الأربعاء، 24 ديسمبر، 2008

صباح الخير

وحشتوني طبعا جدا جدا
حبيت اسلم عليكم كده في الاوام اوام وبعدين نبقا نحكي علي كل حاجه لآن الرحله كانت جميله وشاقه وكمان كان في جوانب كوميديه كتير مع المرض كمان فافي حكاوي كتير
وطبعا دعيت لكم كلكم كنت كاتبه كل الاسماء بالدعوات المطلوبه في ورقه موصوله زي فرمنات زمان كده وكانت طبعا مسار الضحكات في عرفه لآن المدونين كان ليهم لوحدهم نص متر منها وصدقوني مانسيتش حد
عايزه اشكر بنوتي ضد التيار طبعا علي اللي عملته وكنا علي اتصال ببعض وبشكر كل اللي دخل عندها وسأل عليا وبقوله انا مانستش حد هناك ودعيتلكم كلكم وضد التيار كانت بتبلغني عن كل اللي سأل عليا او عايز دعوه خاصه
ويارب تكون الفته والرقاق كفاكم في العيد وبشكر المدونه اللي اخدت الصينيه عندها قبل ماتتحرق ولما ضد التيار قالت لي دعيتلها دعوه خاصه
وعقبالكم كلكم انكم تحجوا

هناك 101 من التعليقات:

رئيس جمهوريه نفسى يقول...

حج مبرور وذنب مغفور وتقبل اللة منا ومنكم صالح الاعمال ان شاء اللة
حمد لله على السلامة وعقبال العودة مرة اخرى للحج ان شاء اللة

mido يقول...

صباح النور يا شمس النهار

اللهم تقبل الحج والدعاء

مستنيين التفاصيل

~*§¦§ Appy §¦§*~ يقول...

حمد لله على سلامتك يا رب وحشتينا خالص
ربنا يتقبل منك يا حبيبتى يا رب

عمرو يقول...

الحمد لله على سلامتك يا شمس النهار و ربنا يتقبل منك اٍن شاء الله
سلامتك ألف سلامه عليكى و أنتى عامله أيه دلوقنى ؟ على الله تكونى أحسن
البلوجر كله مستنى يسمع حكاياتك عن الرحله بالتفصيل و شكرا كثيرا لدعواتك لنا و ربنا يستجيب يا رب

tarek momen يقول...

حمدا لله علي سلامة العودة
حج مبرور ان شاء الله
منتظرين التفاصيل
تحياتي

arsenalwy يقول...

اول زيارة ليا

جت فى وقت مناسب

حمد الله على سلامتك وحج مبرور

Foxology يقول...

اولا الف حمد الله ع السلامة وحج مبرور :)

ثانيا فى انتظار الحكاوى وشوقتينا :)

تحياتى :)

romansy يقول...

اشرقت الانوار


اهلا بيكى يا حاجه


حمد الله على سلامتك
بس ضد قالتلك على الطاقيه والسبحه
ولا نسيت

انا بقول اهو
حج مبرور وذنب مغفور

فركشاوي ..ناوي يقول...

السلام عليكم ورحمه الله وبركاته .
الف حمدا لله علي سلامتك ...ويارب حج مبرور وذنب مغفور عند رب شكور ...لك كل الود والله يا حاجه ...وحشتنا طبخاتك وكلماتك ...وعلي يكون كان لنا نصيب في دعواتك ....حمدا لله علي سلامتك ...ويارب عقبال العوده .

دعاء مواجهات يقول...

الف الف الف حمدلله على سلامتك

وبجد نورتى البلوج من تانى

ربنا يارب يتقبل كل دعوااتك

انا منتظرة تحليلك للموضوع عندى

بيس ياقمر

طالب ثانوى يقول...

حج مبرور وذنب مغفور وحشتينا جدا جدا منتظرين بقى كلامك عن الحج

خمسة فضفضة يقول...

السلام عليكم ورحمة الله وبركاته

حمد الله علي السامكه وحج مبرور وذنب مغفور يارب

والسنه الجايه نبقي كلنا صحبه هناك

مستنيين الحكايه بسرعه

سلام

شمس النهار يقول...

