السبت، 9 أكتوبر، 2010

عبرنا الهزيمة يا مصر ياعظيمة

كتير فكرت اني اكتب عن الهزيمة والنصر وخصوصا اني عيشتهم مابين عدم الفهم و الدهشة والمشاركة
وأخيرا قررت ان ادون عنهم
هي رحلة اثرت وشكلت في نفسي الكثير
نبدأ بيوم 5يونيه كنت طفلة شفت الناس بتهلل كل متسمع خبر من الراديو والتليفزيون
وفرحانين جدا وكلمة حرب علي كل لسان وطبعا كطفلة سالت امي عن معناها

index (2)

index (6)

وبعد كتير لاقيت امي تبكي و امي من النساء القوية التي لا تبكي ابدا الا للشدائد
وأبي حزين جدا وكان لي عم لسه متوفى افتكرت حد تاني مات
وبعد شويه مظاهرات في كل مكان والرئيس جمال يخطب و ابي جالس هو وأمي وعمي بيسمعوا ووقف عمي غاضب ولن انسي كلماته الغاضبة (لا تعملوها وتسبوها تخرب)

index

و انا مش فاهمه حاجه
و كل مانروح حته ألاقي الناس زعلانه ولما يبتدوا يتكلموا يبكوا
و الاسرة مجتمعه لفقد اتنين من الاسرة وسمعت أول مرة كلمت اسر
حتى بوابنا في يوم من الايام لاقيت مراته عماله تصوت وتصرخ وهو يبكي بشده
ولما بابا سأله قال له ابني مفقود (وللآن لم يعود)
index (5)

انا مش فاهمه حاجه حد يفهمني
وواحدة واحده ابتديت افهم وشفت الشباب بيلفوا يدهنوا الزجاج ازرق وكل عمارة بتبني قصدها طوب عالي
وعاد اسير من العائلة واستشهد الاخر
وكان كل شويه اشوف ناس شايله عفشها وبيسكنوا في كل مكان نروح فيه

index

ولما سالت قالوا دول المهجرين من علي مدن القناة
اللي عنده عمارة كان بيشطبها بسرعة عشان الناس المهجرة تسكن
ما هي بيوتهم اتهدت وبلادهم اصبحت علي خط المواجهه
وكنت بسمع عن الاولاد اللي مش لاقين ورقهم عشان المدارس وحاجات ما كنش عقلي قادر ساعتها يستوعبها
وكبرت مع هذا الهم والحزن العام وما كنش حد بيتكلم في الموضوع ده خالص عار لازم ما نتكلمش عنه
عاشت مصر في سرادق عزاء كبير جدا واجزم انه لم تزف عروس بفرح هذه السنه
ومرت السنين
ومات عبد الناصر والحزن بقا اكبر والبكاء في كل بيت
حتى جدي الذي لم يحب الرجل يوما(بسبب التأميم وأشياء اخري)
بكاه وسمعته بيقول الله يرحمه
وكتبت امي قصيده صغيرة قرأتها في الاذاعة المدرسيه بنفسي
ومرت الايام وتابعنا حرب الاستنزاف وحكايتها التي لا تنقطع
وقبل مااتكلم عن حرب اكتوبر

عايزة احكي قصه سمعتها من احد طيارين 67
كانوا في مطار الاقصر وضربت طيارتهم علي الارض وهمه بيتفرجوا مالحقوش حتى يعملوا اي حاجه دك المطار وسوي بالأرض
وهمه راجعين في القطار ونفسيتهم في الحضيض اتكسفوا يقعدوا علي الكراسي من غير اتفاق لاقوا نفسهم كلهم قاعدين علي الارض منكسي الرؤوس
حسوا انهم اتخدوا علي خوانه ماحربوش عشان يخسروا
همه دول نفس الطيارين اللي جابوا النصر ومحوا العار في73
وللحديث بقيه

هناك 73 تعليقًا:

Sweet Violet يقول...

نقول اوووووووول تعليق
:)

شمس النهار يقول...

مااااااااااشي ياجميل
:))

adel يقول...

عودة جميلة ورائعة
مش هنسيب التدوين للناس الوحشة
ولا ايه ؟؟ :))))

انا مستني باقي الموضوع
وانا علي فكرة برضه زي جدو مليش في عبد الناصر ولا السادات حتي

انا بشجع الملكية وتشيلسي والاهلي ساعات :)

د. ياسر عمر عبد الفتاح يقول...

كانت أيام سيئة أوي
ربنا ما يرجعها

احن حاجة سمعتها
اتاخدنا على خوانة

الله يسامحهم اللي كانوا السبب
اللي قامروا بمستقبل مصر ولعبوا بيه بوكر

فتاه من الصعيد يقول...

ماما كانت لسه بتقولي ان ايام النكسه دي الناس كانت زعلانه وحزينه بدرجه لا توصف

بس الحمد لله اننا انتصرنا .... ربنا يعيد الامجاد

مستنين باقي القصه :) ..

تحياتي

همس الاحباب يقول...

احنا فعلا اتاخدنا على خوانة
بس قدر الله وماشاء فعل
لان لولا مرارة الهزيمة ما عرفنا حلاوة النصر
عودا احمد يا دكتورة وفى انتظار البقية
تحياتى

Manamino يقول...

