الاثنين، 11 فبراير، 2013

الندوة 3

الندوة حميت اوي
وكان السؤال اللي لعلع كده
هل الكاتب بيسيطر علي شخصيات روايته
ولاشخصيات الروايه  اللي بتسيطر علي الكاتب
بس وعينكم ماتشوف الا النور
:))
شيرين قالت ومصطفي قال وابراهيم والكلام احلو
الكاتبة مني طه 
قالت ان ممكن الكاتب يكتب شخصيه عكس شخصيته 
بس 
هيخليها تعمل اللي هو مش عارف يعمله ...
الي اخر الكلام
طيب اسكت انا بقا
لألألألأ طبعا
قلت لهم العمل الفني دايما بيحمل روح صاحبه مهما كان
يعني لو هرسم وانا زعلانه الصوره هترجم ده
ولو فرحانه هترجم ده
كذلك الكاتب والشاعر
انا اعتقد ان اللوحه قصة قصيره فعلا
انتوا بقا ايه قولكم في الكلام ده احب اعرف رايكم
:))
المهم الندوة كانت جميلة جدااااااااااا
وفي ختام الندوة حصل حاجه جميله جدااااااااااا
 لاقيت ابنائي المدونين اللي انا فرحانه بيهم جداااااااااااا
بيهدوني كتبهم وكمان كتبوا لي عليها اهداء
كل اهداء منهم بعتبره وسام علي صدري
وحروفه هي الالماظ واللولي اللي مزين الوسام
بجد اتلبخت جداااا 
ومابقتش عارفه اقول ايه ولا اعمل ايه :)
بس كنت فرحانه جداااااااااا بده
بس علي مين ده انا شريره
الاربع كتب دول
 ايوه اربعه اصل مصطفي اهداني كتابين 
وشيرين كتاب ونور الدين كتاب
الاربع كتب دول 
انا هذاكرهم 
وان شاء الله كل مااخلص كتاب اجي هنا وانقد بقا
:))
في النهاية الندوة عدت علي خير
وكل واحد فينا رجع ومعاه ذكريات جميله
ماتنسوش تقولوا رايكم في موضوع شخصات الروايه دي 

هناك 33 تعليقًا:

شيرين سامي يقول...

أنا قلت رأئي هناك بس هقوله هنا تاني
عن نفسي لما بكتب بكون راسمه خط معين أسيطر بيه على الشخصيه..لكن في النهاية الشخصية هي اللي بتسيطر عليه و بلاقي خط جديد إترسم..
ساعات بتحكم في الشخصيه إنها تعمل اللي مقدرش أعمله..و ساعات بخليها تعمل اللي مرضاش أعمله..حسب الفكره هي اللي بتحدد.
أنا فرحانه أوي إن كتابي معاكي و مستنية رأيك فيه و أكيد فاكره أنا قلتلك إيه عن إحساسي بيه دلوقتي :)
هفضل أكرر كل مره إن الندوة كانت جميله بيكي و بالناس الجميله اللي نورتنا :)

asmaa fathy يقول...

اربع كتب حتة واحده طيب اتوحيني بالكتاب التاني بتاع استاذ مصطفي

هههههههههههههه

معاكي في حتة ان مشاعر الأنسان بتطغى عليه في كتابته

يمكن حاولت كتير وانا حزينة اكتب حاجة بمود مختلف لمجرد اني أكسر الكآبة الموجودة في مدونتى معرفتش هههههههههههههه

صعب اووووى الإنسان يتجاهل مشاعرة في كتابته وان نجح ده في البداية هتلاقية من غير ماياخد باله ربط كتابته وبدايته بحالته النفسية
كمان الكاتب بيسيطر علي شخصيات العمل
يعنى مثلا لو اي حد كتب عن بنات الليل قصة

هتلاقية بشكل تلقائي بيهيء للقاري ان ظروفها هي اللي خلتها تعمل ده لانه من جواه هيكون رافض انها تكون مشيت الطريق ده بمزجها

