الأربعاء، 27 أبريل 2011

تاااااااااج الثورة

عجبني الاسم
:))
صديقتي وحبيبتي مدونة كلمات من نور
عزمتني علي تاج الثورة
نقول بسم الله
===
هل توقعت ثورة 25 يناير؟
مش بالظبط لكن كنت علي يقين ان ساعة انتخابات الرياسة هتحصل مجزرة في البلد بمعني مجزرة
ولما قامت ثورة تونس قلت كده اهو اهل تونس لبسونا الطرح وكتبت ده علي الفيس الشخصي عندي وبعض الشباب من العيلة زعلوا
ولما اتعملت الدعوي للثورة علي كلنا خالد سعيد واتعمل جروب 25 يناير اللي اختفي خالص مش عارفة ليه
بصراحة اتريقت وقلت ياسلام هنضرب مواعيد لبعض كان المفروض تكون سريه مش اوي كده يكون التحدي وكنت حاطه ايدي علي قلبي
=====
وهل كنت من ثوار ميدان :
التحرير _ الكنبة _ الكمبيوتر _ حدد الميدان الآخر الخاص بك

:)))
التحرير والكمبيوتر الاتنين
والحمد لله ان ربنا مد في عمري واشتركت الي اخر يوم

واشتركت في اللجان الشعبيه كمان كنا بنمونهم بالغذاء والمشروبات والاسلحة
:))))))
وعندي صور وفديوهات ان شاء الله هعمل لهم مدونة لوحدهم خاصة بالثورة
======
مالم تنجح الثورة في تحقيقه هو .................... : اختار شيئا واحدا
في حاجات كتير وان شاء الله تتحقق علي المدي الطويل واحدة واحدة
بس في شئ مستحيل:))
ان المصريين فعلا يتغيروا فعلا

نزلوا نضفوا الشوارع ونظموا المرور وبعدين اتبهدلت تاني وماقدرناش نحافظ عليها نظيفة وعلي تنظيم المرور
رجعت الهرجلة تاني للشارع المصري

======

أكثر شىء فرحك في هذه الثورة هو ......................... اختار شيئا واحدا
برضوا حاجات كتير فرحتني في الثورة
بس اكتر حاجه فرحتني ان الشعب المصري فاق اخيرا واتحرك
كل واحد كان ماشي يندب حظه ويشتم في البلد واللي بيحصل وماحدش بيتحرك
علشان كده كنت مستنيه الانتخابات الرياسيه بفارغ الصبر
علشان كنت واثق ان هي دي اللي هتحرك الشعب
بس برضوا كتير من الناس مااشتركتش ولا سابت اولادها يشتركوا وفي منهم كان بيروحوا التحرير من وراء اهلهم وكنت بحاول اقنع اهلهم انهم يسيبوهم ينزلوا كانوا خايفين ان اللامبارك ينتصر واولادهم يتقبض عليهم
======
الشخصية التي أعجبتك خلال الثورة
الشخصية المصرية نفسها بكل طوائف المجتمع وخصوصا الباعه الجائلين اللي وقفوا في ميدان التحرير يبيعوا للشعب هناك سواء المقيمين او اللي بيروحوا وبيرجعوا لبيوتهم وصورتهم واتكلمت معاهم وعلي فكرة برضوا يوم موقعت الجمل كانوا مشتركين يعني ثوار وبيشتغلوا
:))
======
الشخصية التي احتقرتها بسبب الثورة
اللامبارك وحاشيته كنت الاول بكرهه بس لكن بعد اللي عملوا فينا من اول 25 يناير خلاني احتقره وبشده
=====
أطرف ما سمعته خلال الثورة ؟ تعليق _ نكتة _ حدث _ أخرى
حاجات كتير جداااااااا وخصوصا التلميذ اللي كان عايز الثوار ينجزوا
=====
القناة التي تابعت من خلالها أحداث الثورة هي
كله مافيش قناة ماتابعتهاش وعلي النت رصد واخر الانباء وكله
=====
الجريدة التي كنت تقرأها لتتابع الثورة هي
المصري اليوم ورقية وساعات الفجر والقاهرة
واليوم السابع علي النت والدستور والشروق
وبمااني بجيب الاخبار والاهرام علي طول كنت بتابع من خلالهم العالم دي بتوهم الشعب ازاي
زي التليفزيون المصري ماكان جايب لنا كورنيش النيل
====
الكاتب المفضل خلال الثورة هو

كنت بقرا لناس كتير بس كنت حريصة اني اتابع بلال فضل اكتر واحد
وبعض مماتكتبه اسعاد يونس لسخريتها من الاحداث
====
المذيع (المذيعة) المفضل خلال الثورة هو
ماحدش معين كنت بتابع القناة مش المذيع بس طبعا بما اني عندي القلب كنت بتجنب تامر واخواته
:))
====
كلمة تقولها لشهداء وجرحى 25 يناير
الشهداء مش هينفع نقول لهم احنا القضاء هو اللي هيقول لهم ويارتني كنت معاهم وانول الشهادة
اما الجرحي لما رحت وزرت بعضهم مالقيتش كلام اقوله غير ان جراحكم وسام علي صدرنا
=====
متقولش إيه إدتنا مصر وقول حندي إيه لمصر
عندك حاجة تديها لمصر ؟

