الثلاثاء، 4 نوفمبر، 2008

عيد الحب والسعاده

كل سنه وكل الاصحاب في حب وود واخلاص
كل سنه وكل عيله بتحب بعض بخير
وكل سنه والاحباب بخير واخلاص لبعضهم
انسب يوم النهارده اتكلم فيه عن السعاده والتاج اللي عمله محمد غاليه بس انا مش هجوبه علي شكل سؤال وجواب
هجاوب كله علي بعضه يامحمد
السعاده هي شئ نسبي
اللي ممكن يسعدني النهارده ممكن مايسعدنيش بعد شويه
ممكن ابقي سعيده دلوقتي بعد شويه لا
ماحدش بيكون سعيد علي طول او تعيس علي طول
واعتقد ان السعاده تكمن في الرضا لو رضينا بماقسمه الله لنا هنوصل للسعاده
السعاده مش وهم الاعند الانسان اللي دايما مش راضي طماع عايز اكتر عامل زي اللي بيشرب من البحر المايه مالحه مابترويش
واكيد طبعا الانسان الراضي السعيد بحاله بيكون الي حد ماناجح عشان رضاه باللي في ايده مابيخليهوش يبص لغيره فبيركز مع عمله وحياته ويحقق اللي يقدر عليه لأن ماحدش بياخد كل حاجه اوبيحقق كل حاجه
تاخد قراط فلوس علي قيراطين صحه
شوية فكه نجاح في الشغل
علي اربع قراريط حب
يعني
من ده وده تشكيله يعني المهم تبقي راضي
والحياه هتمشي ممكن يحصل لك حاجه وحشه في الشغل تعكنن عليك ترجع تلاقي حد من الاولاد ناجح وطالع الاول تفرح وتنسي زعل الشغل كده يعني
كمان مابحبش موضوع التفائول والتشائم ده احنا منهين عنه اصلا في الاسلام الواحد يعمل اللي عليه ويترك حموله علي الله
الانسان لازم يكون عنده امل في الله
والايقنط من رحمته مايقنطش من رحمة الله الاكافر
واذا اصبت بحزن او مصيبه توضأ وصلي ركعتين واقرا القران
الابذكر الله تطمأن القلوب
حاول تكون راضي بقسمتك راضي لضميرك محب للخير مساعد للأخرين خير بأهلك واصل لرحمك
وقبلهم راضي لوالديك ونول دعاهم لك
هتكون سعيد ان شاء الله حتي لو الدنيا سودا حوليك
--------------------------------------------------------
فاضل سؤال يامحمد(ماهي اكتر اللحظات التي شعرت فيها بالسعاده؟)
--------------------------------------------------------
**اكتر لحظه حست فيها بالسعاده وعمري ماحسيتها كده لاقبل والابعد
يوم ماشفت بنتي وهمه جايبنهالي بعد الولاده كنت سعيده جدا ان ربنا اداني المخلوق ده وطلع مني واول مره اعرف يعني ايه تضحك وتبكي في وقت واحد لحظه من السعاده الفريده عمري ماهنساها

هناك 44 تعليقًا:

ضد التيار يقول...

بجد قدرتى تقولى معنى السعاده صح

ربنا يجعل ايامك كلها حب و سعاده

(:

~*§¦§ Appy §¦§*~ يقول...

عارفه عنيه دمعت على دى


وم ماشفت بنتي وهمه جايبنهالي بعد الولاده كنت سعيده جدا ان ربنا اداني المخلوق ده وطلع مني واول مره اعرف يعني ايه تضحك

مش عارفه ليه
بس كده
ربنا يجعل ايامك كلها سعاده يا شمس

أحــوال الهـوي يقول...

مفارقة عجيبة الدموع مرادفة للحزن و لكنها في بعض الاحيان تعني قمة السعادة
اسعد ايام يوم ولدت ابنتي و كان الناس يتعجبون و يقولون اول مرة نشوف راجل فرحان ببنت ..... يومها ايضا دمعت

السعادة هي تصالح الانسان مع نفسه و شرحها يحتاج ساعات

اسعد الله ايامك و بارك لك في ابناءك
تحياتي

N@B!L يقول...

فعلاً زي ما قال الأخ ضد التيار قدرتي تقولي معنى السعادة صح ... ربنا يديها لنا ويديها للمسلمين جميعاً يا رب، وربنا يجعل حياتك كلها سعيدة ...
وكل عام وانتم بخير

رئيس جمهوريه نفسى يقول...

ربنا يخلي ليكى بنتك ويحفظها من كل سو وتتربى فى عزك وتكون بنت صالحة باذن اللة
ويارب كل ايامك سعادة وحب ان شاء اللة

ABOALI يقول...

