2011 باي باي + تحديث +تحديث 2

مش قلت لكم
اهي ابتدت
الصبح النور اتقطع بعد ماكتبت الكلمتين اللي تحت دول
وجه الساعة واحدة ونص الضهر
:))))
---------

يافتاح ياعليم يارزاق ياكريم اصطبحنا واصطبح الملك لله
وادي 1 يناير
لما نشوف اخرتها اييييييييييييييييه ؟
‎:)‏)صباح الخير

كل سنة وانتم طيبين
عام سعيد عليكم جميعاااااااااااااااااا
وان شاء الله السنة الجديدة تبقا اجمل
وتبقا مصر اجمل
وربنا يعدي يناير علي خير
ماانتوا عارفين ان انا ويناير مابنحبش بعض
كل يوم في يناير له ذكري انيل من اللي قبلها
حتي الذكريات الحلوة فيه بتقلب بعد كد غم الغم وتبقا ذكري مؤلمة
:))))))
حتي ثورة يناير قلبت غم عارفين ليه علشان قامت في يناير
:))))
طب كانوا خالوها فبراير
:)))))
وعلي ذكر الثورة
مش بحب المجلس العسكري علشان ضحك علينا
وبهدل الدنيا وماعرفش يعمل حاجة وغرق وغرقنا معاه
وياريت يرحمونا بقا ويخلعوا قبل ماالدنيا ماتغرق اكتر من كده
وربنا يرحم الشهداء
الكسبان الوحيد من الثورة
كل سنة وانتم طيبين

العجلة البيتسا الاستقرار !!

افهم من حكم البراءة بتاع ظباط السيدة زينب
ان المخلوع هياخد براءة هو والشلة
!!؟؟
لييييييييييييييييه؟؟
ماهو كده ماحدش قال لحد اقتل
الظباط كانوا بيدافعوا عن نفسيتهم
من المتظاهرين الوحشين الكخة
اللي اطاحوا بالعصابة
اللي لولاهم لولا لولا لولا
ماكانش التيارات اللي مايعلم بيها ربنا طلعت للنور
وماكناش عرفنا حجم النهب والسرقة وماهيات الكبار
الي اخر ماكشفته المظاهرات واتت بيه الثورة
اول مره في التاريخ يحصل ان معتدي علي ثورة يطلع براءة
بكره يرجعوا بالتعويض علي اهالي الشهداء والمصابين الكخة
ويلزموهم بمصاريف التقاضي واصلاح الاقسام
علشان كده بقا مافيش ظابط قعد في بيته
كانوا عارفين انهم هيطلعوا براءة كده كده
تصدقوا قالهالي ظابط من زماااااااااااان وماصدقتوش
قلت ده بيقول كده وبس
قالي مافيش ظابط هياخد حكم
بلاش اوهام وكلام فاضي
ولسه ياما هنشوف
علشان
العجلة البيتسا الاستكراد
ايوة الاستكراد
--------
سؤال علي الماشي؟
ايه موضوع الامر بالمعروف والنهي عن المنكر دي
--------
ممكن حد يصلي علشان خايف من حد واقف له بالعصاية بس الحد ده مش هيبقا عارف الحد ده بيصلي ولا بيعمل تمارين رياضية
حسبي الله ونعم الوكيل

آآآآآآآآه يابلد !! +تحديث

اسفة ياجماعة
برد علي التعليقات متقطع
مافيش وقت وان شاء الله هرد علي باقي التعليقات
سواء هنا او في البوستات السابقة كل مايسمح الوقت

============================================

امبارح كانت جنازة الشهيد محمد مصطفي
ايوووووووة الشهيد محمد مصطفي
ومش عايزة حد يدخل يقول لي عملتيه شهيد
هقوله ارجع لحديث الشهداء هتعرف ان الشهداء كتييييييييير
عارف لو حد جاله شوية مغص مات فيهم ده شهيد
ماعلينا
ام الشهيد الانسانة الجميلة اللي عرفت تربي شاب زي الفل
وهو طالع من زينهم زغرتة زغروته حلوة اوي
محمد مش بلطجي
محمد كان هيبقا مهندس يعني متفوق
محمد ابوه مهندس امه دكتورة اخته دكتورة والتانيه سياسة واقتصاد والصغري في المدارس
محمد من بيت طيب مش بلطجي
ورياضي من صغره
---
لما نكون في المسجد علشان مستنين محمد
وواحدة غريبة وهي في وسط اهله واصحابه
تقول ايه اللي منزلهم الي اخر الكلام الخايب
وترد عليها واحد تقول لها نازل ينضف البلد
سيبكم اننا في جامع ماينفعش الجدل ده اصلا
سيبك من حرمة الموت
هو ينفع الكلام ده في وسط ناس مكلومة
للدرجة دي في ناس مابتعرفش تميز
ولولا كلنا قلنا هششش كانت هتقوم معركة سياسية
ينفع والجنازة شغالة الناس تتزمر من تعطيل المرور
عجبت لبعض شعب مصر
مش هو ده ميدان رابعة
اللي كان بيتقفل يوم بحاله
علشان مسؤل من عهد اللامبارك
جوز بنت خالة مراته مات والعزا في رابعة
وماحدش فتح بقه ولو بكلمة
مش ده ميدان رابعة اللي كان بيتقفل قبل وبعد الماتش ب4ساعات
مش ده ميدان رابعة اللي اقل تشريفة كانت بتقفله بالساعات
احلف لكم لما كان ميتران هنا في مصر
وكان في قاعة المؤتمرات ان المنطقة اتقفلت
6 ساعات قعدتهم في الشارع جوه عربيتي
بلاش تصدقوا ان انا نقلت بناتي من مدرستهم
اللي بيحبوها وكانت ممتازة
لمدرسة قريبه من البيت
بسبب تشريفات اللامبارك ومراته اللي كانت مابتهمدش كل شوية تشريفة
لما يتقفل ميدان رابعة
علشان شاب زي محمد ده شرف لميدان رابعة
والميدان ماتقفلش كتير
اصل محمد طاااااااااار زي اليمام
محمد صلي عليه ناس كتييييييييييييييييييير
ربنا ينتقم من اللي قتله غدر
محمد مات ان شاء الله شهيد
ان شاء الله الجنة ونعيمها
ودخل التاريخ من اوسع ابوابه يعني دنيا واخره
واللي قتله دخل مزبلة التاريخ
وكفاية دعاء ام محمد عليه

الفجر وباب للمدونين

كيمو (صوت من مصر)
بيشتغل في جريدة الفجر
وهيعملوا في الجريدة باب للتدوين
يعني ياخدوا من المدونات
اللي يحب يشترك دي المعلومات اللي ادهاني
ونحيطكم علما ان كيمو ده
العريس بتاع يوم الاحد ان شاء الله
:))))
المطلوب داتا بالأسم والتليفون لأسماء الكتاب ومدوناتهم ..
موقع الفجر
http://www.elfagr.org
الباب
http://www.elfagr.org/Detail.aspx?nwsId=0&secid=19&vid=2
للتواصل معى 01225171958 كيمو