كل واحد من مكانه ممكن يدي مصر واللي في ايده يعملوا في المحيط بتاعه
ممكن الناس العواجيز اللي زي يشتركوا في محو الامية او اي عمل تطوعي
العمل التطوعي في مصر مش منتشر واغلب الناس ماتعرفش عنه حاجة
=====
من سترشح لرئاسة الجمهورية ؟ ولماذا ؟
لسه بدري علي الاجابة لما الناخبين يستقر عددهم وافاضل بينهم في كل شئ في تاريخهم وسابق اعمالهم وانتمائهم وافكارهم هيعملوا ايه وان شاء الله اكيد هقول
اصل اللي لازم يحكم مصر في الفترة الجايه لازم يكون راجل جدع
علشان الشيلة كبيرة وعلشان يعرف يرجع لمصر والمصريين هبتهم في العالم تاني
صحيح الثورة عملت ده بس لسه شوية علاقات خارجية عايزة تتظبط شوية
:))
=====
لو أصبحت رئيسا لمصر ما هي أول ثلاث قرارات لك ؟
اول قرار هعمل وفورا وزارة للنظافة
وهعمل شوية قوانين هتخلي البلد زي الفل هو كده لازم قوانين وتتنفذ علشان البلد تنضف
ومش بس تنضف لا والزرع والورد يملا الدنيا
عايزين نشوف مناظر عدلة في الشوارع
ثانياهعمل وزارة من الغفراء ايوة جمع غفير هي خفير ولا غفير
المهم
علشان يقف فوق راس كل مسؤل في البلد اي مسؤل
وفي ايده نبوت اول ماضمير المسؤل يحاول يعكرت يروح مديله ضربه علي ام نافوخه
يحوله يعدله اهو يفكره ويصحصح له ضميره في التو واللحظة
ثالثا هعمل ائتلاف بين وزارة الصحة والتربية والتعليم والمالية والشؤن الاجتماعية(الاسم الجديد مش عاجبني)
الائتلاف ده لييييييييييه؟؟؟
علشان نعدل حال الاسرة المصرية من التلات اشياء دول المرض والفقر والجهل
====
لو أعطوك نصيبك من المليارات المسروقة , ما توقعك أن يكون نصيبك منها وماذا ستفعل بهذا المال ؟
طبعا ده سؤال فانتازي :))
بس ماشي نعتبر ان الفلوس جت
هدور علي ناس عندهم حلم احاول اجمعهم واحقق لهم الحلم ده
======
الحمد لله التاج خلص وياريت كل اللي يزور المدونة يتفضل التاج بالهنا والشفاء
:))))

