الخميس، 21 فبراير 2013

ابن ادم

ابن آدم

*******

قال: إيه مراد ابن آدم؟
قلت له: طقه
قال: إيه يكفي منامه؟
قلت له: شقّه
قال: إيه يعجّل بموته؟
قلت له: زقه
قال: حـد فيها مخلّد؟
قلت له: لأه
قال لي: ما دام ابن آدم بالصفات دي
نويت أحفظ صفات ابن آدم كل ما اترقى.
**********
كل مااشوف الناس حواليه
اتغيروا وبيجروا ورا الدنيا
افتكر الابيات دي
الله يرحمك ياعمنا بيرم

الثلاثاء، 19 فبراير 2013

رغي رغي واشاعات !!

البلد اتحولت لبوتقة اشاعات
تعبان هري واشاعات
والناس تتخانق مع بعض
*ياسر علي بيتجوز عرفي
ماحصلش
دي الست فضحاه في كل حته
ماحصلش 
*زوجة الرئيس راحت طابا ب360 الف
لأ كدب
والفاتوره المنشوره
مزورة
ده كلام الناس مع بعض
وماحدش طلع رسمي كدب
*ابن الريس اتعين ب39 الف جنيه في الشهر
كدب دول 900 بس
ده كلام الناس مع بعض
طيب فين الحقيقه 
وماحدش طلع كدب
الي اخر الاشاعات .....
يعني هي الرياسه قاعده بقا للقيل والقال
ايوووووة
لما يكون في هذا الكم من الاحتقان
لما نكون عايشين في هذه الفوضي
يبقا لازم الرياسه تكدب
مستكبرين ليه
شوفوا الراجل ده بيقول ايه
دخلنا في الشرشحه لبعض 
واسفه علي الكلمة دي
بس مالقيتش في قاموسنا المصري اخف منها
وقعوا مع بعض
حد خد حته من التورته اكبر
قالك لأ
ده حد اخد التورته كلها
فين الدين بقا في اللي بيحصل 
شوفوا الفديو ده واسمعوه بأمعان

الاثنين، 18 فبراير 2013

رجيم يابلوجر

التدوينه دي عايزة  انشرها بقالي شهر
لحد ماقريت تدوينه عند ذو النون المصري 
عن علاقة الطبيعه بالشريعه
قلت بس مابدهاش انشري بقا
وده تعليقي هناك
(( الشريعه تخدم الفطره وتهذبها 
وتضع لها الكتالوج للأستخدام
يعني الفطره والطبيعه بتقول ايه لما تجوع
تعالي نشوف الكتالوج
تعمل عمل شرف
يأتي بمال حلال
تشتري به طعام حلال
وعندماتأكل هذا الطعام لاتسرف
تلت لطعامك تلت لشرابك تلت لنفسك
الي اخره
))
******
كل ماحد يقابلني يقولي انتي رفيعه كده ازاي
ايه مابتكليش
اقولهم لأ باكل طبعا وباكل كل حاجه كمان
وبحب الشوكلاته والبطاطس المحمره :)
وبمووووت في الجيلاتي :)
طيب انتي كده ازاي
اقول ده الرجيم الرباني
يعني ايييييه !!؟
الرسول الكريم قال ايه:
(( ما ملأ آدمي وعاء شرا من بطن ، بحسب ابن آدم أكلات يقمن صلبه ، فإن كان لا محالة : فثلث لطعامه ، وثلث لشرابه وثلث لنفسه ))
رواه الترمذي ..

يعني مانقعدش ناكل ناكل ...
لحد مانبقا مش عارفين نشرب ميه فين 
ومش عارفين نتنفس 
وندور علي مهضم وفوار :) 
هو ده الرجيم الجميل الرباني  

الأحد، 17 فبراير 2013

الطيور الراحله تعود

http://2lbmasry.blogspot.com/2013/02/blog-post.html
ده لينك تدوينه في مدونة 
مدون كاااااان مهاجر
هو المدون
فاكرين المذيع المحاور اللي ادار الندوة
زي ماوعدني رجع وكتب تدوينه رااااائعه
:)
وبقوله حمد الله علي السلامة بلوجر نور
 