او يخلي الأحداث تمشي في اتجاه ان يحصلها حاجة تخليها تتوب وترجع لربنا قليل اوووي لما تلاقي حد كمل القصة بموت بنت الليل علي نفس حالتها وخل القصه انها مشيت بمزجها

يعني بعد الرغي دا كله الكاتب هو الفيصل الوحيد اللي بيسيطر علي شخصيات العمل وبيرتبها علي حسب مبادئه هو وأخلاقه هو وحالته هو النفسية واوقات بيشوف هو لو كان مكان البطل كان ممكن يتصرف ازاى

كفاية رغي كده بقى

تحياتي

ASMAA FATHY

ريـــمـــاس يقول...

صباح الغاردينيا شموسه
وحشتيني جداً جداً
ورجعت لبلوجر بعد غياب وشوق بالنسبة لسؤالك ياست الكل حكلم عني أنا وهقولك مش بعرف أكتب غير ريماس حتى في قصصي الزغننه البسيط بيبقى فيها حته مني آممم أنا بحس أن أحنا الي بنسيطر على أبطال روايتنا وساعات بجد بنرسم حاجة فيهم مش قادرين نقولها في الواقع وبتبقى جميلة لما نحسها في الحروف ..
والف الف مبروك لكتابنا لرائعين اتمنيت بجد أنه أكون معاكم بس أكيد قلبي كان بينكم وحواليكم :)"
؛؛
؛
لروحك عبق الغاردينيا
كانت هنا
reemaas

شمس النهار يقول...

*شيرين سامي

عجبني كلامك جدا
الصراع اللي بيتم بين الكاتب والشخصيه هو اللي بيفجر الابداع
وان تكون القصه جيده ام لا
وبيخلق التنوع طبعا في الافكار والسرد
طبعا انا سعيده بيكي والشوية اللي قعدناهم مع بعض والحوار الجانبي
بجد ياشيرين انتي عندي زي بناتي بالظبطت

شمس النهار يقول...

* asmaa fathy

:)
الكتاب التاني بتاع مصطفي ده الجماعي مش ليه لوحده

ماينفعش حد يكتب عكس مابداخله

يعني لايمكن تكتبي حاجه حزينه وانتي فرحانه
الابداع انعكاس وترجمه لما بداخل المبدع
وكل كلامك مظبوط بس ساعات الشخصية اللي انتي كتباها وماسكه خيوطها تشدك وتفتح لك مناطق ماكنتيش عامله حسابهتلاقي نفسك بتكتبي وبيخرج منك كلام تاني بس برضوا الكلام ده جزء من روحك وحالتك

شمس النهار يقول...

*ريماس

اهلا اهلا
بريماس الجميله

حمد الله علي السلامه
كنتي فين؟؟
وحشتيني ووحشني كلامك
يارب تكوني بخير

طبعا نفسنا انك تكوني معانا بس ان شاء الله هيحصل لاتقلقي :))

ياسمين يقول...

أظن أن الشخص هو المتحكم,يعني مش لازم الشخص يكون فقير عشان يكتب شخصية فقيرة ,بس من تجاربه أو من آراء الآخرين يقدر يرسمها ,يعني عامل الثقافة مهم جداا,وفي الأول والآخر نظرة الكاتب للأمور وازاي يخليها تتمحور هي اللي بتسيطر علي الكتابة ..!

مصطفى سيف الدين يقول...

انا قلت الحكاية مزيج بين الاتنين بيبقى في مسار معين و هدف معين و فكرة عايز توصلها لكن التفاصيل ساعات بتوديكي مناطق مختلفة
تمام زي ماحضرتك قلتي هناك اللوحة عبارة عن قصة قصيرة زي ما بيعمل الرسام بالظبط بيعمل الكاتب بس واحد بيستعمل الريشة و التاني بيستعمل القلم

كانت ندوة ي قمة الروعة و الأحلى هو تواجدك معانا
هاستنى رأيك أكيد في الكتب و يا رب ينالوا اعجابك

صاحب الحبر الأسْوَد يقول...

