الأربعاء، 27 مارس 2013

مصطفي سيف يرد :)

 اتشرف بنشر تعليق مصطفي القناوي 
-----------------
نيجي بقى للتعليق بتاعي
بصراحة اول ما قريت التدوينة قلت لنفسي ياااه هو انا مفضوح اوي كده؟ رغم ان انا كنت فاهم نفسي فتك و مخبي الحفر اللي جوايا كويس
حضرتك بتقولي جواك جوهرة و انا بانحت منها قطع صغيرة في كتاباتي بس انا حاسس ان اللي جوايا ضلمة او ضوء اسود و باكتب كل شوية منه
يمكن غيري يقدر يتحاشاه
سعيد ان الكتاب محسسكيش بالملل و ان الرموز عجبتك
(شاي مر) فعلا لخصت حيوات ناس كتير بتشوف احلامها بتموت يوميا بعينيها و مضطرة تتعايش و تتكيف مع الواقع
(الساعة الآن صفر) لحظة صفاء مع النفس قد تكون مميتة في بعض الأحيان فسياط النفس أقوى من سوط الجلاد
(القطار) آسف إنها ابكتك انا عارف ليه دموعك نزلت علشان الولد مرضيش ينزل من القطر زينا

(كوب شاي) مبحبش اصلا كلمة (كل) لأن كل القواعد فيها استثناءات و الجواز (كوب شاي) دي قاعدة أكيد ليها استثناءات

(نافذة لها قضبان ) دي أنا فعلا و هي من الحاجات اللي في الكتاب اللي بتمثل ذاتي دايما كاشفاني :)

(ألسنا رجالا ) تعرفي انتي اول حد تعلق معاه القصة دي مع اني منشرتش الكتاب غير علشانها للأسف دايما بننسى على رأي عمنا نجيب آفة حارتنا النسيان جملة (اذهبوا للسندباد انه يقف وحيدا عند البحر ) علشانها نشرت الكتاب الفكرة ان واحد ضحى بكل اللي حواليه من اصدقاء حقيقيين علشان مجده الخاص هيقف وحيد حتى لو العالم كله جاله يحتفل معاه هيفضل برضه وحيد

(خسوف القمر ) اصلا مبقاش في حب يا شمس دلوقت بقى في انك تحاول تحسس نفسك انك بتحب علشان تعيش الجو ده لكن الإغراق في الحب و الرومانسية بتاعت زمان انتهت زمان كان بيبقى الحبيبين روحين في زكيبة :) يعني بيبقى في شفافية و روحانية حتى لو بعاد عن بعض و بينهم بلاد بيبقوا عارفين كل واحد بيعمل ايه او بيكلم مين او بيفكر في ايه ، الاتنين شخص واحد

في النهاية آسف إني أطربتك اكتئابا
بس ضوء اسود يعني هتنتظري ايه منه

اشكرك يا شموسة و تدوينتك دي شهادة و وسام و سعيد ان المجموعة عجبتك

الثلاثاء، 26 مارس 2013

مصطفي القناوي والضوء الاسود :)

جينا بقا لمصطفي القناوي
صوت الصعيد 
الصورة للأهداء الجميل ذو الكلمات الرشيقة
اللي كتبه لي دكتور مصطفي علي الكتاب
نيجي بقا لمصطفي نفسه 
قبل مانقرا عمل ايه في الضوء الاسود
مصطفي شخصيه جميله ضحوك بشوش دمه خفيف جدااا 
احسبه متفائل
ولكن
هو شاااااااااااااااطر في اخفاء مابداخله
بس علي مين بيظهر في الكتابه يا دكتور
شخصيه واعيه عارف بيعمل ايه 
ولكن
خايف ان حد يعرف اللي جواك عامله زي مايكون جوهره ثمينه ممنوع ان حد يشوفها او يعرف عنها
والجوهرة دي انت هتنحت لنا منها قطع صغيرة جداااااا
في كتاباتك
الحزن سيد الموقف رغم انك زي ماقلت ضحوك
كتاباتك كلها رموز وانت بارع في الرمز
وعادتا كتر الرموز بيجيب ملل في القراءة بس انت شاطر ماحسستنيش بملل
خاليت كل واحد ياخد اللي عايزه او فاهمه او عاجبه :)

(شاي مر)
 لخصت فيها حياة ناس كتير ببساطه تحسد عليها

(الساعه الان صفر )
وقت التصالح مع النفس اقترن بوقت الحساب حسيته تحذير رائع

(القطار )
عجبتني جداااااااوابكتني في اخر سطرين (عجبك كده)

