العيال بتوع التحرير والحلابوظا

وماحدش يسألني يعني ايه الحلابوظا
اصلها ماتتشرحش يعني ناس في البلالة
وماحدش يسألني يعني ايه بلالة
اهي حاجة هلامية كده مالهاش معالم ولا لون ولا ريحة ولا اي حاجة
حاجة حلابوظة كده
المهم نرجع للعيال بتوع التحرير
اللي خربوا البلد
وقفلوا ميدان التحرير وعطلوا العجلة
مع ان ميدان التحرير ده اتقفل اكتر من مره
مره 77 ومرة لما كانوا بيعملوا متروا الانفاق
وماحدش جاب سيرة العجلة
ومصر الجديدة نصها مغلق بسبب اعمال المترو
والدنيا اخر زهق وماحدش جاب سيرة العجلة
وهنا بقا عايزة اسأل
دلوقتي بقوا العيال بتوع التحرير خلاص
بقوا وحشين وكخة
بعد ماطلع علي حسهم اللي ماكناش بنسمع لهم حس
ولانعرف لهم وجود اصلا
وكله ركب الموجة ولحقله حته من التورته
دلوقتي بقوا هيخربوها بعد مااتسحلوا واتسجنوا
وضاع نور عينيهم
علشان الحرية والكرامة والعدالة
دلوقتي بتخدوهم منهم
لما اترستأتوا وبقا لكم وجود بتدوروا الدفة عليهم وتقوموا الناس عليهم
وبقوا من اول اعمال منافية .......حتي التمويل الخارجي وكمان يتسموا
وكأن المصري مش مصدق ان في مصري تاني عنده دم وممكن يثور للكرامة والحرية
لازم يبقا قابض
الاول اتفرجتوا عليهم ومن بعيد لبعيد
اهو لو نجحوا نبقا كنا معاهم ولو فشلوا واحنا مالنا
ولما نجحوا فضلتوا تتمسحوا فيهم وتزيحوهم شوية بشوية
لحد ماتمكنتم
زحتوهم خالص طلعوا مابيتزاحوش
قلتوا بس الخطة القديمة شوه ياجدع علي قد ماتقدر
ودس في وسطهم شوية مشبوهين يتحسبوا عليهم
الحملة الاعلامية ضد العيال بتوع التحرير واضحة ومعروفة المعالم
ياريت تلعبوا غيرها
علشان العيال بتوع التحرير دول(شباب وبنات) ارجل من اي راجل في مجلسكم الموقر
والعيال بتوع التحرير دول ايمانهم بالقضية احسن من اي تيار طلع لنا في المقدر والمكتوب
علشان همه بيعملوا لمصر
وانتوا بتعملوا لأهداف خاصة
وكلمة بقولها ومش هبطلها
الشعب المصري مش هيضحك عليه تااااااااااااااااااني
------
سؤال في السريع
هو حملة اشتري المصري دي فعلا هنشتري المصري ولا هنلاقي اللي بنشتريه صيني؟؟؟
-------
بعتذر عن عدم الرد علي التعليقات لضيق الوقت وهرد في اقرب فرصة ان شاء الله

شكل للبيع مرشحكم :)

يااهالي الدائرة الاولي
محافظة الجيزة
لينا مرشح عندكم
حاتم عبد الفتاح
صاحب مدونة شكل للبيع
علي قائمة حزب الوسط
ربنا يوفقك ياحاتم ويبقا لينا مدون تحت قبة البرلمان
ومش هوصيك بقا تتوسط لنا عند بلوجر
يشيل الشكل الجديد اللي فرضوه علينا ده
ربنا معاك

