الحياة

لما بدور علي

الناس الجميلة اللي بتغيب عن عالمنا 

وبنقول لما نذكرهم الله يرحمهم

وبفتكر كانوا ازاي وعملوا ايه 

وجاهدوا و قاوحوا في الحياة وهي كمان قاوحت فيهم

 بقول ايه ده الدنيا دي عبث 

و كل اللي بنعمله ده عبث 

بس برضوا بلاقي اننا بنعمل زيهم 

ما احنا ترس صغير متربطت مع باقي التروس 

علشان نشغل الترس الكبير 

(الحياة)

البرنامج 2

الابن العزيز سواح في ملك اللــــــــــــــــــه

كتب تعليق علي التدوينة السابقة

ده

((كلام كويس بس حتي الآميين بيبقي ليهم حد ادني من الطموحات يجب علي من يتولي امرهم تحقيقها وهو ده البرنامج الانتخابي لآي رئيس تلبية طموحات شعب يطمح في ان يعيش))
*******

وده ردي عليه

وهو حد قال انهم ماعندهمش طموحات

؟

 دول اكتر ناس عندهم طموحات مشروعة جميلة
واهمها 

(( الستر والصحة ))
احنا بقا عايزين رئيس يجيب الاتنين دول
الستر يعني الناس تقدر تاكل اكل حلال كويس 

وتشرب مايه نضيفة مش ملوثة 

وتسكن في بيت ادمي مش عشه 

ولا يهدر كرامتها
والصحة ان المريض يلاقي مكان يتعالج فيه صح وبأدميه وعياله يطلعوا في بيئة صحية ادمية
هي دي طموح الانسان الامي في بلدي
بس هو مش هيعرف يقرا الكلام ده 

ولا عايز يقراه

هو عايز يسمعه يحسه يلمسه يعيشه
واي حد هيعمله له هيشيله علي الاكتاف والراس
الناس مش عايزة برنامج مايفهموهش 

وكلام مايقدر عليه الا بتوع السياسة
الناس حبت عبد الناصر علشان اداهم احلامهم

 خلاها حقيقة

ونقول خير ربنا يستر

البرنامج

بيقولك ايييييييييييه

هننتخب السيسي ازاي

مش نعرف ايه البرنامج الانتخابي بتاعه الاول

ضحك مني هستيري

ليييييييييه

؟؟؟

بمااني عاصرت خمس رؤساء جمهورية

في عين العدو

جمال عبد الناصر

انور السادات

حسني مبارك

فاصل كوميدي

عدلي منصور

ماشوفتش ان اي حد فيهم 

جه علي برنامج الانتخابي ده

دول كلهم تبع برنامج 

اخترنا لك

الا فاصل كوميدي المسمي مرسي

ده جه اثر برنامج خلف القضبان

المسمي النهضة

واتحدي ان يكون قراه 

اكتر من 100 

شخص من اللي راحوا انتخبوه

ياجدعان ده احنا بلد امي

لا ماتفهموش غلط

مش والدتي 

لا

بلد نمره واحد في الامية

قال برنامج انتخابي قال

ياشيخ روحوا كده ولا كده

:))ضحك ضحك صحيح

بقالي كتير ماضحكتش

كده

:)

مش ممكن احنا المصرين

مالناش حل

بندوس علي الالم بالضحك

:)

والجدير بالذكر

ان كل صفحات الاخوان

اعلنت ان مرسي راجع النهاردة

ومارجعش

:)

