الثلاثاء، 30 يوليو 2013

اعرف من هو البرادعي

دي لينكات عن البرادعي عالميا
وعلاقته باللاتاته امريكا
ياريت نقرا ونفهم
ومانمشيش ورا كلام حد
ومانديش دماغنا لحد يفهمنا اللي هو عايزه واللي فيه مصلحته
البرادعي كان حلو لكل الاطراف 
لحد ما اتكلم عن التغير والديكتاتوريه
بقا وحش وعميل وخاين بالنسبه لنظام مبارك 
وشوه ياجدع علي قد ماربنا يقدرك
والاخوان حبوه وساندوه 
معلوم ماهو ده اللي هيوصلهم للحكم
ولما الثورة قامت والاخوان هوووووب لهطوا كل حاجة
بقا البرادعي 
عميل وخاين وهو السبب حتي في حريق حبل الغسيل اللي اتحرق في العمارة اللي جنبنا
اقروا بقا كده علي رواقة 
----
---
----
------
-----
-----
دول كده لحد مااجيب لكم الباقي



الأحد، 28 يوليو 2013

الاخوان + تحديث هااااااااااام

تحديث : اديني عرفتك والحمد لله ماطلعتش من اصحابي المدونين كنت اتصدمت صدمة عمري 
وكمان لاغيتلك غير معرف راجل بقا ادخل وقول انت مين
عايز تشتم اشتم بس باسمك الحقيقي
=======
البهوات بتوع الاخوان 
اللي بيشتموا من وراء غير معرف 
علشان ماعندهمش الشجاعة يقولوا همه مين 
علشان اخدوا علي حياة الخفافيش في الظلام
احب اهديهم الصورة السلمية دي