مبدئيا شكلها كانت ندوة ممتعة و مفيدة وهادفة
والمناقشة دي بالذأت اعتقد انها بتشغل اي كاتب هاوي او محترف
رأي باختصار ان الحالة النفسية للكاتب غالبا بتنعكس علي اختياره للقصة والاحداث والشخصيات او الفكرة العامة
اما النهاية فممكن تنعكس علي حالة الكاتب او تعكس حالته يعني الكاتب نفسه يتحول من يائس لمتفائل لانه عاش جوة احداث هو ماعشهاش فبالتالي ممكن يطلع بنتيجة تغير فكرته وحالته النفسية
اما شخصيات القصة لازم تنفصل عن الكاتب وحالته لانه في موضع تقمص الا لو بجسد شخصيته
ماينفعش اكتب عن شخص شرير واخليه يتصرف بطيبة عشان انا من جوأية طيب كده هوصل رسالة مشوهة للقارئ

بس كده الحمد لله خلصت تعليق
انا فاكر اني ذكرت كلمة باختصار في الاول؟
مش عارف ليه باجي عن تدويناتك واطول في التعليق
;-)
موضوع شدني كالعادة
شكرا علي المشاركة

رؤى عليوة يقول...

انا مبعرفش احقد وقلبى ابيض جدا صحيح
بس خلاص بقى عشان بغير
ههههههههه

انا غيرانه انى محضرتش ومشوفتكيش
كده كتير قلبى الصغير لا يتحمل :)

كلام جميل واجمل ما فى التدوينات الايامدى الوفاء
لسه كاتبه كده عند عمو فاروق

دمت بخير
ويارب الايام كلها تعدى بفرحة

ابراهيم رزق يقول...

شمس النهار

شمس الشموس

فعلا الندوه كانت جميله

انا وجهة نظرى اللى انا قلتها

ان الشخصيات لو حملت شخصية و فكر الكاتب اصبح كاتب فاشل
القصه فكره تحمل شخصيات و على كل شخصيه ان تجنح بسماتها بعيدا عن الشخصيه الاخرى
الموضوع عايز بوست لوحده

تحياتى

doaa elattar يقول...

الكتابة إحساس وروح .. حتى لو الحكاية مش شبهنا ولا زينا بس بنكون حسيناها لدرجة إنها استفزتنا للكتابة وممكن حاجة عكسنا تمامًا بس نفسنا فيها جدًا فنقدر نعبر عنها كأننا عيشناها .. الأأهم في كل ده إحساسنا وعلى قد إحساسنا على قد ماجمال اللي كاتبينه بيظهر ، لكن التحدي اللي بجد إننا نكتب عن حاجات عمرنا ماعشناها بس قدرنا نحسها ونوصلها لقلوب الناس كأنها حكايتنا :)

شمس النهار يقول...

*ياسمين

فعلا بس برضوا روح الكاتب وحالته النفسيه بتطلع في الكتابه
واكيد ده اللي بيميز كاتب عن كاتب والا كان كله متشابه
روح الكاتب وشخصيته هي اللي بتميزه

شمس النهار يقول...

*مصطفي سيف الدين

كلامك مظبوط يامصطفي
مع تواجد روح وشخصية الكاتب علي العمل
وده مايميز كاتب عن كاتب ورسام عن رسام
والا كان كله بقا متشابه
وزي ماقلت في الندوة زمان كنا من اول المقدمه الموسيقيه بنقدر نعرف مين الملحن
يعني بليغ مهما لحن كنت تحس بروحه في العمل سواء حزن او فرح
ومن كام سطر من روايه ماتعرفش مين المؤلف تقدر تعرف انه لأحسان عبد القدوس
:)
عقبال مااشوفك كده زيه :)

شمس النهار يقول...

