الجمعة، 19 أكتوبر، 2012

لا يفر احدكم

بالنسبة لموضوع غلق المحلات
ايوة انا موافقه
ليييييييييه
؟؟؟؟
الدنيا تهدي شوية
الناس ترجع تصحي بدري
مش ده الدين بتاعنا
الليل سبات والنهار معاش
كده كده الشركات بتقفل الساعة 4
وفي الساعة 5
صح
؟
طيب
اللي عايز يشتغل بعد الضهر عنده من 4 الي 10
او من 5 لعشره
الحكومة بتقفل2
وفي 3
يعني برضوا هيبقا في وقت للي عايز يشتغل شغلانه تانيه يزود دخله
واللي هيقفل المحلات التجاريه
لكن المطاعم اعتقد مش هتقفل
في العالم ماحدش بيفتح 24 ساعه غيرنا
سان فرانسيسكو اللي هي قايمه علي السياحه
كله علي 9 قافل
باقي كاليفورنيا علي 5 باي باي كله بيتك بيتك
اوروبا كذلك وماحدش قالك عجلة الانتاج
سنة 83 النظام ده اتعمل
وكان من 7 
المحلات بتقفل وكانت الدنيا رايقه وجميلة
انا شخصيا مبسوطه اني هقفل الساعة 10 وكان نفسي تبقا 9
لييييييييييييه
؟؟
العملاء بيدخلوا المعرض 10 الا ربع 
وماشاء الله يقعدوا يتفرجوا ويتناقشوا نقول ساعتين
مع اننا بنقفل الساعة 10 اصلا 
لكن علشان البلد مصحصحه بيقعدوا
لكن لو النظام علي الجميع 
مش هيحصل ده
:))
معلش نصحي بدري ونقفل بدري مع ان 10 ده مش بدري خالص
ونسيب فرصه للي رايح يزور اهله او الدكتور
والمرور يبقا سهل حبتين
وكده كده
لا يفر احدكم من رزقه حتي يدركه كما يدركه الموت
او
ولو ان احدكم فر من رزقه كمايفر من الموت لأدركه رزقه كمايدركه الموت

هناك 24 تعليقًا:

habiba يقول...

السلام عليكم
بسم الله الرحمن الرحيم
"وجعلنا الليل سباتا والنهار معاشا " صدق الله العظيم

أنا كمان موافقة جدًا..نفسى الشوراع ترجع زى زمان هادية وحتى يلحقوا ينظفوها عقبال الصبح ما يطلع..
هنرتاح كتييير لو النظام ده اتنفذ.
تحياتى :)

الجوكر يقول...

معكِ كل الحق ياشموسه

بس ياريت الكل يلتزم بهذا القرار

لأننا افضل من يحطم الأسعار

اقصد من يحطم القوانين

وياريت الموضوع ده يكون سبب فى عدم قطع الكهرباء كل يوم


وشكرا لزيارتك لمدونتى

وكلماتك التى اسعدتنى كثيراً

الست حشَرية يقول...

هوطبعا الهدوء جميل والصحيان بدرى حلو بس نخليها اخرها 12 كويس زى السعودية مثلا , لان مصر دولة نامية و شبابها العاطل قايم على الشغل الخاص و الباعة الجائلين حالهم هيقف لان خروج الناس مبيبدأش غير بالليل اصلا ,, غير كدة الشوارع لما بتبقا زحمة بالليل بتعمل نوع من الحياة ان لو بنت خرجت تجيب طلب وراجعة مبتبقاش خايفة لكن لو الشوارع فاضية هتخوف اكتر وخصوصا ان فى طلبات عاجلة زى لو حد تعب فجأة ودى ياما بتحصل بالليل يلاقى اللى يجيبله دوا مثلا
انا شايفة ان 12 احسن ومحدش بيخرج بعد 12 اصلا يعنى كله هيروح طبيعى

شمس النهار يقول...

* habiba

وعليكم السلام ورحمة الله وبركاته

صح عمال النظافه هيلاقوا وقت ينضفوا فعلا
ونقوم الصبح بدري زي زمان نلاقي الشوارع نضيفه

شمس النهار يقول...

*الجوكر

اهلا بيك اللي قلته قليل عليك انت فعلا موهوب
ولازم تنشر في المدونة علشان نقرا كلامك الجميل


القرار لو لم يدعم بالمتابعه والغرامه هيبقا زي قلته

شمس النهار يقول...

