الثلاثاء، 23 أكتوبر، 2012

زحمه

ازمة المرور عندنا في مصر
ازمة سوء خلق مش اكتر
اول امبارح خرجت رحت كارفور اللي في صن سيتي اللي علي الدائري بتاع شيراتون المطار
المفروض الطريق ده بالعربيه ياخد ربع ساعه
اخد ساعتين ونص الطريق كان مغلق تماما من اول نزلت كوبري الماظة
ماعلينا عدي ياليله
امبارح كان عندي مشوار في شارع الاربعين
واللي مايعرفش شارع الاربعين ده شارع في اخر جسر السويس قبل سوق القنال قبل طريق العبور والسلام والعاشر من رمضان والاسماعيليه طريق يعني بتاع كله موصل لكله
اوم انا بقا بسزاجتي انزل من البيت الساعة اربعة ونص وقلت اخطفففففففففففف 
المشوار ده واطلع علي المعرض اللي في مصر الجديده
خادتولي بالكم بقا من المثلث اللي عايزه اعمله
م نصر جسر السويس مصر الجديده
ده انا طيبه بشااااااااااااااااكل
المهم اخدت معايا تمرتين وشوية مايه وقلت ابقا اكل اي حاجه في المعرض
معايا ياحضرات
وصلت انا بقا الساعة كام شارع الاربعين
الساعة تسعة ونص 
واللهم صل وسلم علي حبيبنا المصطفي محمد
خمس ساعاااااااااااااااااات
ده مش ازمة مرور دي ازمة اخلاق
تلاقي علي الرصيف اللي يمينك اوتوبيس جاي عكس الاتجاه ماشي علي الرصيف وينزل منه تلاته اربعه يوقفوا العربيات علشان البيه السواق ينزل من علي الرصيف ويعدي للأتجاه التاني في اليوتيرن
عربيات ساده اليوترن اصلا عامله صف خامس فاطبعا سادين الطريق علي الجاي وهيمشي طوالي
طبعا عربيات بالكوم اتعطلت
طبعا انهيار وخناقات بين السواقين مين يعدي الاول
حاجه غير ادميه
وطبعا بنزين اتهلك في غير موضعه
ويقولك وفروا في البنزين والكهربا
وده مننا ويقولك مرسي قال هيحل ازمة المرور في 100 يوم
ده عايز 100 سنه علي مانهذهب من نفسنا 
ونتصرف كابني ادمين مع بعض
وكل واحد يلتزم ببحر الطريق ماتبقاش سواقه في سيرك
لو احترمنا بعض واحنا سايقين
الشارع هيحترمنا وماهيبقاش في زحمة
هيكون في زحمة منظمه ماتتعبش الاعصاب
ونظم المواعيد
مايبقاش الشعب كله في الشارع في معاد واحد
كله بيفتح في نفس الموعد وكله بيقفل في نفس الموعد
وكله بيخلص شغل في نفس الموعد

هناك 29 تعليقًا:

ابراهيم رزق يقول...

شمس الشموس

ههههههههههههههههههههه
دى مصر يا شمس
البنى ادم فى مصر بيقضى تلت عمره فى العربية
فعلا هو سلوك لان فى الغالب لا نعرف سبب الازمة

تحياتى

أمل حمدي يقول...

للاسف في كل مكان حاجة غير طبيعية أزمة المرور
كل سنة وأنت طيبة وبخير يا رب شموسة أنت وكل حبليبك يارب

لـــولا وزهـــراء يقول...

حاجه غير ادميه
وطبعا بنزين اتهلك في غير موضعه
ويقولك وفروا في البنزين والكهربا
وده مننا ويقولك مرسي قال هيحل ازمة المرور في 100 يوم
ده عايز 100 سنه علي مانهذهب من نفسنا
ونتصرف كابني ادمين مع بعض
>>>>>>>>>>>>>>>>>>
عندك حق !!!! الايد لوحدها هتعمل ايه لكن لو كلنا شربنا جرعة الاخلاق اللي من ايام ارض النفاق كنا اتقدمنا
مش ازمة بلدنا هتتحل في 100 يوم
ممكن تتحل في 100 دقيقة بس كل واحد يبدأ بنفسه
كنت بعد الثورة بقول ان ممكن مصر كلها تتبيض في 10 دقايق لو كل شارع ادهن في 10 دقايق مصر كلها هتكون في خلال 10 دقايق مصر جديدة
المشكلة اننا نبدأ من جوا الاول ننضف القيم اللي مش كويسة


لولا

شيرين سامي يقول...

و الله يا شموسه أنا بقى بيجيلي كرامب أو شد عضلي في رجلي من كتر السواقه..
من مدينة نصر للمنيل يومياً
زائد الدقي في الويك إند
دمار شامل يعني
باخد معايا مية و بسكوت و كل حاجه
و الناس كتيييير في كل مكان و مفيش أي إحترام أو ذوق في المرور إلا حالات نادره.
بس أفتكر ممكن تتحل برضو لو في قوانين مرور صارمه.

و متزعليش نفسك كلنا في الهم واحد :)

كريمة سندي يقول...

الله يعينكم والله الدنيا كلها زحمة مش بس عندكم والموسم على الأبواب .. كل عام وانت بخير

محمود احمد يقول...

السلام عليكم
آسف على التاخير في الرد ، معلش كان النت عندي فاصل اليومين الى فاتوا و لسه راجع

مدونتي انا غيرتها بس ان جوجل كان زعلان مني ، و على ما تصالحنابقي :)
مدونتي الجديده هي دي :
http://7ewratna.blogspot.com/


و لي عوده ان شاء الله و رد على هذا البوست :)

تحياتي لحضرتك

فتاه من الصعيد يقول...

