الجمعة، 31 أكتوبر، 2008

يعني ايه كلمة وطن ؟

لازم تتغرب عشان تعرف معني الكلمه بس تكون اتغربت وانت كبير مدرك الوطن اللي كبرنا فيه .

عليه اول خطوه مشيتها واول مدرسه دخلتها واول بنت جيران حبيتها واول اي شئ اتعرفت عليه واول زغروته من زوجة البواب مع اول شهاده اخدتها.

الوطن هو الذكريات والناس اللي زي بعض في كل حاجه حتي الهموم بدليل كل اللي بيهاجروا في النهايه بيرجعوا لما يكبروا ويكونوا في سن اجترار الذكريات

لكن اولادهم اللي اتولدوا هناك مابيرجعوش عشان هناك هو ده وطنهم حيث اول اي شئ حيث الذكريات

صدقني يااخ طارق مع الوقت وبعد زوال الانبهار بهذا العالم بيحصلهم شئ من الغيره مننا لآنهم بقه معاهم فلوس وبيت كبير وعربيه اخر موديل

بس ناقص لهم حاجات كتير ابسطهااللمه مع الاهل والجيران

وبيتظهروا بالسعاده وده مش صحيح عشان الناس تقول يابختهم ويحسوا انهم كانوا صح

وده وهم كبير بدليل لما بيحتاجوا الدفا واللمه بيرجعوا وبيعيشوا تاني معانا مع ان هي هي العيشه وهمه همه الناس وهي هي المشاكل بس همه هربوا واحنا لا

بيرجعوا وهمه عارفين يعني ايه كلمة وطن

15 أغسطس, 2008 10:40 ص

ده كان ردي عند الاخ طارق وهو ده رأي وبرد بيه علي كل اللي شرفني بالتع

وده احساسي بمعنه كلمة وطن

هناك 58 تعليقًا:

عمرو يقول...

جيتى على الوجيعه يا شمس
الوطن !!
أرض بتتزرع و حيطان و بيوت و ناس بتجرى ورا لقمة عيشها .. و أطفال شايلين شنط مدرسيه تقيله على ضهرهم .. و مساجد و كنائس و نداءات باعه جائلين .. و تراب مغطى العمارات و دخان سيارات خانق .. و رزالة سائقى الميكروباص و ناس متجمعين على عربات الفول بيفطروا .. و عفش عروسه بيتنقل على عربيات التص النقل و شوارع كبرنا فيها ضاقت بمرور الزمن لمابقت زى بطن الأم مالناش فيه مكان .. و عساكر نازلين أجازه و طلبه بيستعدوا للاٍمتحان
الوطن حبه زى المرض العضال لا شفاء منه و بيزيد يوم بعد يوم !!
مش هو ده برضو الوطن ؟

ضد التيار يقول...

فعلا ردك على حق

بس برضه مش لازم الواحد يتغرب عشان يعرف معنى الوطن

فى ناس كتير عارفه يعنى ايه وطن و يعنى ايه حب الوطن وقيمته و هما جواه ماتغربوش

شمس النهار يقول...

*عمرو
هو كل اللي انت قلته
بس هو كمان الدفا واللمه والاهل والجيران
والاصحاب
خلطهبيطه كده
من الفشل والنجاح من الحب والكره
من الخير والشر
ادينا بنسب ونلعن ونطبطب
اهو علي رأي جاهين
حب زي الداء

شمس النهار يقول...

*ضد التيار
كلنا عارفين يعني ايه كلمة وطن
بس مابنحسهاش غير في الغربه
كلنا بنسمع ياحبيبتي يامصر
بس اسمعيها كده
وانت بره
هتلاقي احساسك بيها زاد وحسيتي معانيها اكتر

صابر وراضى يقول...

وعليكم السلاااااااام
يااااااااااااااه قلبتى على المواجع
فعلا انا عمرى ما حسيت بالوطن غير اما رحت بعيد عنه
طبعا اكتر وقت الانسان بيشتاق للوطن
فى الاعياد
والمناسبات
وخصوصا رمضان
ياااااااااااااه
انا كرهت كل الاعياد والمناسبات
واتمنى اليوم اللى برجع فيه

blue-wave يقول...

الوطن هو الأهل
فقط لا غير

م/ الحسيني لزومي يقول...