الاثنين، 11 فبراير 2013

الندوة 3

الندوة حميت اوي
وكان السؤال اللي لعلع كده
هل الكاتب بيسيطر علي شخصيات روايته
ولاشخصيات الروايه  اللي بتسيطر علي الكاتب
بس وعينكم ماتشوف الا النور
:))
شيرين قالت ومصطفي قال وابراهيم والكلام احلو
الكاتبة مني طه 
قالت ان ممكن الكاتب يكتب شخصيه عكس شخصيته 
بس 
هيخليها تعمل اللي هو مش عارف يعمله ...
الي اخر الكلام
طيب اسكت انا بقا
لألألألأ طبعا
قلت لهم العمل الفني دايما بيحمل روح صاحبه مهما كان
يعني لو هرسم وانا زعلانه الصوره هترجم ده
ولو فرحانه هترجم ده
كذلك الكاتب والشاعر
انا اعتقد ان اللوحه قصة قصيره فعلا
انتوا بقا ايه قولكم في الكلام ده احب اعرف رايكم
:))
المهم الندوة كانت جميلة جدااااااااااا
وفي ختام الندوة حصل حاجه جميله جدااااااااااا
 لاقيت ابنائي المدونين اللي انا فرحانه بيهم جداااااااااااا
بيهدوني كتبهم وكمان كتبوا لي عليها اهداء
كل اهداء منهم بعتبره وسام علي صدري
وحروفه هي الالماظ واللولي اللي مزين الوسام
بجد اتلبخت جداااا 
ومابقتش عارفه اقول ايه ولا اعمل ايه :)
بس كنت فرحانه جداااااااااا بده
بس علي مين ده انا شريره
الاربع كتب دول
 ايوه اربعه اصل مصطفي اهداني كتابين 
وشيرين كتاب ونور الدين كتاب
الاربع كتب دول 
انا هذاكرهم 
وان شاء الله كل مااخلص كتاب اجي هنا وانقد بقا
:))
في النهاية الندوة عدت علي خير
وكل واحد فينا رجع ومعاه ذكريات جميله
ماتنسوش تقولوا رايكم في موضوع شخصات الروايه دي 

الأحد، 10 فبراير 2013

الندوة بقا:)2

نتكلم بقا عن الندوة الرائعه
الندوة كانت في راديو ارابيسك في وسط البلد
ادار الندوة شاب من شباب المدونين 
اسمه فاروق 
ماشاء الله عليه ينفع مذيع وبجداااااره
ادار الحوار بحرفيه وذوق وشياكه
والناقدة والكاتبه
 مني طه اتكلمت كلام جميل جدااااااا
عن الادب وعن بلوجر 
وطبعا انا انشكحت جداااااا
علشان هي اتكلمت عن بلوجر صح الصح
انسانه هاديه رقيقه كلامها مترتب جداااااا
وعارفه بتقول ايه
 بكلمات بسيطه مش معقده زي اغلب النقاد
وحسيتها بتضيف في نقدها للكاتب 
الفراشة شيرين 
كالعادة اتكلمت زي مابتكتب بقوة رقيقه وصدق صادم
بس هي اتكلمت صح وماخافتش تقول رأيها خالص
وطبعا قالت شعر جميل قوي رقيق زيها
وان شاء الله شيرين هتبقا من اقوي الكاتبات الشابات
مصطفي سيف كان صعيدي صريح زي الكتاب مابيقول
عارف بيكتب ايه وعارف بيقول ايه
وقال رأيه بصراحع عجبتني وخصوصا لما اتكلم عن دور النشر
اللي بقت تطبع كتب زي افلام المقاولات زمان
يعني هو انا قاعدة ماما شمس كده اونطه
لألألألألأ
اتكلمت برضوا 
اه وربنا 
اتكلمت ودافعت عن امثالي من قاطني بلوجر 
اللي مالهمش في الكتابه
طيب هو علشان انا مابعرفش اكتب ادب ماجيش هنا
ولا عشان اكتر من نص البوست فيه غلطات املائيه 
مااجيش وارغي معاكم
هو يعني علشان انا مبوظه اللغه العربيه ابقا وحشه :))
وكمان طبعا مانسيتش انم في كلامي 
عن الناس اللي لماطبعت كتب هجرت بلوجر
:))
كمان طبعا نميت وذميت في تويتر والفيس 
اللي اخدوا مننا الناس الجميله والصحبه الحلوة
لحد كده جميل خالص
اذ نحن قاعدين يجي نور الدين :)
بعد السلامات قعد نور الدين وابتدي يتكلم عن شيرين الاول وصمت الجميع وعلي رؤسهم الطير
نور الدين قال كلام جميل جداااااااااااااااااا
عن الادب النسائي
قلت بس نور هيولع الدنيا ده بينم علي الادب النسائي :)
بس صراحه كلام صح
ومافيش لحظات وشكر في شيرين 
ونقد ماتكتب بحرفيه انااحسده عليها 
طبعا ده غير اني حسداه علي لغته السليمه واسلوبه في الكلام المرتب الرائع
وبعدين اتكلم عن مصطفي سيف 
واتكلم عنه كلام رائع
كنت اتمني ان الاديبه مني طه كانت تقعد واسمع حوار بينها وبين نور الدين
نسيت اقولكم ان طول ماالكلام ده شغال 
ازهري وساليناز شغالين في اكل الشوكلاته اللي كانت جيباها ريم سعيد المدونة الجميلة اللي هجرت بلوجر هي كمان
:))

