الأربعاء، 13 أبريل، 2011

بوست البوستات بقا+تحديث


ايه موضوع الشماته دي اللي ماشي في البلد النهاردة
واحدة تقول لي انتي فرحانة اوي كده ليه ده حرام
واللي تقول لي احنا منهيين عن الشماته
في ايه ياشعب مصر
انتوا خايفين تفرحوا بنصر الله
خايفين تفرحوا انكم اسقطوا اقوي عصابة علي مر التاريخ
حد مستوعب يعني ايه رئيس دولة برئيس ديوانه بأولاده برئيس مجلس الشعب
علي رئيس مجلس الشوري ورئيس وزراء بأغلب الوزراء مع كبار الاعلاميين بخمس مديري امن ورجال اعمال علي نواب في مجلس الشعب
دي هيصة دي ماتعملتش في الملكيه
وبعد كده يتقال للفرحة شماته
عجبت لكم يامصريين
ولو هتعتبروا الفرحة شماته ماشي نمشيها شماته ولاتزعلوا
======
مبرررررررررروك سيد قراره خد 15 يوم
مبروك يافتحي سرور مبروك
تصدق جاز فيك دعاء البوست ده
فاضل الاخ فاروق حسني اللي راح اتحقق معاه والوحيد اللي رجع
نفسي يتحقق معاه بسبب المعرض ده بس
:))))
=======
خبر ماكانش ينفع فيه تحديث
السيدة الفاضلة بيتحقق معاهاااااااااا
ايه الحلاوة دي يامصر
كده صدقت ان مصر فيها سيادة قانون
وان مافيش حد فوق القانون وكله هيتحاااااسب
واللي جاي هيعرف ويعمل حساب لا مليون حساب للشعب الجميل ده
وبقول للي كانوا بيقولوا كفايه عايزين ايه تاني كل مااللامبارك يطلع يتسهنت في خطاب كاتبهولوا دكتور نفساني (ماهو كان خايف من كم الفضايح)او لما شوية الفاسدين اللي اتلموا في سجن يرموا لنا لقمة تغيير هنا علي علاوة هنا
الحمد لله اننا صمدنا وصممنا لحد ماالحمد لله كله اتعكش واتلم
اللهم لك الحمد والشكر حتي ترضي
ومبروك علي مرتضي منصور شاه بندر المحاميين ال15 يوم اللي اتلطشهم علي زمة التحقيق
اللي شتم في الثورة وسلط عليها البلطجية
واروح ازووووورالجرحي في القصر العيني
الاقيه مسرح محاميينه علشان يلموا توكيلات
علشان قضايا التعويضات مستند لجهل المرضي بالقانون
والحمد لله اننا ضيعنا عليه الفرصة
ومسجلة الكلام ده فيديو وكمان معايا نسخ من الورق اللي كانوا عايزين يمضوا عليه المرضي وعندي الشهود عليه
ماما وصديقتي واولادي كيارا وازهري
الحمد لله اهو ظهر علي حقيقته
مليون مبروك علينا الثورة الحمد لله
باقي شوية ركش سهلين هيتلموا
وادي سيد قراره بيتحقق معاه دلوقتي
حد هيقول لي مين الباقي ؟
هقول عمر سليمان بتاع اليهود
واحمد شفيق وندر عليا هوزع بونبون علي طلعت ال15 يوم بتوعه
وكمان هلال وسامح فهمي اللي عايز نائب خاص له لوحده
وان شاء الله بالتحقيق مع كل دول هيتجاب صبيانهم اللي بره اللي عمالين يخربوا ويبهدلوا الدنيا
يخرتكم اكتر من كده احنا كنا مسلمين البلد لشوية عصابة ولا عصابة خط الصعيد
وبكده نفوق بقا للبلطجيه اللي طايحين في البلد
علشان نعرفهم ان البلطجيه الكبار خلاص اتعكشواومش هينفعوهم
الله اكبر الله اكبر ولله الحمد

هناك 47 تعليقًا:

Malooka Yousef يقول...

فعلا والله اصل ربنا ميرضاش بالظلم ولسة كمان عشان حقنا يرجعلنا ودم الشهدا اللى راح منهم لله كلهم
مدونتك جميلة ياشموسة

ماجد القاضي يقول...

