الأحد، 30 يونيو 2013

مبارك مرسي رايح جاي :)

السيناريو من ناحيتك زي مبارك
من ناحية الشعب السيناريو اقوي
خالي بقا عندك كرامة وامشي
بس ماتمشيش خاربها
حلها صح بكرامة
ماحدش هينفعك يوم العرض العظيم
الشعب كله في الشارع
في ناس اعرفها نزلت لك 
ماكنتش احلم انهم يقفوا حتي يتفرجوا من البلكونة
المصرين نزلوا يدافعوا عن هوية مصر
كل دول مندسين ومغيبين
اعقل ياطايش وامشي بالذوق
شوف حد من الناس الكويسة يحلها لك
وماتعتمدش علي اللي في رابعة دول غرقوك ياخفيف
اعتمد علي اللي خلقك
الكرسي حلو صحيح 
بس عقاب ربنا هتعمل ايه فيه

السبت، 29 يونيو 2013

توحدووووووووووووا يرحمكم الله

مش عجباني حكاية هتنزلوا مع الفلول دي
مش عجباني خالص حكاية تصنيف المصرين
يعني انتوا بتنظروا لبعض 
بنفس نظرة الاستعلاء اللي بينظرها لنا المتاسلمين
همه مسلمين واحنا كفار مكة
واحنا ثوار والتانين فلول ومش مصرين
في ايه ياشعب مصر
ده عبد الناصر فضل يتعاون مع خبراء العهد البائد 
الي ان استقرت الامور
مابقاش في لا ذكاء سياسي ولا اجتماعي
وخلاص اتفرقنا ومش هنعرف نتوحد تاني
!!
لما اتحدنا مشينا مبارك
وان مااتحدناش مش هنعرف نشيل مرسي
مصر لكل المصرين
وكل اللي عايز ينزل ينزل
دي مصر بتغرق ولازم ننقذها كلنا
واياكم والعنف لتظل ثورتنا نقية سلمية
وبطلوا هبل بلا بتوع مبارك بلا بتوع عكاشة بلا بتوع العسكر
وماتخافوش الجيش مش هيمسكها تاني
دي كانت تجربة والجيش مش هيكررها تاني 
خاااااااااالص
ان شاء الله خير
اللهم احفظ مصر
ان الله غالب علي امره

الخميس، 27 يونيو 2013

مش كده ياريس :)

ياعم الحاج
مش كده 
كل شئ بالهواده الدنيا مش قفش
بزمتك ده خطاب ده
يعني الناس بتغلي ومقضين وقتهم يا في طابور العيش
ياجوه العربيات مستنين البنزين
ولماانت مفتح اوي كده ماقبضتش ليه علي البلطجيه اللي بتسميهم كده بالاسم
 يامدقدق انت
ماقلتش لوزير داخليتك ليه اقبض علي البلطجيه 
اللي اصغر عسكري عندك عارفهم وعارف اماكنهم
وبتاع السكينة ده ماجبتوش ليه وحاكمته
هو ياولاد لسه فيه سكينة في الكهربا
والبنزينات 
مانزلتش ليه مفتشين من البترول والتموين 
يفتشوا
ويشوفوا اللي مشغل مسدسين ومعطل الباقي 
والناس اللي في الطابور اللي عنده نص التانك يروحه
فين الخطاب فين الحلول
طالع تتكلم عن مكرم 
اللي في ناس قاعدين في القاعة حاولوا يقتلوه وفشلوا
هو ايه الخطاب الحلابوظة السكلانس ده
والمضحك بقا اوي موضوع المسيحين
:)))
انت لما بتعوزهم بتطلعهم من تحت المخدة :)
ايه الكلام الكبير ده ياعم
اومال ماهنتهمش ليه بالعيد
ماتلعب غيرها بقا
وايه موضوع افريقيا ده :)) 
تصدق ضحكتني
ده انت رجعت من هنا وتاني يوم حولوا النيل
وكله كوووووووووم 
والسادات الله يرحمه 
كوووووم
ضحكتني كنت هقع من علي الكنبه
السادات اللي القتله بتوعه قاعدين قصادك
كان فاضل تقول السادات عارفينه ده اللي قتلناه قريب من هنا
المدفون بره ده:)
ماعلينا
انا كنت مستنيه منك ايه يعني 
ده انا طيبه
ده خطاب يتقال في الوقت العصيب ده
بقا بدل ماتجيب جردل ميه تدلقه علي النار تطفي
تجيب بنزين من اللي مش لاقينه
وتدلقه اوم تولع الدنيا اكتر
براحتك ياعم
انت كده جبت من الاخر
واللي كان مابين انزل لا ماانزلش
حسم امره ونازلك
كان في ايدك تدخل التاريخ من اوسع ابوابه
 تنادي بأنتخابات مبكره
ولو فعلا واثق من نفسك اوي كده ماانت كان هيعاد انتخابك
وديتنا في داهيه الله ينتقم منك
فرقتنا وخلتنا اضحوكة العالم
ربنا يتسر
عظيمة يامصر
ان الله غالب علي امره 
ادعوا لمصر بعد كل صلاة

