الثلاثاء، 28 أكتوبر، 2008

يعني ايه كلمة وطن ؟

البوست ده اخدته من عند نواره حبيت انكم تشركوني حرقة الدم
موضوع غريب جدا جدا .. موضوع أرض وادى الملوك !!
اٍحنا أكثر من ألف فرد أتلحسنا فى عقلنا ذات يوم و قررنا أن نقتحم الصحراء و نستصلحها و نخضرها .. و وقع اٍختيارنا على شركة وادى الملوك لسمعتها الطيبة و خبرتها فى تقسيم و بيع الأراضى ..
و عاينا قطع الأراضى المعروضه للبيع فى الكيلو 52 طريق مصر الاٍسكندريه الصحراوى ..
و زيادة فى الاٍطمئنان رحنا وزارة الزراعه و الهيئة العامة لأستصلاح الأراضى و كافة الجهات المسئولة و كلهم أكدوا لنا أن موقف الشركة سليم و أن فعلا مدحت بركات رئيس مجلس الاٍدارة شارى بعقود سليمة من الدولة و مسدد كامل الثمن و حصلنا على صور لعقد البيع المبرم بينه و بين الهيئة و فيه واضح و بشكل صريح أن الراجل مسدد كامل الثمن ..
و مش كده و بس لأ ده كمان الدوله موصله الكهرباء الحكومية للمنطقة و كله تمام التمام ..
فأطمئنينا و أشترينا و سددنا برضو كامل الثمن للشركة و أستلمنا عقودنا و فينا من باع عفش بيته و من دخل جمعيات طويلة الأجل و طبعا من وضع تحويشة شقا العمر فى الأرض لشرائها و أستصلاحها و زراعتها .
.و بقدرة الله الجليل و اٍصرار الناس على النجاح تحولت المنطقة من صحراء جرداء يخاف العفريت الأزرق يمشى فيها لجنة مورقة أشجارها خضراء أرضها تسر الناظرين و ده طبعا على مدى سنوات طويله من العمل و الصبر و الاٍنفاق تحت أعين أجهزة الدوله اللى كانت بتبعت مندوبيها كل فتره و التانيه لتطمئن على أن الأرض تستغل فى الزراعة و ليس فى البناء حتى أرتفع سعر الفدان هناك ليصل اٍلى ضعفين و نص سعر شرائه من الشركة و عشرات أضعاف سعر شراء الشركة له من الدولة !!
فجأه بين يوم و ليله نزعت أجهزة الدولة هذه الأراضى من مالكيها و طربقت البيوت و الزرايب على اللى فيها .. و ألقت القبض على مدحت بركات و قدمته لمحاكمة عاجلة بحجة أنه أخل بشروط العقد مع الدولة ..
و مطلوب الآن من الملاك اٍعادة شراء هذه الأرض بسعر اليوم !!!!!!!!
و لما جرينا على هيئة اٍستصلاح الأراضى قال لنا نفس المسئولين اللى رحنا لهم قبل ما نشترى الأرض أنه فعلا كل عقود الشركة سليمة و لكن تم فسخ التعاقد بينهم و بين مدحت بركات !! طيب يا أسيادنا و أحنا مالنا ؟؟ ما تاخدوا حقكم من مدحت بعيد عننا !!و هكذا بقى ..
دوخينى يا لمونه ما بين الهيئة و ما بين الشركة و ما بين برنامج العاشره مساءا و ما بين قسم الشيخ زايد و ما بين الأرض اللى تحولت لثكنة عسكرسة تجوبها السيارات المصفحة المحملة بمئات الجند المدججين بالسلاح !!
المصيبه كمان يا مسلمين و يا أقباط و يا يهود و يا كفره أن الزرع اللى فى الأراضى و اللى الناس صارفين عليه دم قلبهم بقاله أسبوع ما أترواش بعد منع القائمين على ريه و رعايته من الدخول للمنطقة !!
طيب حنلاقى فين أبويا محمد أبو سويلم و لا عبد الهادى ؟؟ و لو لاقيناهم حنطلعهم من فيلم الأرض اٍزاى يا ولداه ؟؟ خلاصة الموضوع : أرضنا أتخدت مننا قدام عينينا لسبب اٍحنا مش فاهمينه ..
و زرعنا بيموت قدام عينينا لسبب اٍحنا برضو مش فاهمينه !!
النتيجة : خراب بيوت الآلاف من المستصلحين اللى وضعوا كل ما يملكوا من حطام الدنيا فى هاتيك الأرض و تشريد مئات العاملين بها .. و موت الزراعات فى آلاف الأفدنة المستصلحه ..المطلوب :
ننتحر كلنا ..-----يعني الناس تعمل ايه؟
يزرعوا عند الوادي يطردوهم من الارض زي فلاحين سراندو
ويقولوا لهم دي اراضي الاقطاعيين اللي اتأممت من خمسين سنةيغوروا من وشهم ويروحوا الصحرا يقولوا لهم لا اصل الدولة اتخانقت مع الشركةهم عايزين مننا ايه؟
فيه تحديث في مدونة عمرو ان اصحاب الاراضي قرروا التمسك بارضهم لاخر لحظةواحنا معاهم
مش عارفه اعمل لهم حاجه علي الاقل انشر مشكلتهم

