الخميس، 30 أبريل، 2009

سؤال مجرد سؤال

المفروض النهارده كنت اكتب عن الحاجات اللي بتضيع الحب وتهده
بس الحقيقه كنت بأتكلم مع صديقتي المقربه
واتكلمنا في موضوع غريب ومش غريب حبيت نشترك في الاجابه عليه
*ليه المحب بيكون عارف ان حبيبه مش صادق في حبه او حتي حبه مش كفايه ورغم كده بيكمل الي النهايه اللي هي مش سعيده طبعا .ليه مابيختصرش العذاب وينهي الموضوع ويضع لعذابه نهايه ؟
*وليه المحب بيكون عارف ان حبيبه غير ما كان مبين يعني اتكشف واحده واحده امامه وماطلعش الشخصيه اللي كان عاملها لنفسه وبرغم كده برضه بيكمل الي النهايه
*وليه المحب بيكون عارف ان حبيبه بيكذب عليه ورغم كده بيكمل برضه ؟
*الحب له علامات ودلائل بتختلف من شخص لشخص ليه لما المحب بيحس ان حبيبه مش مديله المشاعر اللي هو عايزها ومش محتويه برضه بيكمل
*ليه المحب لما بيلاقي ان حاله هو هو وان الحبيب ده مااضفش ولا غير حاجه والوحده هي هي ليه برضه بيكمل الي النهايه الغير سعيده؟
السؤال
-------
ليه الحالات السابق ذكرها بيكملوا ليه ؟
وليه الانسان لما بيحس انه مش قادر يدي اللي قصاده المشاعر اللي هو عايزها ليه بيكمل معاه ليه يفضل يعذب فيه للنهايه ؟
ليه في ناس دايما تعيد وتعيش الفشل هو هو وبنفس الاخطاء ؟
طبعا انا جاوبتها علي قد ربنا ما الهمني بس احب نشترك واعرف هتقولوا ايه
واعتقد ده هيفدنا واحنا بناقش السلبيات اللي بتموت الحب

هناك 106 تعليقات:

عمرو يقول...

دائما المحب بيبقا عنده امل انه يغير من حبيبه
وبيحاول يكون في اتجاه للأحسن
وغالبا بينجح او بيرضي بالامر الواقع
مش كل التجارب متشابها
وان احيانا المحب بيعتقد انه صح من واقع تجارب سابقه
او من واقع تفاصيل شخصيته

Appy يقول...

علشان اللى بيحب بخلق الف عذر لحبيبه حتى لو حبيبه ده مش عارف عذر لنفسه
ويمكن علشان احنا دايما بنقنع نفسنا بالحاجه الكويسه
ويمكن فيه ناس بتحب تتمسك بالحاجه لمجرد التمسك وحب الملكيه
صباح الفل

أمبارح كان عمرى عشرين يقول...

علشان الابيحب مبيشفش كل الحاجات دى
زى ما احنا شايفنها دلوقتى
هو بيطبطب ويدلع ويقول عادى ويعمل مش شايف ويقول بكرة هتبقى أحسن وانا بكرة هعمل بردو الأحسن

وديما الابيحب بيشوف ان اليوم الاهو فيه دلوقتى يوم غريب وكله حاجات بتبعده عن حبيبته مثلا
وبيقول ياه على اليوم بقى الاهنكون فيه مع بعض اكيد مش هتكون بنفس الحاجات دى وهتكون أجمل
وانا كمان هعمل وقتها احسن شى عندى

بنفضل نضحك على بعض وفى الاخر نتصدم الصدمه المتوقعه الاعمالين نربى فيها لما بتكبر وبتبقى قد الجبل

وفى الاخر بردومش عارف ليه بنعمل كل ده مع اننا عارفين اننا هنتصدم

Eno يقول...

علشان التعود ياشموسه
هو خلاص اتعود علي الشخص ده ومش هيقدر يبعد عنه حتي لو هو مش سعيد معاه لمجرد التعود بس !

حمد الله علي سلامته اتمني تكون رحله سعيده :)
اسكندريه جملها بيسحرني بجد :)
تحايتي :)

بنت الغربة يقول...

حبيبتى ياشمووسه
انا مش عارفه ليه صدقينى..
عارفه اغنية ..اكدب عليك لورده..؟؟؟
اللى هى ..اكدب عليك لو قلت بحبك لسه...اكدب عليك لو قلت نسيتك همسه...
هى دى الحقيقه اللى انا عايشاها ..احيانا بابقى مش طايقه ابص فى وشه ..واحيانا كتيرة باحب اتفرج عليه وهو نااايم ..
انا احيانا باقول لنفسى انى هاسيبه..
لكن قلبى بيرجع يوجعنى قوى ..
ده معناه انى لسه باحبه..انما هو لسه بيحبنى ولا لأ..فده علمه عند الله تعالى بس..صدقينى صعب قوى حد يفسر الحب وعذابه ..لان مالووش تفسيير صدقينى..وتحياتى ليك ياجميل

شمس النهار يقول...
أزال المؤلف هذا التعليق.
عاشقة الأحزان يقول...

السلام عليكم
شموسه الجميله
أخبارك ايه ياقطه بجد وحشتنينى كتير قووى
ربنا يطمنا عليكى
وبصراحه الوست جميل قووى شموسه ومحتاج كلام كتير قوووى
الحب : فرص ليصبح الإنسان أفضل وأجمل وأرقى ...

الحب ليس عاطفة ووجدانا فقط إنما هو طاقة وإنتاج.....
الحب : هو أعظم مدرسة يتعلم كل عاشق فيها لغة لا تشبهها لغة أخرى ....

الحب : مثل أي لعبة يمارسها اثنان … في نهايتهما : أحدهما يربح … والآخر يخسر ...
ا أشك في كروية الارض , ولا اشك في وجود السماء , ولا اشك في وجود الرسالات.
ولكني اشك في بشر يحب لاخيه ما يحب لنفسه , أشك في امرء يخاف على جاره , اشك في أناس لا يأكلون لحم بعضهم .
نعم فلا وفاء بين البشر باق , ولا التزام بين الناس , والكل ينهش من لحم اخيه ويغدر به بحسب ما تقتضيه مصلحته !!!
فهل يرى غيري ما يخالف ذلك؟
أجيبوني
تقبلى تحياتى
إيناس

صوت من مصر يقول...

السؤال بيقول حاجه بسيط جدا اجابته اننا لسه م بتعلم شىء من الاغراب لسه بنخاف نقول ان الحاجه دى فاشله او مش هتنفع او صعب تملتها بس بنقول اهو لسه الايام ممكن تغيير الواقع مع انه صعب ؟
الحب الى فى خيالك وخيالى وخيال الناس صعب حد يقول عليه

عالم حبيب يقول...

أول زيارة لمدونتك أتمنى لك التوفيق

الحب كلمة مكونة من حرفين .. ولا تنطق إلا بضم الشفتين .. تغنى به المطربون وشعر له جميل المعاني الشعراء .. ولا أكاد أدخل مدونة إلا وأجد أصحابها يكتبون عن هذا المعنى .. يتصوره الكثير تلك العلاقة بين الشاب والفتاة والكلام المعسول .. لكن صدقيني إذا كان المحب صادقا فلن تصل العلاقة ابدا أن يهين محبوبته .. وأي اهانة اكبر من التي نراها في شوارعنا والحدائق والمتنزهات .. شاب يمسك بيد فتاة لا تربطهم أي صلة ويقول ان هذا حب .. لو كان يحبها لحافظ عليها ولأتى البيوت من ابوابها

أتوقع ان هذه العلاقات تستمر ويطلق عليها حب .. ويظل الشاب او الفتاة طوال الليل سهران يسمع اغاني العشق والهيام لأنه كُتب عليه العذاب لأنه أسس علاقة لا يرضاها الله .. أعظم الحب هو الحب لله وعلى طاعة الله أما الحب الآخر فيورث التعب وتكون نهايته كما شاهدنا ورأينا كثيرا غير سعيدة

دعواتي بالتوفيق

mostafa rayan يقول...

