الكتالوج ضاع !!

الكلام اللي بالاحمر ده لاقيته واحده نشراه
علي الفيس
عجبني وعلقت عليه كمان
قلت انشره هنا ونتناقش فيه 
ليه الام في مجتمعنا كده
الكلام اللي بالازرق ده تعليقي
**********

((الست مننا تشتغل ذي البقرة طول النهار 

ويطلع عينها وتتمرمط من اللي يسوا واللي ميسواش 

في الشغل والشارع .. 

وتروح تطبخ وتكنس وتغسل وتنشر وتكوي وتذاكر

 وتدلع وتطيب الخواطر 

وتشتغل سواقه للبيت توصل تمرين ودروس ودكاتره .....

وتنام اخر واحده وتصحي اول واحده ...

وتصحي في عز الليل تدي دوا وتغطي العريان... 

وتقوم الصبح تحضر فطار ولبس مدرسه وتستني الباص 

وتروح شغلها عشان تدور الساقيه من جديد ... 

ومافيش مانع تقف مع الصنيعيه 
وتروح للميكانيكيه 
وتغير كاوتش العربيه وتخلص ورق من المصالح الحكوميه وتعمل زيارات اجتماعيه وتجامل الي جاملها 
 و تزعل وتاخد علي دماغها وتتأمص ومحدش يعبرها ويتعمل عليها حوارات وتسكت عشان تمشي الدنيا وتيجي علي نفسها وتسامح عشان العشره وتقبل الأهانه مره واتنين عشان دي ذله لسان وضغوط نفسيه وتتحمل الوحده عشان دي ظروف ومش بأديه وتستحمل مودك عشان لازم تكوني اد المسئوليه ,,,,,, 
وبعد كده يقولك الستات دي عايزه كاتلوج .... 
لا يا رااااجل ... 
عذراً ايها الرجال الكتالوج ضاااااااااااااع :((

*************
وتفضل الام في الطاحونه دي مستنيه كلمة شكر او كلمة طيبه اللي هي في الاصل صدقه في العادي اومال لماتتقال للأم تبقا ايه؟
ومع هذا لاتسمع الام شئ وتقابل ربها ويندم الابناء علي تقصيرهم في حقها وقت لاينفع الندم 
هيجيبوها منين ماخلاص مابقاش في مرمطون يبقوا يستغفروا ربهم بقا:)

 

العيد !!

عيدنا والحمد لله

بس مش عارفه ليه العيد ده

مااقدرتش اطلع من نافوخي 

معتقلين السعوديه

اللي بيتجلدوا وفي غربه

والله اعلم بيهم وبعائلاتهم

قضوا العيد ازاي

وخصوصا اللي قامت عليهم هوجه وبرامج توك شو واعلانات تعد فلوس

وجرايد وخناقات علي النت

وخلاص خلصة الهوجه

والناس دي لسه بتتجلد ومحبوسه وماحدش عارف ليه

والحقيقه فين 

تحيه لعائلاتهم

وخصوصا نجلاء وفا 

والجيزاوي

عيد سعيد

كل سنه وانتم طيبن

ويارب كلكم فرحانين

ومعيدين

ومحققنين كل احلامكم

زحمه

ازمة المرور عندنا في مصر

ازمة سوء خلق مش اكتر

اول امبارح خرجت رحت كارفور اللي في صن سيتي اللي علي الدائري بتاع شيراتون المطار

المفروض الطريق ده بالعربيه ياخد ربع ساعه

اخد ساعتين ونص الطريق كان مغلق تماما من اول نزلت كوبري الماظة

ماعلينا عدي ياليله

امبارح كان عندي مشوار في شارع الاربعين

واللي مايعرفش شارع الاربعين ده شارع في اخر جسر السويس قبل سوق القنال قبل طريق العبور والسلام والعاشر من رمضان والاسماعيليه طريق يعني بتاع كله موصل لكله