السبت، 9 فبراير 2013

الهوي جلاب ؟؟مااعرفش انا !!

الجلاب
:)
ايوة الجلاب اللي في الصورة ده
الايد دي ايد ازهري
:) 
واللي مااعرفش هو ده بتاع اغنية الهوي جلاب جلاب الهوي
بتاعة عبد العزيز ولا لأ ؟:))
نحكي من الاول 
بس الموضوع كبير و هانحكي علي كام يوم
عرفت ان في ندوة في ارابيسك يوم الخميس
مع مصطفي سيف القناوي
وشيرين سامي القاهريه
قلت مابدهاش بقا 
طلعنا من كتب كتاب اخويا 
ابراهيم وازهري 
وانا طبعا
قابلنا مصطفي وعلي الندوة عدل
لاقيت مصطفي القناوي الشاب الصعيدي اووووووي
بيقولي تاخدي جلاب ياشمس
ماعرفتش ارد
ماانامااعرفش بيتكلم عن ايه
:)
لاقيته طلع لي القله اللي فوق دي
قلت له ايه ده قله :)
طبعا ضحك :))
بزمتكم دي مش قلة
المهم الندوة كانت تجنن
وحوار راقي وجميل واستفدنا كلنا منه
وقابلت ريم سعيد الرقيقه اللي كانت وحشاني جدا
وقابلت المبدع نور الدين اللي علي اسم حفيدي واللي معقدني بكتاباته
وقابلت غادة محسن بستان افكاري ومبسوطه اني شوفتها جدااااااا
وقابلت الناقدة الجميلة الرقيقة مني طه اللي حبتها جدااااا
سبحان الله في ناس كده لما تشوفهم تحبهم لله في الله من اول كلمة
الشباب بعد الندوة اخدوا مصطفي يأكلوا شوربة عدس ويقعدوه علي البورصه
فضحوناااااااااا
الراجل جاي من قنا للقاهره يقوم يعزموه علي عدس 
اتفضحنا
وهتكلم عن الندوة الرائعه التدوينه الجايه
فوتكم بعافيه
:))