مش عارف ياشموسة
يمكن بسبب ضغوط الحياه بيكون عندنا رغبة في الشعور بالحب حتى لوكان وهمى
وان كن عن نفسي ذد الحوار دةنهائى
زي ما بدى زى ماهخد
سلاموز ياصديقتى العزيزة

MǿиY El-Shreef يقول...

دايما عذاب فقدان الحبيب بيوجع اوي

اكتر من اني اكمل ف علاقه من العلاقات الي قلتيهم دول

بيبقى في امل فعلا انه يتغير ويرجع زي زمان

احساس الفراغ العاطفي ده صعب اوي عند ناس كتير وناس بتفضل انها تفضل مرتبطه بحبيب او حبيبة حتى لو مجرد ظاهريا كده

حمدالله ع سلامتك ياشموسه

موناليزا يقول...

اعتقد ان حالة المحب الاولى بيكون رافض ان يعترف بكل اللى هو حاسه وبيقول جواه كفاية عليا انه معايا ونظام بقى اللى نعرفه احسن من اللى مانعرفوش ويمكن يتصلح حاله ويتعدل وكده يعنى
فى حالة المحبوب بقى بيبقى مبسوط انه لاقى حب واهتمام من شخص الى حد ما مهضوم بالنسبة له وبما ان مفيش حد فى الساحة حاليا غيره يبقى ايه المانع

Sweet Violet يقول...

ليه الحالات السابق ذكرها بيكملوا ليه ؟

علشان بيقنعوا نفسهم ان كل ده هيروح يوم مايكونوا هما الاتنين مع بعض و ان الظروف هى السبب فى كده .. و تلاقى مليون عذر و مبرر للحبيبى ..الامل اللى الحب بيعمله جواهم هو السبب الرئيسى انهم يكملوا و يكدبوا على نفسهم بردو بانه مصيره هيتغير

و بقول يكدبوا لانهم بيبقى متأكدين و عارفين ان عمر الظروف و بعد المسافة كان السبب فده

لان ياما ناس كانت ابعد فى الاماكن لكن اقرب فى المشاعر

************

وليه الانسان لما بيحس انه مش قادر يدي اللي قصاده المشاعر اللي هو عايزها ليه بيكمل معاه ليه يفضل يعذب فيه للنهايه ؟

علشان الانانية و حب الذات .. هو شايف ان اللى معاه بيعطيه اللى هو عايزه

يبقى خلاص مش مهم مشاعره هو .. و ده طبعا حب من طرف واحد بس مش متبادل بين الطرفين

**************
ليه في ناس دايما تعيد وتعيش الفشل هو هو وبنفس الاخطاء ؟

علشان بتبقى خايفة من الوحدة فبيكون عندها وجود حبيبى رغم عذاب احسن من عدمه

دول بيحبوا علشان الحب فقط بصرف النظر عن اى شئ تانى

رغم انهم لو بصوا كويس هيلاقوا انهم ماشين بالاكتفاء الذاتى يعنى هما اللى بيقنعوا نفسهم بالمشاعر دى و بيعيشوها (:

************
حمدلله على سلامتك ياشموستى

و بعتذر عن تقصيرى معاك

بسنت صلاح الدين يقول...

مش عارفه فعلا لكن الحب بيبقى ليه طريقه غريبه فى انه يربط بين شخصين رغم كل الاختلافات و الخلافات كمان اللى بينهم، بس متهايألى ان الواحد بيفكر ساعتها انه مش لازم ناخد كل حاجه فى الحب فى حاجات بتعوض حاجات ،و ساعات رغم كل العيوب اللى فى الشخص اللى مرتبطين بيه لكننا منقدرش نستغنى عنه ولو لحظه يعنى بأختصار بنحبه بمميزاته و عيوبه، و مين عارف يمكن بشويه صبر يتغير و يقدر يعطى اكتر

princess يقول...

الامل هى دى الاجابة
بيبقى عنده امل ان اللى بيحبه يقدر التضحية والحب
وحاجة كمان التعود فى ناس بتتعود يعنى العذاب عندها اهون من البعد الكامل

حسام غانم يقول...

والله هو الموضوع ده مش في الحب بس

السلبية دي في كل حاجة

نظام يا سيدي

وأهي ماشية

وطنش

MaNoOoSh يقول...

بصراحة معنديش اجابة على ولا سرال فيهم
بس اعتقد ان الناس با اما عندها امل اللى قدامها يتغير يا اما بيحبوا يعيشوا حالة الحب ويفضلوها عن الوحدة.



بس انا عندى سؤال تانى.. ليه ممكن نحب حد ويبادلنا نفس الاحساس وبيقدر يحتوينا واحنا نحتوية ونسيب نفسنا نحس الاحساس دة مع اننا عارفين ان اسباب عدم اكتمال الحب دة لزواج كتير وفى الغالب مش هيكتمل.. ليه بنسيب نفسنا نعمل كدة؟

كيــــــــــــارا يقول...

عشان بيحب ياشموستي

بحب فلان بحبه بكل اللي فيه بعيوبه قبل مميزاته بحبه حتي لوو قاتلني بحبه حتي لو دابحني

لاني بحبه بقول ممكن يتغير ممكن يفهم ممكن يحس ممكن يشعر ممكن يفكر ممكن قلبه يقوله حبيبتك تعبانه

يمكن يفوق في يوم

اصل هو مزاجه مش ولابد عشان كذا كذا

لا دي نزوه وهتعدي لا دي كذا

لكن في النهايه جرح والم وتعب

بس مش هتقدري تقولي لواحد بيحب واحده وهيا مثلا ظهرت علي حقيقتها اكرهها او ابعد عنها

االلي يحب عمره مايقدر يكره ولو كره يبقي مش حب من الاساس

موضوع ملعبك وبيختلف من شخص لشخص

ABOALI يقول...

التمس لاخيك سبعين عذرا
فاءن لم تجد له عذر فاصنع له عذر

فما بالك بالمحبين

مغناطيس الحب تظل فيه الشحنات متأججة
طالما حافظنا على شحنها بدفء المشاعر والطيب من الكلمات والهمسات

عندما يقل الشحن
تظهر العواقب والفتور
ولكن المحب يقول لعل وعسى
فالحب مجموعة من العواطف
ان فترت واحدة نمت الاخرى
مثل العشرة وحب العطاء والمودة والرحمة والتاءلف
ولا تنسى اننا نكمل بعض
ولا يوجد منا الكامل والجميع يتعرض للاختبارات والتحديات فى الحياه
فمن يصبر ويطور من نفسه ينجح ويستمر

ولالالالالالالالالالا ايه

طوبة ذهب وطوبة فضة يقول...

انا والله عامله حسابى انها الخطوه اللى جايه بس والله نفسى تعذرونى لاننا بجد بجد ما فيش وقت حتى نقعد فى بيتنا ربنا يستر لكن وعد هكتبه لان دا واجبى وذى ما ضحكت الناس لازم احذرها

assafo anaroze يقول...

يسعد مساك
اسئلة في محلها و بشكرك عليها
للاسف فعلا الموضوع ده موجود فعلا بتلاقي ناس عارفة ان الحبيب بيكذب و بيبين حاجات مش موجودة فيه اصلا و اشياء كثيرة
ساعات بسأل نفسي ليه نعذب انفسنا من حب عارفين نتيجته الى الفشل ليه بنستمر بالرغم اننا بنعرف ان مال العلاقة الى النهاية
ممكن ان تعلقنا بمن نحب يجعلنا نتغاضى عن كل شيء و نقول يمكن مع مرور الايام حيتغير
ممكن الحب اعمى زي مبيقولوا و لا نستطيع ان نبتعد و لو كانت نهايتنا الموت على ايد من نحب
يمكن اننا لا نستطيع او نوهم انفسنا اننا لن نستطيع ان نعيش بدون الحبيب
و الله مش عارف اقول لك ايه الحب ده حاجة تجنن بس لو مش موجود بالرغم من عذاباته لن يكون للدنيا معنى
مودتي

سمكه واحده يقول...

عشان الحب اعمي!

