الأحد، 15 سبتمبر 2013

يا وزير التربية والتعليم يا

جميل جدااااا
ان شيخ الازهر يعفي الطلبه من رسوم الدراسة
جميل
وكمان الاجمل ان وزير التربية والتعليم كمان يعفي الطلبه من رسوم التعليم
طيب انتوا اعفتوهم من ملاليم
طيب والالوفااااااات 
هيعملوا فيها ايه ؟؟
الوفات ايه ياشمس
؟؟؟؟؟؟
خد عندك ياسيدي
الزي المدرسي 
شتطة-جزمة-شربات لزوم الجزمة-كوتشي-2بنطلون-2قميص-2بلوفر او جاكيت
دول بكااااااااااااام كلهم
الطالب علي ماينزل من بيتهم الصبح
عايز يفطر وعايز ساندوتش معاه وكمان مصروف
ادوات دراسية
كشاكيل -كراسات -كتب خارجيه-اقلام -مساطر- اساتيك-الوان-وطبعا كالكوليتر
دول بكاااااااااااااااام كمان
؟؟؟
الزغلول الكبير بقا
الدروس الخصوصية
هتعمل فيها اييييييييييييه
هترجع ضمير المدرس ازاي
وخصوصا في الاحياء الشعبية
الووووووووف 
بيدفعها ولي الامر علشان ابنه يفلح ومابيفلحش
والمدرس زي المنشار
ولا ضمير ولا خوف من الله
الله يرحمه بقا القذافي كان مجرم الدروس الخصوصية
واللي بيتقفش بيتسجن
حد يقدر يقول لي ولي الامر ده اللي مرتبه علي القد هيعمل ايه
وهمه لسه بيناقشوا الحد الادني والحد الاكبر للأجر
وان شاء الله هنتكلم فيها دي كمان

السبت، 14 سبتمبر 2013

مساجد الله

عملية غلق المساجد بعد الصلاة
 اللي بقالها سنين رجعت تاني
طيب رجعت ليه؟
مش لما اتحط فيها سلاح
واستخبي فيها خارجين عن القانون
وهو مسجد الفتح الرائع ده
اتبهدل من مين
مش من ناس قعدت فيه وخربته
وهو بيت ربنا بيتعمل فيه كده
وغلق المساجد اللي اقل من 80 متر
ده قرار انا مبسوطه بيه
لييييييييييييييييه
في قانون في مصر بيقول ان اللي بيبني مسجد في عمارته بيعفي من العوائد
هوبااااااااااااااااااا
كله بني مسجد تحت البيت
يعني مش مبني لوجه الله
طيب ايه المشكلة
المشكلة ان ده مسجد في عمارة 
فيها سكان وكل ساكن حر في شقته 
طيب تضمن ان الشقة اللي فوق المسجد دي شقة ناس افاضل ولا شقة استغفر الله العظيم؟؟!!
بلاش كنت بصلي التراويح في مسجد تحت عمارة
واحنا بنصلي كان في حفلة عيد ميلاد في الشقة اللي فوق المسجد علي طول
والدي جي وهابي بيرث تويو بتجلجل فوق دماغنا 
وطبعا تركيز وروحنيات ايه بقا
ومره صليت في مسجد تحت عمارة العشا في الصيف
وكان في خطوبة في شقة في العمارة
وحدث ولا حرج بقا
كمان اغلب المساجد دي لاتخضع لوزارة الاوقاف 
وطبعا بيروج في بعضها لأفكار غريبة 
وصلتنا للي احنا فيه ده وتسمع اغرب خطبة جمعه
وخصوصا في العشوائيات
ده يرضي ربنا

السبت، 7 سبتمبر 2013

ظبوط بدرجة مصطاف

لما سعادة البيه الظابط
يبقا بيصيف ولابس شورت وتي شيرت
ياريت يحط الكتافات علي التي شيرت
او لو حضرته حب يتخانق ويسخف علي حد
يبقا يديه فكره انه ظابط
او تتفضل الوزارتين بمنح الظباط شارة توضع علي صدرهم
مكتوب عليها دونت تاتش ظابط بدرجة مصطااااااااف
:)
هم يضحك وهم يبكي
اتنين بشورت وشبشب وفي مطار
اتخانقوا عادي
الان نص مصر بتتخانق مع نص مصر التاني
عااااااااادي
ايه الجديد
المهم انا حبيت اقولكم بس
قبل ماتتخانقوا اسألوا برضوا من باب الاحتياط
المتخانق ده ظبوطه ولا مش
صباح الحلابوظة
:)