العيال بتوع التحرير والحلابوظا

وماحدش يسألني يعني ايه الحلابوظا
اصلها ماتتشرحش يعني ناس في البلالة
وماحدش يسألني يعني ايه بلالة
اهي حاجة هلامية كده مالهاش معالم ولا لون ولا ريحة ولا اي حاجة
حاجة حلابوظة كده
المهم نرجع للعيال بتوع التحرير
اللي خربوا البلد
وقفلوا ميدان التحرير وعطلوا العجلة
مع ان ميدان التحرير ده اتقفل اكتر من مره
مره 77 ومرة لما كانوا بيعملوا متروا الانفاق
وماحدش جاب سيرة العجلة
ومصر الجديدة نصها مغلق بسبب اعمال المترو
والدنيا اخر زهق وماحدش جاب سيرة العجلة
وهنا بقا عايزة اسأل
دلوقتي بقوا العيال بتوع التحرير خلاص
بقوا وحشين وكخة
بعد ماطلع علي حسهم اللي ماكناش بنسمع لهم حس
ولانعرف لهم وجود اصلا
وكله ركب الموجة ولحقله حته من التورته
دلوقتي بقوا هيخربوها بعد مااتسحلوا واتسجنوا
وضاع نور عينيهم
علشان الحرية والكرامة والعدالة
دلوقتي بتخدوهم منهم
لما اترستأتوا وبقا لكم وجود بتدوروا الدفة عليهم وتقوموا الناس عليهم
وبقوا من اول اعمال منافية .......حتي التمويل الخارجي وكمان يتسموا
وكأن المصري مش مصدق ان في مصري تاني عنده دم وممكن يثور للكرامة والحرية
لازم يبقا قابض
الاول اتفرجتوا عليهم ومن بعيد لبعيد
اهو لو نجحوا نبقا كنا معاهم ولو فشلوا واحنا مالنا
ولما نجحوا فضلتوا تتمسحوا فيهم وتزيحوهم شوية بشوية
لحد ماتمكنتم
زحتوهم خالص طلعوا مابيتزاحوش
قلتوا بس الخطة القديمة شوه ياجدع علي قد ماتقدر
ودس في وسطهم شوية مشبوهين يتحسبوا عليهم
الحملة الاعلامية ضد العيال بتوع التحرير واضحة ومعروفة المعالم
ياريت تلعبوا غيرها
علشان العيال بتوع التحرير دول(شباب وبنات) ارجل من اي راجل في مجلسكم الموقر
والعيال بتوع التحرير دول ايمانهم بالقضية احسن من اي تيار طلع لنا في المقدر والمكتوب
علشان همه بيعملوا لمصر
وانتوا بتعملوا لأهداف خاصة
وكلمة بقولها ومش هبطلها
الشعب المصري مش هيضحك عليه تااااااااااااااااااني
------
سؤال في السريع
هو حملة اشتري المصري دي فعلا هنشتري المصري ولا هنلاقي اللي بنشتريه صيني؟؟؟
-------
بعتذر عن عدم الرد علي التعليقات لضيق الوقت وهرد في اقرب فرصة ان شاء الله

شكل للبيع مرشحكم :)

يااهالي الدائرة الاولي
محافظة الجيزة
لينا مرشح عندكم
حاتم عبد الفتاح
صاحب مدونة شكل للبيع
علي قائمة حزب الوسط
ربنا يوفقك ياحاتم ويبقا لينا مدون تحت قبة البرلمان
ومش هوصيك بقا تتوسط لنا عند بلوجر
يشيل الشكل الجديد اللي فرضوه علينا ده
ربنا معاك

فتش عن المرأة

كنت المفروض اكتب عن اللي حصل واللي شوفته يوم الجمعة
في ميدان التحرير
وكمان في اعتصام مجلس الوزراء
(هنأجله البوست الجاي)
لكن حبيت احيي الصحفية والسياسية الجميلة
توكل كرمان
واقول ان نوبل تشرفت بها
وليس العكس
وعايزة اقول ان كل امرأة عربية هي توكل كرمان
ومثلهم الاعلي هذه القصة
اللي الرسول الكريم تركها لنا عبرة وعظة لكل مسلم ومسلمة
اهديها للمتشددين اللي عايزين يعملوا دين علي مزاجهم
متجاهلين الاسوة الحسنة
----------
((عندما هاجر الرسول الكريم من مكة الي المدينة لم يطلع احد علي سره
الا الصفوة من اصحابه ممن سيشتركون في الخطة
ترك سيدنا علي في فراشه
وخرج ومعه صديقه الصدوق ابو بكر الصديق
وكان لابد ان يأتي احد لهم بالاخبار والطعام
علي بعد كبييييييير من مكة
واللي راح العمرة او الحج عارف قد ايه موحش هذا الطريق
الان بعد كل التقدم والانفاق والكباري والحياة المدنية
فاكيف كان ايام الرسول
سؤل سألته لنفسي لما كنت في الحج هذا العام
المهم
هذه المهمة الخطيرة
ان يحمل احد الاخبار والطعام للرسول الكريم وصديقه ابو بكر
لمن ستسند هذه المهمة
؟
فيضرب لنا الرسول اروع مثل لمشاركة المرأة المسلمة وعدم تهميشها
اسماء بنت ابي بكر
اولم يكن هناك من الرجال من يقوم بهذه المهمة من شباب المسلمين
لكن الرسول الكريم الذي لم يكن ينطق عن الهوي
اختار بعلم ربه
لهذه المهمة المحفوفة بالاخطار هذه الصحابية الجميلة
وقد قامت بالمهمة علي خير وجه
وفي روايات انها كانت حامل اثناء هذه المهمة
-----
الا تكفي هذه القصة لأسكات من يقول ويتقول علي الاسلام
في حق المرأة
لقد حرر الاسلام المرأة واعاد لها حقوقها
التي سلبت منها من مجتمع الجاهلية
-------
ربنا يهديكم يارب
------
وعلي فكرة في مدينة الحجاج
وزع علينا شريط كاسيت مكتوب عليه تحرير المرأة
وده هبقا اعمل عليه بوست
ان شاء الله لما اخلص الاشغال الشاقة اللي انا فيها اليومين دول
:))
ونقول مبروك لنوبل توكل كرمان
-------
حاجة علي جنب: مقصرة مع الجميع بس بجد
مشغوووووووووولة
جدااااااااااااااااا

كيمو في المصيدة :))

خبر الموسم وكل موسم
كيمو(صوت من مصر)
هيتجوز ياميييييينز
الف الف الف مبروك والله يعينها ويقويها
وبما اني مامته التانيه
فوضني اعزم اهل بلوجر الكرام
والحفلة في مركز شباب سرايا القبة يوم 25 ديسمبر
وعقبال الجميع
واسمع زغروته
علشان هنخلص من كيمو عقبال ازهري يارب
:))

