الأربعاء، 31 ديسمبر، 2008

كل سنه وانتم طيبن

كل سنه وانتم طيبين ميلادي وهجري
وماحدش يشتم السنه السنه دي زي اللي قبلها واللي قبلها واللي قبلها
الناس والاطماع والحروب والشر هو اللي عامل ده كله نلوم السنه ونشتمها ليه
ربنا ادانا كل حاجه حلوه حتي النظام اللي نمشي عليه واحنا اللي خالفناه صحيح مش كلنا بس من بيدهم الامر
المهم كل سنه وانتم طيبين
بالنسبه لي انا السنه دي كانت حلوه علي المستوي الشخصي بالرغم ان اولها بداء بفقد انسانه عزيزه عليا جدا جدا
بس بعد كده بنتي الكبيره اتجوزت والوسطانيه اتخطبت والصغيره اتخطبت صحيح الخطوبه اتفسخت بس ده في حد ذاته خير احسن ماكانت اطلقت
وكمان حصلي انا شخصيا اهم حدثين في حياتي
طلعت عمره اول السنه وكمان طلعت الحج في نفس السنه اللي هحكي لكم عليه بس نفوق شويه من موضوع غزه
وكمان عملت المدونه واتعرفت علي احلا شخصيات في الدنيا
ياريت نفكر في الحلو عشان نقدر علي اللي مش حلو
رنا يجعل السنه الجديده حلوه عليكم جميعا

الأربعاء، 24 ديسمبر، 2008

صباح الخير

وحشتوني طبعا جدا جدا
حبيت اسلم عليكم كده في الاوام اوام وبعدين نبقا نحكي علي كل حاجه لآن الرحله كانت جميله وشاقه وكمان كان في جوانب كوميديه كتير مع المرض كمان فافي حكاوي كتير
وطبعا دعيت لكم كلكم كنت كاتبه كل الاسماء بالدعوات المطلوبه في ورقه موصوله زي فرمنات زمان كده وكانت طبعا مسار الضحكات في عرفه لآن المدونين كان ليهم لوحدهم نص متر منها وصدقوني مانسيتش حد
عايزه اشكر بنوتي ضد التيار طبعا علي اللي عملته وكنا علي اتصال ببعض وبشكر كل اللي دخل عندها وسأل عليا وبقوله انا مانستش حد هناك ودعيتلكم كلكم وضد التيار كانت بتبلغني عن كل اللي سأل عليا او عايز دعوه خاصه
ويارب تكون الفته والرقاق كفاكم في العيد وبشكر المدونه اللي اخدت الصينيه عندها قبل ماتتحرق ولما ضد التيار قالت لي دعيتلها دعوه خاصه
وعقبالكم كلكم انكم تحجوا

الأحد، 23 نوفمبر، 2008

ان شاء الله

ان شاء الله هسافر الفجر
ادعولي
بشكر كل من هناني
وان شاء الله هدعيلكم كلكم و لأهل العراق وغزه ولكل مسلم عنده مشكله او ظلم
بشكر المدونين الجدد اللي دخلوا عندي لأول مره وان شاء الله لما ارجع هزورهم في مدونتهم
وان شاء الله ضد التيار هتطمنكم عليا في مدونتها وهكون علي اتصال بيها
اللي يحب يعرف اخباري هيكون من مدونة ضد التيارhttp://upstream2.blogspot.com/
اشوف وشكم بخير
وعقبالكم كلكم
ومطبخ شموسه (المدونه الجديده) امانه في رقابتكم اوعوا تنسوا صينية الرقاق اللي في الفرن
طلعوها في العيد
كل سنه وانتم طيبين

الخميس، 20 نوفمبر، 2008

هديه

احوال الهوي الله يبارك فيه اهداني هديه جميله
ياريت كلكم تشوفوها
جميله جدا
والهديه عنده في مدونته
وانا بشكره عليها

الأربعاء، 19 نوفمبر، 2008

اللهم لك الحمد والشكر

الحمدلله
اخيراااااااااااااااااااااااااااااااااااااا
ان شاء الله هسافر الحج
ربنا كرمني ياجماعه وهسافر الحج
حد عايز حاجه من هناك يقول بسرعه عشان مسافره الاسبوع الجاي
ان شاء الله هدعيلكم كلكم
انا فرحانه قوي

الاثنين، 17 نوفمبر، 2008

من صفر الموووووووووووونديال لبكين

امس كان اليوم الرياضي بتاع تنظيف البيت
عندي شغاله مثقفه شويه
سألتني الا ياباش مهندسه ايه موضوع اوباما ده
قلتلها قلت لك 100 مره ماتقوليش ياباشمهندسه انا نسيت الموضوع ده من زمان
المهم مش ده موضوعنا
انها تسألني عن اوبامااااااااااوووووو اوو
افتكرت الحوار اللي كان حصل بيني وبينها ايام الصين وماكنتش نشرته
قلت خلاص افرجي عنه بقه عشان اقدر اكتب لكم موضوعها مع اوباما
**ام محمد الشغاله اللي عندي عزيزه عليه واحب ان اتحاور معها لآني بصراحه بسمع كلام البسطاء الجميل وهي زوجه لبواب مما يجعلها نبض الشارع كله

قلتلها:تعرفي ايه عن بكين ياام محمد

قالت:اهه ده البط يامدام ايوه البط البكيني وكمان مره غسلت عند واحده من الناس اللي باروحلهم حاجات كده قال ايه طلعت

مايوه يكيني زي البط يعني

قلتلها:بكين دي بلد في الصين بلد الصينيين انا قلت كده ودي راحت نازل دعا علي الصين واللي بيجي منها واللي فيها واللي جابوها

سألتها في ايه انت اتجننتي دي عامله كده زي امريكا

قالت بس امريكا ماكانوش هيخربوا بيتي لكن الصين كانوا هيخربوا بيتي

قلت: ازاي ده انت مستهدفه من الصيين بقه

فالت:دول بيجوا العماره وقصيرين قوي كده وشايلين علي قلبهم شنط اتقل منهم عاملين زي النمله اللي شايله حملها

والعجيب انهم ينزلوا باييعين اد كده يخوشوا كل بيت وفي مره الساكنه الجديده عملت عمايلها قال ايه ماندخلهمش العماره

وقالت كلام مافهمنهوش تخريب ابصر ايه بيخربوا اقتصاد البلد
ايه اقتصاد دي ماتكلمنا بالعربي
اللي يخصني العركه كبرت وجوزها حلف مااحنا قاعدين في العماره لولا الحج اللي في الخامس الله يستره كنا اتطردنا يبقوا كانوا هيخربوا بيتي والا لآ

قلتلها:ايوه همه مش هيخربوا بيتك انت وبس دول هيخربوا البلد والعالم

قالت: ايه همه بيروحوا عند بوابين العالم برضه

قلتلها: ماتشغليش بالك

ايه رئيكم

الصين جايه زي هراس جاي بتاعت زمان

الصين اخدت 51ميداليه ذهبيه امريكا 36

الصين دخلت كل بيت

كل شئ بقه مستورد من الصين

عملوا افتتاح الدوره مبهر بكل المقاييس تكنولوجيا علي اعلا مستوي

واستعرضوا عددهم في الآعداد الكبيره اللي كانت في العرض

واستعرضوا حضارتهم القديمه

يعني احنا قوه اقتصاديه علم تكنولوجيا فن وحضاره يعني جدر جامد مش بلد لسه طالع في المقدر ماباقلوش 250سنه

والكلام هنا موجه للآمريكا

يعني هنكون اسياد العالم رسمي

والخطه ماشيه جمييييييييييييله جدا

خليينا احنا نتفرج لاتخطيط والا علم والا تكنولوجيا والشباب امل المستقبل عطلان

الصين حوالي مليار ونص وبيعملوا ايه

احنا صرفنا ادايه علي البعثه الموقره

انا مستنيه التحقيق عشان اعرف اتكلم

دي فضيحه

لوالاموال اللي بتتصرف علي الدوري الفاشل اتصرفت علي الاطفال الموهوبين وعملنا لهم اعداد جيد

