هو في ايه ؟
انا ساكت ومش عايزة اتكلم
وبقول اللهم اني صائمه
وبرضوا مافيش فايدة
الشعب قام علي فصيل كان عايز يحكم البلد لوحده
ويرجعها للخلف كده قيمة تلات اربع قرون
وياريته عرف يحكم حاجة
المهم
وبماان الشعب المصري
حدق ومدقق ويفهمها وهي طايرة
عرفهم وفقسهم بدري بدري
وخرج لهم خرجة سمعت الاطرش في العالم كله
انا فعلا في ناس خرجت كنت اظنها لا تخرج
:)
المهم
الشعب خرج وقال للسي سي انت فين
؟؟؟؟؟؟
هات الجيش وحصلني انت كمان
البلد هضيع ياوديع
الراجل ماكدبش خبر
اداهم انذار واتنين ماعملوش حاجه
وعملوا من تنزنيا
و ودن من طين و ودن من عجين
قال لهم خلاص ذنبكم علي جنبكم
وايد الشعب ولم الليلة
وصلح الغلط اللي عمله المشير طنطاوي
ولم شوية منهم
ونضف البيت ورش بيروسول
وسلم المفتاح لرئيس مدني مؤقت
وقالك عيشوا حياتكم بقا صح
فين بقا هنا الانقلاب يامتعلم يابتوع السياسة العالميه
امريكا
طز فيكي ده مش انقلاب
الانقلاب يعني الجيش ينقلب علي الرئيس
ويحكم البلاد تماااااااما
زي ماعمل عبد الناصر
لكن الثورة وده مش من عندي ده من ايام الثورة الفرنسيه الشعب يخرج علشان يعكش الحاكم واللي حواليه
والجيش يؤيد ده
تركيا
اردوغان خاليك في حالك الله لا يسيئك
واركن علي جنب وخاليك في نفسك
ولو مزنوق في مرسي خده رئيس عندك
اما حكام الدول العربية اللي مش عاجبهم
شربوا من المحيط علشان البحر مش هيكفي
وبقول حكام ليه
علشان الشعوب العربيه فرحانه لمصر
يادول العالم
المصرين خرجوا ومش هيرجعوا ايدهم فاضية خلاص
ومليون مره قلت هنا
ان الشعب المصري مش هيضحك عليه
افهموها بقا
ياساتر
رمضان كريم
هناك تعليقان (2):
شمس الشموس
على رايك
اللى مزنوق فى مرسى ياخده
ده اقوى من النسر
و اجود من ميشلان
تحياتى
اولا ازيك كتير وكل سنه وانتي طيبه وبخير ورمضان كريم
انا بقالي يجي سنه مفتحتش المدونة بتاعتي خالص والله كنتم واحشني جدا
بمناسبة بقي الموضوع لانه معقد شوية عشان مش الشعب كله كان راضي باللي حصل وفيه حاجات كتير لا يعلمها الا الله
لكن انا اللي مزعلني جدا اننا سقطنا في اول سنه ديموقراطية
إرسال تعليق