القاهره زحمه فعلا وفعلا الواحد لما بيركب بياخد وقت اطول من لو مشي :)))

ربنا معاكم :)

سواح في ملك اللــــــــــــــــــه- يقول...

بصي ياشموسة

احنا شعب يعشق الفوضي

محتاجين نتربي من اول وجديد

شمس النهار يقول...

* ابراهيم رزق

بيبقا المشوار مايخدش نص ساعه بتعمله في اربع ساعات

ملل الصراحه

شمس النهار يقول...

*امل حمدي

الازمه بقت كل يوم وكل ساعه
مابقاش في وقت زروه بقا اليوم كله خالتي زروة دي
كل سنه وانتي غاليه وحبيبه

شمس النهار يقول...

لولا وزهراء

مابنعرفش نعمل اي عمل جماعي

اي حد بيسوق فاهم ان الشارع ده ملكه هو
كنت معديه من شارع مايخدش نص دقيقه لاقيته مربوك علي الاخر وعربيه عربيه بتعدي
لما وصلت لنقطة الاختناق لاقيت عربيه بيبسي بتنزل بضاع لسوبر مركت غايه في الصغر

شارع بحاله مسدود علشان محل صغير بتنزل له بضاعه

لازم قوانين وتطبق بصرامه علي الجميع
مش بس مشكلة المرور هتتحل لأ كل مشاكلنا هتتحل

شمس النهار يقول...

*شيرين سامي

بجد الله يكون في عونك وكل اللي شغله يبعد عن بيته كده كتير

ربنا يصبركم
انا كنت هموت جوه العربيه خمس ساعات علشان اروح مشوار

استهلاك وقت في الفاضي
استهلاك طاقه علي الفاضي
ده غير استهلاك الاعصاب في مالايفيد

كل سنه وانتي طيبه وبخير:)

شمس النهار يقول...

*كريمه سندي

كل سنه وانتي طيبه
طبعا مكه دلوقتي زحام شديد من ضيوف الرحمن

ربنا يتقبل منهم

شمس النهار يقول...

*محمود احمد

وعليكم السلام ورحمة الله وبركاته

ولا يهمك النت كاس وداير علي الجميع
:)

شكرا علي لينك المدونه ان شاء الله ازورها

كل سنه وانت طيب

شمس النهار يقول...

*فتاه من الصعيد

واي زحمه دي ماباقتش زحمه
اجمل نكته قريتها النهارده

ان هنغير اسم جمهورية مصر العربيه
ل
جمهورية مصر في العربيه
:))))

كل سنه وانتي طيبه وبخير

شمس النهار يقول...

*سواح في ملك اللــــــــــــــــــه

اعتقد ان احنا اللي بدعنا الفوضي
:)))

كل سنه وانت طيب وبخير وسعادة :))

eng_semsem يقول...

انا معاكي ان السبب الرئيسي للازمه ازمة اخلاق وان احنا محتاجين نبص في المرايه ونعالج اخطائنا عشان الاوضاع تتحسن
تحياتي

شمس النهار يقول...

*eng_semsem

ولازم يتعمل دورات توعيه للسواقين بتوع الاوتوبيسات والميكروباص والنقل
ويتعمل عليهم حملات دوريه
اغلب دربكة المرور منهم

مسلم مصرى يقول...

طبعا أزمة أخلاق
بصى أمشى أو هاتى عجلة :)

الازهرى يقول...

صباح الخيييييييييييير

سيبك إنتى
المهم أعصابك
بالدنيا وما فيها

كل لحظة وإنت وكل التيتات والبنات وإجوازهم وكل الحبايب فى خير وسلام ومحبة

شمس النهار يقول...

*مسلم مصري

:)))))
شوف هو حل جميل

بس كان ممكن من 30 سنه
:))
لكن دلوقتي لاينفع مشي ولا عجل
البركة فيكم انتم الشباب امشوا او اركبوا عجل وسيبوا لنا احنا الطرق نمشي فيها بعربياتنا
:)))
ده حتي الاتنين رياضة جامده ونافعه

شمس النهار يقول...

*الازهري
كل سنه وانت بكل خير وصحة وسعادة

والسنه الجايه افرح بيك في بيت العدل كده
:)))))

gogo!sf يقول...

المهم انك بخيييييير

كل سنه وحضرتك طيبه
عيد سعيد على حضرتك وعلى اسرتك يارب

اندروميدا يقول...

كل سنة وحضرتك طيبة ... وعيد سعيد عليكي وعلي كل الاهل والاحباب ... وربنا يتقبل منك الصيام والدعاء وصالح الاعمال .

تحياتي

mrmr يقول...

علشان زحمه مصر مش بحب انزل فيها ابدا
وبصدق ارجع البلد فى اقصى سرعه
كل سنه وانتى طيبه يا شموسه
ربنا يسعدك يا حبيبتى

شمس النهار يقول...

*gogo!sf

كل سنه وانتي طيبه وبخير وصحة وسعادة

شمس النهار يقول...

*اندروميدا

كل سنه وانت بخير
ويتقبل منك دعواتك الجميله:)

شمس النهار يقول...

*mrmr

القاهره بقت فظيييييييييييييعه

ربنا يرحمنا

وكل سنه والقاهره زحمه وهده حيلنا وحيل عربياتنا:))

غير معرف يقول...



Here is my homepage ... webpage