امبارح كانت ليله غريبه جدا
اولا
***
الميل بتاعي حصله حاله من الجنان المؤقت حاولت ابعت ميل لضد التيار وعمرو ابدا اجيبه يمين اجيبه شمال بتاتا البته
راح عمرو الله يكرمه قال خلاص نعمل غيره وغيري الباص وورد بعد كده عمله وانه يفتح ابدا من هنا من هنا مافيش
الرجل مشكورا عمل غيره نفس القصه
بس بعد محاولات الحمد لله فتح قوم ايه الميل القديم يغير من الموضوع ويفتح اظاهر لقي نفسه هيتركن علي الرف قال اعقل ياواد
واتبعتت الميلات بعد ماكنت فصلت شحن وعمرو اتجنن وبنتي احولت
ثانيا
***
صديقه ليه قالت لي افتحي العاشره عليها موضوع حزب الغد اللي كان مزعلك(معلش اصل انا ماليش في التليفزيون والا القبيله كلها)
فتحت اتغميت علي الاخر
للدرجه دي مابقيناش عارفين نتحاور ونتناقش مع بعض
معقول دي الناس دي المفروض متعلمين ومتنورين ووصلوا من العلم والثقافه زروتها معقول النقاش الهادف يحل محله السباب والعراك والبلطجه والعنف خلاص فقدنا لغة الحوار وحل محلها لغة العصابات
وعايزين تغيير ازاي
خلصة الفقره وانا حزينه علي مصر وعلي مستقبل الجيل الجديد
ثلثا
***
قفلت التليفزيون ووصلت للمحطه الاخيره قبل النوم اتوضيت وصليت الشفع والوتر وامسكت المصحف لاقيتني واقفه عند سورة العنكبوت مش عارفه ليه حسيت اني بقراها للأول مره قعدت اقراالست آيات الاولي اكتر من مره ولاقيتني برجع لسورة الحج وقعدت برضه اقراالخمس آيات الاولي بنفس الطريقه
يانهار ابيض ايه اللي احنا فيه ده حد استعد لأخر الرحله دي والموقف ده اخذ الزاد والزواد معاه احنا فعلا في غفله من ومع كل حاجه وخصوصا مع مغريات العصر
طيب ربنا بيقول لناانت هتقولوا امنا بس انا همتحن ايمانكم ده ويابخته اللي ينجح في الامتحان
ياتري كام واحد فينا دخل الامتحان ونجح علي الاقل بتقدير الشعب مقبول
احبائي انتبهوا
رابعا
****
عندي عاده مش عارفه ابطلها اني اقرا الجرايد قبل ماانام مع ان حاجات كتير المفروض تتعرف الصبح مش مهم
ولسه بفتح الاهرام وببص علي صباعي اليمين اللي ماسك الجرنال والاقي خبر مش عارفه مش لاقيه له وصف بس بعد ماقريته قلت حتي انت يابروتس
عشان ماطولش الملخص ان السودانيين مسميين الجنيه المصري دبور عشان مابيساويش حاجه وعشان هو بنص جنيه سوداني والا تعليق
اتنكدت طبعا رحت سايبه الجرايد وقلت مش هقرا اول القصيده كده امال جوه في ايه
رابعا
***
بلاها جرايد اللي هتعكنن عليه هي رخره
كانت بنتي جابت كتاب من المواضيع اللي بحبها وماكنتش لسه قريته
قلت بس نعمل حاجه حلوه في الليله الغريبه دي الكتاب لباحث اسمه سليمان مظهر وهو عن قصة الديانات