*رئيس جمهورية نفسي
ازيك
الله يسلمك وعقبالك يارب وماتخفش دعيتلك كتير جداوعملت اللي عليه ربنايوفقك يامتر

saragebaly يقول...

شموسة التدوين

الف حمدلله على السلامة

حج مبرور وذنب مغفور وسعي مشكور ان شاء الله

ربنا يتقبلها منك ان شاء الله

مبروك رجوعك بالسلامة

نورتي مدونتك والتدوين كله

شمس النهار يقول...

*ميدو
ازيك عقبالك يارب
وطبعا دعيتلك اخبار الامتحانات ايه
استرد صحتي بس شويه وهكتب تفاصيل الرحله
انا واخده عدوه جامده وكمان اتعلجت غلط فا الدنيا باظت تماما
فامابقدرش اقوم كتير

شمس النهار يقول...

*ابي
ازيك وحشتيني ووحشتني امثالك الجميله يارب كل دعوه دعيتهالك تستجاب انا لااذكي علي الله بس انت فعلا بنوته رائعه
عقبال ماتحجي انت كمان

شمس النهار يقول...

*عمرو
ازيك عامل ايه واخبار الارض ايه وشجراتي
عقبال ماتحج انت كمان وبشكرك انك سألت علي في السعوديه
كانت لفته جميله منك ياراجل ياطيب

شمس النهار يقول...

*طارق
الله يسلمك وعقبال ماتحج تاني انا دعيتهالك انك تحج تاني زي ماانت عايز
ربنا ينولهالك

شمس النهار يقول...

*ارسينالاوي
الاسم كده صح معلش انا مابكتبش الاسماء بالانجليش كسل يعني
الله يسلمك وعقبلك

شمس النهار يقول...

*فوكسولوجيا
ازيك والله يسلمك وعقبال ماتحج انت واينو وطبعا دعيتلكم بحاجات كتير جدا
من ضمنهايرزقكم بالزريه الصالحه والرزق الحلال وحاجات كتير

شمس النهار يقول...

*رومنسي
ازيك عامل ايه
وهو انا اقدر انساك
طبعا سبحتك عندي
ودعيتلك طبعا
وعقبال ماتحج يارب

شمس النهار يقول...

*فركشاوي ناوي
ازيك عامل ايه ربنا يخليك وعقبالك يارب لما تحج
بس تصدق دعيتلك كتير جدا ودعيت انك تشيل القرد من قصادي ماشيلتوش ليه اي طفل هيولد من مدونه حامل الان يطلع شبه القرد هيكون مسؤليتك انت الشخصيه
يارب فركشاوي ناوي يشيل القرد

شمس النهار يقول...

*دعاء مواجهات
عقبالك يارب لما تحجي يادودو بس حجي وانت صغيره عشان دي رحله عايزه صحه جامده قوي
ولما استرد صحتي شويه هرجع اعلق علي موضوعك الخطير والجميل عشان هو عايز رواقه شويه مش اي مود

شمس النهار يقول...

*طالب ثانوي
ازيك ياروقه تصدق وحشتني جدا ودعيتلك كتير انك تنجح وتدخل الكليه اللي انت عايزها بس لازم تعمل اللي عليك وماتكسفنيش
كل سنه وانت طيب

شمس النهار يقول...

*خمسه فضفضه
ازيك وعقبالك يارب لما تحجي
وشكرا علي سؤالك عليا
وربنا يكرمك

شمس النهار يقول...

*ساره جبالي
انت اللي منوراني ازيك عامله ايه
عقبالك لما تحجي يارب
وشكرا ليكي

kemet يقول...

السلام عليكم ورحمة الله وبركاته

حمد ع السلامه وحج مقبول ان شاء الله
اللهم تقبل

تحياتي
الي اللقاء

شمس النهار يقول...

*كيمت
ازيك وعقبالك يارب

أحــوال الهـوي يقول...

حمد الله علي السلامة
و حج مبرور و ذنب مغفور باذن الله
ثبتك الله علي طاعته

حقيقي و حشتينا بطيبتك و صلاح قلبك

تحياتي

مـجـنـووون يقول...