يمكن نقدر نوصل في يوم

التخطيط هو الحل مع الضمير مع حب البلد دي

الخميس، 13 نوفمبر، 2008

اوبامااااا اوبماااااا اوو اووووو

هو في ايه؟
هي موضه اسمها اوباما كل ماافتح جرنال اوبامااو مجله اوبامااو تليفزيون اوباما
تلاجه اوباما حنفيه اوباما
مدونه اهو اوباما
خلاص عرفناانه الفارس المغوار ابو سيف(خشب)وحصان(حلاوة المولد)
هو الاعلام افلس وماصدقوا عاملين زي خالتي بمبه ده ابوه ده امه ده جدته ده اخوه ده اخته
ماخلاص والا ده غسيل مخ
عرفنا ان امريكا حلوه وجميله وجابت ولد صغنن وكوكتيل امريكااااااني
مالامريكان كلهم كوكتيل ايه المشكله مافيش امريكان غير الهنود الحمر وكمان مااسمهمش كده اصلا
واللي زاد وغطا علي الكل وده اللي استفزني اصلا
شعبوله (شعبان عبد الرحيم) هيغنيله اغنيه اشمعنا هو يعني الراجل يغني لأسرائيل و اوباما لا ده حتي اسم ابوه حسين
ياله ماهو مولد
بصراحه لي رأي في موضوع اوباما ده انا مالييش في السياسه بس انا مواطنه بسمع وبحس
مش عارفه ليه فرحانين قوي كده بالشب
***الشعب الامريكي فرحان عشان عمل اللي هو عايزه
ده لو كان هو ده اللي هوعايزه ومااتوجهش ليه
امريكا حبت تغير صورتها وتقول اني مش عنصريه والابكره المسلمين
وطبعا ده بعد البهدله اللي شافتها وورتهلنا في العراق
اهو الريس اسود من اصل افريقي وابوه مسلم وامه بيضه
يعني كوكتيل عنصريه في بعض
ونبي مفصلينه تفصيل
ايه الحلاوه دي
همه جابوه منين ده
ده علي المقاس
اوعوا تقولوا بقه ان امريكا فيها عنصريه والا بتكره المسلمين والا السود مش واخدين حقهم
واهو المؤسسات حاكمه البلد واربع سنين تفوت والا حد يموت
وعلي مااعتقد هي مش عارفه تنسحب من العراق بكرامه ازاي تجيب حد عايز ينسحب من هناك ويكون عيل
ماهو مش معقول امريكا مافيهاش غير ماكين ده عشان يترشح امام اوباما
ماكين ده مابيجمعش اصلا
كان لازم يجيبوا حد اهبل امامه
احنا مالنا بقه باللي بيعملوه يجيبوا زيد يجيبواعبيد والا نطاط الحيط السياسه واحده
دي دولة مؤسسات ياجماعه
همه حبوا يصلحوا صورتهم شويه عشان الضربه اللي جايه
ده شغل يهود
و شفت خبر يفطس من الضحك الرئيس الكيني اده الشعب اجازه عشان يحتفل
والا ايه اخوه الغيرشقيق عمال يرقص الايعني هياخد حاجه
هم يضحك وهم يبكي
خلينا احنا فالافلامانات اللي عندنا علي رأي بنتي
---------
وعل رأي عزيزتي ابي
بكره نقعد جنب الحيطه ونسمع الظيطه(مع الاعتزار للحيطه طبعا يعني كلنا كده هنقعد جنبها ازاي)

الثلاثاء، 11 نوفمبر، 2008

ليله بيضه

امبارح كانت ليله غريبه جدا
اولا
***
الميل بتاعي حصله حاله من الجنان المؤقت حاولت ابعت ميل لضد التيار وعمرو ابدا اجيبه يمين اجيبه شمال بتاتا البته
راح عمرو الله يكرمه قال خلاص نعمل غيره وغيري الباص وورد بعد كده عمله وانه يفتح ابدا من هنا من هنا مافيش
الرجل مشكورا عمل غيره نفس القصه
بس بعد محاولات الحمد لله فتح قوم ايه الميل القديم يغير من الموضوع ويفتح اظاهر لقي نفسه هيتركن علي الرف قال اعقل ياواد
واتبعتت الميلات بعد ماكنت فصلت شحن وعمرو اتجنن وبنتي احولت
ثانيا
***
صديقه ليه قالت لي افتحي العاشره عليها موضوع حزب الغد اللي كان مزعلك(معلش اصل انا ماليش في التليفزيون والا القبيله كلها)
فتحت اتغميت علي الاخر
للدرجه دي مابقيناش عارفين نتحاور ونتناقش مع بعض
معقول دي الناس دي المفروض متعلمين ومتنورين ووصلوا من العلم والثقافه زروتها معقول النقاش الهادف يحل محله السباب والعراك والبلطجه والعنف خلاص فقدنا لغة الحوار وحل محلها لغة العصابات
وعايزين تغيير ازاي
خلصة الفقره وانا حزينه علي مصر وعلي مستقبل الجيل الجديد
ثلثا
***
قفلت التليفزيون ووصلت للمحطه الاخيره قبل النوم اتوضيت وصليت الشفع والوتر وامسكت المصحف لاقيتني واقفه عند سورة العنكبوت مش عارفه ليه حسيت اني بقراها للأول مره قعدت اقراالست آيات الاولي اكتر من مره ولاقيتني برجع لسورة الحج وقعدت برضه اقراالخمس آيات الاولي بنفس الطريقه
يانهار ابيض ايه اللي احنا فيه ده حد استعد لأخر الرحله دي والموقف ده اخذ الزاد والزواد معاه احنا فعلا في غفله من ومع كل حاجه وخصوصا مع مغريات العصر
طيب ربنا بيقول لناانت هتقولوا امنا بس انا همتحن ايمانكم ده ويابخته اللي ينجح في الامتحان
ياتري كام واحد فينا دخل الامتحان ونجح علي الاقل بتقدير الشعب مقبول
احبائي انتبهوا
رابعا
****
عندي عاده مش عارفه ابطلها اني اقرا الجرايد قبل ماانام مع ان حاجات كتير المفروض تتعرف الصبح مش مهم
ولسه بفتح الاهرام وببص علي صباعي اليمين اللي ماسك الجرنال والاقي خبر مش عارفه مش لاقيه له وصف بس بعد ماقريته قلت حتي انت يابروتس
عشان ماطولش الملخص ان السودانيين مسميين الجنيه المصري دبور عشان مابيساويش حاجه وعشان هو بنص جنيه سوداني والا تعليق
اتنكدت طبعا رحت سايبه الجرايد وقلت مش هقرا اول القصيده كده امال جوه في ايه
رابعا
***
بلاها جرايد اللي هتعكنن عليه هي رخره
كانت بنتي جابت كتاب من المواضيع اللي بحبها وماكنتش لسه قريته
قلت بس نعمل حاجه حلوه في الليله الغريبه دي الكتاب لباحث اسمه سليمان مظهر وهو عن قصة الديانات
لسه بفتح الكتاب ويدوب قريت صفحتين والنور قطع
قلت اه هو ده اللي كان ناقص هي ليله بيضه من اولها
طب نكتفي بهذا القدر وتصبحي علي خير او زي ماتحبي ياليه بيضه انت عشان الحق انام ساعتين قبل الفجر

الأحد، 9 نوفمبر، 2008

عاجل من وادي الملوك من عمر

عاجل .. عاجل .. عاجل

أزيكم الأول ؟ .. طيب الحمد لله ..

أنا لسه راجع من الهيئة العامة لمش عارف أيه و أيه و التنمية الزراعية و مقرها خلف المتحف الزراعى بالدقى ..

رجاء حار من الأعزاء اللى بيدخلوا المدونه و اللى يعرفوا أى حد شارى أرض فى منطقة وادى الملوك بالكيلو 52 طريق القاهره الاٍسكندريه الصحراوى من مدحت بركات يبلغوه بالآتى علما بأن اللى حأقوله بينطبق بصفه عامه على كل واضعى اليد و لكن أرض وادى الملوك بصفه خاصه لأن الهوجه قايمه عليها اليومين دول :

1- عمل محضر اٍثبات حاله بقسم الشبخ زايد و معاك أصل العقد و صورتين منه و كمان المخالصه لو وجدت .. و أصل بطاقة الرقم القومى أو جواز السفر .. عند سيادة النقيب أحمد حافظ و يفضل بعد العاشره مساءا علشان الزحام و ما تنساش و أنت ماشى تاخد رقم المحضر ..

2- عمل خريطه مساحيه هندسيه بالقمر الصناعى و المهندس اللى بيعملها اٍسمه محمود و ده رقم موبايله 0106948616 و بتتكلف 300 جنيه و بتاخدها تانى يوم أو تالت يوم بس ده يستلزم أن أرضك أصلا تكون عارف رقمها كويس و تكون محددة الأركان الأربعه و لو بحدايد ..