السعاااااااااااااااااااااااااااده
معنى ومعانى
انا بحب معنى
وغيرى معنى
بس هى ليها معانى
ممكن راحة البال
ممكن احساس بأمان
ممكن حب الاوطان
ممكن صحة وعافيه
ممكن توفيق ونجاح
ممكن علم وايمان
ممكن دنيا ودين
ممكن حب واحباب
ممكن اولاد وبنات
ممكن زوج وزوجات
ممكن اب وام
ممكن دمعة وفرحة
ممكن بسمه وهمسه
ممكن روح وريحان
ممكن زهرة وبستان
ممكن صبر جميل
ممكن نغم اصيل
ممكن نجاح وعبور
ممكن دهب وقصور
ممكن خير حبور
ممكن رحمه ورحمات
ممكن حب الصلوات
ممكن حب الرسل والانبياء
ممكن حب الللللللللللللللللله


سيدتى كل السعاده
انككككككككك مسلمة

تحياتى

عمرو يقول...

كل سمه و انتى طيبه يا شمس و ربنا يخللى كل ايامك سعاده يارب
العجيب ان الدموع بتنزل فى الفرح و فى الحزن و الأعجب أنها ساعات ما بتنزلش لا فى دى و لا فى دى !!
يا رب السنه الجايه تبقى الظروف أحسن من السنه دى و تبقى النفوس أسعد و أبهج

شمس النهار يقول...

*ضد التيار
وانت كمان ربنا يسعدك ويهنيكي

شمس النهار يقول...

*ابي وانت كمان ياابي ربنا يسعدك
وبكره هتحسي بكلامي ده لما تكوني في نفس الموقف
ان يطلع مخلوق جميل منك وتلاقيه قدامك ده شئ رائع
وخصوصا انكم مع بعض يقالكم 9شهور حاسين ببعض بقلوبكم بس مش شايفين بعض
اللحظه دي جميله جدا
ربنا يكتبهالك ويسعدك

شمس النهار يقول...

*احوال الهوي
كمان احنا المصريين شعب عاطفي
نزعل نبكي نفرح نبكي
مهما كان المولود ولد والابنت
الاحساس بالامومه والابوه لأول مره ده شئ مدهش
حي بيطلع من حي
ربنا يخليهالك وتفرح بيها وهي عروسه
البنات حنينين جدا وخصوصا علي الاب
انا كنت مرطبته بولدي جدا
وخصوصا اني كنت وحيده علي اولاد

شمس النهار يقول...

*نبيل@
وانت بالف صحه وسعاده
وياسلام لو تقول لوالديك النهارده كل سنه وانتم طيبين انا عملت كده
صبحت علي امي في التليفون
وقريت لولدي الفاتحه

شمس النهار يقول...

*رئيس جمهورية نفسي
وانت طيب وربنا ينولك كل اللي في نفسك
بنوتي دي دلوقتي زوجه والحمد لله اظنها من الصالحين نحن لانذكي علي الله

شمس النهار يقول...

*ابو علي
كل سنه وانت طيب
والايحرمنا من ردودك الموزونه

شمس النهار يقول...

*عمرو
كل سنه وانت طيب
عارف امتي الدموع مابتنزلش
ياالموقف او الشخص مايستاهلش الدموع الغاليه دي
او الموقف اكبر من دموع العين هنا القلب هو اللي بينزف دموع بس من دم يكفيك شر الموقف ده لأنه بيكون صعب جدا

دعاء مواجهات يقول...

ماهي اكتر اللحظات التي شعرت فيها بالسعاده؟)

حلو اوى السؤال بجد

بس هيحتاج تفكير

كتيييييييير


سلام ياقمر

funckydoctor يقول...

قولتى كلام تمام لا تعليق عليه إلا أنه قلت فأصبت
ورحم الله الشيخ المسير :(
أول زيارة وإن شاء الله مش الأخيرة

شمس النهار يقول...

*دعاء مواجهات
كل سنه وانت طيبه
للدرجه دي انت شايفه ان السؤال صعب
مع اني حلتهالكم اهو
الرضا(بأنواعه واشكاله)+الايمان+رضاالولدين+الامل في الله=السعاده
ربنايسعدك

شمس النهار يقول...

*فانكي دكتور
اهلا بيك في اول زياره للمدونه
نورتني

saheda.com يقول...

السلام عليكم
جعل الله ايامك كلها سعادة
وفى طاعة الله

tarek momen يقول...

صدقتي
و وصفتي فاحسنتي
كل سنة و انتي بخير و سعادة

شمس النهار يقول...

*شهيده.كوم
اهلابيك
وشكرا لك
نورتيني

mohamed ghalia يقول...

أختى العزيزة
إجابتك بجد رائعة
وربنا يسعدك دايما ويباركلك فى بنتك
شكرا على قبولك التاج
حقيقى شرف ليا
تقبلى تحياتى
دمتى بود

شمس النهار يقول...

*طارق
وانت طيب
ايه ياكبير الموتوسيكل والحركات الشبابيه دي

شمس النهار يقول...

*محمد غاليه
انا اللي بشكرك انك اتحت لي الاجابه علي التاج الجميل ده
وكل سنه وانت سعيد وطيب

fashkool يقول...