فتش عن المرأة

كنت المفروض اكتب عن اللي حصل واللي شوفته يوم الجمعة
في ميدان التحرير
وكمان في اعتصام مجلس الوزراء
(هنأجله البوست الجاي)
لكن حبيت احيي الصحفية والسياسية الجميلة
توكل كرمان
واقول ان نوبل تشرفت بها
وليس العكس
وعايزة اقول ان كل امرأة عربية هي توكل كرمان
ومثلهم الاعلي هذه القصة
اللي الرسول الكريم تركها لنا عبرة وعظة لكل مسلم ومسلمة
اهديها للمتشددين اللي عايزين يعملوا دين علي مزاجهم
متجاهلين الاسوة الحسنة
----------
((عندما هاجر الرسول الكريم من مكة الي المدينة لم يطلع احد علي سره
الا الصفوة من اصحابه ممن سيشتركون في الخطة
ترك سيدنا علي في فراشه
وخرج ومعه صديقه الصدوق ابو بكر الصديق
وكان لابد ان يأتي احد لهم بالاخبار والطعام
علي بعد كبييييييير من مكة
واللي راح العمرة او الحج عارف قد ايه موحش هذا الطريق
الان بعد كل التقدم والانفاق والكباري والحياة المدنية
فاكيف كان ايام الرسول
سؤل سألته لنفسي لما كنت في الحج هذا العام
المهم
هذه المهمة الخطيرة
ان يحمل احد الاخبار والطعام للرسول الكريم وصديقه ابو بكر
لمن ستسند هذه المهمة
؟
فيضرب لنا الرسول اروع مثل لمشاركة المرأة المسلمة وعدم تهميشها
اسماء بنت ابي بكر
اولم يكن هناك من الرجال من يقوم بهذه المهمة من شباب المسلمين
لكن الرسول الكريم الذي لم يكن ينطق عن الهوي
اختار بعلم ربه
لهذه المهمة المحفوفة بالاخطار هذه الصحابية الجميلة
وقد قامت بالمهمة علي خير وجه
وفي روايات انها كانت حامل اثناء هذه المهمة
-----
الا تكفي هذه القصة لأسكات من يقول ويتقول علي الاسلام
في حق المرأة
لقد حرر الاسلام المرأة واعاد لها حقوقها
التي سلبت منها من مجتمع الجاهلية
-------
ربنا يهديكم يارب
------
وعلي فكرة في مدينة الحجاج
وزع علينا شريط كاسيت مكتوب عليه تحرير المرأة
وده هبقا اعمل عليه بوست
ان شاء الله لما اخلص الاشغال الشاقة اللي انا فيها اليومين دول
:))
ونقول مبروك لنوبل توكل كرمان
-------
حاجة علي جنب: مقصرة مع الجميع بس بجد
مشغوووووووووولة
جدااااااااااااااااا

كيمو في المصيدة :))

خبر الموسم وكل موسم
كيمو(صوت من مصر)
هيتجوز ياميييييينز
الف الف الف مبروك والله يعينها ويقويها
وبما اني مامته التانيه
فوضني اعزم اهل بلوجر الكرام
والحفلة في مركز شباب سرايا القبة يوم 25 ديسمبر
وعقبال الجميع
واسمع زغروته
علشان هنخلص من كيمو عقبال ازهري يارب
:))

الكزروللا:)

اليومين اللي فاتوا كنت مشغوووووووووولة
جدااااااا
الحمد لله كنت بخلص من بنتي نمرة 2
والحمد لله وماشاء الله ولاقوة الا بالله
الفرح تم علي خير
بس عايزة اقولكم
ان مافيش حد بيمشي كله بيرجع تاني
وبدل فرد بيبقا اتنين وبعدين تلاته
:)))))
المهم لمافضيت امبارح قلت اشوف ايه اخر الاخبار
فتحت التليفزيون
علي قناة سي بي سي بتاعة ابو العينين
لاقيت بيعرضوا غلق الصناديق بالشمع الاحمر
وفنجلت عينيه من هول ما كان علي الشاشة
وكله كوووووم
والكزرولا القديمة المصدية اللي كانت علي باجور مولع كوم
ايوة
فراش المدرسة ماسكها من ايدها وحاطتها علي النار
وجواها الشمع الاحمر
وبعد كده بقا يصبه لسيادة العقيد علشان يشمعوا
يقفلوا الصناديق
وبعد كده القاضي يختم علي الشمع
وحمل ياجدع الصندوق وحطه علي جنب
واللي بعده واللي بعده
صناديق انتخابات تتشمع كده
!!!!!
وده منظر تتناقله وكالات الانباء
المحلية والغير محلية وبلاد تركب الافيال
ماعنديش تعليق
غير اني بعد مااستوعبت المنظر قعدت اضحك ضحك كالبكاء
ولاتعليق عندي
----
حته علي جنب ::
هي الناس نزلت علشان خايفة من ال500 جنيه غرامة
ولا فعلا عايزين ينتخبوا
ولما كده و 52 % حضور
اومال زمان كان ايه؟؟؟

