الخميس، 31 ديسمبر 2009

تحديث للتحديث هاااااااام جدا 2009 بالسلامه

ده لينك شمس ودفا في رؤية وماتستغربوش
ده لينك مطلقات راديو
هيبتدي علي الهواء النهارده الساعه 6 مساء
مبررررررروك يامحاسن الف مبروك

اخيرا خلصتي يا

2009

ده انتي عملتي فيه عمايل يا شيخه

كل ماافرح اوي وابقي طايره من الفرحه

يصعب عليكي

وماترتاااااحيش غير لما تشوفي دمعتي علي خدي

في عز الفرح عز الحزن

ولولا كرم ربنا علي عبيده

كان زماني في خبر كان

مع ان 2008 كانت برقبتك

ان شاء الله ربنا يكرمنا في 2010

ونصلح كل اخطائنا في 2009 ونرميها وراء ضهرنا

دة حتي 2010 شكلها شيك كده في الكتابه

ان شاء الله سنه حلوه علينا كلنا

ونحقق كل احلامنا وأشوفكم واسمع عنكم كل خير

اما الاغنية الجميلة جدا دي اهداء من صبرني يارب بعد ماهددتها :)

انها لازم تبعتها

كل سنه وانتم طيبين وبخير وصحه وسعاده ان شاء الله


السبت، 26 ديسمبر 2009

اناااااااااااجيت اهو :(



السلام علي من اتبع الهدي

كل سنه وانتم طيبين علي الراسين راس السنة الهجريه

و راس السنة الميلاديه

وماتنسوش صيام عاشوره

************

الحقيقة انا كنت ناويه ماارجعش المدونه ابدا بتاتا البتههههههه

دلوقتي علشان كنت عايزه ارجع لمااروق وافضي تماما وده

لأسباب كتير جدا جدا

اولا انا كنت تعبانه طول شهر رمضان طبعا كلكم عارفين وخصوصا المركزين معايا وبيحسبوا خطواتي علي المدونه
اني راجعه من رحله شاقه قبل رمضان بأسبوع وكنت جايه من امريكا عيانه اصلا وجه رمضان كله تعبانه وسفر دهب في العيد مشوار مش سهل والتعب مع بعض المشاكل العائليه كنت نفسيا مش قد كده
ماركزتش اوي مع التدوين علشان انا بحب اكون في مدونتي كويسه مش اي كلام

اوم ايييييييييييه

في ناس عارفه نفسها كويس جدا كانوا عاملين حبايبي واتكلموا علي كلام بايخ
في ناس عارفه نفسها كويس هوايتهم الكلمات المتقاطعة والسلم والتعبان كانوا مركزين معايا جدا و انا بتعامل من منطلق حسن النيه وكلكم اخواتي واولادي طبعا ما هو انا اكبر سن في البلوجر يبقي اي رجل او ست او شاب او بنت في البلوجر ابني
او بنتي ينفع الام يتعمل فيها كده من اولادها ؟

في ناس عارفه نفسها كويس جدا كانوا عاملين سيرتي علي الشات هوايتهم وهمه اصغر اصلا من اصغر بناتي
في شخصيه هي عارفه نفسها كويس جدا الحقيقة كنت تعباها جدا واضح لدرجة انها تعمل لي ميل مخصوص علشان تبعت لي ميلات كلها شتيمه يعاقب عليها القانون

وشخصيه اخري هي عارفه نفسها كويس جدا

اكثر تركيز معايا وفهلويه اكتر منهم في الازيه والكلام علي الناس

بعتت لي رساله من نمره مجهوله علي الموبايل

رساله هبله جدا ولله الامر من قبل ومن بعد!!!!!!!

كل السابق ذكرهم انا بشكرهم جدا وبشده و حرارة ليييييييه ؟
علشان ادوني حسنات كتير جدا جدا ماكنتش احلم
بيها
وبدعي لهم ربنا يهديهم ويشفيهم

يعني هو الموضوع كده هي بقت الدنيا كده ......؟

عامله انا المدونه علشان في السن ده يتعمل معايا كده ده تدوين و لا وجع دماغ ؟
بلاها تدوين ...ياللي اعتبرتكم اهلي وناسي واولادي

وبجد ماكنش ليه نفس ادخل المدونه

وكنت حزينه جدا

وبجد دورت علي اغنية وردة بتاعت كل يوم قاعدين في بيتنا ويطلعوا يجيبوا في سيرتنا

اه اسمها اولالالاااااااد......الحلال

بس يخساره مالاقيتهاش

كان نفسي اهديهالهم

نتقابل بقي يوم القيامه

*****

ولكن!!!!!!!!!!!!!!!!!!!!!!!!!!!!!