حمدالله علي السلامه

وربنا يتقبل منك الحج ويجعله في ميزان حسناتك


تقبلي مروري
مجنووون

شمس النهار يقول...

*احوال الهوي
الله يبارك فيك وعقبالك ان شاء الله تحج تاني
وشكرا علي المجامله اللطيفه

شمس النهار يقول...

*مجنون
الله يسلمك وعقبالك لما تحج بس حج وانت صغير عشان الموضوع محتاج صحه

موناليزا يقول...

حمدالله على سلامتك
و حج مبرور وذنب مغفور
وعقبالنا يارب

ABOALI يقول...

هل الحجيج بالخيرات
على وجههم نور السموات
فهنيئا" لمن كان هناك
و رأى البركة والرحمات
ويااااااااااااااارب
لا تحرمنا مثلهم
من هذه النفحات


حمدا" على السلامة يااااااااااا
حااااااااااااااجة شموسه
وانت اليوم وليد
يقوووووووووووووول
وووووووووووووووووووووووووواء
وووووووووووووووووووووووووووواء
فاحذرى
عالم
ال واق واق
ولالالالالالالالالالالالالالالالالالالالاايه

تحياتى

fashkool يقول...

الدنيا شته بس النهارده الشمس طالعه وسط السما ومنوره الدنيا
الحمد لله على سلامتك يا حاجه وياريت ما تكونيش نسيتى فشكول بالذات عشان اصل فشكول بيتوه من اى حد حتى من نفسه .. كل سنه وانت طيبه وعقبال 7 حجات

ضد التيار يقول...

شموسه حمدلله على السلامه

نورتى البلوجر بعد طول غياب

حج مبرور وذنب مغفور

و ان شاء الله تكونى بخير و تبقى معانا دايما

منتظرة الحكايات بقى

بوسه كبييييييييييييييرة ليكى

TeVa يقول...

اسمي موجود عندكم ؟؟

اوعي اكون اتنسيت
ازعل قوي :))

حمد لله على السلامة

وحج مبرور وذنب مغفور إن شاء الله

تحيتي ,,,

حاسوباتيه يقول...

حمد الله على السلامه ويارب حج مبرور وذنب مغفور وعقبالنا كلنا يارب وحمد الله على سلامتك
واحشتينا خالص

smilyrose يقول...

حمدلله على سلامتك يا حبيبة قلب ورد

وشمس نهار كل المدونين

يارب تكونى بالف خير وصحه

وحجة مبرورة وذنب مغفور

ويارب نجمع كلنا فى زيارة الحبيب

وحشتينا قوى

smilyrose

روح الحب الصادق

ماما أمولة يقول...

ازيك يا شموسة

الف حمد الله على السلامة حبيبتي

حج مبرور وذنب مغفور بإذن الله تعالى

ربنا يتقبل منك يارب

بجد وحشتيني وافتقدت اخت غالية

في انتظار كل حكاياتك بالتفصيل

دمتي بكل خير وحب

اختك امولة

من غير عنـــوان يقول...

نورك يا ست الكل نور حينا

تقبل الله وجعله حجا مبرورا وذنبا مغفورا يا حاجه

بجد بجد... مفتقيدين مدونتك و تعليقاتك



أمنياتي

prince4ever يقول...

حمد الله عالسلااااااااامه
و حج مبرور و متقبل ان شاء الله
و ليكي وحشه والله
و يارب تكوني افتكرتينا كده
حمد الله عالسلامه كمان مره
يا حاجه

أ / أحمد عبد المنعم يقول...

بسم الله الرحمن الرحيم
حمدا لله على سلامتك
وتقبل الله منك عبادتك
وجزاك الله خيرا على دعائك لنا
لا شك أن للحج ذكريات لا تنسى أبدا
تلك اللحظات الإيمانية السامية
لحظة الإيمان المطلق استسلام الجوارح والعقول والقلوب لله
قمة الصفاء الإيمانى
استشراف معانى الإيمان الفطرية الخالدة
ذكريات آدم وحواء
إبراهيم و هاجر و إسماعيل
هاجر و إسماعيل
إبراهيم و إسماعيل
محمد صلى الله عليه وسلم وكلماته الأخيرة
وداعه لأمته
فالحج لقاء و وداع
ستظل الذكريات عالقة فى ذهنك
وستتوقد شوقا وجوى فى مثل تلك الأيام من كل عام

مفكر يقول...

