الخميس، 29 نوفمبر 2012

حملة التدوين اليومي : الزوجة الذكية والحلابوظا

يااااااااصباح الجووووود موووورنج عليكم
*********
كنا قاعدين مجموعه من الشباب والشااااااابات 
وانا العجوزة الوحيدة فيهم
وقلت لهم مش هنتكلم في السياسة
ومن هنا لهنا
قلت لهم عايزة اعرف حاجه من الشباب
لما تحب تختار زوجه
هاااااااااتخترها
شخصية  ذكيه لماحه دمها خفيف وجمال عادي
ولا
 مالهاش راي ولا فكر ولا ليها اي حاجه في اي حاجه 
حلابوظا خالص يعني
ولكن جميلة جمال خاااااارق
الاجابات صااااااااااااااااادمة
تلاته عايزنها امينه 
علشان الحياة مش ناقصه مناهده ووجع قلب
مع العلم ان امينه خرجت من غير اذن سي السيد 
ولولا رجلها اتكسرت 
كان سي السيد لبس السلطنيه
اومااااال
واتنين لأ 
عايزنها شخصية ودمها خفيف ولماحه
بسسسسسسسسسسسس
مش عليه 
يعني ايه ياابا الحاج
يعني برضوا مش عايز مناقشات بقا وحوارات
اومال عايزها شخصية ليه بس
ايوة هو انا هعيش مع تمثال جميل وبس
مش لازم يبقا في روح كده وحركات
عارفين
بعد ما دوخوني
وطبعا قامت حريقة بين الفتايات والفتيان
:)
قلتلهم اتكلموا في السياسة اسهل
:)
صباح الهنا عليكم

الخميس، 22 نوفمبر 2012

حملة التدوين اليومي : الرومانسية

 النهاردة اول يوم في حملة التدوين الاسبوعي
وحبيت اشترك بتدوينه قديمة بحبها جدا==================
الرومانسية مش مظاهر الحب من التوهان والسرحان والسنتحه

(ماحدش يسألني يعني ايه سنتحه هي بنتي بتقولها كده)
والنحنحة
لا
كل شئ حوالينا م
مكن يبقا رومنسي
تبسمك في وجه اخيك صدقة (مش دي رومانسية)
الكلمة الطيبه (المجاملة الحلوة الصادقة) صدقة مش دي كمان رومانسية
الاخلاص والوف
اء رومانسية

لما نشوف شئ جميل ونقول تلقائي الله الله رومانسية
القعدة علي النيل او علي البحر رومانسية
لما نزور مريض ونقول له سلامتك وندعي له دي رومانسية
 

التدبر التفكر في خلق الله والكون رومانسية
حب الله ومنجاته من غير مانشوفه رومانسية
حب رسول الله رومانسية ما
احنا ماشفناهوش برضه
كنت بقرا عن معاملة الرسول لزوجاته 

لاقيته صلي الله عليه وسلم زوج محب رومانسي جدااااااا
حسيت ان كلمة رومانسية تعني لطف ورحمة 

تعني قلب رحيم رقيق لا يغدر ولا يخون
قلب عمران بحب الله
وحب الله هو اللي ه
يخليه رؤف رحيم
قلب محب
بمعني الكلمة
مافيهوش مكان للغلظة او الغدر
او البرود واللامبالاة
قلب بيتقي الله في كل افعاله
ولا انتوا رأيكم ايه في موضوع الرومانسية دي

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
------------------------------------
عيزاكم تسمعوا اول 5 دقايق من الفيديو ده
هتعرفوا يعني ايه حب