الأربعاء، 6 فبراير 2013

الغريب اديب

الغريب اديب 
مثل قديم 
بهمس بيه في ودن اخوان العرب اللي في مصر
لييييييييييييه؟؟
زمان ايام الغزو بتاع العراق علي الكويت
 كتير من الاسر الكويتيه جت مصر هربا من الغزو
علي عينا وراسنا طبعا
كان في وقعه حصلت غريبه اوي
كنت راكنه مستنيه صديقه تنزل من بيتها 
وتاكسي ركن جنبي ينزل اتنين ستات واضح انهم عرب 
وجت الست تحاسبه السواق 
قال لها مش عايز حساب ياست هانم احنا لبعضينا
 انا ياما عشت عندكم في الكويت 
ماكان من الست الا انها صرخت فيه وشتمته 
شتايم بمامعناه انت ياجربوع هتبقشش عليا انا
رد فعل غريب عنيف
 حتي لو كان بيجاملها بس وهياخد اجره 
ترد عليه احسن من كده وتديله حسابه
سواق التاكسي قال لها كتر خيرك 
مش هرد عليكي انتي مهما كان ست 
وكمان غريبه وضيفه
 راحت شتماه وراميه له فلوس من الشباك
راح هو واخد عربيته ومشي 
وهو بيقول حسبي الله ونعم الوكيل
طيب ياشموسه ايه اللي فكرك بالكلام ده 
؟؟؟
هقولكم
كنت في سوبر ماركت ماركاتوا
 وكان الاتنين ستات اللي قصادي علي الكاشير عرب
ولما حاسبوا 
الست اللي دفعت قالت للبنت اعطيني العشره جنيه خمستين البنت ردت بكل ادب
( وده غريب طبعا علي البياعات المصريات)
 مافيش يافندم خمسات
 راحت الست قالت لها قلت لك اعطيني فكه 
فاالبنت قالت لها تاخديهم معدن ؟؟
قالت لها لا ورق
 البنت فتحت لها الدرج وقالت لها شوفي يافندم مافيش خمسات خالص
ماكان من الست الا انها نتشت منها الباقي بعصبيه 
وشتمت البنت وقالت لها انتوامعاملتكم زباله 
وانتوا زباله
البنت كانت هترد عليها
 انا برقتلها انها ماتردش وتسبها تمشي
بعد الست مامشيت طيبت خاطر البنت بكلمتين وخلاص
ده حال اغلب العرب في مصر 
في بلدنا وبيتعملوا معا الناس بطريقه بايخه
وعايزة اقوللهم 
الغريب اديب
ومش مستغربه طبعا عليكم ده
اللي يسيب بلده وهي محتاجاه يعمل اكتر من كده
مش مبسوطه بأغنياء العراق وسوريا اللي في مصر
 وفاتحين محلات وعاملين بزنس
 مش مبوسطه باللي يجري من بلده وقت العسر
ممكن اكون غلط
بس لنا في اهل غزة اسوة حسنه

الاثنين، 4 فبراير 2013

هيبة

زمان قالوا في الامثال
مثل غريب كده بس صح
اللي جوزها يقول لها ياعوره..ولادها يلعبوا بيها الكورة
وفي رواية اخري
جيرانها يلعبوا بيها الكورة
مش مشكلة 
المهم ان الست دي اللي اتقال لها ياعورة
حد اي حد هيلعب بيها الكورة
جميييييييييل
هو ده بقا حال مصر دلوقتي
ليييييييييه؟؟
السلطه 
اي الدولة نفسها مش علي بعضها
قرارات قرارات قرارات
وكلها قرارات مالهاش دعوة ببعض
والقرار وعكسه
والقرار ويتلغي
يعني الحكومة ممرمطه هيبة مصر
يبقا من الطبيعي ان الاولاد والجيران من الدول الاقزام 
يلعبوا بمصر الكورة
ياعم الريس ياابا الحاج
عايزين قرارات لصالح المواطن تكون واضحه جهارا نهارا
المواطن يحس ان في حاجه بتحصل لصالحه
تصدق لو عملت كده
هتعرف تاخد الاستقرار اللي فلقتونا بيه 
والعجله هتمشي وهنصنع الصاروخ عابر القارات
والشارع هيروق من الناس الصح
وهيبقا سهل عليك تمسك
 الطرف التالت والفلول والبلطجيه ....الي اخر التسميات
اعمل لجنة محايدة من اساتذة الدستور
 ناس اهل ثقه يعدلوا البنود الخلافيه
اعمل حكومة انقاذ وطني.......
الي اخر المطالب اللي مابتعضش دي وهيكون فيها الصالح
علشان التيارات والقوي والانقاذ...... الي اخر التسميات  يهدوا بقا
والداخليه دي بقا دوله جوه دوله وليلتها طويله حبتين
مااعتقدش انك هتقدر تعمل فيها زي ماعملت في الجيش في الخباثه واحلت للمعاش كل الرؤؤس القديمه 
عشش علي البلد ياريس 
دي مصر جميله وحنينه وبتحب اللي يحبها
وعايزة اهدي اغنية ليلي مراد لأستقرار واخته العجله
سنتين وانااحايل فيك ودموع العين تناديك ياسبب تعذيبي
فوتك بعافيه يا ريس


الجمعة، 1 فبراير 2013

صباح الخير

الحمد لله 
والشكر لله
شهر يناير مشي
شهر رخم بطئ 
كل ماابص ورايا 
علي سنين عمري اللي راحت اتخض
كل ده عشته وعملت فيه ايه
ربنا يعنا علي الجاي بقا 


الملك لك لك ياصاحب الملك