اوم انا بقا بسزاجتي انزل من البيت الساعة اربعة ونص وقلت اخطفففففففففففف 

المشوار ده واطلع علي المعرض اللي في مصر الجديده

خادتولي بالكم بقا من المثلث اللي عايزه اعمله

م نصر جسر السويس مصر الجديده

ده انا طيبه بشااااااااااااااااكل

المهم اخدت معايا تمرتين وشوية مايه وقلت ابقا اكل اي حاجه في المعرض

معايا ياحضرات

وصلت انا بقا الساعة كام شارع الاربعين

الساعة تسعة ونص 

واللهم صل وسلم علي حبيبنا المصطفي محمد

خمس ساعاااااااااااااااااات

ده مش ازمة مرور دي ازمة اخلاق

تلاقي علي الرصيف اللي يمينك اوتوبيس جاي عكس الاتجاه ماشي علي الرصيف وينزل منه تلاته اربعه يوقفوا العربيات علشان البيه السواق ينزل من علي الرصيف ويعدي للأتجاه التاني في اليوتيرن

عربيات ساده اليوترن اصلا عامله صف خامس فاطبعا سادين الطريق علي الجاي وهيمشي طوالي

طبعا عربيات بالكوم اتعطلت

طبعا انهيار وخناقات بين السواقين مين يعدي الاول

حاجه غير ادميه

وطبعا بنزين اتهلك في غير موضعه

ويقولك وفروا في البنزين والكهربا

وده مننا ويقولك مرسي قال هيحل ازمة المرور في 100 يوم

ده عايز 100 سنه علي مانهذهب من نفسنا 

ونتصرف كابني ادمين مع بعض

وكل واحد يلتزم ببحر الطريق ماتبقاش سواقه في سيرك

لو احترمنا بعض واحنا سايقين

الشارع هيحترمنا وماهيبقاش في زحمة

هيكون في زحمة منظمه ماتتعبش الاعصاب

ونظم المواعيد

مايبقاش الشعب كله في الشارع في معاد واحد

كله بيفتح في نفس الموعد وكله بيقفل في نفس الموعد

وكله بيخلص شغل في نفس الموعد

الكلام ده صح !!؟؟

 http://www.klmty.net/2012/10/blog-post_6271.html

الكلام ده صح

؟؟

!!

