ثورة لأ ماثوراشي

ثورة لأ ماثوراشي
ليييييييييييه ؟؟
تعالوا نشوف ليه؟

رحت مكان ما من غير اي واسطة ولا حد يوصي علينا
مع ان لو طلبت هيضرب لي بروجي وانا داخلة
بنتي قالت لي هنروح كده مش هتقولي لحد
قلت لها وانا متعنطظة اوووووووي
نقول لحد ايه يابنتي
مصر اتعمل فيها اجمل ثورة الناس اتغيرت
وياويله اللي مايسمع كلام بنته الصغيرة
المهم
دخلت وبعد السلام عليكم اللي اترد عليها بالعافية ومن تحت الضرس
قلت انا جاية ليه وحاجزة ايه وعايزة ايه
مش عايزة اقول لكم
كم قلة الزوق والبواخة اللي صدرت من هذا الشاب
وكالعادة مااتنرفزتش
انسحبت من قصاده وهو بيتكلم وخرجت عملت اتصالاتي
ولما اخدت الاوكيه لاقيته هو اللي طالع من مكتبه المكيف يدور علي سعادتي
واتغيرت الدنيا وبقت سيادتي والدنيا بقت بمبي
انا بقا ماسكتش
قلت له هو انت اشتركت في المظاهرات بتاعة الثورة
بكل فخر وحماس انا كنت من المقيمين يافندم يومي رغم خطورة ده عليا
قلت له يعني انت ثورجي
قال اه
قلت له طيب ليه لابس عباية النظام القديم
ليه لما جيت لك من غير وصاية رغم اني جاية اخد خدمة وهدفع تمنها
مش هقولك من اللي عليك
عملت كده
ولما عرفت اني اخت فلان عملت العكس تماما
قلت له للأسف احنا عملنا ثورة علي نظام
ولسه النظام ده معشش في عقول اغلبنا
ايه هنغير الشعب كمان
زعلاااااااااانة بجد

الذكريات الجميلة

الذكريات الجميلة مابتتنسيش
وطول عمري اقول
ان الذكريات الجميلة بتؤلم زي الذكريات المؤلمة واكتر
بتؤلم علشان بنقول لما كان في حاجات جميلة كده افترقنا ليه
البوست ده لأبن من ابنائي اللي بعتز بيهم
وعايزة اقول له
انتوا مافترقتوش علشان اختلفتم مع بعض
ولا انكم مش عارفين تحبوا بعض
ولا علشان مش عارفين تتفاهموا
وصدقني الذكريات الجميلة دي
اللي بينكم هتردكم تاني
مش هينفع حد يمحيها عندها ولا عندك
وان شاء الله تكون سبب رجوعكم تاني ورجوع الخطوبة
ايوة مش المهم الذكريات
المهم ان الذكريات دي تكون ماينفعش حد يعملها تاني ولا يمحيها
والخلاف اللي بين العيلتين هيروح وهترجعوا تاني
وبهديك الاغنية اللي كانت شغالة في خطوبتكم
اللي انا طلبت من الدي جي يذعها لكم
:)

=========
ونقول يارب وندعي لكم ربنا يردكم لبعض تاني
وخصوصا انكم مالكمش ذنب في اللي بيحصل
ندعي لهم
ونقول
آمييييييين

ابتسم :)

اليومين دول بتعامل مع اغلب بياعين مصر في مختلف المجالات
وطبعا بياعين مصر مالهمش زي ابدا
بجد ماشوفتش زيهم في اي بلد زرتها
بتاتا البتة
ده عاااااااادي وكنا متعودين عليه
لكن اليومين دول مالهمش حل
زااااااااادوا وزودوهاااااااااااا
تدخل المحل تحس انك بتتعامل معاملة الزنوج في امريكا زمان
تحس انك اقلية انكشارية مضهطه من اسيادك البياعين
ده غير التكشيرة اللي بتحس معاها انك شوية شوية هتتمد علي رجليك
البلد فيها كساد والمفروض ان البياع يجتهد يبيع
علشان يحافظ علي مكان اكل عيشة
وياخد مرتب واعتقد في محلات بتدي نسبة من المبيعات
عمري مادخلت محل بره مصر الا والبياعين كانوا مبتسمين لطاف
يتودد اليك وتشتري اكتر طبعا من زوق البياع
مش عارفة امتي بياعينك يامصر هيتعلموا فن البيع وفن الابتسامة
ده حتي تبسمك في وجه اخيك صدقة
ده مايمنعش ان في بياعين كويسين جدااااااا
بس دول بقوا قلة مندسة علي البياعين المكشرين

ونبينا صلى الله عليه وسلم قال: (رحم الله عبداً سمحاً إذا باع، سمحاً إذا اشترى، سمحاً إذا اقتضي.)