عشان الحبيب عنده امل انه التاني يتغير ويحبوا ومش بيشوف عيوبه وانه بيحب الامتلاك الاخر او انه يحب وخلاص وفاهم الحب غلط مش مهم عنده اذا كان بيحبه ولا لاء وان الحب امتلاك وده غلط
ناس كتير فاهمين الحب غلط وان طلما حب واحد لازم ولا بد التاني يحبه او يبادله نفس الشعور او يستني لحد ما يحبه وبكده بيضيع في وقته ويتحمل اهانه وتعب وعذاب بس عارفه برده انها حاجه غصب عنه او مش بأيده

عامله ايه يا جميل؟

حنعيش يعنى حنعيش يقول...

علشان عايز يحب وخلاص
علشان خايف لا الناس تقول علية فشل
علشان مابيكونش ناضج كفاية
علشان عندة امل انحبيبة يتغير
علشان مابعرفش ياخد قرار
علشان فاكر ان الحب فسحة ومسكة ايد
علشان مابيتعلمش من اللى قبلية
من الاخر علشان اهبل

د. ياسر عمر عبد الفتاح يقول...

يمكن علشان خايف من الفشل
يمكن علشان شايف إن نص العمي ولا العمي كله

ذو الوجه المبتسم يقول...

السلام عليكم

** ليه المحب بيكون عارف ان حبيبه مش صادق في حبه او حتي حبه مش كفايه ورغم كده بيكمل الي النهايه اللي هي مش سعيده طبعا

-- الحب الحقيقي لا يحتاج لمقابل حتى لو كان المقابل ده حب الطرف الاخر

** ليه مابيختصرش العذاب وينهي الموضوع ويضع لعذابه نهايه ؟

-- الحب مش محتاج لاختصار وعذاب الحب متعة وصعوبته لذة والحصول عليه منتهى الحياة الحقيقية

**وليه المحب بيكون عارف ان حبيبه غير ما كان مبين يعني اتكشف واحده واحده امامه وماطلعش الشخصيه اللي كان عاملها لنفسه وبرغم كده برضه بيكمل الي النهايه

-- التكلمة لان اللى بيحب بجد صعب يكره او حتى صعب يبعد او حتى ينهى الموضوع ده كله لانه بيحب بجد

** ليه الحالات السابق ذكرها بيكملوا ليه ؟
**وليه الانسان لما بيحس انه مش قادر يدي اللي قصاده المشاعر اللي هو عايزها ليه بيكمل معاه ليه يفضل يعذب فيه للنهايه ؟
-- قد تكون الحالات دى قليلة او حتى كثيرة بس الحقيقة لو بصينا لها ان ده مش بيبقى حب حقيقي متبادل مجرد تضييع وتسلية

وجهة نظرى المتواضعة فى النقاط اللى انتى ذكرتيها
ان الحب الحقيقي عبارة عن مشاعر متبادلة ولو فيه مشاكل او صعوبات او حتى سلبيات ممكن تقابل الطرفين
يجب عليهم مواجهتها معها

لكن اللى مش صادق فى حبه ده اكيد لا يستحق لقب محب او محبوب

تعقيب على تعليق عاشقة الاحزان
الحب الحقيقي عمره ما كان لعبة
الحب الحقيقي كيان مستقل بذاته وبيعطينا طاقة وحيوية وامل وحياة وحاجات كتير

معجب بتعليق الاخت كيارا لانه منطقى

معجب ايضا بتعليف sweet violt
تحليل منطقى وصحيح

بنت الغربة سمعينا الاغنية احسن
تعليقك جميل بجد

مصطفى ريان تعليق منطقى وجميل

التعليقات كلها بصراحة كويسة

وفى الاخر باقول هل الحب الحقيقي يحتاج للمساعدة وان نأخذ بيده ونقف امام اى صعوبات او مواجهات خارجية كى يكتمل

تحياتى

تامر علي يقول...

نوع من أنواع الغباء الإنساني أسمه الأمل في التغيير للأحسن ... على الرغم من إن عدد مرات حدوثه على المستوى العام لاتتجاوز عدد أصابع اليدين (والقدمين:) إلا إن الأمل في التغيير يظل هو المحرك الرئيسي لكافة أنواع الغباء :)

تحياتي :)

كيــــــــــــارا يقول...

معلش يااستاذ تامر
مش معاك في انك تسميه غباء انت كدا بتجرح في كتير

لان الحب والمشاعر والاحاسسيس عمرها ماتتوصف ابدا بالغباء

اللؤلؤة يقول...

الأخت شمس النهار
السلام عليكم
أخبارك إيه ؟
علشان عايز يحب وخلاص
علشان خايف يعترف بالحقيقة و الناس تقول علية فشل
علشان مابيكونش ناضج كفاية
علشان عندة امل انحبيبة يتغير
علشان مابعرفش ياخد قرار
وعذرا لتأخيرى
دمت بكل الخير

عاشقه الرومانسيه يقول...

يمكن لان المحب بيكون عايز يعيش فى حاله حب وخلاص
يعنى بيحب الحب نفسه
انا واحده من الناس باعرف احكم عقلى فى الوقت المناسب واوقفه قدام قلبى واقوله استوب
كفايه وجع

ممكن اكون غلطانه بس اكتشفت ان ده احسن الحلول
ان العقل يقول كلمته وقت اللزوم

norahaty يقول...

السلام عليكم ورحمة
الله تعالى وبركاته
ممكن لان (مراية الحب عمية)زى ما بيقولوا:)او ان المحب بيحب الحب نفسه
الحالة اللى هو عايشها .ممكن ما عنده القدرة على اتخاذ القرار بالابتعاد.
ممكن يكون وهمان ان التصرفتات الغلط بتاعة الطرف الاخر(دلال -غشومية-تقل
خطأ غير مقصود)احتمالات كتير بينجح
انه يخبى الحقيقة حتى عن نفسه
لأ كما افتكرت :الوهم الاكبر
انا عارف كل العيوب
بس حأعرف اغيره !!
فعلا ده الخادع لنفسه:(

norahaty يقول...

شموسسسسسسسسسة نسيت اقولك:)
التدوينة الجديدة نزلت
بعد ما دخلتها الفرن
شوية تكمل سوا:)

Foxology يقول...

علشان لما الأنسان بيحب بتبقى كل حتة فيه متعلقة بالحبيب ومستعدة تعمل اى حاجة علشان يفضل معاه ومكمل معاه حياته

ده بيبقى الحب المرضى !

احبه مهما اشوف منه على رأى الأغنية :)

حالات قليلة اللى بترفض تكمل على حساب نفسها وحساب قيمتها وكرامتها ودى بتبقى الشخصية قوية اقوى من الحب نفسه :)

تحياتى على الموضوع الجميل :)

ادم المصرى يقول...

سعات الحب مبيكنش بشكل لمطلوب ولكن الحب عمرو مكان غباء او الاحساس او الرومانسيه عمرها متتوصف بل غباء لئن الحب لهو اشكال عديده وجميعها ليست من الغباء هوا اكيد زى اى شب حب ولكن الحب موفقش بس ولكن الحب ليس بل غباء

من غير عنـــوان يقول...

هكذا حال المحبين

أمنياتي

mohamed ghalia يقول...

الموضوع بجد مهم أوى وصعب يتجاوب عليه فى كلمات بسيطة
هحاول بإذن الله اكتب إجابة وارجع أعلق

dalia يقول...

شمس النهار

صدقيني مفيش حد بيبقى عارف ان الحب حينتهي الوضوع مش بالسهولة ديه ممكن الشخص بيكون اساء الاختيار من الاول او اكتشف اثناء تعامله مع الطرف الاخر انه غير صريح او ان صفاته مش متفقه معاه في بعض الاشياء بس رغم كل ده بيحاول انه يستمر لعله يستطيع التأقلم الى ان ينتهي الموضوع بعذاب داخلي أو لا ينتهي على الاطلاق فهمت حاجه
تحياتي دوما نصيحتي لا تسألي عن الحب لانه مجنووووون جدا

شمس النهار يقول...

