الثلاثاء، 16 أغسطس 2011

توم وجيري





العلاقة بين المجلس والثوار بقت عاملة زي توم وجيري
لييييييييييه؟؟؟؟؟
مش عارفة ؟؟
حد عارف؟؟
مش كنا سمن علي عسل
فاااااااااااجأة الدنيا اتقلبت
ومن بعد ماكانوا الشباب حلوين ومقطقطين وبيقعدوا يتكلموا معاهمبقوا وحشيييييييييييين
وكله كوم وتهمة مناوء دي كوم مش برضوا هي مناوء
نكونش شيلنا ديكتاتوووووووور
علشان يجي بدالة عشرة خمستاشر
وايه حكاية ان المدنيين يتحاكموا عسكريا دي
علشان قال رأي وبصراحة
وبعد ماكان الجيش والشعب ايد واحدة
وماعرفتش الايد الواحدة دي تسقف
دلوقتي خلااااااااااااص
اللي عايز يبعبع له بكلمتين
يحضر شنطته ويرهن الكردان الدهب
اه ما الفدية 20 الف جنيه
وانت وشطارة المحامي بتاعك بقا
ده علي كده المخلوع كان عامل لنا اوكازيون بقا
وبمناسبة المخلوع
ايه الباي باي دي اللي كان بيعملها ونبي ضحكني
والاخوين الظراف اللي حاولوا يستظرفوا اوي
حركاتكم مكشوفة وان شاء الله المحاكمة مستمره
ويارب يعملوا لكم الزنزانة طوبة فضة وطوبة دهب
برضوا زنزانة ومش زي ماكان بتاخدوا الطيارة تروحوا تلعبوا جولف في اوروبا وترجعوا اخر النهار
ولا تروحوا تتعشوا في باريس وترجعوا
وتلتين الشعب يافي العشوائيات يامش لاقي ياكل
واللامبارك اللي امر بقتل الشعب
جه يوم الحساب وربنا مش بيسيب حق حد
وحقوق الناس الغلابة مش هتروح هدر ابدا
المدونة هنا مش بتحب اللامبارك وماحدش يدخل يقول لي عيب ده ابونا
اللامبارك مش ابو حد
وده شخصية عامة هو والمجلس اللي سابهولنا يرازي فينا ويحاكمنا عسكريا لأقل كلمة
والشخصية العامة من حقنا ننتقدها زي مااحنا عايزين
سيدنا عمر بن الخطاب - رضى الله عنه - حينما تولى الخلافة خطب وقال
(أيها الناس إنى وليت عليكم ولست بخيركم فإن رأيتمونى على حق فأعينونى، وإن رأيتمونى على باطل فقوّمونى) فرد أحد الحضور «والله أقوّمك بسيفى»
بس اصلها عادة فرعونية تأليه الحاكم
ماعلينا
ياريت مسلسل توم وجيري ده يخلص
وعجبني يسري فودة النهاردة وكذلك محمود سعد
البرنامجين كانوا موفقين جدااااااااااا
وشكرا يامجلس العسكر شكرا
11الف من الشعب مقبوض عليهم في ست اشهر
اسمع كلامك اصدقك اشوف امورك
استعجب
وبقول للناس اللي اطلقت علينا فاجاة
لما ابتدت المحاكمات
القافلة تسير والكلاب تعوي
والمحاكمات ماحدش هيقدر يوقفها
خلاااااااااااااااااااص
كش ملك
في

هناك 38 تعليقًا:

  1. εïз زهرة εïз17 أغسطس 2011 في 4:50 ص

    توم وجيري فعلا

    بس الفرق ان الاصابات حقيقية

    مش زي الكارتون ان شالله جراله ايه هيصحى تاني

    ..