هناك 33 تعليقًا:

mido يقول...

مدحت بركات رجل الاعمال
ورئيس مجلس ادارة جريدة الطريق المستقلة الاسبوعية(لسه جرنان جديد) اللى كانت بتناكف طلعت مصطفى فى قضية سوزان و بتهاجم النظام بشراسة و الرئيس

ممكن يكون الراجل فعلا استولى على الاراضى بالمخالفة للقانون

بس فى كتير زيه , اشمعنى هوه؟

السبب اللى انا كتبه فوق!

Beram ElMasry يقول...

الاخت . شمس النهار
تحية وسلام
شكرا لسرعة الرد ، واسمحى ان اوضح شئ وهو ان اللذى اقترح على نشر ما اكتب فى مدونة بقصد ايقاظ الهمم ، اقترح ان لا اكتب اسمى الحقيقى ، ولا اكتب سنى الحقيقى فافقد صداقة الشباب ، فكان خيارى للمدهول اسما للمدونة قبل ان تغيرة ماما امولة والدكتور توكل ، وبيرم المصرى اسما لى ، فكان ما كان وتاريخ ميلادى الحقيقى ، 14-1- 1942 ، ابوحماد شرقية
ليتنا جميعا نعتنق فكرة النقد افضل من جامد اقووووى ، وعميق ومعبر وهكذا
شكرا لك وتحياتى

romansy يقول...

انتى عارفه يا شمس
لو كل واحد حاول انه يواجهه المخاطر باسلوب اللى هو شايفه صح يبقى الدنيا هتخرب اكتر من اللى خربانه
احنا يا شمس فى غابه
القوى بياكل الضغيف
واللى يلحق بقى
الله يسامحهم
وحسبى الله ونعم الوكيل

elsha3er يقول...

والله البلد دى غريبة لا كدة عاجب ولا كدة عاجب يارب يصبر الناس اللى دفعت دم قلبها دى


احمد الشاعر

مـجـنـووون يقول...

منقدرش نقول غير حسبي الله ونعمة الوكيل


ونصيحه بقولهالك

( ما ضاع حق وراءه مطالب به )

يعني لو هم وجعوا دماغ المسئولين وكبروا الموضوع أكيد حيلاقوا حل لهم علشان يرتاحوا من وجع الدماغ


تقبلي مروري
مجنووون

Foxology يقول...

ايو مدحت بركات اخل ببنود العقد الحقيقى اللى هو اهم بنوده واللى بركات اخل بيها : التدمير وليس التعمير

عليه العوض

ABOALI يقول...

دع الحياه تسير كما تشأؤا
فرب الحياه يفعل ما يشاءوا
ان كنت مظلوما وغلقت الابوابُ
فرب السماء لا يغلق بابه
ارفع يدك له
وقل
مظلووووووووووووم
انصرنى
كن واثق" موقنا"
بأجابة الدعاءُ
هو السميع البصير
من استنصر به اجابه
انظر الى يونس فى الظلماء
انظر الى يعقوب وقت البكاء
انظر الى ايوب فى الضراء
انظر الى موسى فى الدهماء
انظر الى نوح فى الامواج
انظر الى يوسف فى العصماء
انظر الى احمد فى الدعاء


اللهم تولى امرهم وكن لهم سندا

تحياتى

mohamed ghalia يقول...

إلى الله المشتكى

SemSem يقول...

اول زيارة لى فى المدونة

اللى يعيش ياما يشوف واللى يمشى يشوف اكتر

انا لله وانا اليه راجعون
وهى دى معنى كلمة وطن
باذن الله زيارتى لن تكون الاخيرة
تحياتى

عمرو يقول...

