ان شاء الله

ان شاء الله هسافر الفجر
ادعولي
بشكر كل من هناني
وان شاء الله هدعيلكم كلكم و لأهل العراق وغزه ولكل مسلم عنده مشكله او ظلم
بشكر المدونين الجدد اللي دخلوا عندي لأول مره وان شاء الله لما ارجع هزورهم في مدونتهم
وان شاء الله ضد التيار هتطمنكم عليا في مدونتها وهكون علي اتصال بيها
اللي يحب يعرف اخباري هيكون من مدونة ضد التيارhttp://upstream2.blogspot.com/
اشوف وشكم بخير
وعقبالكم كلكم
ومطبخ شموسه (المدونه الجديده) امانه في رقابتكم اوعوا تنسوا صينية الرقاق اللي في الفرن
طلعوها في العيد
كل سنه وانتم طيبين

هديه

احوال الهوي الله يبارك فيه اهداني هديه جميله
ياريت كلكم تشوفوها
جميله جدا
والهديه عنده في مدونته
وانا بشكره عليها

اللهم لك الحمد والشكر

الحمدلله
اخيراااااااااااااااااااااااااااااااااااااا
ان شاء الله هسافر الحج
ربنا كرمني ياجماعه وهسافر الحج
حد عايز حاجه من هناك يقول بسرعه عشان مسافره الاسبوع الجاي
ان شاء الله هدعيلكم كلكم
انا فرحانه قوي

من صفر الموووووووووووونديال لبكين

امس كان اليوم الرياضي بتاع تنظيف البيت
عندي شغاله مثقفه شويه
سألتني الا ياباش مهندسه ايه موضوع اوباما ده
قلتلها قلت لك 100 مره ماتقوليش ياباشمهندسه انا نسيت الموضوع ده من زمان
المهم مش ده موضوعنا
انها تسألني عن اوبامااااااااااوووووو اوو
افتكرت الحوار اللي كان حصل بيني وبينها ايام الصين وماكنتش نشرته
قلت خلاص افرجي عنه بقه عشان اقدر اكتب لكم موضوعها مع اوباما

**ام محمد الشغاله اللي عندي عزيزه عليه واحب ان اتحاور معها لآني بصراحه بسمع كلام البسطاء الجميل وهي زوجه لبواب مما يجعلها نبض الشارع كله

قلتلها:تعرفي ايه عن بكين ياام محمد

قالت:اهه ده البط يامدام ايوه البط البكيني وكمان مره غسلت عند واحده من الناس اللي باروحلهم حاجات كده قال ايه طلعت

مايوه يكيني زي البط يعني

قلتلها:بكين دي بلد في الصين بلد الصينيين انا قلت كده ودي راحت نازل دعا علي الصين واللي بيجي منها واللي فيها واللي جابوها

سألتها في ايه انت اتجننتي دي عامله كده زي امريكا

قالت بس امريكا ماكانوش هيخربوا بيتي لكن الصين كانوا هيخربوا بيتي

قلت: ازاي ده انت مستهدفه من الصيين بقه

فالت:دول بيجوا العماره وقصيرين قوي كده وشايلين علي قلبهم شنط اتقل منهم عاملين زي النمله اللي شايله حملها

والعجيب انهم ينزلوا باييعين اد كده يخوشوا كل بيت وفي مره الساكنه الجديده عملت عمايلها قال ايه ماندخلهمش العماره

وقالت كلام مافهمنهوش تخريب ابصر ايه بيخربوا اقتصاد البلد
ايه اقتصاد دي ماتكلمنا بالعربي
اللي يخصني العركه كبرت وجوزها حلف مااحنا قاعدين في العماره لولا الحج اللي في الخامس الله يستره كنا اتطردنا يبقوا كانوا هيخربوا بيتي والا لآ

قلتلها:ايوه همه مش هيخربوا بيتك انت وبس دول هيخربوا البلد والعالم

قالت: ايه همه بيروحوا عند بوابين العالم برضه

قلتلها: ماتشغليش بالك

ايه رئيكم

الصين جايه زي هراس جاي بتاعت زمان

الصين اخدت 51ميداليه ذهبيه امريكا 36

الصين دخلت كل بيت

كل شئ بقه مستورد من الصين

عملوا افتتاح الدوره مبهر بكل المقاييس تكنولوجيا علي اعلا مستوي

واستعرضوا عددهم في الآعداد الكبيره اللي كانت في العرض

واستعرضوا حضارتهم القديمه

يعني احنا قوه اقتصاديه علم تكنولوجيا فن وحضاره يعني جدر جامد مش بلد لسه طالع في المقدر ماباقلوش 250سنه