    ربنا يحفظ مصر من كل شر :)

    ردحذف
  2. فافى17 أغسطس 2011 في 4:54 ص

    والله مانا عارفه هاتخلص على ايه المحاكمات دى مش قادره اخمن انا لا يهمنى يتعدم ولا يطلع براءه انا بس مش عايزه استهبال ويتحاكم محاكمه عادله وخلاص
    يارب اكون اول تعليق:)

    ردحذف
  3. مصطفى سيف الدين17 أغسطس 2011 في 5:38 ص

    بصراحة المجلس العسكري بقت اعماله مريبة
    الظاهر احنا فهمناه غلط وقلنا مادام سابولنا الدبابات نتصور عليها يبقى خلاص بقوا اصحابنا
    اتاري الدبابات فيها سم قاتل
    ربنا يعدي الفترة دي على خير بس حضرتك الحقي اعملي الكحك بسرعة علشان توزعيلنا قبل ما ييجوا زوار الليل:)
    تحياتي

    ردحذف
  4. سواح في ملك اللــــــــــــــــــه-17 أغسطس 2011 في 6:21 ص

    بصي بقي ياشموستنا

    يعني انتي عاجباكي الفوضي بتاعة كل يوم

    اعتصام كل اسبوع مليونية مش عارف ايه

    عشان مش عارف مين نزلوا مليونية

    وبعدين ياريتها تيجي علي مليونية

    ونفضها ونمشي لا ابببداا

    يطلع ميتين تلتمية ويقوللك اعتصام

    طيب الهدف ايه من الاعتصام

    واحد يقوللك الدستور الاول والتاني

    يقوللك مش عايزين الوزارة

    والتالت يقوللك رفع المرتبات

    والرابع يقوللك عايزين مساكن تاوينا

    طيب فين دم الشهداء وم-حاكمات قتلة

    الشهداء

    لما يتزنقوا اوي ويحسوا ان طلباتهم مش

    معقولة يقولولك دم الشهداء

    طيب مكان من الاول المطلب ده يبقي

    الوحيد والرأيسي

    انا متهيالي انهم لو سابوا الدنيا كدة

    اللي هيتخانق مع جاره بعد كده هيروح

    يعتصم في التحرير عشان ياخد حقه

    ياشموستنا

    الثوار مش بتوع سياسة

    وكل كلامهم تلاقي فيه غلطات

    وانا خايف نخرج من تأليه الحكام لتأليه

    الثوار

    الثورة بدون المجلس العسكري وقيادات

    الجيش مكانتش ممكن تنجح

    وبدون مساندة الشعب اللي هوه احنا

    مكانتش ممكن تنجح

    وعلي فكرة انا بقدر اسماء محفوظ

    جدا بس هي مش نبي ومش معصومة

    من الخطا ولو اخطات تتحاسب

    ردحذف
  5. The illusionist17 أغسطس 2011 في 7:39 ص

    ايواااااااااااااااااا

    اه والله

    والله البوست ده شكحنى جدا

    اه والله

    ده مش توم جيرى ده بيقى ميكى ودنجل

    بندق وابو طويله

    حاجه كده ملهاش اى معنى

    حاسس انو سبيس تون برنامج الخدعه اللى عمرك ما هتعرف سرها

    ناس طيبين قوى الناس دى

    تفتكرى فى حاجه هتبقى سعيده زى ما بيحصل ساعات فى توم وجيرى وتوم يتعاون مع جيرى عشان يهزموا الكلب الكبير

    مع اختلاف التشبيهات هنا ؟

    ردحذف
  6. Moalgredy17 أغسطس 2011 في 9:45 ص

    جميلة جداً هذه التدوينة

    نظراً لبعدي عن الساحه المصريه مش عارف أوي اللي بيحصل بس متابع من بعيد لأني مليت...

    اللي يسمع كده يفتكر أني مش مصري

    أنا مصري وأبويا مصري علي رأي نانسي
    بس أقدر أقول ان رأي المصريين اللي خارج مصر كلهم تقريباً نفس رأيي

    في حالة خمول وطنية
    زهقنا من اللي بيقوله التليفزيون
    مش شايفين جديد

    بس عندنا أمل أنه هيحصل بإذن الله

    ومنتظرينه

    تحياتي .....

    بحب مصر

    ردحذف
  7. ابراهيم رزق17 أغسطس 2011 في 11:15 ص

    رغم ان اسماء محفوظ دى من الشخصيات اللى بتعصبنى لا تجيد الكلام و عندها قدرة غريبة على فقد التعاطف الا انها فى الموقف ده معاها قلبا و قالبا و اخدت اجازة و رحت عند النيابة و كان نفسى الا تدفع الكفالة عشان تحرج المجلس العسكرى بس طبعا الامر يرجع لها و عشان خاطر اهلها
    لو اسماء و غيرهم لم يتكلموا و لم يستمع اليهم من الذى يتكلم عمرو مصطفى و طلعت ذكريا
    نأتى للمستفزين قوى و على راسهم هبيب الظالمى و ابتسامته الصفراء التى تشبه اسهال الاطفال اسف على التعبير
    نعود للمحاكمة القاعدة تقول طالما استقر يقين و ضمير القاضى هو القاضى ده مش من مصر و عارف حسنى و عارف انه قتل يعنى مفروض من جلسة واحدة و نخلص و مع ذلك نحن فى انتظار الحكم و فى انتظار مكر الديب
    اه يا بلد
    تحياتى و سلامى الى نور الدين