25 يناير

النهاردة

25 يناير

يامهون يناير قرب يخلص اهو

ماعلينا

امبارح صدعت وزغللت واحوليت

وانا علي غير العادة من مدة

بقلب القنوات وبجري ورا المحللين السياسين

والامنين

لحد ماهوووووبا

شوفت الفديو بتاع المتحف

اللي طبعا اكيد مدير امن القاهرة

هيموووووووت

انه اتسرب

واتفرج ياسلام

علي تامين مديرية الامن

عربية بيضا شبه عربيات المباحث

تيجي تركن بهدوء وشجاعة امام المديرية

في نفس موعد تغيير النابطشية

وينزل منها ارهابي بهدوء وثبات وهو بيطلع لنا لسانه

وتيجي عربية تانية

في ثانية تاخده خده ربنا

اوم اييييييه

عسكري الحراسة مايلاقيش العربية دخلت ولا نزل منها حد

يروح يبص عليها

ولما يلاقيها فاضيه يروح يبلغ

المهم الموضوع اخد 3 دقائق بالظبطت

ياناس العربية دي مشيت في القاهرة ازاي

واحنا بنتكلم يوم جمعة الساعة ست الصبح

يعني الدنيا فاضية

نجاح العملية دي في تحرك العربية اصلا

كده كده اكتشفوا مااكتشفوش

هي هتنفجر

العملية دي علشان تفشل يبقا من المنبع

لكن مادام اتحركت خلاص

في خسائر في خسائر

ربنا يستر

فوتكم بعافية

امي

امي ربنا يديه الصحة

اقترحت اقتراح وجيه

انهم يجيبوا شبكه كبييييييرة

زي اللي بيصطادوا بيها الوحوش في الغابة

 ويخلوا مظاهرة الاخوان ماشيه 

ويصطادوهم بيها وفين يوجعك 

اه وربنا

ولما سالتني ايه راي

قلت لها

ميه ميه 

في ايييييييييييييييه ؟؟؟!!!!

في

ايييييييييييييييييه

؟؟؟

!!!

هو ده بقا الجهاد

انتوا كده بقا رجالة

لما تقتلوا

الناس الغلابة

وكمان شبابكم علي النت 

فرحانين اوي بالدم

حسبي الله ونعم الوكيل

بس احسن رد عليكم

الناس اللي نزلت الشوارع 

تقول لكم احنا مش خايفين منكم

لو رجاله اطلعوا وجها لوجه

السيسي

مساااااااااااااااء الخير

بما ان الدنيا بقت هيصة

والزمباليطة في الصالون

انا بقا لو من السيسي

لازمن ولابد اترشح

ليييييييييييييييه

؟

انا كده كده هتعزل واقعد في بيتنا

!!

ليييييييييييييييه

؟

لو مااترشحش 

اول رئيس جمهورية اول ما يدخل القصر

هووووووبااااا

هيشيله

وماحدش يقول لي الدستور ونبي

علشان دي حاجات رفيعة اوي في الوطن العربي

هيشيله ليه

اهيييييي

ده حتي العقل زينة

حد هيقبل ان وزير دفاعه يبقا حبيب الملاين

اومال هو هيعمل ايه بقا ان شاء الله

هيبقا حبيب مين

لو اترشح كده كده هيتعمله اي حاجة يمشي

نقوا بقا 

عندنا معزول ومخلوع ومافيش مانع يبقا في مفصول

طيب بزمتكم بقا

لو انتوا مكانه

اقعد في البيت وانا رئيس سابق

ولا وزير سابق

:)

واحنا ماشاء الله علينا

عندنا اتنين رؤساء مشرفين في السجن

:)

انا شخصيا هنتخبه

اه

هو انا شايفه غيره

:)

اه يابلد 

فوتكم بعافية

الحلابوظة رجعت

هو في ايه

الثوار ماطلعوش ثوار

والثورة ماطلعتش ثورة

والتسريبات شغالة

والمخابرات شغالة

والامن الوطني شغال

وشخصيات كانت عامله ثورجيه

ماطلعوش ثورجية

واعلامين طلعوا تجار 

وتيارات اسلامية

ماطلعوش لا تيارات ولا اسلامية

طلعوا سياسيه 

عملوا طيبين ولما اتزنقوا

قلبوا علي خط الصعيد

والشعب طلع طيب اوي ياخال

والاندهاش بقا سيد الموقف

والطلبة ماطلعوش طلبه

ايوة

لما الطالب اللي بيتعلم باابو بلاش

يروح يكسر جامعته يبقا

طالب

لا طبعا

يبقا زي المغول ضد العلم

طيب هو انا انا

ولا انت انت

طيب هو في ايه في البلد

كل حاجة اتلخبطت ليه

احنا في زمن الحلابوظة

ونرجع نتفرج تاني

ويخربيت الانفلونزا علي الحساسية

تمر حنة

اغنية عبقرية

فايزة صوت يتاقل بالالماظ

***

بس برضوا اكلت علقة من تحيا كاريوكا

وفي سوريا بلدها

:)

اصل فايزة اللي متزوجه من مصري

ومعاها الجنسية المصرية

لسنت بس تلسين علي مصر والمصرين

الله يرحم الجميع

نعم نعم :)

من زمااااااااااااااااااان

كل ماانزل الانتخابات 

النتيجة تيجي عكس اللي انا قلته

:)

حتي بعد الثورة

نزلت اول استفتاء قلت

 لا

جت بنعم

ماقلتش نعم خاااااالص

في اي حاجة

ولا انتخبت اي اخواني

ولما صفصفت علي شفيق ومرسي 

رحت وقلت برضوا لا

ايوة كتبت لا

لا ده ولا ده

اسخم من سيدي ستي 

:)

