الخميس، 30 مايو 2013

باي باي م نصر

باي باي م نصر
بعد 27 سنة في م نصر
مشيت منها كان اخر ارتباط بيها امبارح
اييييييييه دنيا :)
سكنت في م نصر ايام ماكانت اغلبها صحراء 
ومعسكرات جيش
اصلا اشتريت الشقة من 30 سنة 
وماقدرتش اسكن الا بعد ثلات سنوات 
لما الشارع بقا فيه ناس
الي حد ما
كان شارع عباس العقاد ده اغلبه ارض فضاء
شارع مصطفي النحاس كان مدق مش شارع
كنا كل حاجة بنشتريها من م الجديدة او العباسية
ساعات كنت اطلع البلكونة الاقي عربيتي هي الوحيدة اللي في الشارع
والشارع هس هس
:))
وكان حي م نصر حي هادي مهجور
الان اصبح حي مزعج زحمة ولا الصين الشعبية
مكرم عبيد ده اللي ماكنش فيه مخلوق
علشان ناخده من اوله الان 
ممكن نوصل اخره في ساعة من كتر الزحام
كنت امشي فيه قافله العربيه عليا خوفا من اي شئ
ماكنش في محل واحد بتاع فول او طعميه ولا مكوجي
وكان يادوب صيدلية افريقيا وسوبر مارت استورز جمبها
كنت بشوف المطار من الدور ال11 بوضوح
وشوية شوية اصبحت م نصر
حي من ازحم احياء القاهرة 
ورجعت م الجديدة تاني
اللي ابتديت فيها حياتي الزوجيه
وعاشر ماتعاشر يابني ادم مسيرك في يوم تفارق

الاثنين، 27 مايو 2013

تمرد

انا مضيت علي تمرد
وكل اسرتي كمان
مع علمي ان مش هيتعمل حاجة بكل التوقيعات دي
مع ان سعد زغلول اتكلم بأسم الامه وفاوض الانجليز
 بتوقيعات زي دي
بس اللي في الحكم مختلفين في الحالتين
ايام سعد كان ناس عارفة بتعمل ايه
والمهم مصر
لكن الموجودين الان المهم الجماعة
وماحدش يقول لي 
ده كلام غلط
المفروض ان الانسان وقت الخطر يقول اللهم امتني علي الاسلام
صبحي صالح وهو مربط في السرير وبيموت
قاللك اللهم امتني علي الجماعة
ولا حول ولا قوة الابالله
المهم
ليه انا مضيت 
علشان اللي في الحكم يعرفوا قد ايه ناس رفضاهم ويعرفوا حجمهم الحقيقي
ويبطلوا تهديد لباقي الشعب
واستعراض قوة مش موجود اصلا
ويعرفوا ان عيب مصري يهدد مصري
ومصر مش عزبة حد
ولا حد هيفرض حاجة علي المصرين تاني همه مش عايزينها
وطول ماانت مابتعملش انجازات حقيقية لمصر وشعب مصر مش هتتساب في حالك
بتصلي ومربي دقنك ده شئ ليك انت
وربنا هيحاسبك علي الرعية قبل دقنك
الرعية والمسؤلية شئ اساسي
انما دقنك دي روح احلقها احسن

الأحد، 26 مايو 2013

الغيرة


هلي يغير الزوج من زوجته ؟
اللي عايز يعرف ايه الموضوع 

الجمعة، 24 مايو 2013

الانفاق

موضوع الانفاق ده بقا موضوع سخيف
ايه لزمة انفاق بين بلدين المفروض انهم عربيتين
اهلنا في غزة ليه محتاجين انفاق علشان يحصلوا علي البضائع والتنقل
المفروض البوابات تتفتح ويبقا في تبادل تجاري قانوني 
وعلي عينك ياتاجر
هو ده الحل السليم

الأحد، 19 مايو 2013

سحر الليل



سحر الليل وجمال السجود 

الثلاثاء، 14 مايو 2013

كده برضوا :)

ياجماااااااااااااااعة
الناس بتوع مسلم اكاديمي عجبهم الشغلانه
:)
قالك عايزين كل يوم من ده
بس ماحدش راح شاف الموقع ليه
؟؟؟؟
ولا دخل علي التدوينة 
مدونة اونطة انا ولا ايه
:)
لاااااازمن ولا بد 
العداد بتاع المقال يجري كده
وكلكم تدخلوا هناك تشوفوا التدوينة
عايزة اروح مشوار ارجع الاقي العداد بقا 20000 مواطن
:)
ان شاء الله
نجاملكم في الافراح
ودي اللينكااااات 
ايوة جمع لينك
:)
 يااااالا علي هناك
معتدل مااااااارش
ان شاء الله صباحكم زي الفل
:) 