*****

ندخل في الموضوع :)

لا... ماهو مش ده الموضوع اصلا دي حاجه كده علي الهامش بس

ايه بقي الموضوع اللي خلاني ارجع تاني يااخوانيييييييييييي

من خلال انضمامي لأسرة

مجلة رؤيه

كان بيوصلني ميلات عن اللي بيحصل علي النت من تجاوزات كتير

ومشاكل

وفي بنوته طلبت مني اعمل

نداء

وقد كان وبعد النداء كأني قلت هجوووووووم لاقيت اكتر من بوست مهم جدا بيتكلم عن الموضوع ده

ويوميات شاب فقري عامل البوست ده

وحاكي فيه الحكايه اللي اتبعتت لي علي ميل المجله

وكان قبله صبرني يارب عامله البوست ده

قلت لا لا لا

مابدهاش ياشمس دي لازم حمله بقي الناس تعرف يعني ايه نت واحترام الاخر علي النت
عايزين نت نظيف شفاف
مش كل من بقي عنده جهاز كمبيوتر نص كم وبيعرف يكتب ومريض نفسي ينتحل شخصيه مش بتاعته ويدخل يلعب علي خلق الله
انطلاق الحمله من هنا

وفي انتظار البانر بتاع الحمله

ياريت كل اللي عايز يكتب حاجه يكتبها عنده في المدونه او يبعتها تنشر في

مجلة رؤية .

ودي الشراره الاولي

و نتصدي كلنا للهبل الي بيحصل ده

لسه البوست ماخلصش

مستعجلين و لا حاجة ماانا ليه تلات شهور بالتمام والكمال (طبعا المركزين معيا عارفين) مانزلتش بوست حقي بقي ارغي مره من نفسي :)

عايزه اشكر شيكو حبيبتي اللي ماسبتنيش يوم من غير سؤال وكانت معايا في كل حاجه :)

وكانت متابعه اخباري اول باول زي مامتي

وكمان كيمو ابني اللي اصر ان اول بوست لهنرسم وطن تكون ماما شمس الي كتباه

واللي كان علي طول بيكلمني في الموبايل

وان شاء الله هرد علي حبايبي الي علقوا علي البوست هناك

وبشكر مولان بنوتي اللطيفه علي

تليفونتها و سؤالها علي

والبوست النداء الي اثر في جدا

وكمان ابني الرحاله ازهري اللي كان بيطمن عليا ويطمني عليه رغم ترحاله

وتليفونه المغلق الا علي ماما شمس

ومنمينو الانسان الجميل اللي خلصت له كارت الموبايل في مكالمه بس هعمل ايه الحوار معاه كان رائع و

قعدنا نرغي كأني اعرفه من زمان

ودودو عاشقة الرومانسيه وتليفونتها الجميله

وورد شان ورسائلها الرائعه وتليفونها اللي فرحني جدا

وبنوتي سالي(عاشقه وغلبانه) اللي تليفونها وكلامنا مع بعض اسعدني جدا جدا

وبشكر روفي علي ميلاتها وان شاء الله نتقابل

وطوبه فضه وطوبه دهب اللي دخلت المدونه تسأل عليا

واحمد (رومنسي) وطبعا ابني ابراهيم (كأني اتكلم)اللي فشل اني اشوفه مرتين

بس كنا بنتكلم الحمد لله:)

وبشكر داليا(قوس قزح) وابي انهم تعبوا وعدوا عليه واخدوا بنفسهم البؤجه اللي سابوا نصها ولمارجعت البيت شديت شعري منهم ومن بنتي الكبيره بس معلش البنت ماكانتش نايمه كويس وكانت تعبانه

وكيمت الي سألت شيكو عليا

وبعتذر لمصطفي ريان كان نفسي فعلا احضر التوقيع بس انا قلت لك كان في ايه:)

MR.PRESIDEN وابني

وعاشقه القمر اللي سابت لي السؤال في التعليق

وماما اموله شكرا علي اهتمامك وسلامتك الف سلامه

ومنووووووش شكرا يامنوش انا جيت اهو

وبشكر د/عصام (احوال الهوي)علي سؤاله علي في الميل

ومهندس محمد البنا (من غير عنوان)

وطبعاااااااا الحاجه ان شاء الله صبرني يارب اللي اخدت مني خضة عمرها :) ولكن الله سلم بشكرها وبشده

واديني رجعت ياستي ارجعي انتي بقي

وطبعا ميسيز توهااااان محاسن صابر (عايزه اطلق) ربنا مايحرمني من توهانها هي نعمة الصديقه فعلا

واخيرا بشكر عمرو حبشتكنات وكمان بدعي له ربنا يشفيه ان شاء الله ويقوم بالسلامه

وبشكر اي حد سأل عليا ونسيت اكتب اسمه ومبسوطه اني قابلت منمينو وكريم (مطلق) ذو الشخصيه الجميله ربنا يكرمه

ونيجار الجميله اللطيفه وصديقتها الحبوبه

ودعاء(مش عايزه اتجوز والا اطلق والا اعنس ) مش عارفه هي عايزه ايه بالظبط

ذات الصوت الحنون

والله ماشفت غير كده اصلها منقبه ومع ذلك شخصيه متفتحه وعقلها جميل فعلا

:)

والجميله (بلاش فضايح) اللي اتمني اقعد معاها علي رواقه برضه الاجتماع كان زحمه


وبشكر جزيل الشكر الي اتكلموا عليا كلام بايخ

واشتدي ياازمه عرفيني العدو من الحبيب


يانهااااااااار ابيض :)

يااااااااااااااه كل ده بوست معلش بقي كنت محوشاه

اوعوا تنسوا الحمله بتاعت نت نظيف شفاف

علي مجلة رؤية

:)