3- سرعة زراعة قطعة أرضك على وجه السرعه لأن اللجنه بتاعت التفتيش خلاص نازله الموقع و لو ماكنتش عملت شبكه أو زرعت فأعلم أخى المواطن و أختى المواطنه أن شبكة الرى للفدان بتتكلف حوالى 1200 جنيه شامله كل حاااااااااااجه و الزراعة للفدان بتاخد 200 شتله على أبعاد 5 فى خمسه و طن و ربع جله لا مؤاخذه سعر الطن بنقله 350 جنيه و أنت و شطارتك مع العمال بس بتتراوح زراعة الفدان بما فيها حفر الجور و غرس الشتله و ريها حوالى من 100 ل 150 جنيه .. مع مراعاة أخى المزارع تخمير الأرض جيدا بالجله و المياه لمدة يومين قبل غرس الشتلات .. و لازم تكون الشتلات طولها تتناسب مع تاريخ شرائك للأرض علشان ما يبانش اٍنها حركه أمريكانى كده و كده .. و الحوار ده كله مش بياخد أكتر من 4 أيام أو خمسه بالكتير ..

4- بعد كده أيها المواطنون .. تنووا خير و تتكلوا على الله ساعة الصبحيه على الهيئة العامه للى مش عارف أيه و أيه و التنمية الزراعيه اللى خلف المتحف الزراعى فى الدقى و تدخلوا من الباب الرئيسى و تحودوا يمين حتلاقوا مبنى دور واحد مبنى بالألوميتال و يكون معاكم أصل الخريطه المساحيه لأنهم بياخدوا الأصل + سى دى اللى مع الخريطه + أصل العقد + صوره من أصل العقد + بطاقة الرقم القومى أو الباسبور + صوره منهم .. و خدوا بالكم أن لو فيه أكتر من اٍسم فى العقد فلابد من حضور جميع الأطراف بتحقيق شخصياتهم .. و هناك فيه الأستاذ / منير موظف شاب زى البلسم يعرف ربنا و صدره متسع لكل الاٍستفسارات حيديكم نموذج مطبوع من عدة ورقات تملوه وش و ضهر و ما تنسوش أهم حته فى ورقه منهم اٍثبات سند الملكيه تروح كاتب قدامها الزرع + عقد الشراء و ما تنساش تاخد معاك قلم جاف علشان أنا أتبهدلت على ما حد رضى يشحتنى قلم .. الأستاذ منير بيراجع الأوراق و بيستلمها منك و بيديك رقم و خلاص على كده ..

5- نصيحه أخويه لما اللجنه تنزل أرضك اٍنشاءالله أوعوا حد يفكر يصبح أو يمسى عليهم بطريقة المصريين الفهلويه لأنهم ناس دوغرى مالهمش فى الكلام ده و منهم واحد عنده 3 زبايب فى قورته من أثر السجود يعنى أوعى وشك ..

6- طيب اللى حيسألنى يا باشا لو واحد مسافر بره يعمل أيه ؟ حأقوله : و يسافر بره ليه أصلا ؟؟ ما علينا .. ببساطه يعمل توكيل لحد من قرايبه فى مصر و يبعتهولوه بعد ما يوثقه من السفاره المصريه و يبعت له الأوراق اللازمه لأستكمال الاٍجراءات ..

7- سمعت كده طراطيش كلام أن الفدان حيندفع عليه من 5 ل 7 آلاف جنيه للهيئه على حسب تميز القطعه و بعدها أو قربها من الطريق بيتقسطوا على 5 سنين ..

8- أنا شايف أن ده حل مش بطال للخلاص من الورطه اللى أتحطينا فيها .. و ربنا هو صاحب العوض ..

أرجو بقى من اللى يقرا الكلام و يعرف حد شارى فى وادى الملوك أو من أى شركه على الطريق الصحراوى أنه يبلغه و لو حد عاوز يستفسر عن حاجه خاصة بالموضوع أو بالزراعه أو لأى سبب يراسلنى على : amrbadr70@yahoo.com

الجمعة، 7 نوفمبر، 2008

افكار

بعد مافقدت العزيزه الغاليه واحتسبتها
قعدت افكر ياتري هي راحت فين وليه الحاجات بتختفي مانعرفش راحت فين
وافتكرت بقه ونش مترو الانفاق العملاق اللي اختفي في غمضة عين
وحاجات كتير ماعرفناش اصلها وفصلها
زي مين وليه اتعمل كده في سعاد حسني والصحفي اللي اختفي في ظروف غامضه
وغيرهم من الحوادث الغامضه
المهم اهي تخاريف تشركوني فيها
---------------------------------
(*المهم*)
ان شاء الله سيتم افتتاح مطبخ شموسه بالمدونه قريبا
الفكره جت لما بنتي اتجوزت اليومين اللي بتقعدهم في بيتها بتطبخ وانا معاها علي التليفون
وكمان الحمدلله انا مشهوره بالطبيخ الجيد والاختراعات الطبيخيه
هنطبخ في المدونه الاكل المصري بتعنا واهو نحافظ عليه من الاندثار
وعايزه اشكر ضد التيار اللي ساعدتني اني اعملها
--------------------------------------
ملحوظه:
ناس كتير بعتت لي علي الميل تسأل عن سني وليه ماكتبتوش في البروفيل
ارد بقه ؟وليه نسأل علي الميل انا هجاوب علي البوست 49سنه واربع شهور
اناماعرفتش اكتبه اصلا وانا بعمل المدونه
بس اللي متابع المدونه هيلاقيني ذكرته في اكتر من تعليق

الأربعاء، 5 نوفمبر، 2008

عميتها

جيت اكحلها عميتها
حبيت اعمل للمدونه نيو لوك اشمعنه هي يعني
وبعدين عيب علي لما ابقه فنون جميله وشكل المدونه مافهوش حركات
رحت مبوظه الدنيا
الحمد لله الاصابات ماكانتش كتير
والمريضه فاقت من الغيبوبه
بس للأسف فقدت القايمه
وهقعد اكتبها تاني ياصبر ايوب
ده غير التريقه اللي اخدتها من القبيله ولسه انتوا كمان
معلش سمحوني مش هعرف مين كتب ومين ماكتبش لحد مااعمل القايمه تاني
مش عايزه حد يتريق
مواساه في الفقيده ماشي اه

الثلاثاء، 4 نوفمبر، 2008

عيد الحب والسعاده

كل سنه وكل الاصحاب في حب وود واخلاص
كل سنه وكل عيله بتحب بعض بخير
وكل سنه والاحباب بخير واخلاص لبعضهم
انسب يوم النهارده اتكلم فيه عن السعاده والتاج اللي عمله محمد غاليه بس انا مش هجوبه علي شكل سؤال وجواب
هجاوب كله علي بعضه يامحمد
السعاده هي شئ نسبي
اللي ممكن يسعدني النهارده ممكن مايسعدنيش بعد شويه
ممكن ابقي سعيده دلوقتي بعد شويه لا
ماحدش بيكون سعيد علي طول او تعيس علي طول
واعتقد ان السعاده تكمن في الرضا لو رضينا بماقسمه الله لنا هنوصل للسعاده
السعاده مش وهم الاعند الانسان اللي دايما مش راضي طماع عايز اكتر عامل زي اللي بيشرب من البحر المايه مالحه مابترويش
واكيد طبعا الانسان الراضي السعيد بحاله بيكون الي حد ماناجح عشان رضاه باللي في ايده مابيخليهوش يبص لغيره فبيركز مع عمله وحياته ويحقق اللي يقدر عليه لأن ماحدش بياخد كل حاجه اوبيحقق كل حاجه
تاخد قراط فلوس علي قيراطين صحه
شوية فكه نجاح في الشغل
علي اربع قراريط حب
يعني
من ده وده تشكيله يعني المهم تبقي راضي
والحياه هتمشي ممكن يحصل لك حاجه وحشه في الشغل تعكنن عليك ترجع تلاقي حد من الاولاد ناجح وطالع الاول تفرح وتنسي زعل الشغل كده يعني
كمان مابحبش موضوع التفائول والتشائم ده احنا منهين عنه اصلا في الاسلام الواحد يعمل اللي عليه ويترك حموله علي الله
الانسان لازم يكون عنده امل في الله
والايقنط من رحمته مايقنطش من رحمة الله الاكافر
واذا اصبت بحزن او مصيبه توضأ وصلي ركعتين واقرا القران
الابذكر الله تطمأن القلوب
حاول تكون راضي بقسمتك راضي لضميرك محب للخير مساعد للأخرين خير بأهلك واصل لرحمك
وقبلهم راضي لوالديك ونول دعاهم لك
هتكون سعيد ان شاء الله حتي لو الدنيا سودا حوليك
--------------------------------------------------------
فاضل سؤال يامحمد(ماهي اكتر اللحظات التي شعرت فيها بالسعاده؟)
--------------------------------------------------------
**اكتر لحظه حست فيها بالسعاده وعمري ماحسيتها كده لاقبل والابعد
يوم ماشفت بنتي وهمه جايبنهالي بعد الولاده كنت سعيده جدا ان ربنا اداني المخلوق ده وطلع مني واول مره اعرف يعني ايه تضحك وتبكي في وقت واحد لحظه من السعاده الفريده عمري ماهنساها