حمدالله علي السلامة
واتمني اجي هنا كتير علشان اقرا وما اعلقش كالعادة
ههههههههههههههههههههههه
بس المرة دي لازم اعلق
اولا بالرغم من قصر الرحلة الا انها عميقة عيشت فيها المعاناه معاكي ومع الطيارين اللي رجعوا في القطر ومع البواب ومراته واسر الشهداء والاسري والمهجرين
مفردات وتفاصيل سمعتها وقريتها وحسيتها وللأسف بنعيشها لحد دلوقتي
لسة عندنا اسري بس المرة دي جوانا
ان ماكانوش اسري جوا بلدهم فهم اسري جوي نفوسهم
ولسة عندنا شهداء بس بيموتوا بايدين اخواتهم
ولسة عندنا مهجرين من الدويقة والسيول وغيرها وغيرها
الفوق الوحيد اننا مش عاملين مآتم ولا بنمنع زفة العرسان
علي مايبدو اننا نحسنا ومابقاش حاجة فارقة معانا
او يمكن تعبنا من الحزن وبنحاول نفرح نفسنا
عبرنا الهزيمة وانتصرنا في 73 علي اسرائيل
بس محتاجين قوي ننتصر علينا
علي نفوسنا
اتمني ما يكونش كلامي كئيب في يوم احتفالك بالنصر
بس هو اكيد كئيب
هههههههههههههههههههههههه
ماتغيبيش علينا تاني

Manamino يقول...

معلش مضطر اعلق تاني علشان نسيت اعمل متابعة للتعليقات ع الميل
ههههههههههه
زهايمر وغلاسة واستحواز ع التعليقات
((((((((((:

مصري جدا يقول...

بصرف النظر عن نصر سته اكتوبر

نصر تسعه(بعودتك) على مستوى البلوجر لا يقل روعه

لسا شايف النور دا كل ورغم الصداع والارهاق قلت اجي يمكن تكوني عامله شاي ولا حاجه

حاجه صح


سنكوشت لحمه مثلا؟

MR.PRESIDENT يقول...

بعد السلام والتحية
أما بعد
من رئيس الجمهورية

يا شموسة رغم اني لم اعاصر إلا الفترة المباركية إلا انني شعرت بلعبة عبدالناصر علي الشعب .. والشعب طلع اهبل لما رجعه .. السادات لعبها في الأول صح وكان جدع .. وفي الآخر خرف .. والأسطورة علي رأي دك ستيتة كابس علي مراوح قلبنا .


النصر دا كان رفع للرأس بس انا شايف اني لسه مخدناش بترنا وحق ربنا ودينه اللي ماتوا

كيــــــــــــارا يقول...

ااااه انا بئا بموت في الكلام دا لانه مش زي الكتب ابدا

امبارح كان أ. شيرين الكردي بيكلمنا بردو عن النكسه والحرب وازاي حاربو وعن الاستنزاف

استمري ياماما

كان نفسي تكوني امبارح معانا

محمود(باحث عن حب) يقول...

حمدا لله على سلامتك
وبجد
فرحان ان
حضرتك
رجعتى تانى
يراب ما يغبيك تانى عننا
ابدا
موضوع فوق الرائع
والله

الفقيرة إلى الله أم البنات يقول...

نورتى يا شموسه هاقرأ ةواعلق

Baskouta يقول...

عارفة انا عاوزة اقول حاجات كتير لحضرتك
لكن هقول بس
وحشتيني

:)

أحــوال الهـوي يقول...

عشت مثلك تقريبا نفس الفترة
و كنت اري الطيران الاسرائيلي يعربد فوق البيوت في الزقازيق

من كثرة ما شاهدناها لم نعد نخشاها
و خصوصا اننا كنا نسمع الانفجارات قبل ظهورها فكن ندرك انها قد افرغت حمولتها قبل التحليق فوقنا
مرارة ما بعدها مراره والجنود راجعون في ملامح اخري غير ما تعودناها انه الانكسار
هذه هي الهزيمه

حينما تكتبين عن النصر عندي حكايات كثيره

تحياتي

قوس قزح يقول...

الاول
نورتى دنيا البلوجز بشمسك الجميلة

ثانيا
جدتى حكت لى على الايام دى و قالت لى ان وقت الغارات كانت لحظات صعبة جدا على الناس
و الغريب انها قالت حتى فى نصر اكتوبر ..التليفزيون دايما يركز على جزئية العبور بس ..لكن كان فى اكتر من كده وفى احداث كتير و مات فيها مصريين كتير بالرغم من الانتصار

اللى عايزة افهمه و لغز لى هو عبد الناصر و ردود فعل الناس
الناس بالرغم من النكسةو فرض الحراسات و زوار الفجر ..لكن كانوا بيحبوه
ازاى ؟
ليه الحب ده برغم ان فى حاجات كتير حصلت تخلى الناس تفقد الثقة فيه ؟

أحمد شريف يقول...

آه ع الكلام اللي يوجع وبعد دقائق يشرح القلب
كملي يا مدام شمس .. متابع معك إن شاء الله

mrmr يقول...

حمد الله بس بس

بالسلامه يعنى

اصلى انا بقص الكلا
الكلام يعنى

انا سعيده انك رجعتى تانى للتدوين

ورجعتك دى عادت بمناسبه جميله
مناسبه انتصار ذى ما انتى انتصرتى على الفتره اللى مرت عليكى
ربنا يسعدك ديما وتنورى مدونتك

تصبحى على خير يا اجمل شموسه

مـجـنـووون يقول...

