الاثنين، 17 نوفمبر، 2008

من صفر الموووووووووووونديال لبكين

امس كان اليوم الرياضي بتاع تنظيف البيت
عندي شغاله مثقفه شويه
سألتني الا ياباش مهندسه ايه موضوع اوباما ده
قلتلها قلت لك 100 مره ماتقوليش ياباشمهندسه انا نسيت الموضوع ده من زمان
المهم مش ده موضوعنا
انها تسألني عن اوبامااااااااااوووووو اوو
افتكرت الحوار اللي كان حصل بيني وبينها ايام الصين وماكنتش نشرته
قلت خلاص افرجي عنه بقه عشان اقدر اكتب لكم موضوعها مع اوباما
**ام محمد الشغاله اللي عندي عزيزه عليه واحب ان اتحاور معها لآني بصراحه بسمع كلام البسطاء الجميل وهي زوجه لبواب مما يجعلها نبض الشارع كله

قلتلها:تعرفي ايه عن بكين ياام محمد

قالت:اهه ده البط يامدام ايوه البط البكيني وكمان مره غسلت عند واحده من الناس اللي باروحلهم حاجات كده قال ايه طلعت

مايوه يكيني زي البط يعني

قلتلها:بكين دي بلد في الصين بلد الصينيين انا قلت كده ودي راحت نازل دعا علي الصين واللي بيجي منها واللي فيها واللي جابوها

سألتها في ايه انت اتجننتي دي عامله كده زي امريكا

قالت بس امريكا ماكانوش هيخربوا بيتي لكن الصين كانوا هيخربوا بيتي

قلت: ازاي ده انت مستهدفه من الصيين بقه

فالت:دول بيجوا العماره وقصيرين قوي كده وشايلين علي قلبهم شنط اتقل منهم عاملين زي النمله اللي شايله حملها

والعجيب انهم ينزلوا باييعين اد كده يخوشوا كل بيت وفي مره الساكنه الجديده عملت عمايلها قال ايه ماندخلهمش العماره

وقالت كلام مافهمنهوش تخريب ابصر ايه بيخربوا اقتصاد البلد
ايه اقتصاد دي ماتكلمنا بالعربي
اللي يخصني العركه كبرت وجوزها حلف مااحنا قاعدين في العماره لولا الحج اللي في الخامس الله يستره كنا اتطردنا يبقوا كانوا هيخربوا بيتي والا لآ

قلتلها:ايوه همه مش هيخربوا بيتك انت وبس دول هيخربوا البلد والعالم

قالت: ايه همه بيروحوا عند بوابين العالم برضه

قلتلها: ماتشغليش بالك

ايه رئيكم

الصين جايه زي هراس جاي بتاعت زمان

الصين اخدت 51ميداليه ذهبيه امريكا 36

الصين دخلت كل بيت

كل شئ بقه مستورد من الصين

عملوا افتتاح الدوره مبهر بكل المقاييس تكنولوجيا علي اعلا مستوي

واستعرضوا عددهم في الآعداد الكبيره اللي كانت في العرض

واستعرضوا حضارتهم القديمه

يعني احنا قوه اقتصاديه علم تكنولوجيا فن وحضاره يعني جدر جامد مش بلد لسه طالع في المقدر ماباقلوش 250سنه

والكلام هنا موجه للآمريكا

يعني هنكون اسياد العالم رسمي

والخطه ماشيه جمييييييييييييله جدا

خليينا احنا نتفرج لاتخطيط والا علم والا تكنولوجيا والشباب امل المستقبل عطلان

الصين حوالي مليار ونص وبيعملوا ايه

احنا صرفنا ادايه علي البعثه الموقره

انا مستنيه التحقيق عشان اعرف اتكلم

دي فضيحه

لوالاموال اللي بتتصرف علي الدوري الفاشل اتصرفت علي الاطفال الموهوبين وعملنا لهم اعداد جيد

يمكن نقدر نوصل في يوم

التخطيط هو الحل مع الضمير مع حب البلد دي

هناك 65 تعليقًا:

romansy يقول...