الفصل التاي بتاع صلاحيات رئيس الجمهوريه

دي كده جمهوريه ملكيه 

الكلام ده لو صح يبقا ايه المقصود

ولو غلط طيب ايه برضوا المقصود من نشره

هي البلد ناقصه

الكلام ده لو فعلا مكتوب كده

يبقا غلبوا السادات لما عمل كل السلطات في ايده في دستور 71

علشان كان داخل علي حرب

وحاطط في دماغه انه هيفاوض

وعلشان ماحدش يستجري يعارضه

عمل دستور 71

اللي عمل رئيس الجمهوريه اله

تفتكروا الكلام ده لو صح

ينفع دلوقتي بعد 25 يناير

لا يفر احدكم

بالنسبة لموضوع غلق المحلات

ايوة انا موافقه

ليييييييييه

؟؟؟؟

الدنيا تهدي شوية

الناس ترجع تصحي بدري

مش ده الدين بتاعنا

الليل سبات والنهار معاش

كده كده الشركات بتقفل الساعة 4

وفي الساعة 5

صح

؟

طيب

اللي عايز يشتغل بعد الضهر عنده من 4 الي 10

او من 5 لعشره

الحكومة بتقفل2

وفي 3

يعني برضوا هيبقا في وقت للي عايز يشتغل شغلانه تانيه يزود دخله

واللي هيقفل المحلات التجاريه

لكن المطاعم اعتقد مش هتقفل

في العالم ماحدش بيفتح 24 ساعه غيرنا

سان فرانسيسكو اللي هي قايمه علي السياحه

كله علي 9 قافل

باقي كاليفورنيا علي 5 باي باي كله بيتك بيتك

اوروبا كذلك وماحدش قالك عجلة الانتاج

سنة 83 النظام ده اتعمل

وكان من 7 

المحلات بتقفل وكانت الدنيا رايقه وجميلة

انا شخصيا مبسوطه اني هقفل الساعة 10 وكان نفسي تبقا 9

لييييييييييييه

؟؟

العملاء بيدخلوا المعرض 10 الا ربع 

وماشاء الله يقعدوا يتفرجوا ويتناقشوا نقول ساعتين

مع اننا بنقفل الساعة 10 اصلا 

لكن علشان البلد مصحصحه بيقعدوا

لكن لو النظام علي الجميع 

مش هيحصل ده

:))

معلش نصحي بدري ونقفل بدري مع ان 10 ده مش بدري خالص

ونسيب فرصه للي رايح يزور اهله او الدكتور

والمرور يبقا سهل حبتين

وكده كده

لا يفر احدكم من رزقه حتي يدركه كما يدركه الموت

او

ولو ان احدكم فر من رزقه كمايفر من الموت لأدركه رزقه كمايدركه الموت

مصر مش عزبة حد:)

كتير سألوني

نازلة بكره جمعة مصر مش عزبة حد

قلت

لأ

ولأ ليييييييييييه

علشان انا كنت بنزل لما كنا علي قلب رجل واحد

والمطالب واحده

والهدف واحد

لكن بعد السكلانس اللي حاصل ده

معلش انا بره الموضوع

بعد مااتقسمنا

مصرين

اسلامين وكأن الباقي مش اسلامين

ومسيحين وكأن الطوفان هيصيب المصرين المسيحين والمسلمين لأ

ولبرالين وكأنهم كفره

ويسارين مش عارفه ايه

لأ معلش سامحوني

مش دي مصر خااااااااالص

احنا قلنا

عيش حريه عداله اجتماعيه

لمصر

بكل سكانها

سينا نوبه قبلي بحري

كل المصريين

كلنا بنشرب نفس الميه المعكره

كلنا بنمرض مرض واحد

كلنا مدهوسين تحت نفس الظلم

الولعه طايله الكل مش حد وحد لأ

لما العمارة بتولع

كل السكان بيوتهم بتولع

النار مابتنقيش

تولع مين وتسيب مين

الشباب اللي مات

الموت مانقاش

كله ادهس ومات

يارب ارحمنا

حد يقدر ينقي من الصوره دي

مين مسلم ومين مسيحي ومين لبرالي ومين يساري ومين اسلامييييين

 

في ايه ياسعوديه

هو احنا كل سنه

محتاسين كده

بكره ايه

اول رمضان ولا لأ العيد ولا لأ

اول ذو الحجه ولا لأ

في سنة 1983

ماشاء الله قالك بكره المتمم لشعبان وبكره مش صيام 

حلوووووو

جميل

قوم ايه نلاقي الجوامع فاتحه الميكروفونات عماله تقول بكره صيام يامؤمنين

الساعة كام واحده ونص بالليل

نروح علي الاذاعة نلاقي نفس الكلام

اتصلنا بصحفي صديق في الجمهورية اكد ان السعوديه رجعت في كلامها قالت ان مش عارف مين شاف الهلال