حمدالله علي السلامه

ونورتي مدونتك

طبعا مفيش حد بيحب الهزيمة والحمد لله ان احنا عرفنا نقاط ضعفنا ووقفنا علي رجلينا مرة تانيه

تقبلي مروري
مجنووون

Sweet Violet يقول...

انا جيييييت
الحمدلله وصلنا بسلام للجهاز و ارض المدونة
:))

*****
علشان احنا عندنا كتب التاريخ كلها عبارة عن اراء شخصية
فبحب اسمع من الناس اللى عاشت المرحلة دي فعلا و ابدا فى الربط بينهم علشان افهم

احنا للاسف جيل اتولد فى الرفاهية بعيدا عن اللى بتعمله الحكومة دلوقتي
لكن بردو مش هيجي زى مانكون وسط حروب و احتلال

عارفة ياشموسة لما قريت ان جدو بكى لموت عبد الناصر رغم انه مختلف معاه كتير حزنت على حالنا فعلا
لان المشاعر دي خلاص راحت من معظم المصريين .. دلوقتي احنا بنفرح فى اى حد نختلف معاه يعني لو الموقف ده اتكرر فى الزمن ده قليل اللى هيقول اللى يرحمه و كتير هتدعي عليه
:(

الاحساس بالعار مابقاش موجود عندنا
بالعكس احنا بقينا نمجد الاخريين و نأيدهم حتي لو هما غلط بس يكفي انهم لا مصريين ولا البلد اللى بيتم تمجدها هى مصر ولو حصل خطا من البعض و تم تمجيد مصرى و تحويله لرمز من رموز البلد بيكون تمجيد خطأ و مبالغ فيه

بجد انا لما بقعد مع جدو على قد ما بكون مستمتعة بالكلام على قد مابكون حزينة على جيلنا و الاجيال اللى طالعه
الجيل اللى عايز يحارب وهو اصلا مش اهل للحرب ولا حاسس يعني ايه البلد فى حرب
:(

هسأل نفس سؤال داليا
ليه الشعوب العربية و الشعب المصري كان بيحب عبد الناصر رغم كل الكلام اللى اتقال عليه و رغم الاخطاء الكبيرة ؟ هل انجازاته كانت جديرة انها تغفرله الاخطاء دي ؟؟

Haytham Alsayes يقول...

مستني بقية الحكاية
والله العظيم لو المصريين عاوزين يعملوا حاجة هيعملوا
بس احنا دلوقت منهزمين نفسيا حتي الشباب من جيلي
بس اعذرونا اصل احنا اتولدنا لقينا الحكاية بايظة
احنا مدمرين اساسا
شايفين كل العالم بيتقدم ماعدا احنا
عاوزين روح اكتوبر تاني
بس اقول ايه البقاء لله وحده

تحياتي

الازهرى يقول...

مممممم
واضح إن أول تعليق بقى كوسة
لله الأمر من قبل ومن بعد

همه دول نفس اللي جابوا النصر ومحوا العار في73

فى أحد مذكرات الحرب قالوا إن 80 % من اللى شاركوا فى حرب 73 كانوا من اللى رجعوا من 67
الفرق كان فى حاجتين مهمين جدا
الأول التدريب الناس كانت أيام 67 عندها حماس لكن التدريب للمعركة كن غير كافى إطلاقا ودا على مستوى القيادات والجنود على حد سواء

ثانيا كفاءة المعدات
ودا بيختلف طبعا عن طرازها فالمعدات كانت غير متطورة لكن كفائتها والتدريب على استخدامها كان عالى جدا وعلى كافة المستويات

تحياتى وفى انتظار المزيد

شمس النهار يقول...

* adel

:))
صح

هو الموضوع ياعادل ان كل ده جزء من تاريخ مصر
حبيناه ماحبيناهوش
جزء من تاريخ بلدنا

ان شاء الله هكمل باقي خواطري وذكرياتي في الموضوع ده

:)

شمس النهار يقول...

* د. ياسر عمر عبد الفتاح

فعلا ربنا مايرجعها مع ان في ناس دلوقتي مالهاش في البلاله نفسها ترجع
:(

ايوه مصر ورجالة مصر اتخدوا علي خوانه

وهتعرف عملوا ايه في البوستات الجايه
ابقا معنا

:)

شمس النهار يقول...

* فتاه من الصعيد

عارفه ياريت الجيل اللي لم يحضر كل هذا يقعد ويسمع من اهله

ايه اللي حصل
دي احسن حاجه فعلا
عادتا واغلب التاريخ يكتب حسب الاهواء
وده من ايام الفراعنه

:)

شمس النهار يقول...

* همس الاحباب

ايوه لولا الهزيمة ماكناش انتصرنا

بس هزيمة تطلق علي من حارب وهزم ونحن لم نحارب

هو كان درس كبير لناس مغروره كان لازم علشان يفوقوا شويه
بس درس كان تمنه غالي اوي

شكرا ليك
:)

شمس النهار يقول...