اول تعليق


ل




رومانسى

romansy يقول...

ههههههههههههههه
يا سلام عليكى يا ام محمد

الصين برغم عددهم الكبير الاانهم فعلا بيتحدوا العالم كله بس دول عالم ذكيين لدرجه كبيره فعلا منتاجتهم بتتصدر لامريكا والمانيا ايوه لانه بيقدورا كل شعب وبيعرفوا ايه هو المكان اللى يودا فيه الحاجه اللى بعشره والحاجه اللى بميه
ماشين على الحكمه
لكل مقام مقال

خمسة فضفضة يقول...

السلام عليكم ورحمة الله وبركاته

والله صدقت ام محمد

باحس ف ي الصينين انهم عاملين زي ياجوج وماجوج اللي هايطلعوا يقضوا علي الاخضر واليابس وياخدوا كل حاجه لنفسهم ومايسيبوش حاجه لحد

ربنايستر

شمس النهار يقول...

*رومنسي
لعلمك العدد ده ميزه مش عيب اللي عندنا همه اللي خيبين
احنا عندنا موارد كتير
كفايه ان عندنا بحر ابض واحمر ونيل وكم هائل من البحيرات والسمك غالي وكمان بقينا بنستورد سمك من الهند والصين وروسيا
قولي كده علي جنب ايه حكاية القصيده الاخيره اللي عجباني قوي دي
ماتخفش سرك في بير مش هقول لحد

شمس النهار يقول...

*خمسه فضفضه
صدقتي
وشوفي كم الاشياء الصيني اللي موجوده في البلد
شوفي الغزو الكرتوني اللي عاملينه للعيال
ربنا يستر

ABOALI يقول...

ما تقولش صينى
ده فى المعنى متين
يمكن يكون قابل للكسر
بس خليك كووووووووول وجميل
فكر كويس
لاءنك هنا غرقان فى الطين
ماتقولش صينى
علشان دول بيطلعوا بالليل
بعدين ياخدوك رهن
ولا تنام طول الليل
يااااااااا عينى
بتقول انك شغال
طول الوقت وبتعانى
ولما نشوف النتيجة
نضحك ونقوووووووووول
صينى صينى تحيا الصينى



سيدتى الصين تفوقت لسببين

الاول محلق ثقافى ماشى وسط الناس
بيشوفهم بيفكروا ازى وعاوزين ايه

الثانى
ملحق تجارى
عامل وسيط بين الشركات والمستوردين

الملحقان موجودين فى كل سفارة فى العالم

يعنى احنا عندنا برضوا
بس احنا لم ننجح لاننا ما بنحبش الملاحق

وعجبىىىىىىىىى


شكرا على البوست الصينى يا صينى

saragebaly يقول...

التخطيط هو الحل مع الضمير مع حب البلد دي

شمس النهار

جيبتي الخلاصة واسباب النجاح

مصر والحمدلله

انعدام تخطيط....!!

انعدام ضمير ....!!

حب البلد تم استبداله بالبحث عن المال وحب الذات .....!!

يبقى عمر البلد ما هتتقدم ولا تتصلح

وللاسف الجيل اللي طالع هو اللي مظلوم

~*§¦§ Appy §¦§*~ يقول...

الموضوع ده من زمان يا شمس اوى
وهما منظمين جدا بس اللى متعرفهوش ان اردا الانوا اللى فى الصين هى اللى بتنزل مصر سواء تجارنا بيستوردوها او الصنين بينزلوها

tarek momen يقول...

انا عايز افهم
هم المدونين قاعدين علي باب المدونة اول ماينزل البوست
طب لاولاا اني واخد اجازة النهاردة وقلت اتفسح بين المدونات
الاقي بوست نازل جديد عندك
قلت اسيب تعليق
الاقي ييجي عشرتاشر واحد معلق
سبحان الله
ناس ليها بخت و ناس مالهاش
تحياتي
دي مناغشة صغيرة علي الماشي

شمس النهار يقول...

