الجمعة، 8 مارس، 2013

الحنفية الايديل الاستاندر :)

ايه بقا موضوع الحنفيه ده
اشتريت حنفية من ايديل استاندر
ليييييييييه
؟؟؟؟
مش فنجره يعني
ده علشان انا مركبه ايديل استاندر من 31سنه 
والشهادة لله زي الفل للنهارده
اومال ايه بقا اللي حصل
المهم
العمال رحلوا اخيرا من الشقه
رحت مركبه الصحي والنواكل
اي مركبه طقم الحمام والحنفيات الي اخره
وانا بأفرش الشقه اللي اصلا لسه ماحدش سكنها
لاحظت ان لون مقابض حنفية الحوض متغير 
قلت في غلطننننن مااااااا
هاتولي الشركة علي الالو
الو ياخدمة عملاء
الو ياأفاندم
الحقوني
وبصراحه لحقوني
الشركه دي مشهود لها بالصيانه والمتابعه
المهم ادوني موعد وحضر الباشا الفني في الموعد 
اخر شوووووياكه الصراحة
وبادج علي القميص وحركات جامده
وبص للحنفيه بصه فاحصه ماحصه
وقالك دي مواد كيماويه!!!!
ازاي يعني 
زي ايه حضرتك
قالك كلور. ايريل. بيرسيل
ان دششششششششش
نعم ياابو الكباتن ازاي يعني
عايز تفهمني ان شوية كلور ولا مسحوق يعملوا كده
قالي ايوة ياافندم
اومال انا شاريه ليه ايديل استندر 
ان شاء الله
قال احنا كاتبين في الضمان كده 
شوية صابون سائل مخفف فقط
لزوم النضافه
ياصلاة النبي
ليه ياابني هو انا هركب الحنفيه في الدولاب
يعني الحنفيه الصيني اللي مركبينه في اسكندريه
 وهرينها كلور وغيره وزي الفل
احسن منكم
طيب ونفس الايديل استندر اللي عندي من31 
ومبهدلينه معانا مساحيق 
ماكنش فاضل له غير مية النار  
ولسه لحد النهارده زي الفل
قالك هو كده
قلت له شكراااااااااا
المناقشه بينا غير مجديه
واناآسفه اني اشتريت ايديل استندر 
ومااشتريتش الصيني اللي بيقبل انه يتنضف باي مسحوق
مش طقمكم اللي عايز يتنضف بصابون كاميه
وواحسرتاه علي اللي ادفع في ايديل استندر 
اللي لونه غير من قبل مااستعمله 
علشان واحنا بنضف جرحنا مشاعر الحنفيه 
وغسلناها بكلور  ومسحوق 
ونسينا ندهنا باللوشن لزوم ترطيب البشره

هناك 22 تعليقًا:

ابراهيم رزق يقول...

شمس الشموس

هقولك على السر

ايديال ستاندر حاليا بتصنع فى مصر
اللى كانت عندك دى مستوردة

عليكى و على جاكوب لسه بيجى من فرنسا او خليكى فى الصينى و غيريه كل سنتين هتلاقيه ارخص

مبروك على العموم

تحياتى

سواح في ملك اللــــــــــــــــــه- يقول...

هههههههه ياشموسة

العصر اللي احنا فيه كل حاجة فيه بقت

مضروبة

وبعدين اول مرة اشوف حنفية بكتالوج

حنفية ايه دي ياشموسة ههههههههه

سواح في ملك اللــــــــــــــــــه- يقول...

معلش ياشموسة

ده جزات اللي يشتري حنفية وليها كتالوج

مالها حنفيات سوق الجمعة يعني

هههههه

Bent Men ElZman Da !! يقول...

طيب أنا عندى ايديال استاندر وبغسله بكل حاجه أصلا وعادى كويس
المفروض أعمل حسابى بعد كده وإلا أيه بقى :|

خدمة العملاء فى أى حاجه أصلاً بقوا مش فاهمين أى حاجة فى الخدمة اللى بيقدموها نهائي

asmaa fathy يقول...

ههههههههههههههه

ايه الحنفيات اللي عايزة اللي يحسس عليها دي

داحنا مش بنطبطب علي وشنا كده هنطبطب علي الحنفية

فعلا انتى كنتى قاسية اووووي معاها ياشموسه

خليكي حُنينه ورقيقة شوية معاها دى برضه زي بنتك

معلش تعيشي وتاخدى غيرها وربنا يعوض عليكي

تحيـــــــاتي
كانت هنا ورحلت
Asmaa Fathy

مصطفى سيف الدين يقول...