الأحد، 12 مايو 2013

الف مبروك

هيثم
صاحب مدونة
الحمد لله والشكر لله 
ان شاء الله 
هيناقش رسالة الماجيستير
يوم 21 مايو
 في قاعة الندوات بكلية اداب الاسكندرية
والدعوة عامه
وهتبقا لمه
علشان نساند اخوكم هيثم
الف مبروك ياهيثم 
وان شاء الله تجيب امتياااااااااز

سعد روماني نجح يامنز :)

الحمد لله بفضل الله تعالي
وبفضل تصويتكم 
لوحة الحصان العربي
 اخدت الجائزة الاولي
 النجاح جميل وخصوصا لما يكون بعد مجهود كبير
شكرا ليكم 
ودي كلمة وشكر سعد للجميع
( شكرا لكل الأصدقاء و الزملاء الذين شاركوا بالتصويت ل لوحة الحصان العربى
و التى فازت بجائزة الجمهور فى مسابقة TGK بألمانيا
لكم جميعا تحياتى و خالص شكرى و مودتى . سعد رومانى)

الأربعاء، 8 مايو 2013

بمبي بمبي:)

بجد مش مصدقة اللي بيحصل اليومين دول في مصر
ديل حصان وقلنا 
مااااااااشي
سلسلة وقلنا
مايضرش
انسيال وحظاظة وحركات وماله
لكن 
بنطلونات سكيني
حمرا وفوشيا وبمبي 
و تيريكيوووووووواز

:))
اهو ده اللي مش ممكن 
ابداااااااااا
طيب 
احساس الشاب اللي ماشي
لابس بنطلون اسكيني وتيريكيواز 
ايه؟
طيب 
لوخارج مع خطيبتك
وهوووووب 
جت الطوبه في المعطوبة
 ولاقيتها جايه لابسه هي كمان زعطلون سكيني 
وتيريكيواااااز
شكلكم هيبقا ايه
؟؟؟؟ 
:))
شباب حلابوظة صحيح

الاثنين، 6 مايو 2013

كل سنة :)

كل سنة وانتوا واحنا 
طيبين اوي زي مااحنا
 والسنة اللي جاية احلي
:))
دي اغنية لصفاء ابو السعود علي فكرة
افتقد جداااا اليوم 
شم النسيم
افتقد التحضيرات المسبقه من امي ودادة
تلاقي المطبخ بقا فيه سلاطين كتييير 
من قبلها بكام يوم
سلطانيه منقوع فيها الترمس
وتانيه للحمص
وتلاته فيها حلبة منبته
الي اخر حركات شم النسيم
وقبلها بيوم يجي بقا الزغلول الكبير الفسيخ والرنجة
وكان زمااااااان اوي بقا 
في حاجة اسمها سمك البكلاه 
وده سمك ناشف مقدد كده بيجي من فرنسا
بيتنقع في الميه ينفش ويتقلي
افتقد اللمة بتاعة العيلة عند عمتي الكبيرة 
وصف التربيزاة اللي محطوطة ورا بعض في حديقة فيلتها
وكل واحد جاي ومعاه حاجات ومحتاجات
ده غير اللي عملاه عمتي الله يرحمها هي وجوزها 
وكم الناس الهائل اللي متجمع
النهاردة الذكريات عاملة عليا حفلة
80% من الناس دي بقواالله يرحمهم 
والدنيا لهت الباقي 
ولا حول ولا قوة الابالله
اديني مطلعه الصور
 وبتفرج علي فيديو من سنييييييييييين 
اول مااخترعوا كاميرا الفديو
:)
وبفتكر جوز عمتي لما سهر علي ايد الحداد علشان يركب مرجيحه لبناتي في الجنينه عنده
وفرحتهم او مادخلوا بيها
ايوة اصل بناتي او اطفال الاحفاد اللي همه انا
بعد كده اي حد من الاحفاد يجيب اطفال
ويتمرجحوا عليها بيتقال لهم دي مرجيحة بنات شمس
:))
المرجيحة موجودة لحد النهاردة بس اللي عملها مش موجود
اييييييييييييه دنيا
بتعرف تسرق الفرحة صح
كل سنة وانتم طيبين
واللي يقدر يتجمع مع اهله وناسه يجري يتجمع معاهم
قبل ماالفراق يلعب لعبته معاكم 