*ابو علي
كده برضه انا صيني
ده حتي انا من صعيد مصر الغالي
ياسيدي لو الملاحق هتكون كده ماشي نجيب لنا ملحقين تلاته علي الماشي

شمس النهار يقول...

*ساره الجبالي
الجيل الجديد المفروض انه متعلم اكتر من الجيل القديم وفي ايده تونكلوجيا ماكنتش موجوده والعالم وخبراته واختراعاته ونظرياته بين ايديه بسهوله ناقصه ايه
هواللي كسلان

شمس النهار يقول...

*ابي
شوفي همه عاملين كل المستوايات واللي بيروح يتعاقد او يشتر هو اللي بيختار
وطبعا انت عارفه المستورد المصري بيعمل ايه في المستهلك اللي هو مصري برضه مش يهودي

شمس النهار يقول...

*طارق مؤمن
اهلا بيك
اجازه ليه النهارده هو في مناسبه والا حاجه
انت تنور في اي وقت ياحاج

(أم البنين) يقول...

باين على أم محمد دي مثقفة جدا وفهمتها صح
ويا رتنا زي الصين
ربنا يعزك ويكرمك أختي الكريمة

شمس النهار يقول...

*ام البنين
اهلا بيكي في اول زيار
ويكرمك انت كمان

mohamed ghalia يقول...

لوالاموال اللي بتتصرف علي الدوري الفاشل اتصرفت علي الاطفال الموهوبين وعملنا لهم اعداد جيد


يمكن نقدر نوصل في يوم

موافقه
تحياتى

عمرو يقول...

يقال و الله أعلم أن بعد حرب 67 الرئيس الصينى عرض على جمال عبد الناصر يبعت له مليون عسكرى صينى فى ظرف أيام (مش عارف اٍزاى) يحرروا سيناء فى ساعات فرد عليه عبد الناصر قال له : و دول حأكلهم منين ؟؟
الصين قادمه لا محاله

خواطر ليست عابرة يقول...

امته هنكون بديمقراطية أمريكا
مع أنني أبيض البشرة إلا أنني أقول أن السود المصريين لا يحصلون علي بعض الحقوق كالبيض
مثل العمل في وظيفة مذيع أو مذيعة بالتليفزيون المصري
مع أن هناك العشرات من المذيعيا والمذيعات السود في فرنسا وأمريكا

شمس النهار يقول...

*محمد غاليه
وانا كمان موافقه
كلنا موافقين يبقه المشكله فين
منين ماتقعدمع حد يقول لك الاخلاق الميت ميليون بيقولوا كده يبقه مين اللي ماعندوش بقه وعامل كل العمايل دي فينا

ضد التيار يقول...

التخطيط هو الحل مع الضمير مع حب البلد دي

التخطيط المفروض انه موجود

لكن الضمير هو اللى اتعدم و بسببه اقل حب البلد مافيش تعاون مابين الشعب و الحكومه .. كله بيجرى ورا المصلحه الشخصيه فقط

mahasen saber يقول...

يا نهارى اليى زى وجودنا المشرف فى الدورات الاوليمبيه مدام شمس كل دى بوستات انا مكنتش موجوده فيها
اخس عليا من هنا لكوكب عطارد
انا اسفه على التاخير بس الريدر اضبطه بس اصلى لقيت ورقه فيها اسامى مدونات ضفتها ولسه بجمع فى باقى الينكات فده اكيد اليى عطلنى بجانب ان النت فصل من عندى يوم ونص وبخلاف بيرو لانى انشغلت معاه تعب بعنيه الحلوين وطبعا غيبته من الحضانه انشغلت معاه

عارفه عارفه كويس قوى كلها اعذار اقبح من ذنبى بس بعتذر ليكى ومنك قوى قوى قوى
وده لان حضرتك ومدونتك عزيزه عليا قوى قوى
فمقدرش على زعل حبايبى بتاتا وبالذات اجمل شموس الدنيا..شمس النهار..

