الخميس، 30 أبريل، 2009

سؤال مجرد سؤال

المفروض النهارده كنت اكتب عن الحاجات اللي بتضيع الحب وتهده
بس الحقيقه كنت بأتكلم مع صديقتي المقربه
واتكلمنا في موضوع غريب ومش غريب حبيت نشترك في الاجابه عليه
*ليه المحب بيكون عارف ان حبيبه مش صادق في حبه او حتي حبه مش كفايه ورغم كده بيكمل الي النهايه اللي هي مش سعيده طبعا .ليه مابيختصرش العذاب وينهي الموضوع ويضع لعذابه نهايه ؟
*وليه المحب بيكون عارف ان حبيبه غير ما كان مبين يعني اتكشف واحده واحده امامه وماطلعش الشخصيه اللي كان عاملها لنفسه وبرغم كده برضه بيكمل الي النهايه
*وليه المحب بيكون عارف ان حبيبه بيكذب عليه ورغم كده بيكمل برضه ؟
*الحب له علامات ودلائل بتختلف من شخص لشخص ليه لما المحب بيحس ان حبيبه مش مديله المشاعر اللي هو عايزها ومش محتويه برضه بيكمل
*ليه المحب لما بيلاقي ان حاله هو هو وان الحبيب ده مااضفش ولا غير حاجه والوحده هي هي ليه برضه بيكمل الي النهايه الغير سعيده؟
السؤال
-------
ليه الحالات السابق ذكرها بيكملوا ليه ؟
وليه الانسان لما بيحس انه مش قادر يدي اللي قصاده المشاعر اللي هو عايزها ليه بيكمل معاه ليه يفضل يعذب فيه للنهايه ؟
ليه في ناس دايما تعيد وتعيش الفشل هو هو وبنفس الاخطاء ؟
طبعا انا جاوبتها علي قد ربنا ما الهمني بس احب نشترك واعرف هتقولوا ايه
واعتقد ده هيفدنا واحنا بناقش السلبيات اللي بتموت الحب

الأحد، 19 أبريل، 2009

نبتدي منين الحكايه ؟

Get this widget Track details eSnips Social DNA

طريق النحل - فيروز

تحديث
----------

انا جيت ازيكم كلكم
طبعا اسكندريه جميله جدا جدا كالعاده .كنت بسمع اغاني وانا سايقه واول ما لاقيت البحر قصادي وهندخل شمال علي طريق الكورنيش لاقيت اغنية فيروز طريق النحل ابتدت. كانت صدفه جميله جدا عشان انا بحب الاغنيه دي جدا وبحب لحظة ماتقع عيني علي البحر اول ماادخل اسكندريه.
والحمد لله كان الجو جميل والبحر جميل علي فكره انا بتفرج عليه
من بعيد بس اي من البلكون :)
ان شاء الله نبتدي الشغل من بكره وارد علي كل الحبايب
وحشتوووووووني