(كوب شاي)
مش كل المتجوزين كده :)

نافذة لها قضبان= مصطفي سيف

(السنا رجالا )
حستها الان

(خسوف القمر)
رائعه هنستبدل القمر بموتوسيكل دليفري علشان الحب الان بقا تيك اواي

في اخر الرحلة الجميله في بساتين افكارك وعناقيد كلماتك 
عايزة اقولك من نجاح لنجاح
واطربتني اكتئااااباااا
:))
 

الاثنين، 25 مارس 2013

محمد الجيزاوي يرد :)

 اتشرف بنشر تعليق نور الدين علي حواري معه:)
الأم الغالية شمس النهار:
بداية ارسل لك أنفاس شكر وتحايا تليق روحك الصافية .
نعم سأجيبك .. سأقول .. سأنضح لك ببعض الوجع كما قالت الكريمة ليلى الصباحى .

دعينى ابدأ بأحمد أخو البطل عاصم ولماذا بالغت فى مأساته التى انتهت بقتل نفسه فى نهر الألم نيلنا الذى يمد أنفاس الأمل مصبوغة بالوجع

إن أهم شخوص الرواية أربع هم عاصم البطل وسارة الحبيبة له ومحمد اليمانى صديق البطل ثم أحمد أخوه
عاصم وسارة هم يمثلان حيرة الألم وشخصية المصرى الذى يعشق الوطن ومستعداً للتضحية حد الرمق الأخير لكنها شخصية شفافة يسهل جرحها وتترك الندبات بصماتها بوضوح على روحها فكانت الخاتمة طبيعية أن تنتهى بشكل هلامى بين بين تماماً كشخصياتهما .. قصتهما التى انتهت بانسحاب سارة وهجرة عاصم من وطنه الذى اختصرت قصته معه بالجملة الختامية فى الرواية :
(هل أنا من اسأت لك يامصر أم أنت من أسأت لى ، فنحن لانرحل عن أوطاننا إلا بعد أن ترحل هى عنا أولاً )

أما محمد اليمانى صديق البطل : فهو بسمة الأمل فى الرواية والبطل الحقيقى الذى لازال يؤمن بالقضية ومهما استعر الطغاة وتجهم القدر فقد ظل متمسكاً بالأمل فى صناعة وطنه .

وأخيراً أحمد : هو نموذج المصرى الذى تم قهره وكسر عمق روحه رغم صفاءه ورقته وطيبة قلبه فكانت النتيجة إنهزامه وإنسحاقه تحت مطارق الطغيان ومقصلة الواقع الفاسد .. إنه المصرى الذى فقد إيمانه بالثورة نتيجة للفوضى والتخبط والفقر والقلق ، إنه ذاك الشخص الذى تتعاطف معه لكن لاتوافق أبداً على نهجه .. إنه ظهرنا العارى يا أماه !

أما عن الموقف الحميمى فهو مشروع بالنسبة لى وفى فلسفتى واقع لايجب أن نزعم أنه غير موجود لاسيماأنى قدمته بشكل (ساخن) كما تفضلتِ بوصفه لكن أتحدى أن يجد أحد لفظ مخجل أو كلمة بذيئة فى هذا المشهد هو فقط نوع من الإمتاع الوصفى وتخير الألفاظ التى تشبع روح العشق .

أما عن الفلسفة فهى دربى وقد تعمدت أن (ينهج) القاريء معى وهو يدور فى فلك واقعنا العربى المتأزم حملته على جناح السطور ليبصر الرقعة من نقطة عالية حتى تبدو خارطة الدماء والوجع ظاهرة بجلاء
فقد أردت أن أضع وعين المتلقى فى المرآة ليبصر سؤة الواقع الدميم وبشاعة حالنا الأليم ..
وماذا أكون قد صنعت لو لم أحرك عقل القاريء ؟!
أنا صوت صارخ فى الرية أنادى فى كل صوب أن أعيدوا بعث الإنسان فى داخلكم وتذكروا ذاك الألم الذى يحيي ضمائرنا التى تشوهت وأرواحنا التى تجمدت وعقولنا التى تبلدت .
...
شمس العزيزة لقد سعدت ايما سعادة بتناولك الغالى لروايتى المتواضعة وكم أحس بالفخر والشرف أن نالت إعجابك
فأنت دوماً لكِ عندى مكان ومكانة
لك كل التحية والمودة والإحترام .