اعتذر تانى ولا كفايه كده

mahasen saber يقول...

اما ام محمد وثقافتها العاليه وان بكين زى البط البكينى اليى هما الاتنين ميختلفوش عن المايوه البكينى
يا سلام برضه ساعات كتير الناس البسيطه بيطلع منها عبر

مره بتكلم مع واحد بسيط وطلق مراته فبقوله وطبعا بهدلتها عبال ماخدت الورقه قالى عيب يا مدام آكل حق وليه

شفتى البسطاء عالين ازاى
...........
انا رايحه المطبخ عامله ايه النهارده
حضرتك اليى عزمتينى هدخل واطلع كده على الفاضى

fashkool يقول...

الصين وما ادراك ما الصين ..
شمس الشموس .. شمس النهار الأموره .. عن الصين حدث ولا حرج .. دول مش فى الصناعه بس .. دول بقى فى التكنولوجيا وكمان تسمعى عن كلمه اسمها التقنيه .. دول بقوا فى التقنيه كمان .. طبعا احنا مش عارفين نخش عالم التكنولوجيا ولا عالم الفجل لوجيا ولا عالم حتى الخيار لوجيا .. احنا احسن حاجه وخدنا البريموا فى العالم كله باختراع اسمه القرع لوجيا وبقينا اخر خيبه لوجيا واخر ناس فى العالملوجيا.. تحياتى يا شمس

blue-wave يقول...

هههههههههههههههههههه
والله الشغاله بتاعتكم دى عسل
بس فعلا
يا خيبتنا قدام الصين

مفكر يقول...

السلام عليكم::


صدقت والله يا شمس النهار

المفروض يكون فيه اهتمام مدروس ومخطط وهادف بالأطفال والشباب

والله احنا ممكن نعمل أي حاجة

يعني احنا كدة كدة عندنا مخ وفهلوة لو مستخدمنهاش في تحقيق نهضة هنستخدمها بطرق شتى علشان نعيش..والطرق الشتى دية ممكن تكون تحت في الظلام..


انا بصراحة سعيد اني متواجد في مدونتك

مفكر

shawkat يقول...

احنا ممكن نستفيد بالصين

انهم يقفوا امام امريكا

و يهبطوهم شوية

و دي سنة التدافع

أسامة وغيداء يقول...

هههههههههههههههه
طبعا عندنا في السعودية تقريبا أغلب البضائع صينية وفيه ياباني وحتى الماركات صارت صينية رغم أن أسعارها تضاهي الفرنسة وصارت الماركات الفرنسية مساوية للصينية في المولات والمراكز التجارية وطبعا انتشرت بشكل كبير ملابس وأجهزة وأدوات تجميل وأدوات نظاففة وبجميع الأسعار يعني منها الرخيص ومنها الغالي المهم كان لي صديققة مصرية هنا تعمل بالسعودية معنا وفي الإجازة نزلت لمصر وهي محملة بالهدايا الصينية ولما رجعت كانت تحكي لي وتقول تفاجأت إنه أغلب الأشياء اللي جبتها لقيتها عند أبنائي حتى الجوارب ولما سألتهم قالوا من البياعين الصينيين يلفون ببضائعهم فوق ظهورهم رغم إنهم ساكنين في محافظة بصراحة أنا مت ضحك وتخيلت اشكالهم خاصة إن أجسامهم صغيرة فكيف يتحملون اللي فوقق ظهورهم هههههههههههههههههه
اممممممم عندنا الصينيين تطوروا مايتجولون بالبضائع أتوقع لو تجولوا بها محد راح يشتري منهم ههههههههههه
الشعب السعودي يحب يدلع نفسه ويشري من المولات الفخمة والماركات المشهورة

عصفور مهاجر يقول...

باين انا تهت ...
مبروك ياباش مهندسه الnew look
موضوعاتك جميله وشيقه ..

د/ رامي شهاب الدين يقول...