وطبعا كان في ناس نامت

وصحيت الصبح لقت نفسها في رمضان

لأ بجد كانت حوسه لناس كتير

وتستمر خيبتنا نحن العرب ملوك الفلك قديما

مش عارفين بكره اول الشهر العربي ولا لأ

اللهم اهدنا فيمن هاديت

أأأأأمرسي

هو كده

ماتضيقوش خلقي بقا

وانا ست كبيره وخلقي ضيق لوحده

ايوووووووووة

مرسي هيتشتم وهيطلع عليه نكت بعدد شعر راسه ويمكن اكتر

وهيترسم فيه كاريكاتير

وهيطلع عليه اشاعات وقصص

وهيتعارض من كل التيارات الا طبعا تياره ويمكن كمان يتعارض من تياره

هي الدنيا كده

والمصرييييييين بالذات 

عندنا طبيعه جميلة

بنتريق علي اي حاجة في اي حاجة

وان مالقيناش حد نتريق عليه بنتريق علي نفسنا

وكلمة نتريق دي مش موجوده عند حد غيرنا

هاتولي انسان ريس من اول الفراعنة لحد الان ماتهراااش تريقه

وفي العصر الحديث

جمال سادات مبارك

كله طلع عليه نكت واتشتم

مرسي انسان بشر 

عاااااااااادي

ممكن يصيب

ممكن يغلط

ممكن يكدب

ممكن يصدق

دي سياسة ياجماعة

يارب نبطل نعمل الحاكم اله

وياريت الناس اللي بتدافع عن مرسي في الفاضية والمليانه يبطلوا

لاحد سامعكم

ولا هتعدلوا المايله

وهتضروا اكتر ماهتنفعوا

نحن المصرين نمتلك من العند

اللي ممكن يتوزع علي العالم

وماحدش يطلع يقول لي يعني هو ينفع نتكلم عن ريسنا بقلة ادب

هقوله مع كامل احترامي ايوة ينفع

هي كده احنا المصرين كده

وحضرتك شتمت ريسك قبل كده لما كان مبارك

هتقولي مبارك كان كخه

ماشي بس ريسك برضوا

وكان بيتشتم ليل نهار

ومع كل جبروته ماطلعش علينا حد قال

عيييييييييييييب

انا بقا اللي بقول لكم عيب

عيب افتح النت

الاقي الناس عماله تشتم بعض

علشان مرسي

بتتخانقوا علي ايه

بضيعوا مجهودكم واعصابكم علي ايه

ماتتلفتوا للبلاوي السوده اللي احنا فيها دي

اللي بتعملوه ده

كان السبب في اللي حصل يوم الجمعة

فضلتوا تتخانقوا بالكلام

لحد مااترجم ضرب

ارحمونا وارحموا مصر

اي حد ماشي ومصر وتاريخنا

هو اللي باقي

ملحوظة

ان شاء الله هنكمل ابطال اكتوبر

بس بعد مانشوف الخيبة اللي احنا فيها دي

من البراءة للنائب العام ليوم الجمعة

ارحمنا يارب

ادي النخلة وادي الجمل

بما ان 

موقعة الجمل طلعت فوتوشوب

والشعب كان واكل اكله جااااااامدة ونام اوم جاله كابوس جماعي

وبماان 

الشباب اللي راح كان عامل حفلة انتحار جماعي

وبماان 

الشباب اللي عينهم راحت كانوا بس بيهزروا مع بعض 

بس هزار تقيل حبتين تلاته

اووووووم اييييييييييه

احنا بقا نعمل حمله

كل واحد حضر الموقعة يحكي اللي حصل

يووووه

لأ يحكي الكابوس اللي شافه

وياريت يذكر نوعية العشا علشان نقدر حجم الكابوس

اللي عنده نت يكتب عليه

ونتكلم مع الناس في الشارع 

انا شخصيا مافيش عميل جه المعرض عندي الا وكلمته عن الجمل وسنينه

ومن اولي المشاركات

ابراهيم رزق

بيحكي هنا ايه اللي حصل

