الجمعة، 31 أكتوبر 2014

طظ فيكم بقا :)

مساء اي مساء بقا
عليكم
و
بالبلدي بقا كده 
موضوع سيناء ده
علشان انا زهقت
اللي عنده مصالح وسبوبه 
ونفقين تلاته مظبطينه فلوووووس
مهيص الدنيا وبيولو وبيندب 
ويقولك حقوق ومش حقوق
واللي مالوش في ده موافق ومبسوط 
ومش فارقة معاه
و بيضحي علشان الكلاب اللي بتنهش فينا تغور 
 ايام الحرب مع اسرائل
 مدن القناة اتهجرت واتوزعت علي الجمهورية 
علشان عبد الناصر يستفرد بالصهاينة 
وماحدش اعترض  ولا لولو
ودي مدن بحااااااالها
وانتوا بتولوا زي البغبغانات 
علي الرجوع في نفس المكان شوية 
ده ايه النيلة البني دي
مش قلتلكم 
لو اللي موجودين دلوقتي 
همه اللي كانوا في 67 
ماكناش عبرنا وانتصرنا
 ارحمنا يارب

الثلاثاء، 28 أكتوبر 2014

سيدنا يوسف

صباح الخير عليكم
المفروض النهاردة كنت اكتب عن
مرض  m..s
بس مش مشكلة
المرض مش هيطير
بس اللي هيطير نافوخي من راسي
لييييه؟
علشان الفتي في كل حاجة في اي حاجة عن اي حاجة
خلاص كلنا بقينا كده
ولا استثني احد حتي انا
بس في حاجات ماينفعش
ياعم عايز تشتم اشتم انت حر 
انت اللي هتتحاسب مش انا
اشتم في كل حاجة في اي حاجة
بس موضوع سيدنا يوسف والقضاء الفرعوني
قال يعني بقا القضاء المصري من ايام الفراعنه فاسد
ويشتم في الجيش ولما تقوله ماده الجيش اللي عبر في 73 جيش الانتصارات يقولك لا ده غير ده
اشمعنا الجيش اتغير من 41 سنه
والقضاء مااتغيرش من 7الاف سنه
اه يامررتي اللي شيلاها اصلا
طيب ياعم
ماشي
بس كله الا سيدنا يوسف بقا
سيدنا يوسف دعا الله وقال
(قَالَ رَبِّ السِّجْنُ أَحَبُّ إِلَيَّ مِمَّا يَدْعُونَنِي إِلَيْهِ ۖ وَإِلَّا تَصْرِفْ عَنِّي كَيْدَهُنَّ أَصْبُ إِلَيْهِنَّ وَأَكُنْ مِنَ الْجَاهِلِينَ)
جميل
يعني السجن هنا دعوه من نبي واستجابه من الله
جميل
سيدنا يوسف اتربي في قصر منعم مرفه
والنبوة مش امر سهل فاكان لازم يخشوشن كده
ولازم القصة تكمل ويتحافظ عليه يعني مليون سبب
وفوق ده كله ربنا عايز ده
ومش هفتي ادخلوا شوفوا 
الشيخ الشعراوي فسر سورة يوسف ازاي
وليه سجنوه رغم علمهم انه برئ 
لأنه كان عامل فتنه
ماتخلطوش ابو قرش علي ابو قرشين
واشتموا بس بعيد عن الانبياء والرسول الله يخليكم
وماتنسوش سيدنا موسي اللي قتل واحد في خناقة
وربنا خلاه يطلع الصحرا وهو المرفه المتربي في قصر الملك
ده برضوا القضاء اللي عمل فيه كده
ياناس ارحمونا بقا
وفوتكم بعافية 
ياسااااااااااااااتر