* Manamino

اهلا بيك مدونتك تيجي وتقرا زي ماانت عايز
:)
كلامك مش حزين
كلامك صح ومنطقي
وهتكلم عنه في اخر السلسله

شبابنا الان محتلين نفسهم بنفسهم

وشهداءنا مش شهداء معارك شهداء اطماع ونفوس مريضه

وكذلك مهجرينا مش هاجرين مدن مواجهه
لا مهجرين من الارض الجميلة اللي كانت بتجيب خير
دلوقتي بقت كلها بيوت
سكنا الارض الطينيه
ورايحين نزرع الصحراء

واخرين مهاجرين للموت بحرا

ده واقع
وعلشان ننتصر علي المعركة دي مش محتاجين قوة تنتصر علينا
لا
محتاجين نصحي ضماير مش اكتر

:)

واستحوز زي ماانت عايز
ولا ده يعتبر احتلال
وندور بقا علي صد العدوان
:)))

شمس النهار يقول...

* مصري جدا
:)

اهلا وسهلا بحضرتك

النور نور الناس الاصيلة في البلوجر

وكل تحيه ليهم

وبشكر حضرتك علي كلماتك في اخر بوست عندك
كانت مشجعه جدا لي

وكل يوم نهزم فيه خوفناونهزم الناس البايخه
ده عبور متجدد

:))

شمس النهار يقول...

* MR.PRESIDENT

اهلا بسيادة الريس
:)

لا الشعب ماطلعش اهبل ولا حاجه
الشعب حس انه اتخدع زينا
ولو مشي مين هيكمل
هو ادري بناس بيته ويعرف ازاي يظبطه تاني
وكمان الناس كانوا بيحبوه
مش في مصر بس
لا
علي مستوي الوطن العربي
اما السادات ده موضوع تاني
:)
وبس كده عايزين نكمل باقي السلسله

ياسيادة الريس
التار ده بالذات هيفضل ليوم الدين
ماتنساش حديث سيدنا النبي

:))

شمس النهار يقول...

* كيــــــــــــارا

حبيبتي احسن كلام تاخديه من الناس اللي شافت
واحلي حكاوي
علشان الناس دي مالهاش مصلحه
انها تزيف التاريخ
ولا تحط له شوية فلفل وشطه

ان شاء الله هنكمل

معلش بقا انا لسه مش بخرج وقراري ساري لن اتراجع عنه

:))

شمس النهار يقول...

* محمود(باحث عن حب)

الله يسلمك

شكرا علي كلامك اللطيف

وتابع باقي البوستات معانا ان شاء الله

:))

كيــــــــــــارا يقول...

اكيد طبعا يامامتى

تعرفي بقعد كتير مع تيتا وجدو وبيحكولي عن فترة الملكية كمان لاني جدي ربنا يديله الصحه عاصر الملكية وكمان الجمهورية اسما :)

بلاقي ان كتب التاريخ في اتجاه واللي بيحكوه في اتجاه تاني خالص

منا عارفه ياماما ان قرارك لن تتزحزي عنه وطبعا مقدره دا بس انا بقول نفسي انها امنية :)

تعرفي انا حتى مش نزلت بوست باللقاء كان محددوووووووود اوووووووووي جدا كمان :)

شمس النهار يقول...

هكمل باقي الردود علي التعليقات
ان شاء الله
علشان اوفي الاساله حقها
استراحه قصيرة واعود
:))

Foxology يقول...

اولا : نقول حمد الله على السلامة

ثانيا : البوست جميلة جدا لأنها اختصرت فترة زمنية كبيرة جدا فى كلمات معبرة جداااا خصوصا واننا كشباب معاصرناش الفترة دى لكن حاسين بطعمها اوى خصوصا وانها تقريبا شبه الوقت اللى بنعيشه اليومين دول للأسف

ثالثا : فى انتظار حديث النصر يمكن يكون فاتحة خير لنصر قريب من عند ربنا

تحياتى

tarek momen يقول...

الله ينور ..بوست جميل ورجعنا للزمن اللي فات ربنا ما يرجعها ايام بس المشكل من وجهة نظري اننا نعيش ايام اسوأ بعد 67 كان عندنا مرارة و رغبة في الأنتقام لشهدائنا و استرداد ارضنا و كرامتنا اما الان فنحن مهزومين من الداخل و الناس مستسلمة بدون رغبة في التغيير هزيمتها و قاعدين حاطين ايديهم علي خدهم مستنيين فرج ربنا... عموما فرجه قريب
تحياتي

شمس النهار يقول...

* الفقيرة إلى الله أم البنات

اهلا بيكي والنور نورك

شكرا علي سؤالك ووصلني سلامك

الله يسلمك ويبارك فيكي

ومستنيه تعليقك

:)

شمس النهار يقول...

* Baskouta

حسيت كل كلام
شكرا ياجميلة
وانتي كمان وحشتيني

:)

شمس النهار يقول...

* أحــوال الهـوي

علشان نكتب عن النصر لازم نكتب عن الهزيمة اللي سموها نكسه

ماهو كل حاجه في بلدنا لها اسم حركي

وياريت حضرتك تكتب كمان عن الفترة دي
جيل بحاله مايعرفش حاجه عن الفترة دي
وماحدش حكه له
واللي لازم يحكي احنا واللي اكبر مننا
علشان هيحكي مش سياسه بحته
لا
هيحكي عيشه كلنا عشناها وحسيناها صح

:)

شمس النهار يقول...