بقا ده تظاهر سلمي
بقا لو المنظر ده في اي بلد في العالم
كانوا سابوه
ده لو فرنسا ولا المنيا كانوا اتسحلوا 
ولا حد في العالم كان قدر يفتح بقه
عايزين تقتلوا وتخربوا في البلد والدولة تطبطب عليكم
ابلغ رد علي حجمكم الان
هو الملاين اللي خرجت في شوارع مصر 
تقول لكم حلوا عننا بقا
ياجيش ياشرطة خلصونا
لو كان اللي بتعملوه ده لوجه الله 
وربنا كان الكل مشي وراكم
لكن انتم قلة مغميه عينيها بتدافعوا عن سلطان وكرسي 
ياريت تعقلوا وتلموا نفسكم 
هو الاسلام بيقول اقتلوا النفس التي حرم الله الا بالحق
ولو رجاله اوي كده 
ماتسيبوا النساء والاطفال يروحوا 
متحامين فيهم ليه
خايفين 
مش الايمان بيقوي القلب 
بتتحاموا في النساء ليه
مش كان الست تلزم بيتها ومالهاش دعوا بالمظاهرات
دلوقتي علشان المصلحة بقا لازم الست تنزل
عييييييييييييييييييييييييييب 
عليكم وعلي دقونكم
اللي علي حق وعايز يواجه يواجه من غير مايتحمي في النساء
ده حتي مش من الجدعنه ده لما بتحصل خناقة في الشارع وبيكون في حريم المصري مابيحبش يتخانق ومعاه حريم
هقول ايه كفاية ان قياداتكم بتدخل وتخرج من رابعة بلبس الحريم
واللي يقولك بتوع التحرير ماحدش عمل معاهم كده ليه 
ايه ده 
انت بتقارن اللي انت بتعمله ببتوع التحرير
اللي قعدوا علي قد ماقعدوا كان الميدان نظيف
 و 
ماجوش جنب مدخل عمارة ولا قربوا من السكان 
انتوا لو كنتوا في التحرير كان زمانكم مستولين علي مجمع التحرير والجامعة الامريكية 
:) 
ده السكان كانوا بينزلوا يدوهم اكل 
انتوا بقا ماشاء الله عندكم تمويل وعاملين مطابخ 
ومستولين علي مدرسة وعملنها زريبة للبهايم اللي بتدبحوها علشان تأكلوا الناس الغلابة اللي مقعدنهم غصب عنهم
وبتدوهم فلوس وعلي الله حد يقول لي ماحصلش بتاعة الجرجير هناك بتاكل وتشرب وبتاخد فلوس ولما ينفض الاعتصام 
والناس دي تخرج هنسمع العجب العجاب
والفلوس اللي بتتصرف
ومين اللي بيصرف علي ده كله الله اعلم 
ان شاء الله 
حق كل واحد قتلتوه او كنتوا السبب في موته 
هيطلع من قيادتكم وهتفرج عليكم يوم القيامة 
وانتوا شايلين اوزاركم واوزارهم
وكفايه كده روعتوا الناس في رابعة وبهدلتوا الشوارع
واحنا في شهر كريم
المفروض نتفرغ فيه للعبادة
ان شاء الله مرسي مش راجع
انسوااااااااااا
ده خيال علمي انه يرجع
كل شوية تدونا معاد ومايرجعش
ايه حتي مش عارفين تدونا معاد صح ولا ايه
وامريكا اللي بتستقوا بيها خلاص قالت لكم باي
ده اللي انتوا عاملينه ده كان عندهم كان زمانكم كلكم بقياداتكم  بسلطاتكم مشرفين في التلاجة
و الاول قلتوا هتسحقونا في 30 يونيو 
والزمر القاتل هددنا
وبعد كده لما مرسي انكرش من الرياسة
اديتونا اكتر من معاد اخرهم امبارح
صفوت حجازي بتاع الفنانين وقضية احمد الفيشاوي
قالك مرسي هيبقا بينا السبت العصر واحنا اهو الاحد العصر
لعل التأخير خير 
انا ماكنتش عايزة اتكلم في المواضيع دي
لأنها مواضيع موجعه ان ده بيحصل في مصر ام الدنيا
ولأن مرسي كاشخص اقل بكتير 
ان شباب من الاخوان او من غير الاخوان 
يموتوا علشانه
وماحدش يقول لي الشرعية
علشان هقوله ده كلام اهبل لا مؤخزة
لا جيش طايقه ولا طايقكم ولا اعلام ولا شرطة 
ولا قضاء 
والاهم
الاغلبية العظمي من الشعب مش عايزاكم
فاضل ايه ومين
هيرجع يحكم مين ان شاء الله
افيقوا يرحمكم الله قبل فوات الاوان
====
ملحوظة : لغير معرف اللي عامل نفسه بتاع ربنا وعارف دينه كويس
مااسمهاش العزة بالاسم :)
اسمها العزة بالاثم
وشكرا علي الحسنات اللي اديتهاني بالشتيمة بتاعتك لي
:)
والحمد لله قلت كل اللي في نفسي من غير مااشتم حد
المسلم من سلم المسلمون من لسانه ويده
قلت حقائق :)
ولو كنت فظا غليظ القلب لأنفضوا من حولك

الخميس، 25 يوليو 2013

حزب النور اللي ضد النور

ان شاء الله 
لما حزب النور قعد لنا زي العضمه في الزور 
وقعد ينقي في الوزرا ورئيس الوزرا 
زي ما بينقوا رز التموين
وده لأ وده اه
ولما خلاص حشر نفسه
 وتمت مهمته اللي متفق عليها مع باقي المتأسلمين
خلااااااااص
ادانا ضهره  وراح في حضن حبايبه
وماحضرش المصالحه
ان شاء الله بقا
هو مع الضلمه ولا الارهاب
معلش احنا بنسأل بس
ياريت بقا تعرفوا ان الناس دي كلها في خندق واحد 
وضدنا كلناااااااااااااا
ولا تهمهم مصر ولا شعب مصر 
المهم همه وخطتهم
علي الله بقا 
يتحشروا في حاجة تانيييييييييي
كده بنتوا علي حقيقتكم 
صح
اصل طبعا 
لو اشتركتوا في المصالحة 
هتخسروا بتوع رابعه 
اللي ليكم فيها ناس
 وناس كتييييييييير كمان
بقا هو ده الاسلام 
يامتأسلمين
ياخسارة الرجاله
لا عهد لكم
ومش بس النور واي حد مااشتركش في المصالحه
واحب اقول لكم ذنبكم علي جنبكم
نازل لكم اهل اي شهيد قتلتوه 
حسبي الله ونعم الوكيل
( ان الله غالب علي امره )