الاثنين، 3 نوفمبر، 2008

وفاة الدكتور محمد المسير بعد صراع مع المرض
نعي اليكم الدكتور الشيخ المسير
كان نعم الشيخ الاب والاخ والناصح الامين بما يرضي الله
كان في نظري اخلص الرجال للدعوه بخلقه الكريم وتمسكه بكتاب الله ولم يكن يفتي حسب الاهواء الدنياويه
حزني عليك كبير يامن واسيتني في ابي
من يواسيني فيك اليوم سأظل اعاتب نفسي اني لم اعرف الا اليوم

الجمعة، 31 أكتوبر، 2008

يعني ايه كلمة وطن ؟

لازم تتغرب عشان تعرف معني الكلمه بس تكون اتغربت وانت كبير مدرك الوطن اللي كبرنا فيه .

عليه اول خطوه مشيتها واول مدرسه دخلتها واول بنت جيران حبيتها واول اي شئ اتعرفت عليه واول زغروته من زوجة البواب مع اول شهاده اخدتها.

الوطن هو الذكريات والناس اللي زي بعض في كل حاجه حتي الهموم بدليل كل اللي بيهاجروا في النهايه بيرجعوا لما يكبروا ويكونوا في سن اجترار الذكريات

لكن اولادهم اللي اتولدوا هناك مابيرجعوش عشان هناك هو ده وطنهم حيث اول اي شئ حيث الذكريات

صدقني يااخ طارق مع الوقت وبعد زوال الانبهار بهذا العالم بيحصلهم شئ من الغيره مننا لآنهم بقه معاهم فلوس وبيت كبير وعربيه اخر موديل

بس ناقص لهم حاجات كتير ابسطهااللمه مع الاهل والجيران

وبيتظهروا بالسعاده وده مش صحيح عشان الناس تقول يابختهم ويحسوا انهم كانوا صح

وده وهم كبير بدليل لما بيحتاجوا الدفا واللمه بيرجعوا وبيعيشوا تاني معانا مع ان هي هي العيشه وهمه همه الناس وهي هي المشاكل بس همه هربوا واحنا لا

بيرجعوا وهمه عارفين يعني ايه كلمة وطن

15 أغسطس, 2008 10:40 ص

ده كان ردي عند الاخ طارق وهو ده رأي وبرد بيه علي كل اللي شرفني بالتع

وده احساسي بمعنه كلمة وطن

الثلاثاء، 28 أكتوبر، 2008

يعني ايه كلمة وطن ؟

البوست ده اخدته من عند نواره حبيت انكم تشركوني حرقة الدم
موضوع غريب جدا جدا .. موضوع أرض وادى الملوك !!
اٍحنا أكثر من ألف فرد أتلحسنا فى عقلنا ذات يوم و قررنا أن نقتحم الصحراء و نستصلحها و نخضرها .. و وقع اٍختيارنا على شركة وادى الملوك لسمعتها الطيبة و خبرتها فى تقسيم و بيع الأراضى ..
و عاينا قطع الأراضى المعروضه للبيع فى الكيلو 52 طريق مصر الاٍسكندريه الصحراوى ..
و زيادة فى الاٍطمئنان رحنا وزارة الزراعه و الهيئة العامة لأستصلاح الأراضى و كافة الجهات المسئولة و كلهم أكدوا لنا أن موقف الشركة سليم و أن فعلا مدحت بركات رئيس مجلس الاٍدارة شارى بعقود سليمة من الدولة و مسدد كامل الثمن و حصلنا على صور لعقد البيع المبرم بينه و بين الهيئة و فيه واضح و بشكل صريح أن الراجل مسدد كامل الثمن ..
و مش كده و بس لأ ده كمان الدوله موصله الكهرباء الحكومية للمنطقة و كله تمام التمام ..
فأطمئنينا و أشترينا و سددنا برضو كامل الثمن للشركة و أستلمنا عقودنا و فينا من باع عفش بيته و من دخل جمعيات طويلة الأجل و طبعا من وضع تحويشة شقا العمر فى الأرض لشرائها و أستصلاحها و زراعتها .
.و بقدرة الله الجليل و اٍصرار الناس على النجاح تحولت المنطقة من صحراء جرداء يخاف العفريت الأزرق يمشى فيها لجنة مورقة أشجارها خضراء أرضها تسر الناظرين و ده طبعا على مدى سنوات طويله من العمل و الصبر و الاٍنفاق تحت أعين أجهزة الدوله اللى كانت بتبعت مندوبيها كل فتره و التانيه لتطمئن على أن الأرض تستغل فى الزراعة و ليس فى البناء حتى أرتفع سعر الفدان هناك ليصل اٍلى ضعفين و نص سعر شرائه من الشركة و عشرات أضعاف سعر شراء الشركة له من الدولة !!
فجأه بين يوم و ليله نزعت أجهزة الدولة هذه الأراضى من مالكيها و طربقت البيوت و الزرايب على اللى فيها .. و ألقت القبض على مدحت بركات و قدمته لمحاكمة عاجلة بحجة أنه أخل بشروط العقد مع الدولة ..
و مطلوب الآن من الملاك اٍعادة شراء هذه الأرض بسعر اليوم !!!!!!!!
و لما جرينا على هيئة اٍستصلاح الأراضى قال لنا نفس المسئولين اللى رحنا لهم قبل ما نشترى الأرض أنه فعلا كل عقود الشركة سليمة و لكن تم فسخ التعاقد بينهم و بين مدحت بركات !! طيب يا أسيادنا و أحنا مالنا ؟؟ ما تاخدوا حقكم من مدحت بعيد عننا !!و هكذا بقى ..
دوخينى يا لمونه ما بين الهيئة و ما بين الشركة و ما بين برنامج العاشره مساءا و ما بين قسم الشيخ زايد و ما بين الأرض اللى تحولت لثكنة عسكرسة تجوبها السيارات المصفحة المحملة بمئات الجند المدججين بالسلاح !!
المصيبه كمان يا مسلمين و يا أقباط و يا يهود و يا كفره أن الزرع اللى فى الأراضى و اللى الناس صارفين عليه دم قلبهم بقاله أسبوع ما أترواش بعد منع القائمين على ريه و رعايته من الدخول للمنطقة !!
طيب حنلاقى فين أبويا محمد أبو سويلم و لا عبد الهادى ؟؟ و لو لاقيناهم حنطلعهم من فيلم الأرض اٍزاى يا ولداه ؟؟ خلاصة الموضوع : أرضنا أتخدت مننا قدام عينينا لسبب اٍحنا مش فاهمينه ..
و زرعنا بيموت قدام عينينا لسبب اٍحنا برضو مش فاهمينه !!
النتيجة : خراب بيوت الآلاف من المستصلحين اللى وضعوا كل ما يملكوا من حطام الدنيا فى هاتيك الأرض و تشريد مئات العاملين بها .. و موت الزراعات فى آلاف الأفدنة المستصلحه ..المطلوب :
ننتحر كلنا ..-----يعني الناس تعمل ايه؟
يزرعوا عند الوادي يطردوهم من الارض زي فلاحين سراندو
ويقولوا لهم دي اراضي الاقطاعيين اللي اتأممت من خمسين سنةيغوروا من وشهم ويروحوا الصحرا يقولوا لهم لا اصل الدولة اتخانقت مع الشركةهم عايزين مننا ايه؟
فيه تحديث في مدونة عمرو ان اصحاب الاراضي قرروا التمسك بارضهم لاخر لحظةواحنا معاهم
مش عارفه اعمل لهم حاجه علي الاقل انشر مشكلتهم