السبت، 23 مارس 2013

الجيزاوي والوطن

الصورة دي فيها الاهداء الجميل اللي كتبه لي ابني نور الدين علي الكتاب 
ماعرفتش اعدلها اكتر من كده 
:))
اناهنا مش هنقد لأني لااملك ادوات النقد
ولكن هتكلم عن تفاعلي كامتلقي 
عااااادي 
اولا انا مؤمنه بحرية الابداع 
وكمان مؤمنه ان المتلقي عليه ان يختار  
الروايه رائعه ومااقدرتش اسيبها الاوقد اجهزت عليها واجهزت علي
:)
الروايه محركه للعقل مشاغبه
يعني ماتقراش وتقفل الروايه وخلاص
لأ من الكتابات اللي تفضل 
تزززززن 
في راسك
وتخليك تفكر في حسابات كتير
كان عندي تساؤلات كتير جدا 
لكن لما سمعت حلقة (حبة ثقافة)الجيزاوي مع الشازلي
اتجاوب علي كتير من تساؤلاتي
بس عايزة برضوا اتكلم عن مشهد تعذيب زوجة احمد وابنه رغم انك اتكلمت عنه وقلت علشان نحس بالبشاعه
صدقني اناماكملتش قراية الجزء ده ماقدرتش
كان كفايه سطرين:))
عجبتني اللوحة اللي كانت بين عاصم والوطن في البار
ايوة اناحسيتها لوحة تعبيريه
قضيه ان الاسير اليهودي بيحل مشاكل مئات الاسري العرب
رغم ان دي حقيقه نعلمها ونعيها جيدا الا اني لما قريتها في الروايه وجعتني 
حستها صفعه قويه علي كبرياء العرب
الطريقه البسيطه العفويه اللي كتبتها بيها خالتني يمكن احس ان بقا من البديهي اننا نحس اننا عادي بقينا ارخص
مالقيتش تفسير ليه انت خاليت احمد ينتحر؟؟
موضوع الحريه في التعبير والمشاهد الساخنه
اعتقد ان الكاتب حر يكتب اللي هو عايزه
وعلي القارئ ان يختار 
ولكن رغم اني مؤمنه بده بس للحريه برضوا حدود :))
المشهد الساخن مش عارفه ليه حسيته كله سياسه :)
الروايه في مجملها رائعه 
مزجت بين السياسه والحياة والحب وبديهيات الحياة 
مزج رائع دون ملل ولا خطب عصماء
جرتنا وراك من هنا لهنا حتي غزة 
ماحرمتناش من حاجه
ربنا يكرمك ومن نجاح لنجاح 
وياريت ترد علي التدوينه في تعليق
واعرف اني هنشر التعليق ده كاتدوينه رد علي التدوينه دي:)
ايوة اللي اوله شرط اخره (نور )
وفي النهاية باقة ورد لكاتبنا الرائع
نور الدين

الخميس، 21 مارس 2013

همسة حب وعتاب

المفروض النهارده 
انشر اول تدوينه عن ابناء بلوجر الرائعين
بس عايزة اهمس في اذن كل زوجة ابن همسه صغيرة
كده علي الصبح
وانا مستنيه دوري عند الدكتور
 كان في بنوته جميله 
عماله ترغي في الموبايل مع صحبتها وكله سامع
ولاقيتها بتقول لصحبتها 
اييييييه هديه وكمان اروح 
دي كبرها كل سنه وانتي طيبه علي الموبايل 
ومن تخت الدرس كمان 
مش هديه عيد الام 
عيد الام للأمهات مش القراشانات 
وضحكت ضحكه مستفذه
كل اللي قاعدين اترسمت علي وشوشهم
تعبيرات مختلفه كلها تعني الاندهاش والقرف
لاقيت ست كبيره جنبي بصتلها بحده
وقالت لها مسيرك يامراة الابن تبقي حما
حسيت برتياح شديد علي وجوه الناس من كلام الست الكبيره اللي نزل زي الشاكوش علي دماغ البنوته اللي بصتلها بقرف واخدت بعضها ومشيت راحت فين الله اعلم

