الأحد، 22 مارس، 2009

رادل ولد رادل

الحقيقه ياجماعه موضوع كلمة راجل ده محيرني شويه هي كلمه تدل علي النوع والا هي تصرف وبالتالي بتكون هناك نساء ارجل من ميت راجل
عيد الام خلانا شفنا وقرينا عن نماذج من النساء ارجل من رجاله كتير ودايما بيكون الرجل خد في وشه ومشي يابمزاجه خرج ولم يعد يا انتقل للرفيق الاعلي وفي كلتا الحالتين الست شالت الحمل كله علي راسها
فجه علي بالي السؤال ده
هل الرجوله تدل علي النوع ام هي معني ؟ ومامعني كلمة رجل ؟

هناك 93 تعليقًا:

عمرو يقول...

الرجوله موقف و تصرف
سواء كان من رجل أو اٍمرأه أو حتى طفل ..
الرجل الجدع هو القادر غلى تحمل المسئوليه أيا ما كانت و الهروب منها هو قمة عدم الرجوله ..

صوت من مصر يقول...

الرجوله ادب مش هز اكتاف ولا ايه
الرجوله يعنى عمارتين ادب و فدانين اخلاق

صوت من مصر يقول...

اسف للتعليق
الرجوله احترام وغيره على الاخرين الرجوله يعنى رجاله مصر والى منها

mahasen saber يقول...

معنى ليس الا يا شموسه طبعا

والدليل ستات زى احلام وام وليد وميرفت وغيرهم يعنى الدليل القاطع هتلاقيه كمان فى الشارع الست اليى قاعده تبيع علبة مناديل بقروش عشان فى الاخر تسد جوع ولادها ولو حتى بجنيه فول

الرجوله كلمه مجتمعنا الذكورى بيحتكها على الرجل وبيفهما على مزاجه الشخصى

mido يقول...

انا شايف ان راجل تدل على النوع و ليست صفة

ممكن يبقى رجل شهم و جدع و ممكن لأ

و الست ممكن تبقى شهمة و جدعة او لأ

mahasen saber يقول...

طل انا دخلت علقت وكنت التعليقالتانى جه منيين هذا الصوت العالى

ماشى امرى لله

وحشتينى جدا جدا جدا انا مشغوله لاخرى دعواتك بئه ربنا يصلح الامور للاحسن

حسام غانم يقول...

ايوة زي مانتي بتقولي

فيه ست بميت راجل

الرجولة تصرف

MǿиY El-Shreef يقول...

الرجوله مواقف قبل ماتكون تحديد نوع او جنس .. رجل يعني شخص قادر ع تحميل مسئولياته وقرارته وقادر ع انه يقف قصاد الحياه ويلتزم بمادئه وقيمه .. راجل يعني راعي ومسئول عن رعيته وفي ستات كتير كده ف راجل مانقدرش نطلقها ع الرجاله بس

mostafa rayan يقول...

الرجولة تدل على المعنين
الرجولة تعني الشهامةوالجدعنةوتحمل المسئولية
تحياتي لك

aidy يقول...

جايز تكون معنى إرتبط معانا بنوع معين

يعنى الرجولة إرتبطت عندنا من زمان اوى بالشهامة والمروءة والحماية والامان والقوة وحسن التصرف وتحمل المسؤلية وإن الدور ده الاصلح للقيام بيه هو الرجل

لكن مش معنى كده ان المرأة لن تستطيع انها تقوم بيه لأن الظروف فى احيان كتير بتضع بعض السيدات فى مأزق

وبنلاقى اغلب السيدات دول بمرور الزمن أصبحوا يتمتعوا بشخصية قوية قادرة على تحمل المسؤلية التى كان يتحملها الرجل من قبل

كمان فى رجال كتير بيفتقدوا لحسن التصرف وتحمل المسؤلية وللصفات دى

وده معناه ان مش النوع ولكنه فعلا معنى إرتبط معانا منذ قديم الازل بنوع معين...

تحياتى

صبرني يارب يقول...

ياما رجاله لا تحمل من الرجوله الا اسمها وشكلها بس يا شموسه طبعا


وعلى راي اللمبي

الرجوله ادب مش هز اكتاف
هههههههههههههههههههه

حقيقى الرجوله اولا ادب

نهر الحب يقول...

ازيك يا شموسة
لية مختفية عنى ؟؟
كل عيد ام وانتى بخير
بصى الرجولة مجموعه مواصفات عربية شريقة وضعت للرجل ليكون فارس احلام
اما عن النساء اللى تحملن المسئولية ونجحن فالامثلة كثيرة

تحياتى وحبى

عاشقه وغلبانه يقول...