الكزروللا:)

اليومين اللي فاتوا كنت مشغوووووووووولة
جدااااااا
الحمد لله كنت بخلص من بنتي نمرة 2
والحمد لله وماشاء الله ولاقوة الا بالله
الفرح تم علي خير
بس عايزة اقولكم
ان مافيش حد بيمشي كله بيرجع تاني
وبدل فرد بيبقا اتنين وبعدين تلاته
:)))))
المهم لمافضيت امبارح قلت اشوف ايه اخر الاخبار
فتحت التليفزيون
علي قناة سي بي سي بتاعة ابو العينين
لاقيت بيعرضوا غلق الصناديق بالشمع الاحمر
وفنجلت عينيه من هول ما كان علي الشاشة
وكله كوووووم
والكزرولا القديمة المصدية اللي كانت علي باجور مولع كوم
ايوة
فراش المدرسة ماسكها من ايدها وحاطتها علي النار
وجواها الشمع الاحمر
وبعد كده بقا يصبه لسيادة العقيد علشان يشمعوا
يقفلوا الصناديق
وبعد كده القاضي يختم علي الشمع
وحمل ياجدع الصندوق وحطه علي جنب
واللي بعده واللي بعده
صناديق انتخابات تتشمع كده
!!!!!
وده منظر تتناقله وكالات الانباء
المحلية والغير محلية وبلاد تركب الافيال
ماعنديش تعليق
غير اني بعد مااستوعبت المنظر قعدت اضحك ضحك كالبكاء
ولاتعليق عندي
----
حته علي جنب ::
هي الناس نزلت علشان خايفة من ال500 جنيه غرامة
ولا فعلا عايزين ينتخبوا
ولما كده و 52 % حضور
اومال زمان كان ايه؟؟؟

يوم تاريخي بالنسبة لي

المفروض اكتب عن اللي بيحصل
او عن الانتخابات او عن الحج
بس انا هكتب عن يوم بالنسبة لي تاريخي
احب اسجله هنا في مدونتي
النهاردة اتميت رسالتي التعليمية
ايوة
بحفلة تخرج ابنتي الصغري
وانهي مشواري مع التعليم والحمد لله
الاهم واللي جاية احكي عنه غير فرحتي طبعا وشعوري ان مشواري انتهي
مشوار طوييييييييييل
والحمد لله خلص علي خير واجمل مما كنت احب
ربنا راضاني في بناتي والحمد لله
ايه هو الاهم؟
الحفل
حفل الجامعة العربية المفتوحة
وهي جامعة نظامية مش تعليم مفتوح
بس اسمها كده علشان لها 7 فروع
في الوطن العربي والاصل في انجلترا
ومن حق الطالب يتنقل بينهم يعني اللي اخد اولي من مصر
ممكن يروح يكمل في الكويت او عمان او الاردن الخ
الجميل في الحفل
ان الجامعة بها طلاب عرب من الاقطار العربية
قامت فتاة من العراق قالت كلمة
ومن ضمن الكلمة العرفان للجامعة ومصر ودعت لمصر والعراق
وقام طالب مصري من ضمن كلمته تحية شهداء الثورة ودعا لمصر وثورتها
من ضمن الطلبة اتنين رجلهم مكسورة في التحرير

بعد توزيع الشهادات واعلان التخرج
والصويت والزغاريد والتصفير والضحك والبكاء
الطلبة نفسهم احيوا الحفل
مجموعة من الطلبة الشباب العراقيين
قدموا دبكة عراقية جميلة وكانت لوحة مبهرة
وطالب مصري قلد الفنانين والمغنين وبجد موهوب
اتنين شباب ماعرفتش من اي قطر عربي
علشان غنوا بالمصري بس اللكنة واضحة
وكان بيردوا علي بعض بطريقة لطيفة وصوتهم بجد رائع

الطلبه والطالبات كانوا اجمل لوحة
ماتقدرش تعرف مين من الكويت مين من مصر مين من لبنان
ماتقدرش تعرف

من الحاجات اللطيفة في الحفل
ان بنتي كانت جنبها طالبة لها وضع خاص جدا
دخلوا كي جي مع بعض
وبرضوا بيتخرجوا مع بعض
مؤبد يعني والاتنين شبه بعض

من الحاجات المش لطيفة في الحفل
وجود احمد زكي بدر اللي لما اترحب بيه في الميكروفون ماحدش صقف اصلا
وبعدها بدقائق غادر الحفل مقموص شكله اصل في ناس قالت ييييييييي

الحفل خلص زي العمر اللي بيخلص
والحمد لله بشطب اهو علي ادواري
عقبال الجميع اللي ماتخرجش يتخرج
واللي ولاده لسه ماتخرجوش يتخرجوا
:)

كل سنة وانتم طيبين

كل سنة وانتم طيبين ومصر بخير وسلامة

عايزة ارغي معاكم كتيييييييييير
بس بجد تعبانة جداااااااااااا

حبيت بس اهنيكم براس السنة الهجرية
وان شاء الله السنة الجاية تكون اجمل وكله يبقا زي مانحب

ومصرنا الغالية تبقا اجمل

وماتخافوش مبارك دي لزوم اللغة العربية
وبعدين ماطلعش مبارك طلع سيد
:))

ازيكم

الحمد لله
رجعت بالسلامة
بس تعبانة ان شاء الله ارتاح شوية
وارجع احكيلكم وتحكوا لي
وماننساش ندعي لمصر

رايحة الحج :) + تحديث

مسافرة بعد ساعات قليلة
ان شاء الله هدعي للجميع
وياريت تدعوا لي
وكل سنة وانتم طيبين

الحمد لله والشكر لله
ان شاء الله اسافر للحج
يوم الاحد القادم
عقبالكم جميعا
هي رحلة من امتع الرحلات اللي ممكن الانسان يقوم بها
رحلة وجدانية
رحلة امتثال وطاعة لله
لبيك اللهم لبيك لبيك لاشريك لك لبيك
ان الحمد والنعمة لك والملك لاشريك لك
ادعولي وهدعي للجميع
ان شاء الله
--
المدونة امانة
اوعوا حد يحذفها
:))

