الجمعة، 28 فبراير 2014

الاخلاق !

صباح يارب يكون الخير
بجد مش عارفة اقول ايه
مندهشه مبهورة باللي شوفته وسمعته
بقا ياعالم ياظلمه يامفترين
الرسول الكريم صل الله عليه وسلم
كان بيشتم
!!!!!
كنتوا قاعدين معاه بقا ولا مكشوف عنكم الحجاب
فين الحديث او الرواية الصحيحة اللي بتقول كده
ها
مش مكسوفين من نفسكم مش خايفين من ربنا
لما ان شاء الله نقابل الرسول يوم القيامة هتقولوا له ايه
اتكلمنا عليك وحش
الرسول الكريم الخلوق الصادق الامين
اللي شهد له الكفار انه امين وصادق ومؤدب
قووووم انتوا تيجوا بعدها 
بسنييييييييييييييييييييييين
تقولوا عليه كده
وعاملين لي بتوع ربنا ورسوله
طيب ماشي
اولا
يقول الله تعالى
(ن وَالْقَلَمِ وَمَا يَسْطُرُونَ{1} مَا أَنتَ بِنِعْمَةِ رَبِّكَ بِمَجْنُونٍ{2} وَإِنَّ لَكَ لَأَجْراً غَيْرَ مَمْنُونٍ{3} وَإِنَّكَ لَعَلى خُلُقٍ عَظِيمٍ{4})القلم1-2-3-4 
******
وقال صل الله عليه وسلم
" أدَّبني ربي فأحسن تأديبي "  
*****
وكمان
"إنما بعثت لإتمم مكارم الاخلاق" 
****
ده غير قصة اليهودي 
اللي كان بيرمي ذبالة علي باب بيت الحبيب 
ولما الرسول مالاقاش الزبالة يوم سأل عليه 
اليهودي اسلم من خلق الرسول الكريم 
*****
اللهم صل وسلم وبارك عليك يارسول الله
وحسبي الله ونعم الوكيل
ربنا وحده اللي هيقتص منكم لرسوله الكريم
العيب مش عليكم 
العيب علي اللي سابكم ترعوا في البلد وفي دماغ الناس
حرقتوا دمي علي الصبح يابعده
منكم لله



الثلاثاء، 25 فبراير 2014

الوزراة في الشكارة :)

مبروك ولا مامبروكشي
:)
رغم اني مشغووووولة جدا
وعايزة اليوم يبقا 42 ساعة بدل 24
بس ماحبتش 
افوت هذه المناسبة الخطيرة الرهيبة المهيبة الفخمة
 وابارك لكم علي استقالت او اقالت الوزراة
وسمعوني 
سلام خاليك هنا خلايك وبلاش تفارق
:)

ووووووو
لكنننننننننننننننننن
اييييييييييييييييه
؟
هي فعلا فعلا هتتغير بجد ولا كده وكده
سامعه حد هنااااااك
بيقولي هتفرق ايه بقا
طبعا 
هتفرق كتير
علي الاقل لو هي هي ومافيش تغير
يبقا كده ماحسيناش بالغربة
ماعلينا كل سنة وانتم طيبين
اقصد مبروك
وعلي فكرة 
شكلهم هيجيبوا وزيرة تضامن اجتماعي 
قمر
:)

الجمعة، 21 فبراير 2014

الرغي :)

صبااااااح الخير عليكم
الاخ اسامة (ازهري )
والحاج طارق (عابر سبيل)
الاتنين بيزعموا ان الفتاة بتحب الهاتف 
علشان لو قلبت كلمة هاتف هيبقا فتاة

ولو جينا للحقيقة بقا
هنلاقي الرجالة اكتر ناس بترغي في الكون
شوف كده الرجالة وهمه ماشين وهمه سايقين 
الموبايل علي ودنه
طبعا اللي يقولك الستات بترغي 

ده مستند ان الزوج من كتر الرغي بره البيت
 بيدخل البيت يجيله خرس زوجي
ومراته اللي بتقعد تكلمه
لكن تعالي كده 
واحد صاحبه يكلمه تلاقيه طلع علي الرابع
ولا شوفه كده لما يلبس وينزل القهوة يقابل اصحابه 
سبع تلسن بترغي في لسانه
ولا شوف ولد مع البنت اللي عايز يتجوزها

ماشاء الله الرغي رغي يعني
الرغي رجل
:)
لما تعدي يوم الجمعة علي تجمع شبابي او رجال كبار
بعد الصلاة تلاقيهم كلهم بيتكلموا في نفس واحد
الرغي مالوش صاحب
نااااااس بتتكلم كتير
وناااااس صامته بطبعها
مافيش نوع محتكر الموهبة دي لوحده
:)
اه
فووووووتكم بعافيه 