* قوس قزح

ده نورك انتي

فعلا وقت الغارات كانت صعبه جدا وخصوصا علينا الاطفال وقتها
لما كنا نلاقي بعض الناس منهاره وخايفه
في الخندق
او مدخل العمارات اللي بانيه ساتر
كنتي تلاقي اللي بيدعي واللي منهاره علي جوزها ولا اخوها ولا ابنها اللي علي الجبهه

تخيللي اطفال بقا يعملوا ايه في وسط ده
وتخيلي بعد كده لما نلاقي ونسمع عن الاطفال اللي زينا وماتوا في بحر البقر ونبقا خاييفين احنا كمان
انتي عارفه في اهالي خافوا يبعتوا اولادهم المدارس لمدة طويلة

دايما في الحروب وخصوصا وقت الانتصار بيتركز علي النصر مش اللي استشهدوا ولا المصابن علشان الحالة النفسيه للشعب مهمه جدا في الاوقات دي
تعرفي جنبنا كان في مستشفي عسكري لما كان يجي دفعت مصابين للمستشفي كان بينقطع النور عن الاحياء المجاورة علشان ماحدش يشوف حاجه
بالرغم من ان كل مصاب من دول وسام علي صدر مصر وهنتكلم عليهم بعد كده في بوستات تانيه

بالنسبه لعبد الناصر هرد عليكي بس التعليق ده كبر فاهرد في ردي علي سويت فيوليت

شكرا علي تعليقك الجميلة اللي فتح باب للذكريات عندي

:)

شمس النهار يقول...

* أحمد شريف
اهلا بيك

ان شاء الله نكمل
وده كلام يااحمد مش هتلاقيه في كتب التاريخ
علشان ده كلام عبارة عن خواطر وتسجيل للحظات انا عشتها وشوفتها بعيني وحسيتها
لا هو سياسه ولا تاريخ

:)

شمس النهار يقول...

* mrmr
اهلا يامرمر انتي اللي منورة

شكرا علي كلامك الجميل ياجميلة

:))

شمس النهار يقول...

* مـجـنـووون

الله يسلمك ويبارك فيك
حمد الله علي سلامتك انت كمان

ايوه عندك حق
احنا وقفنا علي رجلينا بس للأسف بدل مانبني بنهد

تحس ان مصر ماشيه وشها لقدام بس خطوتها للخلف

وطبعا متقبلة مرورك
بس ياريت تمر دايما
وتبطل تختفي
:)

نورتني

شمس النهار يقول...

* Sweet Violet

اهلا اخيرا جيتي
ده انتي ولا اللي حاجزة شقه في الاسكان التعاوني بالنقابات العامة
:)))

معظم كتب التاريخ العربيه تكتب حسب الاهواء
حاولي تقري عن التاريخ الاسلامي
برضه هتلاقي في اختلاف من مؤرخ لمؤرخ برضه
وزي ماقلت انا مش بكتب تاريخ
انا غير مؤهله لده
انا بدون خواطري الشخصيه واحاسيس عشتها

ومعاكي انتوا جيل ماحدش تواصل معاه ولا اتكلم معاه
والقدوة قليلة
والحياة الثقافيه اغلبها قصص ورويات واشعار
مافيش حد تواصل معاكم
مش مصدقة ان ذكري اكتوبر تيجي ومايتعملش ندوات في المدراس والجامعات يحاضر فيها البقيه الباقيه من ابطال الحربين
والتلفزيون يكتفي ببعض البرامج المكرره البايخه
وافلام حفظناها

فين ابناء الشهداء يحكوا لنا
فين ارامل الشهداء وبطولاتهم

انتي عارفه ان في بعض زيجات تمت في المستشفيات
يعني بطل من الابطال رجع مصاب اصر ابو خطيبته انه يكتب كتابه علي بنته في المستشفي في ميعادة

بالنسبه لسؤالك عن عبد الناصر وكذلك قوس قزح

السؤال ده عايز قاعدة كبيرة اوي
بس هحاول اختصر

عبد الناصر كان له كاريزما جامده اوي
ولما جه
جه ومعاه حلم للبسطاء

ملك الفلاح 5 فدادين كان اجير فيهم (ومش هتكلم عن فشل هذا بتفتيت الارض الزراعيه لحد ماوصل ان الشاب ورث قيراط هيعمل بيه ايه هيزرعه ازاي راح باني عليه بيت وسافر الدول العربيه يشتغل او نزل القاهرة يشوف رزقه وضاعت الارض وضاع محاصيل جميلة زي القطن المصري الجميل وده خد في وشه مصانع النسيج والقماش المصري...الخ)

نيجي للعامل بدل ماكان بيشتغل اجير اممله المصانع وخلاه في مجلس الادارة وشاركه في الارباح وعمل له نقابه تحميه(بغض النظر ان العامل ده بلطج ومابقاش يشتغل كويس علشان كده كده هو هيقبض اخر الشهر)

اما المثقفين كان السواد الاعظم منهم ضد الملكيه واللي بيعمله الملك
وحبوا الثورة والتفوا حواليها

والطبقات اللي ماكانتش بتقدر تعلم ولادها عملهم مجانية التعليم(اللي طبعا اثارها واضحة الان)

ده قليل من كثير مش عايزة بقا يحبوا عبد الناصر صاحب الحلم الجميل اللي اتحقق فعلا

الناس حبته وصدقته ومشيت وراه
كون ان الحلم ماكنش مدروس او اتنفذ غلط بس برضه همه حبوه