الانتخاااااااااااااابااااااااات !!؟؟

انشرها وإشرحها وثقف البشر تؤجر بجد مش دعايات فارغة...
on Twitpic

بعد دراسة عميقة مستفيضة محولة (اي حولة)
في موضوع الانتخابات
فهمت كده علي قدي
وكنت محتارة افهم اللي حواليه ازاي
ايوة ماهو لازم اللي يفهم مايسكتش يفهم اللي حواليه
الموضوع مش سهل المره دي
ولازم كله يفتح عينه بس مش علشان ياكل ملبن
لا
علشان نحاول نجيب مجلس شعب كويس علي مقاس المرحلة بالظبطت
مش مجلس شعب اوووووول سايز
ده رسم لاقيته علي الفيس وتويتر منتشر وبصراحة كويس ونميس
وماكنتش عارفة انشره هنا
لاقيت الدكتورة ستيته نشراه هناك بطريقة عرفت انشره منها
وكمان دول بوستين من عند الزميل ماجد القاضي برضوا مهمين
البوست الاول
البوست التاني
وادينا نتعكز علي بعض لحد مانفهم ونفهم اللي حوالينا
فاكرين النبؤة بتاعت فتحي سرور!!؟؟:))
وادي النبؤة التانية
مجلس الشعب الجديد بالترتيب العددي
اخوااااااااااان
وطني وفلووول
سللللللللللللفين
وفديييييييييين
باقي التيارات والاحزاب والمستقلين
اما شباب الثورة يبقا يقابلني في الثورة الجاية
وماتقولوش اني محبطة
النبؤة لو صحت هيبقا مجلس جميل:)
وقلبي مع المستقلين الجدد والقدامة الدوائر كبييييييييرة جدا وعلشان يلف هنا وهناااااااااااااااك عايز سنة
اما المراة بقول لها هارد لك المره دي وادي اللي خدناه من الكوتة
المصرين في الخارج علي عيني وراسي طبعا
بس المصرين بره مصر انواع
نوع في الدول العربية ودول من وجهة نظري لازم يدلوا بأصواتهم
وكذلك المصرين اللي في بعثات مؤقته
لكن المصريين اللي هاجروا بره مصر نوعين
نوع مرتبط الي الان بمصر ويعرف عنها اكتر من اللي عايش فيها
ونوع مايعرفش حتي لو رجع شارع بيتهم القديم فين
واولاده ايوة معاهم الجنسية المصرية
لكن مايعرفوش حتي مصر فين علي الخريطة
ومش هيعرفوا اصلا يقروا ورقة الانتخاب علشان بالعربي
يبقا هيفهموها ازاي اذا كان احنا لحد دلوقتي بنحاول نفهم
ونتعرف علي المرشحين عن دوائرنا
قبل مانسمح للمصري بره مصر يشارك
لازم نعرف اللي هيشارك ده فعلا مصري ولا جنسيته مصري بالوراثة مش اكتر
ولازم الموضوع يدرس ويطلع قانون صح يطبق صح مش كل حياتنا كده
قوانين بنج للتهدئة وبس
واتمني لكم انتخابات سعيدة
:))

حكايتي مع القذافي

كنت هنشر مافيا اتنين
واتكلم عن الحكام العرب اللي بدايتهم كانت زي المافيا
ابتدوا ثوار وانتهوا سفاحين طغاة
سرقوا اموال الشعوب واحلامهم وصحتهم
ومن اكتر الحكام العرب شبه
العقيد القذافي
وبما ان اذكروا محاسن موتاكم
مش هنشر البوست لكن هكتب جزء من قصة عشتها بنفسي
----
كنت اعيش في طرابلس ليبيا فترة من الزمن
واحنا في ثانوي طلع علي نافوخ القذافي
اننا نروح المدارس بالزي الوطني الليبي سواء بنات او شباب
والزي الليبي غالي الثمن
ويتكون من توب اسمه الريديه
والجزء اللي يتلبس علي كامل الجسد
اسمه فراشية وده لونه ابيض ده غير منديل الراس
المهم وزع علي مدارس ليبيا الزي الوطني الليبي
تلات ريدية تلاتة فراشية تلاته مناديل راس
ورفضنا نلبسه طبعا سواء الليبيات او باقي الجنسيات
وفي يوم واحنا في الطابور
لاقينا باب المدرسة بيتفتح علي مصرعيه(حلوة مصرعيه دي:))
وعربية القذافي داخله هو اللي سايقها
(ايوة سنة74 كان معبود الليبين وكان بيتجول عادي بدون حرس)
المهم لاقيناه دخل علينا من باب المدرسة ووقف عند مكان الاذاعة المدرسية
وقال لنا جعمزو(يعني اقعدوا)
وراح قاعد علي السلالم بتاعة المدرسة
وسألنا ليه مش عايزين نلبس الزي
ردت عليه واحدة من المصريات ليه نلبس لبس بيعوق عن الحركة
لو عايز نلبس لبسنا المصري
وطبعا باقي الجنسيات قالوا نفس الكلام
راح ضاحك وقال( باهي)
وقال خلاص ماتلبسوش
والزي هدية مني ليكم
ومشي والبنات بتسقف وتهلل وفي اللي صفروا كمان
بعد ماصرف ملايين علي اللبس وتوزيعه علي المدارس
عادي بدون تخطيط وتفكير في اهدار المال
مال الفقراء اولي بيه
هو ده العقيد القذافي اللي انا شوفته في يوم من الايام

خير اللهم اجعله خير

كنت هانشر النهاردة الجزء الثاني من مافيا
لكن استفزني جداااااااااااااااا
خبر القبض علي الناشط ب6 ابريل
علي الحلبي
الخبر اهووووووووو
مش ممكن شاب نزل يرسم علي الحيطان
ويحذر الناس من انتخاب المرشحين من الفلول والحزب الوطني
وكمان يتقبض عليه وهو بيرسم يبقا كده متراقب
هو في ايه؟؟؟؟
هنتحاسب كمان علي الرسم علي الحيطان
!!!!!!!!!!
نفس الحيطة دي كان مشتوم عليها المخلوع من قبل مايتخلع
هو في ايه؟؟؟؟؟
مدونات تتقفل
طلبة يتقبض عليهم
ونشطاء يتقبض عليهم ويتحاكموا عسكريا
احنا بنرجع للخلف ايام المخلوع ولا ايه؟؟!!
طيب مايتشطروا علي بتوع مؤتمر الصعيد
اللي قالوا وهددوا بأنهم هيولعوا في البلد لو صدر قانون العزل السياسي
ولاحد قالهم حتي عيب ولا جه جنبهم
ولا هي ناس ناس
ياريت ننزل كلنا يوم الجمعة نرسم علي حيطان الحي بتاعنا
ويبقوا يقبضوا بقا علينا كلنا ويخلصوا نفسهم مننا
وعلي راي اهل سوريا
الموووووووووت ولا المزلة

مش مصدقة !!!!

