الجمعة، 22 أغسطس، 2008

يافضائيات يا

خبر غريب وعجيب اعلنه اليوم برنامج عم يتسألون علي دريم انشاء اول قناة فضائييه للمنقبات فقط
يعني كل العاملين بها من المنتقبات ومافيش رجال خالص مش فهمه حاجه
يعني همه اعتبروا الوجه عوره والصوت لا والاهمه هيمنعوا الرجاله تتفرج عليهم
يعني لو رجل فتح القناه دي يطلع له عفريت يسد له ودانه
والا ايه
ومن مهند باشا لقناة المنقبات يا قلبيي لاتحزن

هناك 33 تعليقًا:

tarek momen يقول...

خبر غريب و لا تعليق
ولا اقولك هابقي احضر نقاب احتياطي علشان و انا باقلب القنوات لو جت بالصدفة

Foxology يقول...

الضحك على الدقون بأة للركب الواحد مش عارف هما بيضحكو علينا ولا على نفسهم ؟؟؟؟

tamer.sala7 يقول...

ههههههههههههههههههه

علي فكرة نكتة جديدة لانج

ودي بقي كدة تعتبر فرع من فروع محلات المحتشمة بتاع العبايات الحريمي ولا ايه

شمس النهار يقول...

طارق
الحل انك تنقب القناه نفسها او تتفرج من وراء ساتر
فوكسلوجي
لابيتحكوا علي الناس الغلابه الاميين
اللي الحكومه سيباهم غنيمه للناس دي
حد هيقولي همه الناس دي عندهم دش ايوه البركه في الوصله اللي هي اصلا حرام
انزل عزبة الهجانه وانت تشوف الجهل والفقر والتطرف الجاهل همه دول يوم الجد اللي هيكونوا ايديهم اللي هتيطش
اصلهم وعدنهم بالجنه
تامر صلاح
ايوه نكته بس حراقه قوي
لادي فرع من فروع محلات الشىخ والشيخه للو للفتاوي التيك اوي

mohamed hesham يقول...

بجد والله !!؟!

عموما الواحد ياما يعيش ويشوف ...

ممكن نعتبرها واحدةمن القنوات النسائية الجديدة ...

كاتب مصري يقول...

الغريب انهم اعتبروا الوجه عورة ونسيوا الصوت

TAFATEFO يقول...

الصوت عوره دي نكتة سامية جمال

النقاب حرية شخصية .. قناة للمنتقبات برصه هما حرين .. لكن مش علمي ولا منطقي .. تعبيرات الوجه مهمه جدا جدا للتواصل .. ايه فرقها بقى عن إذاعه؟؟

الملاحظ .. ان السلفيه بقت أكتر بكتير

التشدد الديني بيزيد .. والانحلال بيزيد .. والوسطيه بتضمحل

شمس النهار يقول...

*محمد هشام
القنواة النسائيه لها اصول ان تعلم المراه شؤنه الدينيه والدنياويه وتستفيد منها المتعلمه والغير متعلمه
وكما نعلم ان الاعلام رساله وضمير وشرف
هنا انعدم الضمير لان الناس دي عارفه بتعمل ايه دي عايزه تعمل غسيل مخ للمراه اللي هي نصف المجتمع
همه لواعتبروا المراه عوره فعلا ماكانوش عملولها قناه
بالعكس همه عارفين قيمة المراه
عشان كده حبوا ياخدوا المجتمع من جزوره يربوا المراه علي ايديهم عشان تطلع لهم الشاب والشابه النسخه اللي همه عايزنها
يعني كده خطه طويلة المدي يعني
*كاتب مصري
همه لااعتبروا الصوت والا الصوره عوره
همه استخبوا ورا ستاره عشان وجه الخطه القبيح مايبنش
*تافاتيفو
الاسم كده صح
الحريه انك تكفي الناس شرك همه مش حرين دول بينخربوا في المجتمع
وما تنساش ان احنا في مجتمع تغلب عليه الاميه وجهل المتعلمين

TAFATEFO يقول...