الأحد، 26 أكتوبر 2014

ام اس ...m s

صباح الخير
النهاردة جايه اشاركم
حاجة كتير من المصريين مايعرفوش عنها حاجة
وكتير بينا عندهم ومايعرفوش
وللأسف كتير بيتعالجوا
بس من حاجات تانيه وهو عندهم
وعلي مابيتم اكتشافه
بيكون المريض تعب جدااااااا
هتكلم النهاردة عن تجربتي معاه
وبعد كده هتكلم عنه
علشان تاخدوا بالكم
بنتي الكبيره تعبت من سنين طويله
وتم علاجها
من التهاب الاذن الوسطي
من تعب في المعدة
من الضغط المنخفض
من ضغط العين
من القولون
من المعدة
من الاكتئاب
الي اخره
الي ان شكيت انه ممكن يكون حاجة في اعصاب المخ
اه والله انا اللي شكيت
ورحنا لدكتور مخ واعصاب وطلب اشعات اوليه
ولما عملناها طلب اشعة متقدمه علي المخ
وربنا فتح عليه وقال ده
للأسف حاجة اسمها ام اس
التهاب او تصلب الاعصاب المتعدد
وكانت صدمه
لأن طبعا عملنا بحث عنه
ووجدنا انه مالوش علاج
وكل اللي بيحصل
ان يامرض يالعين بدل ماتدمر الانسان ده في عشره خمستاشر سنه
دمره في 50
يعني العلاج تجميد نشاط المرض فترات
وطبعا عملنا كل شئ 
وبعتنا الاشعات والتحاليل بره مصر
نفس الموضوع مالوش علاج
ومشينا علي الطب البديل بتاع الاكل وتنظيم الاكل
وكان هيتنصب علينا ونسافر بره نعمل نقل خلاية جزعية
ولو تفتكروا
المدونة ام البنات
 كانت معايا في الطلعة دي 
------
في النهاية وبعد ست سنين
ماشين مع دكتور بقالنا سنتين
اشتركت بنتي علي جروب علي الفيس عاملينه جمعية مرضي الام اس في مصر
ومن خلاله عرفنا بوجود مركز للمرض
في القصر العيني
تم افتتاحه من 2011
ترددنا اننا نروح
في النهاية قلنا بجملة اللي اتعمل
رحنا لاقينا حالات اسوء من بنتي كتير
وادهشني اهتمام الناس هناك بالمرضي
وقابلنا الدكتوره رشا والدكتور حازم
في الاول
واخدوا معلومات من بنتي عن تتبع الحالة
بهتمام شديد 
وبعد كده قابلنا الدكتوره
 نرمين عادل
ماشاء الله عليها انسانه قبل ماتكون دكتوره
وطلبت تحليل للأسف مابيتعملش غير في البرج
وكمان البرج بيعمله بره مصر
وطلبت اشعه اكتر تخصص من اللي عاملنهم قبل كده علي العين
علشان بنتي عينيها متأثره جدا
وقالت لازم نعلق كرتيزون لمدة 5 ايام
علي ماالتحليل اللي هنستلمه يوم 17 /11 يطلع مع الاشعة
علشان نحدد خطة العلاج
لأول مره بعد 16 دكتور احس ان في حد فعلا فاهم يعني ايه طب
يعني ايه ام اس يعني ايه خطة علاج
القصة بقا هتبتدي من هنا
قلنا لها مش هنعلق محاليل هنا في القصر العيني
وعايزة اقول ان المركز بيقدم كل الخدمات لهذا المرض اللعين المكلف ببلاش
يعني مثلا في تحليل للنخاع الشوكي بيتكلف 15 الف جنيه بيتبعت فرنسا ويرجع
بيعملوه للمرضي ببلاش
التحليل كمان اللي اتطلب مننا ده بيكلف 750 جنيه احنا عملناه في البرج
بس المركز بيعمله ببلاش
وتعليق المحاليل برضوا بيعملوه ببلاش
المرض ده مكلف جدااااااا
وهمه بيقدموا الخدمات دي كلها ببلاش
عمار يامصر
المهم
الدكتوره قالت مافيش مشكله هكتب لكم روشته تفصيليه عن كيفية تعليق الكرتزون وايه الادوية اللي هتبقا معاه قبل ومع المحلول
وشكرناها ومشينا
وتاني يوم ابتدت خطة البحث عن مكان نعمل فيه التحليل وجدنا ان مافيش معمل بيعمله الا البرج