الأحد، 21 يوليو 2013

حقوق الانسان

حقوق الانسان 
اللي الغرب فاهم انها اختراعهم 
دول تدوينات 
عملتهم ارد بيهم علي الكلام ده
هو الغرب عرف حقوق الانسان 
الا بعد ما فنوا بعض في الحرب العالمية الاولي والتانيه 
اللي كانت مجزرة عالمية


الجمعة، 19 يوليو 2013

سجود السهو في الصلاة

 لسجود السهو في الصلاة
الموضوع ده مهم وكتير مش بياخدوا بالهم منه
ربنا ينفعنا جميعا به

الأربعاء، 17 يوليو 2013

انقلاب لأ ماانقلابشي

هو في ايه ؟
انا ساكت ومش عايزة اتكلم 
وبقول اللهم اني صائمه
وبرضوا مافيش فايدة
الشعب قام علي فصيل كان عايز يحكم البلد لوحده 
ويرجعها للخلف كده قيمة تلات اربع قرون
وياريته عرف يحكم حاجة
المهم
وبماان الشعب المصري 
حدق ومدقق ويفهمها وهي طايرة 
عرفهم وفقسهم بدري بدري
وخرج لهم خرجة سمعت الاطرش في العالم كله
انا فعلا في ناس خرجت كنت اظنها لا تخرج
 :)
المهم
الشعب خرج وقال للسي سي انت فين 
؟؟؟؟؟؟
هات الجيش وحصلني انت كمان 
البلد هضيع ياوديع
الراجل ماكدبش خبر 
اداهم انذار واتنين ماعملوش حاجه 
وعملوا من تنزنيا
و ودن من طين و ودن من عجين
قال لهم خلاص ذنبكم علي جنبكم
وايد الشعب ولم الليلة 
وصلح الغلط اللي عمله المشير طنطاوي 
ولم شوية منهم  
ونضف البيت ورش بيروسول 
وسلم المفتاح لرئيس مدني مؤقت 
وقالك عيشوا حياتكم بقا صح
فين بقا هنا الانقلاب يامتعلم يابتوع السياسة العالميه
امريكا 
طز فيكي ده مش انقلاب
الانقلاب يعني الجيش ينقلب علي الرئيس 
ويحكم البلاد تماااااااما 
زي ماعمل عبد الناصر
لكن الثورة وده مش من عندي ده من ايام الثورة الفرنسيه الشعب يخرج علشان يعكش الحاكم واللي حواليه
والجيش يؤيد ده
تركيا 
اردوغان خاليك في حالك الله لا يسيئك 
واركن علي جنب وخاليك في نفسك
ولو مزنوق في مرسي خده رئيس عندك
اما حكام الدول العربية اللي مش عاجبهم
شربوا من المحيط علشان البحر مش هيكفي
وبقول حكام ليه
علشان الشعوب العربيه فرحانه لمصر
يادول العالم 
المصرين خرجوا ومش هيرجعوا ايدهم فاضية خلاص
ومليون مره قلت هنا
 ان الشعب المصري مش هيضحك عليه
افهموها بقا
ياساتر
رمضان كريم