السلام عليكم::

حج مبرور وذنب مغفور إن شاء الله،،

حمد لله على السلامة،،،الحمد لله إنك افتكرتيني وربنا يستجيب دعائك،،،

جميل البيت الحرام مش كدة

وحلوة القعدة فيه وقراءة القرآن ومية زمزم،،،بس أكيد كان زحمة جداً

يا شمس النهار،،اعتذر ليكي مقدماً إن لم اكن في زياراتي منتظماً لأني بجاهد إني ألم المنهج،،،

مستني حكاية الرحلة،،،بس تبقى توصفي إحساسك في كل موقف من المواقف،،أدخلي جوة نفسك،،،أوك يا طنت شمس،،

ربنا يكتبهلنا بإذن الله

في رعاية الله

شمس النهار يقول...

*موناليزا
شكرا وعقبالك لما تحجي يارب

شمس النهار يقول...

*ابوعلي
الله يسلمك وشكرا علي الكلام اللطيف
وعقبال ماتحج ان شاء الله
وطبعا دعيتلك

شمس النهار يقول...

*فاشكول
الله يسلمك وعقبال ماتحج ان شاء الله
طبعا دعيتلك ولولدتك زي ماطلبت تمام
انا مابنساش الدعوات

شمس النهار يقول...

*ضد التيار
الله يسلمك ومش عارفه اشكرك ازاي علي اللي عملتيه
لما دخلت عندك وشوفت اخباري وتواصل الناس معاكي حسيت قد ايه وانا عارفه طبعا انك كده بس فعلا حسيت قد ايه انت بنوته جميله

شمس النهار يقول...

*تيفا
ازيك الله يسلمك
مادعيلكش ازاي انا اصلا كتبتك في الورقه وكمان ضد التيار قالت لي انك عايزني ادعيلك في التليفون
يعني ياعم دعوه اسبشيل
ربنا يستجيب لدعائي ليك
عقبالك لما تحج انت كمان

شمس النهار يقول...

8حسوباتيه
الله يسلمك وعقبالك لما تحجي
وانتم كمان وحشتوني
جدا

شمس النهار يقول...

*سميلي روز
الله يسلمك وانتم كمان وحشتوني
وكنت بدعيلكم من قلبي
وشكرا علي الكلام الجميل
عقبال ماتحجي يارب

شمس النهار يقول...

*ماما اموله
الله يسلمك
وعقبال ماتحجي وتشوفي جمال وجلال ان الانسان يطيع ربه ويعمل مناسك للطاعه والحب
ان شاء الله بس ارتاح شويه عشان انا راجع تعبانه جدا وهحكي علي كل حاجه بالتفصيل

شمس النهار يقول...

*من غير عنوان
شكرا علي المجامله اللطيفه وعقبال ماتحج
ومانسيتش ادعيلك طبعا ودعيتلك للبنات كمان
ربنا يستجيب لي

شمس النهار يقول...

*برينس فور ايفر
الله يسلمك وعقبالك وانتم كمان وحشتوني
وصدقني دعيتلكم كلكم مانسيتش حد
واللي طلب دعوه معينه دعيتهاله

شمس النهار يقول...

*أ/احمد عبد المنعم
الله يسلمك وعقبال ماتحج ان شاء الله
وشكرا علي المجامله اللطيفه

شمس النهار يقول...

8مفكر
ازيك وحشتني فعلا
طبعا مانسيتكش ولما ضد التيار قالت لي في التليفون قلتلها دعيتله طبعا
بس انت لم المنهج واعمل اللي عليك
وماتكسفنيش لحسن انا دعيتلك بحاجات كتير من ضمنها انك تنجح

Eno يقول...