أرجو ألا يساء فهم ما سأقوله .. فأنا أؤمن تماماً بالحرية الشخصية ولا أقصد الإساءة لأي من الطرفين

السيدات و الساده الأفاضل
لي عدة تعليقات
* المرأة عورة !! مين قال كده؟ السلفيه مش بيقولوا كده .. وهل كل ما يستر عوره .. عورة الرجل ما بين صرته وركبته .. ولو مشى رجل مغطيا هذا فقط .. لاتاء منه الناس

* الخطه (كما فهمتها بضم الخاء وتشديد وفتح الطاء) دي إهانه .. وحجر على حرية أفراد .. هما بيدعوا المرأة للاقتداء بيهم .. هم حرين .. هم شايفين ان ده الصواب .. من حقهم يقولوا رأيهم ويدافعوا عنه .. ومن حق حضرتك تنقديه .. وإن أساء أحد الطرفين وأخطأ في حق الآخر .. فلا يجب أن نتبادل الإساءة بالإساءة

ايه اللي يمنع ان أيا من كان لبسه ومظهره .. يدعو الناس للاقتداء به .. ديفيليهات البيكيني (وإن كانت حرام طبعا) بس هما حرين .. واللي رايحين رايحين يتفرجوا على بيكيني .. لو حبوا يعملوا قناة ديفيليه بيكيني .. برضه هما حرين .. طالما هيقولوا ان القناه دي لديفيليهات البيكيني .. حد شريكهم ؟؟
وإذا كنا نرى بعض العري والإباحيه في قنواتنا .. وإن انتقدنا، لكننا لا ندعو لإغلاقها .. فما الغضاضه من وجود قنوات متشدده

* ملحوظه: أنا مش منتقب :D .. ولو أختي سألتني أنتقب ولا لا .. هقول رأيي لا .. لأنه عائق عن التواصل الاجتماعي.


يا ريت نبطل نحجر على آراء الناس .. ونسيب الرأي المجرد فقط .. أنا آسف لو اتفهم من كلامي أي ساءه لأحد .. لكني لا أقصد ذلك

TAFATEFO يقول...

"انعدام الضمير لان الناس دي عارفه بتعمل ايه دي عايزه تعمل غسيل مخ للمراه اللي هي نصف المجتمع"

معلش هعلق تاني على الجمله دي بالذات

مشكلتنا .. اننا بنسيب الآراء .. وهاجم الأفراد .. ما ننقد المنهج زي ما احنا عايزين .. لو حضرتك قلتي على من يدعو للنقاب ويخطط لدعوة النساء وإقناع السيدات بالانتقاب .. منعدم الضمير .. ايه اللي يمنعه انه يقول على من يدعو لغير ذلك انه منعدم الضمير
وإن قال .. هل يجدر بسيادتك أن تقابلي الإساءة بالإساءة؟!

مفيش مانع اني أقول ان ديفيليهات البيكيني ولا حتى هاني البحيري تعرض فيها أزياء غير مطابقة للشريعة الإسلامية .. اللي رايح يشوفها هو حر .. واللي يتفرج عليها في التليفيزيون هو حر .. ولو عملولها قناة .. برضه هما حرين

أي حد ممكن يهاجم الفكر أو المنهج نفسه .. لكن ميصحش نهاجم الشخص أو متبني الفكر
نناقش الفكر بالفكر .. عقل بعقل

"غسيل مخ"
طب ازاي؟ القنوات التليفيزونية كلها مفيهاش مذيعه محجبه (غير البرامج الإسلامية وأ/ سوزان مقدمة مباشر مع) .. وبقالهم أكتر من 30 سنه على المنوال ده .. ومع ذلك شوفي حضرتك الحجاب ونسبته في المجتمع .. طالما في رأي ورأي آخر (ومش لازم في نفس القناه) .. ده يبقى رأيين .. مش غسيل مخ
واللي تقتنع بأي الرأيين هي حره .. وحسابنا جميعاً على الله

تاني .. أنا مش منتقب .. ولا أي من أسرتي .. وأنا مش مقتنع بفرضية النقاب .. ولو حد سألني أنهي الأفضل من وجهة نظري هقول عدمه

TAFATEFO يقول...