بصي ياست الكل
البشريه تنقسم من حيث النوع لراجل وست
دي فطره ربنا في الاساس
في بقي شويه صفات تلاقيها صلبه كده وحاده وقويه المفروض يتسم بيها الرجاله
الصفات دي مع اساس ذكوري يدوكي راجل مكتمل
لو فقد الصفات وماخدش من الرجوله غير الاساس اصبح اشباه رجال
ودول قلتهم احسن
ولو استبدل صفات الرجوله واخد تصرفات الستات دول رجاله مستته ماشاء الله
وقلتهم احسن برضو

عند الست برضو نفس المبدأ
لو فقدت صفات الانوثه اصبحت شبه ست


في ستات بقي ماشاء الله بتجمع كل الصفات
وقت ماتحتاج قرار حازم وجد تلاقيها تتقمص دور الراجل ودي اللي يتقال عنها بميه راجل
ووقت ما المفروض تكون ست بس بتكون ست بس

انتي فهماني ياشموسه

من الاخر
الرجوله بجد = قول + فعل

عاشقه الرومانسيه يقول...

الرجوله حسن تصرف وتحمل للمسئوليه

أكم من رجال لا يعرفون عن معنى الرجوله الا ما كتب فى خانه النوع فى البطاقه الشخصيه

وأكم من نساء تحملوا مسئوليه يعجز عنها كثير من الرجال

mohamed ghalia يقول...

الرجولة مواقف وشخصية وأداء يحسس الى قدامك إنك راجل
وقديما قالوا ليس كل ذكر رجل

kemet يقول...

السلام عليكم ورحمة الله وبركاته

شمس
الرجل في اللغة معناها من بلغ مبلغ الذكورة
بس دا في اللغه

لكن في قاموس الحياة
فهناك فرق كبير بين الرجل والذكر
ففي البطاقه الشخصيه تكون خانة النوع ذكر وليس رجل

لذا فالمجتمع يفهم تماما الفرق بين الاثنين
ولكن
الفكرة
اننا
بنعمل
مش
واخدين بالنا فبيصبح عند بعض الناس الرجوله نوع
ودي الكارثه ان الرجال من النوع ده كتير
لكن الرجل اللي اتقال فيهم انهم قليل
اصبحوا نادرين
:)
تحياتي الى اللقاء

ABOALI يقول...

راجل يعنى واحد ليه رجلين ماشى على الارض

رجل يعنى يااااااااا عينى برجل واحدة ماشى

مستنى حواء علشان يكونوا رجلين تمشى على الارض ويكملا بعض

والمعنى فى بطن الزير


تحياتى

قال رجل قال

حواء يقول...

هو طبعا الرجال يختلفوا عن الذكور
وده ذكر في القرأن الكريم
وفي الحياه فرق كبير بين الذكر والراجل
وفي ستات بميت راجل فعلا
والامثله كتير علي كل الانواع
بس فعلا في حاجه غريبه جدا
ان الذكور كتروا اوي
وإن الرجاله بقوا نادرين جدا
وإن اي شاب بيطلع نسخه طبق الاصل من أبوه إلا ما رحم ربي
علشان كده نصيحه مني لكل البنات اللي مقدمه علي الزواج
قبل متسئلي علي العريس نفسه اسئلي علي ابوه وشوفيه ازي بيتعامل مع اهل بيته
وبعدها اسئلي علي العريس المنتظر
ولو لقيتي الاب زفت
انفدي بجلدك علشان متندميش
لان اذا كان رب البيت بالدف ضاربوا فشيمة اهل البيت الرقص



جزاكي الله خير ياشموسه

Foxology يقول...

الرجولة معنى

الرجولة معنى لتحمل المسؤلية بكل جوانبها
الرجولة معنى للألتزام بالكلام وعدم نقض العهد
الرجولة معنى للمحافظة على الحاجة اللى مسؤل عنها

معانى كتيرة اوى وللأسف مبقتش موجودة دلوقتى

تحياتى :)

شمس النهار يقول...

*عمرو
انت اختصرت الموضوع بطريقه لطيفه
فعلا ساعات بيكون في طفل ممكن يتصرف احسن من اي رجل
بس تقول ايه في الرجل اللي بيهرب من المسئوليه ويقول برضه انا رجل

شمس النهار يقول...

*صوت من مصر
تفتكر ان كل الرجاله في مصر رجاله والا دي عنصريه منك
طيب ماانت قلت ان الرجوله ادب تفتكر كل الرجاله دلوقتي محترمين
ولو كده ليه المحاكم مليانه قضايا اسره

شمس النهار يقول...

