الأحد، 28 أبريل 2013

سعد روماني :)

 مسابقة داخلها الفنان المصري
سعد روماني
 وعايزين نصوت للوحة الحصان العربي 
اللي هي فوق دي
عايزة اشوف الهمة بقا

الأربعاء، 24 أبريل 2013

بلد الحريات والحلابوظة :)

واحد امريكي صديقنا ماكنش جه مصر 
بس عاشق لمصر 
والفراعنه
جه مصر اليومين دول
قالك انا قتيل البلد دي 
انا هقعد هنا
وهشتغل هنا
ده بلد الحريات :)
قالك هو في حرية اكتر من كده
كل واحد بيعمل اللي هو عايزه
مافيش ممنوعات
ولا تيكت علي اي مخالفه
وبعدي الشارع من اي حته تعجبني 
وبمشي في وسط الشارع مش علي الرصيف
وبرمي ورق في الشارع وماحدش بيكلمني 
وبشوف ناس سايقه عكس الاتجاه عادي
وكل عماره مافيهاش دور شبه التاني
والجيران بتضايق بعض عادي
والمحلات في وسط البيوت 
ومافيش محل مش طالع  علي بره
والقهاوي في الشارع وعلي الرصيف 
(مبهووووور بالقهاوي) 
اللي علي الرصيف في وسط بحر الطريق
حريه مالهاش حدود
وكان يوم مالوش معالم لما اخدوه العتبه:))
بقول لكم ايه العتبه جزاز والسلم نايلوا في نايلوا

السبت، 20 أبريل 2013

الفيوم :)

سافرت الفيوم في عمري 3 مرات
اول مره سنة 70 وقعدت اسبوع
شوفت السبع سواقي الجميلة 

وبحيرة قارون
ووادي الريان
ووادي الحيتان 

والاوبيرج الي اخر المعالم الجميلة اللي في الفيوم
ورحت تاني في 78 
بس ده كان يوم واحد ولما خيرت اروح مكان واحد بس 
:) 
قلت البحيرة وكان موسم البط 
ومااجمل منظر البط وهو طاير في تشكيلات جميله في السما وخصوصا قبل الغروب بساعه ونص
وامبارح كنت هناك !!!
ان ديش ان ديش
لاقيت فيوم راااااااابع
:)
والصورة اللي فوق خالص اول واحدة
 صورتها واحنا داخلين الفيوم علي الطريق
سألت السواق ياعم عزب انت متأكد ان دي الفيوم
ضحك وقالي ياباشمهندسه ايوة بس الخواجاتي :)
اعتقد ان الفيوم فقدت نص هويتها
زي كل مكان في مصر
فقد نص هويته
مليون استعمار من كل شكل ولون ماعرفوش يغيروا هويتنا وسحبناه وفرمناهم في هويتنا
ودلوقتي سبحان الله من غير استعمار ولا حاجه
 احنا بنغير هويتنا وبمزجنا 
عاااااادي كده
عارفين ربع الجمال اللي كان في الفيوم 
واللي بقي ربعه 
لو في امريكا كان بقا حاجه تانيه خالص
دول عندهم بحيرة كده شبه طشت الغسيل بتاع زمان
 اللي ساعة الغسيل الاسبوعي يبقا طشت غسيل 
وفي رمضان يبقا طشت عجن الكحك:)
وفي الطشت ده 
قصدي البحيرة دي شوية بط شكلهم يجنن 
وكاتبين ممنوع تأكل البط 
علشان ماتغيرش طبيعته في البحث عن طعامه
 يعني ماتلعبش في فطرة البط
وينهااااار ابيض 
علي اللي عاملينه حواليها
دكك خشب جميلة اماكن للشوي 
اماكن للعب الباسكت نضافه ايه 
ومافيش كافيتريا ولا حاجه 
عايز تيجي تقعد علي الليك هات حاجتك معاك 
عملوا من الطشت مكان ساحر رايق 
وقبل ماتمشي ياحلو لم اي شئ عملته
ونظف مكانك
والا هتاخد مخالفه توجع قلبك قبل جيبك
ماعلينا
انصحكم تلحقوا تروحوا الفيوم الساحرة
تستمتعوا بجمال الطبيعة والفطرة 
و باللي باقي وموجود منها
قبل مايتغير هو كمان 
وبدل ماتبقا محافظة الفيوم في جمهورية مصر العربيه 
تبقا( فا يو مو)
 الولاية ال54 من امريكا المحطة:)