الأخت شمس
أنا عاجز عن الشكر و الله لنشرك مشكلتنا
http://habashtkanat.blogspot.com/
و الحمد لله موضوع رى الزراعات أتحلت مشكلته بناءا على أمر صدر من جهة ما اٍمبارح عصرا و بدأت أعمال الرى بالفعل
نسأل الله أن تحل مشكلة الأرض نفسها عن قريب و بشكل نهائى
أشكرك مره تانيه

smilyrose يقول...

على فكرة يا شمس

المشكلة مش عافرة فينا ولا فى الناس

اللى مش بتقدر تعب الناس وهمومهم

ولا بتحس ان كل فرد فينا بيعانى وبيتعرض لأشياء قد تؤدى او تفقده حياته للحصول على ما يلزمه من احتياجات

وبعد كدا نيجى ونصحى على كابوس

وتتكرر مرة والتانية ومفيش فايدة

بجد يا شمس ربنا يرحمنا برحمته

ابدعتى يا شموسة

smilyrose

روح الحب الصادق

الازهرى يقول...

صديقتى العزيزة

هناك ما هو اكثر من نشر المشكلة هناك الوقوف بجانبهم ودعوتهم الى التمسك بحقهم ما دامت اجراءاتهم سليمة ولو تحول الموضوع الى قضية رأى عام
فالكل سيقف الى جانبهم ويؤيدهم ما دام موقفهم سليما


تحياتى ودعائى

سبهللة يقول...

ما ضاع حق وراءه مطالب

ذو الوجه المبتسم يقول...

السلام عليكم
انا قريت كلامك اكتر من مرة
وبجد مش لاقى تعليق مناسب
بس دايما باسال
ياترى ايه الحل
ازاى نتحرر من قيودنا
ازاى نتحرر من الاقطاعيين وواضعى الايدى
ازاى نحرر من السياسيين
كفاية كده احسن ممكن الخبط قوووى
تحياتى

شمس النهار يقول...

*ميدو
المشكله ان الناس مابقتش تصدق اي حاجه في اي حاجه
ممكن يكون في سبب خفي
ممكن يكون في حاجه مش مفهومه
المهم ان في حاجه غلط
وان الزرع كان ممكن يموت

شمس النهار يقول...

*رومنسي
مش عيزاك تيأس من رحمة الله
لسه في خير
والناس دي ربنا هيقف معاهم
مادام همه صح

شمس النهار يقول...

*الشاعر
لانملك الا الدعاء

شمس النهار يقول...

*مجنون
اكيد الناس دي مش هتسيب حقها وشقي عمرها
بس اناحبيت اقول لهم احنا معاكم
ولو حتي بالدعاء

شمس النهار يقول...

*فوكس لوجيا
تصدق صح انت جبت اخرها
انا برضه ملاحظه اليومين دول اعداء النجاح كتروا قوي

شمس النهار يقول...

*ابو علي
حاولت انقل كلامك الجميل
واحطه عند عمرو في مدونته ماعرفتش
ولو كتبته انا هيفتكر ان انا اللي كتبته
وانا ماحبش انسب شئ مش ليه ليه
ارجوا منك ان تدخل مدونته وتكتبه له
علي الاقل يحس ان في ناس حاسه بيه ومشركاه
وخصوصا ان كلامك جميل جدا

شمس النهار يقول...

*محمد غاليه
مالناش غير الله
بس ياريت نلجأ اليه في السراء والضراء

شمس النهار يقول...

*محمد غاليه
مالناش غير الله
بس ياريت نلجأ اليه في السراء والضراء

شمس النهار يقول...

*عمرو
ده اقل واجب ممكن نعمله لك
ياريت في ايدي حاجه اكتر من الكلام والدعاء اعملها
وانبسط ان الزرع اتروي
الحمد لله دي بادره كويسه
يمكن لما يلاقوا ان انتم زرعتم وعمرتم
يختشوا علي دمهم
ربنا معاكم ويحلها علي خير
اجري ورا حقك واتركها علي جانب الله

شمس النهار يقول...

*سمسم
اهلا بأول زياره
كان نفسي تكون في موضع مفرح
مش محزن
فين اجابة يعني ايه كلمة وطن؟

شمس النهار يقول...

*سميل روز
انا حبت بس اقول لهم احنا معاكم حسين بيكم
ياريت نروح مدونته
ونترك له الكلام الجميل ده ويحس بروح المشاركه دي

شمس النهار يقول...