وعايزة اقول لبناتنا المتزوجات
عمرك ماهتعاملي حد كويس وهيعاملك وحش 
اعتبريها امك ومش عايزة اسمع انا ليه ام واحده بس
لأ
لمابتتزوجي بقا ليكي اتنين
وعايزة اقولك 
ان دي اللي انجبت الشاب اللي بقا زوجك
 ودي امه هو شخصيا لما هيشوفك بتكرمي امه هيكرمك
واعرفي انه لو جه معاكي ضد امه يبقا مالوش خير فيكي
علشان اللي مالوش خير في امه مالوش خير في حد
وهيقلب عليكي في يوم من الايام
واعرفي ان انتي قابله للتغير:))
  لكن الام مابينفعش نجيب واحده تانيه غيرها  
وكمان دي جدة اولادك ماتقطعيش اولادك بينكم
ويبتدوا يميلوا لحد علي حساب حد
الحب والحنيه والود بيصنعوا المعجزات
وفعلا مسيرك يتعمل معاكي اللي هتعمليه مع حماتك
وكل سنه وكل الامهات بخير وصحة وسعادة
وربنا يبارك في عمرهم

الثلاثاء، 19 مارس 2013

ابناء بلوجر الرائعين :)

كتير من 
زمااااااااان
كان نفسي الكاتب يطلع لي بره 
اكلمه
:)
لما كنت اقرا لنجيب او احسان وخصوصا عبد الحليم عبدالله
كان نفسي اكلمهم اناقشهم
كان بيبقا في حاجات مش عجباني اوحساها ناقصه او اوفر وخصوصا الكاتب عبد الحليم عبد الله 
كان الله يرحمه خميرة عكننه علي ابطاله 
:)
وليه لأ مش الناس دي بتكتب لينا 
ولا ايييييييييه ؟؟
واخيرا امنيتي اتحققت اهو
ومن هنا وجاي كام تدوينه كده علي حساب
كتابنا الرائعين اللي هيطلعوا لي بره
:)
انا مش ناقده ولا اديبه علشان انقد ماكتبوا
من الناحيه الحرفيه 
لكن انا هتكلم من واقع اني قارئه وهقول انا تفاعلت ازاي مع الكلمات والافكار
مش همه بيكتبوا للناس اهو اسمعوا راي الناس بقا
 :)
طبعا بهني ابناء بلوجر 
ابنائي شيرين ومصطقي والجيزاوي
عل كتبهم الرائعه
شرفتونا وشرفتم بلوجر بنجاحكم
وهكتب تلات تدوينات علي التلات كتاب
ربنا يبارك فيكم وفي موهبتكم
ومن نجاح لنجاح

الاثنين، 18 مارس 2013

المافيا كلاكيت تاني مره:)+تحديث

واضح ان التدوينه دي هيبقا التعليقات فيها اجمل من التدوينه نفسها:)
المدونةاسماء فتحي 
كتبت تعليق 
راااااائع
----------------------------------
ياجمااااااااعة اقرواتعليق ابراهيم رزق علي التدوينه اجدع من التدوينه نفسها
انا فطست من الضحك مش هرد عليه لحد ماتقروها
 -----------------------------------------
كتبت مره تدوينه عن المافيا
:)
واوووووم ايه 
وانا بأرد علي التعليقات
هووووووب 
المدونه طارت
مافيش مدونه
واتصلت بالمنقذ ازهري
وبعون الله 
قدر يرجعها تاني
المافيا زعلوا 
ولا ايييييييييييه
:)
المهم
يجعل كلامنا خفيف عليهم
عايزة اكرر تاني
حته مهمه من التدوينه
بهمس بيها في ودن الجماعه
الموضوع بيبتدي
 خييييييييييير
ويقلب شر
الله يرضي عليكم خالوا بالكم
خالوا بالكم
الكرسي وحش
السلطان وحش
والفلوس وحشه
والقوة غروره
والدنيا غروره
دي الحته اللي عايزة انشرها تاني من التدوينه القديمه
مع بعض الاضافات لزوم الواقع الان
--------------------
مين بقا المافيا دول
دول جماعات جميلة لطيفة 
(محظوره)
(منظمه جداااا فيما بينهم)
اتكونت في جزيرة صقلية
في القرن الثالث عشر
علشان اييييييييييييه
مقاومة الغزو الفرنسي
(واخدين بالكم خير اهو )
:)))
وبعد ماخلصوا عليهم تحولوا الي عصابات اسرية منتهي النظام والدقة
(وماحدش بيتجوز من بره لا ولد ولابنت)
وعلي فكرة مافيش حكومة علي الارض الا وتعاملت معاهم
وحتي حكومات امريكا تعاونت معاهم
صحيح غدرت بيهم بعد كده
بس همه بقا ماسكتوش جننوهم
وكمان اصلا اسر المافيا 
مسيطره علي مناطق كتير في امريكا
من اهمها نيويورك وشيكاغو ولاس فيجس 
واي حته فيها قمار
اللي عايز يقرا العجب عن المافيا ودورها علي مستوي العالم
يدخل اللينك ده  
بعد البحث والتنقيب
لاقيت ده ابسط بحث وملخص الحدوته كلها
-----
امضاء دونة شمس
:))