حاجه أخيره لا أفخر بها ولا أخجل منها

أنا مسلم الحمد لله - أتجنب المعاصي قدر الإمكان .. ولكني لست على درجه كبيره من الإلتزام

بغلط كتير جداً .. وبعمل حاجات عارف انها حرام .. وبستغفر ربنا .. عادي

حاجه كمان .. السلفيه بيدعو لارتداء الجوانتي .. وهو ما ليس بعورة نصاً .. برضه هما حرين .. ومحدش فيهم قال على اليد عورة

محدود الدخل يقول...

مش عارف هي السلفية بعبع ليه
ليه كل ما بياخدو خطوة الكل بيهتم وبيهاجم

السلفية بتقدم أعلام موجه
أتحدى أي حد يجيب ليا قناة تلفيزيونية واحدة بتقدم أعلام غير موجه وحر
وبعدين ما كل تيار سياسي أو ديني بيعمل على نشر فكره ومنهجه وثقافته
بكل الوسائل المتاحة ليه خصوصا الوسائل الشرعية

نقلع ونعري ونغني على OTV حرية
نعمل قنوات أسلامية ... مخططات خفية
عجايب يا بلد

ابو النجوم يقول...

صديقتى
طالما هما عايزين يخلوها نقاب فى نقاب مايتنيلوا ويقعدوا فى بيوتهم يعنى هو احنا ناقصين ماداموا ناس شرفا ومتدينين كده ايه اللى جابرهم على الاوساخ امثالى ماكل واحد بدقن وواحده منكبه يتنيلوا ويسبونا فى حالنا. ولا احنا صعابنين عليهم وعايزين يدخلونا الجنه غصبا عن اللى جابونا--------
نتكلم جد شويه- الحكايه انها سبوبه وسبوبه عشره على عشره اسألى كده الجماعه اللى بيسموا نفسهم (داعيه ) بياخدوا كام فى القنوات دى وانتى هتلاقى نفسك تانى يوم بقى اسمك الداعيه شمس . كل الحكايه انك تربى دقنك وتلبسى جلابيه وبنطلون وتتعلمى تشهقى كام شهقه كده وتستخدمى المصطلحات المتداوله بينهم مثل الله المستعان وبارك الله فيك وكام كلمه من منقوع الاونطه بتاعهم وبعد كده هتاخدى مرتبك فى شوال وكله ورق ب 200 جنيه يعنى هتعمليهم على السريع. والحق مش عليهم الحق على القوادين اللى بيسمحوا لهم بالنصب على البسطاء والجهله

شمس النهار يقول...

تافاتيفو
شوف يادرش انا معاك في موضوع الحريه الشخصيه
بس ماتمشيش بعجله علي الرصيف وتقول حريه شخصيه
الناس دي مش بتخاطب اللي زي وزيك دي بتخاطب البسطاء والاميين
انت عارف في الريف والصعيد كلمت مين المسموعه سيدنا الشيخ فالو عنده ضمير عمرت ولو ماعندوش خربت
الانسان بالفطره يميل للدين والتدين
لو التوجيه صح الحمدلله لكن لو غلط يبقي عليه العوض
يعني تقدر تقولي المتطرفين والارهابيين جم منين ماهو من الفكر الموجه اللي مش لله في لله دي ليها اغراض اخري انامابحبش احجر علي حد واحب اعرف كل الآراء
لآني مؤمنه انك لوسمعتني وسمعتك ممكن نطلع بفكر جديد
المهم اننا نتناقش بهدوء
والموضوع مش موضوع نقاب دول ناس عايزين يجبونا ورا لو قرأت عن المراه في الاسلام كانت بتعمل ايه هتزهل
الموضوع كبير يادرش
شوف الاندلس اتطردنا منها ازاي ماهو مخطط زي اللي احنا عيشينه دلوقتي بس ده علي اتقل بيعلمونا الهيافه
بالنسبه لقنوات العري اللي بيسموها قنواة اغاني ياما سمعنا ام كلثوم وفيروز وغيرهم ماشفناش واحده اتعرت فيهم وكنا نطرب لهم اما اللي بيحصل دلوقتي شئ صعب
امااللي كنت عايزه اكمل بيه كتبه ابو النجوم اقراه
*محدود الدخل
السلفيه ولواني مابحبش التسميه دي
مش بعبع والا حاجه همه اللي عايزين يدخلوا في عقولنا انهم بعبع ومع احترامي الشديد لهم اي طالب في جامعة الازهر حتي لو ساقط في مليون ماده هيهلهلهم ويطلعهم بزراميت
الدين هو القران والسنه وتفكير وتدبر في خلق الله واعبد ربك واخلص له الدين
مش تعمللي مذاهب وابصر ايه
اما موضوع المذيعات الغير محجبات شرط في التليفزيون المصري ان تكون المذيعه غير محجبه لييييه
خايفين الفكر المتطرف يعشش في مسبيرو
وبوداني سمعاها من مزيعه مشهوره لوسمحوا بالحجاب هيتحجب نصنا ماكنش اكتر
*ابوالنجوم
انامعاك في كل كلمه قلتها وبالذات موضوع الدعاه الجدد
انا بقيت حاسه انهم زي نجوم السيما والكوره احنا بقينا في زمن اللي تغلب به العب به
ان فتحتني في الكلام عن الموضوع ده مش هسكت قبل عشر سنين