الثلاثاء، 16 أبريل 2013

غربه

عارف لما تلاقي حياتك فاجأة اتطفي النور 
ظلام تام
ولما النور رجع 
لاقيت حاجات كتير اختفت وحاجات كتير اتبدلت
ايوة ده بيتي بس مش ده بيتي خالص
دي اوضتي بس مش هي خالص
عارف لما تخرج وترجع تلاقي بيتكم مش موجود 
بخ
وبرضوا عندك بيت بس مش ده خالص بيتي
زي ماتقولوا كده فقدان نصفي للذاكره
الاماكن والاشياء اختفت مش موجوده ولا الشخصيات
 لكن الذكريات موجوده
يعني الاماكن متغيره والشخصيات مش موجوده مشيت
مافيش حاجه موجوده غيرك انت والذكريات وبس
ذكريات جواك بالاماكن والشخصيات بتضغط عليك
وماحدش شايف ولا حاسس بده غيرك انت
اشخاص كانوا محور حياتك
 بخ 
حل محلهم ناس تانيه خالص
تحس بغربه
تحس بتوهان
الدنيا ليه اتشقلبت كده
الناس اختفوا ليه
طب راحوا فين 
طيب انا مين اصلا 
طيب اشمعنا ده كله اختفي وانا لسه
الحمد لله
كل مايعمل يعمل للخير

الأحد، 14 أبريل 2013

اللي يحب مصر

بنتي نشرتها لي 
كانت قاعده معايا وانا بكتبها
 قالت لي هاخدها انشرها 
وعلشان تتنشر لازم ننشرهااحناالاول
المهم اخدت التدوينه ونشرتها
زي ماهي كده
:))
بس لمابعتتها نشروها باسمها
:))
(وادي التدوينه اهي)
اللي يحب مصر مايخربش مصر
الكلمه دي اتكررت كتير في بدايه الثورة
وكانت تمام التمام
ايه بقا اللي جري
؟؟
مافيش مانع تتظاهر تعتصم اعمل اللي انت عايزه
ولكن
تخريب ليه؟
انت بتتظاهر عايز حقك ليه تعتدي علي حقوق الاخرين
انت علشان تتظاهر 
تحرق عربية واحد تاني الله اعلم شاريها ازاي
ولا لسه عليه اقساط
انت علشان تتظاهر تخلي واحد غلبان يقفل محله اللي بياكل منه عيش هو واولاده
ماتتظاهر بعيد عنه ولا بطريقه ماتضروش
ليه مطالبتك بحقك اعمتك عن حقوق وحريات الاخرين
انا مش ضد التظاهر بالعكس معاه قلبا وقالبا
ولكن
ضد التخريب والحرق والتكسير والاضرار بالمال العام والخاص
المال العام :اي خراب حصل لأئ مبني عام هيتصلح من جيوبنا وعلي حساب حاجات تانيه عائده علينا
المال الخاص:اي خراب حصل لأي شئ يملكه مواطن هيتصلح علي حسابه والوقت صعب وحسابه ده اليومين دول يادوب مكفيه
بحزن لما بلاقي اي تخريب في اي حته
وفي اماكن غريبه ؟؟!!
يعني اي متظاهرين لما بيهاجموا مبني الحي او المحافظه ويكسروه استفادوا ايه ؟؟
الا لو فعلا بلطجيه وواخدين فلوس
يعني اللي اقتحموا وزارة الماليه استفادوا ايه اخدوا حقهم؟؟
مااخدوش حاجه ومش هياخدوا!
اللي حصل في جامعة مصر الدوليه من تخريب وضرب للطلبه
مين اللي استفاد منه؟
وازاي يحصل كده في جامعه خاصه اصلا
واللي بيحصل في المنصورة الان محسسني ان الجامعات بقت ساحة قتال
وطلاب جامعة الازهر والتسمم الجماعي وماتبعه من احداث
والكاتدرائيه واللي حصل فيها اللي ماحدش عارف لحد دلوقتي الحقيقه فين
ولا عرفنا حقيقة اي حاجه في اي حاجه
ومرسي كل شويه يقولك التحقيقات هتبين
ايه كم العنف ده
ايه كم التربص ده
ربنا يحمي مصر من اللي عايزينها تقع
مصر درة الشرق وربنا حاميها
واللي نفسه مصر تقع وعمال يصرف فلوس علشان يدمرها
احب اقوله وفر فلوسك
فوق ياشعب مصر يرحمك الله