*محاسن
تفتكري يامحاسن الرجل اللي بيحبس ست علي زمته ويدفعها تروح المحكمه ده رجل
بس ده مايمنعش ان في لسه رجاله بجد
وشباب طالع عارف يعني ايه معني الرجوله

شمس النهار يقول...

*ميدو
لا ياميدو النوع يشار له بكلمة ذكر ولكن الرجوله حاجه تانيه خالص

شمس النهار يقول...

*محاسن
انت معلقه تاني
انت كمان وحشتيني ويعلم ربنا انا بدعيلك كتير بس ليه كل ماناخد موعد يتفركش
تفتكري دي عوووووووكووووووسات

شمس النهار يقول...

*حسام غانم
ماش الرجوله تصرف ايه هي التصرفات دي اللي لما تلاقي رجل بيعملها تقول عليه رجل

شمس النهار يقول...

*موني الشريف
عندك حق بس ساعات المسؤل عن رعيته ده بيكون غير مسؤل اصلا وبيتصرف بحمق ويقول انا رجل ومسؤل وكله لازم يسمع كلامي
حتي لو غلط

شمس النهار يقول...

*مصطفي ريان
ايوه انا معاك بس الجدعنه دي ساعات الناس بتعملها غلط لما يسند صديقه في حاجه غلط السنده هنا مش جدعنه في حين الجدعنه انه كان ينصحه ويقف في وشه بس بيخاف يتقال عليه مش رجل عشان ماوقفش جنب صديقه
والا ايه

شمس النهار يقول...

*ايدي
صح الاسم كده معلش عشان انا بكسل اكتب انجليزي
المهم
كلامك كله صح وموافقه عليه
وكمان الرجل مهما كان مابيقدرش يقوم بدور الست خالص لكن العكس ممكن
بدليل ان الرجل لما زوجته بتموت بيتزوج عشان يقدر يكمل الحياه مع اولاده لكن الست لا
وعشان ماحدش يطلع يقول لي لا
لكل قاعده شواز وفي رجاله بتقدر تقوم بالدورين بس مش كتير زي نسبة الستات اللي بتقدر تقوم بالدورين

شمس النهار يقول...

*صبرني يارب
ايوه الرجوله ادب
بس ايه حكايت هز الاكتاف دي ياصبرني
ده تاني تعليق يقول الكلام ده
مش دي بتاعت اللمبي

شمس النهار يقول...

*نهر الحب
ازيك انت
وانت كمان طيبه وبخير
انا موجوده انت اللي مختفيه وطلبتك كان تليفونك مغلق

شمس النهار يقول...

*عاشق وغلبانه
ازيك
ايوه فهماك ياجميل
وتحليلك عجبني
ومبسوطه بيه وبيكي وانك طلعتي من الحاله اللي كنتي فيها

شمس النهار يقول...

*عاشقة الرومانسيه
صح في رجاله كتير فاكره ان الرجوله صوت عالي وتحكمات اغلبها بتكون فارغه وعلي الفاضي

شمس النهار يقول...

*محمدغاليه
موافقه علي الكلام ده بس ايه هي المواقف
يعني مثلا في ولد يقول لما الاقي صاحبي بيتخانق ادخل في الخناقه واساعده ودي رجوله ولد تاني يقول لا مش دي الرجوله الرجوله اني ادخل افض الخناقه واساعد علي حل الخلاف بالعقل
هنا الرجوله اصبحت عقل يحرك الامور مش عضلات

شمس النهار يقول...

*كيمت
بس كده انت ماقلتيش الرجل يسمي رجل من وجهة نظر ازاي

شمس النهار يقول...

*ابو علي
يعني اللي ماعندوش رجلين فقدهم في الحرب او حادثه خلاص مابقاش رجل:)
ماشاء الله علي التحليل المقنع

شمس النهار يقول...

*حواء
ازيك عامله ايه دلوقتي والبيبي عامل ايه
ماتقعديش كتير علي الكمبيوتر
انت صح واصبتي كبد الحقيقه حلوه كبد الحقيقه دي:)
الانسان ابن بار للبيئه اللي خرج منها يعني الولد اللي شايف ابوه بيتصرف تصرفات الرجال الصحيحه مش المزيفه بيطلع زيه وكذلك للبنت
وده تفعيل لنظريات كتير زي اكفي القدره علي فمها
وقول لي من صديقك اقول لك من انت
ومن شابه اباه ماظلم الي اخره

شمس النهار يقول...