محدود الدخل يقول...

**********
السلفيه ولواني مابحبش التسميه دي
مش بعبع والا حاجه همه اللي عايزين يدخلوا في عقولنا انهم بعبع
**************
ياريت توضحي ليا أزاي عايزين ينشرو فكرهم وأزاي عايزي يدخلو في عقولنا أنهم بعبع ؟؟!!!!

**********
ومع احترامي الشديد لهم اي طالب في جامعة الازهر حتي لو ساقط في مليون ماده هيهلهلهم ويطلعهم بزراميت
**********
لا تعليق ((:


************
الدين هو القران والسنه وتفكير وتدبر في خلق الله واعبد ربك واخلص له الدين
مش تعمللي مذاهب وابصر ايه
***********
هي أه السلفية
القرأن والسنه بفهم سللف الأمة
مين سلف الأمة
الصحابة والتابعين وتابعي التابعين والعلماء
يبقى أعتراضك على السلفية في أيه ؟؟

أما بلنسبه للمذاهب
فده قالو سيدنا محمد أن المسلمين هيكون طوائف
طائفة واحدة على الحق والباقي في ضلال
يعني مهياش حاجة عجيبة أو غريبة
...

شمس النهار يقول...

*محدود الدخل
شوف ياسيدي بالبلدي كده
همه عايزين يوهمونا انهم قوه كبيره
والناس بتحب القوي اوم ايه الضعيف يروح لهم يتحاما فيهم والدماغ يخاف منهم ويقول ياعم اكفينا شرهم
اما بالنسبه لطالب الازهر لو ناقشهم يما يتذكره من مواد علميه هو فاكره لسه هيطلع نص كلامهم غلط والا انت متفق معهم ان النقاب فرض وان صوت المراه عوره ونصوم رمضان لما نشوف الهلال بالعين المجرده مع تجاهل التقدم العلمي
مين اللي قالك ان السلفيه النهارده كده علي طريق السلف الصالح السابق لو همه كده ماكناش ادايقنا
اما المذاهب انا ماتكلمتش عن المذاهب المتفق عليهااللي فسروا وافتوا المسلمين بما يتفق والزمن اللي كان فيه المسأله انا اقصد ان حتي السلفيين انقسموا فيما بينهم وتوهونا في مسأل ابعدتنا عن الذي خلقنا من اجله واهمه عبادة الله
اتمن ان اكون شرحت وجهة نظري
وان كنت اخطأت او اصبت فهذا فهمي البسيط للموضوع حيث اني غير متخصصه
ولكني اسمع جيدا واحاول ان اقراء حتي استطيع ان افهم مايدور حولي ولي شرف المحاوله

محدود الدخل يقول...

مع أختلاف أراءنا وقناعتي بفرضية النقاب وأن صوت المرأة ليس عورة (مادامت لا تخضع بالقول)
لكن سعدت بنقاشك ونكتفي لحد كده
...

شمس النهار يقول...