الاغنيه دي لمدونتي والناس اللي شكرتها فوق واصحابي المخلصين في بلوجر

الوحشين يسدوا ودانهم



الأربعاء، 30 سبتمبر 2009

حملة مستشفي 57357



فكرة حــــــملة" مـــــدونتك هتـــنقذ طفـــــللك "
- اولا اسم الحملة نابع من ان الاطفال الى ان شاء الله هنساعدهم (اطفال مستفى 57357 )زى اطفالنا فواجب علينا نعمل كدة او هنقدم حاجة بسيطة لمساعدتهم وان شاء الله تكون ليها اثر كبير بأذن الله وخير علينا كلنا بأذن الله ومش تفتكروا ان مسعدتكوا دى بسطة لا بالعكس ومش كلامى دة كلام رسولنا العظيم ومعلم البشرية جمعاء :-قال أتى النبي صلى الله عليه وسلم رجل يستحمله فلم يجد عنده ما يتحمله فدله على آخر فحمله فأتى النبي صلى الله عليه وسلم فأخبره فقال إن الدال على الخير كفاعله وفي الباب عن أبي مسعود البدري وبريدة قال أبو عيسى هذا حديث غريب من هذا الوجه من حديث أنس عن النبي صلى الله عليه وسلم ...قوله : ( يستحمله ) أي يطلب منه المركب ( فحمله ) أي أعطاه المركب ( فقال ) أي رسول الله -صلى الله عليه وسلم- ( إن الدال على الخير كفاعله ) لإعانته عليه ، فإن حصل ذلك الخير فله مثل ثوابه ، وإلا فله ثواب دلالته قاله المناوي .

- هنســـــــــــاعدهم ازاى :---
- ان شاء الله الفكرة ببساطة اننا عاوزين كل المدونات الى هتشترك معانا فى الحملة دى هتحط شعار المستشفى واللينك الخاص بالمستشفى على المدونة الخاصة بكل واحد هيشترك بأذن الله معانا وكمان فوق الشعار هتكون كلمة( اتبرع وانت فى بيتك ولو بجنية او دولار من هنا ) والناس الى مبتدئين فى المدونات هشرح لهم بطريقة مختصرة ازاى هيحطوا الصورة واللينك وهى( انكوا تفتحوا صفحة التخطيط فى مدونتكم وبعدين اضافة اداة وبعدين نختار من اضافة اداة اختيار اضافة صورة وبعد كدة لما تفتح نحط فى خانة اسم النموذج الكلام الى اتفقنا علية وهو" اتبرع وانت فى بيتك" وفى خانة وصل هنحط اللينك بتاع موقع مستشفى 57357 والى هو http://www.57357.com/Default.aspx?PageContentID=8&tabid=155
وبعد كدة هنضيف الصورة بتاعة المستشفى وهى موجودة اعلى الموضوع بتاعى فوق وبس وجزاكم الله خيرا ) علشان فية ناس كتيرة متعرفش عن طرق التيرع الى هى كتيرة ومش معروفة وممكن تحقق عائد كبير جداا جداا ومش متركز عليها فى اعلانات التلفزيون والراديو ووسائل الاعلام وهدفنا فى الحملة دى اننا نوضح طرق التبرع المتعددة الى بدورها هتجيب عائد اكبر واكتر لو كل واحد استخدم ولو طريقة واحدة وهو فى بيتة وهقولوكوا نبذة عن طرق التبرع دلوقت :- ....

1 - البنوك :- (ودى متركز عليها كتير فى وسائل الاعلام ومش هنخوض فيها ) .

2 - انترنت الخير (هنركز اكتر عليها ):-يمكنك التبرع من خلال أستخدام ارقام انترنت الخير : 07775757 أو 07075757 بنفس سعر المكالمة العادية كما انه يمكنك حساب صافي قيمة ما تبرعت به بأستخدام عداد الخير ...

3 - التليفون (هنركز اكتر عليها ):- يمكنك الاتصال برقم 1468 أو 2357 من اي تليفون محمول او برقم 09009555 أو 09000957 و التبرع لصالح المستشفى اثناء استماعك للرسالة الصوتية . سعر الدقيقة جنيهان

4- بطاقة الائتمان (هنركز اكتر عليها ):- خدمة جديدة تقوم بها مستشفى 57357 لتسهيل التبرع بالتعاون مع بنك مصر و شركه Verisign العالمية لتأمين المواقع على الانترنت. يمكنك التبرع بأي عملة صدرت بها بطاقتك الائتمانية في أي بلد في العالم بما يعادلها من الدولار و ستقوم مؤسسه فيزا و ماستر كارد بتحويلها إلى دولار .فقط اضغط على اختيار دولار ,فنحن بحاجة إلى العمله الصعبة لتمويل عملية استيراد الأجهزة و المعدات الطبية .