تحديث:
------ ان شاء الله هسافر الصبح اسكندريه وهرجع الاحد
البوست امانه عندكم ومش عايزه خناق تناقشوا بالراحه وهدوء ماتفرحوش فينا حد :)
وان شاء الله لما ارجع ارد علي التعليقات .
---------------------------------------------------------------------------------------
كده الاستفتاء 200%
ونعم الديموقراطيه :)
---------
نرجع نكتب ونتكلم ونتحاور ونتشاور علي بركة الله
بس ليا عتاب علي البعض لأن كتير لما علقوا قالوا انهم متابعين بس مش بيعلقوا
ليه طيب؟
ياريت ياجماعه نشترك كلنا ونتكلم مع بعض من خلال تجاربنا وخبراتنا في الحياه
ونتواصل ونحسس بعض اننا بنتكلم مع بعض
وكمان اغلبية الشباب مااشتركش في المناقشه خالص
ارجوا ان الشباب يشترك بفكره ورؤيته في الموضوع
---------------------------------------------
ونبتدي منين الحكايه
--------------------
البوست السابق اتكلمنا علي الحب عموما و اختصينا بالمناقشه الحب بين الرجل والمراه اللي نتاجه اسره سعيده وابناء اصحاء نفسيا
وبالتالي مجتمع راقي جميل
بعد ربنا مايوهبنا هذا الحب الجميل البرئ اللي هو اصلا نعمه من نعم الحياه
ازاي نحافظ عليه ونحميه ونكبره ونرعاه ونشكر ربنا عليه ؟
الشكر علي النعمه بيزودها (( ولأن شكرتم لأزيدنكم ))
وينطبق ده علي الحب لو شكرنا ربنا عليه وحافظنا عليه واتقينا الله في الحبيب وفي نفسنا هيزيد وهيكبر
----------------------------------------------------------
**اول حاجه بتحافظ علي الحب تقوي الله في كل شئ يخص هذه العلاقه
الرجل يتقي الله في حبيبته بأن يحافظ عليها ويضع اخته مكانها
يخاف علي سمعتها وعلي وضعها الاجتماعي وقبل ده كله يحافظ علي علاقتها بربها
يعني يعينها حتي تعينه علي ذكر الله وحفظ حدود الله فهو خير حافظ
لوده تم ربنا هييسر باقي الخطوات
--------------------------------------
**تاني حاجه الود والتفاهم والتحاور بلياقه وعدم التشبث بالرأي يعني ماحدش يقول انا كده وخلاص ياتقبلي كده يابلاش
مستند علي انها بتحبه وماتقدرش تعيش من غيره والعكس ايضا
هنا ده انا باسميه قهر وعمر المقهور مايعرف يحب
يبقى التفاهم بالحسني اجمل والطف حتي نصل لحل وسط يرضي الطرفين
---------------------------------------------
**تالت حاجه التضحيه ان كل واحد يحس انه بيضحي علشان التاني
ماحدش يقول لا انا متعود علي كده اتغيري انتى او اتغير انت
ماحدش بيتغير لكن فيه تضحيه
مثلا واحد تزوج من مريضه بحساسية الصدر و بيشرب سجاير ومتعود يشرب سيجاره قبل النوم
ليه مايضحيش بيها عشان ما يأذيش شريكته في الحياه
وامثلة التضحيه كتير واعمق من كده بكتير
وشقيق التضحيه انكار الذات يعني الكل في واحد احنا الاتنين اصبحنا شخص واحد مافيش انا وانت فيه احنا وزي مابيقولوا المصلحه واحده
-------------------------------------------------
**رابع حاجه الرحمه والشفقه : نرحم بعض مانضغطش علي بعض لحد ماواحد من الاتنين يطق ويرحل
ولما يخسر الحبيب حبيبه من كتر الضغط عليه يسأل نفسه انا عملت له ايه ؟
والمفروض يسأل نفسه انا ماعملتلوش ايه ؟
الاحساس بالرحمه تجاه بعض والتماس العذر يعنى ما ارهقش حبيبي بالطلبات وما ارهقهاش بالاوامر والنواهي
يعني نعامل بعض بالرحمه وبالراحه
مانرميش بالمسؤليه علي بعض فالواحد يشيل المسؤليه والتاني يتفرج لانشيل مع بعض و نتشارك
-------------------------------------------------------
**خامس حاجه العطاء ماينفعش طرف يفضل يعطي ويصبر ويشتاق ويستني كلمه اولفته من الطرف التاني
والطرف التاني مابيعملش حاجه غير انه بياخد وبس بياخد ومابيديش
ولما يقف ويحاسب نفسه ويلاقي ان اللي قصاده ما ادالوش ابسط حقوقه
ويتأكد من الحقيقه بيبعد في ذهول الطرف التاني اللي ماعرفش يعطي عشان يحافظ علي حبيبه
----------------------------------------------------
**سادس حاجه السعاده : و هى ان كلا الطرفين يحاول يسعد التاني بكلمه حلوه بلفته حلوه ده حتي الكلمه الطيبه صدقه وتبسمك في وجه اخيك صدقه
ده مع الاخ والصديق يبقا اولي يكون مع الحبيب
ولما الانسان يسعد شريكه اكيد شريكه هيسعده عشان هو سعيد
ماينفعش اضغط على حد واخليه حزين وتعيس واقول له اسعدني لأن فاقد الشئ لايعطيه
-------------------------------------------
ده رأيي المتواضع في ازاي نحافظ علي الحب ؟ و اكيد فيه حاجات تانيه كتير احب اسمعها منكم
نتكلم مع بعض ونقول ايه اللي نعمله نحافظ بيه علي الحب ونكبره ونعدي بيه لبر الامان
--------------------------------------------------------