عملناه وان شاء الله هناخده 17/ 11
وطلعنا علي دار الفؤاد نعلق المحاليل
وهنا كانت المفاجأة
رفض دار الفؤاد يعلق لها المحاليل
ليييييييييييييه؟
ياعم
مابنعلقش محاليل لعلاج جاي من بره المستشفي
ياريس دي روشته مختومه من القصر العيني يعني جهه حكوميه
وكمان المركز الاوحد في الشرق الحكومي لهذا المرض
طب انت تعرف يعني ايه ام اس
لا
طيب هتلي حد اكلمه
لأ
ماكنتش عايزة اوتر بنتي
مشيت وكلمنا مستشفي الصفوة
مارضيوش يقولوا 
لأ
لكن بعد مراوغة
قالوا مافيش سراير فاضيه
ورحنا مستشفي الوادي ب 6 اكتوبر
مستشفي جميله ولا امريكا
بجد مش هزار 
كنت مستغربه ان المستشفي دي في مصر
المهم دخلنا الاستقبال
قابلنا موظف من حزب اعداء النجاح
قال لنا 
لأ
هنا انا بقا انفعلت
قلت له انت دكتور
 قال لأ
قلت له يبقا بتقول لأ ليه 
هو انا جايه اعلق لها مخدرات
قال ماينفعش نعلق محاليل الا بناء علي كشف عندنا
قلت لها انت عندك دكتور مخ واعصاب الان
ولو عندك متخصص ام اس
ولما لقاني ابتديت انفعل
قال طيب هاتي الروشيته
ودخل كلم الكتور الموجود ورجع قال
طيب هنعلق لها المحلول
دخلنا نعلق المحلول بصراحة الناس لطيفة وجميلة
ومتعاونه
وزي الفل مش فاهمه سايبين هذا الانسان معاهم ازاي
علقوا لنا المحاليل
وبعد ساعتين قلت لبنتي ايه ده دول ماطلبوش فلوس
استغربت ولما سألت التمريض قالوا
عادي وحضرتك خارجه هتحسبي
!!!!!
هنا في مصر
!!!
ماعلينا
الموظف ده عمل معانا مشاكل طبعا علشان هو صعب عليه انه يقول لأ والدكتور يقول اه
عمل ايه بقا جايه احاسب
فابديله كارت التأمين الصحي بتاع بنتي
اللي هو (في اي بي) وكمان من غير اي موافقه
ومكتوب فيه ان الشركة موافقه علي اي علاج لصاحبته وفورا
وده مخصوص لبنتي علشان حالتها
قالك 
لأ
احنا مش متعاقدين مع شركة التأمين دي
قلت له ماشي وحاسبت كاش ومشيت
تاني يوم رايحين نعلق اليوم التاني
كان الباشا مش موجود فاعلقنا المحاليل
وطلعت للموظف اللي مكانه
قلت له انا لاحظت غلط في الحساب امبارح
انكم مش محاسبين علي حقنه من الحقن
ولا ده تخفيض علشان كارت التأمين احب اعرف
قال لي انتوا معاكم كارت تأمين
قلت ايوه
قال لي اومال حاسبتوا ليه
قلت له الموظف بتاع امبارح قال انكم مش متعاقدين مع الشركة دي
قال لي استأذن حضرتك في الكارت
ولما اديتهوله
قال مين قال ده كرت مخصوص كمان
ورجعوا لي فلوس امبارح
تالت يوم لاقيت واحد من اصحاب المستشفي
جاني وبنتي معلقه المحاليل
دكتور بشوش جدا ومؤدب ورجل كبير
واطمن علي بنتي واعتذر لنا عن اللي حصل من اول رفض تعليق المحاليل الي غلط الكارت
وقالي ان الموظف اخد جزه
وقال من حقها تعلق في اي مكان في مصر
والموظفين في الاستقبال عادتا مش عارفين حاجة
ولا يعرفوا يعني ايه ام اس
وقالي المكان مكانكم تشرفونا في اي وقت
ولا حول ولا قوة الا بالله
دي حكاية مختصره عن الموضوع
معلش اول مره اكتب تدوينه كبيره بس ماكنش ينفع تتجزء
ان شاء الله هكتب عن المرض نفسه
لأني بلاحظ ان كتير بيصحوا من النوم مصدعين ومقريفين ومش طايقين نفسهم
وممكن يكون المرض
 