والوطن وشعوب الوطن العربي برضه حبته علشان حلم القوميه العربيه وكمان مساعدته في كفاحهم ضد الاستعمار
وحروب التحرير

عبد الناصر في تصوري انه انشغل بقضايا علي حساب قضايا
وترك اشياء كتير لناس المفروض انهم اهل ثقه

لعبوا باقدار الناس
وخربوها
واول خراب بان كان 67

ده اللي بان الباقي مااتعرفش غير لما مات عبد الناصر
والناس الكريهه دي وقعوا ورا بعض وخبطوا في بعض
ومجي واحد زي السادات عارف الدهاليز
كلها

الناس دي اتفضحت واتشهر بيها واتعرف كل شئ
يبقا ان جمال عبد الناصر بشر
وليس خارق له عيوب وميزات واي قانون وضع هو قانون بشري قابل للصح والغلط

ويبقا عبد الناصر زعيم حكم مصر

يعني ده راي كمواطنه لا خبرة لي بالسياسه ولكن اسجل ماعاصرته فقط
:))

شمس النهار يقول...

* Haytham Alsayes

المصريين بقوا كسلانين جدا

بس عايزة اسالك

تفتكر الدنيا تتصلح ازاي
من وجهة نظرك كاشاب

وان شاء الله نكمل الباقي

:)

شمس النهار يقول...

* الازهرى

انت لسه واخد بالك

طبعا ده كوسه واضحه جدا

ماالبلد كلها كوسه جت علي شيكو حبيبتنا

:))
صح كل اللي رجعوا من 67 اشتركوا في 73الا من اثر ورجع او اصيب واصابته منعته

لكن موضوع التدريب ده اخالفك فيه بدليل ان حرب الاستنزاف وهي من اهم الحروب اللي خاضتها مصر وهتكلم عليها ان شاء الله

ابتدت بعد 67 علي طول بفارق تلات اسابيع من وقف اطلاق النار11 يونيو حصلت حرب راس العش وياريت قرا عنها بالتفصيل هتعرف ان الكلام الفارغ ده عن قواتنا المسلحه كان غلط

67 كان سوء ادارة مع ناس نايمه علي ودنها
اتخدوا علي خوانه مش اكتر

وحمد الله علي السلامة
:)

شمس النهار يقول...

*كيــــــــــــارا

علشان انتي دارسه تاريخ
ده مخليكي تعرفي اكتر ان التاريخ كتب باكثر من طريقه

اللي بيحبوا جمال كتبوا مميزاته وانجازاته فقط وطلعوه فارس مغوار مابيغلطش

واللي كرهوه طلعوه عكس ذلك وكتبوا كل غلطاته
وبصراحه شرحوا الرجل

وكذلك بالنسبه للسادات

مع ان الصح
الزعماء يكتب بحياديه مالهم وماعليهم
وحسب كفة الانجازات يصنف الزعماء

وليس حسب الاهواء

تابعي بقا معايا
:))

شمس النهار يقول...

* Foxology

الله يسلمك ويبارك فيك
:)

عندك حق هي شبهه بس الاول كان علشان كل شئ محول لخدمة هدف سامي تعبئة الجيش
والنصر
علي عدو
لكن دلوقتي بنحارب في بعض والحكومه بتحارب فينا
والبلد ماشيه بالعكس

وان شاء الله نكمل بس لسه 67 هنتكلم عليها شويه كمان

:)

شمس النهار يقول...

* tarek momen

كلامك كله صح ياحاج

لما بلاقي الحاجه غاليه والناس بتشتري وساكته بقول ايه ده المصريين اغتنوا يارجاله
والا اعلانات الاستفزاز الغريبه بتاعت الفيلل والشقق اللي تبتدي من مليون

بحس اني في بلد غير بلدنا
مرة كنت في المول وعجبني فستان بسيط ولطيف في محل شكله زي محلات برة
سالت تمنه كام قالت لي بنت زي القمر ولانجمات السنيما ب32 الف جنيه
بعد الزهول الانفهاش والخضه
قلت لها وده بيتباع يابنتي قالت لي طبعا ياهانم دي اخر قطعه
طبعا بناتي شدوني قبل مااديهم درس اصل ياحاج ده فستان بيتباع في بلد لسه اغلب شعبها يستخدم البطاقه التموينيه ولسه عندنا وزارة الشؤن الاجتماعيه اللي غيروا اسمها وبقت اشيك التضامن الاجتماعي
:))

ياريت ياحاج تكتب لنا خواطرك عن 67 وانت كنت اكبر مني واكيد كنت واعي عني وعندك حكايات اكتر
وكمان انت بتكتب كويس مش زي مع اني حطيت برنامج تصحيح وبرضه بتطلع في غلطات
:))

الازهرى يقول...