والكلام هنا موجه للآمريكا

يعني هنكون اسياد العالم رسمي

والخطه ماشيه جمييييييييييييله جدا

خليينا احنا نتفرج لاتخطيط والا علم والا تكنولوجيا والشباب امل المستقبل عطلان

الصين حوالي مليار ونص وبيعملوا ايه

احنا صرفنا ادايه علي البعثه الموقره

انا مستنيه التحقيق عشان اعرف اتكلم

دي فضيحه

لوالاموال اللي بتتصرف علي الدوري الفاشل اتصرفت علي الاطفال الموهوبين وعملنا لهم اعداد جيد

يمكن نقدر نوصل في يوم

التخطيط هو الحل مع الضمير مع حب البلد دي

اوبامااااا اوبماااااا اوو اووووو

هو في ايه؟
هي موضه اسمها اوباما كل ماافتح جرنال اوبامااو مجله اوبامااو تليفزيون اوباما
تلاجه اوباما حنفيه اوباما
مدونه اهو اوباما
خلاص عرفناانه الفارس المغوار ابو سيف(خشب)وحصان(حلاوة المولد)
هو الاعلام افلس وماصدقوا عاملين زي خالتي بمبه ده ابوه ده امه ده جدته ده اخوه ده اخته
ماخلاص والا ده غسيل مخ
عرفنا ان امريكا حلوه وجميله وجابت ولد صغنن وكوكتيل امريكااااااني
مالامريكان كلهم كوكتيل ايه المشكله مافيش امريكان غير الهنود الحمر وكمان مااسمهمش كده اصلا
واللي زاد وغطا علي الكل وده اللي استفزني اصلا
شعبوله (شعبان عبد الرحيم) هيغنيله اغنيه اشمعنا هو يعني الراجل يغني لأسرائيل و اوباما لا ده حتي اسم ابوه حسين
ياله ماهو مولد
بصراحه لي رأي في موضوع اوباما ده انا مالييش في السياسه بس انا مواطنه بسمع وبحس
مش عارفه ليه فرحانين قوي كده بالشب
***الشعب الامريكي فرحان عشان عمل اللي هو عايزه
ده لو كان هو ده اللي هوعايزه ومااتوجهش ليه
امريكا حبت تغير صورتها وتقول اني مش عنصريه والابكره المسلمين
وطبعا ده بعد البهدله اللي شافتها وورتهلنا في العراق
اهو الريس اسود من اصل افريقي وابوه مسلم وامه بيضه
يعني كوكتيل عنصريه في بعض
ونبي مفصلينه تفصيل
ايه الحلاوه دي
همه جابوه منين ده
ده علي المقاس
اوعوا تقولوا بقه ان امريكا فيها عنصريه والا بتكره المسلمين والا السود مش واخدين حقهم
واهو المؤسسات حاكمه البلد واربع سنين تفوت والا حد يموت
وعلي مااعتقد هي مش عارفه تنسحب من العراق بكرامه ازاي تجيب حد عايز ينسحب من هناك ويكون عيل
ماهو مش معقول امريكا مافيهاش غير ماكين ده عشان يترشح امام اوباما
ماكين ده مابيجمعش اصلا
كان لازم يجيبوا حد اهبل امامه
احنا مالنا بقه باللي بيعملوه يجيبوا زيد يجيبواعبيد والا نطاط الحيط السياسه واحده
دي دولة مؤسسات ياجماعه
همه حبوا يصلحوا صورتهم شويه عشان الضربه اللي جايه
ده شغل يهود
و شفت خبر يفطس من الضحك الرئيس الكيني اده الشعب اجازه عشان يحتفل
والا ايه اخوه الغيرشقيق عمال يرقص الايعني هياخد حاجه
هم يضحك وهم يبكي
خلينا احنا فالافلامانات اللي عندنا علي رأي بنتي
---------
وعل رأي عزيزتي ابي
بكره نقعد جنب الحيطه ونسمع الظيطه(مع الاعتزار للحيطه طبعا يعني كلنا كده هنقعد جنبها ازاي)

