وعد وشهر غريب

تحديث:
اخيرا الحمد لله خلص شهر يناير وهل علينا شهر فبراير الجميل شهر لطيف كده وصغير فيه كمان عيد الحب والجمال والحنيه
بس احب اقول لكم ان انا راضيه بقضاء الله وبحمد الله علي كل شئ
وعمري ماتطيرت خالص انا حبيت اسخر من كل الاحزان اللي حصلت لي في شهر يناير
بدل مااكتب بوست حزين والناس مش ناقصه
بس انا فعلا كل يوم من شهر يناير عبر السنين اللي فاتت له عندي ذكري مش لطيفه وبفتكرها مع كل ورقة نتيجه انتزعها
بس السنه دي الاصابات كانت اقل شويه وكمان حصل لي فيه حاجه جميله جداجدا بحمد ربنا عليها ليل نهار وربنا يدمها عليا نعمه
كمان اخيرا ربنا فك اسر محاسن صابر وده شئ اسعدني جدا
واعتقد انها كمان سعيده ربنا يسعدها ويسعد ابنها
وبشكرها انها ذكرتني في البوستين اللي فاتوا
وبقول لها لاشكر علي واجب انا فعلا بحس انها بنتي
وكل سنه وانتم طيبين والسنه الجايه هندخل علي اول فبراير علي طول وده الجديد بتاع السنه الجديده ان شاء الله
---------------------------------------------------------------------------
---------------------------------------------------------------------
بقالي 26 سنه شهر يناير يمثل لي ازمه مابعدها ازمه
في كده بينا وبين بعض تار بايت بايت فين وعند مين مش عارفه
الشهر الغير لطيف ده ماشاء الله مايشرفنيش غير لما علي مايمشي بالسلامه غير مأسوف عليه يكون سايب لي مصبتين تلاته كده علي الماشي وهو كده والا همه وبقلب بارد
يعني انا مش عارفه يجري ايه يعني لما السنه تيجي كده من غيره ونبتدي بفبراير بلاش فبراير مارس واهو بتاع الامهات وتبقا السنه حلوه كده بدعاء الامهات
يعني لو السنه جت من غيره الناس هتعيط ابدا ده حتي التلاميذ والطلبه هيفرحوا جدا ماهم مش هيمتحنوا
طب بلاش السنه تبتدي من غيره عشان مانزعلش اخواته الشهور ولو اني اشك انهم بيحبوه ماهو الاخ الشرير
نعمله 15 يوم ماهو كمان من رخمته عامل نفسه كمان 31 علي ايه يعني اليوم الزياده ده
هذا الشهر اللي مش بيحبني والا انا بحبه رحل فيه اتنين من احب الناس الي قلبي اللي لما رحلوا تركوا لي حزن وفراغ بوسع خرم الاوزون وكان هيرحل التالت لولا ستر ربنا اعاده لي واعاد معه روحي
ماهو مش معقول كل مايشرف يترك لي عاهه
ده غير الحوادث والعمليات والمهاترات
لاياجماعه مش بحبه
واهو هانت قرب يمش باقي من الزمن 4ايام بس عيزاكم تركزوا معايا كده وتشوفوا رخامة الاربع ايام دول وبطئ ساعاتهم زي ماتكون الساعه كسلانه ومش عايزه تمشي
المهم طولت عليكم بس اصلي مش بحبه
زي النهارده ياحبيبي يابابا انت رحلت عن عالمي سبتني كده وانا مزهوله وانا واقفه قدامك والاجهزه الكتير دي مش عارفه اعمل حاجه
همه خرجوني من الغرفه بزعم ان الطبيب يقدر يمارس عمله بس انا كنت عارفه اني مش هشوفك تاني وانك رحلت عني
اصلهم مش فاهمين اننا كان في بينا وصله كده خفيه مخبينها احنا الاتنين ماحدش يعرف عنها حاجه غيرنا
8سنين ياحبيبي عدوا
وبعمل زي ماوعدتك وزي طلبك
بس عايزه اقول لك انت وحشتني
وعايزه اطمنك علي اني كويسه وعمري ماكنت كويسه زي اليومين دول والا فرحانه زي اليومين دول