*فوكسلوجيا
كلامك صح اكيد
بس نفسي اعرف ليه الرجاله اللي من النوع ده بينقرضوا

موناليزا يقول...

الرجولة مواقف وافعال

شمس النهار يقول...

*موناليزا
اتفقنا بس هي ايه الافعال دي
ماهو ممكن راجل فاهم انه لما يتحكم في زوجته او اخته ويسمعوا كلامه في الفاضيه والمليانه دي رجوله
احنا عايزين نصل لتعريف لكلمة رجوله بكل صفاتها المحموده

ماما أمولة يقول...

الرجل يا شموسة

يطلق على الذكر والانثى

في حياتي رأيت نساء يتحملن المسئولية ويحافظن على بيوتهن وأولادهن بمئة رجل


الرجولة فعل وموقف

وليست كلام وبس

واخيرا يا شموسة تدويناتك رائعة

بحبك في الله

مـجـنـووون يقول...

الرجوله تحمل مسئولية وادب واخلاق

والي تلاقي فيه الصفات الي ربنا يرضي عنها مش مهم نوعه

أكيد هيكون راجل

تقبلي مروري
مجنووون

من غير عنـــوان يقول...

العزيزة شمس

أبويا رحمة الله عليه ( وسيبك من إنه أبويا ، إنما هو كان رجل نادر)

المهم قال في تعريف الرجوله.. تعريف قعدت سنين لغاية ما فهمته

موجز... قوي...

قال:

الراجل عشان يكون راجل... لازم يكون راجل....


بس خلاص


أظن أنه لا تعليق...


أمنياتي

شمس النهار يقول...

*ماما اموله
اهلا بيكي
الحقيقه كلام حضرتك مظبوط
بس انا هدفي من البوست تعريف الرجوله يعني نذكر الصفات اللي تخلينا نقول علي الشخص رجل
وايه المواقف دي
شكرا علي مجاملتك ليه

شمس النهار يقول...

*مجنون
صح فعلا دي من الصفات المحموده في الرجل بس ممكن كمان تكون من صفات ست او ولد صغير السن

شمس النهار يقول...

*من غير عنوان
(لراجل عشان يكون راجل... لازم يكون راجل)

انا مش معترضه بس ااحقيقه انا كمان عايزه افهم زي ماحضرتك فهمت وكمان الشباب اللي بيدخل يقرا
ناس كتير دخلت قالت الرجوله موقف وتصرفات
ايه هي المواقف وايه هي التصرفات
يعني ايه رجوله
بمعني اصح لو رجل عايز يفهم ابنه يعني ايه الرجوله يقول له ايه
فهمتني حضرتك
عشان انا حاسه ان في اتجاه ان الرجوله الصوت العالي والفتونه والفهلوه
والتحكم في الفاضيه والماليانه
والا ايه رأيك

أمبارح كان عمرى عشرين!!! يقول...

الرجولة موقف
مش تحديد نوع الراجولة بشوفة صفة
زيها زى الجدعنة الشجاعة اى شى
وفية سيدات كتير بــ150 راجل :d
شكلا ومضمونا:d:d

Son of Egypt يقول...

السلام عليكم

عزيزتى شمس النهار

الرجوله وصف لأى من يتحمل وينتج ويكون على قدر المسؤوليه ولكن الكثير من الناس يفسرون الرجوله على الذكور وفقط ولكن سبحانه وتعالى فى قرآنه دائما ما كان يصف الذكر عندما يقصد الصفه هذه على الذكور وذلك فى الأيات التشريعيه مثلا مثل الميراث واما الى ذلك
اما عندما يطلق اللفظ على الرجوله فتكون فى مواطن تحمل الشدائد مثل قوله تعالى من المؤمنين [رجال] صدقوا ما عاهدوا الله عليه
اي كانوا على قدر المسؤليه وليس فقط الذكور منهم وانما ممكن ان يكونوا نساء لأن العهد للذكر والأنثى كل سواء
وايضا يقول الله سبحانه وتعالى (( لمسجد أسس على التقوى من أول يوم أحق أن تقوم فيه ،فيه [رجال] يحبون أن يتطهرون ، والله يحب المتطهرين))

هل التطهر صفه من صفات الذكور وفقط
لا احب ان اطيل عليكى اكثر من ذلك ولكن هناك امثله كثيره ولكن اتمنى ان اكون قد استطعت توصيل ما اريد ان اقوله وفى الأخير تمنياتى لكى بالتوفيق والرجوله انتى وكل ام

nona يقول...