الشعب الصينى شعب ذكى ، بنظرة خبيرة بيعرف كل بلد ناقصها إيه وبيصنعه وبيصدره إليها ، ده طبعا بعد تحديد القوة الشرائية للبلد ومستوى السيولة فيها إيه

الموضوع بقى مسخرة لدرجة إننا بنستورد منهم الأستيكة والكيس النايلون أحيانا والشباشب البلاستيك وهلم جرا، و الأمر وصل لحد السبحة إللى بيجيبها الحجاج من السعودية

ياخوفى بكرة يجيبوا رجالة صينى، ويقولوا أرخص ومش بياخد حيز كبير فى البيت ههههههه

موضوع مهم فعلا وبيلقى الضوء على الغزو القادم المسمى بالغزو الصينى الأصفر

سؤال بقى خارج الموضوع: هو حضرتك درستى هندسة؟جامعة إيه؟قسم إيه؟

وشكراااااااااااااااا

أحــوال الهـوي يقول...

الصين ؟؟؟

اصبحت السبب في كل بلوي في العالم حتي انهيار الاقتصاد العالمي نسمع عنهم وان امريكا عامله الحركة دي لتدمير اقنصاد الصين

لكن في النهايه لابد من رفع القبعة لهم شعب المليار و مئات الملايين و يملكون اقوي و انجح تجربه بتحويل شعب مغيب بالافيون ال طاقه انتاجيه هائلة مثبتين ان التعداد السكاني ليس عائقا للانتاج و قوة الاقتصاد كما تهلل ابواق الحكومه بان الزيادة السكانيه هي سبب تخلفنا و ضعفنا
دوله قامت بغزو العالم و احتكار الدول الكبري للصناعات المختلفة فانتجت كل شئ و باسعار متواضعة مما ادي بالشركات الغربيه بتخفيض اسعار منتجاتها ايضا

اين التخطيط ؟؟؟؟؟ افة ليس لها حل في مصر يعملون بمبدا دع الفتنة نائمة الويل لمن ايقظها
يعني خللي المشكلة و استعمل الترميم و المسكنات الي ان تتفاقم ويصبح حلها مستحيل

تحياتي
زوريني

شمس النهار يقول...

*عمرو
كمان كانوا عايزين يحاربوا بدلنا

شمس النهار يقول...

8خواطر ليست عابره
انت بتشوف القناه بتاعت الصعيد فيها مذعات ومذيعين سمرجدا
كمان المذيعات اول ماتطلع تلاقيها مصريه %بعد شويه تلاقيها استوت واصفرت بقدرت قادر
شعرها اصفر وعينيا اخضرت ازرقت وكمان ابيضت

شمس النهار يقول...

*ضد التيار
مافيش تعاون بين الناس اصلا مش بس بين الحكومه والشعب
عشان الانانيه تفشت

ضد التيار يقول...

شموسه حبيبتى بخصوص سؤالك

كل حاجه كويسه لكن المدونه بس بتاعت كيارا اتعمل عليها هاك

وطلبت اننا نعلن عن المدونه التانيه عشان ماحدش يدخل ضى القمر

لحد ماهى ترجع من تانى و تتصرف فى اللى حصل

اطمنى ياشموستى (:

Dr Ibrahim samaha يقول...

حقيقة فالإقتصاد الصينى اصبح عملاق ينافس أمريكا وأصبحت الصين قوة إقتصادية ذات شأن

تحياتى

د إبراهيم

شمس النهار يقول...

**محاسن صابر
اهلا اهلا
وحشتيني جدا
ازي ابنك وماما ان شاء الله كله تمام
عارفه ومقدره اللي انت فيه
مسمحاكي بس برضه علقي في اللي فاتك عشان بحب تعليقاتك جدا
احيانا الرجل البسيط الغير متعلم اللي علي سجيته بيكون ارجل من كتير رجاله متعلمه وفي اعلا المناصب
تسلأليني ليه اقول لك عشان من وجهة نظري انهم لسه علي احاسيس الفطره والفطره بتقول ان الرجل ماياكلش حق الست

Beram ElMasry يقول...

