اجاااااااااااازة

كل سنة وانتم طيبين
شم النسيم علي الابواب
وان شاء الله ربيع جميل
وان شاء الله هاخد اجازة من النت
لمشغولياتي الكتير
وان شاء الله اعود بعد استقرار الاوضاع
وربنا يعيني
المدونة امانة
وبعتذر للي مااقدرتش ارد علي تعليقاتهم الفترة الاخيرة
وبشكرهم جدا جدا
نورتوني
:)

ماما

كل سنة وكل ماماهات البلوجر طيبين
وندااااااااء
كل ابن كل ابنة
كل يوم مش النهاردة بس
كلمة حلوة لماما
في النهاية الكلمة الطيبة صدقة
وندااااااااااااء
كل زوج
كل يوم كلمة حلوة لزوجتك
اضحك معاها صاحبها في الدنيا معروف لله
اعطيها الحنان والحب والعطف والاهتمام
حتي تتوازن نفسيا
وتعطي احلي ماعندها
صحيح هي كده كده بتعطي
لكن عطاء عن سعادة وتوازن وواجب
غير عطاء عن واجب مغلف بالحرمان من الكلمة الطيبة
فاقد الشئ لايعطية
وكل سنة وانتي طيبة ياماما ربنا يديكي الصحة
ويبارك لك في عمرك
::))

اغنية محمد محي

بنوته حبوبة من اصحاب بناتي لما لاقيتني في دوشة حبت تعمل لي حاجة لطيفة
لاقيتها مكلماني وبتقول لي افتحي نجوم اف ام بسرعة واستني
لاقيتها بعتالي الاغنية دي
حبيتكم تشاركوني فيها
هي عارفة اني بحب محمد محي
صحيح صوتة زي اللي هربان من الحضانة
بس محترم وبيغني بأحساس

واهو نغير المود الغير لطيف ده

لييييييييييييه(تحديث علي الماشي)

معلش عارفة اني مقصره بس ظروف
بس جايه وجايبه لكم هديه حلوة بوست قريته ومش راضي يروح من دماغي حبيت تشركوني فيه عارفه ان كتير شافوه بس برضه
اتمعنوا فيه كده
هنا

معلش هنأجل بوست الرحلة شوية
علشان انا ست كبيرة وكمان شايلة المرارة
ولازم ولابد اتكلم في الموضوع ده بالرغم اني مش بأحب اتكلم علي
السياسة واخواتها
ايه القصة
ليه صديقة بتموت في السياسة وكأنها من عيلتها
قعدت تقول لي ادخلي اليوتيوب وشوفي العاشرة مساء مع البرادعي
وانا اصلا مش فاضيه خالص
المهم
اخيرا لما فضيت شويه اتفرجت وبصراحة استغربت جدا
ليه
التركيبة غريبه حبتين تلاته اربعة
البرادعي ودريم بتاعت احمد بهجت ناسبنا الحكومة
ازااااااااااايي
بقا هو احمد بهجت هيلمع البرادعي
؟؟؟؟؟؟؟؟؟؟؟

المهم الرجل طبعا عارف بيقول ايه وبيعمل ايه
وهات ياتمجيد وتفخيم في كليب صغير
في البرادعي
وهوب

الست مني شويه تخبطه في الاخوان يطلع منها وشويه تخبطه في اليساريين
يطلع منها طب الاسلاميين مافيش طب الشعب البسيط مافيش
طب السياسيين راح قايل لها انا دخلت في معارك مع امريكا يبقا اي معركة في الداخل هتكون لعب اطفال
هوبا
بصراحة ماكنتش فهماااااانه حاجه خالص
هو في ايه
لحد ما كل شئ انكشفن وبااااااااااان
الهدف من البرناااااامج
كلمتين من صاحب الشأن
انا سني كبر 66سنه ومااعتقدش اني ممكن اطمع في منصب سياسي
ده خليه للشبااااااااااااااااب

(يعني ياريت اللي عمالييين يعملوا شقلباظات
يتهدوا ادي صاحب الشأن
وتوته توته خلصت الحدوته)