5 - البريد المصرى (هنركز اكتر عليها ):- يمكن التبرع فى اى فرع من فروع مكاتب البريد المصرى لحساب رقم 26386
**** حملتنا على ال facebook ( ودى اهداء من مدونة قطرات ندى . جزاها الله خيرا ) :-
- احب قبل وماكتب لينك الجروب علشان ان شاء الله تشتركوا معانا فية احب اشكر المدونة وربنا يجزيها خير ودة مثال حى للعمل الجماعى و ياريت كمان ياجماعة الى يحب يشارك بعمل شعار للحملة وعندة معرفة بالفوتوشوب ويصمم شعار خاص للحملة يبقى جزاة الله خيرا وربنا يجعل عملة فى ميزان حسناتة ان شاء الله .واليكم لينك الجروب على الفيس بوك :-
**** وبعد ياجماعة ماستعرضنا كل حاجة عن الحملة عاوزين بقى ان شاء الله نبدأ بقى بأذن الله وتكون على خطوتين ان شاء الله :-
1 - ان كل صاحب مدونة او اى حد يقدر يساعد او اى حد يعرف صاحب مدونة يقولة على الموضوع وبعد كدة نحط زى ماتفقنا الصورة الى موجود بالاعلى واللينك زى ماشرحنا عن سابق ... وتخيلوا لو كل مدونة زارها فى اليوم 100 شخص او 200 شخص وضغط على اللينك وعرف طرق التبرع واتبرع تخيلوا الخير الى هيعم شكلة اية يأذن الله تعالى وان شاء الله ربنا هيوفقنا علشان نيتنا خير ان شاء الله وصدقة جارية كمان فى مدونتكوا ان شاء الله.. بقول رسول الله صلى الله عليه و سلم : « إذا ماتَ ابْنُ آدَم انْقَطَع عَملُهُ إلاَّ مِنْ ثَلاثٍ : صَدقَةٍ جارية ، أوْ عِلمٍ يُنْتَفَعُ بِهِ ، أوْ وَلدٍ صالحٍ يدْعُو لَهُ » - رواهُ مسلمٌ .

2 - نحدد يوم نحط الموضوع دة كلة بكامل تفاصيلة على المدونات الى هتشترك معانا فى الحملة ويكون يوم موحد ان شاء الله لكل المدونات وهنعرف اليوم دة من خلال تعليقاتكوا على الموضوع علشان يقرا اكبر عدد وتعم الفايدة والخير علينا كلنا بأذن الله وربنا يكرمكوا يارب ويوفقكوا ويثبتكوا على العمل الصالح وعلى شكرة وحسن وعبادتة اللهم امين ... ومستنى ردود فعلكوا ومشتركين ان شاء الله فى الحملة بأذن الله تعالى وانا واثق ان اهل الخير كتير والمدونات برضوا عددها كبير وان شاء الله الخير قادم بأذن الله ..

والسلام عليكم ورحمة الله وبركاتة ... وكل سنة وانتم طيبن .

الاثنين، 28 سبتمبر 2009

حبيبتي كياااارااا


كل سنه وانت حبيبه وغاليه عليه
وان شاء الله محققه كل احلامك

انت فعلا انسانه جميله و جدعه

كل اللي عايز يقول لكيااااارااااا كل سنه وانت طيبه

يقول هنا

وهنا

الجمعة، 25 سبتمبر 2009

اناااااااا جيت

تحديث:انا هنا شمس ودفا في مجلة رؤية
كل سنه وانتم طيبين
شكرا لكل من زارني في المدونه وعيد عليه
وبعتذر لكل من الوقت لم يسمح لي ان ادخل مدونته واعيد عليه

وبقول لشيكو ماتزعليش مني:(
:)
اما دهب بقا ده موضوع كبير مش هعرف اكتب عنه لكن ممكن اعرض صور

دهب فعلا جميله جدا جدا
بس عايزه عنايه اكتر من كده من كل النواحي فهي تمتلك طبيعه خلابه بس الطبيعه دي عايزه عنايه واخراج يظهر جمال المكان

انا شفت في امريكا مناظر اقل من كده معمول لها خدمات واخراج مخلياها جنه

لو اتعمل نصه في دهب هتبقي تحفه


ودي بعض الصور
دي صورة الجبال في الطريق


ودي صوره لنويبع في الطريق
وده مدخل جميلة الجميلات دهب وهي دهب



ودي صوره للبدو هناك(اللي موضوعهم موضوع)
في سهره جوه الجبل
اللي عل
شان نوصله ركبنا عربيات جيب وبلاد تشلنا وبلاد تحطنا
مع شم الجاز
اللي طالع من الموتور مع ضهرنا اللي اتكسر

وده منظر البحر من علي المركب
ودي محميه من المحميات هناك اسمها(يانهار ابيض نسيت)
:( مش قلت لكم الزهيمر:)

ودي صوره لمحمية نبأ من علي المركب
الحقيقه احلي بكتير


دي صوره للون الماء في المنطقه الجميله دي
تحت السطح اجمل شعب في الدنيا في مناطق بتتشاف كده بالعين
وفي ام
اكن بتتشاف بالغطس الكامل اونصف غطس



ودي صوره لمحمية وادي جني من علي المركب
والجيم عليها فتحه والنون كمان
ودي صوره لوادي جني من علي الشط ساعة ماالشمس جت وراء الجبل فا المنطقه الضوء فيها بقا عامل كده
يعني دي مش س
اعة الغروب ده الجبل من ضخامته عامل ضل كبير جدا علي المنطقه

ودي صوره للجمال علي شاطئ وادي قبر البنت ليه سموه كده مااعرفش اصلا لوحد يعرف يقول علشان لما سألت قالو علشان في بنت مدفونه هنا ليه علشان ايه ماحدش قال حاجه