الأربعاء، 10 يوليو 2013

صلاة التراويح وكل سنة وانتم بخير

كل سنة وكلنا طيبين
وبخير وصحة وسعادة
وربنا يكرمنا ونفوز برمضان هذا العام 
ان شاء الله كلنا
وان شاء الله الغمة تنزاح تماما
وترجع مصر بهية
عايزة اتكلم هنا عن صلاة التراويح والاكل والعزومات
اولا صلاةالتراويح 
ياريت الستات اللي بتروح تصلي التراويح 
ومعاها اطفال تصلي في بيتها احسن 
علشان هي بتفقد الناس التانية روحانيات الصلاة 
وده مش من الدين ان تفسد صلاة غيرك
عندها حل من اتنين 
ياتقعد تصلي في بيتها ولها اجر رعاية اولادها طبعا 
واجر صلاة التراويح في بيتها 
حيث ان افضل صلاة للمراة في مخدعها
يااما تطلب من الجامع اللي هتصلي فيه
 انهم يفتحوا الحضانة التابعة للجامع 
لستقبال اولاد المصليات الساعتين بتوع الصلاة 
في نظير اجر
اما بالنسبة للأكل 
ياريت 
ابوس ايدك ياست يامصرية لاتسرفي في الطبيخ
اعملي علي القد يتاكل في ساعتها 
وباي باي 
وخصوصا في العزايم ياريت مانعملش مليون صنف 
ويقعدوا في التلاجة واهل البيت يزهقوا 
والاخر يترموا في الزبالة
وكل سنة وانتم طيبين وبخير وصحة وسعادة
رمضان كريييييييييييم

الثلاثاء، 9 يوليو 2013

جيش مصررررررررر

هي بقت كده خلاص عيني عينك
ياصهاينة ويااسلامنجية ماريونت
جيش العراق وراح في الباي باي 
مابقاش فيه 
حتي لو حبينا نلمه هناخد دهر
وجيش سوريا كمان راح في الباي باي
 وقدامه سنيييييييييين علي مايخلص اللي هو فيه
عايزين تعملوا ايه بقا في جيش مصر ياحلوين
ياللي عايزين تروحوا علي القدس بالملاين 
ان شاء الله هتروحوا بمين
ده انتوا ان شاء الله هتروحوا في داهية
مما سبق نستنتج 
ان لو اسرائيل حب تعمل اي حنكشة في المنطقة
مافيش جيش في العراق ولا سوريا وهمه اصلا متمركزين في دول الخليج
ومابقاش في غير جيش مصر
 نهدوا هو كمان ونستفرد بالمنطقة
هو ده اللي انتوا عايزينه 
؟؟!!!
بس ربنا مش هينولها لكم
احترسوا ياشعب مصر اقفوا جنب الجيش
وياجيش مصر العظيم
اي حد يقرب من اي منطقة عسكريه يضرب بالنار 
مش هو ده القانون العالمي ولا ايه
واحترس ياشعب مصر من السلفين
حزب النور هو ده اللي امريكا عايزاه بدل الاخوان
وهتشوفوا
هقول ايه؟
ان الله غالب علي امره

الاثنين، 8 يوليو 2013

ارفض

ارفض 
ان يقتل اي فرد من افراد الشعب المصري 
علي يد جيش او شرطة
ولكن
هل يترك الارهابي ؟
ليقتل هو افراد الشعب المصري
ربنا جعل الثواب والقعاب 
من اجرم يحاسب ويتم القبض عليه
الامور الان تحتاج الي الحكمة والعقل في قوة
وعندما تتخبط الكلمات 
ولا نعرف من الصادق ومن الكاذب 
نحكم العقل فيما نسمع
وعلي راي المثل  
ان كان اللي بيتكلم مجنون يبقا المستمع عاقل
طيب
لما يتقال ان الجيش 
بيفض اعتصام الحرس الجمهوري بالقوة 
وبيقتل في الناس
ونلاقي صفوت حجازي الارهابي
طلع علينا يقول 
انهم هيستشهدوا وهمه بيطلعوا مرسي 
من جو الحرس الجمهوري 
وهيصعدوا الموقف اكتر من كده 
يبقا مين هاجم مين ؟
ولما يقول قبل كده من اسبوع 
هنخرج مرسي من الحرس الجمهوري 
زي ماخرجناه من السجن 
يبقا الكلام ايه والاتجاه علي فين
ونقول ان الله غالب علي امره 
وربنا يسترها علي مصر
وان شاء الله مصر بخير وعلي خير