اردوغان

مععلش بغيب كتير اليومين دول
مشغووووووووولة
عندي اكتر من حدث الحمد لله سعيد بستعد له
ومقصرة مع الكل بس انتوا طيبين وبتسامحوا
:)
ندخل علي البوست
رغم انشغالي وبعض من الزعل من حال البلد
ايوووووووة
مش موافقة علي موضوع السفارة
ولا اللعب اللي كان بيتلعب يومها
والجمعة كانت جميلة وزي الفل
ايه اللي قلب الدنيا
وضرب كرسي في الكلوب
الله ورسوله اعلم
وان شاء الله كله هيعلم
---
برغم كل ده بس حبيت اسجل زيارة الاخ اردوغان
مما لاشك فيه انه زعيم بكل ماتحمله الكلمة
ونظرة واحدة علي تركيا
تخلينا نبصم بالعشرة الرجل متدين محبوب وزي الفل
وعصامي وبرضوا كان بياع
بس المرة دي مش موز لا كحك بسمسم
المهم علي راسي كل ده
مخاصم اسرائيل ومطلع علي جتتهم البلاء
ماشي
ماانت كنت عامل معاهم اتفاقيات وتسليح وبلاوي
قلبتوا علي بعض
ماشي
بس ياسيادت الريس
ماينفعش انك تدور علي دور ورياسة لك في المنطقة العربية ومصر موجودة
وزعلت جدا من مستقبلية من الشعب من التيار الاسلامي اللي هتفوا خلافة اسلامية
طب اهو قالكم ادعوا مصر ان تكون دولة علمانية
ليه هو انتوا فاكرين انه هيجي هنا ويقول ادعوا مصر لدولة اسلامية
ويخالف دستور بلده
لاحول ولا قوة الا بالله
تركيا غير مصر(الله يمسيهم بالشر بقا اللي اخترعوا الكلمة دي:))
المهم تركيا غير مصر
تركيا عملت نفسها وروقت المسائل وعملت اقتصاد قوي جدا
وجيش من اقوي جيوش المنطقة
واترستئت كده وراقت وفضيت للي حواليها
هو جاي ليه لحد دلوقتي انا مش فاهمة الزيارة
بالرغم اني سمعته وقريت اللي اتكتب
ومارضيتش اكتب البوست الا لما شوفت يسري فودة
لوحد عارف الزيارة ليه وليه كل الحشد الاعلامي العالمي للزيارة يقول لي
علي فكرة اسرائيل اعتقد انهم ماناموش النهاردة من الزيارة دي
:))
ده لينك
بيتكلم عن تاريخ اردوغان من اول مااتولد لحد النهاردة
بسيط وسهل ومش مطول
وعجبتني الصورة اوي اسرة مسلمة فعلا

ثورتنا حلم لسه مااستسلمش + تحديث

ده لينك بوست كتباه
اختنا المدونة خمسة فضفضة
عن رحلة العذاب والضني بتاعت المعتمرين المصريين السنة دي
=======

مدونة حلم لسه مااستسلمش وان شاء الله مايستسلمش
كاااااتب حتت بوست راااائع
لينك البوست اهووووووووووو
كنت بكتب اكتوبر اللي فات عن ايام الهزيمة والنصر وخواطري عن ايام عشتها
في الجزء ده
الغالية قوس قزح سألتني سؤال هتلاقوه في التعليقات
بغض النظر عن اللي بيحبوا عبد الناصر او يكرهو احنا مش هنتجوزه
احنا بنتكلم عن ثورة عملت ايه علشان الشعب يلتف حولها
========
السؤال اهو:
اللى عايزة افهمه و لغز لى هو عبد الناصر و ردود فعل الناس
الناس بالرغم من النكسةو فرض الحراسات و زوار الفجر ..لكن كانوا بيحبوه
ازاى ؟
ليه الحب ده برغم ان فى حاجات كتير حصلت تخلى الناس تفقد الثقة فيه ؟
=======
الاجابة اهي:
عبد الناصر كان له كاريزما جامده اوي
ولما جه
جه ومعاه حلم للبسطاء

*ملك الفلاح 5 فدادين كان اجير فيهم
(ومش هتكلم عن فشل هذا بتفتيت الارض الزراعيه لحد ماوصل ان الشاب ورث قيراط هيعمل بيه ايه هيزرعه ازاي راح باني عليه بيت وسافر الدول العربيه يشتغل او نزل القاهرة يشوف رزقه وضاعت الارض وضاع محاصيل جميلة زي القطن المصري الجميل وده خد في وشه مصانع النسيج والقماش المصري...الخ)