* صاحب الحبر الأسْوَد

:))
اهلا بيك في اي وقت
والتعليقات هنا مفتوحه طول زي ماانت عايز:)

الكاتب لو طيب وعايز يكتب شر هيكتب مافيش مشكله لكن هتكون مفرداته برضوا بتعكس روحه علي المفردات

شمس النهار يقول...

*رؤي عليوة

:))
القلب الابيض عمره مايعرف يحقد

:))

والحقيقه الندوة مهما كتبت عنها مش هوفيها حقها فعلا
:)

شمس النهار يقول...

*ابراهيم رزق

:))
وماله اكتب لنا في الموضوع ده تدوينه منك هتبقا مفيده جدااا

برضوا انا بقول مهما تنوع فكر وشخصيات الكاتب برضوا الروايه بتحمل حته من روح الكاتب

حتي في التمثيل
تفتكر الراقيه سناء جميل لما تقمصت دور فضه المعداوي
كانت هايله وكأنها مولوده في بحري
لكن بعين الخبير كده
هتلاقيها بشخصية سناء جميل حتي وهي بتقشر البرتقانه ببقها

:))
مستنيه تدوينه عن الموضوع ده
مش البرتقانه طبعا
:))))
لأ عن الكاتب وسيطرت شخصيات رواياته عليه

شمس النهار يقول...

* doaa elattar

ممكن الكاتب يكتب بحرفيه طبعا وده موجود زي كاتب السيناريو ممكن يجيلوه قصه مش بتاعته بس يكتبها بحرفيه

وممكن تحبي تكتبي عن حبيبه مهجوره وحزينه وانتي مش كده هتكتبيها طبعا لو انتي كاتبه ماهره
بس برضوا انتي نفس الكااتبه الماهره دي
لو انتي فعلا حبيبه مهجوره هتبقا الكتابه لها شكل تاني خالص
زي احمد رامي علشان كان بيحب ام كلثوم ومش طايل حبها كتب من اروع الكلمات في الحب والهجر والشوق
:))
لأ كده الموضوع كبر بقا :))

الازهرى يقول...

طبعا المفروض كأى طالب مجتهد أكون ماسك الكتاب
وباستعد علشان رايح الإمتحان

لكن امر ملكى إنى أجى وأشارك فى النقاش

الأمر لله


رأييى الدايم إن موضوع السيطرة مش للبحث أساسا
لإن كتاب القصة نوعين
الأول احترافى بحت
يعنى ه بيكتب علشان الميزانيات وكده
ودا غالبا بتبقى الصنعة همه
وغلبا بيسيطر على مفاتيح الشخصيات سيطرة شبه كاملة
وبيبقى عارف بداية القصة ونهايتها
والأمثلة كتيييير

وغالبا قصصهم بتبقى مش كويسة للدرجة إلا فيما ندر

النوع التانى الكاتب الهاوى بنوعيه
الهاوى المحترف اللى بيكتب للمزاج وبيننشر لكن فى الغالب بيبقى مش منتظر العائد المادى من النشر
أو الهاوى بس اللى بيكتب للكتابة والمزاج

والنوع الأول بيكتب للمعنى وبيبقى غالبا راسم خط للشخصيات وللقصة أو الرواية وعارف هيمشيها إزاى
لكن فى أحيان كتير بيلاقى إن الققصة محتاجة تاخد شكل تانى وهو بيتحرك جواها فيحصل التغيير وأحداث الرواية وشخصياتها يتحركوا قدام عينيه ويرسموا حكايتهم الخاصة

أما النوع التانى الهاوى جدا خالص فعلا ده
فدا غالبا إن لم يكن دايما بيبدأ القصة وهو راسم لها موضوع وخط معين وبينتهى وهى قصة تانية مختلفة تماما عن نيته
وأحيانا كمان بيتغير جزء من المعنى سواء التطوير كا بالسلب أو الإيجاب للقصة