*عمرو
انا معاك ان المحب بيكون عنده امل بس في لحظه بيتأكد ان مافيش امل وبتكون لحظة الفراق
لاعادتا وفي اغلب الاحوال مابينجحش عشان صدقني الطرف التاني عادتا بيكون اناني
وده اللي عمل الحاله دي
اما الرضابالامر الواقع مش كل الشخصيات بترضي بيه واللي بيرضي بيه بيكون ابتدا يتغير وتتغير شخصيته وتصدق في اللحظه اللي بيكتشف الطرف الاخر ان اللي قصاده اتغير ومش ده اللي كان مرتبط بيه مش هقول بيحبه
عشان لو كان بيحبه صح ماكانتش الحاله دي حصلت
المهم لما بيكتشف تغير الشخصيه
علي طول بيبتدي هو وبكل جباروت يبعد
يعني برضه بيحصل فراق
اما موضوع ان المحب بيعتقد انه صح من واقع تجاربه السابقه اكيد كل انسان تجاربه السابقه بيكون ليها دخل وكمان بتدخل في تكوين الشخصيه
هو ايه اللي بيثقل الشخصيه المضي في الحياه واكتساب الخبرات والمرور بالتجارب العديده
الانسان ابن تجاربه ومكتسباته من البيئه المحيطه بيه
وهناك بديهيات في الحياه ان لو اكتشف خداع بيكون خداع
كدب بيكون كدب
حبيب بيتخللي عن حبيبه دي فيها اختلاف في ايه
المشكله هنا ليه هو بيستمر بعد ده كله
حبيب مش عايز يقدم اي تنازلات لحبيبه والا حتي يغير اي سلوك من سلوكياته عشان حبيبه
بيقول انا كده واللي عجبه
مش عايز يتنازل شويه من عنده علي شويه من عند الطرف الاخر
طيب فين الحب هنا
الحب عطاء متبادل لما بيفقد هذا العطاء ليه الاستمرار
المفروض لو الاتنين بيحبوا بعض فعلا تفاصيل شخصياتهم همه الاتنين تدوب في بعض
وشويه عليه وشويه عليها
لحد مايصلوا لنقطة التقاء
مش واحد يقول لا والتاني يفضل يتغير ويدي لحد ماتيجي اللحظه اللي مافيهاش رجوع

شمس النهار يقول...

*ابي
مساء الهنا
حب الملكيه هنا مرض مش فهماه
ازاي عايز يمتلك شخص مش عارف يحبه صح اصلا مش واثق انه بيحبه
ماهو مافيش حبيب بيعذب حبيبه ويقول له انا بأحبك

شمس النهار يقول...

*امبارح كان عمري عشرين
كلامك جميل بس عايزه اقول لك
المشاكل بين اي اتنين تنقسم الي قسمين من وجهة نظري
مشاكل مؤقته تزول بزوال الحال ودي بتكون في فترة الخطوبه
ومشاكل دائمه ودي بتكون خلافات في الشخصيات والمفاهيم والاسلوب الحياتي لكل منهم
فيجب ان نعرف المشكله دي من المشاكل المؤقته اللي لما يتزوجوا هتزول والا لأ

شمس النهار يقول...

*اينو
الله يسلمك الحمد لله الرحله كانت حلوه كان فيها بعض المنغصات بس الحمد لله عدت علي خير

بالنسبه للتعود فعلا وده بيكون بين الازواج زوجه في الحاله دي بتستسلم وبتتعود وبتقول اربي اولادي وخلاص

لكن اللي علي البر انا ضد التعود هنا
الفراق هيتعب صحيح عشان فراق من نحب ليس بالسهل
ولكن تعب ساعه والا كل ساعه

شمس النهار يقول...

*بنت الغربه
الحاله اللي انت بتتكلمي عليها دي مش انت بس لا كتير من الزوجات بيحسوا بيها
وبيكون صراع حقيقي فعلا
بس صدقيني الصراع ده دليل الحب مش العكس
هي المشكله ان اي اتنين حبوا بعض واتخطبوا وقضوا فترة خطوبه يتعرفوا علي بعض ويعملوا مافي وسعهم للتقرب ببعض
مجرد مايتزوجوا تلاقيهم عملوا زي اللي كان في سبق وقعد يجري لحد مااتقطع نفسه
ولما وصل لنقطة النهايه هدي جدا وخلاص اخذ الجايزه ونام علي الخط
مابيحاولش يعمل اي حاجه
هو امتلكها وهي امتلكته وانتهي الموضوع
مافيش اي تجديد والملل يشتغل

بس علي فكره انتم الاتنين بتحبوا بعض:)

شمس النهار يقول...

*عاشقة الاحزان
برغم التشاؤم اللي في كلامك بس فيه كتير من الصح
بس حب مش دايما فيه فائز وخاسر
في حب الاتنين فازوا
وفي حب الاتنين خسروا
اللي فازوا همه اللي حسوا بنعمة ربنا في حبهم شكروا وحافظوا عليه
واللي خسروا كفروا بالنعمه وتكبروا علي بعض وتباروا مين يكسر التاني والعند دخل بينهم
وعلي رأي ايمان البحر كان فينا واحد مايستهلش التاني

اما الحب اللي فيه طرف فائز ده بيكون اللي ربنا نجاه من حبيبه اللي مايستهلوش اصلا
والخسران اللي فقد قلب كان بيحبوا بصدق يعني مالوش في الطيب نصيب

شمس النهار يقول...

*صوت من مصر
فعلا في ناس بتخاف تقول انها فشلت
وفي ناس مابتحبش تستسلم بسهوله

*الحب الى فى خيالك وخيالى وخيال الناس صعب حد يقول عليه

ليه بتقول كده وتقصد ايه

شمس النهار يقول...

*عالم حبيب
اهلا بيك في اول زياره للمدونه
الحقيقه كلامك سليم وصح
وده اللي انا كتبته في البوست السابق
وخصوصا ان الشاب يجب ان يتقي الله في محبوبته ويضع اخته موضعها

شمس النهار يقول...

*مصطفي ريان

هو الفروض كده يادرش المحبين لازم يدو بعض ويخدوا من بعض عطاء متبادل بلا حدود
بس يعني مش علي القد كده
مش قد ماتاخد قد ماتدي بحبحها شويه يادرش
بنتي الصغيره دايما تقول كلمة سلاموز دي:)

شمس النهار يقول...

*موني الشريف
الله يسلمك

لا مش معاكي العذاب ارحم من الزل
ليه المحب يرضا لنفسه الذل

وياستي وجع القلب ساعه والا كل ساعه

وافضل ان الحبيب يموت بعيد عن حبيبه من انه يموت جنبه وحبيبه بيتفرج عليه وبيضحك

شمس النهار يقول...

*سويت فيوليت
ازيك وشكرا ليكي علي سؤالك عليا في التليفون
بجد كلامك صح علي الاطلاق
انا مع كل كلمه قلتيها

واه من الانانيه في الحب من مهلكات الحب وان شاء الله هتكلم عليها في البوست القادم

شمس النهار يقول...

*بسنت صلاح الدين
في فرق بين العيوب المعروفه واللي ممكن تحددي هل ممكن تتعاملي معاه والا لا وشويه شويه بالود والتفاهم بتقربوا من بعض يعني هنا في تعاون لكن الاسأله هنا عن اللي مابيتعاونش خالص بايع القضيه مسنود ان حبيبه بيحبه مايقدرش يستغني عنه مهما عمل فيه

شمس النهار يقول...

*برنسيس
ازيك انت فين حمد الله علي السلامه

فعلا الامل بس للأسف عند اكتشاف ان الامل مش موجود والا كان له وجود
بتكون لحظه غايه في الصعوبه

اما بالنسبه للعذاب لو انسان ارتضي لنفسه العذاب بالشكل ده اعتقد من وجهة نظري كده انه مريض

شمس النهار يقول...