الجمعة، 6 سبتمبر 2013

النسر المهاجر

التدوينة 
راااااااائعة
من اجمل ماتراه العين
ويدخل القلب
من عند النسر المهاجر

ليه كده

كل كلمة قلتوها 
علي منصة رابعة عملتوها 
ليه كده
؟؟
الناس اللي اضررت
ذنبها ايه في خلافاتكم السياسية
يارب احفظ مصر

الأربعاء، 4 سبتمبر 2013

سوريا :(

كده خلاص
امريكا هتضرب سوريا
خلاص هي بقت كده
في كلام ان ايران مش هتسكت 
وهتضرب اسرائيل
وحزب الله مش هيسكت 
هيضرب اسرائيل
وروسيا المتغاظة من امريكا 
من ايام حرب افغانستان 
ومش ناسيه انها هي اللي ساعدة الناس 
اللي بقوا القاعدة بعد كده واخواتها 
ضدها
برضوا مش هتسكت
وفي كلام بيقول 
ايييييييه ؟
ولا حاجة خالص 
ولا اي اندهاش 
ولااي  رد فعل
ايه امريكا ضربت سوريا طاااااااااايب
ماعلينا
امريكا هتضرب سوريا
حسبي الله ونعم الوكيل

الأحد، 1 سبتمبر 2013

مش مبسوطة :(

مش مبسوطة
:(
لييييييييييييه؟
مش موافقه وزعلانة جداااااااااا
ان امريكا بقيادة طفل الشوارع اوباما هتضرب سوريا
والله اعلم سوريا هتبقا عراق تاني ولا لأ
وعلي فكرة لو عايزين فعلا يخلصوا من بشار هيخلصوا منه من غير مايضربوا سوريا
وامريكا ليها سوابق كتير ويامااغتالت ناس وزاحتهم من وشها
وان كنتم نسيتوا اللي جري هاتوا الدفاتر تنقرا
ماعلينا
مش مبسوطة كمان من اللي بيتطاولوا علي الجيش
الجيش المصري عارفين يعني ايه الجيش المصري
وكمان زعلانة من المتعلمين اللي مش قادرين يفرقوا بين المجلس العسكري بقيادة طنطاوي اللي غرقنا
وبين جيش مصر فخر العروبة
مش مبسوطة من المتعلمين اصحابي اللي بيقولوا الخلافة الاسلامية
خلافة ايه مش عارفة
ولما كانوا المسلمين تحت خلافة عملوا ايه خسرنا من اول الاندلس لحد فلسطين
ياريت نفوق
مش مبسوطة من المتعلمين اصحابي اللي بيقولوا ان الخلاف الان بين الاسلام والمش
مش فاهمه ليه وعلشان ايه
الخلاف سياسي ياسادة سياسي بحت
وخلاف بلدي اوي ياحسين
يعني ياريت خلاف شيك 
زعلانة من اللي بيقولوا ان اعتصام رابعة كان سلمي
والاقي منطقة رابعة متدمره
وعلشان ماحدش ينط يقولي يعني انتي مبسوطة بالدم
لأ مش مبسوطة بالدم
بس برضوا مش مبسوطة بالدمار والحريق
وانك تقول لي سلمي واسلامي وتدبحوا وتسلخوا الناس احياء
ومش مبسوطة ان رجالة المنصة يفضلوا يهددوا واللي هددوا بيه عملوه
وبعد كده مايطلعوش رجالة ويتنكروا ويهربوا
ولما يتمسكوا يقولوا ماقلناش يابيه
زعلانه منهم اوي
صدام لما كان بيتحاكم القاضي نده عليه بأسمه مجرد قاله اسمي سيادة الرئيس 
وكان القاضي مرعوب منه اصلا
مش مبسوطة ان الاصحاب بقوا مش اصحاب من كتر الخناق علي تويتر والفيس والحياة
ومش عارفين يختلفوا بحب
زعلانه من سواق الميكروباص الاسكندراني اللي خبطني وانا واقفة ونزل يزعق
وبشكر شباب اسكندرية اللي همه اجدع ناس اللي لقنوه درس وعرفوه انه لما يغلط ويخبط حد 
مش عيب يعتذر مش يبجح وهو غلطان
ويفعل نظرية خدوهم بالصوت قبل ما يغلبوكوا
في حاجات كتير مش بسطاني بس كفاية عليكوا كده