الاثنين، 17 فبراير 2014

حلاوة روح

الجمعة اللي فاتت كنت
 رايحة ميدان الجامع
ويادوب بلف علشان اركن قصاد تسيباس
 ولاقيت مظاهرة مؤيدة لمرسي قاطعة الطريق
وماله من حقهم ماحدش يقدر ينكر عليهم ده مادام سلمين
بس الحقيقه شكل المظاهره جابلي هلع 
كوميدي
حسيت ان انا بعربيتي في قندهار
اه وربنا
الملابس اللي لابسينها شكلها مش مصري
لابسين ياام زي الافغان يا زي السعودين
يازي مش عارفه تبع مين اخترعوه ازاي
جلباب قصير جدا باين منه بنطلون قصير برضوا
وصديري اغرب 
والراس عليها عمه بذيل (ايوة ديل) كده شكلها غريب
بصراحة حسيت انها حفلة تنكرية
وحسيت برتياح شديد للي حصل
احنا كان هيتمحي هويتنا التي ننفرد بها
كنا هنبقا قندهار فرع امارة مصر
وسامعه حد بيقول ايه السطحيه دي ملابس ايه وعمة ايه ياشمس
ياعم بالراحة عليه
الملابس هي عنوانك وعنوان تفكيرك وهويتك وانت منين
هو ربنا عملها كده
لكل بلد ملابسه الخاصة بيه
تتوافق كمان مع البيئه المحيطة بيه
المهم
نيجي بقا للعنف اللي حصل امبارح
ليه العنف علشان هي دي طبيعة التيارات دي كلها 
شوفوا تاريخ كل الجماعات والتيارات والانظمة اللي كده 
ومش عايزة اقول الاسلاميه 
علشان ده مش اسلام خالص
هي حلاوة روح يعني 
علشان مايتقلش ان رئيسكم 
ايو رئيسكم انا لم انتخب مرسي 
فابالتالي هو ليس رئيسي
 ومن انتخبه من المصرين هم عاصري الليمون 
 ده كان رئيس بالصدفة
بتقتلوا في الناس 
علشان مايقولوش انكم سكتوا وانكم ضعفاء 
ونسيتوا ان قتل النفس التي حرم الله الا بالحق
هقول لكم ايه تاريخكم دموي 
ومانسيناش التفجيرات ومحلات الدهب اللي سرقتوها
ده غير رجال الاعمال 
اللي طلعوا منكم في البخت ولموا فلوس البلد 
الريان واتباعه وطلعوا بيضاربوا في البرصة 
هي مش البرصة دي حرام يامتأسلمين
المهم انتوا هتفرفروا شوية زي الطير المدبوح 
وبعيدن هتمهدوا 
علشان مش فاضين لكم 
مصر وراها حاجات كتير عايزة تعملها
والحمد لله رؤس الفتنة منكم بيتساقطوا واحد ورا واحد 
والعجيب الغريب المريب 
انهم بيتقبض عليهم في بيوتهم
 قاعدين وسط عيالهم ياكلوا ويشربوا 
وسايبين الشباب اللي كلوا عقلهم في الشوارع مطحونين
ان شاء الله مصر محروسة
والامل في الله وبكره اجمل

هناك 11 تعليقًا:

ابراهيم رزق يقول...

يسلم فمك يا شمس الشموس
يوم الجمعة اللى فات
لما اصدرت المدام فرمان نشترى فسيخ و رنجة
هههههههههههه

عدت مظاهرة من قدام محل الفسيخ
مراتى قالتلى نفس كلامك

تحياتى

قمر وليل وغيوم يقول...

شكل الناس اللى وصفتيهم فى المظاهره ده غريب اوى
من.امته الاخوان بيلبسوا كده
عمرهم ما كانوا كده
دول دايما كانوا مهندمين
بصى انا حاسه ان فى طرف تالت فى الموضوع
زى مثلا ناس من جماعه التكفير والهجره

Gamal Abu El-ezz يقول...

مش جديد عليهم الأفعال دى
هما ظنوا ان الشعب المصرى اول ميحكموه هيرجع تانى للسيطره القمعيه زى عهد مبارك
حتى مرسى نفسه قالها انه رئيس بعد ثوره بس مفهمهاش هو كان بيبرر قتل المعارضه بتاعته مش أكتر بس مكنش عارف إن رئيس بعد ثوره حتى لو حرامى لازم يقود البلد صح مش يكون كل همه يملى بطنه وبطن الجياع من جماعته
فكر الجماعات دى يتلخص فى حاجتين قيادات كل همها انها تجمع فلوس ويكون ليها نفوذ وناس مضحوك عليهم ومفهمنهم ان الدين مش هيرجع الا لو رجعنا شكل الدولة القديمة أو رجعنا لورا لعصر الأمير مع انه مش لازم ترجع الأمير علشان تطبق الدين
الدين الإسلامى صالح للتطبيق على كل اشكال الدولة ولكن لمن يعقل فقط
تحياتى

مـجـنـووون يقول...

أنتوا بس الي شيفين مرسي كده وشيفين الشباب الي في الشارع كده

بره مصر الناس بتضحك عليكم ومستغربه من الي بتعملوه

صدق أبو اسماعيل لما قال

سوف نصبح اضحوكة العالم

ربنا يهدي

شمس النهار يقول...

*ابراهيم رزق

:)فسيخ

ل بجد شكلهم غريب ولا الحفلة التنكرية
طول عمرنا نعرف اخوان ومتربين معاهم عمرنا ماشوفناهم لابسين كده خالص

شمس النهار يقول...

* قمر وليل وغيوم

انا كاتبه قبل كده بوست وقلت مش كل دول اخوان واللي لابسين كده مش اخوان
دول الله اعلم بيهم

شمس النهار يقول...

* Gamal Abu El-ezz

كلامك صح الصح

ربنايعدينا من المرحلة دي بسلام

شمس النهار يقول...

* مـجـنـووون
:)
صباح الخير
ملاحظة انا انك مابتعلقش غير لما اجيب سيرة مرسي :)
بس هو فين سيرة مرسي في البوست :))

tarek momen يقول...

ماحدش قال لي ان ده الزي الرسمي للمظاهرات طب ماتعرفيش اشتريه منين؟؟؟؟؟

شمس النهار يقول...

* tarek momen

ياحاج انت مش محتاج تشتريه
خاااالص
وتكلف نفسك ليييييه
انت تنقي جلابيه بيضاء من عندك وتروح مقصرها لحد الركبه وتجيب بنطلون برضوا من عندك وتروح مقصره الي مافوق الكعبين بشبر كده فضلت خيرك
وتشوف صديري من بتوع بدل زمااااااان وتروح لابسه فوق كل دول
والحته بقا اللي قصرتها من الجلابيه البيضا فاكرها اللي فوق في التعليق دي
تروح فاردها ولاففها علي راسك وتسيب منها حتت ديل كده ورا نازله علي القفا لازمته ايه مااعرفش ماعلينا
وتبقا كده سيادتك جاهز للحفلة التنكرية اقصد المظاهرة اظن دي وصفه سهله دي واصفة هايله :)
اي خدمه

tarek momen يقول...

:)