لسه بفتح الكتاب ويدوب قريت صفحتين والنور قطع
قلت اه هو ده اللي كان ناقص هي ليله بيضه من اولها
طب نكتفي بهذا القدر وتصبحي علي خير او زي ماتحبي ياليه بيضه انت عشان الحق انام ساعتين قبل الفجر
موضوع الميل اللى مكنش راضى يبعت هو كل ما في الامر ممكن يكون كان فية مشكلة في السيرفر بتاع الموقع وبتحصل كتير
ردحذفنفس اللى حصل معايو بس اكثر ما اثر فيه دموع جميلة اسماعيل اللى كادت تنزل تعاطفت معها كزوجة مش كسياسية
ربنا يهدى الجميع ويجعلنا نستعد لرحلة الاخرة ان شاء اللة
موضوع الجنية السودانى بقاء فعلا واللة العظيم ماساة لدرجة انى فى ناس من مصر بتسافر السودان تشتغل هناك انا مش بعيب على السودان كبلد او قوم بس بعيب على الحالة اللى وصلنا ليها للاسف
هههههههه
ردحذفما أنا قلت لك لله سبحانه و تعالى تدابير خفيه لا يصل اٍليها عقلنا من شدة بساطتها و فى نفس الوقت عمقها
جربى الميل الجديد كده و أتأكدى أنه شغال
السودان دى بلاد كلها خير و الله بس عايزه اللى يستغلها بس ازاى و امتى و هم شاغلينهم بالحروب الأهليه اللى أدت لهذه الحاله المفجعه فيها و رغم كده برضو بلاد فيها خير و آدى اليورانيوم كمان ظهر فى الجنوب يعنى بقت مطمع رسمى
اللى حصل فى حزب الغد بيظهر كم العنف اللى أصاب المجتمع ككل يعنى لما تلاقى ناس محترمين جدا و شايلين تحت كرسى السياره سنجه و لا مضرب بيسبول يعنى خلاص مافيش أى فرصه للحوار على كل المستويات
و ربنا يستر يا شمس و الله
شموس الايميل عادى بيعلق ساعات يا قمر
ردحذفموضوع حزب الغد شوفى مستوى الناس اللى عامله حزب بتتكلم ازاى مع بعض
فى النهايه فاتك موضوع العيش اللى بيخبزوه بقمح مستوردينه من اوكرانيا وروسيا وهو علف للحيوانات وشكرا لكم
اولا موضوع الميل احيانا اما بيكون مشكلة اصلا السيرفر بتاع الميل او النت عندك بيكون ضعيف مش قادر يفتح الميل ثانيا موضوع حزب الغد كله بيقول يلا نفسى مفيش حد بيفكر فى مصلحة البلد الا من رحم ربى ثالثا موضوع الجنية المصرى حاجة تحزن تعرفى انى كان زمان لو واحد مصرى راح السودان ومعاه 100 جنية كان بيكون غنى جداااااااااا هناك اما دلوقتى ربنا يرحمنا برحمته لحسن كدة خلاص مش عارف هو الجنية المصرى بقى اغلى ممن مين دلوقتى
ردحذفالعزيزة شمس النهار
ردحذفمواقف متعددة الرابط هو العكننة
التليفزيون اداة انا ايضا لا استعملها لاننى اصبحت ارى علامات غير طيبة لمن يستعمله
اما السودان فالمشكلة ان هناك من يقول حب متبادل وتاريخ عريق
وهناك من يقول كره شديد
ونحن فى النهاية لا نرى دليل غير من المعاملات الفردية وهى جيد وليست مقياس
تحياتى