ننيجى بقى للسؤال التانى
هل المؤلف بيبقى موجود جوة القصة أو لأ ؟؟
دايما موجود وبكل الأنواع
الإحترافى لإن بتبقى صنعته معروفة وزى كده العلامة التجارية
والأمثلة على الساحة الحالية كتير

أما الهاوى فلإن روحه فسها بتكون جوة القصة
وبيكتبها وغالبا بيحط فيها جزء كبير من خبراته الشخصية وتجاربه

أما بقى إنها تظهر حالته النفسية أو لأ
فدا لا يمكن الرد عليه
لإنها بتختلف من انسان للتانى ولحد النهاردة ما شفتش لها قاعدة تجمعها

***

أنا كده عملت الواجب
خلوا قلبكم أبيض بقى وادعوا النهاردة

أخبار الصور إيه ؟؟؟

شمس النهار يقول...

*الازهري

يامرحب يامرحب :)

انه لتدوينه موازية :))

مش للبحث خالص :)))
يعني نسك علي التدوينة
:))

انت ناقص تقولي ماذااقول بعد الذي قيل

:)))

Aya Mohamed يقول...

هو انا ازاى مش جيت هنا قبل كدا :0
رايئ ان العمل بيحمل احساس الكاتب
فى حين ان لو فرحانة هيطلع الكلام مبهج
ولو حزينة هيكون الكلام حزين كمان
لكن ابداع الكاتب انه يبين الشخصيات مختلفة عنه فبيكون متقمص روحهم لكن باحساسه هو

محمد الجرايحى يقول...

تحياتى وتقديرى للجميع
وبارك الله فيكم جميعاً وأعزكم

P A S H A يقول...

- هل الكاتب هو اللي بيسيطر علي شخصيات روايته ولا شخصيات الرواية هي اللي بتسيطر على الكاتب ؟
- ســـؤال صعــب جــداً . وبجد مش عارف أجاوب عليه إزاي !! واسمحيلي اعتبر إجابتي دي مؤقتة .
- الموضوع – من وجهة نظري الشخصية – ممكن تشبيهه بحلبة المصارعة .. والكاتب بيكون هو : اللاعب واللاعب الخصم والمدرب ومدرب الخصم والحكم وجمهور كلا اللاعبين سواء في الملعب أو قدام شاشات التليفزيون في البيوت والمخرج اللي بيذيع المباراة على الهواء في التليفزيون والصحفيين والرعاة الرسميون وشركات الإعلان والعاملين في الصالة من أول موظف شباك التذاكر لحد عامل النظافة وعائلات الناس دي كلها وغيرهم من اللي ممكن ما يجيش على بال أي حد إن ليهم دور في المباراة ونتيجتها !!
- لو افترضنا مثلاً إن الفقرة اللي فاتت دي هي محور رواية من تلتميت صفحة .. فـ الكاتب هو كل الأطراف دي .. سواء اللي ظهروا على صفحات الرواية وكانوا ضمن أبطالها أو اللي ما ظهروش بس كان ليهم دور مهم في تحريك الأحداث والكاتب .. الكاتب هو اللي بيضرب وبينضرب وبيضحك وبيبكي وبيحب وبيخون وبيتولد وبيموت مليون مرة قبل وأثناء وبعد كتابته للرواية .. الكاتب هو اللي بيعصر نفسه على الورق علشان في النهاية يطلع عمل صادق .. ما اعتقدش إن الكاتب بيبقى عارف (إزاي) هايسيطر على شخصيات روايته طول ما الفكرة والأحداث والشخصيات عايشين في دماغه أو بمعنى أدق دماغه عايشه عليهم ، لأنهم هما في الغالب اللي بيبقوا مسيطرين عليه ، لكن لازم في وقت معين يبقى عارف (إمتى) يسيطر عليهم .. وهنا ييجي السؤال : هل في اللحظة دي هو سيطر عليهم علشان يهرب من سيطرتهم عليه ؟؟ ولا هما (الشخصيات) كانوا وصلوا في اللحظة دي لقمة ومنتهى نبوغه وإبداعه وفكره فقرروا أنهم يكتفوا منه بهذا الحد بدلاً ما يبدأوا رحلة الموت داخل دماغه ؟؟
أنا ســرحت :D

ذو النون المصري يقول...