* الست حشريه

الباعه الجائلين اصلا بيبتدوا متأخر
ماحدش بيشتغل 24 ساعه
المجتمع كله هيتعود علي المواعيد دي
احنا خدنا علي الانتخه خلاص

كله بيخرج بالليل
شوفي الشباب دلوقتي صاحي طول الليل ونايم بالنهار
دي حاجه تجيب الفقر
السعي
البركه في الباكوره

وبالنسبه للبنات
كله هيتعود علي انجاز طلباته بدري
لما كنت في امريكا كنا بنعمل حسابنا علي 5 كل حاجة تبقا موجوده
ومانحتاجش حاجه من السوبر ماركت
ده بيبقا تعود مش اكتر

والناس هتلاقي وقت تزور بعض
الموضوع هو هو
هنصحي بدري المحلات هتفتح 8 بدل 12 هتقفل بدري

المرور هيرتاح
والدنيا هتروق

سواح في ملك اللــــــــــــــــــه- يقول...

اؤيدك ياشموسة بس عاوز اعرف المعرض بتاع حضرتك معرض ايه متخصص في ايه يعني

اندروميدا يقول...

القرار شكله حلو ... بس اي قرار يجي بدون دراسة ... وبشكل متسرع ... وبدون آلية تنفيذ ... مباشرة ممكن نضعه في خانة الفهلوة الادارية ... بمعني ان القرار ... سيتحول في النهاية ... من منطق التنظيم والاجبار .. الي منطق الجباية لتحصيل مزيد من المبالغ لصالح خزينة الدولة ... عن طريق الغرامات .. او اجبار المحال علي الحصول علي تراخيص سياحية برسوم باهظة.... وفي النهاية التعلل بعدم التزام المواطنين بالقرار ... مما يبرر رفع اسعار الكهرباء بشكل كبير .

والحقيقة ... لما يكون 20 مصنع بيحصل علي 60% من دعم الطاقة في مصر !! .... ويكون اول قرار لترشيد الطاقة ... هو غلق المحال ... علي طول الواحد يفتكر المثل القائل ... مفيش فايدة :))

عموما ... ياريت ينفذوا القرار ... بس معاه بالمرة ... منع حرق قش الرز ... لحسن القاهرة اتحولت لمدينة الضباب .... وبعد غلق المحال ... حتبقي مدينة الضباب والظلام :)) ... وكده كتير بصراحة .


تحياتي

فتاه من الصعيد يقول...

اعتقد ان المشكله في ان الموضوع مش هيوفر كتير ... ومحدش عارف ايه لازمته ..

بس بما اني بنت ناس صعايده فطبيعي مابتأخرش عن 10 :))

أحمد أحمد صالح يقول...

يمكن لأني عايش في قرية القرار ده مش فارق معانا كتير، لكن بالنسبة للمدن الكبرى أعتقد هيفرق، فعلا هيكون شئ رائع لو بقى في نظام ومواعيد محددة لغلق المحلات، طبعا مع الوضع في الإعتبار فروق التوقيت بين الصيف والشتاء، يمكن ده فعلا ليه مميزاته إللى ذكرتيها استاذتنا، ولكن اعتقدك عارفة المحلات عندنا غير المحلات في سان فرانسيسكو او المغرب، عندنا بتلاقي نص بضاعة المحل في الشارع! وعشان كدة بيفتحوا 24 ساعة.
القرار لابد أن تكون مدروسة كل جوانبه الإقتصادية أيضا وليس جوانبه الاخرى مثل توفير الكهرباء والحد من الزحمة والدوشة ومثل تلك الأشياء. فبعض المحلات قد تعمل وردية واحدة بعد ان كانت وردتين وده معناه تسريح عمالة تضاف لنسبة البطالة، وأشياء من هذا القبيل.
ويمكن دلوقت الوضع مختلف عن التمانينات والتسعينات، لا نفس حجم المحلات والنشاط التجاري ولا نفس عدد السكان.
وربما يمكن تطبيق القرار على بعض النشاطات التجارية وليس جميعها، في الاخير يجب ان يكون القرار مدروس دراسة صحيحة وكذلك يمكن تطبيقه على مراحل وتلمس النتائج إللي على أساسها يمكن الإستمرار فيه أو إلغاءه.
..
كل التحية والإحترام أستاذتنا.

لـــولا وزهـــراء يقول...

والمرور يبقا سهل حبتين
وكده كده
لا يفر احدكم من رزقه حتي يدركه كما يدركه الموت
او
ولو ان احدكم فر من رزقه كمايفر من الموت لأدركه رزقه كمايدركه الموت
........................
صدقتِ يا شموسة واقنعتيني في الموضوع ده وكنت متأزمة منه جداً بس الحمد لله اقتنعت


لولا

ذو الوجه المبتسم يقول...