الخميس، 20 فبراير 2014

الصمت

صباح الخير عليكم
الصمت 
ايوة الصمت
اي السكوت
اي السكووووووون
هوووووووووس


احنا مش محتاجين اكتر من اننا نسكت شوية
لييييه؟
اولا علشان نسمع كويس 
ولما نسمع كويس نستوعب ونفهم
ونعرف نقدر ونتصرف صح
الصمت الان مش بس من دهب
 ده من الماااااظ من بلاتين
لو الدنيا سكتت شوية هتتعدل للأحسن
مثلا لو بتوع التوك شو سكتوا لجل النبي
ونسيوا مصالحهم في السبوبة
الدنيا هتدي شوية
لو متخانق ومختلف مع حد 
اسكت انت سيبه هو يتكلم وماتردش 
لحد مايسكت ويطلع الشحنه اللي عنده
ليييييه
؟
اصل كلمة منك علي كلمة منه
الدنيا بتولع والشيطان يدخل بينكم
ويولعها اكتر
 ويوهمك انك لازم ترد ماتخليهوش يغلبك بالكلام
بينله ان هو الغلاط مش انت
لو الزوجين يختلفوا 
والست تسكت وزوجها غاضب الدنيا هتهدي
:) 
ولو ان ده صعب علينا نحن نون النسوة
:)
وسامعه واحده هناااااك بتقولي 
لما مابردش عليه بيقولي انتي مابترديش ليه 
مستهتره بكلامي
مش هامك اللي بقوله وبيغضب اكتر
هقولها
معلش لما الدنيا تهدي فهميه 
انك بتعملي كده علشان الموضوع مايكبرش
مره علي مره هيمشي الحال 
وهيزعق براحته وهو عارف انك مش هتردي
واخد الامان يعني :)
وفي بقا صمت اجباري
 صاحبه بيروح له غصب عنه 
ماعندوش خيار غير انه يسكت
صعب عليه يدافع عن نفسه
علشان مايخسرش اكتر من اللي خسروا
وعلشان يحافظ علي البقية الباقية
اللي جواه
ولأنه لو اتكلم هيتجرح اكتر ماهو مجروح
هاااااااا
نصمت شوية 
ونجرب نسمع الكون 
 بس 
كل واحد يجرب يسمع 
بس 
ولو ليوم واحد 
ويشوف ايه اللي هيحصل 
ويجي هنا يقول حصل ايه
وماتنسوش انه كان من اية سيدنا زكريا 
ان لا يكلم الناس ثلاث ليالي 
اذا الصمت شئ مقدس اهو

فوتكم بعافية

الأربعاء، 19 فبراير 2014

شارع النزهة باشا

صباح الخير عليكم
اللي عايز يشوف 
السرك والحرب الاهلية في نفس الوقت
يروح شارع النزهة من عند نادي الدفاع الجوي
لييييه؟
من اول ماتنزل من الكوبري 
مافيش دوران للخلف الا في اخر الشارع
ليييييه؟
علشان قافلين الدوران للخلف اللي في النص من عند النادي
من زمااااااااان
طيب يعني ده يرضي ربنا
الناس تروح لأخر الشارع علشان ترجع لأول الشارع من الناحية التانية
علشان انتوا قافلين حته كل مشكلتها انها قصاد النادي
الناس بتتشل جوه العربيات 
والحته دي علي الاقل بتتاخد في نص ساعة 
وهي ماتاخدش دقيقة
الرحمة حلوة يابتوع الدفاع الجوي
يعني انتوا خايفين علي النادي ومش خايفين علي وقت الناس
اختشوا وافتحوا الطريق
عيب

الثلاثاء، 18 فبراير 2014

جامع :)

صباح الخير
كل ماتكلم حد وتقوله تصدق
طلعت الزكاة دي قامت عليها حرب
يقولك اللي يعوزه البيت يحرم علي الجامع
:)
وناس تقول حرام 
وناس تقول لا الجامع الاهم
ودخلت منتدي لاقيت خناقة طويلة عريضة
وتراشق بالكلمات ان الجامع بيت ربنا اهم من اي حاجة
واننا امرنا ان نعمر مساجد الله
:)
عايزة بس افهمكم 
ان الجامع هنا مش الجامع اللي بنصلي فيه
زماااااااان في مصر 
كان في رجل مهمته جمع الزكاة المفروضة
اسم وظيفته كده
(جامع الزكاة) 
سبحان الله
وطبعا الزكاة انواع واحكام
اهمها ان الفقير والمديون ماعليهوش زكاة
ده بياخد زكاة اصلا
فاكان الحكم الشرعي 
ان اللي يعوزه البيت يحرم علي جامع الزكاة
يعني مايخدش من البيت ده 
مال الزكاة
وبمااننا كامصرين نموت في الاختصار 
بقت بدل
اللي يعوزه البيت يحرم علي جامع الزكاة
بقت
اللي يعوزه البيت يحرم علي الجامع
:)
والناس اللي بتتخانق دي
ماحدش فكر يجيب اصل الكلمة
المهم نتخانق وخلاص
بس خلاص
:)
فوتكم بعافية