دي صوره لشاطئ دهب في القريه
دي دهب ياجماعه ايه رئيكم

وفي العوده
رجعنا من طريق تاني خالص اكثر جمال
الطريق في وسط الجبال وا
لمناطق اللي عايش فيها البدو وكل مجموعه متجمعه حوالين بير ماء
ودي صوره للطريق ده








اتمني ان اكون عملت ملخص صغير جدا للرحله علشان انا عملت 875 صوره بس
كل سنه وانتم طيبين

السبت، 19 سبتمبر 2009

عيد جميل




كل سنه وانتم طيبين وبصحه وسعاده

اجازه صغيره كده :)
نروح نشوف دهب


والكلام اللي قاله عنها عمرو حبشتكانات

الثلاثاء، 15 سبتمبر 2009

صدفه

البوست ده صدفه
طلبت مني بنوتي الصغيره اوصلها تجيب حاجه من عند واحده صحبتها
نزلت اوصلها هي طلعت وانا انتظرتها تحت العماره التي تقع في افخم واهم شارع في م نصر الا وهو طريق النصر
العمارات فخمه وتحتها محلات ذات اسماء كبيره وفخمه من الداخل
لفت نظري اتساخ الرصيف وانتشار القمامه الكثيره عليه
قلت اصور المنظر ده وابعته لعمرو حبشتكنات علشان يرفقه بالبوست ده
علشان يعرف ان الفوضي والقمامه في كل حته

صورت الرصيف ورجعت العربيه

بعد لحظه

لاقيت صاحب السوبر ماركت اللي انا راكنه قصاده نده علي ولد من العمال عنده وولد تاني صغير من اللي بيبيعوا المناديل
وفي خمس دقايق نظفوا الرصيف وكنسوه ورشوه وبقا زي الفل

بنتي قالت لي افتكروكي صحافيه والا ايه؟؟
انتم ايه رأيكم

الأحد، 13 سبتمبر 2009

شيكا بيكا

شيكا بيكا هي الدنيا كده شيكا بيكا

الأربعاء، 26 أغسطس 2009

الأربعاء، 19 أغسطس 2009

ادي اخرة الزهايمر

تحديث:
-------
ياريت نقرا القصيده الجميله دي عند روفي
-----------
مساء الخير
النهارده بابص في النتيجه لاقيت النهارده 19 اغسطس فقلت يانهاااااااار ابيض ده كده المدونه تمت سنه بالتمام والكمال واكتر
ماهو تم انشاء هذه المدونه في 8/8/2008
وتم الافتتاح في 12/8/2008
ولما عملت المدونه قلت هاستمر سنه واقيم التجربه واشوف استمر والا لا ؟
الحقيقه ماحستش بالسنه انها جريت كده
يعني انا في وسطكم بقالي سنه
باكتب من قلبي ماهو انا مالييش في الكتابه انا باكتب زي ما باتكلم وبافكر
وبا
شكر المدونه انها عرفتني بناس جميله جدا وحاسه وانا في وسطهم انهم اهلي


كل سنه وكلكم طيبين بمناسبة رمضان
وبشكر كل من سأل عليا وانا مسافره ودخل علق عندي حسستوني انكم مانسيتونيش انا كمان كنت فكراكم وباحاول ازور مدوناتكم كل ما سمح الوقت ساعات كنت باعلق وساعات كان الوقت ما بيسمحش
شكرا ليكم ورمضان كريم

السبت، 15 أغسطس 2009

اخيراااااا جيت :)


انا جيت اسلم كده فى القوام قوام على حبايبى كلهم لحد ما انام لى يومين من السفريه و ارجع ارد على الناس كلها
و نبتدى بقى نشاطنا التدوينى مره اخرى
وحشتووووووونى :)


الخميس، 13 أغسطس 2009

سؤال علي الماشي كده

flowers Pictures, Images and Photos


ازيكم الاول
وطبعا وحشتوني
ان شاء الله راجعه مصر يوم الجمعه 13 اغسطس العصر(جميل)
حيث اني هاخد الطائره الخميس الصبح اللي هو في مصر الخميس بالليل
وبعد رحله لمدة 26 ساعه اصل برضه مصر يوم الجمعه العصر
ازاااااااااي؟
حد يعرف الاجابه :)
قالوا لي اصل انت هتسافري عكس الزمن!!!!!!!!!!!!!