والنهاردة قلت 

نعم

اما نشوف بقا النتيجة هتبقا ايه

سامعه حد بيقول ده كلام ياشمس

:)

ياسيدي معلش

:) 

اصلا انا ماكنتش هنزل اصلا

الانفلونزا قتلاني

بس اخدت انذااااااااااار

شديد اللهجة

من والدتي

وامرتني انزل ومااحرمش نفسي من العرس ده

ياستي البركة في الناس الكتير دي

قالت لي لو مانزلتيش هزعل منك بجد

طبعا انتوا فاكرين من زمان

الحاجة حزب وطني اي فلول رسمي

:)

وبالوالدين احسانا

ولا تقل لهما اف

نزلت وقلت نعم

وشوفت الهيصة والزمبليطة 

بجد ايه ده

اللي نزلوا نزلوا يحتفلوا

ويكيدوا العزال

:)

شعب كياد صحيح

النهاردة مصر كانت عامله كرنفال

:)

غلبتوا البرازيل

:)

الغريب الناس كانت نازلة للسيسي

كل استفتاء وانتوا طيبين

صباح الايافة والنضافة :)

صباااااااااااح الخير

يامصر

ماشاء الله الدنيا زي الفل

لحد دلوقتي

وماشاء الله

كل المشاهد المنقولة سواء من القاهرة او المحافظات

الملااااااااااحظ

اييييييييييه

؟

المدارس نظيفة زي الفل

وحوالين المدارس زي الفلين

الجيش نضف المدارس وحواليها

لما اتقالي لي ده

قلت ده اي كلام وخلاص

عفاااااارم عفااااارم

يارب عقبال ما باقي البلد تنضف

ربنا يعدي اليوم ده علي خير

*****

احلي حاجة في الفيلم بتاع سندرا

حاجتين

اغنية الشينجل نو هو

ومحمد طه

ده غير الانسان المصري البسيط

وفصاحته

:)

كل استفتاء وانتوا بخير

وصباح الخير يامصر

ربنا لما يجب يهدي عبد من عبيده

جه حبيبي وخد بايدي 

قلت له امرك ياسيدي ... 

جه وعرفني طريقي وسكتي 

وفي هداه وفي نوره مشيت خطوتي ... 

وفي حماه هلت بشاير فرحتي 

والامان فرد الجناح علي دنيتي .. 

قلت ياشموع الامل حواليا قيدي ...

جه حبيبي وخد بايدي 

قلت له امرك ياسيدي .

( اللهم صل وسلم وبارك عليك ياحبيبي يارسول الله )

كل سنة والانسانية بخير

وربنا يرفع عن الامه الغمه

كده رضا

كده رضا كده رضا

يامظلومين

ونقول رضا

يامجروحين ونقول قضي

ومابين تهتنا في الحياة

ومابين املنا في النجاة نصرخ بالف اه واه 

اه اه اه

يرجع جواب الصوت صداه

كده رضا كده رضا

ودوري يادنيا دوري

ويانفسي ياساكنة 

ثوري

وياروحي يالا عدي سوري

 وطيري يالا في الفضا

عيد الميلاد المجيد

كل سنة وكلنا طيبين

بمناسبة عيد الميلاد المجيد

مش عارفة 

حاسة كده ان سنة 2014 هتكون حلوة

ولو انها ابتدت معايا من اول يوم

 بداية مش حلوة 

ابدااااااا

بس متفائلة اوي مش عارفة ليه 

وبامارة ايه

بس املي في الله كبير

 وان شاء الله خير

وكلها كام يوم 

ويجي المولد النبوي الشريف

واهو يناير كله اعياد

ونقول 

ياااااااااااارب

طمن قلوبنا

2013

صباح الخير عليكم

اخيرااااااا

خلصت

كل سنة نقول الكلمتين دول

مع اختلاف الارقام

هي الحياة كده يوم مر نبتهل الي الله يرفع الغمه

ويوم حلو نحمد الله علي النعمة

صحيح 2013 كانت

مزوداها حبتين

بس اهي مشيت

مافيش حاجة بتستني

كله ماشي

كله بيعدي

و

ان شاء الله

تبقا اجمل واحلي

وادينا دااااااخلين برجلنا اليمين

علي يناااااااااااير

يجعل كلامنا خفيف عليه

ويعدي بسلام

نقول ياااااارب

اهلا بيكي

ويالا كل واحد ياخد هدية السنة الجديدة 

:)