العزيزة . شمس النهار
السلام عليكم اولا
تصدقى بالله انى ضحكت من البكينيين وهو كله بط
( فهمت صح والا لا ) لم يجانبك الصواب
تحياتى

شمس النهار يقول...

*بلو ويف
اهلا بيك
علي فكره الصوره دي احلا من التاني
التانيه النور كان مقطوع

شمس النهار يقول...

*مفكر
انا كمان سعيده انك موجود فيها
وبفرح جدا بيك انت وكل شباب المدونين بحس ان لسه في شباب كويس
احنا بنستعمل الفهلوه في اي حاجه غير هادفه او منتجه

شمس النهار يقول...

*شوكت
اهلا بيك في اول زياره
الحقيقه ان الامريكان ارحم من الصينين كتير
عمرك تقدر تطلع نمل من بيتك لو احتله

شمس النهار يقول...

*اسامه وغيداء
ماشاء الله تعلقكم جميل جدا
فعلا اخويا عايش في بلاد الفرنجه وبرضه بيجيب هدايا مصنوعه في الصين بس عالية الجوده

شمس النهار يقول...

*عصفور مهاجر
دفعت في النيو لوك ده دم قلبي
والقايمه
انت كنت فين صحيح
انا افتكرت طرت من البلوجر

شمس النهار يقول...

*د/رامي شهاب
صح والله
وكمان الرجل الصيني هيوفر في الاكياس البلاستك المستورده من عندهم لما تيجي الستات تعبيه في اكياس
شوف ياسيدي
انا مهندسة ديكور
مره التليفون ضرب ام محمد ردت عليه اللي طالبني كان من النقابه
فقال منزل الباش مهندسه
ومن يومها وام محمد مصره تناديني كده
ووجهة نظرها ان السباك بيقولوله كده وهو مش كده يبقي لازم اناديكي كده مش ابويا صرف عليه عشان ابقا كده خلاص هي هتناديني كده
احاول اقنعها ان ماينفغش عشان احنا في بيت مش مصلحه حكوميه مافيش فايده هي دماغه ناشفه بس دمها خفيف وساعات بتقول كلام فيه كتير من الحكمه والمنطق كده بالفطره

شمس النهار يقول...

*احوال الهوي
صدقت
حاضر هزورر حضرتك حالا رايحه المدونه

شمس النهار يقول...

*ضد التيار
الحمد لله طمنتيني يابنتي
وهي كويسه
قولي لها ماتزعلش نفسها

شمس النهار يقول...

*دكتور ابراهيم
اهلا بيك اول زياره
حصلنا الرعب من الصوره ياريس

شمس النهار يقول...

* بيرم المصري
لم يجانبني الصواب
اذا انا صح

من غير عنـــوان يقول...

* يا باشمهندسه أنا الدكتور مانعني من الكلام في الحاجات اللي تعلي الضغط ( ولو إني والحمد لله ماعنديش ضغط) أو يمكن السبب إني ما مابخشش في الحوارات اللي ترفعلي الضغط

طبعا مش قصدي حاجة
بالعكس موضوعك ضرب مباشر على مستقبل هذه الأمه

وأنا فتحته الصبح قلت عايز رواقه

طب العصر أعلق.. كنت جعان

قلت قبل ما أنام

بصي يا ستي
أنا قعدت أقرا الألف تعليق دول ( اللهم لا حسد) وردك على كل واحد

وأنا لسه حاكتب

* ممكن نقعد نتحسر وممكن نقلد الصين.. لو كل واحد عمل حاجه ولو صغيرة... من غير حوار كبير.. لو كل واحد علم البواب أو الشغاله كلمتين يمحو بهم أميته

لو كل واحد زرع نبته صغيره في بلكونته عشان نتنفس كويس ويا سلام لو يحافظ على النبته الجميله اللي في بيته اللي هيه ولاده ويحلم لهم بمستقبل أفضل مع ولاد صاحبه من المدونه اللي جنبه

لو كل واحد صحي بدري واشتغل بضمير

لو كل واخد بطل يرمي حاجة من عربيته ويقولك هيه جت عليه

لو كل واحد ما دفعش فلوسه ( ويمكن يستلف) عشان الناس تتفرج عليه وهو ماشي في الشارع ماسك المخبول على ودنه... نفسي أعرف بيتكلموا في إيه ؟؟؟!!!!