الايميل والمواقع والمدونات بتعلق كتير وبعد كده تفتح عادى بعد الريستارت
ردحذف----------------------------
انا مستغرب اصلا عشان منى الشاذلى جابت موسى مصطفى موسى ده وهو بلطجى وكل الجرايد قالت كده وفضحته بالصور , ولا عشان البرنامج يتقال عليه موضوعى يقف على الحياد بين البلطجى والضحية
الميل علق معكى و معيا انا كمان لما كنت ببعت ليك
ردحذفهو ممكن يكون غضبان من اسمى )): مفيش حاجه وصلت بالفعل )):
التليفزيون و الاخبار عموما الواحد بقى يشوفهم لحرق الدم كل حاجه خربانه و كل ضحك على بشر و بس
لكن هانقول ايه ادمان حرق دم ):
ربنا يرزقنا حسن الخاتمة
السلام عليكم ورحمة الله وبركاته
ردحذفههههههههه
لا فعلا ليلية بيضه وكويس انك خدتيها من قاصيرها ودخلت نمتِ
سلام
جميل والله الليله دى
ردحذفاحداث جميلة لو ربطتت مع بعضها
من الميل
نتعلم الصبر وطوال البال
وطلب العلم وعمره ماكان محال
من العاشره مساء
نتعلم الغوغائيه وشغل المصالح وتكسير الذات
ناخدهم عبره ليرتاح البال
فنحن قوم تاءتى لنا الدينا لا نطلبها
فاءن طلبنها فقولى سلام
من سورة العنكبوت
نتعلم كيف لم نبنى بيت مثل العنكبوت
حافظ على اثنين قامت عليهما امه
ذات دين ورساله
اما عن الاخره والقراءن
نتعلم ان هناك تقدير سنأخذه ليس تقدير شعبى مقبول
ولكن تقدير راء ولام
يعنى رَوح لاءمك
عيش معها فى نار البرارى
لم تتقن تربيتك وعشت عيشة الحاوارى
من سورة الحج
نتعلم خير زاد لخير رحله التقوى
لا تنظر على صغر معصيتك ولكن انظر الى عظمة من عصيت
لما نوصل للسودان
نتعلم تصحيح الصورة
هما لغوا الاصفار الكتير علشان التضخم
ولازال عملتهم تحت الارض
وعلى فكر ه هى الدينار مش الجنيه
من النور الذى قطع
نتعلم ان هناك نور انار كل الوجود ولم ينقطع على مسلم وكافر عطاء ربوبيه
فكفى ان نقول سبحان الله
اشكرك على هذه الرحلة الممتعة
تحياتى
ايه الليلله البيضا دى اقولك حاجه
ردحذفاقرى سوره البقره
وياريت تبخرى البيت
اجرى من هنا احسن
ههههههههههههههههههههه
شمس النهار
ردحذفليلة بيضة تفوت وتبقي دايما بخير اختي
الغالية
عندي ليكي عتاب
ليه اسمي مش موجود في القائمة ؟
انا مؤيد لكل الكلام تقريبً وكلنا بنتجرع من ذات كأس الحزن
ردحذفبالنسبة للي بيحصل في الغد فده بيحصل في كل حتة
وامبارح في مؤتمر السياسات البديلة كان موجود استاذ ايهاب الخولي ووائل نوارة ومنفعلين جدًا وقولتلهم ان كارثة الغد بتاعتنا كلنا لانها كارثة لجزء من شرف مصر ..
وأيًا كان اللي بيحصل
منه لله الرأس الكبير - بتاع بروسلي مش بتاعنا - ربنا ياخده
فرق تسد
سياسة قديمة .. لكنها تبدو أحدث من الحداثة !