Animated Flowers Pictures, Images and Photos

الثلاثاء، 4 أغسطس 2009

الأربعاء، 22 يوليو 2009

وحشتوني


ازيكم
وحشتوني كلكم
وباعتذر انى ماقدرتش ارد علي تعليقاتكم اللطيفه لضيق الوقت وباشكركم كلكم
بس ان شاء الله لما ارجع هرد عليها في بوست كبير جدا جدا
وليه ماجوبتوش علي الفزوره؟
قليلين جدا اللي ردوا عليها ليه؟
الحمد لله انا بخير وكله تمام امريكا الطبيعه فيها جميله جدا سبحان الله الجمال الرباني في كل مكان
وبصراحه همه محافظين علي النعمه دي
وكل مااروح مكان اقول احنا كمان عندنا حاجات جميله بس مش محافظين عليها مع ان احنا اولي بالحفاظ علي النعمه عشان ديننا بيقول كده
وتذكرت الامام محمد عبده لما رجع من فرنسا وسؤل كيف وجدتها
قال وجدت اسلام بلا مسلمين
العباره دي كنت كل ماافتكرها استغرب جدا ازاي امام كبير كده ويقول كده عليهم
لما جيت هنا عرفت ليه
وعرفت ليه ديننا دين عباده وعمل وسلوك وليه ربنا جعل كل سلوك نعمله له ثواب وعقاب
زي مثلا حق الجار واماطة الاذي عن الطريق وحق الطريق و حاجات كتيره جدا
هم بيعملوها و جعلت بلدهم نظيفه والمرور منتظم رغم ان في ساعات بتبقي زحمه بس في نظام
الناس دي سلوكها كما قال ربنا فبلدهم تقدمت وبقت في العالي في كل شئ
انما الامم الاخلاق
وماحدش يقول لي الاباحيه عندهم ومش عارفه ايه
انا بتكلم عن السلوك العام اللي هو الفعل اللي بنعمله ينصب نتاجه علي الاخر والمجتمع والتقدم واهم حاجه الامانه هنا مابيكدبوش عشان كده فيه ثقه
اما الاباحيه هنا لاتنصب الا علي الشخص نفسه مش علي الاخرين
وامريكا مش ورديه مع البوست ده صورتين لجمال البلد وتقدمها ونظافتها
وصوره لشخص لم يجد الا ان يدهن نفسه بالالوان الضاره عشان يعيش واخري تجمع من الزباله اكلها والصورتين متصورين في اغلي بلد في العالم واحلي بلد في العالم
سان فرنسيسكوا
ايه رأيكم ؟



الخميس، 9 يوليو 2009

ازيكم


ازيكم
الحمد لله انا بخير
وصلت بعد سفر دام 26 ساعه بالظبط
منهم 12 ساعه طيران من القاهره لنيويورك اللي شبه شبرا كتير
وبعد ترانزيت 3 ساعات ونص وكمان الطياره عملت تاخير يعني مافيش حد احسن من حد اهو انا مسافره علي طيران امريكاني!!!
المهم طرنا 6 ساعات تاني ونص ووصلنا سان فرانسيسكو اجمل بقاع العالم مدينه جميله جدا جدا بس طبعا كنت مدروخه جدا ماقدرتش اصور حاجه
اتغدينا فيها ثم كملنا الرحله لسكرامنتو في حوالي ساعه ونص اجمعوا ده كله مع ساعتين في مطار القاهره قبل الاقلاع
بجد رحله متعبه جدا جدا
دي صوره للمكان اللي انا نازله فيه
هحاول انزل لكم صور للبلد بس افوق شويه من المشوار
وحشتوني


flowers Pictures, Images and Photos

الأحد، 5 يوليو 2009

الفوازير ( قبل السفر )


البوست ده (الفوازير)
كتبته في رمضان الماضي وكنا لسه عددنا قليل احب اكرره تاني واتركه ليكم تجاوبوا عليه لحد ما ارجع واهو يبقا مرجع للمدونين حبايبي
*********************************************
في مدونين كتير عاملين اسماء لطيفه

كل واحد يدخل المدونه عندي ياريت

يفك الفزوره بتاعته ويقول ليه اختار

الاسم ده و الصوره دي
**************************
اشوفكم علي خير بعد 39 يوم :)
ويارب الاغنيه تعجبكم



Get this widget Track details eSnips Social DNA

السبت، 27 يونيو 2009

كوستا يامجمع الاحباب


عايزه اشكر عمرو بدر(حبشتكانات) علي كل اللي عمله معايا....... والعزومه الجميله والورد اللي في الصوره دي
والاغنيه الكوري اللي حطها لي في مدونته
*********
واشكر مهندس محمد البنا (من غير عنوان)اللي نورنا من اسكندريه وهديته الجميله تسلم ايده
واشكر بنوتي الحلوه مولان علي الكلام الرقيق المكتوب في كارت الهديه اللي لايقدر بمال
واشكر حوريه (محاسن صابر) ومستر بيرو ابنها علي التورته الجميله(دي غير تورتت عمرو)
بلاش نق لو سمحتوا ايوه تورتتين
واشكر ابني العزيز كيمو(صوت من مصر)اللي عمل نشاط وحيويه للقعده وخصوصا هو وبيرو والفاصل الكوميدي اللي عملوه مع بعض

كمان عايزه اشكر (سويت فيولت)علي التهنئه بجد القاعده كانت نقصاكي فعلا
وحنين القلب وكلامها اللطيف
ومنامينو ومكلمته اللطيفه
وكمان جوكر (شباب اون لاين)وتليفونه اللطيف
وابني الغالي تامر صلاح (ضد الحكومه) والف مبروك ليك انت كمان
وابني الازهري اللي مكالمته كان لها اثر جميل جدا جدا ربنا يكرمه
وبشكره علي العيد ميلاد الجميل اللي عمله لي في المدونه عنده

واخيرا بشكر صديقتي الحقوده جدا :) (صبرني يارب)علي تليفونها اللي بجد اسعدني جدا واسعد الجميع