السبت، 23 أبريل 2011

ماكااانش العشم ياقناويه+تحديث1+تحديث2

يارب اهل قنا يستجيبوا لنداء العقل بعد قرار تجميد عمل المحافظ
===
كلمة في ودن الامارات المصريين اتنفسوا الحرية وماحدش هيلوي درعنا تاني
اوقفوا التأشيرات رجعوا المصريين اعملوا اللي تعملوه
ماحدش هيفرض علي مصر تعمل ايه تاني
لأول مره الحكومة والشعب شئ واحد
مش هينفع الحكومة تعملكم اي شئ غير بموافقة الشعب
واعتقد ان شعبكم مش موافق علي كده
بس بقولكم ايه كل واحد ينام علي الجنب اللي يريحه
ان شاء الله كل المصريين اللي بره مصر يرجعوا علي مصر اجمل
====
بشار الفار داخل درعا بالجيش
هو ده جيش ابوه
اه صحيح ده جيش ابوه وبلد ابوه والشعب عبيد ابوه
مش ده الورث اللي سابه له ابوه
وترزية القوانين والدساتير فصلوا له كرسي يقعد عليه علي مقاسه
الحمد لله اننا لم نورث
وان شاء الله يابشار يافار
شعب سوريا هينتصر عليك ويخلعك شر خلعة انت والباقيين
يارب انصر الشعب الليبي والسوري واليمني
انك نعم المولي ونعم النصير
=======
الاخبار كتير والاحداث كتيييييييير
بس عايزة اكلم القناوية الاول
ماكنش العشم ياقناوية
بجد اللي حصل مش لايق علينا هنا في مصر
ماينفعش نعمل كده مع عصام شرف وماينفعش نعمل كده في بعض
يعني كنا بنتسحل ومابنتحركش ولما ربنا كرمنا
نسحل احنا بعض
حد هيقول لي اصل حاجز الخوف اتكسر
هقول في فرق بين كسر حاجز الخوف وبين البلطجه
كان ممكن ان مجموعة من كبار القناوية
وماشاء الله كتار
مع نخبة من الشباب يروحوا يقابلوا عصام شرف
ويتفاهموا معاه او يقابلوا المجلس العسكري
لكن كده تولع نار والدنيا تتعطل تاني
حد هيقول لي طيب فرضنا عملوا كده ومافيش حاجه حصلت
خلاص نبقا نعتصم برقي بس مانبلطجش
وياريت يبقا المحافظين بالانتخاب مش بالتعيين علشان يمشوا عدل
وياريت نحط في الاعتبار الصدمة من الشرطة
في الاحداث الغريبة المريبة اللي حصلت بطريقة منظمة
والرعب اللي عملوه للناس ولا العيال الصغيرة اللي بتلعب عسكر وحرامية
====
طبعا اخبار طره لاند ملعلعه ومنورة الدنيا وياريت بلاش اخبار استفزازية اللي مش عارفة مين بيطلعها
دول معاهم موبايلات دول عندهم ال سي دي دول بيكلوا دول بيشربوا
ونتلهي في الكلام ده عن انهم مع بعض في مكان واحد
ومامدي قانونية الكلام ده
ازاي امسك عصابة واحطهم كلهم في مكان واحد ماهيظبطوا تاني تظبيت عجب
ده غير التظبيط التاني اللي مانفعش وبرضوا اتعكشوا
====
ده غير اللعب بعواطف الناس ده مبارك عيط ومسك في السرير لما عرف انه هيتنقل ايه الكلام الخايب ده
بقا الجبار ده هيعيط ؟؟
طب مايعيط ماامهات الشهداء عيطوا لما شبعوا عياط
ماكل ام ابنها اوبنتها اتصابوا في عينهم رايحين جايين شايفنهم وقلبهم موجوع
يبقا نقول بلاش الكلام الخايب ده اللي مش هيخيل علي عيل صغير
وكان في خبر في الجرايد ان دكتور معدي من جنب السيدة الفاضلة (سابقا)
واستجري ورد علي موبايله
الحرس اتلف حواليه واخدوا منه الموبايل علشان شكوا انه صورها
وقامت خناقه ومااديلوش الموبايل الا لما تأكدوا انه ماصورهاش
ايه ده هو لسه في كده
=====
وزير البترول الحمد لله اتعكش ومش لوحده معاه كل المحاسيب الحلوين معاه
هو ده اللي المفروض يحصل مع اي وزير اتحبس علشان هو مش لوحده اللي كان فاسد حتي الفراش اللي علي بابه كان فاسد
=====
عندي زعل من بعض المصريين علشان همه مش فاهمين يعني ايه ثورة
مش معني ان قمنا بثورة اننا يبقا صوتنا عالي بطريقة غريبة في كل مكان
ونهدد بعض
مش معناه ان الحقوق بتتاخد بالدراع
في اصول للحوار وفي اصول لأخد الحقوق
ومش معني الثورة اني الغي الكبار ويبقوا اعداء
مش كل الكبار وحشين والكبار دول اللي برضوا ياما حاولوا يغيروا وتاريخ مصر مليان ناس اتسحلوا طلبا للحرية
الثورة ماكانتش شباب بس زي ماقلت قبل كده كان فيها جميع الاعمار والمستويات الاجتماعية والثقافية
====
موضوع المستشفيات اللي بتتعرض للبلطجة موضوع مش فهماه لحد دلوقتي واللي محيرني سكوت المجلس الاعلي والداخلية
طيب وبعدين ومين الناس دي
=====
ويعني ايه افتح قناة العربية الاقي اخبار عنوانها مصر بعد مبارك
وجايبين الفوضي اللي حصلت في قنا واسكندرية والمنيا وابو قرقاص .......الخ.
في ايه ياعربية ماتخليكي في حالك
====
وياتري حد فاهم ايه اللي بيحصل في ليبيا يعني ايه الناتو مش عارف يخلص الموضوع دي طرابلس مساحتها اقل من اصغر حي في مصر في حاجه بتحصل مش عارفة افهمها وزي كتير
====
اما سوريا فا بشار الفار قرب يخلص هو وحاشيته
والتوحش اللي هو فيه ده هو اللي هيخلي نهايته سودة زي حبايبه التانين
يعني كنت اتشطر علي اليهود اللي ماضربتش واحد منهم
====
اما علي صالح مش هقول له غير اللي اتقال له في مظاهرات النساء هناك
ياعلي استحي من نفسك