شارك في الحملة الشعبية للقيد بالجداول الانتخابية بوضع بنر الحملة علي مدونتك.
البنر موجود علي مدونتي

mohamed ghalia يقول...

حقيقى متفق معاكى دائما ومفيش أى اضافى
وبجد شىء رائع انك تهتمى بمفهوم الوطن
الإهتمام ده
استفدنا كتير من البوستات الأخيرة عن الوطن
دمتى بكل ود وفى حفظ الله
تحياتى

romansy يقول...

جميل ردك يا شمس
مفيش حد يقدر ينسى اول نور للشمس شافه
ولا يقدر ينسى اول حب فى حياته
وصدقينى مهما اتغرب ولف وشاف برضه هيرجع ليها تانى

عصفور مهاجر يقول...

عم بيرم ..قولوا له معايا
عين الشمس مفتوحه ..والي ماشايف له الويل.
وفاس الفرح مرفوعه ..تهدظلام وتنور بالليل.
هجمت علينا العصابه ..
فرحنا وغنينا بالربابه..
وقلنا الايام الجايه حلوه يابه
..ورقصنا رقص وقلنا ..اخترناك ..اخترناك..والي نسي نفكره ..هناك.

الازهرى يقول...

الوطن هو كل شىء جميل بيجمعنا ونحن له
الوطن هو ابتسامة طفل وحضن ام
الوطن هو كل شىء سىء او جميل لكن بتحس معاه بالامان

تحياتى دوما

SeSaMe يقول...

كلامك جميل يا شمس .. بس هي المشكلة لو في واحد ماعندوش ذكريات حلوة هنا في مصر .. تبقى مصر مش وطنه ؟؟؟!!!

ABOALI يقول...

يعنى ايه كلمة وطن؟
انتى طرحتى السؤال
بس الاجابات كانت منوعة
نظرا لاحساس كل واحد واختلافه
وهذا ماطرحيته فى ردك
حينما اوضحتى ان الذكريات تعنى الكثير للشخص وهى الدافع للحنين للوطن
وهذا فعلا حقيقى ولكنها دافع فقط
وليست كل الاسباب لتشكل فى الوجدان الوطن

باعتبارنا مسلمين
المصطفى صلى الله عليه وسلم
يقول
حب الوطن من الايمان
اى ليس ليكى اختيار
فالحب من اساسه للوطن جزء لا يتجزء من الايمان
ما طرحيته سيدتى
هو ما يزيد ذلك الحب مثل
ذكريات
فضل
علم
ام
اب
وهكذا
لذا وجب التفرقه
بين مايزيد الشيىء واساس الشيىء

لك التحية

tarek momen يقول...

لما سافرت ايطاليا في رحلة عمل انبهرت بالنظام و النظافة لكن كان فيه شئ بداخلي بيحسسني ان فيه حاجة مفتقدها غير الأهل و الأصدقاء
وبقليل من التركيز تبين لي ان ما افتقده هو صوت الأذان يدعو للصلاة و الذي تسمعه اينما كنت في مصر
ده جزء من احساسي بالوطن

شمس النهار يقول...

*صابروراضي
عرفة من اةل سطر انك في غربه
ولو شفت الردود هتعرف مين اللي في مصر ومين اللي بره
ترجع ان شاء الله بالسلامه
ولما ترجع تنضم لنا تشتم وتسب الزحمه والغلا وتقول ياريتني مارجعت وتمشي تاني بس برضه هترجع تاني

شمس النهار يقول...

*بلو ويف
الوطن مش بس الاهل اختلف معك
بدليل ان في عائلات كامله هاجرت بره مصر
وبرضوا بيرجعوا مصر وبرضه بيحنوا لمصر
اصل مصر دي ليها سحر خاص

شمس النهار يقول...

*م/حسين اللزومي
الحمد لله كل افراد اسرتي عندهم بطاقه انتخابيه
ربنا معكم

شمس النهار يقول...

*محمد غاليه
شكرك لك
انت ليه كسلان ومابتكتبش بوستات

شمس النهار يقول...

*رومنسي
المصريين بالذات بيرجعوا مهما طال البعد بيرجعوا
انت ماكتبتش حاجه للوطن

شمس النهار يقول...