الأحد، 7 يوليو 2013

:) من ايام الفراعنة انا

كده فعلا 
بقا عندي احساس اني من ايام الفراعنة
:)
حضرت اربع رؤساء منتخبين والخامس جاي في السكة
واتنين رؤساء مؤقتين
:))

المتخبين
 جمال -السادات-حسني-مورسيكا

المؤقتين
دكتور صوفي ابو طالب رئيس مجلس الشعب بعد استشهاد السادات
والمستشار عدلي منصور
شوفتوا بقا انا من ايام الفراعنة ازاي

تدوينات لم تنشر هنا

دي لينكات تدوينات 
لم تنشر هنا 
احب ان اضعها في مدونتي لأحتفظ بها 
في البوم ذكرياتي





الجمعة، 5 يوليو 2013

امريكا :) يااما اتخضيت :)

امريكا امريكا ...:)
 ايه اخبار القفا ؟؟
علم ولا ماعلمش ؟؟
ادينا وريناكي الوش التاني اهو 
قال لا قال !!
وهو ده شعب ينفع يتقال له لأ ..
وبعدين انقلاب انقلاب انتي ايش حشرك 
انقلبنا واحنا حرين فيه 
انقلبنا هنغسله ونكويه 
وايه الانقلاب اللطيف الظريف ده 
طوفاااااااااااان 
من البشر طالعين يتمشوا يعملوا انقلاب 
ده ايه الجبروت ده صحيح 
فراعنة صحيح ياولاد 
:)

مبروك لمصر

نقول مبروك لمصر
كده الثورة رجعت لمسارها الطبيعي
ونقطة ومن اول السطر
بس عايزين نقول ياهادي ونتصرف صح
وحزينة من اللهجة الانتقاميه اللي ماليه الدنيا وهي دي اللي خالتني لحد دلوقتي مانشرتش تدوينة
براقب اللي بيحصل ومش عاجبني العداء السائد
مش عايزة الفرحة تنسيني اللي بيحصل من عنف 
ربنا يستر ويسلم
عارفة ان هناخد وقت علي ماترجع الامور لطبيعتها واحنا جربنا الاعمال الارهابيه 
ندعي ان ربنا يسترها معانا ونزيف الدم والانتقام ينتهي
وترجع مصر كلها نسيج واحد

الثلاثاء، 2 يوليو 2013

امريكا والجزمة

انتوا عارفين اني مش بحب التجاوز في الحوار 
بس بجد امريكا كده افورتها معانا اوي
فا مالقتش غير الجزمة ابعتهالهم
ياادارة ياامريكيه ياللي انتي صهيونيه اصلا
لمواااااااا
نفسكم احسن لكم
ومالكوش دعوة بينا
احنا شعب بنقرر مصيرنا مع بعضينا انتوا بتحشروا نفسكم ليييييييييييه
والماعونة دي بتاعة اتفاق كامب ديفيد 
مش عايزنها انتوا هتزلونا بيها 
لو ماعملتوش هنقطعها ياعم اقطعها يقطعوا كلكم
والحيزبون الشمطاء الست السفيرة ياريت تلمي نفسك
لا تكلي علقة اخت العلقة اللي اخدتها شجرة الدر 
بالقبقاااااب
واحب اقولك انتي شخص كريه وغير مرغوب فيكي اصلا
هنا في مصر
ومصر حرة مش هيحكمها عرة
اجري اجتمعي بقا بالجماعة 
واخبطوا انتوا الاتنين دماغكم في انشف حيط
والتعليقات مفتوحة علشان تاخدوا راحتكم علي الامريكان