الاثنين، 4 فبراير 2013

هيبة

زمان قالوا في الامثال
مثل غريب كده بس صح
اللي جوزها يقول لها ياعوره..ولادها يلعبوا بيها الكورة
وفي رواية اخري
جيرانها يلعبوا بيها الكورة
مش مشكلة 
المهم ان الست دي اللي اتقال لها ياعورة
حد اي حد هيلعب بيها الكورة
جميييييييييل
هو ده بقا حال مصر دلوقتي
ليييييييييه؟؟
السلطه 
اي الدولة نفسها مش علي بعضها
قرارات قرارات قرارات
وكلها قرارات مالهاش دعوة ببعض
والقرار وعكسه
والقرار ويتلغي
يعني الحكومة ممرمطه هيبة مصر
يبقا من الطبيعي ان الاولاد والجيران من الدول الاقزام 
يلعبوا بمصر الكورة
ياعم الريس ياابا الحاج
عايزين قرارات لصالح المواطن تكون واضحه جهارا نهارا
المواطن يحس ان في حاجه بتحصل لصالحه
تصدق لو عملت كده
هتعرف تاخد الاستقرار اللي فلقتونا بيه 
والعجله هتمشي وهنصنع الصاروخ عابر القارات
والشارع هيروق من الناس الصح
وهيبقا سهل عليك تمسك
 الطرف التالت والفلول والبلطجيه ....الي اخر التسميات
اعمل لجنة محايدة من اساتذة الدستور
 ناس اهل ثقه يعدلوا البنود الخلافيه
اعمل حكومة انقاذ وطني.......
الي اخر المطالب اللي مابتعضش دي وهيكون فيها الصالح
علشان التيارات والقوي والانقاذ...... الي اخر التسميات  يهدوا بقا
والداخليه دي بقا دوله جوه دوله وليلتها طويله حبتين
مااعتقدش انك هتقدر تعمل فيها زي ماعملت في الجيش في الخباثه واحلت للمعاش كل الرؤؤس القديمه 
عشش علي البلد ياريس 
دي مصر جميله وحنينه وبتحب اللي يحبها
وعايزة اهدي اغنية ليلي مراد لأستقرار واخته العجله
سنتين وانااحايل فيك ودموع العين تناديك ياسبب تعذيبي
فوتك بعافيه يا ريس


هناك 21 تعليقًا:

tarek momen يقول...

ماهي المشكلة ان عيال الست مش مقتنعين انهم يصلحوا حال جوزها.. ده راسهم و الف سيف انهم يطلقوها منه مع انهم لو نصحوه يمكن ينصلح حاله ويضللوا علي بيتهم

tarek momen يقول...

هو التعليق نزل؟؟

;كارولين فاروق يقول...

انا في حاله يأس
ومش قادر الامل
يجيلي يمكن اخد تاكسي
وروحله بس حاسه انه حاياخد
فلوس كتيره لان المشوار حايبقي طويل
جود باي مصر نفسي اقولها وانا في المطار
اشوفك علي خير
علي خير اوي
تحياتي

salwa abdelhalim يقول...

هو في حلول كتيير اوي بس حاسه ان احنا هنفضل تايهين علي طول
بجد بوست جميل
تقبلي مروري
تحياتي

ريهام المرشدي يقول...

أحب أكمل على الأغنية " يا سبب تعذيبي و الإسم حبيبي" و الله يا شموسة جبتي الخلاصة ... الله يعافيكي :)

بنت النيل يقول...

عززتى الشمس...
التى أرجو لها...أن لاتغيب
صدق قولك
صدق القلم الذى لا يخيب
نامل الصلاح لمصر ... نأمل أن لا يعيبها شعبها
حتى لا يعيبنا الاخرون
أرجو أن تنزاح الغمة عن البلد الآمنه ... بإذن الله
أسعدنى المرور بمدونتك الرقيقة

faroukfahmy58 يقول...