الف حمد الله علي السلامه

رجعتي نورتي مدونتك من تاني
احنا مستنينك عشان تحكلنا بأه

ربنا يكرمك متشكره اوي علي الدعوات ربنا يتقبلها منك اللهم امين :)

تحياتي لحضرتك وحمد الله علي السلامه مره كمان :)

شمس النهار يقول...

*اينو
الله يسلمك وعقبالك ان شاء الله تحجي انت وفوكس
وشكرا علي كلامك اللطيف
وفعلا انتم وحشتوني

أحمد سعيد بسيوني يقول...

حمداً لله على سلامة العودة

حج مبرور وذنب مغفور ان شاء الله

بالانتظااااااااااار

شمس النهار يقول...

*احمد سعيد بسيوني
الله يسلمك وعقبالك لما تحج ان شاء الله

norahaty يقول...

السلام عليكم ورحمة
الله تعالى وبركاته
الف مليون حمدلله على السلامة وحج مبرور وذنب مغفور يارب وتسلمك ايديكى وعنيكى ومتشكريين على الدعوات الطيبة ولو سألت على صينية الرقاق فهى فى الحفظ والصون (فى بطننا طبعاً)امال يعنى حنخليها للحين طول المدة دى؟انما بقى حتة صينية معتبرة!!!:)
حمدلله على السلامة مرة تانية وتالتة والف مرة كمان وكمان.
وعقبالنا ياااااااااارب

شمس النهار يقول...

**نور
الله يسلمك وعقبالك يارب لما تحجي
والف هنا وشفا بس المهم انها تكون عجبتك مش كفايه انقذتيها من الحرق
شكرا لك

مولان يقول...

وحشتيييييييييييييييييييني ياشموستي وكنت دايما بطمن عليكي من ضد ياضد حبيبتي

طمنيني التعب عامل معاكب ايه والرحله اخبارها ايه

شمس النهار يقول...

**مولان حبيبتي
ازيك وحشتيني جدا والله يسلمك
اديني بتحسن الحمد لله وقاعده في السرير وده ضد طبيعتي طبعا ساعات اقوم اعكرت كده اتعب احترم نفسي وارجع السرير
وطبعا الدكتور مانع الزياره عشان العدوه يعني سجن حربي
بس الحمد لله انا اتحسنت كتير جدا
والمفروض ان الحزر هيتفك يوم الجمعه
واشوف الناس بس اخرج دي لسه شويه

مولان يقول...

ربنا يطمني عليكي ياشمس حياتي

مش تغيبي عني بقي كتير لازحل منك واخمصك خالص

امممممممممممممممموه بوسه كبيره لمامتي حبيبتي

طوبة ذهب وطوبة فضة يقول...
أزال أحد مشرفي المدونة هذا التعليق.
الحرامي يقول...

بيا ن رقم 1
بيان تأسيس العصابة
يشرفني انا الاستاذ / حرامي لص نشال

ان اعلن لكم عن تأسيس اول عصابة لسرقة المدونين

واحب اعرفكم اني خلاص بقي عندي عصابتي
واسلحتي ومفاتيحي وطفاشتي واعلن لكم جميعا عن ميثاق الشرف لتأسيس هذه العصابه

ويتضمن المواد الدستوريه التالية
1- ان لا يتم سرقة الا ما هو نفيس وغالي وعلي المدونين اللي أي كلام انهم يتطمنوا لاني مش هقرب ناحيتهم
اما المدونين المتميزين فيعرفو اني هسرقهم هسرقهم
2- اي عملية سرقة او سطو مسلح لن تتم الا بعد التهديد والوعيد يعني هبعت رساله للزبون اقوله اني نويت اسرقه
3- يتم ترك بصمات(تعليق ) علي كل مدونه تمت سرقتها عشان تعرف انها اتسرقت