    ردحذف
  8. sabry abo-omar17 أغسطس 2011 في 11:57 ص

    فعلا دلوقتى الدنيا ضلمت.. ربنا يستر.. أظن محتاجين نستعجل الفترة الانتقالية دى ونتحرك بسرعة ناحية تسليم الحكم لسلطة مدنية

    ردحذف
  9. غير معرف17 أغسطس 2011 في 4:21 م

    ثقافة الهزيمة .. مغامرات البقرة الضاحكة

    ما قصة لوسي أرتين؟
    ـ لوسي أرتين كانت علي علاقة بالرئيس مبارك والعلاقة بدأت عن طريق زكريا عزمي وجمال عبدالعزيز، و كان فيه رجل أعمال مشهور بيحب يعرف مبارك علي فتيات من دول شرق أوروبا وحسين سالم كان متولي دول غرب أوروبا.

    هل قصر الرئاسة كان يدار بهذه الطريقة؟
    - القصر كان يدار بالسفالة والأسافين والنقار والقمار والنسوان وقلة الأدب ودا كل اللي كان شغلهم ومصلحة البلد بعدين .

    هي سوزان كانت بتحس بالغلط اللي كان بيعمله الرئيس؟
    - هي كانت مقهورة من اللي بتشوفه والنسوان داخلة طالعة قدامها واللي جايين من أوروبا الشرقية وأوروبا الغربية ومش قادرة تتكلم وبتبكي علي طول بسبب اللي بتشوفه وأحيانا كنت بأصبرها وأقولها مصر مافيهاش غير سيدة أولي واحدة، بس بعدها قرر الرئيس أن ينقل جلساته الخاصة في شرم الشيخ وبرج العرب .

    ھل تزوج علیھا؟
    -لا ھو مش محتاج یتجوز .. البركة في زكریا عزمي وجمال عبدالعزیز. ...

    باقى المقال ضمن مجموعة مقالات ثقافة الهزيمة ( بقلم غريب المنسى ) بالرابط التالى

    www.ouregypt.us

    ردحذف
  10. شمس النهار17 أغسطس 2011 في 5:18 م

    *εïз Semsema εïз

    ان شاء الله مصر محفوظة

    بس لعبة حاوريني ياطيطه دي(ماتسألنيش مين طيطه دي)

    اللعب ده لازم يخلص علشان نفوق للبلد بقا

    ردحذف
  11. شمس النهار17 أغسطس 2011 في 5:21 م

    *فافى

    ماهو يافافي هايتحاكم هيتحاكم
    علي كل صغيرة وكبيرة
    انا بتكلم علي الاستفزفز لمشاعر الناس
    تحسي ان في قوة غامضة كده بتستفز الشعب

    وطبعا هيتحاكم محاكمة عادلة
    القضاء المصري بخير طبعا
    والقاضي ده بالذات كل الحقوقييييين بيشكروا فيه وفي نزاهته وصرامته في الحق

    ومعلش ياجميل سمسمه سبقتك
    :)

    ردحذف
  12. شمس النهار17 أغسطس 2011 في 5:26 م

    *مصطفى سيف

    ايوة يامصطفي انا معاك المجلس العسكري بقا تحركاته وتصرفاته وتصريحاته غريبة جداااااااا

    لاتتفق مع حمايته للثورة

    واللي انا مستغرباه اللي بيحصل مع الثوار والنشطاء الان
    بيتشدوا واحد واحد ليه
    نظرية اضرب المربوط يخاف السايب

