نصيحة علي الماشي كده :(

نصيحة كده علي الماشي

ماتغيرش حد حبيته

:(

اصل انت لما حبيته حبيته كده

لو غيرت في الهارد وير بتاعه مش هيبقا اللي انت حبيته

ممكن تغير شوية في السوفت وير بتاعه

بس يكون هو مستجيب وموافق

وحبة سوفت وير من عندك علي حبت سوفت وير من عند حبيبك

هتمشي

لكن تصمم تطير الوندوز والهارد

يبقا انت كده حبيت حد تالت مش تاني غير الاولاني 

خد حبيبك كده علي بعضه زي ماهو 

ماتحاولش تلعب في الثوابت عنده

ولو حبيتوا بعض وماعرفتوش تتفاهموا ومااتفقتوش 

خااااالص

والثوابت عندك غير الثوابت عنده

يبقا خلاص كده 

ده حب منقوص

مهما كان حب شديد وانجذاب اكبر

لأن الحب تفاهم في ثوب مشاعر

ومشاعر في ثوب تفاهم

وواحدة واحدة مع كل خلاف

الحب ده بيتهز

وواحدة واحدة الحياة بتبقا نكد

وواحدة واحدة 

الخلاااااااااافات 

بتزيد

والحب مابيعرفش يعيش في الحزن والهم

الحب ممكن يواجه الصعاب واعتي المشاكل 

الحبيبين ممكن يواجهوا جبروت العالم لو ضد حبهم

لكن مايقدروش يواجهوا اختلافهم في الثوابت وخصوصا لو مابيعرفوش يتفاهموا مع بعض

مابيعرفوش يعملوا حوار ولا يقدروا يوصلوا لحل وسط

الحب بيهرب منهم

لو لاقيت الحب الحقيقي الصح

اوعي تخليه يهرب منك

وخد حبيبك كده زي ماهو

علشان تعيش سعيد

لأنك لو عملت العكس هتعيش من غيره

صحيح حبه هيبقا في قلبك مونسك

لكن هيبقا برضوا حب منقوص

لأنك بعيد عنه

**

أنغام

الرضا

سألتني بنتي مين اسعد حد في الدنيا؟

قلت لها مافيش حاجة اسمها اسعد حد في الدنيا

!!!

السعادة دي شئ نسبي

يعني ممكن اللي يسعدك النهاردة مايسعدكيش بكره

يعني عشان نسعد طفل صغير 

ممكن نجيب له عجلة يركبها 

هيبقا في قمة السعادة 

لكن لما يكبر ويبقا شاب العجلة مش هتسعده

لو عايزين نسعده نجيب له عربية 

لكن لو استهبلنا وجبناله عجلة هيموت من الغيظ

السعادة سراب بنجري وراه

ومفهوم السعادة واسبابها بتتغير من شخص للتاني

ومن وقت للتاني

ممكن تبتدي يوم سعيدة وفرحانه

ويجي حد بن حلال ينكد عليكي عيشتك

ويقلب يوم جحيم

وممكن يكون عندك حلم 

ومن اسباب سعادتك انه اقرب يتحقق

واصبح بين ايديكي

سعيدة وانتي بتستنيه

 وسعيدة وانتي بتحاولي تحققيه 

وسعيدة لما يبقا امر واقع

لكن ممكن تبقي سعيدة وانتي مستنيه وسعيدة وانت شافيه انه ابتدي يتحقق

لكن ممكن لما في اخر لحظة مايتحققش 

تبقي اتعس واحدة في العالم

وممكن ان يكون ده الخير كله 

وان ربنا عمل لك خير انه ماتحققش 

لكن بعقلك البشري انتي زعلانه وتعيسة

لكن لو رضينا بقضاء الله وماقسمه الله لنا 

هتبقا دي السعادة كلها

لولا الحزن ماكانت السعادة

صحيح مابيجتمعوش مع بعض

لكن الرضا قادر علي تجميعهم

ودايما قولي اللهم لااسال رد القضاء ولكن اسألك اللطف فيه

كمان السعادة لازم تكون نابعه من جواكي

ماتخليش سعادتك علي حد

لأن الحد ده لو خزلك

هتنقلب السعادة هم وحزن

***

ان صبرتم اجرتم وامر الله نافذ

 وان ماصبرتم مااجرتم وامر الله نافذ 

سبحانك رضينا بقضائك

***

الظلام

“كلُّ شيء صار مرًّا في فمي 

 بعدما أصبحتُ بالدنيا عليما
آه من يأخذُ عمري كلَّه 

 ويعيدْ الطفلَ والجهلَ القديما!” 

(( ابراهيم ناجي ))

كل سنة وانتوا طيبين

كل سنة وانتوا طيبين 

ومصر بخير

ونرجع مصر ومصرين

وبس

فكروني

تعبنا سياسة :) ولو ان الحب ده اصعب من السياسة :)