لما نشوف اخرتها ايه

والفيديو ده لشاب من موقعة الجمل 

سجلت معاه لما رحنا نزور المصابين

قالها حكمة

 وزير ضربنا ووزير طرمخ عليه 

وحسبي الله ونعم الوكيل

حد يرد عليا

عايزة اعرف حاجة

هي موقعة الجمل دي

حد حكاها لنا ولا احنا شفناها كلنا علي الهوي بعنينا

بلااااااااااااااش

انا بناتي الاتنين كانوا هناك مع خطيب واحده فيهم اللي بقا بعد كده جوزها

وكنت هخلص اللي ورايا وهحصلهم لاقيتهم بيكلموني وبيقولوا لي

ياماما ماتجيش

لييييييييييه

في عربيات نقل وميكروباسات

بتنزل ناس شكلهم بلطجيه ومعاهم شوم وسكاكين وكرابيج

قلت لهم ارجعوا انتوا وسيبوا طارق علشان شكلها هتبقا معركة

وفعلا رجعوا البنتين وبقي طارق

ولما رجع حكلنا العجب

يعني المعركة اغلبنا كان له ناس فيها

ولما رجعوا قروا واعترفوا علي كل حاجة

وكمااااااااااااان 

شوفناهاعلي التليفزيون

طيب مين دول

مين اللي موت شبابنا

ايه كانوا بيلعبوا مع بعض وعملوا حفلت انتحار جماعي

ولا التحرير كان مسكون بعفاريت

حد يرد عليا 

حسبي الله ونعم الوكيل

اهوووووووووو

مش قلت لكم

بكره كله ياخد براءة

وبعد شوية 

القتله يرفعوا قضايا تعويض علي اهالي الشهداء

ايوة 

مش اتهموووووووووهم زور

حسبي الله ونعم الوكيل

يوم النهوض باللغة العربية الفصحي

بما اني من مفسدي اللغة العربية

من اول الاملاء الي النحو والصرف

اه وربنا

مااعرف المبتدأ مين ابتدئه

ولا الخبر مين جاب خبره

المهم

الاخت الفاضلة 

كريمة سندي 

صاحبة مدونة تيا

عملت يوم للنهوض باللغة العربية

قلت وماله اشترك 

واهو اكفر عن ذنوبي في حق اللغة العربية

وبهذه المناسبة

عايزة اكلمكم عن الفية ابن مالك

ايوة حد عنده اعتراض

سامعه حد بيقول يعي انتي مبوظه اللغة العربية 

وساكتين لك

كمان هتتكلمي عن الفية ابن مالك

:))

ايووووووووووة 

اصل الالفية دي ليها معايا حكاية

لما كنت في اولي ثانوي كان بيدينا اللغة العربية 

مستر اسمه عبد الله 

ربنا يديه الصحة لو عايش وربنا يرحمه لو مات

المهم مستر عبد الله كان ذاللني بابن مالك ده

كل مااعرب حاجة غلط وطبعا كان ده الاساس

كان يقول لي

 يابنتي لوابن مالك عايش كنتي جبتيله السكر والسكته

وكان يرزعني بيت الشعر اللي فيه القاعدة بتاعت اللي اعربته غلط عادي يعني

وهو اصلا كان حافظ الالفية وكان خريج دار العلوم

وبجد كان شاطر جدا

في مره قالي 

ياحنااااااااااااااان 

ماتجوبيش النحو ارجوكي

 خاليكي في الحاجات التانيه اللي بتحبيها

اصلي كنت بحب كل حاجة في العربي الا النحو

اسيبكم مع الفية ابن ماللك 

اللي اتحفظ بيها كل قواعد النحو

وعلي فكرة 

اللينك ده 

هيعرفكم كل حاجة عن الالفية

وكمان هيعرفكم ان في علوم اخري برضوا ليها الفية
*********
ملحوظة
ان شاء الله هنكمل ابطال اكتوبر بعد النهوض باللغة العربية