    يعني ياتيارات اسلامية لموا نفسكوااا
    ادي اللي بيحصل في الثوار نفسهم

    امن شاء الله الفترة هتعدي علي خير
    الشعب المصري مش هيضحك عليه تاني


    مين قالك يامصطفي اني بعمل كحك
    :)))))
    لا انت كده فاهمني غلط خااااالص
    اومال الكحك الجاهز ده بيعملوه لمين
    :))))))
    للهوانم اللي زي طبعا
    :)))))))))
    وبعدين انت دقة قديمة اوي الزوار دول ماباقوش يروحوا لحد
    ده كان زمان
    دلوقتي بيبعتولك حتت ورقة صغننة كده
    وانت تروح لوحدك زي الشاطر
    وتسيب الكردان في البيت علشان الكفالة
    :))))))

    ردحذف
  13. شمس النهار17 أغسطس 2011 في 5:38 م

    *سواح في ملك اللــــــــــــــــــه

    اللي بيحصل من المجلس الان ياسواح مالوش دعوة باللي بتقوله
    اللي بيحصل دلوقتي قصقصت ريش لكل التيارات الموجودة
    تقدر تقولي 7 شهور والمطالب الفئوية ليه ماتحلتش لحد دلوقتي
    النهاردة لما تلاقي الجيش كل شوية مطلع فلوس شئ للعشوائيات (مع ان رجال الاعمال وبعض المؤسسات شالت الموضوع ده)
    وبعد شوية شنط رمضان
    من امتي الجيش بيطلع شنط رمضان ده غير الطريقة المهينة اللي فرقوها بيها
    ونلاقي شرف مطلع كام مليون علشان تجديد المقار الرئاسية
    يعني الطلبات الفئوية اعتقد اقل من كده بكتير
    واغلبها تعينات لناس بالعقود من حقهم يتثبتوا
    او ناس وعدوهم يرفعوا الاجور ومارفعوهاش حضرت وقفة في كفر الشيخ لعمال النظافة اللي بياخدوا 200 جنيه مرتب ده كلام برضوا
    انا معترضة ياسواح علي طريقة توم وجيري والاستفزاز
    يعني لما تحاكم نشطاء عسكري في قضايا حرية نشر او سب
    باقي النشطاء هيسكتوا
    ده بعتبروا استفزاز وبتشد القطة من ديلها ومش عايزها تخربشك
    من امتي حرية الراي في بلدنا بيتعمل فيها كده
    ده المخلوع ماعملهاش
    ولا المجلس رضي الله عنه علي راسه ريشة
    المجلس ان احسن يستحسنه وان غلط نقول له انت غلطت علشان مايتماداش ونستني الكارثة
    وبعدين كل شوية يقولك الثورة من غير المجلس ماكانتش تنجح
    ماشي ياسيدي مااعترضناش وهللنا للجيش وللمجلس بس ده مش معناه ان لما يغلط اسكت له
    يعني الصديق لما ينبه صديقه ان غلط يروح صديقه ضاربه علشان نبهه
    المجلس جنب كل التيارات والقوي السياسية وبيعمل اللي علي مزاجة دلوقتي
    وارجع لكل القرارات اللي اتخذها لما يشارك فيها اي حزب او تيار ولا حتي الشعب
    احنا بنرسي الان قواعد دولة جديدة ماينفعش حد ينفرد لوحده
    وعلي فكرة الموضوع مش اسماء محفوظ ولا غيره
    الموضوع الفكرة نفسها
    محاكمة المدنيين محاكمة عسكرية
    ماينفعش
    احنا بنطلب كلنا محاكمة عادلة للمخلوع
    يبقا من باب اولي المواطنين
    اومال الناس هتحس بالعدل امتي
    ومن اولها مافيش عدل

    ربنا يستر

    ردحذف
  14. شمس النهار17 أغسطس 2011 في 5:39 م

    *The illusionist

    ضحكتني بجد

    :))))
    لا لا اعتقد

    عمرك شوفت قطة بتلعب مع فار
    طيب عمرك عرفت ليه همه اعداء
    :))))
    ؟؟؟

    ردحذف
  15. شمس النهار17 أغسطس 2011 في 5:41 م

    *Just Me

    غريبة مع ان المصريين اصحاب اللي بره بحسهم عارفين اللي بيحصل هنا اكتر مننا

    خصوصا بتوع امريكا
    :)))

    ان شاء الله خير
    وصدقني مصر هترجع احسن من الاول بس عايزة شوية صبر ووقت
    وناس بتحبها صح مش حب مصلحة زي بتاع اليومين دول
    :))