4- يتم عمل نقطة بوليس (عندي في المدونه ) لتلقي البلاغات والشكاوي والتعليقات

5- لن يتم نشر اي موضوع الا اذا كان مسرووووق يعني انا مش هكتب حاجه من عندي

6- ان جيت في يوم واتقفشت فسوف اعلن توبتي وابطل سرقه واحل العصابه
وعشان تقفشني لازم تعرف اسم المدونة الاصليه بتاعتي اللي هيه مش سرقه يعني
- يتم نشر هذا البيان علي اكبر عدد ممكن من المدونات للعلم فقط
اعلانات مبوبه
اعلان لكل الجرايد الرسميه والغير رسميه
مطلوب مساعدين لحرامي.... علي ان يكونوا خبره لا تقل عن عام في السرقه والنصب والتدوين وعلي من يرغب في التقدم للوظيفه ارسال cv وصورتين او تعليقين
امضاء
الحرامي الكبير

mohamed ghalia يقول...

حمدا على السلامة ياحجة شموسة
دعواتك بقى عشان الإمتحنات
أشوفك على خير
فى حفظ الله

Soul.o0o.Whisper يقول...

رغم انى مش أعرف حضرتك قبل ما تروحى الحج

بس عرفتك من لكام ضدالتيار ..



ربنا يجعلها كدا واصلة خير :)



حج مبرور و ذنب مغفور و سعى مشكور
و تجارة لن تبور إن شاء الله

و حمدلله على سلامة حضرتك

و فى انتظار يوميات حضرتك هناك :)

خالص تحياتى

الازهرى يقول...

الحاجة شمس النهار

الف حمد لله على سلامتك الغالية
وتقبل الله منك العمل الصالح واثابك عليه كل خير
وكتب لك الرجوع ثانية وثالثة
واعاننا الله على ان نكون جميعا هناك

ده اول تعليق لا حد على الاطلاق فى يوم اجازتى

اسألك الدعاء ثانية

تحياتى وخالص مودتى

من غير عنـــوان يقول...

ربنا يخليكي.. وتفرحي ببناتك وعيالهم
ويبارك لك ولهم

وربنا يتقبل إن شاء الله

أمنياتي

tamer.sala7 يقول...

حمد الله علي السلامة وربنا يتقبل ويكتبها لكل اللي بيتمنها

بجد سرك باتع والدعوة شكلها اتقبلت
الحمد لله

ربنا يكرمك يا رب ويجعله في ميزان حسناتك

فارس القمر يقول...

الحمد لله على سلامتك
حج مبرور وذنب معفور وربنا يتقبل منك صالح الاعمال يارب

ادعيلى اتجوز بقى

ههههههههههههههههههه

سبهللة يقول...

الف حمد لله على سلامتك
تقبل الله منك
وجعل الجنة دارك والرسول جارك

شمس النهار يقول...

*مولان
الله يخليكي
ومستنياكي مع ضد ومحاسن

شمس النهار يقول...

*طوبه دهب وطوبه فضه
الله يسلمك وحاضر هدعي من عينيه

شمس النهار يقول...

*الحرامي
ماشي ياسيدي
حصلنا الرعب والتوتر
هدور لك علي معاونين من عينيه

شمس النهار يقول...

*محمد غاليه
الله يسلمك عقبالك
ودعيلتكم كتير يافريق الامتحانات
كنت كاتبه اساميكم بالسنه الدراسيه اللي حاطينها في البروفيل واللي كنت اعرف اسمه دعيتله بالاسم واللي مااعرفش دعيتله بأسم المدونه وهو وحظه
ركز انت في المذاكره وربنا يوفقك انت وكل اللي زيك

شمس النهار يقول...

**صول او او ويسبر
الاسم كده صح والا غلط معلش كسل مني مابكتبش الاسامي بالانجليش
الله سلمك وعقبالك الحج ده شئ جميل جدا الانسان بيروح رحله كلها طاعه ماينفعش يقول ده اه وده لا ربنا يكتبها للمسلمين كلهم

شمس النهار يقول...

*الازهري
الله يسلمك وعقبالك
ازيك عامل ايه واخبار المذاكره ايه
انا دعيتلكم ما تكسفونيش وانجحوا كلكم كده مره واحده
ربنا معاكم ويوفقكم جميعا طالبي وطالبات المدونات

شمس النهار يقول...