ماعلينا
بس اللي زعلني حاجتين

الاولي:ان الرجل لم يرشح من قبل مصر بلده لمنصبه
بالعكس مصر رفضت ترشحه
والمجموعه الافريقيه هي اللي رشحته

الثانيه: لم يتم نقل حفل نوبل من قبل مصر
ولم يحظي الخبر بالاهتمام الاعلامي المناسب

ياريت تدخلوا علي اليوتيوب وتشوفوا الرجل ده وتواضعه وادبه وعلمه
بس خلاص طلعت الكلمتين اللي ضيقوني
::(((

ازيكمممممممممممممم

ازيكم
ياااااااااااااااااانهار ابيض ماحستش اني غبت شهر الا لما شوفت ان اخر بوست كان 4 فبراير
معلش الغيبه كانت علشان كان عندي احداث كتيررررررررررررر
اغلبها مش لطيفة وكان في كويس بس اللي مش كويس كان اكتر
بشكر كل اللي سألوا عليا
شيكو طبعا*
مولان -كيمو اللي اختفي هو كمان
ازهري رغم مشاغله
ودعاء
*****
وشكرا ل نور الدين ونورهاتي والعروسة اينو
وطوبة فضة وطوبة دهب
واحمد الشريف و حرروف
والجواز وسنينة
وبحر الالوان

ودودو (عاشقة الرومانسيه)وبقول لها سلامتك الف سلامة

وحنين القلب الف مبروك علي البيبي

ومبروك للشعب لابد له من حكومة تشكمة الف مبروك

دي الاخبار الجميلة اللي فرحتني
في اي اخبار تاني حصلت وانا غايبة؟؟؟؟

وشكرا لكل من علق في البوست اللي فات
وان شاء الله نكمل الرحلة في البوست الجاي
وحشتوووووووووووني
************

الاقصر بلدنا

ابحرنا مرة اخري تاركين ادفوا
متجهين شمالا الي
الاقصر الجميلة
وفي الطريق عدينا من
قناطر اسنا وعدينا من ممر مائي لما شوفته
قلت ايه ده ؟ بقا العمارة المتحركة دي هتعدي من هنا
؟؟؟؟؟؟؟؟؟؟؟؟؟؟؟؟؟؟؟؟
وماشاء الله علي القبطان عدي بشكل لايوصف خالص




وبعد كده عدينا علي الهاويس



موضوع الهاويس ده هو اللي يهوس بجد!!!

النظريه اننا بننزل من مستوي عالي الي مستوي اقل
اي عمق اقل للماء
اللي بيحصل اننا دخلنا ممر مائي له بوابتين
دخلنا من بوابة وامامنا البوابة الاخري مغلقة
واول ماانتصفت المركب في الممر
اغلقت البوابة الخلفية
وايييييييييييه
يانهار ابيض لاقيت شويه شويه الرصيف اللي كان بيني وبينه
تلات ادوار بقي اعلي مني
ازااااااااااااااي
لما بقينا في النص
اتشفطت الماء من حول السفينة بهدوء وواحده واحده
فالمركب تنزل واحده واحده معاها وسنه سنه
الي ان اصبح الماء حول المركب
نفس المنسوب خارج الممر
ولما وصل المنسوب المطلوب
اتفتحت البوابه الاماميه وخرجت المركب بيسر
وسهولة للمنسوب الجديد
واحنا في اعجاب شديد باللي بيحصل
تمكن من القبطان
وميكنة ري جميلة مدروسة محكمة
مهما وصفت الموضوع اجمل
وهحاول ارفع الفيديو علي اليوتيوب وانزلة
احنا عدينا بالليل والتصوير ماكنش باين بس لو دخلتوا علي جوجل وكتبتوا قناطر اسنا
وهاويس اسنا
هتتفرجوا علي احلي صور