الجمعة، 24 أكتوبر، 2008

تحديث

ان شاء الله هعلق علي التعليقات كلها بس بعد ما تعلقوا كلكم
السؤال يعني ايه كلمة وطن
مش بس مصر
ده سؤال في العموم

الخميس، 23 أكتوبر، 2008

الوطن

كنت في جلسه شبابيه اي اللي فيها شباب كلهم بنات وولاد وانا العجوزه اللي فيهم بس مين انا( اشبب) منهم
وكان واحد منهم بنقنعه انه مايسافرش لأنه ماعندوش سبب يخليه يتغرب عنده شقه وعربيه وفلوس تكفيه يتزوج من خطيبته مرتاح وكمان وظيفته حلوه ومرتبه عالي
طيب انت عايز تسافر ليه ايه الزائد اللي هيعمله لك السفر
وغلطت وقلت بلدك اولي بيك
وزي ماكون شتمتهم كلهم فضلوا يتكلموا وانا في وسطهم كالبلهاء
وسمعت كلام لايسر عدو والاحبيب
وخصوصا ان كلهم ميسوري الحال
وبسرعه تذكرت الاخ طارق عابر سبيل ومدونته يعني ايه كلمة وطن؟وقد كنت جاوبته علي هذا السؤال بمدونته
وعلي طول رحت خبطاهم السؤال بصولي طبعا وككككككككككككككاني جايه من كوكب تاني
دلوقتي انا بكرر سؤال عابر سبيل
يعني ايه كلمة وطن؟

الثلاثاء، 21 أكتوبر، 2008

الي كل مدون شريف

الوثيقة التأسيسية للمدونين
عناصر الوثيقة التأسيسية للمدونين
1- عدم المساس لأي دين أو مذهب بالتجريح وعدم نشر العداوة بين المذاهب المختله
2- عدم نشر روح
الأنهزاميه بين المدونين ومحاولة السمو بالأفكار والإستفادة منها للصالح العام
3- البعد عن المصلحه والأطماع الشخصية وجعل التدوين نزيه وله هدف سامي
4- المحافظة علي شرف التدوين ومحاولة الأرتقاء به لأعلي الدرجات
5- البعد عن تعليقات المجاملة والعمل علي النقض البناء الذي يهدف إلي تصحيح المفاهيم والتقريب بين الأفكار
6- نشر روح المحبه والأخوه بين الناس
7- البعد عن الأفكار الهدامه والتمسك بالقيم والمبادئ الإسلاميه الحنيفه
8- عدم التخلي عن التدوين قدر المستطاع ومحاولة التواصل حتي ولو علي فترات متباعده
9- مساعدات أخوننا المدونين علي قدر المستطاع ونشر الخير بينهم
10- عدم التعرض بالآساءة أو الألفاظ الجارحه لمن يقوم بالرد علي مدوناتنا
11- التضامن مع أخوننا في كل انحاء العالم وأظهار لهم روح الترابط والأخوة عن طريق التواصل عبر المدونات
12- متابعة تعليقات من نقوم بالرد في مدونتهم لكي يتم الاستفاده من هذا النقاش
13- عدم التسلط أو التطاول علي من يقوم بنقضنا ، ومحاورته بكل حب وتفاهم لكي يتم تصحيح المفاهيم
14- مقاطعة مدونات الشواذ والمثليين وارشادهم للصواب وتعريف المدونين بيهم لكي يتفادوا التواجد معهم
15- عدم نشر العادات السيئة والتقليعات الغريبة التي لا تمت بأي صله للإسلام ولا للعادات والتقاليد الشرقية
اقسم بــالله الـعـظـيم
أن احــــافــظ عــلــي شـــرف التدويــن وأن أعـمــل جــاهــدا عــلــي ان أرتـقـي بـهــذا
الـمـجـتـمع الإلكتروني لـكــي يـــكــون صـــوت الـناس وللناس وأن أقـــوم بنشر روح الأخـــوة والـمحبه بـيـن الـنـاس
وأن أعمـل جـــاهـــدا عــلــي رفـــع الـمـعـنـويــات لــدي الـمـدونين لــكــي يبدعــوا وأن نقف بجــانـب كـــل مــــن
يـحـتـاج الــعــون وأن نتـعـامــل مــع أخــوانـنـا الـمـدونـيـن بــالــحسنه والأخـــوه وأن التزم
بشكر كل المدونيين اللي اشتركوا في هذه الوثيقه (مجنون اللي طلع عاقل - محاسن - كيار - ضد التيار - ايمي - برنسس - طوبه فضه وطوبه دهب - عمرو فاروق - ساسو - ام.كا - مصطفي ريان - احمد.كا - البحث عن انا شئ جنوني)
وادعوا الله ان تكون ايضا نداء لكل من اغلق مدونته ان يعود ويواجه الاسباب اللي خلته يغلقها في وجه احبابه وان نساعده جميعا في التصدي لهذه الاسباب.
تسلم ايديكم علي هذه الوثيقه.

النت اه من النت

6ايام انقطع فيهم النت
ان ينقطع النت ده شئ عادي ولكن ان ينقطع اسبوع
وبدون اي سبب والشركه ودن من طين وودن من عجين
الي ان هددنا ان نقدم شكوي
ونسحب الاشتراك
ورجع النت ليه كل حاجه في بلدنا بقه فيها وجع قلب للمواطن ولا مبالاه من المسؤل عن اي حاجه وفي اي حاجه
كبر المسؤل او صغر حجمه هو مش الموظف ده او المسؤل ده مواطن زينا كده والا ايه
ولا اقصد المسؤل هنا اي وزير او محافظ او وكيل وزاره............الخ
لا المسؤلين الصغار اللي بيتعملوا مع المواطنين
اشكر ضد التيار وبيرم المصري اللي سألوا عن غيبتي

الثلاثاء، 14 أكتوبر، 2008

لوندره الجبل

طولي عمري اقول ان انجلترا عامله زي الجبل في الصعيد
بيستخبي فيها المطاريد
يعيشوا في امان بعيد عن الحكومه
وطول ماهمه ماشيين بقانون الجبل حلوين وزي الفل
اول ما يعكرتوا شويه
يااما ينتحروا لو مافيش حل غير كده والامثله كتير ومعروفه
يااما ينتطردوا
واخر المتطاريد دكتور هشام السباعي بعد14سنه
صال وجال علي كيفه في الجبل
ياتري عمل ايه خلاه خطر كده علي الجبل
علي فكره بيقولوا لندن مسليه جدا فيها كل المطاريد اللي بنسمع عنهم في القضايا وبعدين يختفوا وبعد شويه يظهروا في الجبل قصدي لندن ياتري في احصائيه بتقول عدد المطاريد المصريين هناك كام
-----------------------
علي هامش القذافي وولده هنيبعل(يخرب بيت الاسم قضيه لوحده)
الموضوع طلع عرب في عرب
ليبين ومغاربه وتوانسه خناقه عربيه علي ارض سوسريه
مش عارفه لما هيتنزلوا كان ليه الفضايح اصلا
وبعدين ابوه ليه مايلموش في بلده احسن من كل الفضايح اللي بره دي
ربنا يهديه

السبت، 11 أكتوبر، 2008

انت تاني ياقذافي

القذافي ده رجل غريب جدا
مش عارفه احدد كنيته ايه
قررت ليبيا سحب كل ارصدتها المودعه في المصارف السويسريه
المقدره ب7مليارات دولار
واكدت وقف تسليم النفط الي الاتحاد السويسري
وذلك
احتجاجا علي سوء معاملة الدبلوماسيين ورجال الاعمال الليبيين من قبل شرطة كانتون جنيف
ايهالحلاوه دي
من زمان قوي ماشفناش الكلام ده
طيب وليه الكلام ده ماتعملش لما الحبيب المصطفي محمد اتعمل في سيرته اللي اتعمل
كان من باب اولي الدول النفطيه كلها عملت كده
وعجبي
الكمبيوتر بتاعي اتجنن
يادوب افتح واخد وضع الكتابه والقرأه الاقيه يتحول الي جثه هامده
لابيصد والابيرد
ويروح لامم الكراسي ويرش ويقفل الدكان علي كل الفايلات المفتوحه
والاقي الشاشه ضلمه وناقص يطلع لي لسانه
يعني كرسي في الكلوب
حاولت افتح بسرعه وارد بسرعه علي قد مااقدر ولحقت اكتب الاعتزار وانشره وراح قفل خالص
دكاترة الكمبيوتر في القبيله صلحوا في شويه والمفروض هنكمل النهارده
ادعوا له بالشفاء
وبشكر كل اللي ساب لي تعليق اثناء الوعكه الكمبيوتاريه