عارفه يا شمس يوم ربنا ما يوريك خلفة بنتك الجميله المولوده دى .. يا سلااااااام حاجه حلوه خالص بتبقى حلاوه احلى من الحلاوه عقبال لما تشوفى احفادك زى

صابر وراضى يقول...

وعليكم السلااااااااااام

كل عام وانتى بخير
والصحه والعافيه
بس انا كنت فاكر ان اسعد لحظات الانسان انه اما يتزوج
لكن للاسف
شكلنا احنا الرجاله مش هنشوف اللحظه دى ابدا

romansy يقول...

ربنا يسعدك اكتر واكتر يارب

SemSem يقول...

ماشاء الله اجاباتك كلها جميلة

ربنا يجعل ايامك كلها سعادة باذن الله

تقبلى تحياتى

مفكر يقول...

السلام عليكم:::

فعلاً الرضا أهم عامل ويمكن هو العامل الاساسي في السعادة ومن غيره الإنسان هيعد يجري ورا أطماع هتهد حيله>>>عن تجربة...

أخوك في الله
مفكر

شمس النهار يقول...

*فشكول
الله يخليك ويبارك لك في الاحفاد
الموضه دلوقتي تأجيل الخلفه ياسيدي
عشان بناء الكرير
ماتخلفي ياستي واديهوني
وانت ابني اللي انت عايزاه
ياله
كل سنه وانت بصحه وسعاده

شمس النهار يقول...

*صابر وراضي
اسعد لحظه بتختلف بين شخص واخر مابالك مابين ست وراجل
مرت بيه لحظات سعاده كتير
بس دي كانت مختلفه
ربنايسعدك
وكل سنه وانت طيب

شمس النهار يقول...

*رومنسي
كل سنه وانت طيب
والسنه الجايه محقق احلامك

شمس النهار يقول...

*سمسم
كل سنه وانت سعيد وطيب
وانت مش هتجاوب التاج بتاع محمد

شمس النهار يقول...

*مفكر
عندك حق
نفسي اعرف الناس بتجري ورا ايه
ماحدش هياخد اكتر من نصيبه
كل سنه وانت طيب

د/ رامي شهاب الدين يقول...

كل سنة وإنتى طيبة


ويارب الكل دايما فى خير وسعادة


دمتى بكل الود والخير .. تحياتى

شمس النهار يقول...

*د/رامي شهاب الدين
كل سنه وانت بخير وسعاده
وبحييك تاني علي اخر بوست

tarek momen يقول...

شمس النهار
تحياتي
الموتوسيكل ده ياستي باحاول اقتنص شئ من السعادة
كانت امنية عندي من زمان ونفذتها علي كبر
اه ياليت الشباب يعود يوما..فاخبره بما فعل المشيب
امنياتي لك بتحقيق احلامك

شمس النهار يقول...

**طارق
انت اشتريت موتوسيكل ياكبير
الف مبروك ياعم
عقبال ماتحقق كل امنياتك

fashkool يقول...

شمس النهار .. تحياتى .. والله يا بنتى بقدر الامكان بحاول اذكر المراجع .. بس فيه حاجات زى ما بيقولوا عليها بتبقى معروفه بالضروره وعلى العموم انا مش اكاديمى اللى عايز يعرف معلومه وخلاص يعرفها ..واللى شاكك فى حاجه ممكن يدور هوا عليها .. دى حاجه كدا مختصر مفيد ومش حاقدمه للمناقشه واحصل بيه على شهاده .. لكن اوعدك باكثر من الامكان احاول اذكر المراجع واظن الحلقه الاولى ما قلتش حاجه من غير مراجع .. انا مبسوط قوى من زيارتك

mido يقول...

دأنا نايم فالعسل فعلا عمالين تحتفلوا وانا ولا هنا

كل سنة وانت طيبة و سعيدة يا شمس

وأكيد فرحتى بعد مابنتك اتجوزت وعقبال الباقى

شمس النهار يقول...

*فشكول
والله انا بس مش عايزه حضرتك يتحرق دمك
من التعليقات اللي هتكون في حاجات فرعيه عايزين نستوعب الموضع كويس
وبعدين حضرتك ممكن تزرجن وماتكملش
وده مصير اي شئ ايجابي
اديك شفت اللي حصل في الوثيقه

شمس النهار يقول...

*ميدو
صح النوم ياريس
شفت اللي حصل في المدونه
القايمه اتمسحت
طبعا كنت فرحانه بس مش زي يوم ماولدتها
عشان كنت عارفه انها سيبانا وماشيه
اصلي كنت فاهمه غلط
اللي بتتجوز مابتمشيش ياميدو
حمدالله علي السلامه

م/ الحسيني لزومي يقول...

شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي

شمس النهار يقول...

*م/الحسيني اللزومي
مش معترضه ان حضرتك تدخل المدونه وتدعونا للأي شئ
بس الاعتراض
ان حضرتك كان لازم تحيي اهل المدونه
وبعدين تترك ماتريد
بس ده اعتبره تجاهل
لي ولمااكتب
عموماشكرالحضرتك
برضه شرفتني