الاثنين، 17 فبراير 2014

حلاوة روح

الجمعة اللي فاتت كنت
 رايحة ميدان الجامع
ويادوب بلف علشان اركن قصاد تسيباس
 ولاقيت مظاهرة مؤيدة لمرسي قاطعة الطريق
وماله من حقهم ماحدش يقدر ينكر عليهم ده مادام سلمين
بس الحقيقه شكل المظاهره جابلي هلع 
كوميدي
حسيت ان انا بعربيتي في قندهار
اه وربنا
الملابس اللي لابسينها شكلها مش مصري
لابسين ياام زي الافغان يا زي السعودين
يازي مش عارفه تبع مين اخترعوه ازاي
جلباب قصير جدا باين منه بنطلون قصير برضوا
وصديري اغرب 
والراس عليها عمه بذيل (ايوة ديل) كده شكلها غريب
بصراحة حسيت انها حفلة تنكرية
وحسيت برتياح شديد للي حصل
احنا كان هيتمحي هويتنا التي ننفرد بها
كنا هنبقا قندهار فرع امارة مصر
وسامعه حد بيقول ايه السطحيه دي ملابس ايه وعمة ايه ياشمس
ياعم بالراحة عليه
الملابس هي عنوانك وعنوان تفكيرك وهويتك وانت منين
هو ربنا عملها كده
لكل بلد ملابسه الخاصة بيه
تتوافق كمان مع البيئه المحيطة بيه
المهم
نيجي بقا للعنف اللي حصل امبارح
ليه العنف علشان هي دي طبيعة التيارات دي كلها 
شوفوا تاريخ كل الجماعات والتيارات والانظمة اللي كده 
ومش عايزة اقول الاسلاميه 
علشان ده مش اسلام خالص
هي حلاوة روح يعني 
علشان مايتقلش ان رئيسكم 
ايو رئيسكم انا لم انتخب مرسي 
فابالتالي هو ليس رئيسي
 ومن انتخبه من المصرين هم عاصري الليمون 
 ده كان رئيس بالصدفة
بتقتلوا في الناس 
علشان مايقولوش انكم سكتوا وانكم ضعفاء 
ونسيتوا ان قتل النفس التي حرم الله الا بالحق
هقول لكم ايه تاريخكم دموي 
ومانسيناش التفجيرات ومحلات الدهب اللي سرقتوها
ده غير رجال الاعمال 
اللي طلعوا منكم في البخت ولموا فلوس البلد 
الريان واتباعه وطلعوا بيضاربوا في البرصة 
هي مش البرصة دي حرام يامتأسلمين
المهم انتوا هتفرفروا شوية زي الطير المدبوح 
وبعيدن هتمهدوا 
علشان مش فاضين لكم 
مصر وراها حاجات كتير عايزة تعملها
والحمد لله رؤس الفتنة منكم بيتساقطوا واحد ورا واحد 
والعجيب الغريب المريب 
انهم بيتقبض عليهم في بيوتهم
 قاعدين وسط عيالهم ياكلوا ويشربوا 
وسايبين الشباب اللي كلوا عقلهم في الشوارع مطحونين
ان شاء الله مصر محروسة
والامل في الله وبكره اجمل