النهاردة
وانا رايحة مشاوير عديت علي السماك
واخترت سمك وقلت له نظفه وابعته علي البيت
وكلمتالشغالة قلت لها في سمك جاي انا محاسبة عليه
رحت المشاوير ورجعت
غبت يجي 3 ساعات كده
ولمارجعت مالقيتش السمك
فين السمك ؟
قالت مافيش سمك جه
اتصلت بالسماك فين ياابني السمك؟
قالي ده اتبعت من زماااااااااان يامداااااااااام
لأ يابني مافيش حاجة جت خالص!!
نده الولد وسأله
فين السمك؟
قاله وديته وصاحب الشقة اخده
قلت له لأ الموجو شغالة و بس
المهم بعت معاه واحد تاني عارف البيت عندي
علشان الولد ده جديد
المهم
الولد سلم السمك في شقة تانيه في شارع تاني
اللطيف ان الرجل اللي اخد السمك
سأل الولد ده متحاسب عليه؟
قاله ايوة
اخده وقفل الباب
وخلااااااااااااااااص
وعاااااااااااااااااادي
صاحب المحل نفسه راح للرجل
يحاول ياخد منه السمك او فلوسه
الرجل رفض قاله وانا مالي حد قالك تغلط
وادفع لك ليه تمن شئ ماطلبتوش
!!!!!!!
بالنسبة لي انا لاتعليق لما صاحب المحل قالي
بالنسبة للولد اللي غلط
اصريت انه مايمشيهوش وتنازلت عن تمن السمك
وحذرت السماك لو لاقيته مشاه مش هيحصل طيب
ايييييييييييييييييييييه تعليقكم ؟؟
ولا حول ولاقوة الا بالله

عدناااااااااااااا+ تحديث هااااااااام

ده انا علي تويتر تحسبااااااااا
لأي حركة غدر تاني
hananfattah
والمدونين اللي اتحذفت مدوناتهم ان شاء الله هترجع
وحسبي الله ونعم الوكيل
====

الحمد لله والشكر لله
------
النهاردة جاني تهديد ان سيتم الانتقام مني من غير معرف
مااخدتش في بالي طبعا
عااااااااااادي
ماكل شوية يجيني تهديد وشتيمة
لدرجة ان في مرة حد بعت لي اني هتجرجر علي س 28
اه والله
:))
ماعلينا المهم مااخدتش في بالي
وانا قاعدة المغرب برد علي التعليقات وبزور المدونات
وهووووووووووووبا مافيش
ايوة مافيش مدونة خااااااااااااااالص
وربنا يكرمه ازهري
فضل وراهم في بلوجر لحد مارجعت المدونة
الان حاااااااااااااااالا
قلت اكتب بوست اشكر ازهري
واحذركم ان لازم تصدروا مدوناتكم علي كمبيوتاراتكم
واللي مش هيصدرها هيبقا ذنبه علي جنبه
-----------
بس عايزة اقول ان افكرنا في رووووووووسنا
مش بس في مدوناتنا
المدونة تتاخد
نعمل الف مدونة وبرضوا نكتب افكارنا
اللي بيحصل في بلوجر ده من قفل للمدونات
اسمه قصر ديل
وحيلة العاجز
ماعلينا المهم المدونة رجعت
ورجعت ارازي فيهم تاني
:))
عمر الشقي بقي ومدونتي مخاوية

المافيا :))

ليه بقيت حاسة ان مصر كانت ولاتزال محكومة بعصابة المافيا
يعني اللامبارك كان الدون مبارك
وجمال وعلاء وشريف وسرور و سالم ....الي اخر اسماء العصابة
المساعدين والصبيان
وعلشان المافيا المصرية تعرف تشتغل وتكسب
لازم يكون الامن مستتب ومافيش قلاقل
والناس تبقا مش لاقية تاكل ولاتتعلم علشان يبقوا مهمومين
ومشغولين بالبحث عن لقمة العيش او يهاجروا ويسيبوا البلد وتبقا مصلحة
ولما الشعب قفش الدون مبارك والرؤؤؤؤؤؤؤس المهمه ورماهم في السجن
طبعا بعد ماكان الدون هدد و قالك ياانا ياالفوضي
راح باقي العصابة بره ضربوا كرسي في الكلوب وقلبوها فوضي وضلما
ومابيعديش اسبوع الا والبلطجية مولعين في حته في البلد
ولو قريتوا عن المافيا هتعرفوا انا بربط بينهم ليه
وفي رجال اعمال مصريييين كتيييييييييييييير
بيتعاملوا مع المافيا وخصوصا في السلاح
الرحمة من عندك يارب
---------
هضرب لكم مثال
لاس فيجس مثلا دي بلد قطعة من جهنم
كلها قمار مافيش مكان فيها مافيهوش ماكينة قمار حتي السوبر ماركت
وطبعا قمار وكل مايسمي منكر وفاحشة
ومع هذا بلد منضبط جدااااااااا
ومنتهي الامان صبح ليل فجر في امان ومافيش عسكري واحد في الشارع
المااااااااااااافيا مسيطرة علي البلد
علشان السائح مايخفش ويحس انه محمي وماحدش هيقرب له
ويلموا فلوس وهي اعلي ولاية في الضرائب
-----
مين بقا المافيا دول
دول جماعات جميلة لطيفة اتكونت في جزيرة صقلية
في القرن الثالث عشر
علشان اييييييييييييه
مقاومة الغزو الفرنسي
:)))
وبعد ماخلصوا عليهم تحولوا الي عصابات اسرية منتهي النظام والدقة
وعلي فكرة مافيش حكومة علي الارض الا وتعاملت معاهم
وحتي حكومات امريكا تعاونت معاهم
صحيح غدرت بيهم بعد كده
بس همه بقا ماسكتوش جننوهم
وكمان اصلا اسر المافيا مسيطره علي مناطق كتير في امريكا
من اهمها نيويورك وشيكاغو ولاس فيجس واي حته فيها قمار
اللي عايز يقرا العجب عن المافيا ودورها علي مستوي العالم
يدخل اللينك ده بعد البحث والتنقيب
لاقيت ده ابسط بحث وملخص الحدوته كلها
-----
امضاء دونة شمس
:))

شكل تاني للحدوتة

حدوته ماتتحكيش غير في مصر وبس
اصلها حدوته من القلب
مع مصر ماتلعبش بالنار هتحرقك

الهجرة

من دواعي افتخاري وحبي لمصر
اني متاح لي ان اهاجر وبسهولة وارفض
والحمد لله
ولي صديق من ايام الكلية مثلي ممكن ان يهاجر وبسهولة هو واسرته
ويرفض متمسك بتراب مصر
وزوجته الحبيبة تصر علي تربية اولادهم في مصر
لما بنقعد في وسط اصحابنا المشتركين بيتريقوا علينا
ويقولوا في حد يلاقي الفرصة دي ويقول لأ
لكن
النهاردة جاني منه تليفون بيقولي
انه هيبتدي يعمل ورق الهجرة ويلتحق بأخواته في كندا
بجد اتخضيت
وقلت له ليه كده ومراتك موافقه ؟؟
سألته لعلمي انها اكتر مني عايزة اولادها يتربوا في مصر
قالي ايوة واكتر مني
ليه كده ؟؟
ده من دواعي فخري تمسكنا بمصر
قال لي مصر ماعدتش زي الاول
ومش امان للمسحيين
الكلمة وجعت قلبي
قلبي موجوع عليكي يامصر