الجمعة، 10 أكتوبر، 2008

الكمبيوتر عطلان سمحوني

الثلاثاء، 7 أكتوبر، 2008

سألني خطيب بنتي الصغري
سؤال علي حين غره
ماما همه ليه سموا هزيمة 67 بالنكسه
تنحت شويه كده واستغربت شويه
وبعدين سألته وهمه ليه بيسموا الغلا تحريك الاسعار
روح اسأل حماك اهو من نسور العبور
حد يعرف الاجابه

سؤال

التاج تاني

اهداني الشاعر العزيز محمد هشام هذا التاج
*اعطيتك 3وردات من هم 3اشخاص اللي هتعطيهم الورد اللي معاك؟
ورده لامي.....وورده علي قبركل شهيد ضحي عشان نعيش......وورده علي قبر ابي

*لواعطيتك ورقه فيها 3سطور وقلتلك اكتب فيها اللي انت عايزه هتكتب ايه؟
هكتب سطر شكر لآمي
وسطر لجوزي
وسطرللجيران اكتب فيه الحديث النبوي بتاع الجار

*ماهو هدفك في الحياه؟
انهي مشواري مع بناتي علي احسن وجه وارضي الله قدر مااستطيع

*ان شاء الله بكره احسن من النهارده هل تصدق هذه المقوله ولماذا؟
طبعا مصدقاها عشان ده حسن الظن بالله وعكسها اسائة ادب مع الله

*اجمل مقوله سمعتها في حياتك
ان الله قادر علي اصلاح حطام قلبك فقط اعطه الحطام

*من المغني اللي بتحبه قوي؟
كل من يطربني بجد بس من صغري احب فيروز قوي

*ايه احلا اغنيه بتحبها؟
بحب اغاني كتير قوي بس احب اندن احنا والقمر جيران

*غزه تمثلك ايه في حياتك؟
الجرح المؤلم اللي مش عارفه اروح لمين او اعمل ايه عشان يخف

*اعطي لانتمائك لوطنك درجه من مائه؟
مش معقول اتسأل عن انتمائي
طبعا مصريه جدا بس المشكله انهم مش مديين حد فرصه ينتمي اصلا

*لوتزوجت وانجبت بنتين وولدين هتسميهم ايه؟
السؤال ده متأخر 26 سنه

*عمرك غشيت في امتحان وانت صغير؟
الحمد لله عمري كانت امي مفهماني ان اللي بيغش بيروح النار

*لو اتعرض عليك رشوه كبيره وانت في زنقه ماليه هتعمل ايه؟
الحقيقه انا ماشتغلتش في موقع فيه رشاوي بس انا مابحبش اخلص مصالحي بالرشوه يبقي لا طبعا

*قول3صفات ب3كلمات بس توصف بيهم شخصيتك
طبعا صعب ان الانسان يوصف نفسه
حنينه....زربونه......طيبه .....طبعا كله شكر في نفسي

*صفه عايزها في شريك حياتك
متأخر قوي السؤال ده لقد سبق السيف العزل

*ايه اللي غير دراستك وشايف نفسك فيه قوي؟
الحمد لله ربنا كرمني ودراستي كانت هي هوايتي اللي طول عمري شايفه نفسي فيها وماشفتش غيرها

*بتحب السفر؟
مش قوي بس لو جه اهلا وسهلا لكن مابسعاش له

*طب دلوقتي حالا ايه المكان اللي نفسك تكون فيه؟
بم ان انا بسعي اني احج احب اكون هناك
--------------------------------------------
*توضيح اسم المدون اللي اتكرم ومرر لي التاج؟
محمد هشام

*توضيح قواعد التاج؟
اعتقد الصراحه ونشره علي المدونين

*اتكلم عن6 اسرار في حياتك ربمالم يكتشفها الغرباء
الحمد لله ماعنديش اسرار

*مرر التاج ل6مدونين
احب امرر لكل المدونين اصدقائي

*ترك تعليق في مدونة اللي اهدتهم التاج
صعب عشان انا اهديته لكل المدونين اصدقائي

*طبعا التاج لطيف وبيقرب الناس من بعض وبيعرفنا شخصيتهم اكتر بس هو متعب وبياخد وقت كبير
الحمد لله الامن استتب
وافراد القبيله كل واحد رجع لعمله
والبيت اتنظف وكله تمام
والاجازه كانت حلوه ماعدا ناموس الساحل وعمايله
يله هيروح من المبيدات فين
اللي مش كويس مش عارفه اكتب عن ايه والا ايه
مواضيع كتير تحرق الدم وتزعل
وبعد حيره قررت ادخل مدوناتكم واللي كتب عن اي موضوع فيهم اكتب وخلاص
بس في سؤال تعبني جدا ومنكد علي
همه الشباب بتوع كارثة شارع الدول دول مصريين زي المصريين اللي مسحوا عار الهزيمه وجابوا نصر اكتوبر
حد يقولي

الاثنين، 6 أكتوبر، 2008

انا جيت


كل سنه وانتم طيبين

اخيرا رجعت من الاجازه

بشكر كل من هناني بالعيد ووحشتوني جدا

وان شاء الله بعد ما افضي الحاجات والمحتاجات والامن يستتب

ادخل مدونتكم واشوف عملتم ايه

واحكي لكم علي الاجازه

كل سنه وانتم طيبين

الأحد، 28 سبتمبر، 2008

اهلا بالعيد


كل سنه وكل المدونين والمدونات طيبين وبخير

والسنه الجايه

كل واحد محقق حلمه

اتمني لكم اجازه سعيد

نتقابل علي خير بعد الاجازه

ان شاء الله

وعشان انا هاخد اجازه طويله شويه

عايزه افكركم بصوم الست من شوال وبنصح كل ام مسؤله عن عيله

ماتبتديش غير بعد العيد عشان تقدري تحتفلي بالعيد مع اسرتك وتقومي بواجبك تجاهم تمام التمام

وبعد كده صومي زي ماانت عايزه الحكايه بسيطه يعني من السبت ان شاء الله

اقرالكم بعد الاجازه (ماتنفعش اشوفكم طبعا)

سلالالالالالالالالالالالالالالالالالالالالالالالالالالالالالالالالالالالالالالالالام

الأربعاء، 24 سبتمبر، 2008

امسك حرامي


مش الانجليز طلعوا مديونين
موقع مصراوي ازاع ان الانجليز مديونين من ايام الملك بملايين الجنيهات الاسترلينيه
طيب الثوره ماجبتش الفلوس دي ليه
طبعا الموضوع زوبعه في فنجان وهيعدي
العقيد القزافي شاطر جاب فلوس من الحدايه
وفوقه اعتزار
انت عارفين ان اليهود كمان مديونين للمصريين من ايام الفراعنه
قبل اليهود مايهربوا من مصر مع سيدنا موسي
كل يهوديه خبطت علي جارتها المصريه تستلف منها دهبها زاعمه ان عندها فرح بكره وعايزه تلبسه في الفرح
في الفجر كله هرب ومعاه الدهب
اتسرقنا في اكبر عملية نصب في التاريخ ,,,,,,كنت مره سمعت ان في محامي مصري عايز يرفع قضيه بالدهب لان القصه مثبته
بس مش عارفه عمل ايه
يعني مصر بتتسرق في كل العصور والعهود
حرااااااااااااااااااامي

الثلاثاء، 23 سبتمبر، 2008

النت منه لله

بعتزر عن التأخير في الرد عليكم
لآن النت الله يسامحه وقع وبقالي يومين بعمل فيه مع الشركه
والحمد لله انه اتصلح
وبشكر ابني فاروق علي سؤاله عليه
وبدعوا له بالنجاح والتفوق