الأحد، 19 أكتوبر 2014

الوفد

صبااااااااح
ان شاء الله الخير
امبارح كنت في اجتماع لدفعتي بتاعة
الكلية
بنقابة الصحفيين
طبعا انا لا بشوف برامج
توك لوك لوك
ولا اي حاجة في اي حاجة
من الهري اللي حاصل ده
المهم
تقولوش رزقي في رجلية
لاقيت وقفه علي سلم النقابة
ليييييييييه
اعضاء من حزب الوفد
معترضين علي ان بتوع الحزب الوطني
هينزلوا الانتخابات
علي قائمة الوفد
خاليكوا عمالين تتخنقوا
والعالم دي شغاله علي نار هااااااديه
همه والناس اللي اغلب المجتمع مش طايقنهم
لو ماانتبهناش
هنتخبط في حتت برلمان
مانعدموش
او نعدمه
قولوا ان شاء الله
برااااااحتكم
انا اصلا لحد دلوقتي دائرتي كل اللي بيفرش لنفسه
حزب وطني
ومتأسلمين
مش معروفين
وفوتكم بعافية ياشباب الثورة
(اللي طلعوها مش ثورة)
وياشباب البلد اللي عايزين يغيروا
وهمه قاعدين ورا النت
في حين
الناس اصحاب الاصوات
مايعرفوش يعني ايه نت
اصلا 
ولازم نؤمن ان الشارع هو الحكم
وان كنت من من يعتقد ان تمرد
عمل مخابراتي 
يبقوا برافوا عليهم
عملوا اللي انت مش عارف تعمله
نزلوا للناس واقنعوهم
خاليكم قاعدين
فوتكم بعافية
ده لو اتسابت لنا

الجمعة، 17 أكتوبر 2014

فاااااااااااااتيما ويووووووسف

الليلة ليلة هنا وسرور
تاتاتا....
ليييييييييييه؟
علشان 
ام قلب دهب
صبرت كتيييييييييييير
واحتسبت
وقااااالت ياااااااااارب
وربنا قال
(وبشر الصابرين)
وجتلها بشرة الصابرين
ربنا رد لها
ابنها يوسف
بمعجزة ولا كل المعجزات
والحمد لله
قرت عينها بشوفته
وقلبها ارتاح
اااااااااالف مبروك

ربنا يسعدك يافاتيما
وتنعمي بالراحة والسلام والامان
والاستقرار
مع روح قلبك
يوسف باشا
الحمد لله

الأربعاء، 15 أكتوبر 2014

لسه فاكرين

صباااااااااااح الفل
لسه فاكرين ياحكومه
:)
طيب انتوا لسه فاكرين 
التدوينة 
اااايوة بتاعة الحشيش
:)
قال ايه بقا اخيرا الحكومه جابته
طب مااليافطه متعلقة في جسر السويس
يابا الحاج والرجل ماانكرش وعلي عينك ياتاجر
ماعلينا
الخبر 
والغريب المريب ان الشرطه لابسه اسود
يعني اتقبض عليه ساعتها في شهر ابريل
ولسه فاكرين ينزلوا الخبر
هم يضحك وهم يبكي 
فوتكم بعافية
:)

الثلاثاء، 14 أكتوبر 2014

ياااااااااااااه

يااااااه 
انا بقالي كتير ماجتش هنا معقول كده
نقدر نقول سدت نفس
او
المشاعر اكبر من اني اجي اكتبها هنا
يمكن علشان الكلام
مابقاش ينفع يعبر
يمكن علشان زهقت من الكلام
يمكن علشان خلاص مش مهم
ومافيش حاجة هتتغير
واهو تسليم للواقع
ماااااعلينا
الاهم ان مدونتي وحشتني
جدااااااا
ويوم 13 اغسطس اللي فات
تمت 6 سنين 
واصلا انا نسيت اجي واعمل لها احتفال
:)