السلام عليكم أختي شمس..
نعم.. الله أكبر ولله الحمد
اللهم لا شماتة في الظالمين.. لكن فرحة بما أنعمتَ به علينا من رؤية سننك ومشاهدة آياتك ومعاينة نواميسك وهي تتحقق في الظالمين وتسري على رقابهم.. مما يزيدنا إيمانا بك يا خالقنا ومولانا.. ويزيدنا تسليما لسائر قوانين شرعك..!
تحياتي أختي الكريمة..

شريف صابر يقول...

مساء الورد
بجد اختى لا تتخيلى مدى سعادتنا بهذه الاخبار التى اعادت لنا بالاحساس بالانتصار
تحياتى

مصري جدا يقول...

مش هفكرك بأني قلت لك أمسكي أعصابك لحد اخر الأسبوع

بس أمسكي أعصابك لأنت القادم رائع

لمصر وأهلها

MǿиY El-Shreef يقول...

شموسة حبيبتي احب اقولك ان سيد قراره وصل طره والسيده الفاضله بيجهزولها مطرح ف القناطر :D:D

الف مبروك علينا كلنا الحمدلله المعز المذل :)

وحشتيني

MR.PRESIDENT يقول...

غيثا نافعا
غيثا نافعا

مصر اليوم في عيد يا شموسة .

مصر يا امه يا بهيه يام طرحه و جلابيه الزمن شاب و انتي شابه هو رايح و انتي جايه جايه فوق الصعب ماشيه فات عليكي ليل و ميه و احتمالك هو هو و ابتسامتك هي هي

سواح في ملك الله- يقول...

الحمد لله الملك العدل
الذي لم ولن يضيع حق مظلوم
وقد يمهل ظالما ولكن لايهمله
الخوف بقي يامدام شمس
يشكلوا حكومة ولجنة سياسات في العمبوكة
ويحكموا سجون مصر من هناك
ساعتها المساجين هيقولو ا ارحل
مش هنرحل هو يرحل هههه
تحيتي

HighOnLife يقول...

Shammoossa , bravo that you have a record of the tawkeelat. You are proactive ma shaa Allah. Your supportive actions and helpful recordings especially to the weak and injured are very commendable. Gazakee Allah koll khair. :))

لـــولا وزهـــراء يقول...

الله اكبر الله اكبر الله اكبر
على كل ظالم وفاسد عاملة ايه دلوقتي يا اجمل شمس الشموس؟

لولا

اخبار مصر لحظة بلحظة يقول...

أول مرة أزور مدونتك القيمة .. تهنئتي لك على المجهود المبذول والرائع..
ميدان التحرير الان
اخبار مصر لحظة بلحظة
ثورة 25 يناير

شمس النهار يقول...

* Malooka Yousef

اهلا بيكي وشكرا علي مجاملتك اللطيفة

والحمد لله ربنا اكرمنا

وقلب امهات الشهداء هيرتاح شوية لحد مايتم محاكمتهم ويتهبدوا حكم زي الفل
:)

شمس النهار يقول...

* ماجد القاضي

وعليكم السلام ورحمة الله وبركاته

دي مش شماته زي ماقلت في تعليق لي في البوست السابق
دي فرحة بنصر الله

امنت بالله العلي العظيم
والحمد لله

شمس النهار يقول...

* شريف صابر

مساء الحرية

وليلة 15
:))

الحمد لله وان شاء الله كله خير

شمس النهار يقول...

* مصري جدا

:))

مسكت اعصابي كتييييييير

وماكنتش بحب اتكلم في الحياة السياسيه في مصر
علشان كنت عارفة ان اللي بيظهر لنا غير اللي في الكواليس واللي اتكلم معايا عارف المعلومة دي عني

ودلوقتي الحمد لله ماسكة اعصابي
بس من الفرحة
:))

شمس النهار يقول...

*MǿиY El-Shreef

اهلا ازيك ياعفريته انتي فين اصلا

اشتركتي في جروب المدونين ولا لا؟

ايوة ماانا عرفت ان سيد قرقر اتهبد 15 يوم
ربنا يجعلهم 15 سنة علي الاقل

شمس النهار يقول...

* MR.PRESIDENT

ايوة صح

والاغنية جميلة جدا
انا حطيتها في بداية الثورة في تدوينة

شمس النهار يقول...

* سواح في ملك الله

ضحكتني ياسواح
وماتستبعدش الكلام ده

وخصوصا بعد الكلام اللي سمعته علي اون تي في

شمس النهار يقول...