الاثنين، 18 أبريل 2011

مدد شد حيلك يابلد

مدد الله الله الله حي
الحكم العدل المتقم الجبار المعز المذل
اللي نسيتوه يارؤساء مؤبد
شدي حيلك ياسوريا
شدي حيلك ياليبيا
شدي حيلك يايمن
شدي حيلك ياجزائر
وللي بيقولوا ان ده مخطط وبيتنفذ في الوطن العربي ووراه قوي خارجية
مره يقولوا ايران
ومرة يقولوا امريكا واسرائيل
ماترسوا علي بر هي ايران ولا امريكا واسرائيل
لو ايران ماتنفعش في سوريا اصلا ايران تدعم اسم الله عليه بشارة الفار
وامريكا واسرائيل برضوا ماينفعوش هناك ليييييه؟
اصل لو جه حكم ديمقراطي صح في سوريا من الشعب وللشعب
اول حاجه هيدور ليه من سنة67 لحد النهارده
مااضربش خرطوش من بندقية صيد في الجولان علي اسرائيل
وكمان هيسيبوا لبنان في حالها والدنيا تهدي
طيب واليمن هي امريكا هتتخلي عن عليوة ليه ده هو ده اللي مظبطهم مع القاعدة وحبيبهم
زي اللي كان عندنا كان صمام امان اسرائيل في المنطقة
يعني اللي بيقولوا حد محرك الناس دي بقول لهم عيب عيب قوي
من كتر مااستحملنا رخامتكم وجباروتكم وقهركم لينا افتكرتوا ان مش هيجي يوم ونثور عليكم ونسجنكم كمان
الشعب العربي فاق والحمد لله
من غير اجندات من غير كنتاكي من غير 50 يورو او 60 دولار(مش عارفة اشمعنا الارقام دي:))
اللي حركه ايمانه بالله والقهر وعشقه للحرية
والاغنية دي بهديها للشعب العربي كله

الأحد، 17 أبريل 2011

نساء اليمن السعيد الثائر الان+تحديث

بشار النحس القي خطابين وقطع النت وبيقتل في الشعب
كده فاضل له ايه؟؟؟
فاضل كام خطوة علي نجاح ثورة سوريا؟؟؟؟
مبرووووك لشهداء سوريا الجنة
وياريت يبيضوا السجن هناك ولو مش هيلحقوا يبعتوه هنا
اهو يتسلي مع اخواته عيلاء وجيمي علي ما
علي صالح يجي ومالهمش دعوة بالعقيد انا حاجزة له في الموريستان عنبر الحالات الحرجة

شدوا حيلكم ياعرب

:))))
والله نساء اليمن جدعاااااااااااان
المسيرة النهاردة كانت شكلها يفرح
بتقل ادبك ليه مع النساء
اهو طلعوا لك بمسيره شبه مليونيه
وهيرفعوا عليك قضية وهيجرجروك في المحاكم
ابقا امسك لسانك شوية معاهم
-------
خبر الموسم
حل الحزب الوطني الديمقراطي فرحة في كل بيت في كل شبر علي ارضك يامصر
اتحل الجسم السرطاني اللي كان طابق علي صدرك وصدرنا
يحياااااا العدل
-----
التحقيق مع مني ومحمد ابناء كمال الشازلي قرينا علي الراجل وقلنا عيلته نفدت
:)))
وكمان مع احمد هيكل
البكرة كرت خلاص يامنز
عقبال حل المجالس المحلية اللي فيها فساد للركب علي راي المرحوم زكريا عزم (معلش شلت الياء علشان بتشائم)
وخير اللهم اجعله خير الست عائشة هيتحقق معاها بكره ان شاء الله خير و15 يوم يااخت عائشة
والجبلي بتاع العلاج علي نفقة الدولة بتاع الغلابه والتأمين الصحي لزوم ذل الغلابه
------
الدكتره بتاع سوريا النحنوح طالع النهاردة يجر ناعم مع الشعب ويتكلم علي الشهداء والمصابين ويقول انه والوزراء في خدمة الشعب والا مالهمش لازمة
اهو احنا هنمسك في مالهومش لازمة دي ويالة يادكتره اتكل وامشي ياسفاح
مين ماشفش الفيديو الوحشي بتاع كلابك وهي بتنهش في الشعب
مش هقول لك اتقي الله علشان انت ناسي ربنا اصلا
واللي يقتل شعبه خاين
-----
ورئيس الجزائر كمان طالع علينا يعمل نفس الحكاية
هو في ايه صحيح الشعوب العربيه سكتتلكم سنين طويلة لحد ماافتكرتونا عبط
بس احنا مابقيناش كده وعمرنا ماكنا كده
وليعلم كل رئيس منكم انه ماشي ماشي كان غيركم اشطر
وخصوصا عميد السفاحين العرب اللي في ليبيا
هتمشي ماشيه انيل من مشية حبيبك اللامبارك
قال وبتحضر جن يقاتلوا معاك الشعب العاصي المستبد
جتك ستين جن ينططوك
قال جن قال
بالزمة ده رئيس يحكم كفر مش بلد

الجمعة، 15 أبريل 2011


صباح الخير علي اهل بلدي والمجتمع والناس
اوووووووول جمعة من 25 يناير مايبقاش في مليونيه
الحمد لله خلصنا علي النظام اللهم صلي علي النبي
الريس بحكومته برئيس ديوانه بمجلسي الشعب والشوري
وسبحان الله كمال الشازلي نفد بجلده

ونستخلص من كل ده ايه اننا كنا شعب نايم علي ودانه
ولي رجاء عند رئيس الوزراء
بمااننا لاغينا محافظة اكتوبر ورجعنا حلوان للقاهرة
يتم جميله بقا ويلغي محافظة المنوفيه