موضوع حزب الغد يعبر عن حالة المجتمع ككل الذي اصابه الفوضى في كل شيئ ن اكثر حاجه عجبتني في الحلقه قوة جميلة اسماعيل رغم الوضع الصعب اللي هي فيه وصعب عيا دموعها في نفس الوقت
ردحذفتحياتي وتقبلوا مرورى الاول ولن يكون الاخير ان شاء الله
معلش علي الميل هو ساعات بيعلق اما
ردحذفالتليفزيون فبلاش منه
اما القران فربنا يحسن ختامنا جميعا وفعلا لازم نستعد للرحله
ايه ده بس لأ بصراحه ديه ليله كانت منحوسه اوووووووي يا مامتي
ردحذفوبعدين كده زعلتيني منك يعني انا حاسبات يعني كومبيوتر وتكنولوبيا والحورات ديه كمان موس تقوليلي كنت اتصرفتلك ولا حاجه عطيتك ميل كده تشتغلي بيه ع السريع شفتلك مشكله سيرفر الياهو او بعتلك سيرفر وهمي تشتغلي بيه
عاااااااااااااا ماليش لازمه يعني
احول يعني واسيب الكليه
هههههههههههههههههههههه
بس جميل اووووووووووووي يا مامتي العاده ديه ربنا يكرمك يارب واوعدك هاحاول اقلدك الفترة الجايه اصلها عجبتني انا طول عمري كتابي الي بارتاحله في المقام الأول القرآن
وعليكم السلاااااااااااام
ردحذفانتى بس ابقى اتغطى كويس قبل ما تنامى
وربنا يستر فى الاحلام
الاخت الفاضلة ، شمس النهار
ردحذفسلمت وبيتك من كل مكروهو، وحفظ الله عمرو ان كان ابنك وحفظ اختة
كتاب سليمان مظهر لايغنى والافضل منه الملل للشهرستانى او الملل والنحل لابن حزم او كتاب رحمة الله الهندى فى الرد على اهل الشرك
انا مش فاهم ازاى تكون اى ليلة وشمس موجودة بس مش تقدر تسيح كلامى
شكرا لك وتحياتى للابناء
واضح تماما من العنوان شخصيتك المتفائله المؤمنه بان قضاء الله كله خير....خواطرك المتفرقه هي رصد لاحداث يوميه تأخذ بالالباب يمينا تاره ويسارا تاره اخري... لكنها هي الحياة التي يجب ان نعيشها بحلوها ومرها ولله في خلقه شؤون.
ردحذفليه كده
ردحذفمع إن العاشرة مساءا كان جايب فقرة كوميدية لللمبي الجديد :)
بجد مش قادره اوصف لك خفه ظلك قد ايه بجد عجبتنى روحك المرحه وطريقتك السلسه
ردحذفبحييكى بجد واتمنى لكى من كل قلبى دوام التميز
تحياتى لقلمك الرائع
*رئيس جمهوريةنفسي
ردحذفالزوجه زوجه مهماكانت حتي لورئيسه للجمهوريه
الحاله وحشه بس مش للدرجه دي بنص جنيه سوداني
*عمرو
ردحذفتعبتك معايابشكرك
ماتخفش امريكابس تخلص من العراق وهتفوق لهاواهويكونواخلصواعلي بعض
مستويات ايه هوبقه في مستويات اصلا
السلام عليكم::
ردحذفالدنيا يومان...
قلبي معاكي على اليوم الدراماتيكي دوت..
بالمناسبة يعني ايه دراماتيكي؟؟
تحياتي
صباح الخير والشمس منورة وحتقضل منوره بإذن ربنا وربها
ردحذفصباح الفل على الناس اللي مش عايزة تعكنن علينا فكتبت ليله بيضه
صباح الأمل إن بكره أحلى من النهارده وربنا يخلي شبابنا
صباح العقل اللي هو نعمة ربنا علينا وبيخيرنا ما بين طيب وردي
صباح الود والرحمة على كل من شاركوك ليلتك بكلام كله من قلب طيب لقلب أطيب...
أمنياتي بيوم جميل
لغة البلطجة تظهر عند غياب السلطة و هيمنةالحكومه علي الامن و تاريخ مصر به حقبه مماثلة بهيمنه الفتوات علي الحمايه بفرض القوة
ردحذفو هذا ما حدث الان تحول الامن الي امن رئاسي و حرس خاص لامن الكرسي و اللي يولع يولع فانتشرت البلطجه و الفتونه لان لا محاكم نافعة و لا شرطة منصفة و لا عزاء
الجنيه المصري يساوي 500 جنيه سوداني بعد ما كان يساوي 2 جنيه ناهيك عن الدولار و للتحايل اصدرو عمله جديدة هي الدينار السوداني=10 ج سوداني
ج مصري = 50 دينار= 500 ج سوداني
ده بلاسعار الحاليه
أيون بلاش تسمعى برامج سياسية أو تقرأى الجرايد أحسنلك من أجل حياة هادئة ههههه
ردحذفبمناسبة امتحان الأخرة
ياريت فعلا نستعد
تحياتى
*ابي
ردحذفموضوع العلف ده رحمه زمان اكلوا الشعب الغلبان بلوبيف كلاب
وموضوع الغد حزني عشان حسيت ان خلاص اي تغيير للأحسن هيموت
*جيرو عمرو
ردحذفكان ليه واحده صحبتي عايشه في السودان
وكانت بتقول نفس كلامك
واكتر
*الازهري
ردحذفعلامات ايه(قصدك يطلع له راس زي....)