كان نفسي اكون معاكم
..........

L.G. يقول...

وجون وجون وجون
الله عليك يا سيدتي وتاج راسي
هذا الموضوع قتلناه مناقشة انا وصديقتي نسرين صاحبة مدونة وجنى الجنتين :))))
طبعا انا معك قلبا وقالبا فكل اناء ينضح بما فيه سواء في عقله الواعي او الباطن حياته الواقعية او المتخيلة
انا قريت كتاب شيرين بس وبديه لأصحابي يقروه ويرجعوه تاني طبعا وان شاء الله اجيب الباقي انا بقى عندي ادمان اسمه كتب المدونين ربنا يبارك فيهم ديه اول ثورة نجحت ولسه مستمرة :))))))))
ان شاء الرحمن اشوف حضرتك في يوم من الايام ضروري
سماح

محمد فاروق الشاذلى قلب مصرى يقول...

حرصا منى على الوفاء بوعدى لكم يا مدام شمس نشرت النهاردة تدوينة جديدة، ياريت ماتنشريش التعليق ده علشان مايكونش إعلان، أنا بس جيت أقول إنى وفيت بوعدى
تحياتى :)

شمس النهار يقول...

Aya Mohamed*
اهلا وسهلا بيكي

نورتي
:)
صح روحه هو

ماحدش بيقدر ينفصل عن روحه
احمد ذكي رغم انه ممثل بارع الا انه كل شخصيه عملها كانت تحمل روحه

شمس النهار يقول...

* محمد الجرايحى

اهلا بيك بتنورني في المدونة
وبتنور التعليقات:)

شمس النهار يقول...

* P A S H A
يامساء الفل

ايه الكلام الكبير الجامد ده :)

ياريتك كنت في الندوة

صح هو فعلا بيبقا صراع بين الكاتب والشخصيات
ومن راي ان روح الكاتب هي اللي بتنتصر في النهاية

يعني لما انا اتشطرت كده وعملت فيها اديبه واشتركت في المعطف عملت المعطف شرير وده ليه؟؟
علشان انا كان نفسي ابقا شريرة
:))
:)

شمس النهار يقول...

*ذو النون المصري
ياريت :))
ان شاء الله لما تكون في مصر نعمل ندوة مخصوص ليك :))

شمس النهار يقول...

* L.G

اهلا بيكي ياسماح
ان شاء الله لما يكون في ندوة تاني اكتبها هنا
ونشوف بعض
:)

شمس النهار يقول...

* محمد فاروق الشاذلى قلب مصرى
يااهلا يااهلا

ايوة كده الطيور ترجع لعشها
:))
طبعا هنشر التعليق وهنوه علي التدوينه كمان
:))

;كارولين فاروق يقول...

هل الكاتب هو اللي بيسيطر علي شخصيات روايته ولا شخصيات الرواية هي اللي بتسيطر على الكاتب ؟
شوفي يا ست الكل انا اعتقد من وجه نظري ان شخصيات روايته هي اللي بتسيطر عليه لكن إذا صادفته شخصيه تشبهه هنا اعتقد انه لا يستطيع ان يتملص من سيطرته علي هذه الشخصيه من تفاصيلها ورسمها من منظور رؤيته الخاصه ..وقد اُخطئ في هذا
واسفه علي تأخيري في الرد
تحياتي وتقديري