**موناليزا
----------
بعتزر اني رديت علي سويت فيولت قبلك بس الحقيقه انا بكون فاتحه مدونتين عشان طول التعليقات فاماخدتش بالي


انا معاكي في حالة اللي تعرفه احسن من اللي ماتعرفوش بس دي في حالات الزواج بتكون مفيده ومع الزمن الحال بينصلح لكن في الخطوبه وهمه لسه علي البر اعتقد ان الفراق افضل
ووجع وعذاب ساعه والا كل ساعه

اما المحبوب اللي مبسوط شفتي انت قلتي ايه
طالما ان مافيش حد تاني في الساحه
يعني لو هو قابل حد يحبه هو شخصيا هيبعد عن هذا المحب اللي اداله واتنازل عن حاجات كتير

شفتي ان اللي بيعذب الانسان اللي بيحبه يبقا مابيحبوش

شمس النهار يقول...

*حسام غانم

معقول ياحسام ازاي الانسان ممكن يطنش حاجه وجعاه وتعباه
ازاي ممكن يتجاهل مشاعره وحبه وحياته
معقول السلبيه توصل لكده
صدقني مااعتقدش
طيب انت شخصيا ممكن تعمل ايه لو الظروف حطتك في حبيب زي اللي بتكلم عليه في البوست

شمس النهار يقول...

*مانوش
ماانت كده رجعتي لنفس الاسباب
ورجعتي لنفس السؤال بس بطريق تانيه
اقول لك اقري التعليقات وردي هتلاقي اجابات كتير وان شاء الله هنزل تحديث برأي في المجمل

شمس النهار يقول...

*كيارا
انا معاكي انه موضوع ملعبك
بس لا اقدر اقول لواحد متعذب ومتهان مشاعره ومجروح ابعد واتقي الله في نفسك
انا بقول له ابعد مش اكره
ماحدش بيكره حد حبه في يوم من الايام

كان لي صديقه وكانت في نفس الوضع ده وقعدت تسقط ميت لو وتضع اعذار وتسكت وتفوت لحد لما خلصت السبعين لو
ولما بعدت وخفت من مرض الحب اللي كان عندها وعدت سنين وربنا كرمها بواحد حبها فعلا وهي كمان حبته حست قد ايه هي كانت ظالمه نفسها مع هذا الانسان
حست يعني ايه تحب وتتحب وكل ما حبيبها اللي هو الان زوجها يعطيها حب واخلاص تحس قد ايه هي ضيعت عمر بتجري وراء سراب
وندمت علي السنين اللي عدت وهي بتحاول

شمس النهار يقول...

*ابو علي
انت كده بتتكلم عن الحب المتبادل والعطاء المتبادل
هنا مافيش حاجه اصلا بتتبادل هنا محب بيدي ومحب لاهي

شمس النهار يقول...

*طوبه دهب وطوبه فضه


ياريت تقدري تعملي كده صدقيني مهم جدا ان انتم اللي تكتبوا ده الناس مابقاش عندها ثقه في اي كلام يصدر عن الحكومه

بس ليه لم تعلقي علي البوست
والا حتي قلتي رأيك في اللي احنا عاملينه

شمس النهار يقول...

*اسافوا اناروز
بالظبط انت قلت كلمه لطيفه
الوهم
المحب هنا بيعتقد وبيكون موهوم انه مايقدرش يعيش من غير حبيبه المستبد وبيفتكر انه هيتدمر لو سابوا بعض
وعلي هذا الاساس بيفضل اسير الوهم ده
وعلي فكره اساس هذا الوهم الحبيب المستبد عشان مش عايز يفقد هذا المحب اللي تحت ايده بيعمل فيه اللي هو عايزه

صدقني اغلب الناس دي بتعيش ميته فعلا واغلبهم بيتحولوا الي مرضي نفسيين من غير مايدروا
الي ان يتم الانهيار الكامل

شمس النهار يقول...

*سمكه واحده
الحمد لله
انت عامله ايه واخبار الامتحانات ايه
ربنا معاكي انت وكل طلاب البلوجر صدقيني بدعلكم كلكم

الكلام اللي قلتيه كتير منه صح
بس المفروض المحب مايستسلمش للمشاعر السلبيه دي
نظام اللي تعرفه احسن من اللي ماتعرفوش
كده احسن من الوحده
ماهو الحب عذاب.....الخ ..الخ
لأ
مافيش حاجه اسمها اللي تعرفه احسن من اللي ماتعرفوش ماهو الحبيب ده كنت ماتعرفوش قبل كده واديك عرفته طلع غلط خلاص بلاش العذاب حاول مره اتنين ميه بس خلاص لاترضي لوجدان المذله

ومافيش حاجه اسمها كده احسن من الوحده
لأ
الوحده احسن من العذاب
ومافيش وحده في وجود الايمان

ولأ الحب مش عذاب
الحب سعد وهنا صحيح الدنيا علي كده وكده
بس مايبقاش كله عذاب

شمس النهار يقول...

*هنعيش يعني هنعيش
اهلا في اول زياره للمدونه
بصراحه الكلام كان منطقي وماشي جميل وصح

لحد عشان اهبل :)
تفتكر ان اللي عنده مشاعر واحساس بالمسؤليه تجاه المشاعر دي ومش عايز ياخد قرار كده بسهوله لحد مايستنفذ كل الاعزار لحبيبه
عشان لما يتخذ قرار الفراق مايرجعش يندم
تفتكر الشخصيه دي تبقا شخصيه هبله

شمس النهار يقول...

*دكتور ياسر عمر عبد الفتاح
ممكن بس موضوع العمي ده في قوالان كتير
اعتقد ان الواحد يتعمي احسن مايشوف الذل

زي كده نظرية الوحده خير من جليس السوء:)

شمس النهار يقول...

*ذو الوجه المبتسم

وعليكم السلام
اهلا بيك

لأ طبعا الحب الحقيقي هو الحب الصح اللي له مقابل وخصوصا حب الطرف الاخر

الا في حالة ان اتنين تزوجوا بدون حب زواج صالونات تماما وطرف حب الاخر والطرف التاني اكتفي بالعشره الطيبه وخلاص
هنا ممكن نقول الكلام اللي انت ذكرته

-(** الحب مش محتاج لاختصار وعذاب الحب متعة وصعوبته لذة والحصول عليه منتهى الحياة الحقيقية**)

هنا لانختصر الحب الحب لايختصر احنا هنا بنختصر سنين العذاب ليه يكمل في العذاب؟
انت كمان هنا بتناقض الكلام يعني الصعوبه هنا جت بنتيجه ان المحب حصل عليه
طيب لو ماحصلش عليه ايه الحل هيعمل ايه فين هنا الحياه
هنا العذاب كامل

عايزه اقول لك ان اللي بيحب بالشكل ده ممكن يبعد بس هو معيش نفسه انه مايقدرش يبعد
ولو بعد هيموت
تقدر تقول لي تموت مره واحده والا تموت كل يوم وتهدر مشاعرك مع انسان لايقدر كلمة مشاعر اصلا

وعلي فكره اللي بيقرر يبعد هنا مابيكنش كره ابدا ماحدش بيحب يعرف يكره
هو هنا كره وضعه وكره تصرفات حبيبه

(***ان الحب الحقيقي عبارة عن مشاعر متبادلة ولو فيه مشاكل او صعوبات او حتى سلبيات ممكن تقابل الطرفين
يجب عليهم مواجهتها معها***)

شفت اديك قلت عليهم مواجهتها معا
هنا في السؤال اللي في البوست مافيش معا دي:)
في حبيب بيتعذب والطرف التاني بيتفرج مستمتع والا ايه مش عارفه

(**لكن اللى مش صادق فى حبه ده اكيد لا يستحق لقب محب او محبوب**)

بالظبط انت كده جبت المفيد تمام
ويكون لازم ولابد الطرف اللي بيتعذب يبعد
السؤال مابيبعدش ليه:)

(***وفى الاخر باقول هل الحب الحقيقي يحتاج للمساعدة وان نأخذ بيده ونقف امام اى صعوبات او مواجهات خارجية كى يكتمل***)

اكيد الحب لو كان حقيقي وصح ومتبادل بين الاتنين
محتاج يتقوي ويكبر بكل اللي قلناه في البوست السابق

بشكرك جدا علي كل مناقشاتك الجميله المفيده اللي اثرت فعلا البوست

شمس النهار يقول...

