الأحد، 16 فبراير، 2014

معرض الكتاب :(


 صباح الخير عليكم

دي اول تدوينة في حملة التدوين اليومي
:)
*********
كان بقالي كتير مارحتش معرض الكتاب
واعتقد ان اخر مره برضوا كان اجتماع مدونين
وحد كان عنده حفلة توقيه
ماعلينا
لما رحت يوم حفلة المعطف
اخدت جوله علي السريع كده
في الكتب المعروضة
وتصفحت بعضها وغلطت واشتريت بعضها
لييييييييه؟
كتب كتييييييير اوي
والفن والادب فيها قليل
في كتب حسيت انها اطبعت علشان كاتبها معاه فلوس
وافتكرت كلام مصطفي سيف
يوم ارابسيك 
ان دور النشر بتطبع للي معاه فلوس
وبكده الادب هينحدر
وخصوصا كتب الشعر
اتصفحت اربع كتب علي الطاير
ايييييييه ده ؟
مين دول؟
ايه الكلام الغريب ددددده
اللي حتي مالوه معني مش هنقول موسيقي لغوية
طب يعني دار النشر ماعندهاش حد يقرا الكلام ده
 ويقول لا مش هننشر 
ولا خايفين علي السبوبة 
قوم ندمر الحياة الثقافية في مصر
ده في ناس بتكتب كلام رائع
وماحدش يعرفها
بجد زعلت اوي 
ولابد بقا فعلا يبقا في رقابة علي الناس دي
ومش اي حاجة تتنشر 
كفاية السينما واللي حصل فيها
ارحمونا

هناك 18 تعليقًا:

P A S H A يقول...

صباح الفل والورد والياسمين
:))
والله يا أستاذة حضرتك جبتي خلاصة الخلاصة في الكلمتين دول .



ابراهيم رزق يقول...

شمس الشموس

تصدقى الكلام ده قلناه انا و صديقى الدكتور هيثم فى معرض الكتاب
خصوصا الراجل اللى كان بيجعر ورانا بتاع الحلزونة هههههههههه
معاكى كل الحق

سواح في ملك اللــــــــــــــــــه- يقول...

كان زمان الكاتب

لازم يكون دارس او بيفهم لغة عربية

فكنتي لاتجدي في الكتاب خطأ لغوي



قمر وليل وغيوم يقول...

للاسف دى مهزله من ضمن مهازل كتير فى مجتمعنا
بس لازم يكون فى رقابه يعنى لو الكتاب يستحق النشر يتنشر انما لو.كلام فارغ يرفضوا النشر
بس فعلا هو الموضوع موضوع فلوس وياما ناس موهوبه جدا وكتاباتها رائعه لكن محدش يعرفهم

أحمد أحمد صالح يقول...

صباح الأنوار والأزهار أستاذتنا.
أنا كان نفسي جداً أحضر حفل التوقيع عشان أتشرف بمقابلة حضرتك ومقابلة الأستاذ إبراهيم ودكتورة شيرين وكل الكوكبة الرائعة دي، لكن الظروف ما سمحتش، وإن شاء الله تتعوض.
..
أما موضوع النشر والكتب فأنا متفق معاكي فيه، وأنا تقريبا مش بأشتري كتاب لمؤلف ما أعرفوش غير أما أتصفحه الأول وبأقدر بنظرة بسيطة أعرف مستواه وإن كان يستحق فلوسي ووقتي ولا لأ!
وبكل تأكيد موضوع "النشر لمن يدفع" واحد من أسباب تدني مستوى بعض الكتب على الساحة الأدبية، فلو كان هناك حد أدنى للإجادة يجب توافره لتغير الوضع. لأن من تتاح له فرصة النشر مع ضعف ما يقدم مش هيطور من كتابته طالما بينشر بفلوسه، لكن لو وضعت معايير جودة فأكيد هيطور من اسلوبه وطريقته عشان يفوز بفرصة النشر.
..
صباحك أمل وتفاؤل استاذتنا
تحيتي واحترامي.

ذات النطاقين يقول...

عندك كل الحق ...
دا انا لما بشوف الكتب دي .. بقول ما اعمل كتاب انا كمان .. ماهي بقت مولد وصاحبه غايب .. اه والله :(

doaa elattar يقول...

فعلا للاسف دلوقتي اي حد معاه فلوس يقدر ينشر اي كلام حتى لو معسلة يابطاطا .. وناس تانية كتاباتها رائعة ولا نسمع عنها .. بس اعتقد دي فترة وهتعدي والكويس هيثبت نفسه :)

رحاب صالح يقول...

معاك حق جدااا
دي مش حركة ثقافية الي عايشينها انا بصراحة كتير بشوف كتب بقول حرام انها اتنشرت خسارة فلوس وورق وده لانها مالهاش اي قيمة للأسف

شمس النهار يقول...

* P A S H A

مساء الهنا :)

شكراااا :)

شمس النهار يقول...

*ابراهيم رزق

لأ بتاع الحلزونة ده جاب لي صداع
والمشكلة ماكنتش فاهمه منه حاجة اصلا :)

شمس النهار يقول...

* سواح في ملك اللــــــــــــــــــه

لأ زمان الكاتب ده حاجة تانية خالص
ومع هذا كان بيجيب مصحح لغة للكتاب
ليتأكد ان الكتاب لغويا صح

شمس النهار يقول...

* قمر وليل وغيوم

هو ده اللي ضايقني
ان الناس دي طابعة الكلام الغريب ده
وفي مواهب مش لاقية حتي اللي يسمع بيها

شمس النهار يقول...

* أحمد أحمد صالح

مساء الهنا يااحمد
الحقيقة انا اللي كنت هتشرف بمقابلتك والتعرف عليك
بس ان شاء الله ملحوقة المرة الجاية
ان شاء الله تحضر الندوة
وبالنسبة لدور النشر بقت بتجري ورا الفلوس وبس
زي السينما الهابطة

شمس النهار يقول...

* ذات النطاقين

:))
اعملي كتاب ولا يهمك ونعمل لك اجمد حفلة توقيع :)

شمس النهار يقول...

* doaa elattar

الكتب للأسف بتطلع بره مصر وبره بيفكتروا ان ده بقا مستوي الثقافة في مصر

شمس النهار يقول...

* رحاب صالح

لا قيمة ولا معني ولا بتدي اي خبرة ولا تجربة ولا اي بتنجان كتب الطبيخ احسن منها :)

!!! عارفة ... مش عارف ليه يقول...

عندك حق
وحكاية لجان القراءة دي مش مفعلة كما ينبغي المهم السبوبة

شمس النهار يقول...

* !!! عارفة ... مش عارف ليه

الحياة الثقافية في مصر اتشوهت بسبب السبوبة دي :)