لو كل ست بيت من نفسها بطلت تاخذ وتشتري عروض كارفور اللي فيها 730 بكرة تواليت... وغيرها
17 زجاجة زيت
18 علبة مشروم
35 مناديل ورق بس في كيس بلاستيك
78 شوربة ماجي وعليها علبه بلاستيك صــُغـــيــــــرة

إلا صحيح هو ده من قلة العلب ولا قلة الأدب

بصي يا شمس
طبعا أنا بأقول شمس حاف من غير مدام أو طنط عشان أنا أكبر منك ( سناً)

بصي يا شمس ما تفتحنيش في المواضيع اللي هيه بتسنفر فيه ملاحظات على هذا الشعب اللي لازم يولع التليفزيون ويقعد يتكلم في التليفون

وقال المتنبي غفر الله له ولنا:

ذو العقل يشقى في النعيم بعقله
وأخو الجهالة في الشقاوة ينعم

* طـــول ما مستوى سمع الأغاني هو اللي في عربيات الميكروباس
وبنت صاحبي في فرحها جابت بعرور ( أيوة ده اسم واحد)
وهي خريجه الجامعة الأمريكية أيوة جابت المذكور في الفرح اللي اتكلف ألأوفات

طول ما انت شايفه ده... ما تكتبيش...

إحلمي

زهقتك

تصبحي علف ألف خير
وبكره الصبح في مطبخ شموسه عايزين جمام محشي مع ورق عنب وفخده ضاني مع الباميه وشوية ورق عنب والحلو أم علي مع بسبوسه ... وبكده يمكن نرتاح ...



أمنياتي ي ي ي ي ي ي

fashkool يقول...

جيت اقرا عندك وفى انتظار الجديد .. تقبلى مرورى وتحياتى

مولان يقول...

شموستي حبيبتي

انا بخير انتي عارفه التوضيب مقرف اوي


اما اللي حصل للمدونه فانا فسرته عندي

ربنا يخليكي لسوالك يارب

ولما ارجع هرد علي البوست عشان اكون قريته كويس

امممممممممممموه

الجواز و سنينه يقول...

يااااااااااااه دا انتوا شايلين اوى من الصين
اكتر من اللى شايلينه الصيينيين على قلبهم و همه طلعين العماره
هههههههههه
همه مش قصيرين... بس احترس من كل كم اقترب من الارض

أحــوال الهـوي يقول...

شمس النهار

سد الدين ؟؟؟؟لما نسد جشعهم الاول و نهبهم لثروات البلد

اللهم نعوذ بك من الهم و الغم و الدين و قهر الرجال

تحياتي

مفكر يقول...

السلام عليكم::

ازيك يا شمس النهار؟؟ حبيت بس أسلم عليكي...

صابر وراضى يقول...

وعليكم السلاااااااااااام:
اول حاجه هى اسمها بجين وبكين دى للبط وللحاجات التانيه
اما بالنسبه للمصاريفف فى كتيره
انا سمعت انها اكتر من 100 ميلون
وام احمد دى المفترض تمسك وزارة علشان الحال ينعدل

شمس النهار يقول...