:))
وده اجراء احترازي علشان المحافظة ماتبعتلناش رؤساء تاني
بجد المحافظة دي تعبتنا كتير
:))
بالمناسبة حد له تعليق علي حركة المحافظين !!؟؟
التوليفة غريبة صح؟
وصباح الحرية اللي بينادي في كل شارع في بلادي
وياجمعة الحرية


الأربعاء، 13 أبريل 2011

بوست البوستات بقا+تحديث


ايه موضوع الشماته دي اللي ماشي في البلد النهاردة
واحدة تقول لي انتي فرحانة اوي كده ليه ده حرام
واللي تقول لي احنا منهيين عن الشماته
في ايه ياشعب مصر
انتوا خايفين تفرحوا بنصر الله
خايفين تفرحوا انكم اسقطوا اقوي عصابة علي مر التاريخ
حد مستوعب يعني ايه رئيس دولة برئيس ديوانه بأولاده برئيس مجلس الشعب
علي رئيس مجلس الشوري ورئيس وزراء بأغلب الوزراء مع كبار الاعلاميين بخمس مديري امن ورجال اعمال علي نواب في مجلس الشعب
دي هيصة دي ماتعملتش في الملكيه
وبعد كده يتقال للفرحة شماته
عجبت لكم يامصريين
ولو هتعتبروا الفرحة شماته ماشي نمشيها شماته ولاتزعلوا
======
مبرررررررررروك سيد قراره خد 15 يوم
مبروك يافتحي سرور مبروك
تصدق جاز فيك دعاء البوست ده
فاضل الاخ فاروق حسني اللي راح اتحقق معاه والوحيد اللي رجع
نفسي يتحقق معاه بسبب المعرض ده بس
:))))
=======
خبر ماكانش ينفع فيه تحديث
السيدة الفاضلة بيتحقق معاهاااااااااا
ايه الحلاوة دي يامصر
كده صدقت ان مصر فيها سيادة قانون
وان مافيش حد فوق القانون وكله هيتحاااااسب
واللي جاي هيعرف ويعمل حساب لا مليون حساب للشعب الجميل ده
وبقول للي كانوا بيقولوا كفايه عايزين ايه تاني كل مااللامبارك يطلع يتسهنت في خطاب كاتبهولوا دكتور نفساني (ماهو كان خايف من كم الفضايح)او لما شوية الفاسدين اللي اتلموا في سجن يرموا لنا لقمة تغيير هنا علي علاوة هنا
الحمد لله اننا صمدنا وصممنا لحد ماالحمد لله كله اتعكش واتلم
اللهم لك الحمد والشكر حتي ترضي
ومبروك علي مرتضي منصور شاه بندر المحاميين ال15 يوم اللي اتلطشهم علي زمة التحقيق
اللي شتم في الثورة وسلط عليها البلطجية
واروح ازووووورالجرحي في القصر العيني
الاقيه مسرح محاميينه علشان يلموا توكيلات
علشان قضايا التعويضات مستند لجهل المرضي بالقانون
والحمد لله اننا ضيعنا عليه الفرصة
ومسجلة الكلام ده فيديو وكمان معايا نسخ من الورق اللي كانوا عايزين يمضوا عليه المرضي وعندي الشهود عليه
ماما وصديقتي واولادي كيارا وازهري
الحمد لله اهو ظهر علي حقيقته
مليون مبروك علينا الثورة الحمد لله
باقي شوية ركش سهلين هيتلموا
وادي سيد قراره بيتحقق معاه دلوقتي
حد هيقول لي مين الباقي ؟
هقول عمر سليمان بتاع اليهود
واحمد شفيق وندر عليا هوزع بونبون علي طلعت ال15 يوم بتوعه
وكمان هلال وسامح فهمي اللي عايز نائب خاص له لوحده
وان شاء الله بالتحقيق مع كل دول هيتجاب صبيانهم اللي بره اللي عمالين يخربوا ويبهدلوا الدنيا
يخرتكم اكتر من كده احنا كنا مسلمين البلد لشوية عصابة ولا عصابة خط الصعيد
وبكده نفوق بقا للبلطجيه اللي طايحين في البلد
علشان نعرفهم ان البلطجيه الكبار خلاص اتعكشواومش هينفعوهم
الله اكبر الله اكبر ولله الحمد

الاثنين، 11 أبريل 2011

صدق او لاتصدق+تحديث:)+تحديث2+تحديث3+تحديث4!!!!؟؟؟؟

صحفي علي الجزيره سيتم استدعاء الرئيس المخلوع ونجليه للتحقيق في موقعه الجمل بناء علي اقوال صفوت الشريف
==
مش عارفة ليه اللي بيحصل النهاردة فكرني بفيلم الناظر صلاح الدين
والاصلاح اللي كان عايز يعمله
والثورة المضادة وخطف الطلبة علشان مايوصلوش المسابقة :))))
=====
عجبني بيان وزير العدل

