الخميس، 2 مايو، 2013

اه يامرارتي وشم النسيم :)

موضة كل سنة 
كل مايقرب شم النسيم تلاقي اللي يقولك 
ده حراااااااااااام
سوري بقا
حرمة عليك عيشتك منك له
هو مش لما الرسول صل الله عليه وسلم 
وجد يهود المدينة صايمين 
بيحتفلوا
في عاشورة قال نحن اولي بموسي منهم
وقال صوموا وخالفوهم 
يعني نصوم تسعة وعشرة او حتي ياسيدي عشرة وحداشر
جميل حد هيقول لي ومال ده ومال ده ياشمس
هقوله ماتستعجلش علي رزقك
طيب جميل
مش ربنا لما بعت موسي لفرعون يهديه ويطلب منه بني اسرائيل
قاله انت مجنون وساحر واداه موعد ليوم الزينة
اوباااااااااا
اربط هنا
مش يوم الزينة ده 
من ايااااااام اجددنا الفراعنة 

ولا مصيبه مايكونوش كمان طلعوا اجددنا
ماعلينا
مش من ايام الناس الكوووومل دول 
بتوع الحضارة والحركات
ومصر ام الدنيا بتحتفل بشم النسيم ده
اللي اصلا اختراع الفسيخ ده 
اخترااااااااااااع 
يستحق عليه الولد الفرعون اللي قال وجدتها وفسخ الفسيخ
جايزة نوبل للطعام الرائع
طيب  المهم
فرعون جمع شوية السحرة بتوعه علي سيدنا موسي
وسيدنا موسي في الاول خاف 
بس ربنا ثبته وقاله لاتخف انت الاقوي
مااطولش عليكم
سيدنا موسي كسب طبعا 
اووووم اييييه 
السحره خروا سجدا لله وامنوا برب العالمين 
وكذلك كتير من الناس
وفرعون وهامان طقوا من الغيظ
دي نصرة ولا مش نصرة
مش بنصر الله يفرح المؤمنين
طيب ادي عيد من زماااااااااااااان 
وكمان ربنا عمل فيه نصرة لنبيه موسي
مال ده بقا ومال الشرك بالله واليعاذوا بالله
حرام عليكم زهقتونا
المصرين هيحتفلوا بكل حاجة بقالهم الالف السنين بيحتفلوا بيها
 وهيحتفلوا بالمواسم
والاعياد الدينيه والاجتماعيه 
من اول عيد الحب الي عيد الام الي عيد ابو الفصاد
وحلوا عننا الله يرضي عليكم
سيبوا الناس تنبسط وتفرفش
الا المصرين مشهورين ان ماعندهمش خلق للي يخنق عليهم
وكل سنة وكل حبايبنا المسيحين بخير وسعادة 
وكمان كل سنة وكل المصرين بخير وسعادة
وشم نسيم سعيد وياريت لما تاكلوا الفسيخ كلوه زي ماالفراعنه كانوا بياكلوه وانتوا مش هتتعبوا
اطلاااااااااقا  


هناك 23 تعليقًا:

مصطفى سيف الدين يقول...

اول مرة اخد لبالي ان يوم الزينة هو نفسه شم النسيم

معرفش ان كنتي متأكدة من المعلومة دي و لا لاء

بس اصلا بعيدا عن ده كله ايه المشكلة لما نفرح؟ لما نبتهج نضحك و كده
ده مش معناه اننا بنخالف الاسلام في حاجة
الاسلام مقالناش متاكلوش فسيخ و منهناشعن تلوين البيض و لا قالنا متفرحوش و لا تخرجوا تتفسحوا

عيب التشدد هو التضييق
يعني اهدم التماثيل و المعابد طيب هو في حد بيعبدها دلوقت؟ مش مهم بس تهدمها

العقل بيتحط في التلاجة دايما عندنا رغم اصلا ان ربنا عرفوه بالعقل قبل النقل

رؤى عليوة يقول...

ههههههههههه
شوفى يقولوا كل سنة
بس اصلا احنا مش بنحتفل احنا بس ييدوب بناكل كام اكله


يعنى انا بعتبر اليوم ده زى يوم السبت والاربع عندنا لازم ناكل سمك كده يعنى

بس الناس بقى اللى بتزودها لدرجة العيد يعنى هما دول اللى ناخد عليهم شوية

بس عموما اللى بيتكلم براحته واللى يحتفل براحته وفى النهاية كل واحد بيعمل اللى هو عايزة


دمت بخير

Gamal Abu El-ezz يقول...

يااااااااااااجامد
أيوه كده قولى رايك بصراحه الواحد اتخنق من فوبيا الفتاوى الى ظهرت وللأسف معظمهم لا مشايخ ولا حاجه لمجرد انه ربى دقنه وصاحب واحد شيخ بقى شيخ . زى الى أول مظهر كان بيفسر الأحلام ودلوقتى بيصدر فتاوى حتى فى تفسير الأحلام كان فاشل


كل سنة وأنتى طيبه

P A S H A يقول...