الأحد، 21 سبتمبر، 2008

تيجان وسلاطين

استفتاء اجتماع المدونين شغاااااااااااال مالوش دعوه بالتاج
الاخت محاسن والابن فاروق عزموني علي الاسئله الاتيه وان شاء الله هجوبهم بكل صدق
1-بدأت التدوين امتي ودخلت العالم ده ازاي؟
الجواب في اول مدونه عندي
2-ايه كان انطباعك في البدايه؟
برضه الاجابه في اول مدونه عندي
3-من اكترواحد بتهتم بتعليقه علي بوستك الجديد؟
بهتم بكل الاخوه المدونين لآني بشوف اتجاهات مختلفه
4-ايه اكترحاجه اتعلمتها منعالم التدوين؟
الصبر
5-ايه اكتر حاجه كرهتها؟
الناس اللي بتنتحل شخصيات ناس تانيه وتدخل تأذي
والناس اللي بتستخدم الفاظ مش لطيفه
6-حاسس ان التدوين ليه تأثير؟
اكيد علي الاقل تفعيل نظرية الناس علي الناس رحمه
7-بتحب تهدي التاج لمين؟
لكل اللي يحب يجاوب
-----------------------------------------
1-اذكر6اسرار لايكتشفها من يقابلك لآول مره؟
الحمد لله ماعنديش اسرار
2-7حاجاتنفسك تعملهم؟
احفظ القران-احج -اكمل رسالتي علي خير مع بناتي-
3-7حاجات معرفتش تعملهم؟
حفظ القران واديني شغاله-اسافر عند اخويا عشان ماعنديش وقت اضيعه عند الامريكان--اخد ماجيستير في الفراعنه عشان اول ماابتديت خلفت بنتي الاولي وماحبتش اضيع وقتي وجهدي واعصابي الا في تربيتها--
4-7حاجات دايما بتقولهم؟
والله-ياسلام-يانهارابيض-وكتاب الله-ارحموني مع الزعيق طبعا-جميل-حلوقوي كده
5-7مشكلات في حياتك ممكن تحلهم الفلوس؟
في حياتي انا لا بس في حياة ناس كتير فقراء بحاول احل بيها ساعات
6-7اماكن نتحبها؟
المسجد النبوي-مكه وبالتحديد وانا قاعده عند الكعبه-بيت ابويا -مسجد السيده نفسيه-اي مكان هادي علي النيل
وزمان كان الاتلييه بتاع الكليه
7-اشخاص بتحبهم غير ماما وبابا واخوتك؟
بحب القبيله بتاعتي تتمثل في بناتي وتوابعهم-واصدقائي بتوع زمان والجداد وبحب كل المحيطين بيه من اهل واحباب وجيران
8-مدونين بتحب تقرالهم؟
كل المدونين بس انا حاطه عندي اول مدونتين دخلتهم لما عملت الاكونت
وان شاء الله هحط الباقي لما اعرف اعمل الريدر
ارجوا ان اكون جاوبت كويس بس استفتاء لقاء المدونين شغال

السبت، 20 سبتمبر، 2008

التدوين بين الحقيقه والخيال

اصبح للمدونين مدينه
فيها الطالح وهذا النوع يجب عدم الرد عليه وتجاهله تماما
وفيها الصالح وهو مادائما مايبقي لآن البفاء للاصلح
العزيزه ابي الفاعله للخير دائما عملت دعوه للخير يتخللها لقاء للمدونين
وهنا فكرت كثيرا ايهما افضل
ان نتعامل مع بعض في الخيال
وتكون مدينتي قائمه علي الخيال
ام انزل الي ارض الواقع والتقي بمن عشت معهم الهموم والافراح في الخيال
واصبحت حائره
صحيح الميعاد فات لكن لابد ان احسم امري قبل ظهور اي دعوه اخري
ياريت تشركوني في اتخاذ القرار
اختار الحقيقه ام الخيال
وكل سنه وانتم طيبين
شددوا العباده احنا في العشر الاواخر من رمضان

الثلاثاء، 9 سبتمبر، 2008

الفوازير


مش عارفه ليه رمضان عندنا ربطوه بالفوازير

ماشي تيجوا نعمل فوازير لينا

في مدونين كتير عاملين اسماء لطيفه

كل واحد يدخل المدونه عندي ياريت

يفك الفزوره بتاعته ويقول ليه اختار

الاسم ده او الصوره دي

وكل سنه وانتم طيبين

الثلاثاء، 2 سبتمبر، 2008

مش هنتسرق

رمضان كريم
ربنا ماقلش ان رمضان عباره عن مساسلات وبرامج هايفه
لبه حاسه ان احنا كل حاجه مننا بتتسرق حتي فضل رمضان
لالالالالالالالالا
هنصوم وهنصلي وهنصلي التراويح وهنقرا قرآن ومش هنضيع رمضان في الفرجه علي اعلانات يتخللها مسلسلات
حتي العباده عايزين يسرقوها مننا مايسبونا نعمل حاجه لاخرتنا
ده غير ان في اسر مابتتلمش علي الاكل او غيره في رمضان
ليه اخليهم يتنحوا امام التليفزيون بدل ما يتكلموا مع بعض ويتواصلوا
وعليه قررت انا واسرتي المتواضعه
مافيش تليفزيون في رمضان الا نشرات الاخبار والبرامج الدينيه الهادفه الحقيقيه
استمتعوا برمضان وما يدخره لنا ربنا من مغفره وثواب وعتق من النار في رمضان
ربنا يتقبل منا ومنكم

الاثنين، 1 سبتمبر، 2008

مدونين علي طول

ليه احنا بندون
اعتقد ان احنا بندون عشان نسمع بعض.....ونشارك بعض مشاكل الوطن وهمومه
واعتقد كمان عشان نتبادل الاراء.
واللي يعرف حاجه يشارك الاخرين فيهاواسباب كتير اعتقد هذا
لكن مااعتقدش ان احنا بندون عشان نتسابق مين مدونته مسمعه اكتر
مين عداده شغال اكتر
مين المثقف اكتر
واللي يسخر من الاخر
واللي يشتم
انا حاسه ان في تناحر زي اللي بين الدول العربيه
وخايفه يجي يوم والمدونين يتفرقوا زيهم
او الموقع يولع من كتر اللي بيحصل
هو ماينفعش اللي مايعرفش يقول مااعرفش
ايه هتتهد الدنيا يعني
هو في حد عارف كل حاجه هو في حد بيقراء كل حاجه وبيشوف كل حاجه بايونك مدون
في ايه هو استعراض عضلات
ده بدل ماننشر الفكر بينا ونتحاور بلطف ونفهم يعض وياتقنعني يااقنعك يانطلع بفكره جديده بلطف وود وتفاهم
وندور علي حلول للمشاكل ونبتدي نحلها
ان شاء الله نبتدي بنفسنا والمحطين بينا
والا خلاص هو ده حال البلد
وما فيش فايده
كل واحد عامل ابو عرام وهو وبس وماقيش غيره وهو الزعيم ويسخر من الاخر
بس نتكلم كلام كبير عن الاخر والفكر والتشاور والامه
واحنا مش عارفين نطبق ده بينا في المدونات مبالك الامه
يبقي العيب فين

عملها ازاي

الاتفاق اللي تم بين القذافي وايطاليا غريب حدا
مش فاهمه
بس حاسه ان في حاجه لآن النظريه بتقول الحدايه ما بتحدفش كتاكيت
بس لو الموضوع كده وسهل وجميل فين تعويض باقي الدول العربيه
حد يفهمني
فلوس واعتزار لادي هاصت
واللي عجبني واثلج صدري قول القذافي (انها ساعه تاريخيه يوقع فيها الرجال الشجعان تعهدا بهزيمة الاستعمار والتعهد بعدم تكراره ضد الشعوب الامنه) ياسيدي ايه الحلاوه دي
ده احنا مستعمرين اكتر من الاول
مستعمرين بمزجنا من طريقة لبس لهمبرجر وبيتسا وثقافه وافلام وكمان بيصدرولنا الهيافه
حتي الاتراك صعب عليهم مايبقاش لهم دور
راحوا بعتين لنا حتت مسلسل تفصيل انتم عطشانين حب ورومانسيه خد ياسيدي
وكمان حتت واد من اللي البنات بتحبه
حد يقولي معني هذا الاتفاق

الأحد، 31 أغسطس، 2008

يارب توبه


ان الله قادر علي اصلاح حطام قلبك

فقط اعطه الحطام

الجمعة، 29 أغسطس، 2008

الست السفيره

شكرا للست السفيره كتر خير اللي بعتوها
الحقيقه عملت اللي عليها
ولسان حاله بيقول(مايحكمش اشمعنا ده اللي ادفع فيه فلوس مااحنا عمالين نقتل في العراق والا حس والا خبر)
واحد قالي انت زعلانه ليه دا تلاقي اهله امبسطو ولسان حلهم قال مش عايزين حد تاني من العيله
حطيت في نفسي وقلت ياه البني ادم بقه رخيص كده
استرها يارب