الأربعاء، 21 نوفمبر 2012

الحكاية من الاول

الحكايه من الاول 
ان كنا قاعدين مع بعض
الرقيقة جداااااااااا
شيرين سامي 
وابراهيم رزق
وضياء 
والازهري
وقولتلهم نفسي بلوجر يرجع تاني
وعندي فكره 
بدل التدوين اليومي ومش بنلحق نزور بعض 
ونستوعب التدوينات الجميله اللي بتتكتب
انا بقول نخليه اسبوعي 
علشان نستوعب اللي بيتكتب 
ونقدر نعلق ونتناقش كويس
وافقوني وقالوا ياريت
كلمت شيماء الخولي 
وقلتلها هي كمان وافقت
قلت لها طيب اعملي ايفنت علي الفيس وخبري الناس
فعلا الست مشكوره عملت الايفنت 
والناس هناك علي الفيس مبسوطين
وشكلها هتحلو
وبلوجر هيرجع تاني
والناس كلها هترجع
ونقول يارب 
وهستني بقا كل خميس التدوينات الجامدة

الاثنين، 19 نوفمبر 2012

بيان

بيان اللجنة الفنية الاستشاريه لمسودة الدستور
البيان ده مهم جداااااااااااااااا
وتعليق دكتورة هبه فاروق عليه اهم
والاهم اننا نقرا مسودة الدستور وبجد
علشان احنا هننزل من بيوتنا ونكلف الدوله ملاين
علشان نقول نعم اولا
يبقا لازم نعرف هنقول لأ ليه ونقول نعم ليه
ومانخليش حد يضحك علينا تاني
ومن اهم الفقرات في البيان في نظري الفقرة الاتيه
((وأن معظم تعديلات اللجنة لا تتعلق بمواد الشريعة التي يدور حولها الجدل الإعلامي ، بل بمواد تتعلق بصميم التوازن بين السلطات وبعدم التخلي عن التقاليد الدستورية والأخذ في الإعتبار طموحات الإنسان المصري بعد الثورة.))

الأحد، 18 نوفمبر 2012

مش هنعمل اي حاجة

الحلول موجوده
بس ماحدش بيفكر فيها
ليييييييييييييه
؟؟!!
يعني موضوع القطارات والمزلقانات اللعينة
يتحل بمنتهي اليسر
كل منطقه فيها مزلقان
يتعمل لها مزلقان من بتوع زمان
اللي كان له رافعتين ينزلوا اول ماجرس المزلقان يرن 
ان في قطار جاي
ومايسمحوش لأي حاجه علي اربع عجلات
ولا اي بني ادم يعدي
هيقولوا منين الفلوس
يخربيت كده 
ماانتوا بتدفعوها تعويض اهو للضحايا
ومع هذا 
ماشي
نلمها من الجمعيات الاهليه اللي في المنطقه 
اللي هيتعمل فيها المزلقان
ننشط شويه العمل التطوعي الجماعي
نصحصح شوية رجال الاعمال معانا
ومافيش مانع نعلق لهم اعلانات في المزلقانات دي 
ببلاش طبعا 
نظير تبرعهم لعمل المزلقان
لو بنحبها صح 
هنعمل كل شئ صح
 وبسهوله
---------
اسيبكم مع يابلادي انا بحبك يابلادي 
الاصليه اللي متاخد منها الاغنيه الجديده بتاعة الثورة
من فيلم العمر لحظة 
وتصوير لمدرسة بحر البقر

السبت، 17 نوفمبر 2012

تنحنا :( الدرس انتهي لموا الكراريس + تحديث

ايه ده من كتر الهم تنحنا
خلااااااااص
اعدي من قدام النادي الاهلي
في ساعة وهي ماتاخدش نص دقيقه مشي
علشان النهارده ماتش الاهلي
والنادي عامل شاشات عرض للماتش
ماتش!!!
ماعدش يفرق معانا ولا يهزنا منظر الموت
ماصور الشهداء
بقت محوطانا من كل حته خلاص
من كتر ماشوفنا قتلي ومحروقين ومقطعين
من بورما وغزة وليبيا وسوريا وقبلهم العراق
وطبعا نحن ننفرد اننا اللي بنعمل كده
من اول جشع اصحاب العبارات والمراكب
مرورا بالميكروباصات المحمله اكتر من اللازم
وعربيات النص نقل المحمله بني ادمين
لسواقين معدومي الضمير
الي الانفراد الاكبر
قطارات السكه الحديد
زمان كان قبل القطار مايجي
 كان في حديد للمزلقان
 بيقفل ويمنع اي حد يعدي
 سواء علي رجله او سايق اي حاجه بعجل
يااااااااارب ارحمنا