الاثنين، 24 يونيو 2013

التدوينة ال500 واجمل كلام

كنت محتارة التدوينة 
ال500 
دي اكتب عن ايه
وسبحان الله لاقيت الكلام ده علي الفيس 
نشراه بنت خالتي استوثقت منها عن صحته
ولاقيته كلام زي الفل
ويبقا التدوينة 
ال500 
كلام يملا الدماغ صحيح
وفي نفس الوقت رد علي من يدعون لقتل الناس وحرمانهم من التوبة 
وكلام يرد علي مدعي الاسلام
 والاسلام منهم براء
واذكرهم ان المسلم من سلم المسلمين من لسانه ويده
ولما نتهدد من كل من هب ودب 
ويتقال هيقتلوا الشعب
ويطلع السيسي يقول ماحدش هيمس شعره من الشعب
اوم اابو سمعين يقول ان دي هرتله
يبقا الشعب كله لازم ينزل ويوريهم اننا مش خايفين
وان المظاهرات سلميه
ومش من مطلق ان مدت يدك لتقتلني
ومصر محروسة
ومش عزبة حد 
ومصر من قديم الزمن لكل المصرين
بجميع توجهاتهم وعقائدهم
لعن الله الفتنه
و
ان الله غالب علي امره
نشوف الكلام بقا كده
قال إمام الدعاة فضيلة الشيخ محمد الشعراوي رحمه الله:

كنت أناقش أحد الشباب المتشددين فسألته: هل تفجير ملهى ليلي في إحدى الدول المسلمة حلال أم حرام ؟
فقال لي : طبعا حلال و قتلهم جائز .
فقلت له : لو أنك قتلتهم و هم يعصون الله ما هو مصيرهم ؟
قال : النار طبعاً ..
فقلت له : الشيطان أين يريد أن يأخذهم ؟
فقال: إلى النّار طبعاً
فقلت له : إذن تشتركون أنتم و الشيطان في نفس الهدف و هو إدخال النّاس إلى النار !
و ذكرت له حديث رسول الله صلى الله عليه و سلم لمّا مرّت جنازة يهودي أخذ الرسول صلى الله عليه و سلم يبكي فقالوا : ما يبكيك يا رسول الله ؟؟
قال : نفس أفلتت منّي إلى النار
فقلت : لاحظ الفرق بينكم و بين رسول الله صلى الله عليه و سلم الذى يسعى لهداية الناس و إنقاذهم من النار
أنتم في واد و الحبيب محمد صلى الله عليه و سلم في واد !!!
رحمك الله ياشيخ شعراوى

السبت، 22 يونيو 2013

عملتها ازاي يامرسي :)