    ردحذف
  16. شمس النهار17 أغسطس 2011 في 5:49 م

    *ابراهيم رزق

    الموضوع مابقاش اسماء محفوظ
    الموضوع ان في 12 الي 11 الف مصري مقبوش عليهم منهم قصر
    وبيتحاكموا محاكمات عسكرية ومن غير اي عدالة
    ايه ده هي ثورة ولا مظاهرة والمخلوع موجود

    وعلي ذكر عمرو وطلعت
    تحس في برامج الحوارات السنة دي الاتجاه لتلميع وسماع فلول النظام
    انت معايا في ده ماتلاقيش حد من بتوع الثورة او السياسييين اللي بجد

    اما محاكمة اللامبارك
    دي قمة الكوميديا اللي علي حق
    شوفت الباي باي
    ولا ولاده اللي عاملين ماسكين نفسهم
    ليه الظالم المفتري مابيبقاش حاطط ان في يوم حساب

    نور الدين بقا كميلة كل مايكبر ونبي بيحلو
    :))))
    هو سماره شوية بس كميلة
    :))))
    وهناخد ساليناز يعني هناخد ساليناز
    :))))
    وزي بعضه هناخدها بقلتها

    ردحذف
  17. شمس النهار17 أغسطس 2011 في 5:51 م

    *sabry abo-omar

    المشكلة اننا انتقلنا تاني
    من مقعد المشتركين في الامور
    الي مقعد المتفرجين وتاني رجعنا مش عارفين حاجة في اي حاجة

    ردحذف
  18. Unknown17 أغسطس 2011 في 9:28 م

    بس أنا بحب كرتون تومى وجيرى اوووووووى يا شموسة........*ــــــ^

    ردحذف
  19. rack-yourminds17 أغسطس 2011 في 9:42 م

    اولا: لا يوجد عاقل في مصر يقبل أن يحال اي مدني الي المحاكمه العسكريه,لان من شان هذا اعادة انتاج نظام مبارك الفاسد

    ثانيا :يجب ان تكون ثقافة الاختلاف والنقد في حدود الادب والاحترام ,اما التجريح والسب والقذف فهذا ليس فقط مضيعه للحق والوقت بل ايضا من شانه فقدان تعاطف كثير من الناس لوجهة نظرك

    ثالثا: أتمني ان يدرك الاعلام ان مبارك ونظامه اصبح من الماضي ومن ثم يجب ان تكون اهتاماته مستقبل مصر والمعاناة التي ييعيش في ظلها الشعب المصري وما اكثرها الان

    ردحذف
  20. Unknown17 أغسطس 2011 في 9:50 م

    ربنا يطمنا عليكى
    ياشمووووسة :):):)

    ردحذف
  21. ريهام المرشدي18 أغسطس 2011 في 12:26 ص

    السلام عليكم و رحمة الله
    و الله يا شمس احنا نقول اللى لينا و اللى علينا ، اللى بيحصل ميرضيش حد أ÷ لكن برضو العطله اللى احنا فيها مترضيش حد ، احنا خارجين من ثورة "حتى لو تحفظ البعض على انها ثورة أم لا" يعنى المفروض نعوض اللى خسرناه و كمان نبقى ايد واحدة قبل مانحطها فى ايد الجيش انما احنا متفرقين و كل يوم بنزيد تفرقه ، و الغريب اننا معانا الحق بس هنضيعه بعدم الترتيب اللى احنا فيه و خير دليل على كلامى الجلسه التانية من المحاكمة ، هم على باطل و مرتبين و اهل الشهداء على حق و عشوائيين ، لازم نلحق نفسنا قبل ما يعدي الوقت و يتمكنوا تانى فى صورة ناس تانيه ، أو يطمع غيرهم فينا ، ربنا يصلح الأحوال يا رب .
    عذرا على استخدام العامية و لكن هذا ما أردت أن أقوله ... تحياتي .

    ردحذف
  22. Foxology18 أغسطس 2011 في 12:41 ص

    قلتها وهفضل أقولها : الكلاب مش بتعض ودان بعضها !!!

