الاثنين، 6 مايو، 2013

كل سنة :)

كل سنة وانتوا واحنا 
طيبين اوي زي مااحنا
 والسنة اللي جاية احلي
:))
دي اغنية لصفاء ابو السعود علي فكرة
افتقد جداااا اليوم 
شم النسيم
افتقد التحضيرات المسبقه من امي ودادة
تلاقي المطبخ بقا فيه سلاطين كتييير 
من قبلها بكام يوم
سلطانيه منقوع فيها الترمس
وتانيه للحمص
وتلاته فيها حلبة منبته
الي اخر حركات شم النسيم
وقبلها بيوم يجي بقا الزغلول الكبير الفسيخ والرنجة
وكان زمااااااان اوي بقا 
في حاجة اسمها سمك البكلاه 
وده سمك ناشف مقدد كده بيجي من فرنسا
بيتنقع في الميه ينفش ويتقلي
افتقد اللمة بتاعة العيلة عند عمتي الكبيرة 
وصف التربيزاة اللي محطوطة ورا بعض في حديقة فيلتها
وكل واحد جاي ومعاه حاجات ومحتاجات
ده غير اللي عملاه عمتي الله يرحمها هي وجوزها 
وكم الناس الهائل اللي متجمع
النهاردة الذكريات عاملة عليا حفلة
80% من الناس دي بقواالله يرحمهم 
والدنيا لهت الباقي 
ولا حول ولا قوة الابالله
اديني مطلعه الصور
 وبتفرج علي فيديو من سنييييييييييين 
اول مااخترعوا كاميرا الفديو
:)
وبفتكر جوز عمتي لما سهر علي ايد الحداد علشان يركب مرجيحه لبناتي في الجنينه عنده
وفرحتهم او مادخلوا بيها
ايوة اصل بناتي او اطفال الاحفاد اللي همه انا
بعد كده اي حد من الاحفاد يجيب اطفال
ويتمرجحوا عليها بيتقال لهم دي مرجيحة بنات شمس
:))
المرجيحة موجودة لحد النهاردة بس اللي عملها مش موجود
اييييييييييييه دنيا
بتعرف تسرق الفرحة صح
كل سنة وانتم طيبين
واللي يقدر يتجمع مع اهله وناسه يجري يتجمع معاهم
قبل ماالفراق يلعب لعبته معاكم 

هناك 18 تعليقًا:

ابراهيم رزق يقول...

شمس الشموس

يا بدع الورد يا جمال الورد
من سحر الوصف قالو على الخدّ الورد يا جمالو
الأحمر من بدعو ورد وهيام ألطف يا لطيف
والأصفر من ريحته غيره وآلام ارحم يا رقيق
والأبيض داه العفّة ريحة وغرام أقطف يا شاريه
رسول العشّاق جميل المشتاق
الورد الورد يا جماله
نادي وردك يا خولي
اوع يجرحك شوكه واسهر عليه
داه بحبّك يا هايم أحسن يألمك شوقه
واعطف عليه
هادي حبّك يا عاشق وردك ينعشك
وقبّل إديه
رسول العشّاق جميل المشتاق

كل سنة و انتى شمس و سما و نور

فعلا معاكى كل الحق
يا بختك بتقدرى تتفرجى على شرائط الفيديو

انا مش بقدر

تحياتى

Ramy يقول...

((:

يا شم النسيم

((:

كل سنة و حضرتك طيب و سعيدة يارب

الذكريااااات

كم هى جميلة و عظيمة

تنهيدة كبيييرة

الازهرى يقول...

كل سنة
وإنت وإحنا
مجموعين
والفرحة أحلى

من القلوب
وللقلوب
والقعدة تحلى

ابتسامة
وضحكة أحلى
والنسيم
فى الصحبة يحلى

:)

كل لحظة وهى أحلى

Gamal Abu El-ezz يقول...

شمس النهار

قد ايه الذكريات القديمة بتكون جميله إنتى فكرتينى بموضوع كنت كاتبه على مدونتى اسمه جميله هى أنا حاسس إنى بقرأ الموضوع ده بس بصورته الحيه قد ايه الذكريات بتكون جميله ولكن انشغال الناس بالحياه قد يخفف من تلك الذكريات وكل مالوقت بيتقدم الحاجات الإجتماعيه بتقل وأنا طفل العيد كان الناس بيحتفلوا بيه اربع ايام متواصله دلوقتى بقى يوم أو اتنين وبعد كده الله أعلم هيحتفلوا بيه ولا لا


تحياتى لكى وكل سنة وأنتى طيبه وبصحة جيدة

Tarkieb يقول...