هي بقت كده
ماشاء الله ماشاء الله
بقا ابو الطوارق الزمر القاتل رد السجون
واقف علي منصة قصاد جامع( بيت ربنا)
وعلي بعد امتر 
من المكان اللي قتل فيه هو وجماعته 
الشهيد انور السادات صاحب 6 اكتوبر
واقف الباشا عمال يهدد في المصرين
:)
تصدقوا انا ضحت ضحك
اهو ده اخرته هتبقا زي المماليك :)
بقا هي دي مصر يامرسي
فرقتها انت ومرشدك وجماعتك ازاي كده
فركشتها كده ازاي ينيلك
ربنا هيسألك يوم القيامه انت وعشيرتك 
اللي لمتهم في الاستاد تدعوا علينا
انت فرقت الشعب المصري كده ليه؟
مجمعين الناس البسيطه الغلابه ومركبينهم عربيات نص نقل زي البهايم في الحر ده
علشان ايه  وليه ؟
عايزين تقولوا ايه للناس
خافوا اترعبوا
ده غير الاوتوبيسات بتاعتكم طااااااابور من الاوتوبيسات 
دي بقا للناس متوسطة الحال شوية
اللي عطلتني علشان اوصل المستشفي
 وركنت وكملت مشي مسافه طويله 
بطولها بدعي ربنا يفك ويرفع الغمه
وانت يازمر ياللي عاملي مليونيه لا للعنف
واقف تقول هنسحقهم
هتسحق مين ياكابتن يامسلم يامؤمن
:)
طيب ياسيدي وصلت الرساله الارهابيه
وحصل لنا الرعب
من غشنا فاليس منا
 

الأربعاء، 19 يونيو 2013

ياميش رمضان

كتبته 12 اغسطس 2008
والنهاردة هقوله تاني
 ياميش رمضان
واللي لسه فاضل عليه 19 يوم
المستوردين جابوا دولارات منين علشان يستوردوه
ومين بالصلاة علي النبي اللي هيشتريه 
؟؟

الثلاثاء، 18 يونيو 2013

الو يامرسي الو هل تسمعني :) ؟!

خطاب مرسي يخلي الحجر ينطق
وبماان انا اصلا بنطق قلت افش خلقي هنا
:)

الأحد، 16 يونيو 2013

اهلا اهلا :)

هي حركة الجدعنه اللي عملاها الشرطة دي
اساسها 
اييييييييييييه
؟؟!!
كيد في الاخوان
ولا الشرطة فهمت ووعيت انها من الشعب وللشعب
وانها شرطة جمهورية مصر العربية مش تنزنيا
بجد مش فهماهم!!
وانتوا عارفين انا نظرية المؤامرة عاليه عندي حبتين
يعني مثلا يكون اتفاق غير معلن مع النظام
ماتغلطوش زي 25 يناير
وتتصدوا لهم 
اوم اييييييييييه 
يعندوا ويقعدوا
سيبوهم يطلعوا الكبت الثوري اللي عندهم
واهو يهتفوا ويبعبعوا
ويتهدوا ويروحوا
!!
مش عارفة
في هذا الموضووووووع
انه
وانه كبيرة
او مافيش وعقلوا
طيب مادام عرفتوا ان الله حق
ماتحطوا الكلابوش بقا في ايد 
الظباط اللي اتأمروا علي شباب مصر
وتقدموهم للمحاكمة
ولا دي نقرة ودي نقرة اخري
ماااااااااااااا علينا
مادايم الا وجه الله
هاااااااااااانت
يامسهل
يامعين يارب

الجمعة، 14 يونيو 2013

الحقيقة !!