الف مبروك

الف مبروك يامحاسن(عايزه اطلق)
صبرتي ونلتي
الحمد لله ان ربنا نصرك وعزك

الخراطيم تاني

تحديث

-----خبرهام

الحمد لله فتح مره اخري مطبخ شموسه

اتفضلوا معانا عندنا مسقعه وشوربة عدس

--------------------------------------

خرطوم الماء عند المصريين اصبح ضروره من ضروريات الحياة
نسقي الجنينه بالخرطوم مع ان العالم بيسقي دلوقتي بالتنقيط
نغسل العربيات بالخرطوم مع ان الجردل احسن ده حتي كانوا بيطفوا بيه مجلش الشوري من الطياره يعني برضه له شهرته
ماعلينا
ونغسل سلم العماره بالخرطوم برضه
ده غير الست اللي ساكنه فوقي وخرطوم الماء اللي بتغسل بيه الشبابيك عندها وتدهول الدنيا عندي
ماعلينا
واشهر خراطيم طبعا خراطيم 6 اكتوبر اللي سيحت اعتي الحصون وخلتنا نعبر الضفه التانيه
الخراطيم برضه المره دي عملت بطوله جامده جدا
بس للأسف ماحدش حس بيها عشان غزه طبعا
ايه الحكايه
الحكايه ان القراصنه بتوع الصومال حبوا يستولوا علي سفينة قمح مصريه
فاالقبطان ومعاه البحاره قاوموهم بالخراطيم
وفضلت المعركه بين رشاشات القراصنه وخراطيم المياه بتاعت البحاره الشجعان ساعه ونصف الساعه
حاول خلالها القراصنه وضع السلم وفشلوا وعندما حاولوا ان يلتفوا حول السفينه ليجدوا مكان من غير خراطيم
تصدر لهم مهندس ثالث السفينه بجسده ليعطلهم حتي تأتي الخراطيم
فأمطروه بسيل من الرصاص ولم يتزحزح من مكانه حتي وصلت الخراطيم للمكان الجديد
في وقت المعركه كان المساعد بعث بالاستغاثه فوصلت طياره هيليكوبتر هدد ت القراصنه اللي فروا سريعا
وانتقل مهندس السفينه بالطياره لأسعافه
ورجعت السفينه الي ارض الوطن بسلام بفضل الله وهذا القبطان الشجاع ومهندس السفينه المغوار
ماحدش جاب سيرة الناس دي ليه والا احنا بس نحب نتكلم في السلبيات
سفينه تجاريه لاتحمل سلاح والا حتي مسدس والا حتي ايد هون
بالأمكانيات المتاحه قدرت تغلب القراصنه اللي مدوخين الدنيا
المهم
انا بحي القبطان وبحي المهندس ثالث السفينه وائل سعيد السيد اللي تصدر بحسده للرصاص حتي لايتمكن القراصنه من وضع السلم علي السفينه وبحي بحارة السفينه
------------------------
اسفه اني ماردتش علي تعلقاتكم علي البوست السابق

الحزن

كلمتها في التليفون كالعاده
وجدتها في حالة انهيار تام
نزلت اجري اروح لها لأني ماعرفتش افهم حاجه من صوتها المنتحب
دخلت عليها حجرتها لاقيتها نايمه في السرير محطمه تماما الغرفه ظلام تام
والبكاء سيد الموقف
ايه الموضوع هل انت من كانت ضحكتك تملاء الدنيا ومسارتسائول الجميع
كل اللي فهمته انها اكتشفت كذب من وثقت فيه
يادي الكذب طب ليه الناس تكدب ليه نجرح ونتجرح بالكدب ليه نضحك علي بعض
مع ان الكدب مالوش رجلين
كل اللي قدرت اقوله لها بعد ماسمعت الحكايه الغريبه جدا
احمدي ربك انك اكتشفتي الحقيقه
في ناس بتعيش سنين مخدوعه من غير ماتكتشف الحقيقه
قومي شوفي ايه احلا حاجه بتحبي تعمليها واعمليها
قالت لي ماليش نفس هو كان احلا حاجه بعملها
نزلت من عندها كارهه الكدب وسنينه
ربنا احل الكذب في الخطط العسكريه والصلح بين الناس والازواج وفي حدود الصلح بينهم
ادعوا لها ربنا يبرد قلبها
وربنا يسامح اللي ظلمها ويهديه لما فيه الخير وينور بصيرته ويستغفر ربه
ودي دعوتها هي له لماسمعتها بتدعي له قلتلها يعني ناويه تصلحيه وتغفري له
قالت لا حتي لو روحي في ايده
مش انا اللي بدعي له ده قلبي اللي بيدعيله
لكن هو بالنسبه لي حلم ومات