*الازهري
ماانا نشرت المشكله عشان تعرفوها واللي عنده حاجه ممكن يعملها يعملها
واللي ماعندوش يدعي لهم
يكون فينا حد صالح يلبي له الله الدعاء
الدعاء ونشر المشكله هو مااقدر علي فعله
واننا نحسسهم اننا حاسين بيهم وبمعانتهم

شمس النهار يقول...

*سبهلله
ادعي لهم
بعد كل صلاه ادعي لهم

شمس النهار يقول...

*ذو الوجه المبتسم
هقول ايه
انتم قلتم كل حاجه
ادعوا لهم

fashkool يقول...

شمس النهار .. ما علهش .. تعيشى وتاخدى غيرها .. اصل الموضوع من ايام شركات توظيف الاموال ما يطمنش .. ماهم برضه قبل كدا ضيعوا تحويشة عمرنا وايام الغربه والتعب وايام الشباب اللى ضيعناه فى الغربه وقاموا أمموا أو استولو على الشركات دى وادوها للمدعى الاشتراكى والنائب العام اللى قعدوا يغرفوا منها لحد ما خلصوا على الشركات دى وخلصوا علينا معاها .. كنا ايامها بنقول يمكن تكون الشركات دى نصابه ودا صحيح .. لكن كان النصب شركه بينهم الاثنين .. كان ممكن نستحمل نصاب واحد يضحك علينا ويدينا نصف اللى خده ’ بس اما دخل النصابين الشركاء ضيعوا علينا كل حاجه واشترينا بفلوسنا بضاعه مضروبه وبضاعه بايظه يا دوب تستعمل لمره واحده .. ووضح اليومين دول ان الحكايه كانت معموله لصالح فئه معينه وليست لصالح المودعين او لصالح البلد .. مش دا باين ولا ايه.. الله يعوض على اصحاب الارض .. وربنا ياخد اللى كان السبب,

fashkool يقول...

شمس النهار .. ما علهش .. تعيشى وتاخدى غيرها .. اصل الموضوع من ايام شركات توظيف الاموال ما يطمنش .. ماهم برضه قبل كدا ضيعوا تحويشة عمرنا وايام الغربه والتعب وايام الشباب اللى ضيعناه فى الغربه وقاموا أمموا أو استولو على الشركات دى وادوها للمدعى الاشتراكى والنائب العام اللى قعدوا يغرفوا منها لحد ما خلصوا على الشركات دى وخلصوا علينا معاها .. كنا ايامها بنقول يمكن تكون الشركات دى نصابه ودا صحيح .. لكن كان النصب شركه بينهم الاثنين .. كان ممكن نستحمل نصاب واحد يضحك علينا ويدينا نصف اللى خده ’ بس اما دخل النصابين الشركاء ضيعوا علينا كل حاجه واشترينا بفلوسنا بضاعه مضروبه وبضاعه بايظه يا دوب تستعمل لمره واحده .. ووضح اليومين دول ان الحكايه كانت معموله لصالح فئه معينه وليست لصالح المودعين او لصالح البلد .. مش دا باين ولا ايه.. الله يعوض على اصحاب الارض .. وربنا ياخد اللى كان السبب,

شمس النهار يقول...

*فاشكول
اهلا بيك في المدونه لأول مره
بس الحقيقه انا ماعنديش ارض
بس الاخ عمرو مدون زميل له ارض اخدها بشقاه
وتعب وزرع وصرف اللي وراه واللي قدامه
حبيت انشر مشكلته واشاركه همه
اما موضوع الريان وشركاه
فاده كان نصب في نصب
وقصعة الفته داق منها الكل

ماما أمولة يقول...

اختي شمس النهار

سعدت جدا بمدونتك وتفاعلك الجميل وايجابيتك
جعله الله في ميزان حسناتك
الوطن دم بيجري في عروقي
وهم شايله على كتوفي
بالنسبة لهذه المهزلة فهناك جديد
وهو
تحديث عاجل : صدر عصر اليوم أمر من جهة ما بالسماح فجأه بدخول المشرفين المنوط بهم تشغيل مواتير الآبار العملاقه و أيضا عمال الرى و تم اٍستدعائهم و بدأت بالفعل أعمال الرى للزراعات و أيا كانت هذه الجهة التى سمحت لعمال المزارع بمباشرة أعمالهم بشكل طبيعى فأنا أتقدم لها بكل الشكر ..
http://habashtkanat.blogspot.com/2008/10/2008.html

تقديري

شمس النهار يقول...

*مامااموله
شرفتيني بالزياره
واشكرك علي الخبر اللطيف اللي كتبتيه
وارجوا ان تتكرر الزياره