اللي جاي يقول لي 
ان الاخوان اتسجنوا واتمرمطوا من 1928 لحد النهاردة
زيهم زي اي تيار وطني
هقوله 
نو ياجوني 
نووووووو
الاخوان ايوة تم اعتقالهم واتمسح بيهم بورش السجون
 واتعذبوا بس علشان 
ايييييييييييييه؟؟!!
مش عاشان مصر 
ايوة
علشان الجمااااااااااعة 
فقط
الجماعة ثم الجماعة
وحبايب الجماعة واهل الجماعة والعشيرة
اما باقي المجتمع والناس يولعوا بقا
والدليل 
قالولوا :)
ابو الكباتن صبحي صالح وهو مدشدش علي السرير في المستشفي قال اييييييييييه؟؟
اللهم امتني علي الجماعة
ياراااااااااااااااجل والاسلام هتعمل فيه ايه
؟؟؟؟؟!!!!!!!!
اللهم امتناااااااااا علي الاسلام وريحنا من الجماعة
كماااااااااااان لا يتم تعين الا الاخوان في المناصب المهمه 
بغض النظر عن الكفائات
ومين فينا ماسمعش وزير الاعلام الفاشل 
لما قال ياريت الاقي اخوان اعينهم كلهم
شوفوا مافيش حد كره فيه الناس بالمنظر ده قدهم
حزينة اني كنت بروح انتخبهم 2005 و 2010
بس بحمد ربنا ان الثورة كشفتهم علي حقيقتهم 
همه وامثالهم من تجار الدين
والحمد لله اني لم انتخبهم لا  في مجلس ولا رياسه
وهالو ياريااااسة فاشلة 
مش عارفة لما تقابلوا ربنا 
هتقولوا ايه

الجمعة، 7 يونيو 2013

دعوة ماليش دعوة

استغربت جداااااا 
لخبر علي تويتر 
ان الرئاسة قررت 4 مليار جنيه 
لنشر الدعوةالاسلامية
قلت ايه ده هو احنا سنة كام ؟
وقبل و لا بعد الهجرة ؟
وهل صبأت مصر بأمون يا رجااااااالة
رد علي انسان اشهد له بالمصداقية علي تويتر
 وده نادر طبعا
قال لي لأ نشر الدعوة الاخوانيه
ياحلاااااااااوة
قلت طيب والله كويس ان في 4 مليار اصلا
طيب يعني احنا هنتأخون وبفلوسنا
ده شئ لطيف خاااااااالص
ادينا مستنين الفكر الجديد 
ومش هقول غير
اللهم ارفع غضبك ومقتك عنا
اللهم نجنا من هذا الكرب العظيم
بدل ماتنشر دعوتك
اصرفوا الفلوس دي علي الناس الغلابة 
اللي همه مسلمين بالاسم فقط
مابيعرفوش يصلوا ولا يعلموا اي شئ عن دينهم
علشان كده اي شيخ نص كم بيضحك عليهم باسم الدين
روحوا جاتكم القرف
سوري للناس اللي مش متعودة مني علي الشتيمة
بس طفح الكيل بقا
هو بيشحت علينا ولا بيبعزق علي الدعوة