الله يسلمك

أما عن التدريب فدا مش كلامى دا كلام مذكرات قادة الحرب زى أحمد اسماعيل والجمسى وغيرهم
والتدريب للحرب بيختلف كتير عن التدريب لمعارك الاستنزاف والحرب الخاطفة وحرب الشوارع إحنا قدرنا بعد تلات أسابيع نقوم بمعارك محدودة بعناصر بكفاءة عالية وفى معارك فى حرب الاستنزاف نفسها تشرف جدا سواء على مستوى القادة أو الجنود كتب عنها تشرشل الحفيد فى كتابه
لكن نسبة التدريب اللى كانت موجود كان صعب نقدر ندخل بيها حرب مفتوحة وطويلة زى اللى كان مخطط لها أو بمعنى أصح اللى معلن إنه مخطط لها

وكمان راجعى هنا هتلاقى معلومات جميلة

http://yasser-best.blogspot.com/search?updated-max=2008-11-18T23%3A57%3A00%2B02%3A00&max-results=3&reverse-paginate=true

وعلى الرغم من كل ده لفى كمان حكايات الجنود نفسهم اللى شاركوا فى حربى يونيو وأكتوبر وكلها بتؤيد ده

Diyaa' يقول...

كنت راجع أقول فين البقية بس عجبتني التعليقات

الملكية كارثة
والجمهورية لأهل الثقة كارثة

وعبد الناصر كان فعلاً بيحب البلد وكمان بيتميز إنه مبيطاطيش لحد

السادات الله أعلم بيحب البلد ولا لأ بس وطى لأمريكا لما قال يا بس ... يعني ربنا فوق وأمريكا في الأرض

وللأسف وطى للحد الغلط لأن معروف إن السياسة الأقذر في العالم جنسيتها أمريكية باعتبارهم الخلفاء الشرعيين لبريطانيا :(

الخلاصة إن العيب في الناس نفسها ولولاهم ما كانت عيوب أي رئيس هتؤثر على مسارات الأقدار والأمور بالطريقة دي

مستنيين البقية بقى عشان نقول عوداً حميداً وإحنا متطمنين :)

rack-yourminds يقول...

بصراحه شديده انا بعشق هذا الجيل وبحب استمع واقرا عنه, لذلك هذا البوست عجبني جدا, لانه من عبق الماضي واللي بتحكي عنه من نفس الجيل .حقيقة اللي قراته عن هذا الجيل وما فعلوه في حرب الاستنزاف وفي حرب اكتوبر من مجهودات جباره ونصر عظيم ,جعلني اتصور ان هذا الجيل ليس من البشر بل من الملائكه ,سيدتي اكيد وصلك شعوري واكيد تعلمي اني لا بالغ في كلامي
بصراحه كان زمن عظيم في كل المجالات وبصراحه شديدة مع ان الكثير يختلف مع الزعيم جمال عبد الناصر بالنسبه للديمقراطيه والحريات, لكن هذا الرجل بحق هو رجل كان يعشق ارض مصر وتراب مصر وتاريخ مصر وما فعله في حرب الاستنزاف والاستعداد لحرب اكتوبر وغيرها من الامور العظيمه التي قدمها لمصر ويدل علي ان هذا الرجل ذو فكر ثاقب وارادة جباره
_________

بجد اسمتعت بكلامك

ومنتظر باقي الحديث

Sweet Violet يقول...

امممممممم
يبقى فعلا مميزاته محت عيوبه بالنسبة للبعض
:\

كده تومام
ثانكس يااجمل شموسة
:)
منتظرة الباقي
:)

SHAPE YOUR LIFE (ABOALI) يقول...

من نعم الله ان يتواجد اشخاص فى احداث معينة تعايشوا معها و استظلت عيونهم بها وكانت اعينهم اسطوانات تسجلية
وبتلك النعمة اقتربت الاجيال من بعضها
وتناقلت الخبرات فلم تحدث ابدا فجوات
وترتب على ذلك ظهور اجيال متناسقة مدركة
تعرف التاريخ من نعومة اظفارها
قادرة على ردع كل من يلفظ بلفظ يسىء للوطن
لانه يعرف قيمة ذلك الوطن ومدلوله
يعرف ان قطرات دم ابائه واقاربه واصدقائه
ارتوت بهم تلك الارض وربت ونمت لتكون جاهزة لمن يزرع ويبنى بعد ذلك

لذا من عاش تلك الايام عليه امانة
عليه ان ينقل ما كان وما حدث
ليمحى جهالة العقول الفاسدة التى انتشرت وطالت كل عزيز فى اسفاف واستهزاء

كنت مستمتع وانا اقرء كاءنى قرءت قبل ذلك فى عيون ابى وامى

لذا خالص التقديرى على تلك التذكرة الراقية
التى اعتبرها مسئؤلية من انسان قادر ان يتحملها


خالص الشكر

جايدا العزيزي يقول...

وما النصر الا من عند الله

وعايزة اعلق واقول الهزيمه كان ليه اسبابها

نفس الرجاله اللى انهزموا هما اللى صمدوا

وعبروا وحطموا خط بارليف

بس جايز الهزيمه

صحت فيهم الروح

وساعدتهم على الصمود

بس رسولنا قال عنهم خير اجناد الارض

وهما فعلا خير اجنادها

كفايه انهم كسروا العنجهه الاسرائليه

وعرفوا العالم ان اسرائيل اضعف جيش

خاف واستغاث واسر وبكى

وكفى ان العالم كشف ان اسرائيل

لا تتحرك الا بالمساعدة

انتظر نصر اكتوبر بشغف

واشكرك غاليتى

تحياتى

كلمات من نور يقول...

