عزيزي المقاطع :)

عزيزي المقاطع 

ربنا مايقطع لك عادة 

 مش هقولك دي سلبية وبتنجانية 

والكلام الكبير ده
هقولك بس 

حضرتك لما قاطعت 

حطيتنا بين مرسي وشفيق
وقاطعت تاني

 دبستنا في مرسي انت وبتوع الليمون
ودبستنا في دستور مايعلم بيه الا المولي
وربنا سلم في الدستور الاخير
ربنا يهديك بقا 

انزل ماتقصيش نفسك بنفسك
ياعم انزل وابطل صوتك 

اقولك خد الورقة تذكار
وافتكر 

ان المره دي نزلت مانزلتش 

مش هتغير حاجة 

بس
انت صعبان عليا 

عامل زي الغضبان اللي مش عارف يعمل ايه 

علشان الناس تصالحه
وصدقني ماحدش هيصالحك 

والدنيا ماشيه بيك ومن غيرك

وشكلك بقا وحش
وملاحظة انا 

ان المقاطعة بقت واااااو 

دليل علي الثورجية بقا 

والرأي الجامد و اوعي
بقت موضة 

ودليل الاوووووووبها
ان شاء الله هنشوف مصر اجمل
وبص شوف شعب مصر بيعمل ايه 

انا الشعب :)

لا اعرف المستحيلا

ولا ارتضي بالخلود بديلا

احنا الشعب المصري

رغم كل الاحباطات والحلابوظات 

اللي قبلتنا 

بس بجد شعب مبتكر مبدع 

كل حاجة بيعملها ليها العجب 

وعلي سبيل المثال لا الحصر 

( الناس في الزمن القديم 

كانوا بيدفنوا تحت الارض ويجروا 

احنا لأ بقا حنطنا الميت 

وبنينا مقابر فوق الارض معجزة الاهرامات :)

 وثورة يوليو اللي كانت انقلاب وعملوها ثورة 

وهزيمة 67 

اللي عملوها نكسة وماحربناش اصلا علشان نتهزم 

وخط بارليف اللي دوبناه بخراطيم ميه 

استوردناها من المانيا 

وهمه مش عارفين هنعمل ايه بكل الخراطيم دي 

وثورة يناير ويوليو 

واخيرا وليس بأخر 

الانتخابات الراقصة 

غداااااااااااا 

:) 

وربنا احنا شعب مالناش حل 

:) :) :)

الانتووووخابات :)

ايه الحلاوة دي

ملاحظة ان الكرة الارضية كلها

مشرفانا تراقب علي الانتخابات

:)

خيييييييييير في ايه

مش فاهمة

طيب انتخابات بين السيسي وحمدين هتتزور ازاي وليه

ده لوحبينا حتي نزورها لصالح حمدين مش هنعرف

وبعدين

عد مرشحين ياجحا

واحد ناجح من سنة

 والتاني ساقط من سنتين اصلا

:)

عموما ززززززززززي بعضه

مصر طول عمرها مضيافة

ويشرفونا

:)

امبارح في صلاح سالم زفت عروسة كان ماشي قصدها عربية فور باي فور عليها صور السيسي

ومشغلين بشرة خير

وكل العربيات اللي في صلاح سالم بتضرب كلكسات

:)

مالناش حل

متوقعه ان الانتخابات هتبقا

كرنفال ولا البرازيل

هيصة وظيطه ورقص واخر دلع

:)

احنا شعب فرفوووووووش

:)

 

احمد النجار

احمد النجار 

شاب في التلاتين كده

نجار بيشتغل معايا

يادوب بيعرف يقرا علي خفيف

بس مابيعرفش يكتب غير اسمه

بس بسم الله ماشاء الله عليه

دمااااااااااغ

وذكي جدا بالفطره

امبارح كنت بتكلم معاهم

علشان كانوا بيقولوا لي انهم هيروحوا بلادهم يوم الاربعاء بدل الخميس

طبعا معروف ليه؟

علشان الانتخابات

المهم 

بقول لهم وانتوا هتنتخبوا مين كلهم في نفس واحد

السيسي

:)

ماقلتلهمش حاجة انا 

:)

برئ يابيه

المهم

بقول لهم

ماااااشي بس كل واحد فيكم ياخد اهل بيته معاه

حتي الامهات

قالوا لي 

مش محتاجة وصاية البلد فرح من دلوقتي

والناس بتطلع بالعربيات والميكرفونات

احمد بقا قال لي ايه؟

ياباشمهندسة

انا من بلد صغيره من جو بلد

حاجة مش موجودة علي الخريطة

ومع هذا كل البلد بتطلع وبتتعلق الكهارب

ولا حد حاسس بينا بس احنا بنعمل الصح

وصحيح ان السيسي هو رئيس البلد من يوم مابقا وزير الدفاع

!!!!