مش عارفه اقول لكم ايه شكرا مش كفايه انا قضيت احلي عيد ميلاد في حياتي فعلا


عايزه كمان اقول لكم اني مضطره اقفل المدونه شويه لدواعي السفر ان شاء الله في
5 يوليوالي امريكا بالغصب
انا ماكنتش هقفلها دلوقتي بس جدت ظروف عندي:( فاهقفلها لحد لما ارجع ان شاء الله في 13اغسطس )

بجد هتوحشوني
وهحاول ادخل مدوناتكم علي ما اسافر كل مايسمح الوقت
شكرا لكم جميعا وخصوصا عمرو
*******************
المدونه امانه :)

الجمعة، 19 يونيو 2009

تاج الأحلام

اولا: حبيبتي نهر الحب كل سنه وانت طيبه عقبال 100 سنه
1-أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟
الماضي خلاص عدي و راح الاحلام للمستقبل مش للماضي وكل ماحصل في الماضي لازم نرضي بيه وخلاص مافيش حاجه هتغيره
ماكنش حد غلب
بس احلامي اللي كانت احلامي ساعتها جزء كبير منها اتحقق مثلا كنت عايزه ادخل فنون جميله والحمد لله دخلت كنت عايزه اخلف بنتين الحمد لله ربنا اداني تلاته
كان نفسي احج حجيت وقبلها كان عمره


2-أذكر خمس أحلام على الأقل ..تخص مستقبلك ؟؟؟
في سني ده بتكون الاحلام للأبناء مش ليه ربنا يسعدكم ويسعدهم بس نفسي ادير عمل خيري بما يرضي الله بس للأسف اي عمل خيري هنا بيتخرب

3-أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن ؟
شخصيات بحبهم من المدونين كان نفسي اتعرف عليهم من زمان

4-أذكر شخصين على الأقل غير متواجدين فى حياتك حاليا كنت تود وجودهم الان

كان نفسي بابا يكون موجود وصديقه عزيزه عليا ماتت هي كمان


5-تحدث عن ستة أسرار قد لا يكتشفها من يقابلك للمرة الأولى ؟
طبعا مافيش حد بيكتشف حد في المقابله الاولي حاولت اكتب حاجه ماعرفتش ممكن اللي شافوني منكم همه اللي يجاوبه علي السؤال ده
وخصوصا اللي قابلوني اكتر من مره

كده التاج التاني خلص خلاص

عايزه الفت نظركم ان عمرو بدر حبشتكنات فلسفيه عامل بوست مهم جدا ياريت تقروه




الثلاثاء، 16 يونيو 2009

تاج منكم وورده مني

تحديث:زوروا مدونة دعاء طلبه طلب جميل جدا
*********

من أنت ؟ وما الذى تفعله هنا ؟


انا شمس النهار
هنا (اعتقد البلوجر) بأحاول اتواصل مع اصدقاء اصبحنا مع الوقت عائله واحده
إسرائيل تقصف كل جنوب ممكن بحثا عنك ، أى شمال ستقصد؟

اشمعني انا يعني :) بس ماشي نتمشي بقى في شمال امريكا شويه علي فلسطين المحتله شويه وعلي كيفي ادخل المستعمرات اليهوديه اطلع من مفاعل انا حره
اديني باتمشي وهمه بيضربوا في نفسهم نيران صديقه يعني:)


أنت مكلف بحذف حرف من حروف اللغة العربية .. أيها ستختار ولماذا ؟

انا احذف حرف من حروف اللغه العربيه ؟ لسه هحذف ؟ ماانا اصلا حذفاها كلها والحمد لله ايه ماحدش بيقرا اللي بأكتبه والا ايه
انا ولا فخر عملت كوكتيل بين اللغه العربيه والهنديه
وبيشتكوا مني في المجمع بتاع اللغه العربيه
لو قدر لك أن تدخل السجن فما هي القضية التي تتمنى ان تدخل بها ؟
لا الحقيقه انا عندي هوايات كتير بس مش من ضمنها دخول السجن
لا مش هنفع هناك
ممكن نغير السؤال ده:)


منذ متى اكتشفت نفسك؟
اكيد الانسان بيطلع مع نفسه فاهمها وفاهم ممكن يعمل ايه ومايعملش ايه ويستحمل ايه ومايستحملش ايه
كل واحد عارف نفسه طبعا من غير موعد محدد

على مفترق طريق لافتتان ، اليمنى تقول ( إلى حلمك ) واليسرى تقول: ( إلى مالم يحلم به البشر ) ، أي الطرق ستسلك ؟

لو مالايحلم به بشر ده الجنه يبقا مش عايزه سؤال
لكن لو الجنه خارج الموضوع وده اكيد
مش هروح يمين والا شمال انا بأحب احلم واللي كاتبه ربنا انا راضيه بيه اتحقق حلمي جميل جت حاجه تانيه يبقا اكيد هي الاحسن عشان ربنا قدرها لي

نحن لا نعيش حياتنا بل نتعلم فيها كيف نعيش ما تعليقك؟
ادينا بنعيشها بكل تفاصيلها وبنعلم وبنتعلم يعني كده عايشين كده عايشين

بجملة واحدة فقط أكتب تعريفاً لكل كلمة من الكلمات التالية

الوطن : حضن مصر وحضن الحبيب الصح!!!!!!!!