حللي ضفايرك

كنت عايزة اكتب بالونات 2
بس غزة وقطار اسيوط
فعلا نكدوا عليا
ومش لاقيه غير انغام
تغني لمصر حلي ضفايرك
--------
حللي ضفيرك ضليله
ولملمينا يااصيله
عشاق ترابك احبابك
وكلنا اهل وعيله
-----
احنا اللي يوم الفدا روحنا
نفديكي ونضحي بروحنا
وضحكنا حتي علي جروحنا
ضحكتنا هاونت الشيله
------
وانتي اللي نسهر في هواك
وتدوب قلوبنا في نجواكي
ولا عمرنا نحب سواكي
ونبوس ترابك ياجميله
اه ياجميلة
-----
حللي ضفيرك ضليله
ولملمينا يااصيله
عشاق ترابك احبابك
وكلنا اهل وعيله
------
نديكي حب وتدينا
ونمد للشمس ايدينا
ولو تعبان تاخدينا
ناخد في حضنك تعسيله
----
ونقوم ولا شئ يوقفنا
لاابوجهل جهله يحرفنا
ولا ابو لهب هيخوفنا
مااحناش ضعاف قلالات حيله
اه ياجميله
-----
حللي ضفايرك
 

الخميس، 15 نوفمبر 2012

بلونااااااااااات !!! (1)

زارتني جاره من العماره
 بتجمع مال من السكان لتصليح مواسير في العماره
لاقيتني معلقه بالونات وزينه
قالت لي عيد ميلاد مين
؟؟
قلت لها مش عيد ميلاد حد
دي راس السنه الهجريه
قالت لي وهي راس السنه الهجريه يعملوا لها
((((((المسخرة دي )))))
!!
اي وربنا قالت لي كده
اتصدمت في الاول
وقلت لها فين المسخره في البالونات والزينه
قالت دي بدع اعياد الميلاد
لاتليق براس السنه الهجريه
!!
قلت لها انا بحب البدع دي جدا
اصلها بتفرحني جدا 
وبتدي بهجه مع الاحتفال بالسنه الهجريه
مع صوت القرآن
وبعده النقشبندي
بتفكرني بايام زمان
ومستنيه بناتي بازواجهم علشان نحتفل
مش هو ده الموسم 
ولا حول ولا قوة الا بالله
كل سنه وانتم طيبين 
وبراس السنه الهجريه معيدين
بالصيام والقرآن والتواشيح 
وبالبالونات وباللمه
 وخصوصا انها بتكون اجازة
وللحديث بقيه
اما نشوف ايه اخرتها بقا

الثلاثاء، 13 نوفمبر 2012

فن الحوشنه :)


الحوشنة
:))
يعني ان حد يوحشك
من زمان وانا بقول عليها كده))
في ناس توحشك فا ترفع سماعة التليفون تطلبهم وتطمن عليهم
تشد لهم موبايل
:)
وبس
وفي ناس سهل تشوفهم
عاااااااااادي
بس في ناس لما يوحشوك
مابتقدرش تسمع صوتهم ولا تشوفهم
مابتعرفش تعمل حاجة غير انك تتوجع من فراقهم
لما بابا توفاه الله
واتكلمت مع المرحوم باذن الله الشيخ المسير
قال لي
لما يوحشك اقري له قرآن وادعي له 
هترتاحي
وفعلا كل ما بابا يوحشني
ابعتله سلام ونور وحسنات
وعندي اعتقاد انه بيحس بيا واني فكراه
بقت هي دي طريقة الوصل بينا
لما يوحشني ادعيله اتصدق بأسمه 
اقرا قرآن و اوهبه له
واخيرا عرفت انه بيعرف اني بعتاله السلام
فاكل يوم لازم ادعيله
وابعت له السلام