ليله بيضه

امبارح كانت ليله غريبه جدا
اولا
***
الميل بتاعي حصله حاله من الجنان المؤقت حاولت ابعت ميل لضد التيار وعمرو ابدا اجيبه يمين اجيبه شمال بتاتا البته
راح عمرو الله يكرمه قال خلاص نعمل غيره وغيري الباص وورد بعد كده عمله وانه يفتح ابدا من هنا من هنا مافيش
الرجل مشكورا عمل غيره نفس القصه
بس بعد محاولات الحمد لله فتح قوم ايه الميل القديم يغير من الموضوع ويفتح اظاهر لقي نفسه هيتركن علي الرف قال اعقل ياواد
واتبعتت الميلات بعد ماكنت فصلت شحن وعمرو اتجنن وبنتي احولت
ثانيا
***
صديقه ليه قالت لي افتحي العاشره عليها موضوع حزب الغد اللي كان مزعلك(معلش اصل انا ماليش في التليفزيون والا القبيله كلها)
فتحت اتغميت علي الاخر
للدرجه دي مابقيناش عارفين نتحاور ونتناقش مع بعض
معقول دي الناس دي المفروض متعلمين ومتنورين ووصلوا من العلم والثقافه زروتها معقول النقاش الهادف يحل محله السباب والعراك والبلطجه والعنف خلاص فقدنا لغة الحوار وحل محلها لغة العصابات
وعايزين تغيير ازاي
خلصة الفقره وانا حزينه علي مصر وعلي مستقبل الجيل الجديد
ثلثا
***
قفلت التليفزيون ووصلت للمحطه الاخيره قبل النوم اتوضيت وصليت الشفع والوتر وامسكت المصحف لاقيتني واقفه عند سورة العنكبوت مش عارفه ليه حسيت اني بقراها للأول مره قعدت اقراالست آيات الاولي اكتر من مره ولاقيتني برجع لسورة الحج وقعدت برضه اقراالخمس آيات الاولي بنفس الطريقه
يانهار ابيض ايه اللي احنا فيه ده حد استعد لأخر الرحله دي والموقف ده اخذ الزاد والزواد معاه احنا فعلا في غفله من ومع كل حاجه وخصوصا مع مغريات العصر
طيب ربنا بيقول لناانت هتقولوا امنا بس انا همتحن ايمانكم ده ويابخته اللي ينجح في الامتحان
ياتري كام واحد فينا دخل الامتحان ونجح علي الاقل بتقدير الشعب مقبول
احبائي انتبهوا
رابعا
****
عندي عاده مش عارفه ابطلها اني اقرا الجرايد قبل ماانام مع ان حاجات كتير المفروض تتعرف الصبح مش مهم
ولسه بفتح الاهرام وببص علي صباعي اليمين اللي ماسك الجرنال والاقي خبر مش عارفه مش لاقيه له وصف بس بعد ماقريته قلت حتي انت يابروتس
عشان ماطولش الملخص ان السودانيين مسميين الجنيه المصري دبور عشان مابيساويش حاجه وعشان هو بنص جنيه سوداني والا تعليق
اتنكدت طبعا رحت سايبه الجرايد وقلت مش هقرا اول القصيده كده امال جوه في ايه
رابعا
***
بلاها جرايد اللي هتعكنن عليه هي رخره
كانت بنتي جابت كتاب من المواضيع اللي بحبها وماكنتش لسه قريته
قلت بس نعمل حاجه حلوه في الليله الغريبه دي الكتاب لباحث اسمه سليمان مظهر وهو عن قصة الديانات
لسه بفتح الكتاب ويدوب قريت صفحتين والنور قطع
قلت اه هو ده اللي كان ناقص هي ليله بيضه من اولها
طب نكتفي بهذا القدر وتصبحي علي خير او زي ماتحبي ياليه بيضه انت عشان الحق انام ساعتين قبل الفجر

عاجل من وادي الملوك من عمر

عاجل .. عاجل .. عاجل

أزيكم الأول ؟ .. طيب الحمد لله ..

أنا لسه راجع من الهيئة العامة لمش عارف أيه و أيه و التنمية الزراعية و مقرها خلف المتحف الزراعى بالدقى ..

رجاء حار من الأعزاء اللى بيدخلوا المدونه و اللى يعرفوا أى حد شارى أرض فى منطقة وادى الملوك بالكيلو 52 طريق القاهره الاٍسكندريه الصحراوى من مدحت بركات يبلغوه بالآتى علما بأن اللى حأقوله بينطبق بصفه عامه على كل واضعى اليد و لكن أرض وادى الملوك بصفه خاصه لأن الهوجه قايمه عليها اليومين دول :

1- عمل محضر اٍثبات حاله بقسم الشبخ زايد و معاك أصل العقد و صورتين منه و كمان المخالصه لو وجدت .. و أصل بطاقة الرقم القومى أو جواز السفر .. عند سيادة النقيب أحمد حافظ و يفضل بعد العاشره مساءا علشان الزحام و ما تنساش و أنت ماشى تاخد رقم المحضر ..