الأحد، 5 مايو 2013

احساس رهيب

كنا في انتظار استلام تقرير
 في استقبال مستشفي استثماري كبير 
وعلشان الناس ماتزهقش من الانتظار  
مشغلين تليفزيون علي قناة اغاني 
وكان في اغنيه اول مرة اسمعها 
واتضح انها قديمة حبتين تلاته 
مش ده المهم المهم كلمات الاغنيه رهيبه 
ايه ده شعور غريب اوي اللي بتتكلم عليه الاغنيه 
ده انا كده لو مش عيانه خلاص عييت ياجماعه 
بجد المغني صعب عليا الكلمات واللحن غم
شعور صعب ومميت انك تحب وتعطي وتتعذب وترجع حزين وماحدش حاسس بيك
مافيش ذوق خالص كل اللي قاعدين يامرضي يااهلهم مستنين يعرفوا حبايبهم عندهم ايه
نقوم نشغل لهم الفراق والموت تصدقوا لحد دلوقتي مش مصدقه
ولما قلت للممرضه اللي علي الكاونتر يابنتي اقلبي الاغنيه دي قالت لي دلوقتي تخلص
قلت لها بعد ماتكون خلصت علي اللي قاعدين
ولا حول ولا قوة الابالله 
يابنتي لكل مقام مقال
مابقاش في ذوق خاااااالص
الناس مشاعرها اندهست 

الخميس، 2 مايو 2013

اه يامرارتي وشم النسيم :)

موضة كل سنة 
كل مايقرب شم النسيم تلاقي اللي يقولك 
ده حراااااااااااام
سوري بقا
حرمة عليك عيشتك منك له
هو مش لما الرسول صل الله عليه وسلم 
وجد يهود المدينة صايمين 
بيحتفلوا
في عاشورة قال نحن اولي بموسي منهم
وقال صوموا وخالفوهم 
يعني نصوم تسعة وعشرة او حتي ياسيدي عشرة وحداشر
جميل حد هيقول لي ومال ده ومال ده ياشمس
هقوله ماتستعجلش علي رزقك
طيب جميل
مش ربنا لما بعت موسي لفرعون يهديه ويطلب منه بني اسرائيل
قاله انت مجنون وساحر واداه موعد ليوم الزينة
اوباااااااااا
اربط هنا
مش يوم الزينة ده 
من ايااااااام اجددنا الفراعنة 

ولا مصيبه مايكونوش كمان طلعوا اجددنا
ماعلينا
مش من ايام الناس الكوووومل دول 
بتوع الحضارة والحركات
ومصر ام الدنيا بتحتفل بشم النسيم ده
اللي اصلا اختراع الفسيخ ده 
اخترااااااااااااع 
يستحق عليه الولد الفرعون اللي قال وجدتها وفسخ الفسيخ
جايزة نوبل للطعام الرائع
طيب  المهم
فرعون جمع شوية السحرة بتوعه علي سيدنا موسي
وسيدنا موسي في الاول خاف 
بس ربنا ثبته وقاله لاتخف انت الاقوي
مااطولش عليكم
سيدنا موسي كسب طبعا 
اووووم اييييه 
السحره خروا سجدا لله وامنوا برب العالمين 
وكذلك كتير من الناس
وفرعون وهامان طقوا من الغيظ
دي نصرة ولا مش نصرة
مش بنصر الله يفرح المؤمنين
طيب ادي عيد من زماااااااااااااان 
وكمان ربنا عمل فيه نصرة لنبيه موسي
مال ده بقا ومال الشرك بالله واليعاذوا بالله
حرام عليكم زهقتونا
المصرين هيحتفلوا بكل حاجة بقالهم الالف السنين بيحتفلوا بيها
 وهيحتفلوا بالمواسم
والاعياد الدينيه والاجتماعيه 
من اول عيد الحب الي عيد الام الي عيد ابو الفصاد
وحلوا عننا الله يرضي عليكم
سيبوا الناس تنبسط وتفرفش
الا المصرين مشهورين ان ماعندهمش خلق للي يخنق عليهم
وكل سنة وكل حبايبنا المسيحين بخير وسعادة 
وكمان كل سنة وكل المصرين بخير وسعادة
وشم نسيم سعيد وياريت لما تاكلوا الفسيخ كلوه زي ماالفراعنه كانوا بياكلوه وانتوا مش هتتعبوا
اطلاااااااااقا