وياريت كل يوم يتعمل بيان كده ومايسبوش الناس للأشاعات والقيل والقال
ياريت نعرف ايه اللي بيحصل في كل محافظة مع القيادات اللي ضربت المتظاهرين
ماهو الثورة والمتظاهرين والمصابين والشهداء ماكانوش في القاهرة بس
لا كانوا في كل شبر في ارض مصر
=====
من صفحة وزارة الداخلية

حبس الرئيس المخلوع وولديه 15يوم علي زمة التحقيق
وياتري الحبس هيكون فين في القصر ولا المستشفي
وبرضوا ياتري السيدة الفاضلة هتتشحطط بين السجون زي مانساء السجناء السياسيين واللي اتلفق لهم تهم كانوا بيتبهدلوا برضوا
=======
بالنسبة للزيادة او العلاوة اللي اتعملت وزادت الاسعار قصدها بنسبة اكبر منها
انا كان عندي ثبتوا الاسعار وماعملوش العلاوة
مش هقول خفضوا الاسعار
يامعين يارب
=====
زعلت من موضوع ان طلعت السادات بقا رئيس الحزن اللاوطني
مع اني كتبت له علي الفيس نصيحة بلاش
بالذات انت بلاش
دول ياما بهدلوك هتروح عندهم تعمل ايه
دول بيستغلوا اسمك
اكيد انت عارف بتعمل ايه بس ياريت تطلع تقول للناس ليه عملت كده
========
بعدين بقا في الدلع اللي يقلق ده
هو مبارك يتنقل المستشفي تروح له لجنة التحقيق كده علي طول
ولا دي متطبخه ولا ايه
اللي اعرفه انه يدخل المستشفي يطلع تقرير
تتشكل لجنة تسافر اللجنة
كل ده حصل في كام ساعة
والله الطب اقدم يارجالة الراجل اغمن عليه ودخل العناية وفي الاوام اوام فاق واتحقق معاه
طيب والكابتن جيمي برضوا كا في العناية وعلشان الظروف العوائليه برضوا
ماهو لازم يقعد جنب الوالد
اشتم شئ غريب مريب
حد شامم زي؟؟
======
يامسهل
هي الاشاعات كترت ليه عايزين نعرف صح ولا غلط
ان مبارك اتحقق معاه
ان جمال وعلاء اتحقق معاهم وجمال اخد 15 يوم
وان مرتضي منصورا اخيرا اتعرف انه مشترك في واقعة الجمل
وان شاء الله عقبال السيدة الفاضلة ماتتجرجر زي ماجرجرت ناس كتير
السهتانة الهادية دي
وسيد قراره ربنا يكرمه بكره الشهير بفتحي سرور
ده ليمان طره سابقا طره لاند الان هيبقا منجهه
:))))
============
:)))))
الريس السابق اللامبارك
هيضرب شهادة مرضية
:))))))
تويتر بيدعي للريس مايموتش
:))
ماتخافوش ده النائب العام لما يحاسبه خفيف خفيف
لكن ربنا هيحاسبه بالكتاب المرقوم
يعني صاحي هيتحاسب ميت هيتحاسب
يخرب شيطانك يالامبارك
:)))
=====
حد يرد عليا صدق ولا كدب
الشرررررررررررريف شرف علي البوووووووورش
بجد ولا هزااااااااااااار
هذا الصامد الشامخ اللي مش علي راسه بطحه
علشان ماعندوش راس اصلا

السبت، 9 أبريل 2011

كلنا شركاء+تحديث1+تحديث2+تحديث3+تحديث 4+تحديث5


ايوة كده ايوة يادنيا
القبض علي رجل البلطجة الاول ابراهيم كامل لتورطه في احداث امس
انا قلت من الاول دول مش ظباط
هو في ظابط بيطول شعره كده وخصوصا لما يكون لسه ملازم
ولا في ظابط بيربي سوالف
ده غير الغلطات اللي في الزي العسكري
سؤااااااااال علي الماشي
اللي لسه بيدافعوا عن اللامبارك بيدافعوا ليه؟؟
وعلشان ايه؟
ماهو كويس اهو وصوته كله عجرفه وقوة يعني مش عيان يعني
======
ده ردي علي واحدة علي الفيس في جروب من الجرررررارييييب
زعلانة مني علشان الصورة دي واني بشتم مبارك
وبتقول من حقه يطلع يدافع عن نفسه انا زعلانة ليه مايحكمش
(صح من حق اي واحد يدافع عن نفسه صح ماالبجاحه لها ناسها فعلا وهو بصراحة بجح بجاحه ماشوفتهاش الحقيقه وان شاء الله النائب العام استدعاه علشان يعرف منه جاب الاموال دي كلها منين وليه امر بقتل شباب مصر والنائب العام لايستدعي الا من ثبتت ادانته وخصوصا لما يكون رئيس جمهورية سابق وماحدش راح عنده الا وخد 15 يوم علي زمة التحقيق وبتتجدد ولما احب ادافع عن نفسي مااكدبش وماهددش ولما احب ادافع عن نفسي مااطلعش في قناة يملكها صاحب العزة والفخامة اللي هربت فلوسي بأسمه وان شاء الله هيروح مزبلة التاريخ زيه زي هتلر)
=======
نسيت اهنيكم بتشريف نظيف علي البوووووررررش