يوم تاريخي بالنسبة لي

المفروض اكتب عن اللي بيحصل
او عن الانتخابات او عن الحج
بس انا هكتب عن يوم بالنسبة لي تاريخي
احب اسجله هنا في مدونتي
النهاردة اتميت رسالتي التعليمية
ايوة
بحفلة تخرج ابنتي الصغري
وانهي مشواري مع التعليم والحمد لله
الاهم واللي جاية احكي عنه غير فرحتي طبعا وشعوري ان مشواري انتهي
مشوار طوييييييييييل
والحمد لله خلص علي خير واجمل مما كنت احب
ربنا راضاني في بناتي والحمد لله
ايه هو الاهم؟
الحفل
حفل الجامعة العربية المفتوحة
وهي جامعة نظامية مش تعليم مفتوح
بس اسمها كده علشان لها 7 فروع
في الوطن العربي والاصل في انجلترا
ومن حق الطالب يتنقل بينهم يعني اللي اخد اولي من مصر
ممكن يروح يكمل في الكويت او عمان او الاردن الخ
الجميل في الحفل
ان الجامعة بها طلاب عرب من الاقطار العربية
قامت فتاة من العراق قالت كلمة
ومن ضمن الكلمة العرفان للجامعة ومصر ودعت لمصر والعراق
وقام طالب مصري من ضمن كلمته تحية شهداء الثورة ودعا لمصر وثورتها
من ضمن الطلبة اتنين رجلهم مكسورة في التحرير

بعد توزيع الشهادات واعلان التخرج
والصويت والزغاريد والتصفير والضحك والبكاء
الطلبة نفسهم احيوا الحفل
مجموعة من الطلبة الشباب العراقيين
قدموا دبكة عراقية جميلة وكانت لوحة مبهرة
وطالب مصري قلد الفنانين والمغنين وبجد موهوب
اتنين شباب ماعرفتش من اي قطر عربي
علشان غنوا بالمصري بس اللكنة واضحة
وكان بيردوا علي بعض بطريقة لطيفة وصوتهم بجد رائع

الطلبه والطالبات كانوا اجمل لوحة
ماتقدرش تعرف مين من الكويت مين من مصر مين من لبنان
ماتقدرش تعرف

من الحاجات اللطيفة في الحفل
ان بنتي كانت جنبها طالبة لها وضع خاص جدا
دخلوا كي جي مع بعض
وبرضوا بيتخرجوا مع بعض
مؤبد يعني والاتنين شبه بعض

من الحاجات المش لطيفة في الحفل
وجود احمد زكي بدر اللي لما اترحب بيه في الميكروفون ماحدش صقف اصلا
وبعدها بدقائق غادر الحفل مقموص شكله اصل في ناس قالت ييييييييي

الحفل خلص زي العمر اللي بيخلص
والحمد لله بشطب اهو علي ادواري
عقبال الجميع اللي ماتخرجش يتخرج
واللي ولاده لسه ماتخرجوش يتخرجوا
:)

كل سنة وانتم طيبين

كل سنة وانتم طيبين ومصر بخير وسلامة

عايزة ارغي معاكم كتيييييييييير
بس بجد تعبانة جداااااااااااا

حبيت بس اهنيكم براس السنة الهجرية
وان شاء الله السنة الجاية تكون اجمل وكله يبقا زي مانحب

ومصرنا الغالية تبقا اجمل

وماتخافوش مبارك دي لزوم اللغة العربية
وبعدين ماطلعش مبارك طلع سيد
:))