*تامر علي
صدقني مش كل الامل غباء
في حالات الامل فيها بيكون في محله
عشان بيكون الخلاف في مشاكل تزول بزوال الحال القائم
زي مشاكل فترة الخطوبه
اكثال ماتخرجيش غير لما اعرف
لاماانا باخد الاذن من بابا لما ابقا في بيتك اعمل اللي انت عايزه

----

ماتسهرش بره مع اصحابك
لما نبقا في بيتنا هبقاارجع بدري

وهكذا

هنا الامل موجود
واحد مابيصليش ان شاء الله يصلي


يعني مش كل صاحب امل غبي

شمس النهار يقول...

*اللؤلؤه
وعليكم السلام
اهلا بيك
الله يسلمك الحمد لله بخير

علي فكره عندك حق عدم النضج الكافي له دخل وكمان بيتشابك مع الخوف من اتخاذ القرار
واللي بيحسسه انه فاشل لكن لو استمر مش هيحس بالفشل
والاحساس ده هو الفشل بعينه

انا عازره كل اللي بيتأخر علشان انا عارفه ان الكل مشغول
علشان كده بسيب البوست مده طويله شويه عن المعتاد

شمس النهار يقول...

*عاشقة الرومانسيه
عنك حق
لابد مع القلب يكون هناك العقل يساند ويوجه المحب
علشان مايندفعش ويندم بعد كده علي سنين تضيع علي وهم

شمس النهار يقول...

*نورهاتي
كلامك صح كله
بس اللي يعتقد انه ممكن يغير حد يبقا بيخدع نفسه
ماحدش بيتغير
انا شفت البوست الجديد وعلقت كمان
بس ماقلتليش سمعتي الاغنيه الاغنيه
انا حطيتها لك مخصوص

شمس النهار يقول...

*فوكسلوجيا
كلامك صح
فعلا مش اي شخصيه بتقدر تتخذ القرار في الغالب بتكون شخصيه تميل للعقل
شخصيه زي مابتقول انت شخصيه اقوي من الحب نفسه
احييك علي التعليق اللي اوجز وانجز

شمس النهار يقول...

*ادم المصري

اعتقد كده انت بترد علي تامر علي
صح
انا برضه ضد وصف اي مشاعر بالغباء

شمس النهار يقول...

*من غير عنوان
حضرتك كده ماردتش علي السؤال
معقول حضرتك شايف ان ده حال ناس بتحب بعض
والا حضرتك اثرت السلامه:)
ومش عايز تدخل في اي حوار:)

شمس النهار يقول...

*محمد غاليه

صديقي الدبلوماسي القدير
انا مستنيه تعليقك علي الاحداث
وخصوصا انها تقع تحت تخصصك السعاده وعكسها

شمس النهار يقول...

*داليا
اهلا بيكي
انت فين
ماتخافيش فهمت الحمد لله
الحب مجنون يؤدي للعقل الكامل
فهمتي حاجه:)

من غير عنـــوان يقول...

لأ بجد
هكذا حال المحب
يسامح
ويغفر
وينسى

ويكتشف
ويتألم
ويحب

أمل.. يجده بين قلبه
عل وعسى الحبيب يرضى عنه ويتركه يحبه

أمنياتي

شمس النهار يقول...

*من غير عنوان

بس كده يبقا الانسان بيصنع عذابه بنفسه
المفروض من وجهة نظري ان الانسان مايجاهدش في قضيه خسرانه

من غير عنـــوان يقول...

ده لو كان بإيده

قصدي أن الحب لا يتأتى بالإختيار..

أمنياتي

شمس النهار يقول...

*من غير عنوان
فعلا الحب مش اختيار ان الانسان يحب حد ده في حد ذاته مش اختيار
بس انه يستمر او لايستمر هنا الاختيار
والاراده بتدخل في الامر
مش معقول ان انسان عاقل يكون بيحصل معاه اللي مكتوب في البوست ده ويستمر
هنا الاستمرار في حد ذاته اختيار للعذاب

طوبة ذهب وطوبة فضة يقول...

اعذرينى انا متعوده اقرا الموضوع بالكامل وبكل التعليقات وبعدين اعلق لكن المره دى ما لحقتش اقرا غير الموضوع فهرد على اسئلتك ان احيانا بيكون الحبيب لحبيبه قشايه بيتعلق فيها ذى الغرقان او مجرد امل بيعيش يتمنى انه يتحقق حتى لو كان عارف انه هيسيبه لان مجرد وجوده حتى ولو لفتره مؤقته بتريحه وبتحسسه ان ممكن ولو واحد فى المليون الامل يتحقق هو دا رئى والسلسله بتاعتك متبعاها من اولها لكن اعذرينى على ضيق الوقت اللى بيخلينى ما الحقش اعلقتسلم ايدك

aidy يقول...

ليه الحالات السابق ذكرها بيكملوا ليه ؟
*******
لأنهم بيحسوا انه هو ده الحب انهم لازم يستحملوا وانهم لو بعدوا مش هيعرفوا يحبوا تانى

بس ده لوقت مؤقت لأنه بيتصدموا فى النهاية
************************
وليه الانسان لما بيحس انه مش قادر يدي اللي قصاده المشاعر اللي هو عايزها ليه بيكمل معاه ليه يفضل يعذب فيه للنهايه ؟

********************


ده بقى بيكون انسان مغرور بيستمتع بحب اللى قدامه ليه وبيفضل يستنفذ كل مشاعره على أد ما يقدر يعنى كنوع من الاستنزاف لغاية لما يزهق وبعدين هو كمان اللى بيبعد

***************************

ليه في ناس دايما تعيد وتعيش الفشل هو هو وبنفس الاخطاء ؟

***************************

لأنهم مش بيعملوا وقفة مع نفسهم
يشوفوا غلطوا فى ايه فى التجربة الاولى عشان يصلحوا بعد كده

لأنهم بيكونوا مقتنعين ان مش هما اللى غلطوا
دايما الطرف التانى هو اللى غلطان
وبينسوا انهم هما اللى إدولوا الفرصة انه يغلط فى حقهم حتى لو كده

وبالتالى مش بيحاولوا يغيروا ويغيروا ليه وهما شايفين انهم مش غلطانين

لازم الحياة تدوس عليهم كمان تلت اربع مرات عشان يحسوا ان فى حاجة غلط لازم تتغير

ghorBty يقول...

السلام عليكم

امممممم

مش عارفه اقول ايه لاني مش جربت الحقيقه

بس من وجهه نظري اي حد بيحب حد بيحس بجانبه بالسعاده والفرح واقصي امانيه ان دائما يكون بجابنه طول الوقت لان دا بيريحه وحتي لو لم يأخذ منه اي شئ ...

فالاصل ان الذي يحب يحب ان يرا نفسه سعيد بالقرب من حبيبه وان كان هذا الحبيب مقصر في حقه او حتي بيكذب عليه
هيفضل يقنع نفسه ان بكره هيحبه وهيكون احسن وهو في الواقع بيضحك علي نفسه وبيعيش سعاده وهميه سننتهي قريبا جدا

لان الحب اخذ عطاء ولا احد يعطي دائما دون مقابل وبالذات من يعطي مشاعره ولا يلاقي من يقدرها ولا يحس بها سيشعر بالملل وستنقلب هذه السعاده حزن والم

فالوهم لابد ان ينتهي يوما

فيجب ان ينظر بعين بصيره حتي لا يتعذب اكثر فلا يشعر بالجرح الا المجروح ولن يجد يدك تخفف عنه اٍلا يده هو فليرحم بحاله ولا يخدع نفسه اكثر ...

بارك الله فيك

صوت من مصر يقول...

لاننا لسه عالم رابع بجهلنا وتفكيرنا ان الحب عيب مع ان الحب مش لازم يبقى قله ادب وقزاره بس هو مجرد مشاعر
وللاسف فشلت فى كل معاملاتى بسبب ده وعموما انا عايش حياتى حر ليق ولا بفكر فى جواز ولا خطوبه ولا حب لانى من الاخر فقران ودى برضه مشكله من مشاكل الحب
والتانيه لانى مجنون محدش بيحب تفكيرى
والثالثه لانى معرفش يعنى ايه حب زلا مشاعر وقصص فاشله
مع انى عشت قصه حب لمده 3 سنين
بس فشلت
مش معنى كده انه كله بيفشل
لا بالعكس الاغلبيه ناجحه
بس محدش يقدر يقول عن الحب اى كلمه حتى ولو كان عنتره ابن شداد

صبرني يارب يقول...