الأحد، 17 مارس 2013

مصر الجديدة :(

فااااااجأأأأأأأأأأتننننننننن
ماحدش يقول لي فاجأتا
لأفااااااااجأتنننننننننن
والنون عايزاها تزن كده زي النحلة
المهم
في شارع الصديق بمصر الجديدة
من 10 ايام كده
ناس من الحي وانا معديه لاقيتعم حتتك بتتك
عمااااالين يقطعوا في الاشجار
ليييييييييييه كده ياولاد الحلال
ده احنا منهين نقطع شجره
والشارع ده بالذات 
الناس اللي كانت بتبقا مستنيه المترو بيقعدوا تحت الشجر
قلت يمكن هيوسعوا الشارع نفسه 
قلت ماعلينا
امبارح معديه لاقيتهم شالوا الجنينه اصلا وبيعملوا في المساحه دي صبة رصيف
لييييييييه كده؟؟
 الزرع ده اللي بيدينا اكسجين وملصمنا من التلوث
بجد حزنت جداااااااااا
قلت يمكن علشان مترو الانفاق تحت
طيب ومترو الانفاق ماله
طيب ماتعزل وتعمل برضوا زرع
مش عارفه حاسه ان اغلب المصرين ضد الزرع وضد الجمال
وخصوصا اللي بيشتغلوا في الاحياء
ياخساره علي اجمل شارع فيكي يامصر
الصوره اللي فوق دي لقصر البارون اللي عمل مصر الجديده 
لو يعرف اللي حصل النهارده
هيموت عشر مرات

الجمعة، 15 مارس 2013

نقطه ومن اول سطر


بمااني خلاص قربت انشر التدوينه
ال
500
احب اعمل فيها حكيمه زمانها
:) 
عايزين نحط نقطه
 (نفصل بيها كل اللي فات )
ونكتب من اول السطر

في حب مصر:
ياريت وزير الزراعه يمنع زرع الكوسه في مصر
في حب مصر:
ننسي كلمت انا وتبقا كلنا يعني نلغي كلمة انانيه وادينا اتعلمنا ان القوة في الجماعه
في حب مصر:
كل انسان يبقا نفسه مايحاولش يغش ويتقمص دور مش بتاعه علشان بكده بيحترم نفسه
في حب مصر:
نلغي كلمة وانا مالي اللي يشوف حد بيغلط يوجهه باللتي هي احسن مش بالخناق
في حب مصر:
نحافظ علي حق الغير علشان نحافظ علي حقنا
في حب مصر:
نتعلم معني الحريه اللي مانتعداش بيها علي حرية الاخريين
في حب مصر:
نتعلم معني العمل الجماعي ومش كل واحد يعمل فيها ريس
في حب مصر:
مانخافش من كلمة الصدق
في حب مصر:
نمشي في الشارع بمايرضي الله علشان احناماعندناش ازمة مرور احنا عندنا ازمة اخلاق من اللي سايق ومن اللي ماشي وبيعدي علي رجليه 
ان شاء الله صباحكم زي الفل
:)

الاثنين، 11 مارس 2013

اجدع بنت في بر مصر

سميره ابراهيم اجدع بنت في مصر بل في العالم
وعايزة اشكر ابوها اللي رباها كده
وكمان ماخافش من الفضيحه
ورفعوا قضيه مش علي اي حد
علي الجيش نفسه
وفضحوا الانتهاكات اللي اتعملت 
وكانوا السبب في ان مايتعملش كده تاني
حتي وان كان مااخدتش حقها
بس علي الاقل فضحتهم وخلتهم مايعملوش كده تاني
هنا بتضرب مثل اجمل
قالت للغوله عينك حمرا وحوله
رفضت تعتذر انها بتكره الصهيونيه
قوم اييييييييييه 
سحبوا منها الجائزة
مش زي ناس 
من بعد ماكانوا بيشتموا في امريكا والصهيونيه
صالحوهم وكمان بعتوا لهم باكينام علي انها نائب رئيس الوزراء:)
قال يعني احنا بنكرم المراه اهو
ونائب مش هنقعدها في البيت ونقبها
:))
ماعلينا 
شوفوا الفديو ده وشوفوا قد ايه البنت دي
مصريه صعيديه صوح