*محدود الدخل
اناكمان سعيده بهذا الحوار جدا
واعتقد ان من مميزات التدوين التحاور فيما بينناوالوصول لفكر جديد واللي يعرف يدل اللي مايعرفش واللي عنده معلومه يقولها للباقي وتداول الاخبار فيما بيننا
لآن اعتقد ان مافيش حد عارف كل حاجه وفاهم كل حاجه
التواصل والتعارف والتشاور من الحاجات الجميله في التدوين

TAFATEFO يقول...

مع احترامي الشديد لهم اي طالب في جامعة الازهر حتي لو ساقط في مليون ماده هيهلهلهم ويطلعهم بزراميت

أنا خريج جامعة الأزهر .. وأحترم شيوخ كثيرين جداً من دعاة الفكر السلفي.

أنا بحب الشيخ محمد حسان والشيخ أبو إسحق .. لا أستمع لهم ولا أشاهد برامجهم إلاّ فيما ندر .. ولكني أحترمهم

قد أختلف مع الكثير من آراءهم .. أنا آسف مش أختلف .. أقصد لا أقتنع (لأني معنديش غلم فقهي يكفل لي الاختلاف مع ناس أفاضل وعلماء زي دول) .. لكني لا أنكر عليهم شئ .. رأيهم ومقتنعين بيه .. مقتنعين بفرضية النقاب .. هما حرين .. بيدعوا للانتقاب .. برضه هما حرين.

يا أستاذة شمس .. اللي يدعو لمظاهر .. يبقى سطحي .. بس هو حر
ميصحش نشتمه .. ولا نسفه رايه

شمس النهار يقول...

تافاتيفو
انا ماشتمتهمش وماسفهتهمش لوسفهتهم
ماكنتش قلت خاللو بالكم ده طريق التعصب والتشدد
وانا لما اخدت مثلين اخدت النقاب اولهم وده في ظاهره مظهر ولكن باطنه الرجوع بالمراه للخلف واننا نقعدها تاني في البيت ونحرمها من حقها في التعليم
وبعد كده يقولولي يجب الا تكشف المراه الا عند طبيبه
ونبي هجبها منين بعد حضرتك ما تقعدهملي كلهم في البيت بدعوا ان المراه كلها كده علي بعضها عوره
ونبي يادرش ماتفقعش مررتي
انا اصلا شيلاها بس كده هتطلع تاني

TAFATEFO يقول...

حد قال المرأه عوره :D .. حد يستجري يقول كده أصلاً؟

ومين قال ان الست تروح تكشف عند دكتوره .. من غير زعل أنا معرفش دكتوره عدله .. غير أنيسه الحفني ربنا يديلها الصحه (لو تعرفيها حضرتك)

حتة ان النقاب يؤخر المرأه دي معتقدش بصراحه .. أصل عمر المظاهر ما هتأثر .. ويا ستي ده حكمه مختلف فيه .. والراج انه فضل وليس فرض .. وعموماً هو حريه شخصيه.

أنا آسف لو كنت غلبتك وسلامة مرارة حضرتك .. بس لو متأكده انها هتطلع تاني .. أنا ممكن أغلبك شويه ونشوف :D

صباح الفل

شمس النهار يقول...

تافاتيفو
ونبي بلاش موضوع الحريه دي
لحسن بيجيب لي حساسيه
اديك شايف الدنيا هايصه عند نواره
عشان واحد حر اده لنفسه الحق يصور بنت بتتخانق
يعني فهم الحريه غلط
مع ان الحريه دي مسؤليه جامده قوي
ياعم السلفسسن الجدد همه اللي قالوا كده لازم الست تكشف عند دكتوره ست
اعطرد بقه

TAFATEFO يقول...

لازم أعطرد .. أنا أبويا دكتور نسا .. يسيب شغله يعني .. ولا يولد رجاله :D:D:D

آل دكتوره ست آل .. ده اللي فاضل :D

وبعدين موضوع الفيديو ده فهو تافه .. وان كان اللي صور مش غلطان .. ومفيش ما يمنع .. وبعدين هو المشكله انه صور بنت ؟؟ هو بيصور حدث .. التهديد باستغلال النفوذ .. في حاجه اسمها صور بنت ولا ولد ؟؟!! اللي صور مش غلطان
وإلا يبقى أي واحد يصور أي حاجه يبقى غلطان .. اللي يصور ظابط بيعتدي على مواطن يبقى غلطان .. مش من حقه .. واللي يصور مستشار بيهدد عسكري مرور وبيشتمه .. يبقى مش من حقه

لا يا أستاذه .. مختلف مع حضرتك .. اللي صور حر وحر ونص كمان .. ويا ريت كل الناس لما تلاقي حاجه زي كده تصورها .. تصور أي حد بيعتدي على الآخرين .. وأي حد بيبلطج أو بيستغل النفوذ

شمس النهار يقول...