بناء علي طلب الجمهور

كل سنه وانتم طيبين راسين سنه والعاشر من محرم وعيد الميلاد المجيد
بشكر عمرو بدر وابني فاروق والشقيه ضد التيار(اول اسم كده ماشي)
اللي اهدوني التاج ده وكنت عامله مش واخده بالي بس ضد التيار كتبتني اول اسم
حاضر هجاوب
1-لوكان ينفع تختار عصرتعيش فيه هيبقي انهي؟ومين الحاكم؟
عصر الفراعنه ويكون الحاكم اخناتون
2-اول اولويه في حياتك ؟
الاولويات بتتغير بتغير العمر والمرحله دلوقتي اولوياتي بعد بناتي ومواضعهم القران والصلاه وامي واهلي وحاجات جميله جدت في حياتي
3-ايه اكتر حاجه بتحبها في رمضان؟
غير اللمه لأن الحمد لله احنا علي طول ملمومين
ان بحس الناس كلها حوليه اخلاقهم متغيره مش عارفه ازاي بيكونوا كده كويسين شويه وصلاة التراويح لما ادخل حجرتي واقفل عليا
واصلي من المصحف
بحس ان ده رمضان بتاعي
4-اوصف اجمل فطار ممكن تفطره؟
اجمل فطار ممكن افطره اصبح مستحيل
كان زمان حتي سنة82تتلم العيله كلها في بيت جدي اول يوم وماحدش يقدر مايجيش وجدي كان رجل لطيف وزي مابيقولوا كده ابن نكته وكانت اللمه دي ليها طعم تاني الاعمام والعمات واولادهم قبيله كامله
الي الان احن لهذا الافطار والي جدي وبيت جدي الله يرحمه
5-لو انت حاكم هتكون عادل ؟وهتعرف ازاي؟
مافيش ست بتكون حاكم اصلا
بس علي المستوي الشخصي انا حاكم في اسرتي
والحمد لله عادله جدا عرفت منين عشان عمري ماسمعت انت بتحبي اختي اكتر مني
وعندما تختلف بنت من بناتي مع زوجها احكم بالعدل وهذا اكسبني ثقه من ازواجهم في الحكم مابينهم وساعات جوز بنتي بيهددها اكلم ماما احكي لها تتغاظ وتسكت
6-مين اكتر اعلامي بتحبه؟
زمان كان ايناس جوهر عشان هي عملت طفره في الأداء ولمت الشباب ساعتها حوالين الشرق الاوسط
7-لو ممكن شغلانه تانيه تختار ايه؟
انا بحب الشغلانه اللي انا فيها(ماما)
8-تاني بلد تحب تعيش فيه بعد مصر؟
برضه مصر
بس بحب اسكندريه في الشتا والكورنيش وياسلام لو تمطر والموج يطلع الشارع
9-اوصف ترتيبات اجمل فرح ممكن تحضره
لا ده سر مش هقوله الترتيبات دي لازم تكون سريه
10-بتراعي كلام الناس والقيل والقال؟وليه؟
احنا امرنا اصلا بكده من الحبيب المصطفي وليه نضع نفسنا موضع الشبهات مانمشي صح
11-صحيت من النوم لاموبايل والا كمبيوتروالا كاميرا ديجيتل ورجعنالعصر الاحصنه والحمام الزاجل؟
طيب مااحنا عيشنا من غير موبيل والا كمبيوتر والاكاميرا ديجيتل وكنا كويسين وتمام
بس لو مافيش موبايل هطمني علي حابيبي ازاي
اما موضوع الزاجل والاحصنه ده مش عارفه اهو تغيير
12-السعاده هي ؟
انا شفت السؤال ده قبل كده شفته فين شفته فين
معقول ياجماعه ده سؤال عايز بوست لوحده
بس انا اهو سعيده جدا ربنا يكرم اللي بيسعدني ويخليهم ليا
13-عندك امل واسبابك ؟
علي طول عندي امل في الله واسبابي اني مسلمه مؤمنه بالله وقضائه العادل
14-لما بتحب تهرب من كل حاجه بتروح فين؟
ولو اني مابحبش اهرب من اي حاجه بحب اواجه اي حاجه تعترضني عشان الهروب مابيحلش حاجه بس بعد مابواجه واحل كل حاجه مؤخرا بحب ازور والدي الله يرحمه قبل كده ماكنتش بروح حته
15-بتشرب سجاير والا لا؟ وايه رأيك في الستات والرجاله اللي بيشربوا؟
الحمد لله مابشربش .ربنا يتوب عليهم لااملك لهم الاالدعاء
16-بتعرف ايدك الشمال ازاي؟
زمان قالولي انها اللي مابنأكلش بيها مش عارفه دلوقتي ايه النظام
17-اكتر اله موسيقيه بتحبها ؟
البيانو وبنتي كرهتني في الجيتار عشان الوش اليومي
18-ليه الزوق والنخوه اتعدموا؟
همه مااتعدموش قوي بس اللي اتعدموا عندهم الاتنين دول عشان اصلا مابقاش في تربيه صح
19-ايه الحاجه اللي لو حصلت هتبقي سعيده؟
حاجه بتمناها من ربنا وان شاء الله يحققها لي وبرضه سر ولما يحصل هقولكم
20-تحب ارض زراعيه والا اجنس عربيات والا كام عماره والا فلوس في البنك ؟
مابحبش التملك اصلا
21- تحب؟ البحر ولا النيل؟
بحب النيل جدا صبح ليل اي وقت هادي وساكت ولطيف
وبحب البحر بس مابحبوش بليل
22-مركب ولا طياره؟
مركب بس في النيل
23-شخص مجنون ولا عاقل؟
عاقله وقت مابحب ومجنونه شويه وقت مابحب
24-تقرا كتاب ولا تتفرج على فيلم؟
كتاب
الحمد لله خلاص
عقبال مانتطمن علي غزه عشان نبتدي نحكي علي الحج