انا شايفة ان لقب راجل بتتقال على اى حد سواء كان ست او راجل لما بيقفوا وقفة كبيرة او يعملوا حاجة صعبة ولما يقفوا موقف قوة فى وقت ضعف
انما لقب ( ذكر) اكيد بتتقال على النوع بس اللى هما الرجالة

تحياتى

الربان يقول...

تحياتي

الحقيقة هناك خلط بين المفهومين...لكن الاصل ان كلمة راجل بتجمع بين المفهومين
و لتوضيح ذلك اقول :

الرجل هو "جنس " او "نوع "..مثل "امرأة" او " أنثي "

و "الرجولة" و "الرجولية" هما كلمتان عربية فصحي...وهنا يكون المعني اقرب الي صفات محدده مطلوب ان يتحلي بها الرجل...و قد تكون منسوبة الي الرجل لانه الاكثر حركة و مرونة من الانثي...و ان عليه تقع مهام الاسرة كلها...

من هنا ،وهذا تقديري ، فأن الرجل يعني بالاصل الاشارة الي جنس او نوع..
يتوسم المجتمع فيه ان يتحلي او يتصف بصفات و خصال نبيلة مثل الشهامة و التضحية و الصدق و الاخلاص....

اما إذا خرج اللفظ من هذا المفهوم فقد يكون المقصود به " الذكوره"....


تحياتي و تقديري

MR.PRESIDENT يقول...

الرجولة..دالة..علي..جنس..معين..وهو
الذكور..وكون..المرأة..أو..الأم..هي
التي..تحملت..المسؤلية..فهذا..ليس..موقف
رجولي..إنما..هو..موقف..بطولي..وكما
أن..هناك..أباء..تخلوا..عن..ابوتهم
بأي..طريقة..كانت..فإن..هناك..أمهات
تخلوا..عن..امومتهم..بطريقة..ما.

أخلاق..الشخص..هي..المحددة..لطبيعته
سواء..كان..ذكر..أم..أنثي..فاللهم
يسر..الأمر..للأمهات..والأباء

قوس قزح يقول...

و الله الرجولة دلوقتى بقت صفات جنس مش اكتر

يعنى شنب و دقن و صوت تخين

و نفس الشىء بالنسبة للانوثة

اما باقى الصفات فبقت صفات انسانية
ممكن تكون معدمة عند حد و زيادة عند حد تانى

الاخطر من ده
ان صفات الجنس كمان بقى فيها كلام :(

من غير عنـــوان يقول...

العزيزة شمس

بصي يا ستي

أولا بغض النظر عن تعريف الرجوله أو الذكوره أو الجنس أو ... أو...

كلمة رجل أو راجل دي بتتقال عن مجموع تصرفات الرجل تجاه المواقف...

نبتدي بتصرفه تجاه والدته... من وهو صغير.. وإزاي بيحترمها ويقدرها ويسمع كلامها وما يزعلهاش...

وبعدين تجاه والده وكيف يستطسع الوالد الإعتماد على ابنه والأبن يلبي نداء الأب..

بعد كده تجاه إخوته بنين وبنات وكيف يحتضنهم ويخاف على مصالحهم...

ويأتي دور تصرفاته تجاه أصحابه.. وهل هو أمين معاهم ولا لأ.. بيشلهم وقت الشده لما يحتاجوه ولا لأ..

وفي العموم يتحلى الرجل بالإيمان والصبر والحكمه والحكمه والحكمه ( تلات مرات)والعطف والقوة والأمانه.. وعدم الميل بالقلب إلى تحكيم مشاعره في سبيل نزوانه...

إذا أثبت هذا... يكون ده كله على بعضه راجل...

وساعتها لما يتزوج حيكون هو الحصن الأمين لزوجته...يخاف على عرضه... يحمي أسرته... يجري على لقمة عيشهم زي ما بيقولوا... يكون السند... عند الحاجه... يعطف... يحضن... يدلع... يتكلم...يعلم أن شرفه وسمعته من شرفها وسمعتها... لا يسمح بأن تلبس هي ما يليق... وأيضا هو ... لا يسمح بأن تقول هي ما لا يجوز وأيضا هو...
يشـــيــل... طبعا مش مراته.. قصدي يشيل الحمل

والراجل إن لم يعطف على الضعيف ... ما يكونش راجل.. إن لم يدلع ويقبّل الأطفال الصغار تنزع منه الرحمه...

والراجل الصح كلمته سيف... يقولها عن حق وإقتناع.. ودراسه وتفكير ولا يرجع فيها..ويتحمل تبعاتها...