الأحد، 16 فبراير 2014

معرض الكتاب :(


 صباح الخير عليكم

دي اول تدوينة في حملة التدوين اليومي
:)
*********
كان بقالي كتير مارحتش معرض الكتاب
واعتقد ان اخر مره برضوا كان اجتماع مدونين
وحد كان عنده حفلة توقيه
ماعلينا
لما رحت يوم حفلة المعطف
اخدت جوله علي السريع كده
في الكتب المعروضة
وتصفحت بعضها وغلطت واشتريت بعضها
لييييييييه؟
كتب كتييييييير اوي
والفن والادب فيها قليل
في كتب حسيت انها اطبعت علشان كاتبها معاه فلوس
وافتكرت كلام مصطفي سيف
يوم ارابسيك 
ان دور النشر بتطبع للي معاه فلوس
وبكده الادب هينحدر
وخصوصا كتب الشعر
اتصفحت اربع كتب علي الطاير
ايييييييه ده ؟
مين دول؟
ايه الكلام الغريب ددددده
اللي حتي مالوه معني مش هنقول موسيقي لغوية
طب يعني دار النشر ماعندهاش حد يقرا الكلام ده
 ويقول لا مش هننشر 
ولا خايفين علي السبوبة 
قوم ندمر الحياة الثقافية في مصر
ده في ناس بتكتب كلام رائع
وماحدش يعرفها
بجد زعلت اوي 
ولابد بقا فعلا يبقا في رقابة علي الناس دي
ومش اي حاجة تتنشر 
كفاية السينما واللي حصل فيها
ارحمونا

الجمعة، 14 فبراير 2014

في عيونك

اليسا
في عيونك




الأربعاء، 12 فبراير 2014

اليمن السعيد :(

زمان شهداء الجيش المصري 
مع عبد الناصر 
هيتجننوا من الحسرة علي اليمن وتقسيمها 
علشان الناس دي ضحت بالغالي والنفيس 
علشان اليمن تبقا حته واحدة 
وتفضل اليمن السعيد 
بتقسموها علشان موقعها عند باب المندب
وعلشان دورها في حرب 73 
والاخت بتاعة نوبل بتعمل ايه 
يعني خلاص 
اليمن بقت ست حتت وفضلة 
ده احنا في الوطن العربي 
بيتلعب بينا لعب
ولسه
بيحتلونا بشكل جديد
نيو لوك استعمار

الثلاثاء، 11 فبراير 2014

موبايل ياولاد :)

بينما انا في عربيتي
همووووت من كتر الزحمة
ومابنمشيش اصلا
بتلفت جنبي 
لاقيت العربية اللي جنبي فيها شباب
الخمسة كل واحد ماسك الموبايل 
دابب عينه ووجدانه فيه حتي اللي سايق بيهم
بجد ضحكني المنظر جدااا
وتخيلت انهم مدينها تتويت علي تويتر
واحد بيكتب
اووووف الدنيا زحمة جدااا
(مش هقول الكلمة اللي بيقولوها مش بتعجبني)
والتاني بيكتب
قاعد في العربية وزهقان وحاسس بملل انا قرفت من البلد دي
والتالت بيكتب
زحمة وصحبه خنيقة والنت علي الموبيل كمان بطئ سلحفة
والرابع بيكتب
انا ايه اللي خرجني مع العيال دي 
ماكنت قاعد في البيت علي النت برضوا
اما الخامس بقا اللي سايق بيهم
بيكتب
ايه العيال الخنيقة دي مش كفاية اني سايق بيهم في الزحمة دي
:)
شكلهم كوميدي وهو ده اللي بنقراه علي تويتر
:)
طيب ايه اللي خلاهم يخرجوا مع بعض
لما همه مابيتكلموش مع بعض
وعلي فكرة نفس المنظر بيبقا هو هو
وهمه قاعدين علي الكافيه
فوتكم بعافية

عم حمدين :)

عم حمدين
ونحن شاااااااااكرين
انت عارف ياعم حمدين انت بتعمل ايه
تاااااااني
؟
انت حر
اهو من اولها عملت فورتينه
بين الشباب الجميل
بتاع تمرد
وكمان ناس كتير مش طيقينك
علشان
انت هتترشح قصاد السيسي
طيب بلااااااااش
وافتكر اني نصحتك
وعادي يعني لو تمثيلية
علشان تبقا انتخابات وحركات
مش جديد عليك ماانت مثلت قبل كده
وكان نفسك تمثل
:)
 للي عايز يعرف مين حمدين
اصل شاب سالني
هو حمدين بيشتغل ايه
:) 
مااحنا بقينا ملطشه كل واحد
يهرش في راسه عايز يحكمنا
واحنا صراحة مالناش ملكه
ولا حد بيعرف يحكمنا
:)
اخويا قالي ان مصر من ايام مينا موحد القطرين
ماحكمهاش صح الا رجل عسكري
ليييييييييه بقا؟
موضوع طويل صدعني بيه
موقع مصر
واسرائيل
والغرب
طبيعة الشخصية المصرية
فتوات زمااااان
حاجات كتيييييير
ماعلينا
اللي عايزه ربنا هيكون
وياخبر بفلوس بكره يبقا ببلاش
ومن يوم ماقالهااااااااا
 مبارك
خاليهم يتسلوا
واحنا مش ملاحقين
ياربييييي
فوتكم بعافية 
:)