Get this widget
Track details
eSnips Social DNA

الخميس، 16 أبريل، 2009

استفتاء

بعد هدوء العاصفه الكلاميه والهدنه المؤقته
عايزه اسأل نكمل والا كفايه كده
الموضوع لسه طويل وكبيرو لسه مااتكلمناش في اي حاجه غير تعريف كلمة حب
لسه مااتكلمناش في تفاصيل والدنيا ولعت
وبم ان انا ديموقراطيه وبكتب وبتكلم معاكم انتم حبيت اسيب الموضوع ليكم نكمل المشوار والا كفايه كده
انا عن نفسي عايزه اكمل انتم عايزين ايه.؟؟؟؟
وخصوصا ان احنا ماخلصناش حاجه اصلا

وحسب الاصوات هنقرر سوا نكمل والا لا ؟

الخميس، 9 أبريل، 2009

الاوله فى الغرام

Animated Hearts Pictures, Images and Photos

الحب

الحب انواع

منها الفطري زي الحب بين الاسره الواحده يعنى الطفل بيتولد يحب والده والدته اخوته ماحدش بيتولد بيكرهم والا بيتولد كاره حد اصلا ده الحب اللي بيتولد مع الانسان وبيكبر معاه

جايز الانسان يحب والده اكتر من والدته او العكس نتيجة عوامل كتيره و ممكن يحب جدته لوالدته اكتر من اللي لوالده وعمته اكتر شويه من خالته و وارد برضه انه يكره حد من عيلته وبتكون هناك اسباب برضه بس الفطري ان الاسره كلها بفروعها تحب بعض

وكذلك هناك الحب بين الاصدقاء والصديق هنا انت اللي بتختاره ماحدش بيختاره لك خالص بدليل ان في حالات بيكون صديق صديقك انت مش صديقه وممكن كمان ماتستلطفوش اصلاولو ان عادة الاصدقاء بيكونوا متآلفين مع بعض وغالبا بتكون ميولهم متقاربه ما هى ده قاعدة الاختيار اكيد مش هأختار صديق انا متنافر معاه اصلا

والحب بين الاصدقاء نسخه من الحب الحقيقي بأغلب ملامحه من تضحيه واخلاص ووفاء وتفاهم و ود وخوف علي مصلحة بعض ومشاركه في الفرح والحزن والوقوف مع بعض في الازمات

وهناك حب الاعجاب يعنى اتنين بيتقابلوا و بيعجبوا ببعض و بيبقى هو شايف فيها فتاة احلامه وبعد التقارب يلاقيها كابوس مش حلم وهي تفتكره الشاطر حسن يطلع دراكولا و بعدها يحصل الانفصال وهنا لينا رجعه كبيره في بوست لوحده عشان نشرح حالة الاعجاب والكوارث اللي بتحصل بسببها نتيجة واحد من الاتنين عادة بيكون حب التاني وحاجات كتيروعلي فكره نص حالات الاحزان والجروح بتكون نتيجة حالة اعجاب مش حالة حب

اما الحب الحقيقي بين الرجل والمراه يا تري ايه تعريف الحب عند كل واحد فينا ؟

بالنسبه ليا الحب هو احساس بيتولد بين اتنين من غير هم نفسهم مايعرفوا السبب وتبتدي بينهم كيمياء غير معلومة المصدر ومجال مغناطيسي يشد الاتنين لبعض بشكل غريب ويبتدي التقارب النفسي بينهم ويدخلوا في حاله من المشاعر الجميله وسعاده من نوعيه جديده علي كل منهما يعني كل واحد حاسس انه مش سعيد غير بنصه التاني و مش شايف ليه وعشان ايه ؟ هومش بيسأل نفسه اصلا و مستسلم للحاله الجميله دي و يبتدي الكلام والحوارات والمناقاشات والتوغل في فهم كل منهم للأخر ويبتدي هنا المشوار وعادة بيكون المحبين متفقين في حاجات كتير في الشخصيه وده بيكون تفعيل لنظرية ان الارواح جنود مجنده ماتعارف منها ائتلف وماتناكر(تنافر) منها اختلف---------------وان كل روح مقسومه نصين بيدوروا علي بعض ويابخته اللي يلاقي نصه التاني و هنا الحب بياخد اشكاله الطبيعيه واحواله الجميله اللي هنتكلم عليها مع بعضالنهارده بس عايزين نعرف معني كلمة حب وعايزه اسمع منكم والمفروض اللي يدخل يقرا البوست زي مااتفقنا و يقرا التعليقات كمان عشان نفتح باب المناقشه وياتقنعني يااقنعك :) في ود وحب و رحابة صدر هو ده فهمي لتلك القوه الجباره الغير مرئيه والمحسوسه فقط واللي بتصنع المعجزات