ربنا يعافينا
*ميدو
ردحذفماانكرش ان ده وارد طبعا بس الراجل مابيجمعش ياميدو
ومني الشازلي كانت بتمثل قوي
بغض النظر عن اي توجه للناس دي
جميله زوجه محروق قلبها علي جوزها وهو شكله نصاب تليفزيوني
*ضد التيار
ردحذفالميل ماوصلش يالهوتي
هبعته تاني
*خمسه فضفضه
ردحذفماانا نمت عشان اقصر الشر
*ابوعلي
ردحذفطب اقول انا ايه بقه بعد اللي انت كتبته
ربنا يكرمك
وعلي فكره انا اخدتها تهريج لما النور قطع وقعدت شويه مع البنات نهرج
*رومنسي
ردحذفعلي فكره انا دايما اشغل سورة البقره
بس مش بقدر علي البخور عشان عندي حساسيه
ماتخفش خليك قاعد شمهورش مشي خلاص
*ماما اموله
ردحذفوالله ياست الكل
في اسامي كتير لحبيبي مانزلتش
كل مااتب العنوان يقولي لايوجد وده تعبني لأني بطر ادخل مدونتكم عشان اعرف كتبتوا جديد والا لأ
بس هحاول مره تانيه
همه حوالي 7 اسامي
هو انا اقدر ان مااحطش اسمك ده انت بتنوريني
*كوارث
ردحذفنورتني في اول زياره
صدقت هو شرف الوطن
المفروض ان الكلام ده بيتعمل عشان يثبت ان احنا شعب بلطجيه مش قد المسؤليه وما بنفهمش في السياسه ومانعرفش نكون احرار
*داليا
ردحذفنورتيني في اول زياره
جميله اسماعيل من اقوي النساء اللي شفتهم حصل لهم ازمات
بغض النظر عن اي توجه
هي في النهايه زوجه محبه لزوجها واقفه جنبه مصريه بجد
*كيار
ردحذفنورتيني
موضوعك الاخير عجبني قوي
ربنا يكرمك
*تويتر
ردحذفاجعلي اخر حاجه تعمليها دايما القرآن
نامي واخر مانطقتي به القرآنوان شاء الله في اي مشكله كمبيوتوريه نجيلك
*8صابر وراضي
ردحذفوعلكم السلام
*بيرم المصري
ردحذفحمد الله علي السلامه
نورتني عمرو زميل مدون لينا
هو الحقيقه الكتاب بيتكلم عن الاديان بختصار هو لخص من هنا علي هنا
يعني يشكر علي المجهود
بس اسلوبه ماعجبنيش
*م/الحسيني لزومي
ردحذفاهلا بيك
الحقيقه هي كانت ليله غريبه
حسيت ان ربنا بيقولي حاجات كتير برغم بساطة الربط
نورتني
*سيسم
ردحذفبس انا سمعت ان من كتر ما مني الشازلي اجادت في التمثيل اتعرض عليها مسلسلات رمضان
*ميس جه
ردحذفالاسم كده صح
اهلا بيكي في اول زياره
وشكرا علي المجامله اللطيفه
*مفكر
ردحذفبتسألني انا انتوا بتوع القصص والادب
بس اعتقد قمة الدرامه
بس ياسودا ياسودا
*من غير عنوان
ردحذفشكرا علي كلام حضرتك
مش لاقيه رد عشان هيكون اقل من حقك
نورتني
*احوال الهوي
ردحذفولسه احنا شفنا حاجه
انا سمعت ان الشركات الكبري العالميه هتفتح مصانع في السودان لستغلال الثروات اللي همه مش حاسين بيها تعرف حاجه عن الموضوع ده
*محمد غاليه
ردحذفطب اعمل ايه بحب البرامج السياسيه الهزليه منها والمنطقيه