لا الصوت العالي ... ولا فتح زراير القميص لغاية نص صدره.. ولا التدخين ... ولا إنه يتنطع في الشوارع... ولا إنه ينظر إلى عورات جيرانه مثلا...ولا التخنث... ولا نزع المرؤة.. ولا الهروب... ولا حنث الوعد...ولا العند.. إلخ

نرجع تاني ونقول أنه لازم يكون راجل...

فاكره كلمة فسر الماء بعد جهد بالماء..
أنا حاسس دلوقت إني عملت كده

هو برضه زي ما أبويا قال...

الراجل عشان يكون راجل ... لازم يكون راجل...

أي أن :
إن لم يستشعر حقيقة رجولته.. فلا داعي أن يمارسها... وليكن....كـــائن وفقط...


وأخيرا لا توجد ملائكه على الأرض..وإ،ما توجد نيات صالحة.. من أراد أن تكون نيته أن يكون رجل فليسعى.. ويأخذ طريقه.. وإن أخطأ مرغما .. فليس بذنبه...إنما لا يتعمد الخطأ...

طبعا كلام كتير من اللي قلته ينطبق أيضا على تلك المرأه الجميله التي لم تنس إنوثتها ومع ذلك تأخذ تصرفاتها شكل الجدعنه...


أخذت من وقتكم الكثير... وفي الواقع من وقتي أيضا...

ولكن الحوار معك ممتع... وتعرفين كيف تصلين بي لآن أكتب وأكتب...

أمنياتي

شمس النهار يقول...

*امبارح كان عمري عشرين
اهلا في اول زياره اسم المدونه جميل انا بقا حاسه علي طول ان عمري عشرين مش امبارح بس
مع اني يارب قربت اكون جده
فعلا الرجوله جدعنه بس في الصح وشجاعه بس في الخير

شمس النهار يقول...

*ابن مصر
تعليقك عجبني وعجبني الاشاره ان ربنا مابيفرقش مابين رجل وامراه في الثواب والعقاب
بشكرك علي التحليل

شمس النهار يقول...

*نونا
اهلا بيكي في اول زياره
كلامك صح بس المفروض الرجل رجل علي طول مش في موقف واحد بس

شمس النهار يقول...

*الربان
كلامك كله صح
بس الرجل لو لم يتحلي بكل الصفات اللي انت ذكرتها في تعليقك اعتقد انه مايستهلش يقال عليه رجل اصلا

شمس النهار يقول...

*مستر بريزيدند
الحقيقه كلامك صح الام اللي تجمع المؤليتين معا هي بطله بكل المقاييس
وزي مابقول ان الرجل اللي يتخلي عن فطرته بأن يكون رجل بكل ما تحوي الكلمه
بيختار بكده انه يعيش مش رجل
كمان الام اللي بتتخلي عن فطرتها كأم وهبها الله الحب والحنان دي برضه لها ان تعيش بأي صفه غير انها ست اصلا

شمس النهار يقول...

*قوس قزح
انت عارفه ليه الرجوله بقت كده والانوثه بقت كده
عشان التربيه بقت غلط في غلط
لابنربي البنت انها تطلع بنت والا الولد يطلع ولد
تصدقي ان في واحده اعرفها بتزعق لبنتها انها مابتصليش وابنها ساكتاله
ولما سألتها ليه قالت لي هو ولد هي بنت
وبعد مناقشه طويله معاها
حسيت ان الولد ده عمره ماهيكون راجل صح عشان بيتربي ان الرجوله انه يعمل اللي في نفسه

شمس النهار يقول...

*من غير عنوان
ايوه هو ده الكلام المظبوط
تنورت المحكمه كده
ولو ان
**
(أخذت من وقتكم الكثير... وفي الواقع من وقتي أيضا)
معلش بس الوقت ده هتاخد ثواب كل حد يقرا الكلام الصح ده ويحاول يعمل بيه ويستفيد منه يعني ماكنش وقت ضايع خالص
*
وادينا حطينا ام كلثوم كمان
في الحقيقه مالييش في فريد قوي عشان اغلب اغانيه حزينه الا القليل منها
لكن الموسيقي طبعا فريد كان موسيقي عبقري

من غير عنـــوان يقول...

لم أقصد أن الوقت ده يعنبر ضايع..

أنا بأتشرف هنا بيكم

بس لقيت نفسي بقالي كتير بأكتب...

أمنياتي

leeno يقول...

الرجولة ليست ذكر فحسب وارد جداااا ان تكون المرأة رجلا

في كتير ذكور و اناث بس فيه رجال من النوعين

الرجولة

شهامة... مروءة... كرامة ... بر .... و غيرها من صفات و مواقف

و كلها صفات انسانية و مش صفات ذكورية

david santos يقول...

Excellent work.
Happy Day!!!