Get this widget Track details eSnips Social DNA

الأحد، 5 أبريل، 2009

التاج اه من التاج ده

تحديث
------ ابني كيمو (صوت من من مصر) دعاني لمدونه جميله اسمها صور من مصر ارجو انكم تزوروها
********************************************
التاج اللطيف ده تم اهدائه لي من اكتر من شخصيه بحبها وعشان مايزعلوش حاضر هجاوب عشان عايزه ابتدي في سلسلة الحب من غير ما تقطعها حاجه
وعايزه الفت نظركم ان بوستات الكلام عن الحب مش هتكون بوست وبس لا دي هتكون بوست وتعليقات يعني اللي يزور المدونه يقرا البوست وكمان التعليقات عشان هنفتح مواضيع كتيره في التعليقات وانتم هتشتركوا في الموضوع من خلال التعليقات وكمان تردوا علي بعض بالتعليقات
يعني بوست جماعي بتعليقاته
كل اللي هيعلق ينتظرني انا او حد تاني غيري يرد علي كلامه ونتحاورمع بعض
نستعين علي الشقا بالله ونبتدي التاج
- اٍسمك ؟
شمس النهار :)
- المشهور بيه وسط اصحابك..؟؟؟؟
شموسه
سنك..؟؟؟
هو في حد في البلوجر لسه مايعرفش سني ؟!
49 والله علي مااقول شهيد
مجال دراستك...؟؟؟
فنون جميله قسم ديكور شعبة عماره داخليه هكذا قالولي
- اسم مدونتك....؟؟؟
شمس النهار( بصراحه سؤال رخم رخامه )
صورتك الرمزيه بتعبر عن ايه...؟؟؟؟
انا بحب الورد جدا جدا وبحب يكون في الفازه علي قدر المستطاع ورد بلدي وزنبق لما بيكون اوانه
وفي يوم اشتريت ورد بلدي وكانت الورده دي برعم صغير جدا جدا بالنسبه للبراعم اللي جنبها عشان بحب اشتري الورد البلدي براعم
ويوم عن يوم كل يوم الاقي البرعم ده بيفتح والورده بتكبر بشكل غريب وحجم مبالغ فيه
وكنت كل يوم بصورها لحد ما اول ورقه وقعت منها اخدتها وصبرتها في مجلد للفراعنه
وهي دي صوره لها قبل ماتتصبر
- هل فكرت في اغلاق مدونتك....؟؟؟؟
نعم حصل بس القرار ده مااخدش اكتر من نص ساعه وقلت لا مش انا اللي اهرب
عشان انا طول عمري مابحبش الهروب
- ايه رد فعلك لو حد قل ادبه عليك في تعليق...؟؟؟
بمسح التعليق مش عشاني بس عشان ماضايقش المدونين المؤدبين اللي بيدخلوا
- اسوأ مدونه...؟؟؟
مااعرفهاش ومابتعلقش في ذهني
- هايحصل ايه لايميلاتك بعد ماتموت....؟؟؟
:)ميلاتي طبعا هتموت معايا مش احنا سوا علي الخير والشر
- اديت الباس ورد لحد قبل كده...؟؟؟
طبعا :)
- السفر بالنسبه ليك ايه...؟؟؟؟
بطبعي مابحبش الترحال ومابحبش الغربه ومابحبش ابعد عن البيت كتير
بس في سفر بيبقا جميل من الصحبه الحلوه
- المود بتاعك ايه...؟؟؟؟
الحقيقه في انسان غالي عليه جدا قال لي انت عامله زي الوتر المشدود الحساس
وانا بثق في كلامه
- بتعمل ايه في وقت فراغك...؟؟؟؟
:) وقت فراغي انا سمعت الاسم ده قبل كده
لا انا ماعنديش وقت فراغ عشان بعرف اشغل وقتي كويس
- اكلتك المفضله ايه....؟؟؟
مالييش في الاكل اوي من ناحية الاكل بس بحب اطبخ جدا و باكل كل حاجه بس بحب الفواكه والشوكولاته جدا