اييييييه ده ما خدتش بالي خالص من البوست ده على فكره

اعتقد فى الاول بيبقى عنده امل انه يتغير الوضع

وبعد كده بيحاول يقنع نفسه بقى باي كلام اهبل عشان يكمل ويعيش

اما عشان بقى بينهم بيت وعيال

واما عشان الخوف من الفشل

واما عشان هو عبيط اصلا وعاجبه العذاب

زي ما بالظبط واحد راح يشتكي من مراته مش فاكره لحد من الائمه تقريبا

فقاله وليه صابر عليها

قاله فيما معناه اصلها حلوه وعاجباني
ههههههههههههههههه

قاله خلاص بقى يا تستحمل عيوبها يا تستغنى عن حلاوتها



يعنى فى ناس بتشتكي من الطرف التاني لكن بينهم وبين نفسهم فى حاجات معينه هما مستحملين عشانها

اما مصرحين بها للناس ولنفسهم

واما حتى نفسهم مش صرحا معاها


ما قريتش كل الردود

بس لنا لقاء ا خر ان شاء الله ننام شويه ونصحى نستانف

تحياتي ليكى يا شموووووسه يا وحشاني

norahaty يقول...

السلام عليكم ورحمة
الله تعالى وبركاته
وصباح الخير والخيرات كمان
(بس اللي يعتقد انه ممكن يغير حد يبقا بيخدع نفسه...ماحدش بيتغير)
وهذا هو رأيىّ ياشموسة كما قلت فى أخر التعليق بتاعى:
(لأ كما افتكرت :الوهم الاكبر
انا عارف كل العيوب
بس حأعرف اغيره !!
فعلا ده الخادع لنفسه:(
السطر الاخير رأيى
بمعنى انه الخادع الاكبر لنفسه:(من يظن انه يستطيع تغير احداً)
والاغنية سمعتها ثلاث مرات !!مرة عن يوتيوب حينما قرأت اسمها عندك ومرتين
الان:)وشكرا للهدايا الجميلة

reem يقول...

ازيك يا شموسة
حلو اوي اوي الموضع دا
كتير بيكون المحب عارف كويس عيوب حبيبه وبيحاول يضحك على نفسه ويعمل نفسه مش واخد باله ومش بيصارح نفسه بالعيوب دى او يقول ممكن تتغير مع الزمن
بيكون خايف على العلاقة تنتهى ضعفه وخوفه ادام علاقته بحبيبه بتخليه يغمض عيونه عن العيوب دي

وبيستمر في العلاقة ويحس بعدها انه كان غلطان وانه لو كان خد موقف من الاول كان هايبقا اهون بكتييير

hamada يقول...

جروب جريدة الصباح العربي بيت المدّونين العربي
http://www.facebook.com/home.php#/group.php?gid=78080770039

ندا يقول...

المحب بيفعل اشياء ربما على غير ارادته لا يعرف ما الذى يحركه ويدفعة لهذا الفعل فمشاعره هى المحرك الاساسى له وليس عقلة
تقبلى مرورى
دمتى فى سعادة
على فكرة برده انا بحب الورود وفى كل بوست عندى لازم احط وردة

شمس النهار يقول...

*طوبه دهب وطوبه فضه
والا يهمك وقت ماتلاقي نفسك فاضيه تعالي واقري وعلقي مدونتك وتنور بيكي
تعليقك لطيف بس صدقيني الامل هنا امل كاذب

ماتنسيش البحث
وعلي فكره سبهلله هتلاقيها في القايمه عندي حاطه لينك علي الموضوع ده
شوفيه وقولي لي رئيك

شمس النهار يقول...

*ايدي
بجد تعليقك صح وكل كلمه فيه حقيقيه
وبحييكي عليه
انا موافقه علي كل كلمه فيه وهي تشبه رأي كتير

شمس النهار يقول...

*غربتي
فعلا لازم الانسان يحس بالسعاده والراحه بجوار من يحب
لكن لو ماحسش لابالسعاده والابالراحه وكله حرق دم وانتظار وحزن والم يبقا ليه الاستمرار
المفروض زي ماقلتي
يرحم نفسه وبدل الجرح مايكون بعمق 50 متر كفايه 10 متر

شمس النهار يقول...

*صوت من مصر
مين اللي بيقول ان الحب عيب الحب مش عيب لكن مايرتكب من عيب بأسم الحب هو اللي عيب

ماشاء الله
فقران ومجنون
وكمان ماتعرفش يعني ايه حب
يانهر ابيض امال انا عماله اكتب والناس تعلق ونرد علي بعض لما البلوجر ولع:)
كده هي دي اخرتها ياكيمو

قصة حب تلت سنين وفشلت لما هي فشلت كنت بتعمل ايه تلت سنين
الفشل مابيجيش فجأه له دلائل ومقدمات والمقدمات بتنبأ بالنهايات
اكيد انت كنت عارف من الاول ايه اللي خلاك تستمر

يعني ايه ماحدش يقدر يقول علي الحب كلمه
والا عنتر
لالا ده عنتر ده باذات قال لما اشجانا
ومش كده وبس لا ده قال وحول كلامه لفعل
وحادثة النوق موجوده

الرجل قال ووعد ووفا

كيمو بطل تجيب لي احباط
انا مش ناقصه:)

mahasen saber يقول...

شموسه وحشتينى جدا قوى قوى قوى

وعليه بئه اتكلم عن البوست اليى اتاخرت عليه فى المناقشه

اليى ااقدر ااقوله ان مراية احب فعلا عاميه وبنبقى منساقيين بلا عقل ولاا تفكير فى طريق الحب اليى فى الغالب مليان حفر ومطبات

وعليه لا تكتشف المصيبه الا متاخر قوى قوى

يعنى احنا بنحاف قلبنا يتوجع لو سبنا حبيبنا ومبنعملش حساب للصدمه النفسيه اليى هتصيب مشاعرنا بعد كده

ما علينا برضه الحياه كلها نصيب

mahasen saber يقول...

شموسه وحشتينى جدا قوى قوى قوى

وعليه بئه اتكلم عن البوست اليى اتاخرت عليه فى المناقشه

اليى ااقدر ااقوله ان مراية احب فعلا عاميه وبنبقى منساقيين بلا عقل ولاا تفكير فى طريق الحب اليى فى الغالب مليان حفر ومطبات

وعليه لا تكتشف المصيبه الا متاخر قوى قوى

يعنى احنا بنحاف قلبنا يتوجع لو سبنا حبيبنا ومبنعملش حساب للصدمه النفسيه اليى هتصيب مشاعرنا بعد كده

ما علينا برضه الحياه كلها نصيب

صوت من مصر يقول...

انا مش بحبطك ومش بقول مفيش حب ومش بقول ان انا غلط ولا انتى ولا التعليقات الى موجوده
انا بوضح وجهه نظر زمان ايام الحرب بالطبع الحاله كانت ضنك بس الناس كانو بيحبوا بعض وبيخافوا على بعض
كن لما يكون فقر وتخلف تبقى صعبه جدا اننا نفكر فى الحب فى ظل قهر حكومى انسانى
لكنى انا واثق ان فى يوم الحب سيطرق بابى من وسع
مع الناس فاكرانى كازانوفا من كتر البنات الى اعرفها
بس انا بطلت احب
ونسيت الحب

شمس النهار يقول...