وبحب الجرايد بجميع توجهتها
قول لي اعمل ايه
ههههههههههههههه
ردحذفلا هي ليله بيضه فعلا
والمكتوب باين من العنوان :)
حلوه التدوينه
تقبلي مروري:)
هي الحقيقة منى الشاذلي كان لازم تعمل كده عشان تفضحه .. موسى و اللي زيه أخطر بكتيير من الحزب الوطني
ردحذفبس زي ما قلتلك الراجل مبتدئ تماما .. محتاج تدريب كتير .. كذبه مفضوح على الآخر
*اقصوصه
ردحذفايوه كانت ليله باينه من اولها مع ان كان اليوم جميل من اوله بس لما جه الليل اتقلبت الدنيا
*سيسم
ردحذفماانا بقولك انه عامل زي نصابين التمثيل
موضوع الجرايد ده محيرني جدا
ردحذفعشان أوقات بقرا كل الجرايد قومية ومعارضة
وأوقات أحس انه ده تضييع وقت وفي الفترة الأخيرة أقلعت
*خواطر ليست عابره
ردحذفانا بحس ان لازم الواحد يقرا كل اتجاه
ولو عناوين ويقرا بالتفصيل اللي يهمه
اليوم الابيض بيبان من اْولة واليوم الاسود بيبان من اْولة كنتى ريحتى نفسك ونمتى من الاول
ردحذف*ايمي
ردحذفتقولي ايه اصل انا مابستسلمش بسهوله
بحب افضل اقاوح يااتعدلت يااستسلمت
ههههههههههههههههه
ردحذفالحمدلله إن الايميل عقل هههههههههههه
بوست جميل جدا
على فكرة الاخبار الوحشة مبقتش لليله واحدة بس
ردحذفدى بقت كل ليله
و ربنا معانا
تحياتى
شمس النهار .. اولا ارد على تعليقك وبعدين نتفاهم
ردحذفأولا نورتى عندى
ثانيا فى زواج الملك مينا انه كان يزور كل اقاليم الوجه البحرى ليؤكد لهم انه لم يكن غازيا بل انه نفر من هذا الشعب شماله وجنوبه وأن الجنوب ليس أميرا على الشمال ولا الشمال اميرا على الجنوب الكل فى مصر وعندما زار مقاطعة ..سايس .. استقبله أميرها بالترحاب واقامه فى قصر الضيافه وكان يخدم الملك اولاد أمير سايس ومن ضمنهم الاميره .. نبت حت .. التى خطبها الملك وتزوجها على ما ذكر ولم نجد ما يقول انه تزوج غيرها أو انها ماتت وتزوح من غيرها وهذه الفتره فى التاريخ القديم لا يستطيع ان يؤكد اكد صحة التأريخ لها مائه فى المائه وتظل سرا مطمورا من اسرار التاريخ وكلها محاولات لقراءة الحفريات .. وبعدين موضوع العاشره مساء امبارح كان الواحد مفقوع من اسمه ايه ده سلامه المخبر والبلطجى .. اما الجنيه السودانى والجنيه المصرى .. يا شيخه ما تسهريش كتير قدام التليفزيون وما تقريش الاهرام .. حد يقرأ الاهرام برضه .. اخاف تقولى والجمهوريه والاخبار .. هى دى جرايد .. دى نشرات زى اللى كانت هيئة الاستعلامات بتعملها زمان
هي في أيام بتبقى غريبة كده يا شمس،بجد معرفتش اعمل ايه وأنا بقرا كلامك غير إني اضحك على كل المصادفات دي..