*عصفور مهاجر
كلام لطيف
انت مهاجر ليه وفين
شكرا علي التعليق

شمس النهار يقول...

*الازهري
صح هوكل اللي كلنا كتبناه ومعاه الامان
عارف لو لاقدر الله وقعت في مصيبه كفايه احساسك ان كل اللي حوليك اهلك
انا بعتبر ده لوحده شعور بالأمان
غير ماحتي ولو تعيي في الغربه تحس بالضعف
وانك وحيد
حتي وانت في وسط اهلك

شمس النهار يقول...

*سيسم
اخيرا ظهرت انت فين انا كنت هنزل منادي ينادي عليك
واحد براسين غايب ياولاد الحلال
اهلا بيك
هو يعني الذكريات بس بتكون حلوه
في ساعات ذكريات بتكون وحشه بس الموقف نفسه بينتج عنه شئ جميل
وكمان الذكريات عن اول شئ حسيت انت بيه
اقرا البوست براس واحده الله يخليك
ده انا كنت مستنيه تعليقك
ركز كده ياسيسم

شمس النهار يقول...

*ابو علي
عجبني تعليقك واعتقد انه مكمل
لردي عند عابر سبيل
انا كتبت نفس التعليق اللي كتبته ساعتها
عشان اشاركم ردي وقتها وماكنتش لسه قريت تعليقاتكم

SeSaMe يقول...

ازيك يا شمس
و شكرا على سؤالك ... شوية مشاغل و تنظيم للوقت و الأفكار بس خلاص إن شاء الله كله اتظبط

أنا اللي أقصده إني حتى لو ذكرياتي وحشة و منيلة لو عايش في العشوائيات لو مش لاقي شغل يعني الوطن ساعتها لا هو حضن و لا أم و لا ذكريات حلوة و لا نيلة ساعتها مش هتبقى مصر هي وطني ؟؟؟

ده سؤالي ليكوا .. لأن كل اللي أنا شايفه إن الناس بتقول الوطن هو الأمان هو الحضن هو الأهل هو الأم ... طيب لو مافيهوش حاجة من ده كله .. مش هيبقى وطني !!!!

شمس النهار يقول...

*طارق
اشكر لك تعليقك
انت صاحب الفضل في البوستات دي
بس كمان لما بتكون في دوله عربيه برضه بتحس بالغربه
وبيوحشك صوت الاذان بتاع الجامع اللي حنب بيتك وخصوصا لما تتعود علي صوت البواب بتاع العماره اللي فيها الجامع ابو صوت عايز حبسه

شمس النهار يقول...

*سيسم
ازيك
ماهي مصر خليط من ده كله
كوكتبل غريب الشكل
المتبهدل فيها والمطمن والغني والفقير
المرتاح واللي طالع عينه
كلهم بيحبوها
تقول ايه علي الفلاح الغلبان اللي متبهدل
لما يسافر ويعمل قرشين بطلوع الروح
يجري يرجع ويعمل دار
ماده من اللي داقوا فيها المر
جاهين قال
العنها بحب زي الداء
وحمدالله علي السلامه

SeSaMe يقول...

اللي أقصده إن الوطن بالنسبة لي هي مصر حضن بقى مش حضن .. أمان مش أمان هي وطني لازم أحبها و أموت في ترابها .. زي ما أبويا اسمه محمد .. محمد ده هو أبويا .. كويس مش كويس هو أبويا و لازم أحبه ... حب غير مشرررررررروووط

حتى لو أبويا ده خمورجي و بتاع ستات و فقير و حالته بالبلا .. برضه بأحبه

حتى لو مصر دي ماشيه على حل شعرها و حالتها بالبلا .. برضه باحبها

لأن حبي ليها غير مشررووووووط

شمس النهار يقول...

*سيسم
الله ينور
يبقي مااختلفناش
اناموافقه علي الكلام ده

SeSaMe يقول...

لأ يا شمس مش مختلفين .. بس حبيت أوضح وجهة نظري .. عشان كده مش محتاج أدورلها على تعريف .. كفاية إن هي مصر وطني

شمس النهار يقول...

*سيسم
ممكن بقه تكمل الف ليله
وتنزل بوستات جديده الاحداث كتير جدا
والدنيا بتجري بشكل غريب
مافيش يوم يعدي من غير يامصيبه ياكارثه

SeSaMe يقول...