طب ونبي يادرش
ايه اللي استفدناه من الموضوع ده
انت قرأت تعليقاتي هناك
حد سمع الكلام
سيبنا المشاكل اللي كنا بنتناقش فيها وتفرغنا لمسأل شخصيه
انا زعلانه من اللي بيحصل عند نواره
وكم الالفاظ اللي بيتقال
دي مش طريقه للمناقشه
فين بقه مسؤلية الحريه
انا زعلانه جدا

محدود الدخل يقول...

شمس ومصطفى نقاشكو مع بعض جميل
وأسمحولي أعلق على كام حاجة في السيع كده
...
أولا مصطفى
زمان الكبار قالو الكتاب بيبان من عنوانه
يعني المظهر عنوان للجوهر
وسلوكك بيدل على شخصيتك وتفكيرك وأسلوب حياتك
تفاصيل صغيرة في مظهر الفرد لو أتشافت صح بتقدر تفهم الشخص ده منها
فالنقاب مش مظهر بس النقاب أسلوب حياة
فدعاة النقاب لا يدعو لمظهر شكلي
لكن لأسلوب حياة
فميصحش أنك تقول الي بيدعو لمظهر هو سطحي ... لأن المظهر عنوان للجوهر
.

بالنسبه لأن المرأة عورة وصوتها وتكشف عند دكتور ولا دكتورة والكلام ده كلو
أنا سامع من مشايخ السلفية بنفسي ومنهم مباشرة
صوت المرأة ليس عورة شريطة عدم الخضوع بالقول ( المياصة والدلع والهزار والضحك ...الخ )
الكشف عند الدكاترة
برضو سامعها بنفسي من الشيخ محمد حسان
أذا كان في طبيبه مشهود لها بالكفاءة في التخصص الي الست محتاجة تكشف فيه
فلا يجوز انها تكشف عند طبيب رجل
لكن لو مفيش طبيبة مشهود ليها بالكفاءة ؟؟
الضرورات تبيح المحظورات وتكشف عند طبيب رجل ولا حرج عليها أن شاء الله والله أعلم

ومين قال أن الست تحرم من التعليم والكلام الفاضي ده
الخراب الي في منظومة التعليم والأختلاط والجواز العرفي وحالات الزنا وكل الهم ده مخلاش حد من مشايخ السلفية يفتي بحرمانية خروج المرأة لطلب العلم
سواء العلم الشرعي أو العلم الدنيوي

ياريت ما حدش يا خد كلام عن أي شيخ أو عن منهج الا من مصادره
ولو حابب ينقضه أو يعارضه
يدرسه ويرد عليه بأدلة وكلام علمي وشرعي
خصوصا العلم الشرعي
لأن مينفعش أتكلم في الفيزيا ولا الكيمياء بدون ما أكون دارس وقاري كويييييييييييييييييييس فالي هتكلم فيه

ومش لمجرد أن الشرع حكم بشيء مش قادرين عليه نقوم ننقضه وننكره وندور على الرأي الي يمشي مع الي نقدر نعمله
كمثل بسيط
أنا مقتنع أن اللحية سنة مؤكدة
ومع ذلك مش ملتحي
لكن هل بأنكر اللحيةوأنها سنة وبسقطها أجمالا ...طبعا لأ
وغيرها كتيييييييير
فالحق أحق أن يتبع
ومساء الفل
:):)

شمس النهار يقول...

محدود الدخل
شكرا علي تعليقك
بس واله انا واثقه من اللي بقوله
عايزين يقعدوا الستات في البيت
وفي نفس الوقت
يبقه في دكتوره
ربنا يهدي
مع ان السعوديه بتطلع دكتورات
بس السلفيين الجداد
مش عاجبهم
وكل سنه وانت طيب
انت جاوبت الامتحان والا لا

TAFATEFO يقول...