السلام عليكم
اولا كل سنة وانتى طيبة
ثانيا بالنسبة للبوست اعتقد ان موضوع التوقيت والقفل والفتح لا يشترط ان يكون له وقت محدد لان الاخرين يعتبرونه فرض عليهم والشعب المصري بطبيعته لا يحب احد يفرض عليه اى شئ
حتى لو كان هذا الشئ بمصلحتهم
وعلى فكرة مش موضوع القفل بدرى هو اللى هيوفر الكهرباء ويعطى الامن والامان كما يقول البعض
الموضوع كبير ويحتاج لتفاصيل كتير
خليها على الله واللى ربنا عاوزه هو اللى هيكون

مرة تانية كل سنة وانتى طيبة
ومعلش لانى بقالى فترة طويلة مش بادخل التدوين والمدونات
تحياتى لك شمس النهار
على فكرة انا حاليا بمصر واحتمال اسافر قريبا ان شاء الله

شمس النهار يقول...

*سواح في ملك اللــــــــــــــــــه

اهلا بيك ياخالد

معرض موبيليا وديكور

شمس النهار يقول...

* اندروميدا

جميل كلامك

بس المصرين بقوا كسلانين :))
بقينا نصحي طول الليل ونام طول النهار
المحلات بتفتح علي الساعة 12
الميه ضربت مره في العماره وتحت البيت فيه سباك ومع هذا قلبنا الدنيا علي سباك صاحي مالقيناش
واستنينا لما الباشا جه الساعه واحده فتح المحل

البركة في الباكوره

لكن مش من العدل ان يكون القرار ده عشان جبايات جديده

ربنا يستر

شمس النهار يقول...

*فتاه من الصعيد

مش موضوع توفير
موضوع الدنيا تهدي شويه
المرور يهدي شويه

شمس النهار يقول...

*احمد احمد صالح

مشكلتنا دايما عدم الدراسة

وبالشكل اللي البلد ماشيه بيه ده
احنا بنحكي مع بعض
وهمه هيعملوا اللي عايزينه
:)

شمس النهار يقول...

*لولا وزهرا

الرزق بتاع ربنا

وانا شخصيا مقتنعه بده جدا

هنكن في البيوت
وترجع الاسر تقعد مع بعض

شمس النهار يقول...

*ذو الوجه المبتسم

:)

اهلا اهلا ياناجي
يارب تكون بخير
وحمد الله علي السلامة

وياريت ترجع التدوين تاني

اما موضوع المحلات
الحكايه مش بس توفير طاقه
عايزين نرجع زي زمان
نصحي بدري ونام بدري

كل سنه وانت طيب

كريمة سندي يقول...

والله رزقكم في السماء وما توعدون .. اتفق معك

شمس النهار يقول...

*كريمة سندي

ونعمه بالله

غير معرف يقول...

انا مع حضرتك تماما و مع هذا القرار لعده اسباب و هى
1 نتعود على نظام موحد للبلد ككل بمعنى نعىد للطبيعه التى فطرنا الله عليها الاستيقاظ مبكرا و ننام مبكرا نحن خربنا السلعات البيولوجيه فى اجسامنا
2 له اثر كتير منا يغفله و هوه تعميق العلاقات الاسريه و التى ضاعت مع كتره ساعات العمل
فالام التى تعمل فى احدى المعارض او المحلات تحرم من ولادها و زوجها و هم كذلك يحرمومنها
3 يعود الامن و يسهل السيطره على البلد بالليل
4 عندما نبدى يومنا مبكرا و ننهيه مبكرا ده شى صحى للجسم و حتى لو اضطررنا الى تقليل ساعات العمل لبعض الفئات فاكيد مفيد صحيا مع بعض المتاهب بس الصحه اغلى من اى فلوس
5 طبعا كل المحلات الخدميه للماكولات و الصيدليات و المشروبات و الملاهى و المطاهم مستثناه من هذا القرار
ولذا فهى عمليه وقت لكى نتعود على النظام و نحس بالفرق و الله المستعان
محمد عبده مصرى و مقيم فى فيينا

مصطفى سيف الدين يقول...

اتطمني يا شموسة احنا في عهد بتطلع فيه قرارات كتير
و مفيش منهم قرار بيتنفذ

شمس النهار يقول...

*غير معرف

:)
اهلا اهلا عرفت تيجي وكمان تعلق
:))
ده شئ هايل اتشجع واعمل مدونه كمان بقا:))
موافقه علي كل كلامك كله
هو ده دين الاسلام ننام بدري ونصحي بدري

شمس النهار يقول...

*مصطفي سيف الدين

تفتكر مش هيتنفذ :)))

انا بقا يامصطفي نفسي يتنفذ
:))
عارف محمد هنيدي لما قال وديني لانيمكم من المغرب يا صين
:))