=====
النائب العام يرد ابلغ رد ساحق ماحق

استدعاء اللامبارك ونجليه للتحقيق غداااااااااا
طيب والسيدة الفاضلة اخبرها ايه واخبار فلوس القاءة للجميع وفلوس مكتبة اسكندرية
======
كل الشباب رايح الان علي ميدان التحرير يشوف ايه حكاية الخطاب الخايب من هذا الرجل الخايب(ايوة بشتمك ارفع عليه انا كمان قضية)
طالع علينا يقول انا جدع وهربت كل الفلوس والممتلكات بأسماء اصحاب الفخامة والعزة والهيلمان
واشمعنا الكلمة تتذاع من قناة سعودية
طيب انت شريف وباقي العصابه شرفاء يبقا احنا الشعب المصري اللي طلعنا وحشين وحرمية
طيب ندااااااء
لكل المصريين في جميع عواصم العالم النهارده ويييك اند ياريت تلموا بعض وتتظاهروا امام املاك اللامبارك واسرته وحاشيته واللي معروفه للجميع
وياريت الهتاف يكون املاك الحرامي اهي
وحسبي الله ونعم الوكيل
في كل من ساعد هذا الحرامي في تهريب مال الشعب المصري
وعلي فكره اللي بيجي علي الشعب المصري مابيكسبش
والدليل الشلة اللي مشرفة في طرة لاند الان
ومنك لله يالامبارك حرقت دمي علي الضهر
==========
شكل هذه الاعداد الكبيرة في ميدان التحرير بالتليفزيون
(للأسف ماقدرتش انزل)
خالاني احس اننا كلناشركاء
لييييييه؟؟
عللشان احنا سكتنا30 سنة(بتكلم عن جيلي)لحد ماالدنيااتخربت
سكتنا ليه مش قادرة اجد تفسير
وزعلت من موضوع الظباط واللي حصل من ضرب للمعتصمين بغض النظر انهم مش ظباط وان رجل الاعمال ابراهيم كامل مسلطهم
-----
زعلانة جدا ان ابو الفتوح قال انه هيرشح نفسه للرئاسة ومستقل
وماحدش يفهم غلط انا مش ضد ان اي حد يرشح نفسه اطلاااااااقا
لكن الاخوان قالوا من الاول ان ده شئ بعيد عن حسباتهم ومش بيفكروا فيه
يعني رجعوا في كلامهم وده اللي مضايقني
-----
موضوع الشيوخ اللي فجأة بقوا سياسيين برضوا مزعلني بلاش التحكم في عقول الناس بالدين
بلاش نظام غزوة الصناديق واللي معانا مع الدين واللي مش معانا كافر ويخرج بره في كندا وامريكا
بلاش ندخل الدين في لعبة السياسه الغير شريفة والتاريخ الاسلامي والدول الاسلاميه موجود وتاريخ الاندلس موجود والامجاد اللي ضاعت بسبب شهوة الحكم والجلوس علي الكرسي للي عايز يقرا
مش دايما النوايا بتبقا حسنة
-----
موضوع صلاة الجمعة ده كمان مضايقني جدا
الشباب ينزل من بيته معاه السجادة ويتجمعوا علي الناصية يفضلوا يرغوا ويضحكوا واول ما الامام يقيم الصلاة يجروا يفردوا السجادة ويصلوا
حسب علمي صلاة الجمعة مش كده ابدا لابد من الذهاب الي المسجد علي الاقل مع الاذان
وصلاة تحية المسجد وسماع الخطبه في سكون وسكووووووت
ليه المشايخ في الجوامع ما بيلفتوش نظر المصلين لده زي كده ما دايما الامام يذكرنا بكيفية صلاة الجنازة كل مانصليها
ليه مايبقاش اخر تلات دقائق من الخطبه تعريف المصلين بحكم صلاة الجمعة
---------
اندهشت جدا من كلام زكريا عزمي ان هو اي حد يمتلك كام فيلا علي قصر يبقا مرتشي!!!؟؟؟
عايزة اقول له اللي اختشوا ماتوا
لا يبقا كميلة وزي الفل
ويارب الجمعة الجاية تعدي علي خير ويارب اشوف الشريف واعوانه وسرور واعوانه وكل فرد فاسد من النظام اللي بنحاول نخليه سابق
-----
ومش هنسي سفاحين الوطن العربي بشار وصالح والقذافي
ربنا ياخدكم ويريح الوطن العربي منكم
مش مصدقة اللي بتعملوه في شعوبكم وبفلوسهم
يارب انصر الشعب العربي