صحيح عبرنا الهزيمة .ويارب نعبر مرة تانيه بقى الهزائم المتواصله اللي احنا فيها .زتسلم إيديكي وعدوا حميدا لعالم التدوين اللي مافيش أحلى منه رغم أنف الكثيرون

طوبه فضه وطوبه دهب يقول...

سؤالى عنك دا ابسط واجب عليا يا اجمل شموسه يارب تكونى بالف خير بجد ديما رائعه موضوعاتك تسلم ايدك

نهر الحب يقول...

كيف حالك يا شموسة
كيف رجلك الوقت يارب تكونى بخير حال
رجعتينا سنين وسنين لم نعيشها لكنا سمعنا عنها فى بالنسبة لنا تاريخ
هزيمة صحبت نصر
نكسة ادت الى نصرة كبيرة وتدرس فى الكليات الحربية العالمية


تحياتى وحبى لك يا شموسة

شمس النهار يقول...

* الازهرى

اهو انت كمان قلت

(لكن نسبة التدريب اللى كانت موجود كان صعب نقدر ندخل بيها حرب مفتوحة وطويلة زى اللى كان مخطط لها أو بمعنى أصح اللى معلن إنه مخطط لها)

يبقا اتاخدنا علي خوانه ولا لأ

اسرائيل كانت عارفه كل ده
عارفه كفائة الجندي المصري
من حرب 56 علشان كده ماكنش ينفع تحاربنا غير غدر
واحنا نايمين في العسل

زي برضه مااحنا عملنا في 73
نيمناهم في العسل
وهوبااااااااا

وعنصر المفاجأه هو اللي شلهم زي ماشلنا

رحت المدونه ولاقيتها جميلة

:)

شمس النهار يقول...

* Diyaa

اهلا بيك
ان شاء الله في بقيه

اي حكم علي مر السنين له عيوب وله ميزات

وكل حاكم بيجي ينيلها شويه في حاجه ويظبطها في حاجه تانيه

مافيش حد كامل

لابد ان يحمنا قوانين ومؤسسات

علشان يجي زيد يجي عبيد

الدنيا تبقا صح

وان شاء الله مع بعض نكمل الذكريات
:)

شمس النهار يقول...

* rack-yourminds

صدقني هذا الجيل بشر ومش ملايكه

بس كان عندهم قدوه وهدف

والبلد كلها كان فيها حراك ثوري ثقافي

جميل

الهدف لكل الشعب واحد

واي مصري بيحكم مصر بيحبها
بس كل واحد وطريقته

ان شاء الله نكمل

:)

شمس النهار يقول...

* Sweet Violet

لا شكر علي واجب ياجميل

وان شاء الله نكمل الذكريات

:))

شمس النهار يقول...

فاااااااااصل قصير

ونكمل الرد علي باقي التعليقات

:))

شمس النهار يقول...

* Blogger SHAPE YOUR LIFE (ABOALI)

اشكرك علي هذا التعليق الوافي

واعتبر كل من عاصر هذه الاحداث لابد ان يحكيها للجيل الجديدبكل امانه بدون اغراض او تزييف للحقائق
فهي امانة

:)

شمس النهار يقول...

* جايدا العزيزي

اعجبني تعليقك جدا

وان شاء الله نتكلم عن حرب الاستنزاف وبعدها نصر اكتوبر

:)

شمس النهار يقول...

* كلمات من نور

اهلا بيكي

:)
شكرا علي تعليقك وكلماتك اللطيفه

وفعلا هو عالم جميل بس نقول ايه الحلو مايكملش

ووصلني تحذيرك وتم اللازم

:))

شمس النهار يقول...

* طوبه فضه وطوبه دهب

شكرا ليكي ولكلامك الجميل زيك

نورتيني

:)

شمس النهار يقول...

* نهر الحب

الله يسلمك ويبارك فيكي ياجميلة

نورتيني

عارفه لما لاقيت تعليقك قلت ياه دي نهر الحب في موقع الاحداث
وجتني فكره

ليه ماتجمعيش حكايات من المحيطين بيكي ممن عاصروا هذه الايام

وتنزليها في بوستات

اهل مدن القناة عندهم حكاوي كتير
وخصوا عن التهجير والعوده بعد رجوع سيناء

:))

Haytham Alsayes يقول...

شمس

ازيك

وانا بدور في النت علي كتب لقيت كتاب عن القاضي الفاضل العسقلاني
لو فاكرة حضرتك كنتي طلبتي مني اي حاجة عنه

http://www.4shared.com/account/file/T7Fb5-FT/_______2.html

دة الرابط


تحياتي

همسات وبحــ الحياه ــر يقول...

حمد لله على السلاااااااااااااااامة يااحلى شموسة
بجد كنت زعلانة عليكى خالص
وفرحت لما رجعتى
وكمان راجعه ببوست تحفه :)

شمس النهار يقول...

* Haytham Alsayes

شكرا ياهيثو انت كنت اديتني لينك سابق ولاقيت فيه حاااجااات ومحتاااجااات


:)

شمس النهار يقول...

* همسات وبحــ الحياه ــر

اهلا بيكي
شكرا علي كلامك اللطيف

نورتيني ياجميلة


:))

مدونه هنا السناهره يقول...

كلام رائع ومدونه اروع واتمني مزيد من الابداع

شمس النهار يقول...

* مدونه هنا السناهره

شكرا علي الكلمات اللطيفه والمرور

:)