HighOnLife

Thank you dear always crane my morale:)) I wish you could write Arabic language is better for the blogger
I write as I feel events
Mnorani always

شمس النهار يقول...

* لـــولا وزهـــراء

الحمد لله يالولا الحمد لله

انا بخير مادام كل الحرامية اتعكشوا خلاص عقبال الباقي

دعاء العطار يقول...

ياااااااه .. معقول بجد اللى بيحصل ده ؟

دنيااااااا .. " يعز من يشاء ويزل من يشاء "

الف مبرووووووووووك علينا كلنا ويارب التحقيقات تمشى فى مسارها الطبيعى

دمتى بكل الخير (:

Haytham Alsayes يقول...

هاقول زى الراجل التونسي بس بالمصري
لقد طلع عين اللي خلفونا من اجل هذه اللحظة التاريخية

وتحياتي

MǿиY El-Shreef يقول...

موجوده ياشموسسه والله بس بطلت تدوين بقى

حاليا انا فيس بوكيه وعفريته بردوا =))))

انهي جروب ! مانا كمان مش مدونه للأسف :/

حمدى جعوان يقول...

عاوزين على الدين هلال ومفيد شهاب بقى خليها تحلو

elsha3er يقول...

السلام عليكم
حقيقى مش قادر اوصف فرحتى أد اية والله اة سورى قصدى مش عارف اوصف شماتى هههههههههه
اللى بقى مخلينى فرحان اوى اوى اوى ان كمان راح معاهم مرتضى منصور خليه يقول بقى ماسك سيديهات على الشعب
الحمد لله رب العالمين ان شاء الله ولسة ماما سوزى
عشان علاء وجمال بيعيطوا وعمالين يغنولهم ماما زمنها جاية :D
تحياتى امى الغالية
ahmed mussolini

حاجات جوايا يقول...

صباح العدل والكرامة
الحمد لله حمدا كثيرا طيبا مباركا فيه كما ينبغى لجلال وجهه وعظيم سلطانه
مصر تصنع التاريخ من جديد
والله انا قبل الثورة كنت حاسة ان ربنا غضبان علينا
بس ايام الثورة ولغاية دلوقت حاسة جدا ان ربنا معانا وكل ده مكناش هنحلم انه يحصل لولا نصر الله ومساندته لينا
يد الله مع الجماعة
وعشان مكناش جماعة قبل كده مكنتش يد الله معانا
وده شيء لازم نتعلمه ونفهمه كويس جداااا

الحمد لله يارب
ربنا يكمل ثورتنا على خير
ويجعل الظالمين عبرة لمن يعتبر
وينصر اخواتنا فى ليبيا واليمن وسوريا ويوحد صفهم اللهم امين

تحياتى ^_^

GiGi world يقول...

فعلا هى مش شماته

ليه بس فاهمنها كده

احنا بنقولها كده اي كلام يعنى

لكن هى نار بتبرد حق بيرجع ظالم بيتحاكم

انسان ذلنا وكسر مناخيرنا وموجود فى طره

هي دي شماته

تحياتى

Dr Ibrahim يقول...

ربك كبير ومسير الظالم هياخد جزاؤه..

بالنسبة لموضوع
الحضارة المادية والحضارة الإيمانية.
أكيد كان فيه خطأ بالإتصال بالانترنت
يمكن حضرتك لو جربتى تانى ممكن تشتغل
أو يمكن مشاهدتها على قناتى على اليوتيوب من هنا

sony2000 يقول...

الحمد لله:)

بصي دا طبعنا من زمان
نفرخ..نخاف نفرح
ونقول استر يارب

نحزن ..بالقوييي
دا طبع:))

الحمد لله
الحق والعدل ظهر

وشوفي الفيدون اللي حطيتوا عندي وقليلي رأ]ك
ياتيتا:)

كلمات من نور يقول...

مش شماته يا ناس افهموا مش شماته هي فرحة عارمة بسقوط طاغية ظل جائما على قلوبنا لسنوات عجاف

حاتم عبدالفتاح يقول...

قل اللهم مالك الملك تؤتي الملك من تشاء وتنزع الملك ممن تشاء

rack-yourminds يقول...
أزال المؤلف هذا التعليق.
rack-yourminds يقول...