نصره دي ولا مش نصره يا متعلمين يا بتوع المدارس ؟؟
نصره يا أبلة :)

عجبتني أوي حكاية اللي فسخ الفسيخ دي .. على كده اللي بنى مصر كان ف الأصل فسخاني :)

نجيب يعني حزمتين البصل وإزازتين الساقع (اللي من العزومة اللي فاتت) ونيجي أنا والمدام والعيال ؟؟
D:

سؤال يا أستاذتنا بالمناسبة : هو لسه فيه ملانة ؟؟

كل سنة وكلنا طيبين احنا وكل شمامين النسيم :)

شمس النهار يقول...

*مصطفي سيف الدين

ايوة ياقناوي
يوم الزينة هو هو بعينه بفسيخه ببصله بليمونه :))

ادخل علي جوجل وانت عتلاقي كل حاجة:)
بس انا عارفه الكلام ده من ايااااااام الكلية
انت عارف اصل الفنون كلها في مصر الفراعنة
وانت فاهم انهم عايزينه نفرح!!!
لأ طبعا همه عايزينا مغيبين بس بطريقة تانيه غير الطريقة اللي غيبنا بيها قبل كده الموضوع المره دي مبتكر حبتين
عايزين الشعب يغرق في التدين حد يكره
ماتعملش حاجة غير انك تتعبد مش ربنا قال كده وماخلقت الجن والانس الا ليعبدون ونسيوا ان العمل عبادة وكل شئ بيتعمل في حياتنا عبادة مش بس انك تقعد في الجامع
اما موضوع التماثيل ده انا تكلمت فيه كتير
الصحابه اللي همه يعني
مادخلوش بلد وهدوا فيها التماثيل
او همه بقا اللي اصلا طالبي دنيا عايزين يهدوها:)
وبعدين انت بتتكلم عن العقل اللي ربنا حثنا في مواقع كتير من الرقا علي اعماله!!
دول مبرمجين من اللي اعلي منهم
تصدق انا حاسة ان دي مافيا بس مبتكره حبتين:)

شمس النهار يقول...

*رؤي عليوة

المسميات مش مشكلة
المهم ان الناس تتجمع
انتي عارفة ان اسر لاتجتمع الا في المواسم والاعياد
يعني لايصلوا رحمهم الا في الحالات دي
دول بقا انا عايزة اعمل لهم كل شهر عيد علشان يصلوا رحمهم اللي هو من اخطر الاشياء
واللي لو خلصتي السراط بنجاح بيشد من علي نقطة النهاية لمن قطعه
الدين دين الوسطيه وليس التشدد
وخالوا الناس تنبسط هو هيبقا من كله
:))
يارب ايامك كلها اعياد يارب

شمس النهار يقول...

* Gamal Abu El-ezz

لأ ماتخافش عليا خالص
تصفح المدونة هتلاقي راي بقوله بصراحه شديدة ناعمه

بالرغم ان فاروق حسني زوووومل بس دخلت قلت راي بصراحه في معره الاخير

مش واخدين حاجه من الدنيا الا الصراحه
والشيخ اياه ده اللي كان بيفسر الاحلام وبعد كده بقا يفتي هو اصلا خريج ازهر بس مش عارفه ايه وداه للأحلام:))
ودلوقتي فارق الشعريتين اللي حيلته بعد ماكان جايبهم علي قدام والبدل اييه مااقولكش
كل سنة وانت طيب

شمس النهار يقول...

* P A S H A

نصرة والله العظيم نصرة ياباشا
:))

يادي قزازتين الحاجة الساقعه دول:))
انت واثق انهم لسه موجودين:))

تعالي تنورونا وياسين يلعب مع حفيدي نور الدين :)

طبعا في مالانة المصرين مايتخلوش عن الكلام ده ابداااااا
ولسه الناس بتعمل ترمس وحمص وكله
اوعي تصدق ان ممكن المصرين يتخلوا عن حاجة بيحبوها وتوارثوها يعني مابطلناش نحتفل مع دخول المسيحية مصر ولا مع الفتح الاسلامي هنبطل مع الفتح اللي مايعلم بيه الا ربنا ده

ياباشا قول يابااااااااسط:)
وكل سنة وانت طيب:)

ذو النون المصري يقول...

للسنة الرابعة علي التوالي اكون محروم من الاحتفال باعياد الربيع في مصر
كل عام و الجميع بخير

well يقول...

شمس ..
...
قاالك فرفشة يوميا ما تأجلهاش للغد..
والله الاسبوع اللى فات كنت بتكلم مع جماعة من سوريا على شم النسيم وراح ناطط واحد وقال ده حرام عشان كذا وكذا .. اقوله يابنى ده اليوم ده بتاع يوم الزينا بتاع سيدنا موسى عليه السلام .. لكن اللى انطبع فى الدماغ خلاص انطبع
عارفة انا بحمد ربنا انى كان معايا زمان استاذ على قدر من العلم(الله يرحمه) لما سألته عن شم النسيم عرفنى هو اى وكنت واثق فى اجابته ... الغريبة بقى ان من بعد اكتر من 16 سنة او حاجة زى كدة .. انتى الوحيدة اللى اكديلى المعلومة ...
..
تحياتى

الوردة البيضا يقول...

