الاثنين، 30 مارس، 2009

المهم نحب صح

طول عمري اقول مش المهم نحب المهم نحب صح .
يعني ..
الاول اعرف : كلمة حب .. يعني ايه حب ؟
وكمان اقدر افرق بين الحب الحقيقي والاعجاب .
واعرف واجبات وحقوق الطرفين .
واعرف ان الحب حب مش حرب مين يسيطر علي مين ؟
واعرف مقومات الحب الناجح اللي يؤدي لزواج ناجح .
واعرف ليه في حالات كتير الحب بيموت فيها بعد الزواج وفي حالات اكتر بيعيش وبيقوي اكتر من الاول .
واعرف افرق بين الحب والوهم .
واعرف افرق بين الحب واللي عايز يعيش حالة الحب .
واعرف افرق بين الحب والصداقه .
ونعرف مع بعض حكاية الحب الاول .
و نعرف كمان ايه الحاجات اللى بتسند الحب و تقويه و تكبره ؟
و اللى بينجرح بينجرح ليه ؟
و اللى بينسعد بينسعد ليه ؟
وليه الناس اللي ماتجوزتش هي اللي اشتهرت ( روميو وجوليت - قيس وليلي ) بس فيه ناس اتجوزت واشتهرت برضه زي (عنتر وعبله-- دوق وندسور و مسز سمبسون)
يعني هنشوف حكاية الناس دي ايه .
وايه موضوع الحب ده اللي مجنن الدنيا ؟
وياتري هو حلو والا مش حلو زي ماكل المدونات اليومين دول مشنعين عليه ؟
انا اترددت كتير انى اكتب في الموضوع ده بس سويت فيولت وكمان محاسن صابر وكذلك عمرو بدر اقنعوني اني اكتب فيه وخصوصا محاسن اللي متحمسه للبوست جدا :)
استحملوا بقا هنكتب ونبوظ اللغه العربيه انا هكتب من قلبي ورزقي علي الله .
حد عايز نتكلم في نقاط غير السابق ذكرها ؟ عشان لما هنبتدى هنرغى عن الحب مع بعض يعني سلسله كده بس ملضومه لولي وطبعا هنرفق مع كل بوست اغنيه .



hamid Upload Music

الثلاثاء، 24 مارس، 2009

صباح الطرب

بعد مناقشات بينى و بين عمرو حبشتكنات و بناءا على طلب من غير عنوان قررنا نسمع و نسمع البلوجر كله ام كلثوم (علشان انا مبحبش اوى فريد الاطرش )
Get this widget Track details eSnips Social DNA

الأحد، 22 مارس، 2009

رادل ولد رادل

الحقيقه ياجماعه موضوع كلمة راجل ده محيرني شويه هي كلمه تدل علي النوع والا هي تصرف وبالتالي بتكون هناك نساء ارجل من ميت راجل
عيد الام خلانا شفنا وقرينا عن نماذج من النساء ارجل من رجاله كتير ودايما بيكون الرجل خد في وشه ومشي يابمزاجه خرج ولم يعد يا انتقل للرفيق الاعلي وفي كلتا الحالتين الست شالت الحمل كله علي راسها
فجه علي بالي السؤال ده
هل الرجوله تدل علي النوع ام هي معني ؟ ومامعني كلمة رجل ؟

السبت، 14 مارس، 2009

حماتي (امي)

عيد الام قرب جدا
وطبعا في ناس بتقول ايه عيد الام ده المسلمين مالهمش غير عيدين بس
وده بدعه وماينفعش كده
انا بقول لهم ماتحتفلوش معانا وما تبجلوش الام ماهو اللي زعلان من اليوم ده اعتقد انه متألم من شىء ما
وناس تقول حرام اللي مامته ماتت يعمل ايه ؟ كده بنكد عليه !! وماله ياناس لما يفتكر امه يوم ويعيطله عليها دمعتين ويقرا لها قران كمان معلش ياريت ننكد عليه عشان يفتكرها عشان انا واثقه انه نسيها في خضم الاحداث ده في ناس امهم علي وش الدنيا ومش فاكرينها اصلا
واللي مش مصدق يوصل لأقرب دار مسنين جنبه ويشوف وعلي فكره الابناء فعلا بيفتكروهم وبيجوا الدار يعيدوا عليهم وفيهم بيبكي ويعتذر عن التقصير
يعني اللي بينادي ان ده يوم بدعه يروح يوم عيد الام ويشوف والا كمان عايز يحرم الام المسنه من اليوم ده كمان
بس المشكله انه زيه زي اي عيد سطحناه وجعلناه عيد استهلاكي برضه مع انه عيد مشاعر
المهم
انا عايزه اهدي البوست ده لروح غاليه عندي جدا جدا حماتي اه والله الست دي ليها عندي جمايل كتير انا شفت الدنيا من خلالها بشكل جديد خالص واتعلمت منها حاجات كتير جدا وكان لها عقل جميل جدا وماتبخلش بالنصيحه ابدا وكانت رحمها الله تتمتع بخفة دم لطيفه
عمري ماطلبت منها النصيحه الا واعطتهاني
النصيحه الصح المنزهه عن اي غرض وعلمتني اني لازم اعمل كل حاجه بحب واني علي طول اكون مبتسمه ومفرفشه علي حد قولها عشان النكد مش بيحل حاجه
الست دي وقفت جنبي كتير عمري ماحسيت انها حماتي كنت بحس انها امي مها كان الموقف
وفضلت اقول لها ياماما ( برغم كل الظروف ) وفضلنا ام وبنتها الي اخر يوم في عمرها
هي ماتت من 8 شهور بس وبجد هي وحشاني
كل سنه وامي طيبه وبصحه وسعاده وكل سنه وكل ام طيبه
والله يرحم كل ام ماتت