مشروع نقابة للمدونين

كل مدون بيحلم بحفظ حقوقه الأدبية والفكرية
كل مدون بيحلم إنه مايلاقيش تدوينته منشورة باسم
شخص تاني بعد ماتعب فيها

إحنا كمدونين من حقنا يكون في جهة
تحمي حقوقنا الأدبية والفكرية من السطو عليها

الجهة دي لازم تكون نقابة

أيوة نقابة للمدونين ماتستغربوش

دي مجرد فكرة بدأت بحوار عادي بين أخوة مدونين

مصطفى سيف
صاحب مدونة طير الرماد
رحاب الخضري
صاحبة مدونة فتافيت ربع قرن
نهى صالح
صاحبة مدونة كلام فاضي

وتحــــولت لحلــــــم كبيـــــر
بنحلم بيه ونفسنا نحققه
علشان نحفظ حقوقنا بشكل محترم

لــــــو الفكرة عجبتكم
أنشروا البوست ده في مدوناتكم ...
ولو إنتشرت الفكرة ولاقت ترحيب..
ساعتها هنقدر ننشر التفاصيل وندخل في تنفيذ الفكرة


مش هنقدر ننفذ فكرتنا لوحدنا
شاركونا بأرائكم وأفكاركم وأي استفسارات لكم
على أي مدونة من المدونات التلاتة

كلام فاضى
طير الرماد
فتافيت ربع قرن

يمكن الفكرة تكون مستحيلة
بس لو حاولنا مع بعض هنقدر نحولها لواقع

ودي الفان بيج
اضغط

.. بتاعة المشروع،،

شــــاركونــــا،،!

الشعب هو الباقي

كل سنة وكل المصريين بخير
كل سنة وكل من اشترك في انكسار67 بخير
كل سنة وكل من شارك في نصر 73 بخير
كل سنة وكل شاب(كهل الان)
تم تجنيده ليقضي سنة فقضي اكتر من 5سنين مجند وشارك في رفع راس مصر
كل سنة وكل شاب (برضوا كهل الان:)) من شباب الدفاع المدني بخير
كل سنة وكل فتاة(تيته الان:))كانت من ضمن المتطوعات في المستشفيات
كل سنة وكل طبيب وطبيبه وهيئة التمريض بخير
كل سنة واهالي الشهداء والمفقودين بخير
كل سنة والجيش بخير
كل سنة وشعب مصر الحر بخير
كل سنة وكل من شارك في ملحمة النصر بخير
=====
دي سلسلة كتبتها
خواطري عن الحرب اللي الحمد لله عشتها
عبرنا الهزيمة 1
عبرنا الهزيمة 2
عبرنا الهزيمة 3

المعطف والمطر (سلسلة معطف من القيود) الرحلة 23

ده لينك مدونة معطف من قيود

خرج محمود من منزلة تشيعه لعنات زوجته الغاضبة الصارخة
ولسان حاله يقول (هي دي جميلة الجميلات الرقيقة التي احببتها)
خرج يهيم علي وجه حزين(هجيب كل الطلبات دي منين)
وبينما هو سائر مهموم
والمطر ينهمر عليه بشدة وهو لا يبالي
اذا بالمعطف قابع علي الارض
في سكون الموت حزين هو الاخر
انه لايجد من يحتويه ويحتفظ به الي الابد
اصبح مشرد كل يوم بل كل ساعة في مكان
واوشك الشتاء علي الرحيل دون ان يجد له مأوي
مره يكون نعمة وتارة اخري يكون نقمة
التقط محمود المعطف في دهشة
وانتظر قليلا لعل صاحبته تعود تتفقده
بعد ساعة قرر محمود ان يبيع المعطف لتاجر الملابس القديمة
ويشتري طلبات البيت اللي لاتنتهي
وهو ذاهب الي التاجر وجد الشرطة تقبض علي التاجر
لبيعه الملابس الغالية المسروقة
وانتبه احد الظباط لوجود محمود
ومعه المعطف الثمين فاقبض عليه لظنه انه معهم
وبات محمود في حجرة الحجز مع القتله وتجار المخدرات
وتعرف علي تاجر من تجار المخدرات الكبار داخل زنزانة الحجز
وفي هذه الليلة حكي محمود لتاجر المخدرات قصته مع الفقر
ومع زوجته الجشعة وطلباتها التي لاتنتهي
وقرر التاجر ان يأخذ محمود معه في تجارة المخدرات لأنه احبه
وفي الصباح اتي محامي من طرف تاجر المخدرات
واخرج محمود ومعه المعطف
بعد ان اقر تاجر الملابس القديمة انه لايعرفه وانه ليس معه
وكان صباح جديد علي محمود
اخذ المعطف وخرج من القسم
وتوجه للعنوان الذي اعطاه له تاجر المخدرات
وفتحت دنيا جديدة لمحمود ذراعيها
نجح في تجارة المخدرات
واصبح من الاثرياء
وقد طلق زوجته وتركها مع اولاده واغدق عليها المال لتتركه في حاله
وتزوج من اخت تاجر المخدرات
وظل المعطف معه
وفي يوم كان علي موعد تسليم نوع خطير من المخدرات
اصر المشتري ان يتسلمه من محمود نفسه
نزل من بيته وجد السماء تمطر بغزارة قال خير
وفتح شنطة السيارة ليضع المخدرات المخبأة في لعبة من لعب الاطفال الكبيرة
فوجد المعطف فيها
ضحك في نفسه
وقال ماعدت اريدك تذكرني بأيام لا احب ان اتذكرها
وبعد ان سار بالسيارة قليلا توقف
وفتح شنطة السيارة واخرج المعطف والقاه في الطريق بعصبية
كمن يتخلص من حمل الماضي التعيس
وتحرك مره اخري بالسيارة
وبعد مسافة
اذا بسيارات الشرطة تحيط به وتوقفه
وتخرج المخدرات من السيارة وتقبض عليه
وهو عائد مقبوض عليه بداخل سيارة الشرطة
ومن نفس الطريق
لفت نظره ان شاب وفتاة يضحكان تحت المطر ويرتعدان من البرد
وجدا المعطف
ويحيط الشاب الفتاة بالمعطف ليقيها من المطر والبرد
فاتبسم في نفسه
واسترجع شريط حياته قبل وبعد المعطف
====وللمعطف رحلة جديدة بكاتب جديد
====
ملحوظة:
اول مره اتجااااااااااسر واكتب قصة
:))
نرحب بالنقد البناء
:))

صورة ومعني

اللي بيحصل في السعودية غريب اليومين دول
بس اللي غايظني
ان يتقال ان خادم الحرمين الشريفين اعاد للمراه حقوقها وانه اعزها
الاسلام من اعز المراه المسلمة
واعطاها حقوق سلبت منها علي مر السنين
الصورة ليه غريبة
علشان السعودية اي ست بتمشي مكشوفة الوجه بتعاقب ويعاقب زوجها
بس خلاص
دي لينكات مهمه عن الموضوع ده
ابلغ من اني اكتب عن كم النفاق اللي في الكلام
يعني لما كان كابتها كانوا بيهللوا له
ولما عمل كده برضوا بيهللوا له
الاول
الثاني
الثالث
وده لينك بوست من عند سواح كلامه زي الفل