    وزى ما قال العرب زمااان : شهاب الدين أزرط من أخيه .. يعنى ألعن وأسوأ منه

    تحياتى

    ردحذف
  23. غير معرف18 أغسطس 2011 في 2:38 ص

    هشرح لك وطبعا أنتي ست العارفات

    الموعد المضروب لنقل السلطه أقترب

    طب وبعدين؟ دا هما اللي بيقولوا

    ديمقراطيه بجد ولا ايه؟ برضو هما اللي بيقولوا

    الشعب هيحكم ويتحكم خلا ص...؟ برضو هما اللي بيقولوا

    طب ما تيجي نخربها بئا

    دي من عندي علشان الحبس بئا والذي منه

    ردحذف
  24. شمس النهار18 أغسطس 2011 في 4:44 ص

    *Diara El-Masry

    وماله ما من كتر ما اغلب الشعب بيحب توم وجيري ادينا بنلعبها كلنا
    :))))

    ردحذف
  25. شمس النهار18 أغسطس 2011 في 4:51 ص

    *rack-yourminds

    اهي نمرة اتني دي اللي لانجيدها ابداااااااااا

    ماحدش بيعرف يختلف من غير شتيمة
    كل اللي بختلفوا معاك تلاقيهم داخلين يشتموك
    وده انا بعتبره ضعف حجة
    اللي ماعندوش حجة قوية بيشتم علي طول

    ونمرة تلاته موضوع الاعلام لحد دلوقتي مش قادرة استوعبه الاعلام بكل رموزه مع مين؟؟
    المفروض انه يكون مع مصر وثورة شعب مصر

    ردحذف
  26. شمس النهار18 أغسطس 2011 في 4:52 ص

    *norahaty

    لاتقلقي يادكتورة الرب واحد والعمر واحد

    :))
    والكردان موجود

    :)))))

    ردحذف
  27. شمس النهار18 أغسطس 2011 في 4:56 ص

    *ريهام المرشدي

    وعليكم السلام ورحمة الله وبركاته

    كلامك تمام التمام
    بس العطلة مش من الشعب
    الشعب بينزل يشتغل
    واللي حاكمينه الان بيستفزوه بكل الطرق

    وفعلا لازم نلحق نفسنا ونبقا ايد واحدة تاني زي ماكنا في اول الثورة
    مش مليون ائتلاف علي تيار علي مش عارفة ايه

    واتكلمي زي ماانتي عايزة عامية عربية فرانكو عربية
    المهم نتواصل مع بعض
    :)))
    انتي مش بتشوفي كمية الغلطات الاملائيه اللي بتبقا في البوست ولا ايه
    وخصوصا الهمزة
    :)))))

    ردحذف
  28. شمس النهار18 أغسطس 2011 في 4:58 ص

    *Foxology

    بس عارف ياابو يوسف
    عندي امل وايمان قوي انا نفسي مستغرباه
    رغم اللي ظاهر ده كله
    بس مستبشره خير
    وخصوصا بعد مااتفعل قانون الغدر ده
    بصراحة اثلج صدري كده وخصوصا ان الدنيا حر وصيام

    :))))))

    ردحذف
  29. شمس النهار18 أغسطس 2011 في 4:59 ص

    *مصري جدا

    :)))
    يعني ايه يامتر كرسي في الكلووووب

    :))))))

    وبعدين حبس ايه اومال مين هيطلعنا كلنا
    ده انا موصية العيال
    يبيعوا الكردان وينادوا عليك

    :)))))))

    ردحذف
  30. غير معرف18 أغسطس 2011 في 10:11 ص

    الجيش بيقرطس الشعب ... ربنا يستر والقرطاس مايطلعش ضيق

    ردحذف
  31. Lady E18 أغسطس 2011 في 11:21 ص

    شالو ألدو جابو شاهين

    هو مين حطهم ع البلد أصلا يا شمس طبيعي ده يبقى حالهم

    الحاجة الوحيدة اللي الجيش معملهاش هو انه مضربش المتظاهرين ايام يناير وفبراير وكان سلبي سابهم يضربو لكن مضربش فيهم ودلوقتي بيضربو بس بطريقة تانيه
    على رأي الأغنية : وش ياخد ابن البلد من مجلس الضباط

    ردحذف
  32. شمس النهار18 أغسطس 2011 في 2:14 م

    *فتاه من الصعيد
    تفتكري ان الشعب المصري ممكن يتقرطس تاني
    دا هي دي المشكلة ان الشعب مش هينفع يتقرطس تاني ولا يضحك عليه تاني
    الموضوع جد الجد
    والشعب مابيهزرش
    ومستبيع
    وهيسخطوك ياقرد قال وايه يعني
    يعني هيسخطوني غزال
    :))