الأحد، 10 مارس 2013

الناس :)

ماتحاولش تعامل الناس من منطلقهم همه
عاملهم من منطلقك انت
مش كل الناس زيك
مش كل الناس عندها قدراتك
او حتي تستغرب من انهم بيعملوا حاجه انت مش قادر تعملها
كل انسان غير التاني
وماتستغربش من اي تصرف اي حد بيعملوا انت ماتعملوش
ربنا خلق الكون علي الاختلاف
وماتستناش حاجه من حد
علشان لو ماعملهاش ماتزعلش
ولماتعمل اي حاجه لحد اعملها لوجه الله
علشان تاخد ثوابها
وماتحاولش انك تستني انه يردها لك
ياريت مايردهاش علشان تكون اخدت الثواب كامل
وماتحاولش تتباها بالخير اللي بتعمله 
علشان كده هيبقا مش لوجه الله وهتخسر ثوابه
ماتستناش للناس علي الوحده 
((طنش تعيش وتاكل قراقيش :)
دقق تموت ومايكفنوك:))
دي كانت مقدمة برنامج زمان في اذاعة الشرق الاوسط
اللي كانت ايامها شبابيه
اهو كلمتين رخمين من ماما شمس علي الصبح

الجمعة، 8 مارس 2013

الحنفية الايديل الاستاندر :)

ايه بقا موضوع الحنفيه ده
اشتريت حنفية من ايديل استاندر
ليييييييييه
؟؟؟؟
مش فنجره يعني
ده علشان انا مركبه ايديل استاندر من 31سنه 
والشهادة لله زي الفل للنهارده
اومال ايه بقا اللي حصل
المهم
العمال رحلوا اخيرا من الشقه
رحت مركبه الصحي والنواكل
اي مركبه طقم الحمام والحنفيات الي اخره
وانا بأفرش الشقه اللي اصلا لسه ماحدش سكنها
لاحظت ان لون مقابض حنفية الحوض متغير 
قلت في غلطننننن مااااااا
هاتولي الشركة علي الالو
الو ياخدمة عملاء
الو ياأفاندم
الحقوني
وبصراحه لحقوني
الشركه دي مشهود لها بالصيانه والمتابعه
المهم ادوني موعد وحضر الباشا الفني في الموعد 
اخر شوووووياكه الصراحة
وبادج علي القميص وحركات جامده
وبص للحنفيه بصه فاحصه ماحصه
وقالك دي مواد كيماويه!!!!
ازاي يعني 
زي ايه حضرتك
قالك كلور. ايريل. بيرسيل
ان دششششششششش
نعم ياابو الكباتن ازاي يعني
عايز تفهمني ان شوية كلور ولا مسحوق يعملوا كده
قالي ايوة ياافندم
اومال انا شاريه ليه ايديل استندر 
ان شاء الله
قال احنا كاتبين في الضمان كده 
شوية صابون سائل مخفف فقط
لزوم النضافه
ياصلاة النبي
ليه ياابني هو انا هركب الحنفيه في الدولاب
يعني الحنفيه الصيني اللي مركبينه في اسكندريه
 وهرينها كلور وغيره وزي الفل
احسن منكم
طيب ونفس الايديل استندر اللي عندي من31 
ومبهدلينه معانا مساحيق 
ماكنش فاضل له غير مية النار  
ولسه لحد النهارده زي الفل
قالك هو كده
قلت له شكراااااااااا
المناقشه بينا غير مجديه
واناآسفه اني اشتريت ايديل استندر 
ومااشتريتش الصيني اللي بيقبل انه يتنضف باي مسحوق
مش طقمكم اللي عايز يتنضف بصابون كاميه
وواحسرتاه علي اللي ادفع في ايديل استندر 
اللي لونه غير من قبل مااستعمله 
علشان واحنا بنضف جرحنا مشاعر الحنفيه 
وغسلناها بكلور  ومسحوق 
ونسينا ندهنا باللوشن لزوم ترطيب البشره

الأربعاء، 6 مارس 2013

ااااازيكم :)

اااازيكم
وحشتوني ووحشني بلوجر كله
يارب تكونوا بخير وسعاده 
واستعدوا معايا للتدوينات القاااادمه
:)
حصريااااااا