الخميس، 6 يونيو 2013

شكرا ليكم

الورد ده لزوجة ابراهيم رزق
والتاني لجوجو


طبعا مش هقدر اوصف سعادتي اني قابلتكم
:)
جوجو 
ماشاء الله شخصيا جميييييييييلة 
بنوته مصريه
من كل ماتحمل الكلمة من معاني 
جدعه رقيقة شخصية دمها خفيف 
جداااااااااااااااااا
وتشع في المكان البهجة والحيوية والنشاط
وفوق ده كله
طباخة مااااااااهرة
البشامل والسمبوسك والبوفتيك
 راااااائعين
وعايزة اقولك 
ان الشعب كله اكل منه وسبحان الله فاض كمان
:)
صحيح البركة في اكل الجماعة
وياباخت استاذ نادر بيكي وبالاكل
سعيدة اني اتعرفت عليه جدااااااا
شخصية لطيفة واثق من نفسه
متكلم ربنا يكرمه
بس ماعرفناش برضوا الازهر بارك اتعمل من قد ايه ؟؟؟؟:))
زوجة ابراهيم زوجة هاديه رقيقه زي النسمة
عكس ابراهيم خاااااالص
:))))))
وطبعا كريم نورنا وهاندعيله بالنجاااااااااح
وبقول لأسامة مصر نورت
والف مبروك علي الزواج
وان شاء الله المستقبل يكون افضل وافضل في مصر
 انت شخصية حقيقي افتخر اني اعرفها
وشاب مصر علي حق
وطبعا نجم اليوم وكل يوم
 اللي فاجأة لاقيته اختفي هو وكريم وجميع الاطفال
خطفهم :)
وراحوا يلعبوا في منطقة الاطفال
شكرا يااس
كان وقت لطيف ان شاء الله يتكرر
:)
شكرا ليكم انكم اتحتوا لي ان القاكم

الثلاثاء، 4 يونيو 2013

بقا هي دي مصر ؟!

بقا هي دي مصر 
يامرسي
؟؟!!
بعد الاجتماع السري المذاع علي الهوي
الهزلي مرسي ضيع اللي باقي 
من هيبة مصر
منك لله يابعيد
الاجتماع السري المذاع علي الهوي 
فكرني بموضوع المطار السري
اللي كله كان عارف مكانه 
مجرد ان واحد عرف انه موجود في الحتة دي
اقول فيك ايه بس
هضيعنا في دي كمان
بقا الاجتماع الغريب ده 
هو اللي هتحل بيه موضوع زي ده
نشوف كده لو السادات عايش 
كان عمل ايه
؟
كان طلع وعلي الهوي 
هددهم زي ماعمل زماااااااان
لما قال لهم مش هتموتونا هنا من العطش 
احنا هنيجي نموت عندكم
واحنا بندافع عن حقنا في الحياة
واجتمع اجتماع بحق وحقيق 
وكمان سررررررررري
اه معروف ان في اجتماع لكن قالوا ايه عادوا ايه
كتاتووووومب (اكتر من السر في بير حبتين)
الاجتماع بقا ده كان فيه مين
وزير الحربية (الدفاع) اللي مش عارفه ليه بقت الدفاع يعني مافيش فيها هجوم ولا ايه ؟
قائد سلاح الطيران وقائد الدفاع الجوي
وزير الاعلام
وزير الخارجيه
وزير الري
والاتنين الحلوين المخابرات الحربيه والمخابرات العامه
وطبعا رئيس الوزراء قبلهم
دي الناس اللي هتقول نعمل ايه
ويجتمعوا همه بقا مع الخبراء ويحلو
لكن ابو الكباتن اللي عايز يأجر طيارات 
ده فاهم انه موسم حج 
ومحتاجين كام طيارة تساعد في نقل الحجاج 
هم يبكي وهم يضحك
المهم
المخلوع بقا منه لله قال لهم ساعة عنتيبي
لو بنيتوا هضربه
جميل طيب 
وعبد الناصر كان عمل ايه
كان جابهم وقالهم تعالي ياواد يااثيوبي منك له 
انتوا هتعملوا السدود دي ليه؟
عايزين تنميه هبعتلكم ناس تعمل لكم تنميه 
من غير ماتبنوا السد ده 
وكمان انسوه نووووووهااااائي
وخالينا حبايب احسن
دي سيناريوهات تجمع حقائق وطبائع هؤلاء الرؤساء
اما اللي بيحصل ده اسمه
هوووووووووراااااااااء
وطبعا عايزة اشكر المستثمرين العرب 
اللي هيستثمروا فلوسهم في السدود
وعلي راسهم السعودي والقطري
ربنا يسامحكم بتعملوا ايه مش عارفة
محتاجه يامصر ناس تحبك 
علشان ترجعي تاني 
بهية
منك لله ياللي في بالي