الثلاثاء، 18 فبراير 2014

جامع :)

صباح الخير
كل ماتكلم حد وتقوله تصدق
طلعت الزكاة دي قامت عليها حرب
يقولك اللي يعوزه البيت يحرم علي الجامع
:)
وناس تقول حرام 
وناس تقول لا الجامع الاهم
ودخلت منتدي لاقيت خناقة طويلة عريضة
وتراشق بالكلمات ان الجامع بيت ربنا اهم من اي حاجة
واننا امرنا ان نعمر مساجد الله
:)
عايزة بس افهمكم 
ان الجامع هنا مش الجامع اللي بنصلي فيه
زماااااااان في مصر 
كان في رجل مهمته جمع الزكاة المفروضة
اسم وظيفته كده
(جامع الزكاة) 
سبحان الله
وطبعا الزكاة انواع واحكام
اهمها ان الفقير والمديون ماعليهوش زكاة
ده بياخد زكاة اصلا
فاكان الحكم الشرعي 
ان اللي يعوزه البيت يحرم علي جامع الزكاة
يعني مايخدش من البيت ده 
مال الزكاة
وبمااننا كامصرين نموت في الاختصار 
بقت بدل
اللي يعوزه البيت يحرم علي جامع الزكاة
بقت
اللي يعوزه البيت يحرم علي الجامع
:)
والناس اللي بتتخانق دي
ماحدش فكر يجيب اصل الكلمة
المهم نتخانق وخلاص
بس خلاص
:)
فوتكم بعافية

هناك 12 تعليقًا:

Aya Mohamed يقول...

اساسا الزكاة ركن من اركان الاسلام
وليها احكام وليها نسبه
مش فاهمه ليه يحصل مشكله علشانها
اما بقى المصريين من قديم الازل بيحبوا يبسطوا اى حاجة لحد ما هيضيعونا ^__^

!!! عارفة ... مش عارف ليه يقول...

حلوة المعلومة

أول مرة أعرفها فعلا :)

قمر وليل وغيوم يقول...

سبحان الله هما كده المصريين
بيتخانفوا بدون فهم
تحياتى ليكى وموضوعك جميل ياقمر

الاحلام يقول...

زمان كان كل شىء جميل ومع مرور الزمن شعرنا بالمراره بافتقادنا كل شىء جميل تمنياتى بان يعود لنا كل شىء جميل وتعود لنا الابتسامه الرقيقه
تحياتى ابوداود

موناليزا يقول...

حلوة التدوينة
والغريب أن حتى البرامج الدينية اتكلموا في النقطة دي من غير مايقولوا أصل الكلمة إيه :)

شمس النهار يقول...

* Aya Mohamed

علشان كل واحد متكبر يسأل
وعامل نفسه بيعرف كل حاجة
ده ينفع في اي حاجة الا في الدين

بس هو احنا لسه هنضيع :)

شمس النهار يقول...

* !!! عارفة ... مش عارف ليه

:))

طيب الحمد لله طلعتوا مني بحاجة اهو :)

شمس النهار يقول...

* قمر وليل وغيوم

لا ماالخناق دلوقتي وخصوصا بعد الثورة بقا عادي :)
ربنا يكرمك

شمس النهار يقول...

*الاحلام

زماااااان كان شئ والان شئ
ساعات كتير باشفق علي احفادي من اللي جاي

شمس النهار يقول...

*موناليزا

عارفة ليه علشان كله بيستسهل
ماحدش بيراجع

ولا يبحث ولا يدور
كله حافظ كلمتين يطلع يقولهم في البرنامج وياخد القرشين ويمشي

Gamal Abu El-ezz يقول...

أموال الزكاة حق ولا تفرض سوى فى المال الفائض وبنسبه معينه فيه أى ليس كل مال فائض يبلغ نصاب الزكاة
أما بالنسبه للمسجد فقد جعلت الأرض للمسلم مسجدا وظهورا أى يجوز الصلاة فى اى مكان حتى لو على التراب مادام طاهر فليس هناك ما يجعل الأموال تذهب للجامع من الذكاه فليس من مصارف الزكاة بناء المساجد لان الأرض كلها مسجد
وللأسف تبنى المساجد بكثره ولا تجد من يعمرها
الزكاه فرض ولا تجبى من الأموال الضرورية إنما من المال الفائض بشرط مرور حول ( عام ) كامل
تحياتى

شمس النهار يقول...

* Gamal Abu El-ezz

تعليقك اثري التدوينة

وهنا انا لااتعرض للزكاة
ولكن للمفهوم الغلط لكلمة اللي يعوزه البيت يحرم علي الجامع