سلامة مرارتك يا شمس النهار
والله كلامك كله في الجول، جاي في وقته تمام
متشكرة جدا على زيارتك ليا بعد رجوعي لمدونتي اللي كانت وحشاني جدا...كل سنة وانت طيبة بمناسبة شم النسيم، وأتمنى ان المصريين كلهم ما يسيبوش حد يلعب في دماغهم بالفتاوى الحمضانة اللي بتطلع كل شوية دي
أحب كمان اقول كل سنة وانتم طيبين لكل زوار صفحتك الكرام، ولكل أخواتنا المسيحيين عيد قيامة سعيد عليهم يا رب
تحياتي وسلامي
علا سمير الشربيني (الوردة البيضا)

ابراهيم رزق يقول...

شمس الشموس


هههههههههههههههههههههههه
دول عندهم فوبيا من كلمة عيد
تقريبا كل عيد عندهم حرام

عيد الميلاد عيد شم النسيم ده حتى المولد النبوى حرموا حلاوة المولد يا شموسة

تحياتى

re7ab.sale7 يقول...

ولا يهمني اي حاجة
اينعم انا مش بحب الفسيخ ولا البيض ولا البصل
بس هحتفل واروح ع البحر :)

شمس النهار يقول...

*ذو النون المصري

كل سنة وانت طيب ولا يهمك ان شاء الله الاعياد الجايه كتير وتحتفل في بلدك وسط اهلك بكل حاجة جميلة

شمس النهار يقول...

*well
كل سنة وانت طيب

واحب اطمنك ان المعلومة سليمة جداااا

واطمنك ان المصرين مش هيبطلوا يحتفلوا بشم النسيم ابداااا

تصدق كنت في عمره ووافق شم النسيم وجودنا بمكة ان المصرين دوروا علي الرنجة علشان يحتفلوا :))

شمس النهار يقول...

*الوردة البيضا

اهلا بيكي بلوجر نور

ومبسوطة انك رجعتي الحمد لله

ولاتقلقي زي ماقلت لويل المصرين مش هيبطلوا اي حاجة بيحبوها
بزمتك من الااااااف السنين بيحتفلوا يبقا هيبطلواازاي بقا

كل سنة وانتي طيبة وبخير

شمس النهار يقول...

*ابراهيم رزق

تفتكر يعني المصرين ممكن يبطلوا يشموا النسيم
ده بيشموه من الاف السنين هيبطلوا دلوقتي
واحدة فرنساوية كانت في مصر ووافق شم النسيم وكنا عاملين وليمه فسيخ وملوحه ورنجة وسردين علي جنب
والباقي ملوخية وورق عنب الي اخر الاكلات المصرية المرعبة دي
اولا هي اتخضت من منظر الاربع ترابيزات المرصوصين ورا بعض في فيلا احد اقاربنا وبعدين سابت ده كله وراحت لركن الفسيخ واخواته وقالت ايه ده مش معقول هتكلواازاي ده انت حياتكم غريبه
واحدة ادتها لقمة وقالت لها طيب دوقي ده ده كافيار اكلته وعينك ماتشوف الا النور اخدت غطس في الفسيخ ولا جرلها حاجة بقينا نقول دي هتفطس اهي عايشة لحد النهاردة زي الجن وبتيجي مصر مخصوص للفسيخ :)
كل سنة وانت طيب:)

شمس النهار يقول...

* re7ab.sale7

وماله كل واحد يحتفل زي ماهو عايز
:))

بس ولا حتي رنجة :))

كل سنة وانتي طيبة:))

Aya Mohamed يقول...

عن نفسى بحب يوم شم ا لنسيم جدا
وبعدين احنا بناكل مش بنعمل اى طقوس مخالفة لدينا
المهم بقى كل شم نسيم وانتى مبتهجة :)

salwa abdelhalim يقول...

معلومه جديده ليا ان يوم شم النسيم هو يوم الزينه فعلا شكرا ليكي
بس لو قعدنا نسمع لكلام الناس مش هنعمل حاجه ولا هنحس بفرحه اي عيد
هــاابي شم النسيم
تدوينه راائعه
تحياتي

شمس النهار يقول...

* Aya Mohamed

صح ياايه احنا بننبسط ونتجمع وناكل
والاطفال بتلون البيض
واضح انهم عايزين يحرمونا من ابسط الاشياء اللي بتفرحنا
كل سنة وانتي طيبة

شمس النهار يقول...

* salwa abdelhalim

:))
يعني عمالين يقولوا حرام
حد سمع كلامهم:))
الناس بتحتفل بالمواسم والاعياد وبناكل حلاوة المولد وبنشم النسيم برضوا
:))
كل سنة وانتم طيبين
:))

Bent Men ElZman Da !! يقول...

أول مره أعرف يوم الزينة ده
بس كان فى زمايل ليا بيقلولى أصل لما سيدنا محمد مات الكفار شموا نفسهم وعلى عشان كده عملوا شم النسيم !!
ده بقى قمة الجهل أكتر من انى مش عارفة يوم الزينة :D

كل سم نسيم وأنتى مبسوطة يارب :))