    ردحذف
  33. شمس النهار18 أغسطس 2011 في 2:17 م

    *Lady E
    :)
    حق ربنا الجيش ماضربش
    هو سابوهم يضربوا براحتهم


    بس بعد ماالامور استتبت ضرب هو

    فاكرة كان في مسرحية اسمها البيه صاحب العمارة
    كان بيقول ايه ساجعة وحلوة ماشراااابيش ليييييييه

    :))))

    ردحذف
  34. Dr Ibrahim18 أغسطس 2011 في 3:21 م

    قلنا مليون مرة المجلس العكسرى لازم يمشى..طلع علينا ناس وقالوا مش هنقدر نخش الانتخابات فأجلوها شوية..اتأجلت عشانهم..كنا زمنا الوقتى كمان 15 يوم بنقول للمجلش العسمرى باى باى..بس نقول ايه..

    طبعا هيقولوا نعمل مجلس رئاسى مدنى..طبعا مينفعش..عشان البلد هتولع وتتحول الى حرب أهليه!

    طبعا المجلس العكسرى هيخون كل الناس..وهيضرب كرسى فى الكلوب قريب عشان امريكا عايزه كده عشان عارفة ان العلمانيين مش هيوصلوا الحكم وان الاسلاميين لهم قوةلايستهان بها..فمن مصلحتها ان اللى يمسك مصر عسكرى!!!
    (قمة الديمقراطية!!)

    وعلى الرغم ان هناك تصرفات من بعض الثوار كاسماء محفوظ عندما تسب وتشتم على الهواء مباشرة!! الا انه لايجوز محاكمتهم عسكريا ومن يتم محاكمته عسكريا هو البلطجى!

    فهو المجلس العكسرى الآن عاوز يضرب عصافير بحجر واحد.!!
    والله أعلم

    ردحذف
  35. شمس النهار18 أغسطس 2011 في 4:00 م

    *Dr Ibrahim

    المجلس بيعمل نفس اللي عمله اللامبارك
    قالك ماينفعش يمشي علشان الفراغ الدستوري طيب علشان نقدر نغير الدستور وفضلوا يلعبونا
    ولما اتخلع ماحصلش حاجة
    اهو احنا دلوقتي بنمر بنفس الموضوع
    زيد عليه المحاكمات العسكرية
    وانهم ياخدوا اسماء دي في اعتقادي حركة نص كم
    يعني اضرب المربوط يخاف السايب
    وهي موجهه في الاصل للأسلاميين
    وانذار لهم
    مش هنطبطب علي حد
    كل تيار يلم نفسه
    ولا هتتجرجروا زي ماجرجرنا الناس دي كلها
    واللي يسكت علي جرجرت اخوه
    مايشتكيش بقا لما يتجرجر هو
    في شئ بيتعمل مش مفهوم
    ومافيش حل غير ان جميع التيارات والقوي السياسية تلتحم تاني مع الشعب وتنزل من الابراج اللي طلعوها
    علشان نقدر نحافظ علي الثورة ونقدر نكمل
    في النهاية كلنا مصريين في مركب واحد
    ان عبرت بسلام كلنا هنبقا في امان
    وان غرقت هتغرق بالجميع
    ربنا يستر
    ورغم كل اللي حاصل عندي امل في الله كبيييييييير
    ومتفائلة جدااااااااا
    والشعب المصري مش هيضحك عليه تاني

    ردحذف
  36. Tarkieb18 أغسطس 2011 في 5:03 م

    كنا بنحب جيري عشان بيضحك على توم ....لكن هنا توم عمال يدي جيري على قفاه وبقية الجرزان واقفة تتفرج....من انتم ههههههههه

    ردحذف
  37. شمس النهار18 أغسطس 2011 في 11:35 م

    *Tarkieb

    من انتم؟؟
    لسه بتسأل؟؟!!
    نحن اللي بناخد علي قفاهم
    :)):)):))

    ردحذف
  38. شمس النهار18 أغسطس 2011 في 11:37 م

    *Just Me

    شكرا علي اهتمامك بالرد عليه
    وانت علي فكرة علقت في بوست الحب زمان مش توم وجيري
    :))
    معلش هو الاشراف ده رخم كده
    :)))))

    ردحذف

ياريت نعلق بالحقيقه اللي جوانا
وبضمير