الجمعة، 12 أبريل 2013

تغيييييييير

 مش من هواة فريد الاطرش اوي
بس حسيت اني عايزة اسمع طرب
ليه انا مش من هواة فريد اوي
علشان هو حزين علي طول
حتي وهو بيغني فرح 
برضوا حزين
وانامش بحب النكد 

الجمعة، 5 أبريل 2013

مصطفي القناوي تاني :)

صباح الخير اهل بلوجر

كنت هأنشر تدوينه 
لكن علي الصبح كده كاتبنا الرائع مصطفي القناوي
لاقيته ناشر تدوينه قلت لأ بقا انا هنشرها هنا
علشان اللي ماعرفش يعرف بقا



واحكموا انتوا بقا

الثلاثاء، 2 أبريل 2013

شيرين سامي ترد :)

 شيرين الجميله ترد
وعايزة اقول لها ان كل صاحب رؤيا وفكر وموهبه انسان قوي فضله الله بهم ودي مسؤليه مايقدرش يهرب منها ابدااااا
واي ابتعاد او سكون من المبدع بيعقبه عودة وابداع اقوي بيترجم فيه اشياء اتولد في فترة الابتعاد دي
يعني بلغة العصر كان بيشحن وجاي :))
----------------- 

شموسه :)

أنا سعيده جداً بالبوست ده مش عشان عن كتابي أو عني لكن سعيده عشان هو منك و ده يعني لي كتير جداً
دي مش أول مره تنشري حاجه عني قبل كده نشرتي أكتر من خاطره كنت كتباهم لأنك دايماً بتشجعي و بتدفعي للأمام أبناءك البلوجريه :) و أي فضل لنجاح أي مدوّن بيرجع بشكل كبير للتشجيع الصادق من زملاءه.
عايزه أنتهز فرصة نشرك للتعليق عشان أشكر كل اللي سألوا عني في الفتره اللي فاتت مش قادره أوصف سعادتي بسؤال ناس ماكنتش متوقعاهم أبداً, و كالعاده البنات ملكات الكتابه عن الخذلان..خذلوا توقعاتي :) و ده مش مزعلني لأني مقدره و لأني أحياناً بخذل أصدقائي عن غير قصد, عايزه كمان أطمن كل اللي بعتولي إيميلات إني الحمد لله بخير و إغلاق المدونه مكانش بسبب إكتآب أو مشكله لكن هو إحساس باللا إنتماء لأي شئ, يمكن حسيت إني بمُر بـ extremes في مشاعري ما بين قمة السعاده و قمة التعاسه, فقررت محاولة معايشة الحياه بشكل مختلف و نسيان إني كنت بكتب, قررت أتابع مسلسلات تركي, أتعلم أكلات جديده, أتفرج على أفلام أبيض و إسود, أعمل شوبينج كتير و أغير ديكور حياتي, لكن لاقتني معملتش أي حاجه غير إني غرقت في القراءه..و كأن قدري بيتأرجح ما بين الكتابه و القرايه!
بالنسبة لرأيك الجميل في كتاباتي يا شموسه فالحقيقه إني مش إنسانه قويه و لا حاجه..لكني بكره الكتابه بضعف, و بكره الندب و الولوله باللذات, بحب المثل اللي بيقول بدلاً من أن تلعن الظلام أوقد شمعه, الحزن و الضعف مشاعر إنسانيه عميقه بتثيرني للكتابه خاصة لما بكون عايشه إحساس مقارب, لكن الهزيمه و الكتابه بإستكانه و بلا إراده بتصيبني بالغثيان, عجبني جداً تشبيهك لي بالورقه الجديده و محدش يحاول يمسك الورقه غلط أحسنله :)
هو مش سكين يا شموسه لكن هو الواقع, بيفرض نفسه على كتاباتي رغم إني إنسانه خياليه بشكل مرعب, فبيخلي من قسوته لكتاباتي حد السكين و وقع الرصاص.
أنا فتوايه!! طب ده أنا غلبااااااااان
آه و الله :)
الإهداء...إحم إحم...خطي وحش عادي..كل العظماء خطهم وحش على فكره :)
مبسوطه إن القصص عجبتك..كلهم جزء مني, يمكن ساعات بتغاظ من نفسي و بتمنى أكون كتبت أجزاء معينه بشكل أفضل..لكن في النهايه أنا مبعرفش أغيّر حاجه كتبتها, مبعرفش أقص و ألزق, هي حاله كده و زي ما بتطلع..مبقيسش كتاباتي بكتابات حد, و لا بعرف أو أحب أكون كاتبه مسرحيه بآداء مبالغ فيه و لغة قويه, و مكياج كتير و صوت عالي, ولا أحب أكون كاتبه وهميه كل كتاباتي خواطر و الحُب الحُب :)
لكن بحب ألمس الناس بكلماتي
زي الطيف اللي بيمر بالقلب
أشكرك على ثقتك الغاليه فيّه يا شموسه و رأيك الجميل اللي هفضل أعتز بيه طول العمر..غريبه إنك تتوقعي لي إني أكون كاتبه مشهوره في الوقت اللي ببعد فيه و بحاول أبرء من داء الكتابه, أنا بشكرك أوي على كل حاجه و على مكالمتك العذبه رغم مرضك في عيد الأم, أصدقاءي اللي مش عايزه أكتب أسماءهم عشان منساش حد..و عشان إنتوا عارفين نفسكوا..ربنا يخليكو في حياتي لأنكم سند و عزوه و حتى لو متقابلناش كفايه إني بلاقي منكم صدق و إهتمام مش بلاقيه في ناس كتير بشوفهم كل يوم.
أنا طولت أوي بس كان نفسي أكتب كلام أكتر :)
كنت عايزه أقول إييييييه
آه
و أرجع و أقول
لسه الطيور بتفن .. و النحلايات بتطن
و الطفل ضحكه يرن ..مع إن
مش كل البشر فرحانين
:)