اٍسمعوا كده !!

Get this widget Track details eSnips Social DNA

الثلاثاء، 10 مارس، 2009

الكدب وسنينه 2

بصراحه ماكنتش متوقعه كم التعريفات للكدب اللي جت في تعليقاتكم

ومش عارفه و ما ينفعش اعمل لها ملخص من كتر الافكار والحالات واتناقشت كتير انا و
عمرو بدر في شكل البوست والخص الكلام الجميل اللي انتم كاتبينه ده كله ازاي ؟

وياريت نعمل لعمرو اكتتاب لفاتورة التليفون بس من الرجال فقط عشان هو شرقاوي علي صعيدي ومابيحبش ست هي اللي تطلبه لازم هو اللى يطلبها :)

وكذلك قتلنا البوست بحث انا وضد التيار سابقا و
سويت فيولت الان لحد التليفون ماكان هيولع بس بصراحه هي قالت لي ان في ناس بتكدب وهي مش عارفه انها بتكدب يعني في اللاشعور و تحس بصدقهم من براعة تمثيلهم و كدبهم على نفسهم لدرجة انهم مصدقين كدبهم و عايشين فيه و دول اخطر انواع الكدابين علشان دول اللى بيخربوا الدنيا بين الناس

بصراحه بعد كل المداولات دي كلها انا ماعرفتش اعمل حاجه كل كلمه كتبتوها مهمه جدا وجميله وكل تعليق كان بحث لوحده فاماعرفتش الخص حاجه كل كلمه مهمه وبتكمل اختها

بصراحه انتم اثريتم المدونه بكلامكم ده وحسيت ان البوست التحم مع التعليقات واصبحوا كيان واحد ماينفعش ندخل بينهم

ياريت نقرا تعليقات بعض وكل واحد فينا هيستفيد جدا من اللي كاتبه التاني

بشكركم كلكم ومش لاقيه كلام اقوله يوفيكم حقكم

امتى حتعرف ؟

Get this widget Track details eSnips Social DNA

الخميس، 5 مارس، 2009

الكدب و سنينه .. تحديث

تحديث للكدب و سنينه : أدعوكم لمدونة اٍينو ( رقة الاٍحساس ) عامله بحث لطيف عن الكذب الحلال ..
***************************
موضوع الكدب ده شاغل دماغي بقاله فتره وكان نفسي حد تاني يكتب فيه بس ماحصلش
اصل انا مابعرفش اكتب كويس والا احلل كويس
فاقلت نكتبه سوا يعني كل واحد وواحده يكتب في التعليق رأيه في الكدب وانواعه وليه الانسان بيكدب
انا في اعتقادي ان الكداب يامخادع.. يانصاب ..ياخايف ..يامكره ...ياهوايه... ياعاده اتعود عليها من الصغر... يابيستمتع انه ضحك علي الاخرين..ياعايز ياخد حاجه مش من حقه
يادمه خفيف زي ابو لمعه كده
وفعلا الغريب عادتا ان الكداب دمه خفيف جدا
والغريب ان اغلب العاشقين كدابين ليه مش عارفه هو الحب بيفتح نفسهم علي الكدب
مع ان الحب مبني علي الصدق والثقه
المهم ليه الكدب وماحدش يقول لي ان في كدب ابيض واسود وبمبه الكدب كدب اه

انتم عارفين ان الحيوانات والحشرات بتكدب كمان عشان تخادع الصياد او الفريسه
ملحوظه
------بعد مانخلص تعليقات هعمل بوست اجمع فيه كلامكم ونعمل ملخص لحالةالكدب