كل شم نسيم وفسيخ وانت طيبة...السمك البكلاة كان عى ايامنا غالي ولما كبرنا وقدرنا على تمنه اختفى هههههههه

Foxology يقول...

فعلا معاكِ حق .. زمان كنا بنحس بطعم اللمة الكبيرة في أى بيت من بيوت العيلة لكن دلوقتي مش عارف بقينا ليه مشغولين أوى كدة ومتفرقين أوى كدة.

كل سنة وانتى بخير

asmaa fathy يقول...

كـــل سنة وأنت بخير وسعادة يا شموسة
وكل مدونين بلوجر بود وحب وسعادة
معلش الدنيا مش بتدوم علي حال
ولا بتمشي على نفس الريتم
كل يوم بنشوف ناس وبنفارق ناس وفي الآخر بيفضلنا شوية ذكريات من ناس :)

تحيــــــــــاتي
كانت هنا ورحلت
Asmaa Fathy

P A S H A يقول...

ياه على الذكريات الحلوة الجميلة :))
ربنا يبارك في حضرتك وفي بناتك وأحفادك وتتجمعوا دايماً في الفرح إن شاء الله

:))

ما رضيتش أجيب إزازتين الحاجة الساقعة معايا المرة دي ، قلت أكيد انتوا عندكوا ، جبتلكوا بطيخة :))
عاوزين بس حد يخطف رجله لحد تركيا يجيب لنا بربع جنيه جبنة إسطمبولي على ما الدور ييجي عليا في طابور العيش :))

كل سنة وحضرتك والأسرة وكل الناس بخير وفرحة وسعادة :))

Bent Men ElZman Da !! يقول...

كل سنة وأنتى قلبك أبيض زى ما أنتى :)

شمس النهار يقول...

*ابراهيم رزق

كل سنة وانت طيب

عادي ياابراهيم اي شريط فيديو وديه لأي حد بتاع كمبيوتر هيحوله لسي دي

شمس النهار يقول...

* Ramy
كل سنة وانت طيب

كل مابيتقدم بينا العمر مابيبقاش فاضل مننا الا شوية ذكريات
:)

شمس النهار يقول...

*الازهري

كل سنة وانت طيب
وبخير وصحة وسعادة


وربنا يتم شفاك علي خير

شمس النهار يقول...

*Gamal Abu El-ezz

في ناس بتعيش علي الذكريات

وفي ناس ولا تفتكر حاجة اصلا

:))

والحياة بقت واخدة الناس حتي الاحتفال بقا شكله مختلف
كان الاول الاعياد بيحتفل بيها في وسط العيلة كلها
دلوقتي العيد الناس بتحتفل بيه بالسفر

شمس النهار يقول...

* Tarkieb
:))
مافاتكش كتير هو طعمه مش حلو اصلا
:))

كل سنة وانت طيب :)

شمس النهار يقول...

* Foxology

كلامك صح
بس لو حطينا في دمغنا نتلم هنتلم

في ناس بتخاف تتلم دلوقتي من الحسد :)

كل سنة وانت طيب:)

شمس النهار يقول...

* asmaa fathy

هي دي الدنيا
مبنيه علي الفراق

كل سنة وانتي طيبة ياجميلة

شمس النهار يقول...

* P A S H A

وااااااو
انت هتغدينا جبنة وبطيخ :))

بس يعني لازم المستورد وعقدة الخواجة

ماالجبنة الاسطنبولي عند عم محمد البقال اهي ماليه الدكان
هات معاك تمن وانت جاي ده لو فيك لسه نفس من طابور العيش:)

بس كان لازم تعمل حسابك تقف في طابور العيش من قبل شم النسيم بيومين تلاته
علي حساب مين العطلة دي:))

كل سنة وانت طيب وفرحان بياسين:)

شمس النهار يقول...

* Bent Men ElZman Da !!

كل سنة وانت غالية وحبيبة

ومحققه كل اللي تتمنيه:)