شمس النهار يقول...

*من غير عنوان
الحقيقه الكلمه صدمتني بس مش اكتر
لكن خلاص مافيش حاجه

شمس النهار يقول...

*ليوو
صح عندك حق

حنين القلب يقول...

الرجوله موقف وثبات على الصح ومش شرط تتقال ع الرجاله لاننا ساعات بنقول البت دى راجل بمعنى انها جدعه

كل سنه وحضرتك طيبه
تقبلى مرورى

شمس النهار يقول...

david santos **
---------------
Thanks allot
If you can read Arabic
so you can comment in Arabic too
I am waiting for your comment

شمس النهار يقول...

*حنين القلب
اهلا بيكي في اول زياره
فعلا في بنات دلوقتي برغم كل السلبيات اللي حوالينا تعتبر بميت راجل

Beram ElMasry يقول...

السلام عليكم ورحمة الله وبركاته
اتمنى زيارتكم لمدونتى وابداء الراى فى الموضوع المطروح السلام ومن نسالم ، فلا تتاخروا ولا تبخلو ا بالمشاركة
لك تحياتى والسلام عليكم ، ولا سلام مع اليهود
بيرم المصرى

mahasen saber يقول...

وحشتينى يا شموسه اخبارك ايه

يا رب تكونى بالف خير

من غير عنـــوان يقول...

صباح الخيرات

حبيت بس أقول إن ما شاء الله تعليقات البوست كتير عندك..
وده دليل نجاح وشعبية قوية للشمس

أمنياتي

رئـيس التحـرير يقول...

السلام عليكم
الصراحة انا مش جاي النهاردة زيارة عادية أقرأ وأعلق لا أنا جي أدعوكي دعوة خاصة عشان تشاركي معانا في مجلة رؤية مصرية التي سيصدر عددها الأول يوم السبت الي هو بعد بكرة ده
من متابعتي لكي الفترة الي فاتت لقيت انك لازم تشاركي في المجلة ممكن تدخلي على المجلة وتشوفي الأقسام الي فيها هي متنوعة تختاري هتكتبي في ايه أو حتى لو عندك حاجة قريتيها عجبتك تنفع لأي قسم أو غرائب طرائف على زوقك بس تكون حاجة ذات قيمة وطبعا أنا متأكد من ذوقك وإلا مكنتش دعيتك للمجلة..أنا بفضل إنك تكتبي انتي بنفسك في أي موضوع ولو عندك حجات تفيد المجلة أنا موجود إقتراحات مشاركات رأي نقد حتى أكيد أنا موجود

معلش طولت مستني ردك

لينك المجلة
http://roayahmg.blogspot.com/
والميل بتاع المراسلة لو عندك مشاركة
ibrahemaladawy@gmail.com

مودتي

شمس النهار يقول...

*بيرم المصري
انا يشرفني دعوتك لي
وطبعا هروح واعلق
بس الموضوع ان انا مابحبش الكلام في السياسه
ده مش معناه اني معترضه علي اللي حضرتك كاتبه بالعكس انا بكره اليهود جدا ويمكن اكتر منك كمان بكتير بس حقيقي السياسه مش اتجاهي خالص
بعتبرها حرقة دم بس
وكمان مابفهمش فيها خالص

شمس النهار يقول...

*محاسن
ازيك انت
وانت كمان وحشتيني خالص
هكلمك علي الموبايل لعلك تردي باذن الله عليه

شمس النهار يقول...

*من غير عنوان
------------
:) صباح الخير

شمس النهار يقول...

*رئيس التحرير
اشكرك علي الثقه الكبيره في
ويشرفني الاشتراك معكم ان شاء الله
وهبعت لك ميل ان شاء الله

هــو..مش ..نـو يقول...

شمس النهار:ـ
سيدتي الحاجه أي صوره تقصدين؟
صوره القطه أم صوره الولد؟
الولد ده ...أبن مصر.
الولد دا ...راااااااججل!
والرجوله سيدتي لا تعني النوع أو الجنس وبنقول علي دول ذكر وأنثي أما الرجوله فهي معني و موقف و رأي ,
يمكن ان تكون هناك أمرأه بمليون (دكر)الرجل : موقف ورأي وعقل و مبدأ...و قال العلماء عن السيده عائشه رضي الله عنها ...رجله الرأي!
تقبلي تحيتي سيدتي...

فركشاوي ..ناوي يقول...