*من غير عنوان
الشكر ليك وشكرا لمجاملة حضرتك
علي فكره موضوع التليفون ده عجبني جدا

شمس النهار يقول...

8تامر صلاح
الله يسلمك وعقبالك لما تحج
اوعي تغيب تاني بقه لااطلع شيخه اونطه ومستنيه البوست الجديد
اللي هيكسر الدنيا
بس ونبي مش علي دمغانا

شمس النهار يقول...

*فارس القمر
الله يسلمك وعقبالك يارب
انا دعيتلك بس انت ماقلتليش انك عايز دعوه خاصه بالزواج
بس حاضر هدعيلك وانا لسه حاجه طاظا ونعتبره ملحق دعاوي

شمس النهار يقول...

*سبهلله
الله يسلمك وعقبالك يارب
وترجعي كمان لمدونتك بالسلامه

princess يقول...

حمد الله على السلامة ولو انها متاخرة كتير
حج مقبول ان شاء الله:)

fashkool يقول...

التعليق الـ 86 طبعا الحاجه شمس مش حتشوفه ..

الله يبارك فيك يا حاجه وحمدا لله على سلامتك وعودتك من الاراضى الحجازيه وحج مبرور وذنب مغفور ان شاء الله .. تحياتى

شمس النهار يقول...

*برنسيس
الله يسلمك وعقبالك

شمس النهار يقول...

*فشكول
الله يسلمك عقبالك
الحمد لله انا دايما بشوف كل اللي بيعلق عندي حتي لو بوست سابق عشان بحس ان زي هو ماشرفني بالزياره هو له حق التعقيب

mero-moory يقول...

السلام عليكم و رحمة الله و بركاته

برغم انها اول زيارة ليا هنا بس بكد بكد مبسوطة أوووووي ان اول زياره تكون تهنئة بأجمل شعائر ربنا يكتبهالنا يارب
حج مبرور وذنب مغفور وربنا يتقبل منكم دوما صالح اعمالكم

في رعايه الله

son's egypt يقول...

السلام عليكم
تقبل الله منا ومنك
وانا شاء الله يكون حج مبرور

من غير عنـــوان يقول...

طب وبعدين ... مش نكتب بأه ولا إيه

شمس النهار يقول...

*ميرو موري
الاسم كده صح
اهلا في اول زياره
وعقبالك ان شاء الله

شمس النهار يقول...

ابن مصر
ازيك
الله يسلمك وعقبالك ان شاء الله

شمس النهار يقول...

*من غير عنوان
حاضر هنكتب والله
بس الصحه ماكنتش حلوه وده موضوع عايز تركيز
وكمان حبيت ادخل مدونات بحبها اشوف ايه اللي اتكتب وانا مش موجوده واعلق كمان

صحفية روشة يقول...

اول زيارة ومش اخر زيارة

SeSaMe يقول...

حمد الله على السلامة .. و ربنا يتقبل منك إن شاء الله

شمس النهار يقول...

*صحفيه روشه
اهلا بيكي
وزوري زي ماانت عايزه

شمس النهار يقول...

*سيسم
ازيك والله يسلمك وعقبالك يارب
لما تحج وصدقني راسك هتبقا واحده:)
خف غضبك من موضوع غزه شويه فنحن لانملك الا الدعاء
والحسره

طوبة ذهب وطوبة فضة يقول...

على العموم انا بس كنت عايزه اقولك حمد لله على السلامه نورتى مصر ياقمر وادعيلنا بقى هنا مدام ما لحقناش الدعاء هناك وربنا يتقبل منك حج مبرور باذن الله

شمس النهار يقول...

*طوبه فضه وطوبه دهب
انا بشكرك لتفهمك ليه انا مسحت التعليق
انت نفسك لو شفتي الغلطه كنتي مسحتيها
ماتزعليش بقه
وهستني زيارتك علي طول
اصحاب؟؟

Teawater يقول...

انا عارفه
اكيييييييييييييييييييييد زعلانه مني
بس والله انا اسفه على تاخيري
وحمد لله على السلامه يا ماما شموسه
حجا مبرورا وذنبا مغفورا