كله بقى صيني
مفيش حاجة اصلي
حتى البني آدمين صيني
كله مغشوش و مضروب

zeze يقول...

يا اختي يا حبيبتي يعني هيا جت
علي الحنفية اللي مش هتتغير وتتغش
والله الواحد مبقاش عارف يثق في اليه بالظبط وربنا يعوض عليكي
بارك الله فيكي

Aya Mohamed يقول...

طيب ينفع كدا تزعلى الحنفية هههههههه
وهى فعلا اى ماركة معروفة زمان غير دلوقتى
كل حاجة بتتغير مش الحنفيات بس

faroukfahmy58 يقول...

شموستنا الغالية
انتى تحمدى ربنا وش وضهر ان الحنفية اتغير لونها بس ما تغيرش شكلها وبقت ام حنفى

شمس النهار يقول...

*ابراهيم رزق

:)

ماعنديش مشكله انه يتصنع في مصر خااااالص
بس يعملوه بسعر رخيص بقا مش يبقاغالي وكمان مضروب

حفية ايه دي ياخويا اللي هجيب لها كوافير يحميها :))

شمس النهار يقول...

*سواح في ملك اللــــــــــــــــــه

:))
كل حاجه لها كتالوج

حتي احناليناكتالوج
بس بيبقا في كاتلوج مطبوع
وفي بالفطره
:)))

الحنفيه دي بقا ادوني لها كتالوج بس غلطتي اني ماقريتوش
لوكنت قريته ماكنتش اشتريتها
:))

شمس النهار يقول...

* Bent Men ElZman Da !!

لأ خالي بالك بقا :)))
لحسن دي طلعت حنفيه رقيقه خالص

يادوب ام محمد اديتها دش كلور علي مسحوق هنجت في ايدها:))))

شمس النهار يقول...

* asmaa fathy

:))
ضحتيني يااسماء
:))

عارفه الصيني كده بقا احسن

والحنفيه دي كده عايزة الصالون مش الحمام ولاالمطبخ
:))

شمس النهار يقول...

*مصطفي سيف الدين

لألألأ
الصيني مش مغشوش ياقناوي
الصيني صيني
قالك ده صيني مضروب وده صيني غالي
وانت وشطارتك

وانت عين اللي تقدر وجيبك اللي يشتري
:))))

Mahmoud Bahgat يقول...

لا متنسيش شامبو لا دموع بعد اليوم
ألف مبروك الحنفية و الطقم

Foxology يقول...

عادي جداً يا شمس البلوجز ... الأمثلة كثيرة ولماركات شهيرة آخرها بدون ذكر اسماء (كريازي) اللي مجرد سلك كهربا مقطوع بالغسالة الأوتوماتيك رعاية حرمنا المصون كانوا عاوزين ينقلوها بالكامل لمقر الصيانة مقابل 1000 جنيه مصري.

تحياتي

شمس النهار يقول...

* Mahmoud Bahgat

:)))

الله يبارك فيك :)

شمس النهار يقول...

* Foxology

عااااادي

انا جاني بيه فني خلع الحنفيه واخدها علشا يتم الكشف عليه حيث انها في الضمان
ورجعها بعد اسبوع
والتقرير انها مش عيب تصنيه عيب استخدام
:))

شمس النهار يقول...

* zeze

:)))
لأ ماجتش علي الحنفيه
بس دي مش اي حنفيه ماكنت اشتريت اي حنفيه وخلاص:))

شمس النهار يقول...

* Aya Mohamed

ازعل :))
ده انا اتغظت من بجاحتهم

ابراهيم بيقول انها بتتصنع دلوقتي في مصر
طيب ماترخصوها بقا

شمس النهار يقول...

* faroukfahmy58

:)) ماتضمنش يااستاذنا ايه اللي يحصل بعد كده
اذاكان لسه مااستعملنهاش ولونها غير يبقا لمانستعملها هيحصل ايه :))

Mafrousa يقول...

تصدقى و تآمنى بالله انا اتفرست
ده ايديال استاندر ضمانها مدى الحياة
انا لو منك اتر بس و اعمل هيصة و اكلمهم ابهدلهم
بس تقولى ايه بقا الفساد طال ايديبال استاندر و حالها اتدهور