الأربعاء، 27 أغسطس، 2008

امتحان

حدثني في سطرين
*الماني يقبل صوره لزوجته المتوفيه اثناء استلامه الميداليه الذهبيه في رفع الاثقال
*رجل بنكي النزعه يهرب ب28مليون جنيه من بنك التنميه الزراعي
*مدير محترم بشمال سيناء يجازي نفسه والعاملين معه للتقصير
*سفينتين غير عربيتين تكسران حصار غزه
*الرئيس يأمر بالتحقيق في خيبتنا في الصين

الثلاثاء، 26 أغسطس، 2008

من صفر المووووووونديال للصين يالهوتي

النهارده اليوم الرياضي بتاع تنظيف البيت
عندي شغاله مثقفه شويه
سألتني الا ياباش مهندسه ايه موضوع اوباما ده
قلتلها قلت لك 100 مره ماتقوليش ياباشمهندسه انا نسيت الموضوع ده من زمان
المهم مش ده موضوعنا
انها تسألني عن اوبامااااااااااوووووو اوو
افتكرت الحوار اللي كان حصل بيني وبينها ايام الصين وماكنتش نشرته
قلت خلاص افرجي عنه بقه عشان اقدر اكتب لكم موضوعها مع اوباما
لم اجد غير الصيحه المشهوره لنساء الصعيد عند المحن
يا يامراري

ام محمد الشغاله اللي عندي عزيزه عليه واحب ان اتحاور معها لآني بصراحه بسمع كلام البسطاء الجميل وهي زوجه لبواب مما يجعلها نبض الشارع كله

قلتلها:تعرفي ايه عن بكين ياام محمد

قالت:اهه ده البط يامدام ايوه البط البكيني وكمان مره غسلت عند واحده من الناس اللي باروحلهم حاجات كده لامواخزه قال ايه طلعت

مايوه يكيني زي البط يعني

قلتلها:بكين دي بلد في الصين بلد الصينيين انا قلت كده ودي راحت نازل دعا علي الصين واللي بيجي منها واللي فيها واللي جابوها

سألتها في ايه انت اتجننتي دي عامله كده زي امريكا

قالت بس امريكا ماكانوش هيخربوا بيتي لكن الصين كانوا هيخربوا بيتي

قلت: ازاي ده انت مستهدفه من الصيين بقه

فالت:دول بيجوا العماره وقصيرين قوي كده وشايلين علي قلبهم شنط اتقل منهم عاملين زي النمله اللي شايله حملها

والعجيب انهم ينزلوا باييعين اد كده يخوشوا كل بيت وفي مره الساكنه الجديده عملت عمايلها قال ايه ماندخلهمش العماره

وقالت كلام مافهمنهوش تخريب ابصر ايه بيخربوا اقتصاد البلد ايه اقتصاد دي ماتكلمنا بالعربي
اللي يخصني العركه كبرت وجوزها حلف مااحنا قاعدين في العماره لولا الحج اللي في الخامس كنا اتطردنا يبفوا كانوا هيخبوا بيتي والا لآ

قلتلها:ايوه همه مش هيخربوا بيتك انت وبس دول هيخربوا البلد والعالم

قالت: ايه همه بيروحوا عند بوابين العالم برضه

فلتلها: ماتشغليش بالك

ايه رئيكم

الصين جايه زي هراس جاي بتاعت زمان

الصين اخدت 51ميداليه ذهبيه امريكا 36

الصين دخلت كل بيت

كل شئ بقه مستورد من الصين

عملوا افتتاح الدوره مبهر بكل المقاييس تكنولوجيا علي اعلا مستوي

واستعرضوا عددهم في الآعداد الكبيره اللي كانت في العرض

واستعرضوا حضارتهم القديمه

يعني اجنا قوه اقتصاديه علم تكنولوجيا فن وحضاره يعني جدر جامد مش بلد لسه طالع في المقدر ماباقلوش 250سنه

والكلام هنا موجه للآمريكا

يعني هنكون اسياد العالم رسمي

والخطه ماشيه جمييييييييييييله جدا

خليينا احنا نتفرج لاتخطيط والا علم والا تكنولوجيا والشباب امل المستقبل عطلان

الصين حوالي مليار ونص وبيعملوا ايه

احنا صرفنا ادايه علي البعثه الموقره

انا مستنيه التحقيق عشان اعرف اتكلم

دي فضيحه

لوالاموال اللي بتتصرف علي الدوري الفاشل اتصرفت علي الاطفال الموهوبين وعملنا لهم اعداد جيد

يمكن نفدر نوصل في يوم

التخطيط هو الحل مع الضمير مع حب البلد دي

الجمعة، 22 أغسطس، 2008

يافضائيات يا

خبر غريب وعجيب اعلنه اليوم برنامج عم يتسألون علي دريم انشاء اول قناة فضائييه للمنقبات فقط
يعني كل العاملين بها من المنتقبات ومافيش رجال خالص مش فهمه حاجه
يعني همه اعتبروا الوجه عوره والصوت لا والاهمه هيمنعوا الرجاله تتفرج عليهم
يعني لو رجل فتح القناه دي يطلع له عفريت يسد له ودانه
والا ايه
ومن مهند باشا لقناة المنقبات يا قلبيي لاتحزن

الخميس، 21 أغسطس، 2008

مهند باشا افنديم

كنا ناقصين السيد مهند راخر خلاص بقينا ملطشه لكل التفهات بصراحه انا شايله المراره لكن حاسه انه طلعتلي تاني ياتري ايه سر اهتمام الناس ليه البنات والستات مهبولين كده علي المدعو مهند ؟واحده قالت شفتي جماله والتانيه قالت شفتي بيعامل مراته ازاي انتي مستكتره علينا الخيال قلت ماشي بس ده حتي مافيش قصه اصلا والاسيناريو وكمان الممثلين دمهم يلطش بلد بردين ورخمه ما احنا معشرين سلالاتهم وعارفين الاتراك وجمود مشاعرهم تلاقيهم عاملين المسلسل ده عشان يعلموا الاتراك الرومانسيه طيب احنا ذنبنا ايه مش عارفه مش قادره اهضم الموضوع وزاد الطينه بله التليفزيون بتعنا جري واشتراه بناء علي طلب الجماهير اشمعنا الطلب ده اللي جريوا عملوه ما الناس عايزه حاجات كتير مابتتعملش ليه الرحمه من عندك يارب

الثلاثاء، 19 أغسطس، 2008

تاريخ للحريق

خلاص حصَل مبني الشوري مبني الاوبرا القديمه خلاص تاريخنا بيتحرق حته حته معقول الطريقه البدائيه اللي بيطفوا بيها الحريق دونا مراعيه نوع المبني او طريقة بناه فيه ايه يابلد انا حزينه جدا لآن امثالي من المتخصصين يعلم قيمة هذا المبني من الناحيه المعماريه والتاريخيه وموقعه من اثار العالم وكذلك من الناحيه السياسيه فين تأمين المبني من وضد الحزائق حسبي الله ونعم الوكيل لك الله يامصر

الثلاثاء، 12 أغسطس، 2008

بسم الله الرحمن الرحيم

بها نبدأ اولا وثانيا احيي كل المدونين الاعزاء واستأذنهم ان اكون من زمرتهم وادين بالاشتراك معهم لصديق عزيز علي تجمعني به ذكريات كثيره هو اللي شجعني ان اشترك معكم لاطالما دخلت الي واديكم كقارئه لكم وما كنت اعتزم الدخول معكم لاني كنت اعتقد انكم كالمتفرجين علي ماتش كوره شويه يهللوا ويكلموا اللعيبه ويشوطوا وهم قاعدين وكأنهم في الملعب لااللعيبه سمعنهم والاهمه مؤثرين في المتش والمتش شغال ده حالنا مع الحكومه والجو العام لكن صديقه تانية قالت لي علي الآقل نسمع بعض اسمحوا لي ان انضم لكم واسمعكم صوتي بس خللي بالكم انا معروفه اني غلاباويه
ياهادي
حد يرد عليه يعني ايه 136مليون جنيه جمارك علي ياميش رمضان الله يعني احنا اغنيا وانا مش واخده بالي والا ايه
دايما اسال نفسي الدنيا عماله تغلا والناس ساكته
يمكن اغتنوا وانا مش واخده بالي
يمكن مابقاش عندهم دم وانا برضه عامله مش واخده بالي
يامسهل