الثورة والطلاق +تحديث

بوست من عند تامر علي كلام علي ميه بيضا صافية ميه ميه

==
نستخلص من جمعة 30 سبتمبر
ان الست المصرية مابتعرفش تطلق
ليييييييييييه؟؟؟؟؟؟؟؟؟؟
نشوف كده
عايزة اطلق : لييييه تبقي شايفالك شوفه
الشعب قام بثورة عايز حرية : تبقا في اجندات خارجية
-----
الست : ياجماعة انا مذلولة وبتعامل معاملة كلابي
كفاية عليكي الاستقرار وقعدتك وسط عيالك
طيب اخلع عايزة تخلعي ابو عيالك عيب ايه الفضايح دي
...........الخ الخ
----
الثوار الشعب مش هيتذل تاني يانعيش بكرامة يانموت
ايه ده هتخربوا البلد والاستقرار والعجلة
الريس ده ابونا هتبهدلوا ابوكم
.........الخ الخ
-----
تفضل الست تهاتي وتشتكي واللي حواليها ودن من طين وودن من عجين
هي متعذبه واللي حواليها سايبنها تهاتي ولا حد يسأل فيها
بحجت ماتخربوش البيت
وهو مخروب اصلا هو فين البيت ده
-----
الثوار كل جمعة ينزلوا يهتفوا ويعملوا مليونية
والمجلس ودن من طين وودن من طين برضوا
وسيبهم ياعم يطلعوا الكبت الثوري اللي عندهم
دول ولادنا برضوا
وهيروحوا ويرجعوا
ويادار مادخلك شر
وجمعة تفوت ولا حد يموت(من المجلس طبعا)
---------
وماشاء الله الزوج بيعمل اللي عايزه والست مطحونة
---------
وماشاء الله المجلس بيعمل كل اللي هو عايزه
ولا همه
والثوار يخبطوا دماغهم في الحيط
------
وعلي المتضرر ان يلجأ الي القضاء
------
وعلي المتضرر ان يلجأ للأضراااااااااااااااااااااااب
ولا حول ولا قوة الا بالله

جمال عبد الناصر اشمعنا

اشمعنا السنة دي
ذكري عبد الناصر محتفلين بيها كده
حتي الناس العادية برضوا فاكرين وبيتكلموا
يمكن علشان مصر في لحظة تاريخية
ومحتاجة فيها شخص زي عبد الناصر الان وزعامته
يمكن
حد عارف اشمعنا دلوقتي بنحتفل اوي كده
؟؟؟؟؟
انا فاكرة اليوم ده كويس جدا كان عندي12 سنة
وقلت قصيدة في الاذاعة المدرسية
(ايام ماكان في اذاعة مدرسية بحق وحقيقي)
ارثيه بيها كانت كتباها والدتي
وطبعا اكيد سمعتوا اغنية الوداع ياجمال ياحبيب الملايين
الاتحاد الاشتراكي ساعتها عملها والناس كانت بتغنيها
كده من غير فرقة موسيقية
زي اغاني الفولكلور
ومش هنسي منظر الناس وهي لابسه اسود كلهم
وماشيين في الشوارع يبكوا
وفيم اللي بيلطم
الشعب ساعتها كان حاسس انه اتيتم
اللي حبه واللي ماحبوش عيط عليه وبحرقة
الدول العربية وخصوصا
شعب ليبيا والسودان كانوا زينا واكتر
حتي الشاعراحمد فؤاد نجم
رثاه بقصيدة من اروع الكلمات
والمعاني
رغم ان جمال مات واحمد في المعتقل
قال ايه عم فؤاد في اخر القصيدة
====
ابوه صعيدي و فهم قام طلعه ظابط
ظبط على قدنا و ع المزاج ظابط
فاجومي من جنسنا
ما لوش مرا عابت
فلاح قليل الحيا
اذا الكلاب سابت
ولا يطاطيش للعدا
مهما السهام صابت
عمل حاجات معجزه و حاجات كتير خابت
و عاش و مات وسطنا
على طبعنا ثابت
و ان كان جرح قلبنا كل الجراح طابت
ولا يطولوه العدا
مهما الأمور
جابت
=====
ده كليب فيه لقطات من اليوم ده

=====
لو دخلتوا علي اليوتيوب هتلاقي كلبات كتير عن الموضوع ده
وانا بقلب فيهم لاقيت ميدان التحرير
وكوبري قصر النيل
قلت عجبت لك يازمن صور المكانين الان علي اليوتيوب بس بثورة 25 يناير
وتعيشي وتفتكري يامصر

مش لاقية كلام :(

اللي هقوله دلوقتي حصل علي ارض المحروسة
ومش من خيالي ولا من تأليفي
امبارح اتوبيس احد المدراس الخاصة المميزة
من بتوع الصفوة (الكلمة اختراع مصري صرف)
المهم الاتوبيس اتأخر علي اسرة اكتر من ساعة
ماكان من ولي الامر الا انه نزل ابنه من الباص
واجبر هو وتلاته من اصحابه السواق ان يتوجه بالباص
وبه المشرفة وباقي التلاميذ الي قسم الشرطة
علشان يعمل اثبات حالة ان الباص اتأخر
وده بعد مابهدلوا السواق وشتموه
يعني ولي الامر خطف الاتوبيس باللي فيه علشان يعمل محضر
الغريب بقا موقف القسم من الموضوع
يعني ايه يتخطف باص
بتلاميذ في حالة انهيار من اللي بيحصل حواليهم
ولما يروح القسم يتعمل فعلا محضر للمدرسة
مش كحضر للي خطف الباص
وكل اللي عمله القسم ان ساب السواق يمشي بالباص
والتلاميذ اللي طبعا اهاليم كانوا انهاروا من القلق علي تأخر الباص
وكمان النهاردة المدرسة كانت مولعة
اهالي التلاميذ راحوا المدرسة يتخانقوا
وكمان الرجل عايز ابنه يركب الباص تاني
بالرغم انه عمل محضر بعدم تعرض اي حد من المدرسة لأبنه
وطبعا المدرسة رفضوا ان ابنه يركب الباص تاني
بجد مش لاقية كلام اقوله
وولي الامر رجل متعلم ويشغل منصب مرموق
واكيد الموضوع ماخلصش لحد كده
وهنشوف هيحصل ايه
بجد حزينة