إن شاء الله بإذن الله .. شغل من نار :)

هي بس زي ما قلتلك الواحد بس حب يرتب نفسه قبل ما يلتزم بأمور معينة

من غير عنـــوان يقول...

وطني لو شُغلت بالخلد عنه

نازعتني إليه في الخلد نفسي


ده كلام احمد شوقي

____________
الوطن ده زي الأم والأب
ده كلامي أنا

إحساس جميل في كلامك

a7wal el Hawa يقول...

ارسلت تعليق و يبدوا انه قد حذف و لا ادري لماذا

تحياتي

fashkool يقول...

مين قال لك ان انا شاعر هو الحكايه انى يا دوب حاسس واصل عمك بيرم المصرى حبيت ارد عليك بنثر فشكولى .. قمت عمل الكلمتين دول من غلى وغيرتى على بلدنا اللى مدوخانا معاها ومهجرانا ومغربا ولادها ومشحططاهم فى الدنيا كلها عشان يشوفوا لهم وطن .. لكن هما ما بيعرفوش يعيشوا فى الاوطان البديله بس عيالهم زى انت ما قلت بيتوطنوا هناك واحسن لهم هما يعنى حييجوا هنا على ايه يا حسره ..كفايا احنا يا ريت اشوف لولادى وطن تانى

شمس النهار يقول...

*من غير عنوان
اهلا بيك في اول زياره
وشكرا علي التعليق
اهلا بيك دائما

شمس النهار يقول...

*احوال الهوي
مافيش حاجه محزوفه
لما التعليق بيتحزف بيترك علامه انه اتحزف
التعليقات اهي
مافيهاش حاجه محزوفه
بطل كسل واكتبه تاني
وانت فين كنت غايب

شمس النهار يقول...

*فشكول
لاوالله مش قصدي
ده حتي كان كلام لطيف
انا قصدي انه مش شعر
وهي دي مصر
حبها مكلبش
علي ايه علي كل حاجه وحشه وحلوه
ماهو حب زي الداء

~*§¦§ Appy §¦§*~ يقول...

ممكن يكون صح وهو اقرب حاجه بس لسه بدور على الوطن برضه

شمس النهار يقول...

*ابي
بدوري علي ايه
ماانتي عايشه فيه وهوعايش جواكي
بدليل انك متنحرره عليه
وواكله نفسك عليه وعلي اللي بيجره له
وطنا جوانا
ماتدوريش

أسير الجراح يقول...

الوطن


مفيش حد مش بيحب وطنة

الغربة هى اللى تحسس الشخص بقيمة وطنة


بجد جميل


كل الود



اسير الجراح

~*§¦§ Appy §¦§*~ يقول...

شموس الغزالى مدون اه وبيكتب حلو اوي انا عارفاه شخصيا هكلمه واعرف منه ايه اللى حصل على فكره مهما قال انا متاكده انه لم نفسه ده مصيبه ههههههههه بس ده بيكتب قصص كمان

شمس النهار يقول...

*اسير الجراح
اهلا بيك اول زياره
انا ماقلتش ان في حد بيكره وطنه
انا بس كنت عايزه نتناقش في معني كلمة وطن
ياريت تقرا اول بوست في الموضوع هو البوست اللي قبل قبل ده
نورتني

مفكر يقول...

السلام عليكم ورحمة الله وبركاته::

دي اول زيارة لية لمدونتك الجميلة حقاً..

أنا طبعاً متبعتش سلسلة الوطن بس استوعبت مقالتك دية كويس جداً..

فعلاً احلى حاجة في الدنيا هي الاهل والجيران وفرحتهم بنجاحك وطبطبتهم وحنيتهم لما تزعل..

تقبلي مروري
أخوك في الله
مفكر

شمس النهار يقول...

*ابي
اكتبي لي اللنك بتاعه
ده استفزني جدا ده كان شويه شويه يقوم يضرب العيال
مع انهم كانوا كويسين

شمس النهار يقول...

*مفكر
اهلا بيك
ياريت تقرا ليه انا عملت البوستات دي عشان تكون معانا في الصوره
نورتني

a7wal el Hawa يقول...