*صبرني يارب
اهلا اهلا
اخبار التعديد اللي عندك ايه:)

عندك حق اللي بيصبر واللي المفروض يحاول مره واتنين ومليون اللي متزوج عشان مليون اعتبار من اهمها الاولاد اللي مالهمش ذنب ان احد الطرفين اساء الاختيار
بس اللي لسه علي البر في فترة الخطوبه ده بيقنع نفسه بي ايه

اما اللي عاجبه العذاب ده يبقا مريض في خلل ما في شخصيته ولازم يساعد نفسه يطلع من الدايره الجهنميه دي

اما المثل ده ضحكني جدا
خلاص هو مش بيحب حاجه فيها اهي خلاص يستحمل بقا
اما الرجاله دول عليهم حاجات ياصبرني


مستنياكي
انت كمان وحشاني

شمس النهار يقول...

*نورهاتي
ايوه صح اللي يفتكر انه ممكن يغير حد يبقا بيخدع نفسه
لأنه حتي لو فرضنا جدلا انه هيتغير واتغير فعلا ماهو هيكون شخصيه تانيه غير اللي المفروض اعجب بيها وحبوا بعض عليها

جميل ان الاغنيه عجباكي
بصراحه كل اغاني فيروز جميله

بس في اغاني ليها ذكريات حلوه عندي الاغنيه دي من ضمنهم
وامبسط جدا ان الصدفه خلتها تبتدي وانا يادوب بلاقي البحر امامي

شمس النهار يقول...

*ريم
الحمد لله ازيك انت
بالظبط الضعف
بس انا في اعتقادي ان الحب قوه
ولو حس الانسان انه ضعيف يبقا ده مش حب

وعلي فكره في فرق بين الضعف في الحب والرحمه والحنيه

زي الخوف بالظبط
في فرق بين ان انا اخاف
((*علي فكره انا مابخافش*))
من حد بخاف منه نفسيا خوف كره
وبين ان انا اخاف علي حبيبي من اي حاجه تزعله
يعني لو حبيبك طلب كوب ماء جري هتجيبيه وهتقولي له بالهناء والشفاء

لو حد خايفه منه عشان شراني ومابتحبيهوش برضه هتقومي تجيبي الماء مع تكشيره ومن جواكي تقرنيها باللعنات

كل الموضوع عامل نفسي الانسان لازم يعمل وقفه مع نفسه في ناس بتقدر وناس لا

شمس النهار يقول...

*ندا
اهلا بيكي في اول زياره

الحقيقه كلامك صح المحب بيعمل تصرفات مابيعرفش ساعات بعد مايعملها عملها ازاي

بس لازم العقل يدخل شويه علي القلب
عشان الامر يرد الي صحيحه
ومايرجعش يندم علي الوقت والعمر اللي ضاع

احلا حاجه في الدنيا الورد والشمع
عارفه الاتنين دول بيدونا كل حاجه ومابيخدوش اي حاجه
بالرغم انهم رمز للنور والجمال والعطور الجميله

بس كمان ممكن شوك الورد يجرح
ونار الشمعه تلسع بس ماتحرقش(الا بفعل فاعل)

شمس النهار يقول...

*محاسن صابر
اهلا اهلا انت فين يابنتي
يعني لما بيرو يبقا في الثانويه العامه هتتبخري:)

صدقيني يامحاسن احنا بنبقا عارفين المصيبه من بدري بس بنستعبط وبنحاول عشان لما يتخذ قرار الفراق يبقا المحب عمل كل اللي عليه ومافيش مجال للندم

معلش يعني انت يامحاسن عملتي كل اللي عليكي وزياده
حد يقدر النهارده يقول لك بس لو عملتي كذا والا كذا
انت نفسك عندك ولو ذرة ندم

وبعدين ماهو كده كده القلب موجوع الافضل ان المحب قلبه يتوجع بكرامه من انه يتوجع من غير كرامه

شمس النهار يقول...

*صوت من مصر

كلامك ماشي

بس ايه موضوع بطلت احب
هي سجاير هتبطلها :)
طب ده حتي انت مش عارف تبطل السجاير عشان بتحبها
بس عايزه اقول لك ان السجاير محبوبه خاينه ومش وفيه
عشان بتاخد منك فلوسك وصحتك ونفسك المقطوع منها
وبتديك سعاده وهميه واحساس وهمي
بكره لما تكبر وماتقدرش تاخد نفسك من اللي هي عملته فيك في شبابك
هتفتكر كلامي ده :)

mahasen saber يقول...

بخصوص معاد يوم الجمعه ضد مردتش عليا فقلت اكيد اتلغى

نفسى اشوفك جدا ووحشتنى متعة الكلام معاكى ورؤية وشك الصبوح الرقيق يا شموستنا الرقيقه

mahasen saber يقول...

يا شموسه مهو احنا فى دوامة الحب مبنقدرش نستدل على كلمة كرامه دى بتبقى مستخبيه فى قاموس اللغه يعنى اى تصرف بيصدر من الحبيب بيفسر انه ايه بيخاف عليا

ومبنعرفش الحقيقه المره ولاا بنفهم معنى كلمة كرامه الا متاخر قوى

صدقينى يا شموسه اليى بيحب بيبقى مسلوب الاراده وغير قادر على ابداء اى نوع من انواع القرارات السليمه ولاا التفكير اصلا بعقل لانه بيبقى ملغى ومش موجود

شمس النهار يقول...

*صبرني يارب
بخصوص يوم الجمع بالنسبه لي ماشي مافيش مشاكل حتي لو ضد ماقدرتش تيجي تعالي انت اقول لك هكلمك في التليفون

شمس النهار يقول...

*محاسن صابر
اللي بيخاف علي حد مابيجرحوش
اللي بيخاف علي حد مابيعذبوش

اللي بيخاف علي حد بيديله حب حنيه واهتمام مش اهمال وتوتر

صدقيني يامحاسن الحققه المره دي بتبقا معروفه بس المحب بيحاول يأجل اعلانها
عشان بيبقا عنده وهم ان اعلانها هو اعلان وفاته
بس كل ده وهم كفايه انه بيلاقي نفسه تاني
ايوه اللي بيتحط في الموقف ده وبيستمر فيه
بيبقا تايه عن نفسه حبتين
واول مايعمل وقفه ولو صغيره بتكون دي بداية النهايه والرجوع لنفسه اللي ضيعها

كيــــــــــــارا يقول...

اللي بيخاف علي حد مابيجرحوش
اللي بيخاف علي حد مابيعذبوش

اللي بيخاف علي حد بيديله حب حنيه واهتمام مش اهمال وتوتر


****************

دي الخلاصه ياشموسسسسسسستى

شمس النهار يقول...

*صبرني يارب
معلش جيت ارد علي محاسن كتبت صبرني يارب
ماانت اللي علي البال ياجميل
علي فكره هنتقابل يوم الجمعه محاسن وانا
تحبي تنضننمني :)

شمس النهار يقول...

*كيارا
ازيك انت فين
كنا لسه بنتكلم عليكي محاسن وانا

فعلا ياكيارا هو ده المفيد

اللي بيحب عمره مايزعل حبيبه او يعمل حاجه تجرحه

Geo Amr يقول...

اعتقد انى الحب انواع كثيرة ومنها الصادق ومنها الكاذب وفعلا بيكون الاتنين عارفين انهم بيخدعوا بعض ومع ذلك بيكملوا يعنى كنوع من التسلية ولكن الحب الى فيه رضا ربنا وطاعته هو دة الحب الصادق يعنى حب شريف بين اثنين بينهم ارتباط شرعى اما الحب الى بين اى اتنين ليس بينهم اى علاقة شرعية دة هو الحب الفاشل

واحد من العمال يقول...

السلام عليكم

كل ده سؤال مجرد سؤال
وكل دى أجوبه
تدوبناتك والتعليقات عندك عايزه تفرغ تام
بس متابع
ودمتى بخير

شمس النهار يقول...

*جيو عمر
الحقيقه كلامك صح
بس مش عادتا الحب بيكون تسليه
لكن الحب اللي في البوست ده بيكون فعلا تسليه بس احد الطرفين بيتسلي
والطرف التاني بيتعذب
واتمني انك تقرا السلسله كلها هتلاقي اكتر من رد لطيف علي كلامك
انت كنت غيب بقالك مده طويله

شمس النهار يقول...

*واحد من العمال
اهلا بيك في اي وقت
بس فين المشاركه الايجابيه :)