المهم


وصلنا الاقصر الفجر

ولاقيت منظر رائع مع طلوع الشمس




والساعة9 نزلنا من المركب في طريقنا الجميل ده








متجهين الي وادي الملوك بعد ماعدينا من علي الكوبري الرائع ده



ومرينا علي الاماكن اللطيفة دي


وفي وادي الملوك للأسف ممنوع التصوير هناك






منقولة من جوجل

سبنا الكاميرات في الباص
ودخلنا من بوابة الكترونية
عدينا علي هول كبير جميل معمول علي اعلي مستوي
به ماكيت للمقابر شكلة جميل

وخرجنا علي ساحة ركبنا قطر كهربائي لطيف دخل بينا منطقة المقابر

بس بصراحة مقابر غاية في الجمال الالوان الباقيه
كأنها متلونه امبارح
و برضه موجوده علي جوجل

وبعد طلوع سلالم ونزول دهاليز

طلعنا من وادي الملوك توجهنا الي معبد حتشوبسوت




معبد في حضن الجبل
روعه في البناء والجمال





و الصورة دي مصوراها وانا واقفه امام المعبد
يعني المناظر الطبيعية مع الاثار شئ مذهل!!



حاجة كده علي جنب
نشوف الصورة دي



مش ده الطفل الوحيد اللي كان موجود مع السياح
كتير كان معاهم اطفال
وبيتحركوا بيهم عادي

(طبعا حد هيسيب البوست اللي تعبني في تحميل الصور ويقول لي الصورة مقطوعة ليه ياشمس هقول له باقي الصورة محظور
طبعا كان والدت البيبي السايحة)
::))
الرقابة اللي هي انا شالتها
هنا مدونة الحاجة شمس


خلصنا معبد حتشبسوت ورجعنا للمركب المركب
ودي صورة لطريق العودة





والبوست الجاي ان شاء الله
هنروح معبد الاقصر والكرنك ومتحف الاقصر

::))

ونرجع للرحلة تاني

نرجع تاني للرحلة ونشوف جمال وحلاوة بلدنا
بالليل الساعة 11 ابتدت المركب تبحر علي
كوم أمبوجنوب اسوان



ووصلنا قرب الفجر
ولما الدنيا ابتدت تنور شوفت المنظر الجميل
ده




والساعة 9 الصبح نزلنا من علي المركب علي مرسي جميل ونظيف فعلا حاجة تبسط بجد

واتمشينا علي رجلينا لحد المعبد

ودخلنا معبد كوم أمبو




ياريت تدخلوا جوجل تقروا عنه
حاجه مبهرة المعبد ده فيه مقياس لماء النيل كان بيتحدد عليه الضرايب علي الزراعة
يعني لو الماء مرتفع يبقا الزرع اتروي صح
يبقا كان كويس وكتير
ياخدوا ضرايب توازي المحصول في الكترة
اما لو الماء قليل يبقا الزرع مااترواش كويس يبقا المحصول قليل
وبكده تبقا الضرايب قليلة
الناس دي ماكانتش بتهرج




رجعنا المركب تاني وابحرنا مرة اخري متجهين الي ادفوا






وبرضه طول السكه مناظر جميلة جدا














بس بصوا الرايق ده اللي حاطت علم مصر والجزائر



وصلنا مدينة ادفوا شمال اسوان





وكان اول مرة اشوف مركب عملاق كده بيركن

تمكن من القبطان غير عادي

كنت حاسه هنخبطت في الرصيف

بس مين والا اللي بيركن موتوسيكل

صورتها فيديو وطلع مشكله علشان احطها في البوست

بس هحاول اجمع كل الفيديو وانزلهم
*
مدينة ادفوا اللي ظاهر منها جميل ولطيف جدا وزي الفل
بس مااعرفش جوه البلد في ايه








وصلنا معبد ادفوا بعد مانزلنا من المركب واخدنا الحناطير






المعبد من المعابد المتخصصه وهو خاص بحورس






بعد كده رجعنا المركب لنبحر شمالا الي الاقصر
والاقصر دي هي وكمان موضوع الهاويس دي حكاية لوحدهم
هنقولها البوست الجاي
::))