ابطال اكتوبر 2

اللواء اركان حرب معتز الشرقاوي
***************************

الصورة اللي تحت دي
 بجوار احد اعلام اسرائيل اللي يمتلك منها 6 اخدهم من المواقع اللي هدها علي دماغ اليهود
اسرائيل عارفينه كويس جداااااااااااااا
ده ابو رجل مسلوخه بتاعهم
من هو :
الإشتراك في حرب عام 1967-
الإشتراك في معركة رأس العش عام 1967-
الإشتراك في حرب الإستنزاف والعبور إلى الضفة الشرقية 9 مرات-
الإشتراك في الإغارة على موقع لسان بورتوفيق الحصين عام 1969 حيث حصل على أول أسير إسرائيلي لمصر-
قام بقتل الجنرال الإسرائيلي/ جافتش قائد جبهة سيناء في كمين نصب له بسيناء عام 1969-
الإشتراك في حرب أكتوبر 1973- قام خلال حرب أكتوبر بالإغارة للمرة الثانية على موقع لسان بورتوفيق وحصل على 127 أسير إسرائيلي لمصر- اشترك في حصار الجيش الثالث -
حصل على 9 أنواط شجاعة من الطبقة الأولى ونوطي واجب من الطبقة الأولى
=========
من الجميل انه لما قابله عبد الناصر علشان يكافئه علي قتله للجنرال جافتش معتز ماطلبش حاجة غير انه يتصور مع عبد الناصر ممااثار دهشت عبد الناصر
لوعايزين تعرفوا الرجل ده عمل ايه في اليهود وحقيقي مش فبركه زي شوارزنجر وفاندام ادخلوا علي اللينكات دي هتحسوا بالفخر 
اول لينك 
تاني لينك 
تالت لينك

هتقروا العجب وخصوصا موضوع السحابة اللي ضللت عليهم عشان تحميهم لحد ماخلصوا المهمه

ابطال اكتوبر

اكتوبر عندي شكل تاني عشان انا حضرت الحرب دي 
ودي مجموعة تدوينات كنت عملتها علشان اكتوبر
النهاردة انا عايزة اقولكم علي العبقري اللي فكر في فكرة الخراطيم واعرفكم بيك
واحب سيرته تنور مدونتي
*************
البطل يافي زكي يوسف ياقوت

جت له الفكرة منين تعالوا نعرف كده:
اشتغل باقى ياقوت مهندس فى السد العالى من سنه 1964 لغاية 1967 و هناك كانو بيستعملو المايه المضغوطه فى تجريف جبال الرمله و سحبها و شفطها فى أنابيب مخصوصه عن طريق ترومبات لإستغلال مخلوط المايه والرمله فى عمليات بنا جسم السد العالى.
اتطبقت الفكره فى خط بارليف اللى بنته اسرائيل على الشط الشرقى لقناة السويس لمنع القوات المصريه من التعديه ، و اتفتحت الثغرات بإستعمال ماية القناه و عدت قوات المشاه و المدرعات المصريه و استولت على الحصون الاسرائيليه و دى كانت بداية الانتصار اللى حققه الجيش المصرى فى حرب اكتوبر.

• اتخرج من كلية الهندسه جامعة عين شمس سنة 1954.
• انضم فى نفس السنه للقوات المسلحه كظابط مهندس فى سلاح المركبات.
• إنتُدب للمشاركه فى مشروع بنا السد العالى من سنة 1964 و لغاية النكسه سنة 1967.
• كان قومندان لتشكيل من تشكيلات الجيش التالت الميدانى و كان رئيس لفرع مركبات الجيش التالت فى حرب أكتوبر 1973.
• خرج من الجيش برتبة لوا سنة 1984، و اتكرم بنوط الجمهوريه من الطبقه الأولى 1973على أعمال استثنائيه فى حرب أكتوبر.ووسام الجمهورية من الطبقة التانية 1984 
• المعلومات دي من اللينك ده

أحياناً نحتاج أن نبتعد قليلاً،،، 

لنـعرف من سيخـرج للبـحـث عـنـا... 

و من سينســانــا.. 

(منقولة)

=====

الكلام ده فعلا بجد

لماتغيب تلاقي ناس مفتقداك وبدور عليك

وناس ولا هي هنا

بشكر كل من جه هنا وبارك لي

وبشكر كل من سأل عليا وعلي بنتي وحفيدتي

وربنا يديم المعروف يااجمل صحبه

*******