السبت، 8 فبراير 2014

همووووت من الضحك
ياربي 
واحد قرداتي
وواحد منادي
مالناش حل شعب مصر
عوض علي عوض الصابرين 
يااااارب

الخميس، 6 فبراير 2014

حفل توقيع معطف من قيود

طبعا الحفل كان لطيف وراااائع 
بكل الموجودين
فيه
وخصوصا ان كان بقالي كتييير 
مارحتش معرض الكتاب 
بجد كنت فرحانة جداااا
تجربة جديدة 
عمل جماعي والكل متفاهم
وعلي راي واحد
بشكر كل اللي كانوا موجودين وشاركونا فرحتنا
طبعا فريق كتاب المعطف
الفراشة شيرين واسرتها
نور الجميلة وماعرفناش نرغي سوا
ودعاء ذات البوت الاحمر 
اللي انقذها من المنادي
والموهوب ابراهيم واولاده طبعا انتوا عارفين اساميهم
ومحمد السيد اللي اكتشتفت انه انسان في عتمة نور
ودكتور صابر واسرته الرائعة 
وخصوصا زوجته حسيت اني اعرفها من زمان
وافتقدنا طبعا
مصطفي القناوي لوفاة عمه 
ملحوقه ان شاء الله يكون موجود في الندوة
وسهير وريماس ونسرين
واشكر جداااااا
الاصدقاء اللي اخدنا من وقتهم وتعبناهم
 و شرفونا وخالوا الفرحة تكمل بوجودهم
رامي فايز
خالد زين
وفاء شلبي الجمييييلة جداااااااا
هيثم
رحاب صالح الرائعة زي البنفسج
اسامة نصر
نجلاء (جوجو)البنوته الجدعة الجميلة
اسامة ازهري
ريماس الانيقة داااائما
غااااادة محسن الرقيييييقة اوي
والاختين سارة ومني درويش 
وحوارنا اللي كان لطيف جدااا زيهم
مش عايزة الزهيرم يشتغل وانسي حد 
:)
بجد انبسطت اني شوفتكم جدااااااااا
وفرحت بيكم اكتر من فرحة الكتاب
ولمتنا كانت حلوة وجميلة
ربنا يجمعنا في الخير 
:)

الثلاثاء، 4 فبراير 2014

الاخوان

صباح الخير
:(
ايوة زعلانة
كنت في مشوار قرب ميدان النعام
واللي مايعرفش ميدان النعام ده ميدان منه تروح عين شمس او المطرية او حلمية الزيتون او ....
المهم
كنت هناك وفااااااااااجأة سمعت 
صوت ضرب ناااااار
وصوت دق طبول
ولا افلام الاكشن
قلت للي معايا ايه ده ردوا عادي ده الاخوان هيعدوا دلوقتي انزلي خدي عربيتك والحقي امشي
نزلت
لما نزلنا كان بيني وبينهم مسافة مش بعيدة
ومع احترامي للهمجية اللي همه فيها
دول مش اخوااااااااان

ايوة دول مش اخوان
ممكن يكون فيهم نسبة قليلة من الاخوان 
بس دول مش اخوان
الاخوان مابيربوش دقنهم لما تبقا بالطول ده
ولا بيحنوا دقنهم
ولا بيلبسوا ملابس زي الافغان والخليج
دول الجهادية بتوع عين شمس
اللي ياما الامن سحلهم زمان ايام الارهاب
طبعا مش عايزة اقولكم المسيرة كانت عامله ازاي
حاجة تحزن بجد
ومش هقول غير ربنا يهديهم
ويبعد عننا الفتن
ويقينا شر اللي بيعملوه ده
وعلي فكرة ماكنش في امن خالص
وكان معاهم سلاح
علشان اللي بيقولوا انهم سلمين
ومعروف في عين شمس والمرج والخصوص 
ان العالم دي معاهم سلاح واللي مش مصدق يروح يستني في ميدان النعام يوم الجمعة يشوف بنفسه
ويتاكد انهم من الجهادين الارهابين
بتوع التمانينات والتسعينات
يارب احفظ مصر

السبت، 1 فبراير 2014

المعطف :) الثانية ظهرا( تحديث)

صباااااح الخير عليكم
اخيراااا 
يناير خلص والحمد لله
*********************** 
ان شاء الله
حفل توقيع كتاب 
معطف من القيود 
هيكون الثلاثاء
4 فبراير الساعة 
اتنين ظهرا
:)
وان شاء الله تحضروا كلكم 
صحيح الحفل الساعة 12 بس هنكون موجودين طول اليوم
علشان نحضر حفل توقيع كتاب 
شيرين سامي
ان شاء الله خير
ونقول يارب