--------------
يارب دايما فرحانه ياشيرين
 

الاثنين، 1 أبريل 2013

شيرين وكتاب بنكهة الابداع :)

وصلنا للنسمه العطره
شيرين سامي
عادتا لمابأقرأ الادب النسائي 
بكون خايفه من الضعف والولوله 
والندب علي قلة الحيله والعجز
و ده مش ضعف مستوي الكتابه
لا
الضعف الانساني
لكن شيرين من خلال ماقريته لها انسانه قويه جدااااا
عارفه بتقول ايه وبتعمل ايه
كلام ناعم قوي
في ظاهره
عارفين الورقه الجديده رقيقه قد ايه 
بس لو مسكتها غلط بتجرحك زي السكين
دي كتابات شيرين
مفردات جديده
ناعمه جدا
لكن قويه زي حد السكين بس هي مش سكين
الغريب بقا اني كنت فاكره الفتوه دي هيئه كده قويه
لكن لماقابلتها لاقيتها بنوته رقيقه صغيره جميلة 
مايطلعش منها الرصاص ده خالص
:))
ومن الرصاص اللي عجبني كتابها اللي اهدته لي
اللي هدردش معاكم عنه شويه 
كتابها اللي اهدتهوني
كتاب بنكهة مصر
وصورة الاهداء اهي:)

(احدي رسائل البحر)
اصعب شئ علي الام ان تسلم ابنائها للغربه
بيصبحوا صوت وهديه وذكريات
ومااصعب صوت الذكريات علي الام الوحيدة
(سي تي ايه)
حال كل المصريات اللي انضحك عليهم بأسم حرية المراة والخروج للعمل
(سبحه وسجارة)
ده حال اغلب شباب الجيل
الاهل في وادي وهمه في وادي 
مشتتين بين الصح والغلط
ادخل اكونت حد فيهم الاقيه فيه لينكات ادعيه والا رسول الله والاقي حاجات تانيه علي النقيض خااااالص
(صديق فاطمه)
راااااائعه في بساطه شديدة
روت قصة شعب مصر من مئاااااااااات السنين
(اجازة عارضه)
نفسي نطبعها منشورات
ونوزعها مع الوسيط علي البيوت
(كنت بهزر)
ضحكتني اوي وخصوصا فرح البنت اللي رفضت تتجوزه دي :))
وصحيح ان كيدهن عظيم
(استقرار)
مصر الان الاستقرار الملطخ بالدم
*****
في النهايه اقدر اقول ان عندنا موهبه نسائيه رائعه
يارب من نجاح لنجاح
وعايزة اقولكم ان شيرين
ان شاء الله هتبقا كاتبه مشهوره
وطول ماهي حاسه انها تقدر تكتب احسن 
هتفضل تكتب علشان توصل للأحسن
وهو ده الابداع
من نجاح لنجاح ياشيرين