صاروخ القذافي

طلع في دماغ القذافي يصمم سيارة
:))
وفعلا صمم سيارة
وسماها الصاروخ
((التي صممها الزعيم الليبي معمر القذافي والتي تشكل "مستقبل صناعة السيارات" بحسب المروجين للمشروع. وازيحت الستارة عن النموذجين اثر قمة خاصة للاتحاد الافريقي في طرابلس خصصت لبحث النزاعات التي تشهدها القارة، وذلك عشية الاحتفال بالذكرى الاربعين لتولي القذافي السلطة في ليبيا ))
واتكلفت كام بقا 2 مليون يورووووووووو ايه الجمال ده بيسرق الشعب كده عيني عينك وتصنيع ايطاليا كمان
لو عايزين تعرفوا اكتر
زوروا اللينك ده
ولا عزاء للشعوب

المشير +تحديث :))

http://tahyyes.blogspot.com/2011/09/blog-post_25.हटमल
اللينك اللي فوق ده شهادة المشير المزعومة
اللي ملخصها
شاهد ماشافش حاجة
========

ادي شهادة المشير
مش كل مااشوف حد او اكلم حد الاقيه بيندب ويلطم
ان المشير ماشهدش الحق
لا اكيد شهد بالحق
والحق علي عبد الحق
يعني هيغير زمته والا ايييييييييه
قصدكوا يعني شهد زور
!!!!!!
ماالراجل اهو قال من غير ماحد يسأله
وبقالهم من فبراير
يقول لك خمينا الثورة حمينا الثورة
حمينا الثورة
بالليفة والصابونة
:))))))

ازيكم :)

مش عارفة طلع في نافوخي اسمع اغاني سودانية
وجيلي ارتبطت عنده الاغاني السودانية
بالفنان سيد خليفة
وقعدت اسمع وقلت اسمعكم معايا
:))

علي فكرة السودان بلد جميلة جدا
وفيها اماكن اثرية مختلطة مع الطبيعة الخلابة
والنيل هناك له لون راااائع
لو دخلتوا علي الصور في جوجل
هتشوفوا اجمل صور في الدنيا

الكركدية

صديقة علي تويتر كتبت تعبااااانة من الحموضة
فاكتبت لها اشربي كركدية بسرعة
وان شاء الله علي تالت او رابع كوب هيكون خلاص
عملت كده ورجعت
ولاقيتها بتقول لي شكراااااااااا
اول مره اعرف ان الكركدية بيضيع الحموضة
بسرعة كده
فا لاقيت اصدقاء كتير بيقول لي نفس الكلام
فاقلت انشر بوست عن الكركدية هذا المشروب المصري الاصيل
من ايام الفراعنة والمصري بيشرب كركدية
وعلشان مااطولش عليكم
ده لينك مدونة الطب البديل
مختصر لطيف بيتكلم عن الكركدية
واللي عايز يتعمق اكتر يدور علي جوجل
=====
وعايزة اقول لمستخدمي الحنة
حته علي جنب
لو طحنتي كوب كركادية لحد مايبقا بودرة وخلطية بالحنة وزيت الزيتون
هتلاقي نتيجة جميلة جدا
---
الكركدية يخفض ضغط الدم
وذلك عند شربه بارداً
كوب في الصباح وآخر في المساء،
ويرفع الضغط عند المرضى انخفاض الضغط
إذا شرب على الساخن كما يشرب الشاي
بمعدل كوب مرة في الصباح ومرة في المساء।
والله الموفق والمستعان
:)))
اي خدمة

خبرررر ياخبرررر

خبر ماقدرتش امنع نفسي اني انشره
مع اني كنت عايزة اسيب بوست ثورة لأماثوراشي
كام يوم
بس ده خبر لازم يتنشر
من باب
للذكري الخالدة
:))
تجميد ارصدة جماعة((اسفين ياريس))
ايوة طبعا كان واضح من التي شيرت المطبوع والكابات
بس يعني بتلاته مليون بس
ونبي اضحك عليكمابوكوا ايه بقا
ماطلع ابوك الجنيه
:))

ثورة لأ ماثوراشي

ثورة لأ ماثوراشي
ليييييييييييه ؟؟
تعالوا نشوف ليه؟

رحت مكان ما من غير اي واسطة ولا حد يوصي علينا
مع ان لو طلبت هيضرب لي بروجي وانا داخلة
بنتي قالت لي هنروح كده مش هتقولي لحد
قلت لها وانا متعنطظة اوووووووي
نقول لحد ايه يابنتي
مصر اتعمل فيها اجمل ثورة الناس اتغيرت
وياويله اللي مايسمع كلام بنته الصغيرة
المهم
دخلت وبعد السلام عليكم اللي اترد عليها بالعافية ومن تحت الضرس
قلت انا جاية ليه وحاجزة ايه وعايزة ايه
مش عايزة اقول لكم
كم قلة الزوق والبواخة اللي صدرت من هذا الشاب
وكالعادة مااتنرفزتش
انسحبت من قصاده وهو بيتكلم وخرجت عملت اتصالاتي
ولما اخدت الاوكيه لاقيته هو اللي طالع من مكتبه المكيف يدور علي سعادتي
واتغيرت الدنيا وبقت سيادتي والدنيا بقت بمبي
انا بقا ماسكتش
قلت له هو انت اشتركت في المظاهرات بتاعة الثورة
بكل فخر وحماس انا كنت من المقيمين يافندم يومي رغم خطورة ده عليا
قلت له يعني انت ثورجي
قال اه
قلت له طيب ليه لابس عباية النظام القديم
ليه لما جيت لك من غير وصاية رغم اني جاية اخد خدمة وهدفع تمنها
مش هقولك من اللي عليك
عملت كده
ولما عرفت اني اخت فلان عملت العكس تماما
قلت له للأسف احنا عملنا ثورة علي نظام
ولسه النظام ده معشش في عقول اغلبنا
ايه هنغير الشعب كمان
زعلاااااااااانة بجد

الذكريات الجميلة

الذكريات الجميلة مابتتنسيش
وطول عمري اقول
ان الذكريات الجميلة بتؤلم زي الذكريات المؤلمة واكتر
بتؤلم علشان بنقول لما كان في حاجات جميلة كده افترقنا ليه
البوست ده لأبن من ابنائي اللي بعتز بيهم
وعايزة اقول له
انتوا مافترقتوش علشان اختلفتم مع بعض
ولا انكم مش عارفين تحبوا بعض
ولا علشان مش عارفين تتفاهموا
وصدقني الذكريات الجميلة دي
اللي بينكم هتردكم تاني
مش هينفع حد يمحيها عندها ولا عندك
وان شاء الله تكون سبب رجوعكم تاني ورجوع الخطوبة
ايوة مش المهم الذكريات
المهم ان الذكريات دي تكون ماينفعش حد يعملها تاني ولا يمحيها
والخلاف اللي بين العيلتين هيروح وهترجعوا تاني
وبهديك الاغنية اللي كانت شغالة في خطوبتكم
اللي انا طلبت من الدي جي يذعها لكم
:)

=========
ونقول يارب وندعي لكم ربنا يردكم لبعض تاني
وخصوصا انكم مالكمش ذنب في اللي بيحصل
ندعي لهم
ونقول
آمييييييين