2- عمل خريطه مساحيه هندسيه بالقمر الصناعى و المهندس اللى بيعملها اٍسمه محمود و ده رقم موبايله 0106948616 و بتتكلف 300 جنيه و بتاخدها تانى يوم أو تالت يوم بس ده يستلزم أن أرضك أصلا تكون عارف رقمها كويس و تكون محددة الأركان الأربعه و لو بحدايد ..

3- سرعة زراعة قطعة أرضك على وجه السرعه لأن اللجنه بتاعت التفتيش خلاص نازله الموقع و لو ماكنتش عملت شبكه أو زرعت فأعلم أخى المواطن و أختى المواطنه أن شبكة الرى للفدان بتتكلف حوالى 1200 جنيه شامله كل حاااااااااااجه و الزراعة للفدان بتاخد 200 شتله على أبعاد 5 فى خمسه و طن و ربع جله لا مؤاخذه سعر الطن بنقله 350 جنيه و أنت و شطارتك مع العمال بس بتتراوح زراعة الفدان بما فيها حفر الجور و غرس الشتله و ريها حوالى من 100 ل 150 جنيه .. مع مراعاة أخى المزارع تخمير الأرض جيدا بالجله و المياه لمدة يومين قبل غرس الشتلات .. و لازم تكون الشتلات طولها تتناسب مع تاريخ شرائك للأرض علشان ما يبانش اٍنها حركه أمريكانى كده و كده .. و الحوار ده كله مش بياخد أكتر من 4 أيام أو خمسه بالكتير ..

4- بعد كده أيها المواطنون .. تنووا خير و تتكلوا على الله ساعة الصبحيه على الهيئة العامه للى مش عارف أيه و أيه و التنمية الزراعيه اللى خلف المتحف الزراعى فى الدقى و تدخلوا من الباب الرئيسى و تحودوا يمين حتلاقوا مبنى دور واحد مبنى بالألوميتال و يكون معاكم أصل الخريطه المساحيه لأنهم بياخدوا الأصل + سى دى اللى مع الخريطه + أصل العقد + صوره من أصل العقد + بطاقة الرقم القومى أو الباسبور + صوره منهم .. و خدوا بالكم أن لو فيه أكتر من اٍسم فى العقد فلابد من حضور جميع الأطراف بتحقيق شخصياتهم .. و هناك فيه الأستاذ / منير موظف شاب زى البلسم يعرف ربنا و صدره متسع لكل الاٍستفسارات حيديكم نموذج مطبوع من عدة ورقات تملوه وش و ضهر و ما تنسوش أهم حته فى ورقه منهم اٍثبات سند الملكيه تروح كاتب قدامها الزرع + عقد الشراء و ما تنساش تاخد معاك قلم جاف علشان أنا أتبهدلت على ما حد رضى يشحتنى قلم .. الأستاذ منير بيراجع الأوراق و بيستلمها منك و بيديك رقم و خلاص على كده ..

5- نصيحه أخويه لما اللجنه تنزل أرضك اٍنشاءالله أوعوا حد يفكر يصبح أو يمسى عليهم بطريقة المصريين الفهلويه لأنهم ناس دوغرى مالهمش فى الكلام ده و منهم واحد عنده 3 زبايب فى قورته من أثر السجود يعنى أوعى وشك ..

6- طيب اللى حيسألنى يا باشا لو واحد مسافر بره يعمل أيه ؟ حأقوله : و يسافر بره ليه أصلا ؟؟ ما علينا .. ببساطه يعمل توكيل لحد من قرايبه فى مصر و يبعتهولوه بعد ما يوثقه من السفاره المصريه و يبعت له الأوراق اللازمه لأستكمال الاٍجراءات ..

7- سمعت كده طراطيش كلام أن الفدان حيندفع عليه من 5 ل 7 آلاف جنيه للهيئه على حسب تميز القطعه و بعدها أو قربها من الطريق بيتقسطوا على 5 سنين ..

8- أنا شايف أن ده حل مش بطال للخلاص من الورطه اللى أتحطينا فيها .. و ربنا هو صاحب العوض ..

أرجو بقى من اللى يقرا الكلام و يعرف حد شارى فى وادى الملوك أو من أى شركه على الطريق الصحراوى أنه يبلغه و لو حد عاوز يستفسر عن حاجه خاصة بالموضوع أو بالزراعه أو لأى سبب يراسلنى على : amrbadr70@yahoo.com