*نيجي للعامل بدل ماكان بيشتغل اجير امم له المصانع وخلاه في مجلس الادارة
وشاركه في الارباح وعمل له نقابه تحميه
(بغض النظر ان العامل ده بلطج ومابقاش يشتغل كويس علشان كده كده هو هيقبض اخر الشهر)

*اما المثقفين والسياسين كان السواد الاعظم منهم ضد الملكيه واللي بيعمله الملك
وحبوا الثورة والتفوا حواليها

*والطبقات اللي ماكانتش بتقدر تعلم ولادها عملهم مجانية التعليم
(اللي طبعا اثارها واضحة الان والدروس بتاكل دخل اي اسرة))

*ده غير الحلم والمشروع القومي ببناء السد العالي
التحدي اللي جمع المصريين علي تحقيقه

ده قليل من كثير مش عايزة بقا يحبوا عبد الناصر صاحب الحلم الجميل اللي اتحقق فعلا

الناس حبته وصدقته ومشيت وراه
كون ان الحلم ماكنش مدروس او اتنفذ غلط بس برضه همه حبوه

*وشعوب الوطن العربي برضه حبته علشان حلم القوميه العربيه وكمان مساعدته في كفاحهم ضد الاستعمار
وحروب التحرير

عبد الناصر في تصوري انه انشغل بقضايا علي حساب قضايا
وترك اشياء كتير لناس المفروض انهم اهل ثقه

لعبوا باقدار الناس
وخربوها
واول خراب بان كان 67

ده اللي بان والباقي مااتعرفش غير لما مات عبد الناصر
والناس الكريهه دي وقعوا ورا بعض وخبطوا في بعض
ومجي واحد زي السادات عارف الدهاليز
كلها

الناس دي اتفضحت واتشهر بيها واتعرف كل شئ
يبقا ان جمال عبد الناصر بشر
وليس خارق له عيوب وميزات واي قانون وضع هو قانون بشري
قابل للصح والغلط

ويبقا عبد الناصر زعيم حكم مصر
ومات من غير مايسرق المصريين

يعني ده راي كمواطنه لا خبرة لي بالسياسه ولكن اسجل ماعاصرته فقط
:))
=============
ثورتنا مالهاش صاحب غير الشعب
اللي بيحطولوه قوانين وقواعد تمنعه من الاعتصام والتظاهر وانه يقول رايه بصراحة
من الاخر بيرجعوه لأيام العبودية تاني
واختيار 9/9 جه اختيار جميل جدااااااااااااااااا
9/9/ 1881
ده ثورة عرابي
واللي عايز يعرف اكتر يروح اللينك ده
((لقد خلقنا الله أحراراً، ولم يخلقنا تراثاً أو عقاراً؛ فوالله الذي لا إله إلا هو لا نُورَّث ولا نُستعبَد بعد اليوم.))
أحمد عرابي
======

في ايه؟؟؟

يعني اغيب يومين
ارجع الاقي الفيس راكبه عفريت ومغيرين فيه تلاتين حاجة
والبلوجر كمان عاملين واجهة جديدة توهتني اصلا
مش كفاية القايمة اللي مش بتظهر لي اي حاجة
وباكتشف البوستات بالصدفة
وبعدين ايه موضوع التابعين ده لاقيت عندي 49 متابع
حد يفهمني ايه الموضوع
واعمل ايه
وكمان مش عارفة ارجع الريدر بعد ماالهارد اتغيرت
ايه ده ؟؟!!
مش كفاية الجدار والمحاكمات بتاعة المخلوع وعصابته
وخناقة الماتش النهاردة
هي الشياطين طلعت من حبسها تلعب معانا ولا ايييييييييييه
:)))

صبااااااااااااح الخير

اززززززززززيكم
وحشتوني كلكم
الحمد لله كانت اجازة جميلة سعيدة
وكل تمام
وبشكر كل الحبايب اللي قالولي كل سنة وانا طيبة
ويارب الجميع يكونوا بخير وصحة وسعادة
======
حته علي الماشي كده علي مانستأنف العمل
هو الجدار العازل بتاع السفارة ده خرسانة جاهزة ولا تفصيل؟
معلش احنا بنستفسر بس مش اكتر
وياتري يقرب ايه للجدار العازل بتاع الصهاينة اللي في فلسطين المحتلة؟
:))