الخميس، 20 فبراير، 2014

الصمت

صباح الخير عليكم
الصمت 
ايوة الصمت
اي السكوت
اي السكووووووون
هوووووووووس


احنا مش محتاجين اكتر من اننا نسكت شوية
لييييه؟
اولا علشان نسمع كويس 
ولما نسمع كويس نستوعب ونفهم
ونعرف نقدر ونتصرف صح
الصمت الان مش بس من دهب
 ده من الماااااظ من بلاتين
لو الدنيا سكتت شوية هتتعدل للأحسن
مثلا لو بتوع التوك شو سكتوا لجل النبي
ونسيوا مصالحهم في السبوبة
الدنيا هتدي شوية
لو متخانق ومختلف مع حد 
اسكت انت سيبه هو يتكلم وماتردش 
لحد مايسكت ويطلع الشحنه اللي عنده
ليييييه
؟
اصل كلمة منك علي كلمة منه
الدنيا بتولع والشيطان يدخل بينكم
ويولعها اكتر
 ويوهمك انك لازم ترد ماتخليهوش يغلبك بالكلام
بينله ان هو الغلاط مش انت
لو الزوجين يختلفوا 
والست تسكت وزوجها غاضب الدنيا هتهدي
:) 
ولو ان ده صعب علينا نحن نون النسوة
:)
وسامعه واحده هناااااك بتقولي 
لما مابردش عليه بيقولي انتي مابترديش ليه 
مستهتره بكلامي
مش هامك اللي بقوله وبيغضب اكتر
هقولها
معلش لما الدنيا تهدي فهميه 
انك بتعملي كده علشان الموضوع مايكبرش
مره علي مره هيمشي الحال 
وهيزعق براحته وهو عارف انك مش هتردي
واخد الامان يعني :)
وفي بقا صمت اجباري
 صاحبه بيروح له غصب عنه 
ماعندوش خيار غير انه يسكت
صعب عليه يدافع عن نفسه
علشان مايخسرش اكتر من اللي خسروا
وعلشان يحافظ علي البقية الباقية
اللي جواه
ولأنه لو اتكلم هيتجرح اكتر ماهو مجروح
هاااااااا
نصمت شوية 
ونجرب نسمع الكون 
 بس 
كل واحد يجرب يسمع 
بس 
ولو ليوم واحد 
ويشوف ايه اللي هيحصل 
ويجي هنا يقول حصل ايه
وماتنسوش انه كان من اية سيدنا زكريا 
ان لا يكلم الناس ثلاث ليالي 
اذا الصمت شئ مقدس اهو

فوتكم بعافية

هناك 14 تعليقًا:

tarek momen يقول...

ادينا صمتنا و اجرنا علي الله

gogo!sf يقول...

صباح الخير يا حبى

كلام جميل والله ويجوز مع كل العالم
انما لا يجوز مع كل الزوجات الحقيقه

الله يعفيكى يا قمرتى

gogo!sf يقول...

هو عدم الرد على الافعال مش بيكبر حجم المشكله وده فعلاً صح
انما اللى مش بيرد مرة وبيلاقى المشكله مش بتكبر فبيتعود على انه مش يرد طول حياته وده حاجه من الاتنين
اما تتحول معاه المسئله لبرود ولا مبالاه او انه يكتم جواه ويرفض المناقشه بعد كده الى ان يمرض

شموستى فى افعال كتير اوى غلط صعب السكوت عنها صدقينى

صباجك جميل زى قلبك
جوجو

Ramy يقول...

عالشان كدة سكت (:

برغم بقى هموت و اكتب ((:

حضرتك كنتى منورة معرض الكتاب

يارب دايماً منورانا

(:

كيــــــــــــارا يقول...

ربنا خلق لينا ودنين وبوق واحد عشان نسمع اكتر ما نتكلم

لكن العكس اللي بيحصل

وإذا قرئ القرآن فاستمعوا له وأنصتوا لعلكم ترحمون

شمس النهار يقول...

* tarek momen

ايوة كده :)
الصمت ابلغ من الكلام ياحاج

شمس النهار يقول...

* gogo!sf

صباح الهنا ياجميلة
:)
ماانا قلت لو انه صعب :)
الافعال برضوا ممكن يترد عليها بس في ساعة صفا
:)
وانا بحسد الناس اللي عندها برود ولا مبالاة بحس انهم عالم رااااايقة :)

شمس النهار يقول...

* Ramy

:)
لا انت بالذات ماتصمتش
ارجع المدونة واكتب تاني
:)

شكرا ليك يارامي انك جيت حفل التوقيع

ربنا يكرمك كلك ذوق :)

شمس النهار يقول...

* كيــــــــــــارا

:)
صباح الفل ياكوكي
ده بجد بقا هترجعي للتدوين
:)
اذا بلوجر نور :)

Foxology يقول...

وفي بقا صمت اجباري
صاحبه بيروح له غصب عنه
ماعندوش خيار غير انه يسكت
صعب عليه يدافع عن نفسه
علشان مايخسرش اكتر من اللي خسروا
وعلشان يحافظ علي البقية الباقية
اللي جواه
ولأنه لو اتكلم هيتجرح اكتر ماهو مجروح
==================================
هو ده !!

تحياتي

قمر وليل وغيوم يقول...

موضوعك جاى فى الجون والله ياشموسه
معاكى بجد حق
خصوصا.والله الاعلام محتاج يسكت شويه عشان الناس تهدى
تحياتى ليكى

كيــــــــــــارا يقول...

ايووووون بس واحده واحده يامامتى

ابراهيم رزق يقول...

شمس الشموس

سعيد جدا ان رامى فك الصمت و اخيرا علق

مـروة العقـاد- Marwa يقول...

زينتك عقلك يا شمس النهار :) هاهاها