الأربعاء، 6 أبريل 2011

ياوزير الداخلية

ياااااااااااااوزير الداخليه استبشرنا بيك خير
ولكن جرائم وحوادث وبلطجه في كل مكان
طيب ليه ماتتخلصش من عربجية العادلي في وزارتك
يعني ايه قنبلة تدخل منطقه اثريه
تصدق شايفه من مكاني هنا اللامبارك واعوانه بيضحكوا علينا وبيطلعو لنا لسانهم
طول مافي مصريين بيعبدوا القرش والشر ياماهنشوف
ايه يعني البلد خلاص للدرجه دي في عصابه صعبان عليهم ان مصر تبقا حره
----
العداله اللي راكبه توكتوك هي اللي عملت كده
لو كل الناس دي اتلمت مره واحده لو اللي عملوا موقعة الجمل اتقبض عليهم من ساعتها واتحكموا وطلعوا في التليفزيون واتفضحوا زي برامج وراء القضبان
ماكنش حد اتجرء علي مصر وشعب مصر
----
ياريت نغير السياسه بقا وبلاش الحنيه الزايده دي في النهايه دول شوية مجرمين بيفسدوا في مصر
ياريت نفضح كل اللي بيعمل حاجه
----
ولا هي يااتجبر واسرق واحكمكم واقعد علي قلبكم واورثكم لأبني وليكم الامان
يا لو اتنمردتوا هقلبها لكم فوضي وايام سوده علي دماغكم
قال يعني لما كان موجود كان في امان
ياريت نرجع لصفحات الحوادث علي جميع الجرايد ونشوف
----
حسبي الله ونعم الوكيل
محروسه يامصر

الثلاثاء، 5 أبريل 2011

ياتري ياهل تري:)+تحديث من عند ازهري

ياريت نتطلع علي البيان ده من عند ازهري
الصورة دي لاقيتها علي النت اللي عملها شاااااطر جداااا

مشرفين في السجن بعون الله
=======
ياتري ياهل تري فعلا فعلا
جيمي اللامبارك والثلاثي المرح هيروحوا جهاز الكسب غير المشروع ولا لأ؟؟
طيب لو مارحوش هيعملوا فيهم ايه؟؟
طيب واشمعني الاسبوع القادم لجيمي ممكن حد يفهمني؟؟
واللي يعيش ياما يشوف صحيح سبحان المعز المذل
وممكن اعرف لو حد عرف يعني يعرفني هل تم محاسبت اي حد من اللي تسببوا في مهزلة ماتش الزمالك وتونس
وماحدش يقول لي اصلهم لسه بيحققوا ولسه مايعرفوش مين
طيب علي الاقل حد يسأل بتوع قسم تاني م نصر
ليه مااتصرفوش لما مدير الاستاد عمل بلاغ باللي حصل الصبح قبل المباراة
ياريت مانخبيش الراي العام عايز يعرف ايه اللي حصل
مع الوضع في العلم موقف الاخين الحلوين حسام وابراهيم من الثوار والثورة
وتابعهم مرتضي منصور
ولو حد يعرف يفهمني ليه الحرص علي استمرار الدوري رغم المؤامرات المحيطه وغياب الشرطه

الأحد، 3 أبريل 2011

حقكم علينا ياتوانسه ياخوتنا واهلنا+تحديث

======
ماتش النهاردة واللي حصل فيه
لايمكن هنصدق ان دول شباب الثورة اللي اعتصموا في التحرير وكانوا قمة التحضر والرقي
للدرجة دي العصابه هتموت نفسها علي الانتقام
المطلوب ان مصر وتونس يقعوا في بعض
ويتقال ادي مصر وتونس الثوار وقعوا في بعض
ده طبعا بعد ما التوانسه يضربوا المصريين اللي عندهم
اللي داخلين هربانين من ليبيا
ويطردوهم
وبكده يبقا شباب الثورة طلعوا مجرمين وبلطجيه في البلدين
لعبة خسيسه وهبلة وقديمة ومش هتنطلي علي عيل صغير
وشكر خاااااص للشرطة المصرية اللي عايزة صلح مع الشعب
مش عارفة بأمارت ايه
بلطجيه في الملعب بشوم وسنج ومطاوي
طيب واخرتها ياشرطة ماهو مصر مش هترجع لما قبل 25 يناير تاني
فاياريت تلموا الدور بقا وكفاية كده
عيب شكلنا بقا وحش قصاد العالم
ولا هو لوي دراع
وعايزنا نغني لكم
ده احنا من غيرك ولا حاجه وناقصنا كام مليون حاجه
وبقول للبلطجيه المصريين
حسبي الله ونعم الوكيل فيكم
بكره لما تخلص الفلوس اللي اخدتوها وتفقوا مش هتلاقوا لكم عيش بينا
واللي اتوعد ان ملفه يتشال ولا كأنه كان مجرم ولا حاجه
هيضحك عليه وهيضحوا بيه كمان

الجمعة، 1 أبريل 2011

ماشاء الله

ميدان التحرير النهاردة رغم الحر الشديد
كان جميل
صحيح عظيمة يامصر
عظيم ياشعب مصر
وان شاء الله خير
والحمد لله علي الانفلونزا الفظييييييعة
المريعة
:(