سيدتي هؤلاء اتباع حزب اسفين ومتزعلش منا ومنقصدش ,وعلي فكره هم نفس النوعيه اللي هاجمت الاديب الكبير علاء الاسواني في مناظرته الشهيره مع رئيس الوزراء احمد شفيق ,فعلا ما احوجنا الي تحرير العقول

شمس النهار يقول...

* دعاء العطار

تصدقي لحد دلوقتي مش مصدقة نفسي
الدولة كلها مشرفة علي البورش
مافيش حد بره وحتي اللي برة هيدخلوا معاهم مس؟الة وقت

شمس النهار يقول...

* Haytham Alsayes

الراجل قال هرمنا ياهيثم

انتوا لسه ماهرمناش
:))
اومال احنا نعمل ايه اللي شبينا علي الهم ده من اول 67 الي يومنا هذا

انت غايب فين ومابتنشرش تدوينات ليه

شمس النهار يقول...

* MǿиY El-Shreef

جروب المدونين

وده اللينك بتاعه

http://www.facebook.com/profile.php?id=100002161270300#!/home.php?sk=group_150308615029590&ap=1

شمس النهار يقول...

* حمدى جعوان

لا بالدور الدور الدور الدور

:))
سامح فهمي الاول

شمس النهار يقول...

* elsha3er

ضحكتني

ايوة صحيح ماما زمانها جاية

العيلة كلها هتشرف طره لاند

شمس النهار يقول...

* حاجات جوايا

ايوة صح العدل هو اللي بيحافظ علي الكرامة فعلا

ان شاء الله بكره هيبقا احلي

وانش اء الله مصر تكون اجمل البلاد زي زمان

نورتي المدونة ياسالي

شمس النهار يقول...

* GiGi world

وحتي لو شماته ماشي يعني شمتانين في رجل البر والاحسان والتقوي

بجد ربنا يهدي اللي لسه بيقولوا اسفين ياريس

شمس النهار يقول...

* Dr Ibrahim

ماهي دي رحمة ربنا بينا ياابراهيم

ان يورينا عجائب رحمته

ورحمته بالمصريين كانت كبيرة جدا
وكرمن اخر كرم
بوقفة الجيش معانا ربنا سخر لنا الجيش

شكرا علي اللينكات
وفعلا النت كان بطئ جدا
مافيش ليه عندك اي تعليقات :)))))

شمس النهار يقول...

* sony2000

ايوة بس خوف المصريين المرة دي خنقني بصراحة
وطهقوني بكلمة الاستقرار دي

شوفت الفيديو وعجبني جدااااا

:))
شكرا ياجميلة

شمس النهار يقول...

* كلمات من نور

وحتي لو شماته

ماشي شمتانين في اللي قتل الشباب
شمتانين في اللي كان صمام امان لأسرائيل في المنطقة

شمتانين وفرحانين بنصر الله

شمس النهار يقول...

* حاتم عبدالفتاح

ربنا مابيحبش الظلم

شمس النهار يقول...

* rack-yourminds

ان شاء الله العقول هتتحرر

بس عايزة وقت

علي مايستوعبوا الصدمة

سبايدرمان يقول...

ههههههههه
لاهو فيه فرق كبير بين الفرح و الشماته
الى بنحسه بيكون فرح و فرح كبير قوي
بس الى بنعمله شماته شماته يعني ههههههه

انا مثلا حطيت عندي فديو
و الفديو مش واضح قوي لخروج علاء و جمال من التحقيقات
بس انا حاطه فعلا للشماته ، منكرش صحيح اني فرحان
بس حطيته عشان اشيل الحقد الى كان في قلبي ناحيتهم ^__________^

شمس النهار يقول...

* سبايدرمان

من حقك تعمل اللي انت عايزة
انت مصري
:))))

اللي غايظني اننا شعب عاطفي في غير موضعه
ومع بعض مش ممكن بسحل بعض في الطوابير والمرور
عجبت لك ياشعب مصر

maxbeta3zaman يقول...

لم أقرأ هذا الا متأخرا نظرا لتتابع الأحداث والجرى اللاهث وراءها ...شماتة مين!! دول ناس كانوا واخدين البلد على داهيه بعد نهبها ...وربك لا يوقع العصابات دى فى الشباك الا بعد ما اعطاهم الف انذار بأن يصلحوا من شأنهم وان ينتهوا عن غيهم فوقوعهم اذن من الله بان يلحق بهم عذاب الدنيا قبل الآخره والعاقبة للفلول