الأم:الحب والحنان والامان

الليل: الهدوء والصديق والتأمل والروقان

الحب: كده وصال ودلال ورضا وخصام واهو من ده و ده الحب كده

أمريكا:ما طار طير وارتفع الا كما طار وقع

المرأة:نصف المجتمع والحلو كمان (حد عنده اعتراض)

الصمت:اخيرا وجدت انه الحل مهما كان التمن

الانترنت:البيت اللي مجمعنا كلنا

أخترمنصباً واتخذ قرارا ؟
الحقيقه انا مش بأحب المناصب
.
قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب ؟
مين اللي قال ان صمتهم كان تغييب ده ذكاء المرأه
ماهو لو كانوا اتكلموا وردوا عليهم ماكنش وصلنا الشعر الجميل ده

أن تكون مطلوبا لارتكابك جريمة ، خير لك من ألا تكون مطلوباً مطلقاً " ، هل تتفق مع هذه العبارة ؟ علل
ايه التاج الغريب ده كل شويه سجن هو انا قاعده في القسم والا ايه
لا مش بأحب اني اكون مطلوبه لا في جريمه والا غيره (يانهار ابيض انا وجريمه)

إلى أين تمضي كلمات الحب .. بعد أن نقولها؟
اكيد السؤال ده يوجه للي بيسمعها بعد ما بيسمعها بيعمل بيها ايه:):)

هل تجد علاقة بشكل أو بآخر بين المرأة وقطاع الطرق
طبعا هي اللي مخلفاهم. يعني جم منين ؟

هذا فراق بيني وبينك .. متى ولمن تقولها ؟
لكل من تسول له نفسه ان يخون وطبعا احنا عرفنا انواع الخيانه يعني مش شرط يكون زوج او حبيب ممكن صديقه, صاحب سوبر ماركت بيغش ,محل البان بيغش اللبن
اهو اي خاين

.كيف هو غداً ؟
ان شاء الله احلى واجمل

اخيرا خلاص
طيب جميل
الحمد لله ده اول تاج جاني ان شاء الله هجاوب باقي التيجان ورا بعض

الثلاثاء، 9 يونيو 2009

الخيانه


الخيانه

الخيانه مما لاشك فيه طعمها مر وجرحها لايشفي ولاتقتصر علي الحب فقط

الخيانه انواع كتيره خيانة عهد وفكر وحياة مشتركه وحب ووطن ونفس وحبيب (خيانة الحبيب غير خيانة الحب)

وخيانة الصداقه والعمل والدين والعقيده والاسره

انواعها كتيره جدا

واعتقد ان الكلام عنها ماينفعش ينحصر في الحب فقط ولو ان كل اللي ذكرته انواع من الحب

بس عايزه اقول

ان اللي قلبه يطاوعه انه يكدب ويخون حبيبه في اي شئ مهما كان صغير او كبير

مااعتقدش انه حبه اصلا

نتكلم عن خيانة العهد:اي عهد بين اتنين ربنا بيقول انا ثالث الشريكين مالم يخن احدهم الاخر

اي شريكين في عمل في زواج في صداقه....الخ

خيانة الفكر: ان اخون زوجي او حبيبي او خطيبي حتي لو بالتفكر في اي انسان اخر

او اخون فكر جماعه انتمي اليها كحزب او جريده او نقابه

الحياه المشتركه: ايا كانت هذه الحياه سكان عماره مثلا السباكه بايظه عندي وعماله تنخور في العماره وانا ساكت دي خيانه لباقي السكان

الاسره الواحده البنت او الولد اللي يعمل عمل يسئ لهذه الاسره فهو خاين لأستقرار وسمعة هذه الاسره

الزوج اللي يبص بره خاين مش بس للزوجه لا ده خاين للأسره كلها

وكذلك ينطبق علي الزوجه

وكذلك الام اللي تهمل في واجباتها تجاه اسرتها فهي خاينه للأمانه اللي ربنا حطها في ايديها

وطبعا خيانة الوطن :مش بس التخابر مع الاعداء المواطن اللي مايكنش خير سفير لبلده لما يسافر اي حته فهو خائن لمواطنيه وبلده وزمان قالوا الغريب اديب

خيانة النفس :من افظع الخيانات الانسان اللي مايحافظش علي نفسه وشبابه وصحته وسمعته وايمانه فهو خائن لنفسه

خيانة الحبيب :مش بس انه يحب عليه او يكون له مغامرات وصولات وجولات

لا انه مايهتمش بيه ويرعاه ويشعره بالامان ويحتويه

وخيانة الحب :اننا مانحافظش عليه فهو نعمه من الله ونرعاه ونكبره ونتعامل معاه بصدق وليس بلامبالاه

خيانة الصداقه :من اهمها الصدق في النصيحه يعني ننصح بمايرضي الله مش ننصح بغرض اخر غير سليم

خيانة العمل :يعني ننتمي لمكان العمل مانحاولش نهمل ونتهاون بيسموها خيانة لقمة العيش

ونطلع اسرار العمل بره او يرتشي عشان يعمل حاجه تفيد الراشي وتضر العمل

خيانة الدين :ان مانكنش خير دليل وسفير ان ديننا هو الدين السليم

هو ده بعض رأيي في الخيانه احب اسمع منكم وباقي رأيي هيكون في ردي علي التعليقات عشان مااطولش عليكم




seret el7ob Online recorder