**بدون عنوان
--------
مابلاش ياباش مهندسه دي ماتفكرنيش....
اناكمان ماعنديش ضغط عشان كده بتكلم براحتي وماتخفش في سننا ده مابيجيش ضغط خلاص فااتكلم براحتك
*حضرتك قلت لو كل واحد عمل حاجه طب واللي عمل
اتطوعت في برنامج محو الاميه بدون مقابل
تعبوني جدا جدا عذبوني لدرجة اني ماكنتش مصدقه
واستحملت لحد ماخرجت الناس اللي معايا ومشيت كل اللي عملته وزعلهم خلصت البرنامج اللي عاملينه بسرعه
مع الستات
وكان عندي شغاله اخدت الابتدائيه علي يد العبده الفقيره الي الله
وعندي بلكونه ملاينه زرع جميل وعندي زرع جميل داخل الشقه كله نباتات ظل يغلب عليه البوتس
اما الابناء الحمد لله ربنا اكرمني فيهم وجنيت معهم مازرعته فيهم من تربيه وعلم
الصحيان بدري ده دلوقتي صعب وكمان مابشتغلش والابناء كبروا
الحمد لله مابحبش ارمي حاجه من العربيه عشان ده ضد الدين وتصرف غير حضاري
وعندي محمول اخويا اهداهوني في عيد الام
ومابتكلمش فيه كتير عشان بيجيب صداع
مابحبش العروض الغذائيه عشان بتبقي صلاحيتها قربت تنتهي وده اللي الناس مش عارفينه
العلب البلاستك اصلا غلط لاتصلح للأحتفاظ باالاكل
اتكلم براحتي بقه والا لأ
ومابسمعش غير الاغاني الحلوه اللي ليها معني
وطبعا بحلم بس مش ليه لبناتي
اتكلم بقه والا لأ
وعشان ماتزعلش وترتاح حاضر هنعمل كل الاكل اللي طلبته بس علي مراحل
ان شاء الله
هبقي ادعيلك في الحج

شمس النهار يقول...

*فشكول
حضرتك تشرف في اي وقت

شمس النهار يقول...

**مولان(كيار الحبيبه)
الحمد لله انك بخير
وترجعي بألف سلامه

شمس النهار يقول...

*الجواز وسنينه
عندك حق فعلا لازم نحترس منهم

شمس النهار يقول...

*احوال الهوي
آمين

شمس النهار يقول...

*مفكر
الله يسلمك
اخبار الذاكره والكليه ايه
ماجتش المطبخ ليه
هنعمل خرشوف النهارده
انت بتنور يامفكر

شمس النهار يقول...

صابر وراضي
السلااااااااام عليكم
انا كمان بقول كده لازم ام محمد تمسك وزاره بس وزارة النظافه

قلب شاعره يقول...

ههههه فعلا على اد ما كلام ام محمد بسيط على اد ماهو صحيح فعلا ...
الصين قربت تحتلنا بالفعل .. كل حاجه صينى صينى .. مصر ضاعت ولا ايه ..
بصراحه انا لما شوفت افتتاح دورة بكين فى استاد عش الطائر ...
انتابنى حاله من الخوف الشديد مش عارفه ليه . . بجد خوفت لدرجه غريبه حسيت اننا ضايعين خالص .. ربنا يستر ..

شمس النهار يقول...

*قلب شاعره
صدقتي همه كانوا عايزين يخوفوا العالم ويبهروه
دي كانت مش حفلت افتتاح لاكانت حفلت ارهاب

من غير عنـــوان يقول...

بـــــــــــراءة

اتكلمي براحتكك
_________________
أقولك حاجة
قفلي على كل المواضيع..
يا حاجّة

وتزودوا فخير الزاد التقوى...
يعني سيبك بأه من المدونات دلوقت.. وإديها شوية فقه حج
________________
أفضل الدعاء الذكر...
وأفضل الذكر قراءة القرآن..

عايزك تفتكري ده في عرفات

يقول سبحانه في حديث قدسي
من شغله ذكري عن دعائي أو مسألتي.. أعطيته أفضل ما أعطي السائلين أو كما جاء في الحديث القدسي

تقبل الله منك... وجعاه حجا مبرورا وذنبا مغفورا بإذنه جل جلاله


مبروك

Mahdi Mahdi يقول...

يلزمنى رايك فكن ناصحا ولا ملامة، فهدفى افهام المرضى والموتورين ممن يتطاول او يخادع بدس السم فى العسل تحت دعوى الدفاع عن الاسلام ، ان العين بالعين والسن بالسن والبادى اظلم