وطبعا مدمنة ايس كريم وخصوصا المستكه وليه في باع طويل وبشكله بحاجات كتير ضد المنطق والرجيم والرشاقه اللي انا فيها
- الصفات اللي اخدتها من والدك......؟؟؟؟؟
الحنيه المفرطه جدا جدا
- الصفات الللي اخدتها من والدتك....؟؟؟
مش عارفه هي دايما بتقول لي مااخدتيش مني حاجه خالص
غير ان صوتنا في التليفون واحد
- اكتر ست حاجات بتحبهم...؟؟
مش عارفه حاجات والا ناس
عموما انا بحب بناتي واخواتي الصبيان جدا وامي طبعا وصديقاتي الاتنين اللي مجنينني
وصديقي الطيب جدا وبحب النت والقرايه
اما لوحاجات بحب النيل والقمر لما يكون هلال وبحب بيت ابويا
وبحب البرفان واستاذه فيه وبحب الورد والزرع جدا وبحب الايام المطر
اقول كمان والا كفايه كده ؟
- اكتر ست حاجات بتكرههم...؟؟؟
الكدب وخصوصا الرجل الكداب والخداع والحر والزحمه والانتظار والنكد والحزن والفراق وخصوصا بين الاحباب
- شخصيتك نوعها ايه...؟؟؟
مش عارفه اعتقد ان ماحدش يعرف شخصيته كويس كل واحد فاهم انه احسن الناس اعتقد ممكن تسألوا اصحابي اهلي كده يعني
بس انا انسانه عاديه جدا جدا زي كل البشر فيا كل الصفات اللي خلقها ربنا
- لماذا دخلت عالم التدوين من الاساس...؟؟؟؟؟؟؟؟؟
صديق من ايام الطفوله واخ كمان طلعها في دماغي قالي انت طول عمرك لمضه وكلنا بنحكي لك مشاكلنا ومستحملانا ماتعملي مدونه وتتواصلي مع الناس عن طريق النت
- اجمل كلمه اتقالت في وصف مدونتك...؟؟؟
قالتها محاسن صابر هي كانت كلام كتير اختصاره ان المدونه حضن للكل وانتم عارفين محاسن ومجاملتها الجميله
و كمان عمرو بدر فى مره قالى ان مدونتى بتفكره ببيت العائله
- اهميه التعليقات بالنسبه ليك...؟؟؟؟
هي الوصله اللي بيني وبين اي مدون او مدونه بيقرا البوست مش كده وبس تعليقي عند الاخريين مهم بالنسبه لي
وبحب ان صاحب المدونه يرد علي تعليقي عنده واللي مابيردش بحس انه بيقول لي تعليقك عندي غير مرغوب فيه
مره والتانيه مابعلقش عنده وبكتفي بالزياره والقراءه فقط بدون تعليق
- احلي بوست كتبته وضع اللينك واذكر السبب...؟؟؟
بوست الحزن كنت حاسه بصاحبته جدا وبانكسارها وهي اللي قويه وكنت بعتبرها صخره ماتتكسرش ولما شفتها كده حزنت عليها جدا
وترجمت حزنها اللي حسيته في البوست
- افضل مدونه قرأتها...؟؟؟
كل مدونه بدخلها بحسها واللي مابحسهاش مابدخلهاش تاني يبقا كل المدونات اللي بدخلها جميله وبحبها
- افضل بوست قرأته..؟؟؟
:) كان عند عمرو بدر واسمه شمس النهار تشرق من جديد
- الشغل بالنسبه ليك...؟؟؟؟
جميل بس الحقيقه انا بحب اشتغل ماما اكتر
- الانترنت بالنسبه ليك...؟؟؟
ابن عم الكتاب خير انيس ونافذه علي العالم و هو الشىء الوحيد اللى بيدينى و مش بياخد منى
- تمرر التاج ده لمين...؟؟؟؟؟
لكل المدونين اللي احب اتعرف عليهم اكتر
ان شاء الله هابتدي في سلسلة الحب بعد يومين استعدوا للمناقاشات الحاميه ونصحصح كده مع بعض
وامناء الشرطه علي صبرني يارب