بس برضوا ننزل نخليها رسمي

ولما ضحكت 

قالي معلوم مابقاش حد مابيفهمش في السياسة

 كله بقا فاهم وعارف

واللي بيقول ان الانتخابات هتتزور

السيسي مش محتاج انتخابات تتزور

:)

وموضوع البرنامج ده السيسي هو البرنامج

حمدين بيقول هعمل ايه وايه

لكن السيسي لما يتكلم 

يقول انا عملت ايه وايه وايه

:)

ان ديش ان ديش 

!!!!!!!

دي الناس اللي هتنزل تصوت

لا تقولي نااااااتيته

ولا نشطااااااااء

ولا حقوقيييييييين

ولا الرصة دي كلها

هو ده الشعب يابتوع السياسة

فوتكم بعافية

الولد اللي هرب علي امريكا

شوفوا بقا

المؤيدين لقرار الولد بتاع امريكا

 انه مايرجعش والرافضين والمهللين
الولد ده قاصر صح ؟
طيب اولا لازم يعمل لجوء سياسي

 وهو عليه قضيه اصلا 

ياتري ياهل تري امريكا هتوافق ولا لأ ......
وهل القاصر من حقه يعمل لجؤ سياسي ولا لأ؟
يااما ماما امريكا 

تديله اقامه بقا او تلحقه بالتعليم هناك فاياخد اقامه ....
والله اعلم 

القوانين هناك بتقول ايه 

الناس دي في القوانين مابتهزرش ....
عموما الناس اللي بتروح لحاجات زي دي 

بياخده تأشيره علي القد 90 يوم 

وهو وحظه وهو داخل المطار يديلوا اقامة قد ايه .......؟
انا معايا تأشرة 5 سنين 

ادوني وانا داخله 6شهور بس...........
طبعا ممكن يطلع المكسيك ويرجع 

بس مش هيقدر يقعد اكتر من ال90 يوم
والايام هتبين ايه اللي هيحصل ....؟
امريكا نفسها هتعمل معاه ايه يعني مش بمزاجه اصلا
ولا حد فينا عارف القاوانين ايه هناك اصل

بقا واضح اننا بقيا نمووووووووت

في الهري واللوك لوك

لدرجة ان ادينا الموضوع اكبر من حجمه

وهو عملي فيها بطل

وماحدش جاب سيرة البنات اللي اخدوا المركز التالت 

في حين ان الباشا مااخدش ولا حاجة 

ماعلينا

ماتوحدوووووه

حسين الجاسمي :)

الاغنية جميلة

والاجمل انها لشعب مصر

اه

شعب مصر وبس

وبقوله هدية مقبولة

وان شاء الله نردهالك في الافراح

يامجدع

:)
صحيح ابو الكباتن اللي ملحنها
لاطش اللحن من اغنية اجنبية
بس عادي طول عمره بيعمل كده

صباح الانتخابات

صباح الانكلاب والانتخابات

طبعا المصرين في الخارج ظبطونا علي الاخر

بينوا قد ايه احنا عايشين في

انكلاب جامد اوي

ده ايه الانكلاب اللي مؤيد من الشعب كده

الشعب نفسه اللي انكلب علي ناس مش هي

المهم

طبعا معروف ان الحاجة انا مؤيدة للسيسي

وان شاء الله هنتخبه

ومش ده سر فرحتي بالمصرين في الخارج 

واللي همه عاملينه

لا

انا فرحانة انهم نزلوا وخلاص

ينتخبوا صباحي ينتخبوا السيسي يبطلوا الصوت 

يارب ياخدوا الورقة تذكار

المهم انهم نزلوا وخلاص

برغم ان في بلاد حر جداااااااااااااااااااا

وكماااااااااااااااان

الشباب ياعيني ياليلي علي الشباب

عمالين يتصوروا وينشروا صورهم

ولما قالك دي صور قديمة 

من انتخاب اسم الله علي مقامكم مرسي

ابتدوا يتصوروا ويعملوا علامة

c c

مالناش حل يامصرين شربااااااااات

وكيادين بطبعنا

:)

ده غير صور المنقبات والملتحين

اللي ماليه النت 

وبرضوا

c c

:)

ده غير بقا اللي مانساش الفتوي النميسة 

بتاعة ان الانتخابات المره دي 

حرااااااااااام

هو ياابا الحاج الحرام والحلال ده 

عندك في شوال 

وانت بتخرج منه وقت اللزوم

:) :)

والتريقة شغالة عليهم للصبح

عايزة اقولكم ان المصرين دول طفشوا صحيح

وانت ياللي بتتريق عليهم لو جالك فرصة تطفش هتطفش زيهم

بس همه بيموووووت في مصر

وبيعرفوا الاخبار قبل منك

ومتابعين اكتر مننا

ومن حقهم يقولوا رايهم زيك

المهم

انا مبسوطة من الانتخابات بره 

فوتكم  مع الانكلاب والانتخابات بعافية