لم تفقد مصر يا شمس هيبتها فقط بل فقدت هالتها وهامتها وعظمتها مصر التى كنا ونحن مغتربين نفخر بها
اليوم ماذا اذا صُؤل اى شخص مصرى مغترب عن جنسيته ماذا يقول ايقول انا من مصر القديمة التى شيدت الاهرامات احد عجائب الدنيا السبع ام يقول انا ابن النيل الخالد ام يقول الحق انا امى مصر التى مرضت وهرمت وشابت بالفعل المتعمد من لفيف من ابنائها الذين خرجوا من رحمها ورضعوا من خيرات صدرها الذى تهدّل
لك الله يا مصر

أحمد أحمد صالح يقول...

مساء الخيرات أستاذتنا.
بداية أشكرك على تشريفك لمدونتي وعلى كلماتك الطيبة المفعمة بالألفة والمحبة.
..
صراحة لا أجد تعليق على ما كتبتيه والذي جاءت تشبيهاته موفقة جدا حتى انه رسم أوضاعنا وحالنا في الصورة التي تحزننا جميعا رؤيتها.
فنحن بلاشك في حالة تخبط، أظنها لا على المستوى السياسي الحاكم والنخبوي، ولكن على المستوى الشعبي أيضا، والذي يظهر بإتباع البعض لأشخاص أو توجهات هم في الأساس هدفهم إما السلطة أو البلبلة. ونسى الجميع أننا يجب أن يكون إنتماءنا في كل وقت وحين للوطن، لا لأشخاص أو جماعات أو أحزاب.
لكن ربما العذر في ان الساحة من الأساس لا تحوي ما يسر!
لكن دوما نقول الأمل موجود في غد أفضل بإذن الله.
..
كل الشكر أستاذتنا.
كل التحية والإحترام.

ابراهيم رزق يقول...

شمس الشموس

هههههههههههههههههه

تصدقى يا شموسة نصيحة فى التمام
بس على راى عمنا نجيب سرور

منين اجيب ناس لمعناة الكلام يتلوه

تحياتى

لـــولا وزهـــراء يقول...

والله يا شموسة ضحكتيني ضحك لحد ما عايزة ابكي من مرارة الحقيقة


لولا

شمس النهار يقول...

* tarek momen

التعليق هنا اهو يافندم

لأ ماتوصلش لطلاق الطيب احسن :)

شمس النهار يقول...

*كارولين فاروق

ان شاء الله كله هيبقا تمام

لحظات بيضعف الايمان جوانا بس الايمان بالله بيرجع لنا الامل

شمس النهار يقول...

*salwa abdelhalim

ان شاء الله مش هنفضل تايهين كتير
ومش احنا اللي تايهين الشعب عارف عايز ايه
اللي تايه همه اللي في الحكم

شمس النهار يقول...

*ريهام المرشدي

ايوة والاسم حبيبي
:)

نفسي مرسي يفهم الكلمتين دول
الحب فعل ومسؤليه
مش كلام وبس

شمس النهار يقول...

* بنت النيل

نورتي المدونه في اول زيارة

المشكله ان مصر عابها السلطه الحاكمه فاعابها شعبها والجيران

شمس النهار يقول...

*faroukfahmy58

دي بجد غمه وهتنزاح بعون الله
مصر دلوقتي بتضرب في الخلاط

والحلو هيستنا
والمر هيترمي

شمس النهار يقول...

*احمد اخمد صالح

صباح الهنا يااحمد

اولا مبسوطه انك رجعت تنور بلوجر تاني وتنور التعليقات

مصر عايزة اللي يحبها بجد ويخلص لها بجد
لله والوطن والشعب
مش لعشيره ولا فصيل

شمس النهار يقول...

* ابراهيم رزق

:))

بس مثل في الجون
صح
:)

شمس النهار يقول...

*لولا وزهرا

يااهلا يااهلا
انتوا فين ؟؟

سلامي ليكي طبعا وسلمي علي زهرا

وادينا بنضحك من غلبنا يالولا:))

SHARKawi يقول...

كلام سليم . كلام صحيح مية المية .
وصفتي الحالة ببساطة شديدة .
يارب الناس تاخد بالها وتفهم .

لكي تشكراتي وتقديري وكامل احترامي

شمس النهار يقول...

*SHARKawi

الحاله محزن

ومايتوصفش بالنسبه لي غير كده :))