و لو بعتوا بلدي بالدما انا شاري
نسمة عصاري او طيبةامي و جاري
و مهما ضاعوا في الطريق اولادها
هيعودوا بكره زي ما حصل و جرالي
اصل جدوري متبته في تربها
و احبها مهما هخبي و اداري

N@B!L يقول...

الوطن ده يا جماعة حاجة كبيرة جداً والله احنا مش حاسين بيها بجد ... وزي ما المثل الانجليزي بيقول

go east,go west ... home is the best

وربنا يهدي الجميع....

شمس النهار يقول...

*احوال الهوي
القصيده دي جميله اوي
انت اللي كاتبها والامين

شمس النهار يقول...

*n@p
عندك حق
مافيش احسن من بيت الواحد
والبيت هنا
الوطن

mohamed ghalia يقول...

اختى العزيزة
كتبت البوست أهو
ودبيستك فى تاج ههههههههه
بس التاج ده مختلف تماما
رجاء تقبليه وتجاوبى عليه وتمرريه لأصدقائك
دمتى بود وفى سعادة
تحياتى

شمس النهار يقول...

*محمدغاليه
ماشي
تاج تاني ياغلبي
هعمله بكره معلش عشان هو بياخد وقت في الكتابه
من عيني

mahasen saber يقول...

وبعد كل اليى بيحصل للناس فى الوطن برضه بيعشقوا تراب الوطن ويلفوا يافوا ويرجعوله حتى ولو اموات عشان يدفوا بترابه اليى طول عمرهم بيدوسوا عليه وبيحبوه
.........
بس الناس بتتبهدل وبتتاخد اراضيها منها شوفتى الوطن قاسى ازاى يا شموسه بس برضه بنحبه

نهر الحب يقول...

وطن
بيت اهل دفى حب احساس بالامن
حنان وحنين لذكريات الطفولة والصبى
الوطن انا بكل ما فى من ايجابيات وسلبيات
ااااه
جتى على الوجع
تحياتى لك
اول زيارة وان شاء الله لن تكون الاخيرة

نهر الحب يقول...

يوم الجمعه 14/11بأذن الله
هنروح نزور دار ايتام فى بورسعيد اللى يحب يشرفنا
ياريت تنورنا ونحاول نرسم بسمه ونتعاون على البر والتقوى
وبعدها هنقعد مع بعض شوية طبعا لو تحبوا
التفاصيل عندى بالمدونة
اعتذر لكنه ليس اعلان لكنها دعوه للخير

شمس النهار يقول...

*نهرالحب
اهلابيك في اول زياره
وصفك للوطن جميل
وبعدين وماله لما تعملي اعلان لحاجه جميله وخيره كده عندي
اهلا بيكي في اي وقت
واعلني زي ماانت عايزه

أحــوال الهـوي يقول...

كتبتها ردا علي هبة النيل في مدونتها لقصيده زفوا البلد

فكان كلامها ملهما و رزقني الله بكلماتها
القليله المعبرة فان اعجبتك فالشكر لها
و الفضل لاهله


تحياتي

maxbeta3zaman يقول...

قالها بيرم التونسى لما عاد متسللا للوطن
قال وكان أبلغ من عبر عن هذا الشعورفقال:
واقوللكم بالصراحة اللى ف زمانا
قليلة
ماشفت ياقلب راحة فى دى السنين الطويله
الا اما شوفت العبايه واللاسة والجلابيه

sunlight يقول...

الله جميله اووى الكلمات دى
انا بسأل نفسى يعنى ايه كلمة وطن؟
يا ترى الوطن مكان اتولدنا فيه ولا لنا اى صله به ولا نعرف عنه اى شئ ولا الوطن فيه ذكريات الطفوله ولا الوطن مكان كبرنا فيه ومازلنا نعيش فيه وماهو الوطن؟ يا ترى الوطن بلد اجدادى ولا ايه؟
انا عامله زى الشجره بذره بتتذرع فى الارض تكبر شويه وتبقى جذور وبعد كده تكبر لحد ما تبقى كبييره
يعنى نفسى حد يجاوبنى فى حالتى دى ايه وطنى؟
ما تستغربيش كل ما اريد انى احن الى مؤى ولا اجد الى غربه لعل الوطن يكون الحل