بسم الله الرحمن الرحيم
الحاجه شمس
السلام عليكم ورحمه الله وبركاته
شمس غايبه عننا ليه؟
من غيرها الدنيا ضلمه ...نوري بقي!!
انا شايف الأستاذ/هوهو مهوهو هوهوه حلوه خالص..
بطريقه رد الأشياء الي اصولها..الرجوله جاءت من ..(ر ج ل) وفي العربيه يقال علي القدم (رجل) والراجل هو الذي يقف علي قدمين او يسير عليهما ..
لعلي أضفت شيئا .
ارجو الا تحرمن رجله الرأي شمس النهار من إشراقه عندنا ...سلام الله عليكم.

أنا حر يقول...

كلمة راجل ليها معاني كتير قوي بس بتختلف من مكان للثاني
بس الحقيقة في مصر وعالمنا العربي بشكل عام معناها سخيف جدا كفاية اني اقلك ان الستات فعلا ارجل من ميت راجل
تحياتي

norahaty يقول...

انا اعتقد الرجولة
تصرف واخلاق ومبادىء
وحاجات كتير تحسيها
وتجديها فى انسان .

norahaty يقول...

انسان
مش مهم
رجل أو أمرأة
لكنه إنسان.

شمس النهار يقول...

هو...مش...نو
صورة القطه وهي ماشيه بكل فخر واعتزاز في وسط هذا العدد الكبير من الكلاب
ومش هممها حاجه ماليه مركزها بصراحه عجبتني
اما موضوع الرجوله انت بتتكلم صح

شمس النهار يقول...

*فركشاوي ..ناوي
الحقيقه موضوضوع الرجوله ده موضوع كبير جدا وخصوصا في الوقت الحاضر حيث اختلت الموازيين
وبالنسبه لحضوري انا دايما بزور مدونتك واعلق
وشكرا علي المجامله اللطيفه

شمس النهار يقول...

*انا حر
اوافقك ارأي
بس برضه موضوع ان الرجل يطلع رجل معني وكلمه ده راجع للطفوله فعلا وزي ماانت قلت ان في مجتمعنا العربي الرجوله معناها سخيف ومن ضمن معانيها الصوت العالي والتحكم الغبي والاستقواء علي المراه

شمس النهار يقول...

*نور هاتي
الحقيقه كل اللي قلتيه صح بس انا حاسه ان الرجوله بمعناها الحقيقي ابتدت تختفي

م/ الحسيني لزومي يقول...

شارك في الحملة من أجل إطلاق سراح
1-المدون دكتور / توكل مسعود
2- الناشط / ضياء الدين جاد

fashkool يقول...

الحاجه شمس
تحياتى

من وجهة نظرى
الراجل كلمه تدل على النوع واكثر منها على المعنى

ونماذج النساء التى رأيناها فى عيد الام ليس بالرجوله ... ولكنها بالمسئوليه
فالرجل انسان والمرأه انسان والانسان هو من يحمل الامان
انا عرضنا الامانة على السماوات والارض.. الايه
وحملها الانسان
فالمرأه انسان يحمل الامانه
والرجل انسان يحمل الامانه
والله لم يفرق بينهما فى حمل الامانه
فمن مات عائلها باعتبارها انسان تستطيع تحمل الامانه
وليس الرجل فقط من يحمل الامانه
الانســــــــــــــــان

تحياتى يا حاجه

شمس النهار يقول...

*فشكول
الحقيقه كلامك صح
والامهات دول زي مقال زميلنا ممستر بريزيدند ابطال عشان تصرفوا تصرف الرجال وهم غيرمؤهلين لذلك

مقتطفات من حياة فتاة يقول...

انا حبيت اقولك ادخل واقرا المسبقة تاني وانت تعرف هتكسب ولا لا

شمس النهار يقول...

*مقتطفات من حياة فتاة

حاضر هروح تاني اشوف ايه الموضوع

مقتطفات من حياة فتاة يقول...

يوم الاربع في مناسبة عزيزة عليا ايه هيا

اصحى يا مصر : اسلام ديو يقول...

الرجولة .. من وجهة نظرى
بعيداً عن التحمل والمسئولية
الرجولة فكر واخلاق
طريقة جميلة للحوار وتبادل الاراء
يقتنع بالصحيح لأنه صحيح والخطأ لانه خطاً .

تحياتى

تامر علي يقول...

في اللغة الرجل هو كل من كان راجلاً (يعني ماشي على رجليه) وتشمل الذكر والانثى فعلاً .
لكن الناس تعارفت على أن الرجل هو الذكر وده غلط فعلاً ... وبناء عليه فعلاً كل الستات (رجاله بجد) :)

شمس النهار يقول...

*اصحي يامصر.اسلام دايو
صح الرجوله فكر واخلاق عندك حق