يمكن أقول كلام يزعل .. بس هحاول قدر الإمكان

أستاذي الفاضل .. المظهر عنوان للجوهر .. والجواب بيبان من عنوانه .. على عيني وراسي

مع كامل احترامي لحرية الشيوخ وغيرهم .. السلفيه وغيرهم .. في أن يدعوا إلى ما يقتنعون أن فيه المصلحه .. ولا أقول أني أعلم بالحلال والحرام من أي حد .. ولا أعلم بالأولى من أي حد.

لكن على قد فهمي .. في الوقت الذي سادت فيه مجتمعنا تراجع واضح في الأخلاق .. من استعمال ألفاظ خارجه جهراً أو سراً .. والكذب (عمال على بطال) .. والنميمه (طول الوقت وفواتير التيفونات والموبايلات تشهد) وغيرها من مظاهر التراجع الأخلاقي .. نجد في المقابل انتشار لمظاهر التدين زي الحجاب والنقاب مثلاً (وده خير ويا ريت) .. لكن ده شئ ظاهر لازم ننتبهله ونعرف أسبابه

ازاي بتنتشر أفعال دينيه مظهريه .. في نفس الوقت الذي تخبو فيه أخلاق دينيه ؟؟!!

معلش خليني أشرح اللي أقصده تاني

لو رجعنا تلاتين سنه لورا .. هنلاقي عدد أو نسبة الصلاة في المساجد .. نسبة المساجد لعدد السكان .. نسبة الحجاب .. نسبة النقاب .. وغيرها من تدين المظهر أقل كتييييييييييير من الآن (وده شئ كويس)
لكن اللي مش كويس اننا نلاقي في نفس الوقت .. نسبة الكذب والغش وعدم الأمانه والألفاظ الخارجه والسوقيه وغيرها من ما ينهى عنه الدين زمان أقل كثيراً جداً من دلوقتي

ده معناه ايه .. ان التدين المظهري بيزيد .. والتدين الجوهري (فقه المعاملات والأخلاق) بيقل.

دي ظاهره لازم تدرس .. ولازم نحطها في اعتبارنا .. وتختلف تماماً مع .. الجواب بيبان من عنوانه .. والمظهر عنوان المخبر

مش عايز أزود في معنى اللي أقصده علشان الكلام بعد كده هيزعل فعلاً

TAFATEFO يقول...

هي حاجه بسيطه صغيره كمان

في ظل نسبة الحجاب اللي موجوده في مصر .. هل ترى الأولى من الشيوخ وغيرهم .. الدعوه للحجاب (اللي منتشر وموجود ونسبه كبيره وكل حاجه والحمد لله وربنا يزيد ويبارك وكل اللي حضرتك عايزه) ولا الدعوه للأخلاق (اللي بتضمحل وتقل وتنتهي)

أنا برضه لا أقصد حجر على حريتهم في الدعوه .. ولا أسلوبهم .. ده قرارهم واختيارهم .. ولهم كامل الحريه .. وهما على عيني وراسي .. بحبهم وأجلهم واحترمهم وأقدرهم وكل حاجه والله

شمس النهار يقول...

مش عارفه يادرش
انت زي ابني
بس حاسه ان موضوع الحريه ده عملك حاجه
مش عارفه
انت ياعم حر
وان مالي

TAFATEFO يقول...

:D

محدود الدخل يقول...

شمس النهار مادمتي واثقة فخلاص هس بس يا محدود أقطع نفس :)
بس أنا برضو واثق أنك فهمتيها غلط ^ــ^
عموما مش هنختلف
وكل سنة وأنتي الى الله أقرب وأحب
...
مصطفى باشا
راجعلك بس ورايه مشوار ...مش هتأخر :)

شمس النهار يقول...

محدود الدخل
لا والله مااقصد يا ريس
انت تتكلم زي ما انت عاوز
وعلي رأي درش انت حر
ولا اسكت الله لك حس
وتنورني

عمرو يسرى يقول...

يا نهار هو من وقتها وهما بيحضروا للقناه ديه دا الموضوع مش من بعد الثوره بس بقى
تحياتى