الاثنين، 12 نوفمبر 2012

هرد علي قدي 2

بعض الاسلامين 
اللي مش عارفه ليه همه او الاعلام سماهم كده
بيقولوا ان الرسول تزوج ستنا عائشه عندها 9 سنين
وبعض المشايخ من لهم علم 
مثل الشيخ محمودعاشور (وكيل الازهر السابق)
وده بحث  عن 
وقت زواجها من الرسول الكريم
وحتي لو كانت كذلك للرسول الكريم خصوصيه
ومايباح له غير مباح لنا
تزوج الرسول من 9 نساء
هل مباح للرجال الان الزواج من 9 نساء
تزوج الرسول من من تعدت السبعين 
ماتكلموش عن الزواج من المسنات ليه !!؟؟
وااااالا دول وحشين!!؟؟
الرسول الكريم ربنا خصه ببعض الاحداث لتواكب الدعوة
زوجه وهو الشاب اليافع ممن تكبره بعشرين سنه
لأنه في مرحله سيحتاج للأم والزوجه العاقله
لو تزوج من شابه ماتصرفت بنفس الحنان معه عندما عاد من غار حراء ينتفض
وذهبت به الي قريبها ورقة بن نوفل ليرشدهم
وماتحملت معه من الاحداث ووقفت بجواره
وتزوج من ستنا عائشه صغيره حتي تعيش تنشر السنه عنه اعوام طوااااال
(خذوا نصف دينكم من هذه الحميراء)
نساء النبي متحرمين لأي زوج من بعده
اي زوجه يموت عنها زوجها او يطلقها من حقها تتزوج شرعا
الرسول صل الله عليه وسلم له خصوصيه مش لحد تاني

الأربعاء، 7 نوفمبر 2012

هرد علي قدي 1

طلبتني صديقه وهي منزعجه
وقالت لي حطيتلك صوره علي الفيس شوفي المكتوب فيها
رحت لاقيت الصوره المنشوره دي
طلبتها وقلت لها ممكن تكون متفبركه علي الرجل
منين عذراء ومنين متزوجه
واحنا عارفين كويس ان دي معجزة سيدنا عيسي وستنا مريم
ومذكوره بالنص في القرآن
لو اشاعه ليه ماطلعش وكدب واتشير التكديب
ولو صح تبقا مصيبه سوده وحطت علي دماغنا
مافيش نص بيقول ان كان عندها 12 سنه
وحتي لو كان عندها 12 سنه
هل نقيس المعجزات بالحياة العاديه
اومال هي معجزات ليه ان شاء الله
بجد
المشايخ دي لازم يتحط لهم حد
زي الدكاتره ماينفعش يمارس المهن الا لماياخد تصريح علمي
زمان الاذاعه المصرية ماكانتش بتسمح لحد يغني الالما لجنة الاستماع تديله تصريح
اوم احنا نسيب حفنه من انصاف المشايخ تلعب في رؤس الناس كده
كل ده علشان يجوزوا البنات من 9 سنين
هو البلوغ بلوغ جسدي فقط
البلوغ بلوغ عقلي اكتر منه جسدي
مسؤولية الزواج وتحقيق السكن منها 
هينفع تقوم بيها طفله
الحمل والولادة هينفع تقوم بيها طفله
ده بجد شذوذ واسفه اني بقول كده
علشان اللي تهون عليه ضناه يعرضها للزواج وهي لسه طفله يبقا انسان شاذ فعلا
وماحدش يقول لي ستنا عائشه وسيدنا محمد عليه افضل الصلاة والسلام
هتكلم في الموضوع ده التدوينه الجايه
دلوقتي انا متنرفزه ودي سيره عطره ماينفعش نتكلم فيها ساعة غضب

الأحد، 4 نوفمبر 2012

اشتقنا الي انوثتنا !!!

بمااني ماعرفتش الطش التدوينه الرائعه
اللي كتبها الصديق منجي بكير
واكتبها هنا
:))
هحطلكم اللينك
علشان تروحوا تستمخوا من التدوينه
بجد بجد تدوينه رائعه
وهي رد علي التدوينه السابقه عندي
**********
صحيح
كل عيد حب وانتوا طيبين
ومبروك علي البابا الجديد
حمله هيبقا تقيل ربنا يقدره