الثلاثاء، 25 سبتمبر 2012

تاني :)+تحديث

شكرا ليكم ربنا يبارك فيكم
وبعتذر عن الغياب
وبطلب منكم الدعوات بنتي تقوم بالسلامة
==============================
ااااااااازيكم كلكم
وحشتوني ووحشني بلوجر
بس ماوحشنيش الشكل الجديد
الحمد لله
والشكر لله
بقيت تيتة
للمرة التانية
وبرضوا بنتي كانت هتروح فيها نتيجة الاهمال الفظيع
من دكتوره ماعندهاش ضمير في استقبال مستشفي من اكبر مستشفيات البلد الخاصة
والحمد لله قدرنا نجيب دم بسرعة وبلازما وعناية مركزة
والحمد لله بنتي لحقوها وان شاء الله يتم شفاها علي خير
ودعواتكم ليها انها تقوم بالسلامة
ولبنوتتها
وعقبالكم كلكم
بس من غير مشاكل
:)

الأربعاء، 19 سبتمبر 2012

حتي انت :))+تحديث


التحديث: 
لزميل دراسة ان شاء الله المدونة دي هتكسر الدنيا :))
في ايام كده من اولها بتبقا لطيفة حبتين
ولطفها زايد
علي الصبح كده 

اجي مدونتي
الاقي شكلها اتشقلب
دي عايزة مذاكرة من جديدة
وااااااالا 

بلوجر بيطفشنا
يافتاح ياعليم يارزاق ياكريم

السبت، 15 سبتمبر 2012

رحمتك يارب

كل مااجي اكتب هنا
الاقي نفسي مغمومة جدا
طيب هكتب عن ايه ولا ايه
الاحداث كلها لاتسر عدو ولا حبيب
ومصر بقت عاملة زي السيرك في مولد في قرية صغيرة
المجتمع بقا غريب جدا
اقعد مع ناس الاقيهم في عالم تاني
فلوس ولبس فاخر وعربيات واو
ورحلات لبره مصر
ولا كأنهم من هنا
وناس تانية
مش لاقين قرش ياكلوا بيه
وناس تالته بتشتغل وتكد علشان لقمة العيش
وناس كل شوية همها ان البلد تبقا فوضي وخلاص
وناس كل همها السلطة وتكوش علي كل حاجة
حتي الدين ماسلمش من المولد
والدستور اهم عمالين يطبخوه وشكله جملي حبتين
ولاحد دريان ايه اللي بيحصل
رحمتك يارب

الأربعاء، 5 سبتمبر 2012

التكيف القاتل


طبعا التكيف اختراع جبار
وبسبب كم التكيفات اللي فيكي يامصر
بيقطعوا عننا الكهرباء
يعني بيبقا
لاتكييييييييف
ولا حتي المروحة
لكن ليه هو قاتل
لألألألألأ
مش علشان الانفلونزا
علشان خرطوم التكيف
اي نعم
خرطوم التكيف اللي عمال ينقط نقطه نقطه
زي حنفية ست سنية
اللي اغلب الجيل الحالي مايعرفهاش
العواجيز اللي زي بس اللي يعرفوها
الخراطيم دي عماله تنقط علي المناور
وعلي تكيفات الجيران وعلي الحيطان
وطبعا نقطة الميه دي مع الاستمرار هتدمر الحيطان والاساسات
جربوا تحطوا جردل كبير تحت خرطوم التكيف كده لمدة يوم
وشوفوا الكم الهائل من الماء اللي بيتحوش
هتتصدموا
لازم حل
العمارات الجديدة اغلبها عملوا مواسير تلم مياه التكيفات
وعلي المجاري عدل
مع انها ماء مقطر
ممكن يتسقي منها الزرع او يتغسل بيها السلم والعربيات
المباني القديمة واغلب الحديثة ابقوا اتفرجوا عليها وانتوا ماشيين
وشوفوا التكيفات عملت فيها ايه
لو كل عمارة لمت خراطيم التكيفات وعملت شبكة
هيرحموا المباني من التلف
وهي اصلا مش سالمة كفاية اللي عملاه الحمامات في العمارات
وهيكون عندنا ميه نسقي بيها الزرع ونمسح السلم والعربيات
العمارة اللي انا فيها من كل الاتجاهات ادمرت
ولا حد سمع ولا كأن الموضوع يخصهم
ربنا يستر
نفسي نتعلم نعمل الصح

الاثنين، 3 سبتمبر 2012

هي دي مصر

بما اني من محبي السمسمية
لا لا لالا لالا
هيلا هيلا يامركب
قوم شد القلوع
وتوكلنا علي الله ياله
ماحدش فينا هيموت مالجوع
في معدية واحد ماشي مانعرفوش
ومد ايديه سحب شبكة
وخد سمكة وسلم وراح
ايه الجمال ده
من زمان ماسمعتش الحلاوة دي
فعلا في مصر ماحدش بيموت من الجوع
-----
كمان عجبي مقطع
لما عم الحاج يعدي
كله يوقف لعب يهدي
ايييييييييوة
زمان كان كده
لما الكبير يعدي اللي حاطت رجل علي رجل ينزلها
واللي مولع سجارة يطفيها
ويسلموا
كان في حب واحترام
وكان في حضرتك للكبار
الاغنية دي
هي مصر فعلا
وماحدش هيعرف يغيرها
حتي لو كان الجن الجنزاري او عين زرقة
يبص لنفسه في المرايا
ويقول بلاش غرور
مش هقدر اغير الناس دي
ولا العب بيهم
كان السبعمية اللي استعمرونا عرفوا
ده احنا بلعناهم بالهنا والشفا
وانا بقوله اجري ياشاطر العب بعيد
======

========
ملحوظة
عارفة اني مقصرة
ولضيق الوقت بزور اللي بيعلقوا عندي
من منطلق اذا حييتم بتحية
عادتا مابيفرقش معايا
وبزور اللي بيعلق عندي او اللي مابيعلقش
بس لضيق الوقت
بروح للي بيعلق عندي ويعبرني
معلش شوية مشغوليات وهيعدوا

اسماء المطربين

ياسر نور وايمان رضوان (التتر)
حسن الصغير (النوبة)
الالتراس
فرقة الطنبورة :عزام وجمعة(السمسمية)
جيهان المغاوري (الفلاحي)
فرقة الاسفلت (جاد الكريم-ابراهيم فاروق)
هادي (الصعيدي)
اوكا واورتيجا (الشعبي)
جمعة غنايم(البدو)