ردحذفبصي متخليش حاجة تحرق دمك (نصيحة مبعملش بيها) لأن الأخبار والجرايد هي الطريق الملكي للأصابة بأمراض الدنيا، ربما يحميكي يا رب.
إلا قولولي أنتي حطيتي قائمة المدونات أزاي أنا عايزة احطها من زمن ومش راضية تتحط عندي :(
*اسامه وغيداء
ردحذفاهلا بيكم ونورتوني
*رانيا
ردحذفاهلا بيكي نورتيني
قصدك علي اخبار البلد والا الشخصيه
*فشكول
ردحذفشكرا علي ردك وشكرا علي البوستات اللي بتعملها وتعبينك معانا
بالنسبه للتليفزيون انا ماليش فيه وماعنديش خلق اقعد متحنطه امامه الا لو برنامج يستاهل اديه ودني ودماغي
اما الجرائد هي عاده قديمه عندي لازم اقرا الوفيات وكتير بنقذ مواقف في الموضوع ده
وكمان عشان ذكري ابي الله يرحمه لوشفت حد من اصحابه او معارفه او اقاربه ابعت تليغراف بأسمه
وكمان بحب اشوف كل الاتجاهات
بشكرك
*دعاء
ردحذفاهلا بيكي
الحقيقه انا باخد مجهود شويه عشان يتحرق دمي والمواقف دي دايما باخدها بالتهريج
لأن عندي قناعه ان مايعمل يعمل للخير
بالنسبه للقايمه
اه انت جيتي علي الجرح انت ماشفتيش بوست القايمه
عموما شوفي ياستي ميدو وفاروق همه اللي علموهاني
تدخلي علي من تخصيص علي اضافة اداه هيطلع لك ونوز اختاري اول حاجه فيها وهي القايمه
ونفذي التعليمات
وانا تحت امرك في اي وقت ماانا بقيت خبره في القايمه
امسحها اكتبها كله ماشي
ابقي اقري بوست القايمه
شمس النهار
ردحذفعندما تشرق شمس النهار تعلن للدنيا ان الحياة بدات بعد سبات الليل و لما ارشدتني اشعتها تتبعتها لانها انارت لي الطريق
مشكلتي انني حساس و الكلمة اشعر بعمقها
عمرو ذو قلم مبدع يدافع عما يكتب بشراسة المتنمر المتحفز لثقته بنفسه و ابداعه و لكنه لو سمع نداءات المتذوقين الاخرين سيكون له شأن في عالم القصة
عموما لا يصقل الذهب الا ....
شكرا لك و تحياتي
حبيبتى شمس النهار
ردحذفياما ليالى بتعدى علينا
وياما احداث بتحصل لينا
وياما احوال مش قادرين نغيرها
وياما ظلم مش قادرين نرفعه
وياما اشياء غريبة بتحصل لينا
ومش عارفين سببها
يمكن نكون جئنا فى وقت خاطئ
او زمان خاطئ
ولكننا نعيب زماننا والعيب فينا
وما لزماننا عيب سوانا
ولا يهمك اهى ليلة وبتعدى
وياما ليالى المهم نكون دايما لله طائعين
دمتى حبيبتى
سيبك انتى النوم افضل وسيلة للهرب
وخصوصا فى الليالى البيضاء
smilyrose
روح الحب الصادق
*احوال الهوي
ردحذفاشكرك علي الكلامات الجميله
وربنا يديم المحبه بينا جميعا
8سميلي روز
ردحذفعندك حق
كلامك رقيق وجميل
واهي ليله زي اي ليله بتعدي في العمر المهم الزاد الاخير
نورتيني
عكوسات عكوسات :))
ردحذفمعلش بكرةتوق وتحلى وربنا يسهل :)
*فوكسلوجيا
ردحذفايوه بالظبط هي كانت ليله معكوسه